Nehemiah -4 -

နေဟမိမှတ်စာ - ၄

ဆီးတားမှုကိုအောင်မြင်ခြင်း

1ထိုသို့ ငါတို့သည် မြို့ရိုးတည်ကြောင်းကို၊ သမ္ဘာလတ်သည် သတင်းကြားသောအခါ၊ အလွန်ဒေါသအမျက်ထွက်၍၊ ယုဒလူတို့ကို ပြက်ရယ်ပြုလျက်၊ 2အားမရှိသော ထိုယုဒလူတို့သည် အဘယ်သို့ ပြုကြမည်နည်း။ ကိုယ်ကို ခိုင်ခံ့စေမည်လော။ ယဇ်ပူဇော်မည်လော။ တစ်နေ့ချင်းတွင် လက်စသတ်မည်လော။ ကျွမ်းလောင်သော ကျောက်တို့ကို အမှိုက်ပုံများထဲကထုတ်၍ ပြုပြင်မည်လောဟု မိမိအမျိုးသားချင်း၊ ရှမာရိ တပ်သားရှေ့မှာ ပြောဆို၏။ 3သူ့အနားမှာရှိသော အမ္မုန်အမျိုးသား တောဘိကလည်း၊ သူတို့တည်သော ကျောက်ရိုးကို တောခွေးထိခိုက်လျှင် ပြိုလဲလိမ့်မည်ဟု ပြန်ပြော၏။ 4အို အကျွန်ုပ်တို့ ဘုရားသခင်၊ နားထောင်တော်မူပါ။ အကျွန်ုပ်တို့သည် မထီမဲ့မြင်ပြုခြင်းကို ခံရပါ၏။ သူတို့ကဲ့ရဲ့သောစကားသည်၊ သူတို့ခေါင်းပေါ်သို့ ပြန်ရောက်ပါစေသော။ သိမ်းသွားခြင်းကို ခံရာပြည်၌ လုယက်ခြင်းကို ခံရကြပါစေသော။ 5သူတို့ပြုသော ဒုစရိုက်ကို ဖုံးအုပ်တော်မမူပါနှင့်။ ရှေ့တော်၌ သူတို့အပြစ် မပြေပါစေနှင့်။ မြို့ရိုးကိုတည်သော သူတို့၏စိတ်ကို နာစေခြင်းငှာ၊ ပြောတတ်ကြပါသည်တကား။ 6သို့ရာတွင် ငါတို့သည် မြို့ရိုးကိုတည်ကြ၏။ တည်လုပ်သော သူတို့သည် စေတနာကြီးသောကြောင့်၊ မြို့ပတ်လည် မြို့ရိုးအမြင့် တစ်ဝက်တိုင်အောင် ပြီးလေ၏။

7ယေရုရှလင်မြို့ရိုးမြင့်၍ ပြိုပျက်ရာတို့ကို ပြင်စပြုကြသည်ဟု သမ္ဘာလတ်နှင့် တောဘိအစရှိသော အာရပ်လူ၊ အမ္မုန်လူ၊ အာဇုတ်လူတို့သည် ကြားသောအခါ၊ အလွန်ဒေါသစိတ်ရှိသဖြင့်၊ 8ယေရုရှလင်မြို့ကို စစ်ချီ၍တိုက်မည်။ ထိုအမှုကို ဖျက်မည်ဟု တညီတညွတ်တည်း တိုင်ပင်ကြ၏။ 9သို့ရာတွင် ငါတို့သည် ငါတို့၏ဘုရားသခင်ကို ဆုတောင်း၍၊ ရန်သူကြောင့် နေ့ညမပြတ် ကင်းစောင့်ထားကြ၏။ 10ယုဒလူအချို့ကလည်း၊ ဝန်ထမ်းသော သူတို့သည် အားကုန်ကြပြီ။ အမှိုက်များလှ၏။ မြို့ရိုးပြီးစီးအောင် မတတ်နိုင်ကြဟု ဆိုကြ၏။ 11ရန်သူတို့ကလည်း၊ သူတို့သည် အမှတ်တမဲ့၊ သတိမရှိဘဲနေစဉ်တွင်၊ ငါတို့သည် သူတို့အထဲသို့ဝင်၍ လုပ်ကြံသဖြင့်၊ ထိုအလုပ်ကို ဖျက်မည်ဟု ဆိုကြ၏။ 12သူတို့အနားမှာနေသော ယုဒလူတို့သည်လည်း၊ လာ၍ ရန်သူတို့သည် နေရာအရပ်ရပ်တို့က၊ သင်တို့ကို တိုက်လာကြလိမ့်မည်ဟု ငါတို့အား အထပ်ထပ်ဆိုကြ၏။ 13ထိုကြောင့် မြို့ရိုးနောက်၊ နိမ့်သောအရပ်၊ ရှင်းလင်းသော အရပ်တို့၌ ဓား၊ လှံ၊ လေးလက်နက်ပါသော လူများကို အဆွေအမျိုးအလိုက် ငါခန့်ထား၏။ 14ထိုအမှုအလုံးစုံတို့ကို ကြည့်ရှုစီရင်ပြီးမှ မှူးမတ်၊ မင်းအရာရှိ၊ ကြွင်းသောသူတို့အား ခေါ်၍၊ ရန်သူတို့ကို မကြောက်ကြနှင့်။ ကြီးမြတ်၍ ကြောက်မက်ဖွယ် ဖြစ်တော်မူသော ထာဝရဘုရားကို အောက်မေ့ကြလော့။ ညီအစ်ကို သားမယားအိမ်ရာအဖို့ တိုက်ကြလော့ဟု ဆို၏။ 15ထိုသို့ငါတို့သည် သတိရ၍၊ ရန်သူအကြံကို ဘုရားသခင် ဖျက်ဆီးတော်မူကြောင်းကို သူတို့ကြားသိသောအခါ၊ ငါတို့ရှိသမျှသည် အသီးအသီး လုပ်ရာအရပ် မြို့ရိုးသို့ပြန်လုပ်ကြ၏။ 16နောက်မှ ငါ့ကျွန်တစ်ဝက်သည် အလုပ်လုပ်ကြ၏။ တစ်ဝက်သည် လှံ၊ ဒိုင်း၊ လေး၊ သံချပ်တို့ကို ကိုင်ကြ၏။ မင်းတို့သည် ယုဒအမျိုးသားများနောက်မှာ နေကြ၏။ 17မြို့ရိုးတည်သောသူ၊ ဝန်ထမ်းသောသူ၊ ဝန်ကိုတင်သောသူ အပေါင်းတို့သည် လက်တစ်ဖက်နှင့် လုပ်ကြ၏။ လက်တစ်ဖက်နှင့် လက်နက်ကိုကိုင်ကြ၏။ 18တည်လုပ်သော သူအပေါင်းတို့သည်၊ ခါး၌ ဓားဆွဲလျက် တည်လုပ်ကြ၏။ တံပိုးမှုတ်သောသူသည် ငါ့အနားမှာ ရပ်နေ၏။ 19ငါကလည်း၊ အလုပ်သည် ကြီးကျယ်လှ၏။ မြို့ရိုးပေါ်မှာ တစ်ယောက်တခြားစီ သူနှင့်ငါ ဝေးဝေးလုပ်ရ၏။ 20သို့ဖြစ်၍၊ တံပိုးမှုတ်သံကို ကြားလေရာရာအရပ်မှ၊ ငါတို့ထံသို့ စည်းဝေးကြ။ ငါတို့၏ ဘုရားသခင်သည် ငါတို့ဘက်၌ စစ်ကူတော်မူမည်ဟု မှူးမတ်၊ မင်းအရာရှိ၊ ကြွင်းသောသူတို့အား ငါဆို၏။ 21ထိုသို့ ငါတို့သည် အလုပ်လုပ်ကြ၏။ လူတစ်ဝက်သည် မိုးလင်းသည်မှစ၍ ကြယ်ပေါ်သည်တိုင်အောင်၊ လှံလက်နက်တို့ကို ကိုင်ကြ၏။ 22ထိုအခါ၌လည်း၊ ငါက လူတိုင်း မိမိကျွန်နှင့်တကွ ညအချိန်တွင်၊ ယေရုရှလင်မြို့ထဲမှာ အိပ်စေ။ သို့ပြုလျှင်၊ ကျွန်တို့သည် နေ့အခါ အလုပ်လုပ်လျက်၊ ညအခါ အလှည့်လှည့်စောင့်လျက် ရှိကြလိမ့်မည်ဟု လူများတို့အားဆို၏။ 23ထိုသို့ ငါနှင့်ငါ့ညီ၊ ငါ့ကျွန်၊ ငါ့နောက်၌လိုက်သော တပ်သားတို့သည်၊ ကိုယ်အဝတ်ကို မချွတ်ဘဲ နေရကြ၏။

နေဟမိမှတ်စာ - ၄ (အနက်ဖွင့်)

၃။ ပြင်ပအခက်အခဲများနှင့် အထူးသတိပေးချက် (အခန်း ၄)

၄:၁–၆ အထက်ကျမ်းပိုဒ်တွင် ဆိုခဲ့သည့်အတိုင်း သမ္ဘာလတ်နှင့် တောဘိတို့က မြို့ရိုးဆောက်လုပ်ခြင်း ကို ပြက်ယယ်ပြုသည်။ ခါချဉ်ကောင်က မည်သို့ တောင်ဖြိုနိုင်မည်နည်း၊ ထိုမြို့ရိုးသည် ခွေးအများ တိုက်မိလျှင် ပြိုလဲကုန်မှာဘဲ” ဟုသရော်ကြသည်။ သို့သော်နေဟမိသည် မီးကို မီးခြင်း၊ ရန်ကိုရန်ခြင်းမတုန့်ပြန်။ ဆုတောင်းခြင်းဖြင့် တုန့်ပြန်သည်။အလုပ်ဖြင့် သက်သေပြသည်။ အပိုဒ်ငယ် ၄နှင့်၅သည် ခေတ်ကာလ အခြေအနေအရ လိုအပ်ချက်ဖြစ်ကောင်း ဖြစ်မည်။ ယနေ့ ကျေးဇူးတော်ကာလ၌ မသုံးသင့် (ရော ၁၂:၃-၂၁)။ သို့ဖြင့် တနေ့တလံ ပုဂံ ဘယ်ရွေ့မည်လဲ ဆောက်လုပ်ကြရာ မြို့ရိုးအမြင့် ရည်မှန်းချက်တဝက်တိုင်အောင် ပြီးစီးနေကြသည်။

၄:၇–၁၄ ထိုကာလတွင် ပြင်ပရန်သူ အာရပ်၊ အမ္ဗုန်နှင့် အရှိဒေါရန်သူများကိုသာ ကြောက်ရသည်မဟုတ်။ သစ္စာဖောက်ပုဆိန်ရိုးအတွင်း ရန်သူယုဒလူ တချို့ရှိနေသည်။ မြို့ရိုးဆောက်လုပ်သော ပြည်သူပြည်သားများသည်လည်း ပင်ပန်းနေကြပြီ (ငယ် ၁၀)။ ထိုအခွင့်အကောင်းကို ယူ၍ဝင်ရောက် ဖျက်သိမ်းဖို့ ဟန်ရေးငယ်တပြင်ပြင် စောင့်ကြည့်နေသူများလည်းရှိသည်။ နေဟမိသည် ထိုရန်သူများ လာရောက်တိုက်ခိုက်ပါက ချက်ချင်းတန်ပြန်တိုက်ခိုက်မည့် စစ်သားများ အဆင်သင့်ပြင်ဆင်ထားသည်။ အလုပ်သမားများကိုလည်း အနီးအနားတွင် လက်နက်ကိုယ်စီချထားခိုင်း၍ အရေးကြုံလျှင် သက်လုံကောင်းဖို့ ပြည်သူ့စစ်နည်း ဗျူဟာစီစဉ်ထားသည်။ “ဘုရားသခင်နှင့် မိမိလူမျိုးများအတွက် တိုက်ကြစို့“ ဟု သတ္တိသွေးထိုးထားသည်။

၄:၁၅–၂၃ အဖျက်အမှောက်သမား ရန်သူများသည် ပျောက်ခြင်းမလှ၊ ကြက်ပျောက်ငှက်ပျောက် ပျောက်ကုန်သည်။ ထိုအချိန်မှစ၍ စိတ်ချလက်ချ အလုပ်လုပ်နိုင်ကြသည်။ သို့သော် သတိဟူသည် ပိုသည်မရှိ။ တဝက်လုပ်တဝက်စောင့် စနစ်ကျင့်သုံးသည်။ လက်နက်ကရိယာများ ကိုယ်နှင့်မကွာ အသင့်ဆောင်ထားကြသည်။ မြို့ရိုးတလျှောက်နေရာ ပြန့်ကြဲလွန်းသဖြင့် ရန်သူချဉ်းကပ်လာကြောင်း တပ်လှန့်နိုင်ရန် တံပိုးမှုတ်သမားများ အနားတွင်ခေါ်ထားသည်။ အလုပ်တွင်ကျယ်စေရန် ပြင်ပမှ ရောက်လာသော သူများအား မြို့ထဲတွင် သိပ်ထားသည်။ ရန်သူ၏ အလစ်အငိုက်တိုက်ခိုက်မှု မခံရလေအောင် တဝက်အိပ်တဝက်စောင့် ကျင့်သုံးသည်။ နေဟမိ၏ မဟာဗျူဟာမှာ ဆုတောင်းခြင်း၊ ကင်းစောင့်ခြင်း၊ လုပ်ဆောင်ခြင်းဖြစ်သည်။ ပြည်သူများသည်လည်း နေဟမိ၏ ခေါင်းဆောင်မှု အရည်အချင်းကို ယုံကြည်အားထားကြသည်။ ဆွေမျိုးသားချင်း၊ ကျွန်များနှင့် ပါရှန်းစစ်တပ်များကလည်း သစ္စာရှိရှိ ပံ့ပိုးကူညီလုပ်ဆောင်ကြသည်။ တယောက်တလက်၊ လက်ချင်းရှက်လျက် ဆောင်ရွက်ကြသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။