Micah -4 -

မိက္ခာအနာဂတ္တိကျမ်း - ၄

ထာဝရဘုရား၏အုပ်စိုးခြင်း

(ဟေရှာ၊ ၂:၁-၄)

1နောက်ဆုံးသောကာလ၌ ထာဝရဘုရား၏အိမ်တော်တည်သော တောင်သည် တောင်ကြီးတောင်ငယ်တို့၏ ထိပ်ပေါ်မှာ ချီးမြှောက်၍ တည်လိမ့်မည်။ ခပ်သိမ်းသော လူစုတို့သည် ထိုတောင်သို့ စည်းဝေးကြလိမ့်မည်။ 2များပြားသော လူမျိုးတို့ကလည်း၊ လာကြလော့။ ထာဝရဘုရား၏ တောင်တော်၊ ယာကုပ်အမျိုး၏ ဘုရားသခင့်အိမ်တော်သို့ တက်သွားကြကုန်အံ့။ လမ်းခရီးတော်တို့ကို ပြသသွန်သင်တော်မူ၍၊ ငါတို့သည် ခြေတော်ရာသို့ လိုက်သွားကြမည်ဟု၊ ခရီးသွားလျက် ပြောဆိုကြလိမ့်မည်။ တရားတော်သည် ဇိအုန်တောင်မှလည်းကောင်း၊ ထာဝရဘုရား၏နှုတ်ကပတ်တော်သည် ယေရုရှလင်မြို့မှလည်းကောင်း ပေါ်ထွက်လိမ့်မည်။ 3ထာဝရဘုရားသည် များပြားသော လူတို့တွင် တရားစီရင်၍၊ ဝေးစွာနေလျက် အားကြီးသော လူမျိုးတို့ကို ဆုံးမတော်မူသဖြင့်၊ သူတို့ ဓားလက်နက်များကို ထွန်သွားဖြစ်စေခြင်းငှာလည်းကောင်း၊ လှံများကို တံစဉ်ဖြစ်စေခြင်းငှာလည်းကောင်း ထုလုပ်ကြလိမ့်မည်။ တစ်ပြည်ကိုတစ်ပြည် စစ်မတိုက်၊ စစ်အတတ်ကိုလည်း နောက်တစ်ဖန် မသင်ရကြ။ 4လူအပေါင်းတို့သည် ကိုယ်ပိုင်သောစပျစ်ပင်၊ ကိုယ်ပိုင်သော သင်္ဘောသဖန်းပင်အောက်မှာ ထိုင်ကြလိမ့်မည်။ ကြောက်စေသောသူ တစ်ယောက်မျှမရှိရ။ ကောင်းကင်ဗိုလ်ခြေအရှင် ထာဝရဘုရား၏ နှုတ်တော်ထွက် အမိန့်တော်ရှိ၏။ 5လူမျိုးအပေါင်းတို့သည် ကိုယ်ဆိုင်သော ဘုရား၏နာမကိုခိုလှုံလျက် ကျင့်နေတတ်ကြ၏။ ငါတို့မူကား၊ ကိုယ်ဆိုင်သော ဘုရားသခင် ထာဝရဘုရား၏နာမတော်ကို ကာလအစဉ်အမြဲ ခိုလှုံလျက် ကျင့်နေကြမည်။

ပြည်နှင်ဒဏ်ခံရာမှပြန်လာမည်

6ထာဝရဘုရား မိန့်တော်မူသည်ကား၊ ထိုကာလ၌ ခြေဆွံ့သောသူကို ငါခေါ်မည်။ နှင်ထုတ်ခြင်းကို ခံရသောသူ၊ ငါညှဉ်းဆဲဖူးသောသူတို့ကို ငါစုဝေးစေမည်။ 7ခြေဆွံ့သောသူကို ငါကျန်ကြွင်းစေမည်။ အဝေးသို့ နှင်ထုတ်ခြင်းကို ခံရသောသူသည် ကြီးမားသော လူမျိုးဖြစ်စေခြင်းငှာ ငါစီရင်မည်။ ထာဝရဘုရားသည် ဇိအုန်တောင်ပေါ်မှာ သူတို့ကို ယခုမှစ၍ အစဉ်အမြဲ အုပ်ချုပ်စိုးစံတော်မူလိမ့်မည်။ 8အို ဧဒါလင့်စင်၊ ဇိအုန်သတို့သမီး နေရာကုန်း၊ သင်သည် အစိုးရလိမ့်မည်။ အရင်တည်သော အာဏာတည်ပြန်လိမ့်မည်။ နိုင်ငံတော်သည် ယေရုရှလင်သတို့သမီးလက်သို့ တစ်ဖန်ရောက်လိမ့်မည်။

9ယခုမှာ သင်သည် အဘယ်ကြောင့် ကျယ်သောအသံနှင့် အော်ဟစ်သနည်း။ သင်၌ ရှင်ဘုရင်တစ်ယောက်မျှ မရှိသလော။ အကြံပေးသောမှူးမတ် ပျောက်ပျက်သလော။ သားဖွားသောမိန်းမကဲ့သို့ သင်သည် ဝေဒနာကို ခံရပါသည်တကား။ 10အို ဇိအုန်သတို့သမီး၊ သားဖွားသော မိန်းမကဲ့သို့ ဝေဒနာကိုခံ၍၊ သားကိုဖွားအံ့သောငှာ အားထုတ်လော့။ ယခုပင် သင်သည် မြို့ထဲကထွက်၍ လယ်ပြင်၌ နေရမည်။ ဗာဗုလုန်မြို့တိုင်အောင် သွားရမည်။ ထိုမြို့၌ လွတ်လိမ့်မည်။ ထိုမြို့၌ ထာဝရဘုရားသည် သင့်ကို ရန်သူတို့လက်မှ ရွေးနုတ်တော်မူလိမ့်မည်။ 11ယခုမှာ လူမျိုးများတို့က၊ ဇိအုန်မြို့သည် ညစ်ညူးပါစေ။ သူ၌ ငါတို့အလို ပြည့်စုံပါစေဟု၊ သင့်တစ်ဖက်၌ စုဝေးလျက် ဆိုကြ၏။ 12သို့ရာတွင်၊ ထာဝရဘုရား၏စိတ်တော်ကို မသိ၊ အကြံအစည်တော်ကို နားမလည်ကြ။ ကောက်လှိုင်းတို့ကို ကောက်နယ်တလင်း၌ စုထားသကဲ့သို့၊ ထိုသူတို့ကို စုထားတော်မူ၏။ 13အို ဇိအုန်သတို့သမီး၊ ထ၍ နယ်လော့။ သင့်ဦးချိုကို သံဖြင့်လည်းကောင်း၊ သင့်ခွာတို့ကို ကြေးဝါဖြင့်လည်းကောင်း ငါပြီးစေမည်။ သင်သည် လူမျိုးများတို့ကို ညက်ညက်ချေရမည်။ သူတို့တွင်ရသမျှသော စည်းစိမ်ဥစ္စာကိုယူ၍၊ မြေတစ်ပြင်လုံးကို အစိုးပိုင်တော်မူသော အရှင်ထာဝရဘုရားအား ပူဇော်ရမည်။

မိက္ခာအနာဂတ္တိကျမ်း - ၄ (အနက်ဖွင့်)

၅။ ခရစ်တော် အနှစ်တထောင် အုပ်စိုးမည့် မဂ်လာစကား (အခန်း ၄)

၄:၁–၄ ပထမပိုင်းအခန်း(၈)ခုတွင် ခရစ်တော်အနှစ်တစ်ထောင်အုပ်စိုးမည့် ကျက်သရေမင်္ဂလာတရား ဟောကြားထားသည်။ ယေရုရှလင်မြို့ကိုချီး‌မြောက်တော်မူမည်။ တပါးအမျိုးသားများသည် ဘုရားသခင်ထံတိုးဝင် ချဉ်းကပ်ကြမည်။ ကိုယ်တော်က တိုင်းနိုင်ငံအားလုံးကို အုပ်စိုးမည်။ ကမ္ဘာမြေတဝှမ်းလုံးတွင် လက်နက်စွဲကိုင် အကြမ်းဖက်မှု ချုပ်ငြိမ်းစေမည်။ “သူတို့ဓါးလက်နက်များကို ထွန်သွားဖြစ်စေခြင်းငှါ၎င်း၊လှံများကို တံစဉ်ဖြစ်စေခြင်းငှါ၎င်း၊ ထုလုပ်ကြလိမ့်မည်။ တပြည်ကိုတပြည်စစ်မတိုက်၊ စစ်အတတ်ကို လည်းနောက်တဖန် မသင်ရကြ”၃ ဟု ဆိုထားပါသည်။ ဘုရားသခင်၏လူများအားလုံးအပေါ်၌ ငြိမ်သက်ခြင်းနှင့်လုံခြုံမှု ရှိစေမည်။

၄:၅–၈ မိက္ခာလက်ထက်တွင် တွေ့မြင်ရသော ရုပ်တုဆင်းတုကိုးကွယ်ခြင်းသည် အနှစ်တစ်ထောင်နိုင်ငံတော် ကာလတွင် ပပျောက်မည်။ ရုပ်တုဆင်းတုများကို ကိုးကွယ်သည့်နေရာတွင် စစ်မှန်သော ဘုရားကိုးကွယ်ခြင်း ရောက်လာမည်။ ဖမ်းဆီးကျွန်ပြုခံရသူများ လွတ်မြောက်ကြလျက် ဘူမိနက်သန်နေရာမှန်သို့ ပြန်လည်စုစည်းလာကြမည်။ (နှင်ထုတ်ခံရသူများ ငါစုဝေးမည်”-(ငယ်၊၆)-Moffatt)။ ဘုရားသခင်ကိုယ်တော်တိုင် အုပ်စိုးလိမ့်မည်။ အရင်တည်သောအာဏာ (ငယ်၊၈) ဆိုသည်မှာ ကမ္ဘာမြေကြီးပေါ်တွင် အမြင့်ဆုံးသော အု်စိုးခြင်း မေရှိယဘုရင်အုပ်စိုးခြင်း အာဏာဖြစ်သည်။

၄:၉–၁၃ ထိုကာလ၌ ယုဒတို့သည် ဗာဗုလုန်သို့ဖမ်းဆီးခြင်းခံရမည်။ ယုဒလူမျိုးတို့ပြန်လည်စုစည်းပေါင်းဖက်ခြင်း မပြုမီကာလတွင် ဘုရားသခင်သည်တပါးအမျိုးသားများကို စုစည်း၍ စီရင်လိမ့်မည်။ တပါးအမျိုးသားများအား တရားစီရင်ရန် ဣသရေလလူမျိုးကို အသုံးပြုမည်။ ထိုသူတို့စည်းစိမ်ဥစ္စာဟူသမျှသည် မြေတပြင်လုံးကို အစိုးပိုင်သောထာဝရဘုရားအား ပူဇော်ရန်ဖြစ်သည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။

ကြည့်ရှုသူဦးရေ 0