Jeremiah -48 -

ယေရမိအနာဂတ္တိကျမ်း - ၄၈

မောဘပြည်ကိုဖျက်ဆီးခြင်း

1ဣသရေလအမျိုး၏ဘုရားသခင် ကောင်းကင်ဗိုလ်ခြေအရှင် ထာဝရဘုရားသည် မောဘပြည်ကို ရည်မှတ်၍ မိန့်တော်မူသည်ကား၊ နေဗောမြို့သည် အမင်္ဂလာရှိ၏။ ပျက်စီးခြင်းသို့ ရောက်လေ၏။ ကိရယသိမ်မြို့သည် ရှုံး၍ လုယူခြင်းကို ခံရ၏။ မိသဂပ်မြို့သည်လည်းရှုံး၍ စိတ်ပျက်လေ၏။ 2မောဘပြည်သည် နောက်တစ်ဖန် ဟေရှဘုန်မြို့၌ မဝါကြွားရ။ ရန်သူတို့က၊ မောဘပြည်ကို ပြည်မဖြစ်စေခြင်းငှာ ပယ်ရှားကြကုန်အံ့ဟု၊ ရန်ပြုမည့်အကြံနှင့် ကြံစည်ကြ၏။ အို မာဒမေနမြို့၊ သင်သည်လည်းပျက်စီးရမည်။ ဓားဘေးသည် သင့်ကိုလိုက်လိမ့်မည်။ 3ဟောရနိမ်မြို့၌လည်း ညှဉ်းဆဲခြင်းနှင့် ပြင်းစွာသော ပျက်စီးခြင်းရှိ၍၊ အော်ဟစ်သောအသံကို ကြားရ၏။ 4မောဘပြည်သည် ပျက်စီးခြင်းသို့ရောက်၍၊ သူငယ်တို့သည် မြည်တမ်းသောအသံကို ပြုကြ၏။ 5ငိုကြွေးသောအသံသည် လုဟိတ်တောင်ပေါ်သို့ တက်ရ၏။ ဟောရနိမ်မြို့သို့ ဆင်းရာအရပ်၌လည်း၊ ဆုံးရှုံးခြင်းအသံကို ရန်သူတို့သည် ကြားရကြ၏။ 6အသက်လွတ်အံ့သောငှာ ပြေးကြလော့။ လွင်ပြင်၌ရှိသော သစ်ပင်ခြောက် ကဲ့သို့ဖြစ်ကြလော့။ 7သင်သည် မိမိဆည်းပူးသော ဘဏ္ဍာဥစ္စာကို ကိုးစားသောကြောင့်၊ သူတစ်ပါးလက်သို့ ရောက်ရလိမ့်မည်။ ခေမုရှဘုရားကိုလည်း သူ၏မင်း၊ သူ၏ယဇ်ပုရောဟိတ်တို့နှင့် တကွ သိမ်းသွားကြလိမ့်မည်။ 8လုယူသောသူသည် မြို့များအစဉ်အတိုင်းရောက်လာ၍ မြို့တစ်မြို့မျှ မလွတ်ရ။ ချိုင့်နှင့်တကွ လွင်ပြင်သည်လည်း၊ ပျက်စီးခြင်းသို့ ရောက်ရလိမ့်မည်။ ထိုသို့ ထာဝရဘုရားမိန့်တော်မူပြီ။ 9မောဘပြည်သည် လွတ်ရာသို့ ပြေးရအောင် ငှက်တောင်တို့ကို ပေးလော့။ မြို့တို့သည် နေသောသူမရှိ၊ လူဆိတ်ညံရာ ဖြစ်ကြလိမ့်မည်။ 10ထာဝရဘုရား၏ အမှုတော်ကိုကြိုးစား၍ မဆောင်သောသူသည် ကျိန်ဆဲခြင်းကိုခံစေ။ လူအသက်ကို မသတ်ဘဲ မိမိဓားကို သိမ်းရုပ်သောသူသည် ကျိန်ဆဲခြင်းကိုခံစေ။

မောဘမြို့များပျက်စီးခြင်း

11မောဘသည် အိုးတစ်လုံးမှတစ်လုံးသို့ မပြောင်း၊ တစ်ကျွန်းတစ်နိုင်ငံသို့ ယူသွားခြင်းကို မခံ၊ ငယ်သောအရွယ်မှစ၍ ငြိမ်လျက်၊ မိမိအဖတ်အနည်ပေါ်၌ နေရာကျလျက်ရှိသောကြောင့်၊ မိမိအရသာသည် တည်နေ၏။ မွှေးသောအနံ့လည်း မပျက်။ 12သို့ရာတွင် ထာဝရဘုရားမိန့်တော်မူသည်ကား၊ စောင်း၍ထားတတ်သောသူတို့ကို သူ့ထံသို့ ငါစေလွှတ်ရသော အချိန်ရောက်လိမ့်မည်။ သူတို့သည် မောဘကိုစောင်း၍ထားပြီးလျှင်၊ သူ၏အိုးတို့ကို သွန်၍ ရေဘူးတို့ကို ခွဲကြလိမ့်မည်။ 13ဣသရေလအမျိုးသည် မိမိတို့ခိုလှုံသော ဗေသလဘုရားကြောင့် ရှက်ရသကဲ့သို့၊ မောဘအမျိုးသည်လည်း ခေမုရှဘုရားကြောင့် ရှက်ရလိမ့်မည်။ 14ငါတို့သည် အားကြီးသောသူ၊ စစ်တိုက်ခြင်းငှာ တတ်စွမ်းနိုင်သောသူ ဖြစ်ကြ၏ဟု၊ သင်တို့သည် အဘယ်သို့ ပြောဆိုကြလိမ့်မည်နည်း။ 15မောဘပြည်သည် ပျက်စီးပြီ။ မြို့တို့သည် ကျွမ်းလောင်ကြပြီ။ သူရွေးချယ်သော လုလင်တို့သည် ကွပ်မျက်ခြင်းကို ခံအံ့သောငှာ ဆင်းသွားကြပြီဟု၊ ကောင်းကင်ဗိုလ်ခြေအရှင် ထာဝရဘုရားဟူ၍ ဘွဲ့နာမရှိသော ရှင်ဘုရင် မိန့်တော်မူ၏။ 16မောဘကို လုပ်ကြံရသောအချိန်နီးပြီ။ သူခံရသောဘေးသည် အလျင်အမြန်လာ၏။ 17သူ့ပတ်လည်၌နေသော သူအပေါင်းတို့၊ သူ့အတွက် မြည်တမ်းကြလော့။ သူ၏နာမကို သိသောသူအပေါင်းတို့၊ တန်ခိုးကြီးသောလှံတံ၊ အသရေတင့်တယ်သောတံဖျာသည် ကျိုးလေပြီတကားဟု ပြောဆိုကြလော့။ 18ဒိဘုန်မြို့၌နေသော သတို့သမီး၊ သင်ခံစားရသော စည်းစိမ်မှဆင်း၍ အငတ်ခံလျက်ထိုင်လော့။ မောဘကို လုယူသောသူသည် သင်ရှိရာသို့လာ၍၊ သင်၏ရဲတိုက်တို့ကိုဖျက်ဆီးလိမ့်မည်။ 19အို အာရော်မြို့သား၊ လမ်းနားမှာရပ်၍ ကြည့်ရှုလော့။ အဘယ်အမှုရှိသနည်းဟု၊ ပြေးသောယောက်ျားနှင့် အသက်လွတ်သော မိန်းမကို မေးမြန်းလော့။ 20မောဘသည် စိတ်ပျက်လေ၏။ ပြိုလဲလျက် ရှိ၏။ ငိုကြွေးမြည်တမ်းကြလော့။ မောဘသည် ပျက်စီးကြောင်းကို အာနုန်မြို့၌ ကြားပြောကြလော့။ 21လွင်ပြင်နှင့် တကွဟောလုန်မြို့၊ ယဟာဇမြို့၊ မေဖတ်မြို့၊ 22ဒိဘုန်မြို့၊ နေဗောမြို့၊ ဗက်ဒိဗလသိမ်မြို့၊ 23ကိရယသိမ်မြို့၊ ဗက်ဂမုလမြို့၊ ဗက်မောင်မြို့၊ 24ကေရုတ်မြို့၊ ဗောဇရမြို့မှစ၍၊ မောဘပြည်၌ရှိသောမြို့ အနီးအဝေးရှိသမျှတို့သည် အပြစ်ဒဏ်ကို ခံရကြ၏။ 25မောဘ၏ဦးချိုသည် ပြတ်လေပြီ။ သူ၏လက်ရုံးသည် ကျိုးလေပြီဟု ထာဝရဘုရားမိန့်တော်မူ၏။

မောဘ၏မာနကိုချိုးတော်မူမည်

26မောဘသည် ထာဝရဘုရားတစ်ဖက်၌ ဝါကြွားသောကြောင့် သူ့ကိုယစ်မူးစေကြလော့။ သူသည် မိမိအန်ဖတ်၌ လူးလည်း၍ ကဲ့ရဲ့ခြင်းကိုခံရ၏။ 27သင်သည် ဣသရေလကို ကဲ့ရဲ့ပြီမဟုတ်လော။ သို့ရာတွင်၊ သူသည် သူခိုးတို့နှင့်ပေါင်းဖော်သည်ကို တွေ့ဖူးသလော။ သူ၏အကြောင်းကို ပြောလေရာရာ၌ သင်သည် ခေါင်းကိုညိတ်ပါသည်တကား။ 28မောဘပြည်၌နေသော သူတို့၊ မြို့တို့ကိုစွန့်၍ ကျောက်ကြား၌ နေကြလော့။ မြေတွင်းဝနားမှာ အသိုက်လုပ်တတ်သော ချိုးငှက်ကဲ့သို့ ပြုကြလော့။

29မောဘ၏မာနကို ငါတို့သည် ကြားသိကြ၏။ အလွန်ကြီးသော မာနဖြစ်၏။ မာနကြီးခြင်း၊ ထောင်လွှားစော်ကားခြင်း၊ စိတ်နှလုံးမြင့်ခြင်း ရှိသော်လည်း၊ 30သူ၏ ဒေါသအမျက်ထွက်ခြင်းကို ငါသိသည်ဖြစ်၍၊ သူသည် အချည်းနှီးသက်သက် ဝါကြွားသောစကားကို ပြောလျက်နှင့်၊ မိမိအလို မပြည့်စုံရာဟု ထာဝရဘုရား မိန့်တော်မူ၏။ 31ထိုကြောင့်၊ မောဘအတွက် ငါသည်ညည်းတွားမြည်တမ်းမည်။ မောဘပြည် တစ်ပြည်လုံးအတွက် ငိုကြွေးမည်။ ကိရဟရက်မြို့သားတို့အတွက် ညည်းတွားခြင်း ရှိရမည်။ 32အို စိဗမာစပျစ်နွယ်ပင်၊ ယာဇာမြို့အတွက် မျက်ရည်ကျသည်ထက်၊ သင့်အတွက် ငါသည် မျက်ရည်ကျမည်။ သင်၏အညွန့်တို့သည် ပင်လယ်ကိုလွန်၍၊ ယာဇာပင်လယ်တိုင်အောင် ရောက်ကြ၏။ ဖျက်ဆီးသောသူသည် သင်၏သစ်သီးနှင့် စပျစ်သီးတို့ကို လုယူ၏။ 33ဝပြောသောလယ်ပြင်နှင့် မောဘပြည်ထဲမှာ ဝမ်းမြောက်ရွှင်လန်းခြင်း ပြတ်လေပြီ။ စပျစ်သီးနယ်ရာ ကျင်း၌ စပျစ်ရည်ကို ငါပြတ်စေပြီ။ ကြွေးကြော်သံကိုပြု၍ စပျစ်သီးကို မနင်းရ။ ကြွေးကြော်သော အသံလည်း ကြွေးကြော်သောအသံ မဟုတ်ရ။ 34ဟေရှဘုန်မြို့ ငိုကြွေးသံမှစ၍ ဧလာလေမြို့၊ ယာဟတ်မြို့ တိုင်အောင်လည်းကောင်း၊ ဇောရမြို့မှစ၍ ဟောရနိမ်မြို့ တိုင်အောင်လည်းကောင်း သုံးနှစ်အသက်ရှိသော နွားမမြည်သံကဲ့သို့ အသံကို လွှင့်ကြ၏။ အကြောင်းမူကား၊ နိမရိမ် ရေကန်တို့သည်လည်း ဆိတ်ညံလျက်ရှိကြ၏။ 35မောဘပြည်၌ မြင့်သောအရပ်ပေါ်မှာ ပူဇော်သောသူ၊ မိမိဘုရားတို့အား နံ့သာပေါင်းကို မီးရှို့သောသူတို့ကို ငါပြတ်စေမည်ဟု ထာဝရဘုရားမိန့်တော်မူ၏။ 36ထိုကြောင့်၊ ငါနှလုံးသည် မောဘပြည်အတွက် ပုလွေကဲ့သို့ မြည်ရလိမ့်မည်။ ငါ့နှလုံးသည် ကိရဟရက်မြို့သားတို့အတွက် ပုလွေကဲ့သို့ မြည်ရလိမ့်မည်။ သူတို့ဆည်းပူးသော ဘဏ္ဍာဥစ္စာ ပျက်စီးပြီ။ 37လူတိုင်းဆံပင်တိုလျက်၊ မုတ်ဆိတ်ကိုရိတ်လျက်၊ လက်၌ရှနလျက်၊ ခါး၌ လျှော်တေအဝတ်ကို ဝတ်လျက် ရှိရ၏။ 38အသုံးမရသော အိုးကိုခွဲတတ်သကဲ့သို့၊ မောဘပြည်ကို ငါခွဲသောကြောင့်၊ မောဘပြည်အိမ်မိုးများ အပေါ်၌လည်းကောင်း၊ လမ်းများ၌လည်းကောင်း၊ ညည်းတွားမြည်တမ်းခြင်း နှံ့ပြားရမည်ဟု ထာဝရဘုရားမိန့်တော်မူ၏။ 39သူတို့ကလည်း၊ မောဘပြည် ပြိုပျက်လေပြီတကား၊ ရှက်၍ ဆုတ်သွားလေပြီတကားဟု ညည်းတွားမြည်တမ်း ကြလိမ့်မည်။ မောဘသည် အရှက်ကွဲ၍ ကဲ့ရဲ့ခြင်းကိုခံရလျက်၊ ပတ်လည်၌နေသော သူအပေါင်းတို့၏ ကြောက်လန့်စရာအကြောင်း ဖြစ်ရလိမ့်မည်။

မောဘပြည်လွတ်မြောက်ရန်မရှိ

40ထာဝရဘုရားမိန့်တော်မူသည်ကား၊ ရန်သူသည် ရွှေလင်းတပျံတတ်သကဲ့သို့ ပျံလာ၍၊ အတောင်တို့နှင့် မောဘပြည်ကို အုပ်မိုးလိမ့်မည်။ 41မြို့ တို့ကိုလုပ်ကြံ၍ ရဲတိုက်တို့ကို တိုက်ယူသောကြောင့်၊ ထိုနေ့၌ မောဘအမျိုးသူရဲတို့ စိတ်နှလုံးသည်၊ သားဖွားခြင်းဝေဒနာကို ခံရသော မိန်းမ၏စိတ်နှလုံးကဲ့သို့ ဖြစ်ရလိမ့်မည်။ 42မောဘသည် ထာဝရဘုရားတစ်ဖက်၌ ဝါကြွားသောကြောင့်၊ နောက်တစ်ဖန် ပြည်မဖြစ်နိုင်အောင် ပျက်စီးရလိမ့်မည်။ 43အို မောဘအမျိုးသား၊ သင်သည်ကြောက်လန့်ဖွယ်သောအရာ၊ မြေတွင်း၊ ကျော့ကွင်းထဲသို့ ရောက်လေပြီ။ 44ကြောက်လန့်ဖွယ်သောအရာမှ ပြေးသောသူသည် မြေတွင်းထဲသို့ ကျလိမ့်မည်။ မြေတွင်းမှ လွတ်သောသူသည် ကျော့ကွင်း၌ ကျော့မိလိမ့်မည်။ ဆုံးမခြင်းကိုခံရသောနှစ်ကာလကို မောဘပြည်သို့ ငါရောက်စေမည်ဟု ထာဝရဘုရား မိန့်တော်မူ၏။ 45ပြေးသောသူတို့သည် အားကုန်သောကြောင့်၊ ဟေရှဘုန်မြို့အရိပ်ကို ခိုကြသော်လည်း၊ ရှိဟုန်ဘုရင် နေရာ ဟေရှဘုန်မြို့မှ မီးလျှံထွက်သဖြင့်၊ မာနထောင်လွှားသောသူတို့၏အထွတ်မှစ၍ မောဘပြည်စွန်းတိုင်အောင် လောင်လိမ့်မည်။ 46အို မောဘပြည်၊ သင်သည် အမင်္ဂလာရှိ၏။ အို ခေမုရှတပည့်တို့၊ သင်တို့သည် အကျိုးနည်းကြပြီ။ သင်တို့၏သားသမီးများကို သိမ်းသွင်းကြပြီ။ 47သို့ရာတွင်၊ သိမ်းသွားခြင်းကိုခံရသော မောဘအမျိုးသားတို့ကို နောင်ကာလ၌ ငါဆောင်ခဲ့ဦးမည်ဟု ထာဝရဘုရားမိန့်တော်မူ၏။ ဤရွေ့ကား၊ မောဘခံရသောအပြစ်တရားပေတည်း။

ယေရမိအနာဂတ္တိကျမ်း - ၄၈ (အနက်ဖွင့်)

(ဂ)မောဘအမျိုး (အခန်း၄၈)

၄၈:၁–၁၀ မော ဘပြည်ကို လည်းဗာဗုလုန်သားများ၏ ခြေဖဝါး အောက်သို့ ကျရောက်မည်။ မြို့ကြီးပြကြီးများကို ပြိုလဲစေသည်။ အရပ် ရပ်အပြည်ပြည်တွင် ငိုချင်းရှည်ကြမည်။ လူဆိုးလူပျက်များ ထွက်ပြေး တိမ်းရှောင်ခဲ့ပြီး၊ လူတို့ပစ္စည်းများကို နောက်ပိုင်းမှ သိမ်းယူကြမည်။ စည်းစိမ်ဥစ္စာများ တန်ဖိုးထားခြင်းသည် အချည်းနှီးဖြစ်ကြောင်း သိရှိသွားကြရမည်။ သူတို့ဘုရား Chemosh သည်လည်း ဗာဗုလုန်ပြည် သားတို့ ယူဆောင်သွားခြင်းခံရမည်။ အပိုဒ်ငယ်(၁၀)သည် လက်လွှတ်စ ပယ်လုပ်တတ်သော ကျူးကျော်သမားများကျိန်စာတိုက် သည့်ကျမ်း ချက်ဖြစ်သည်။ ယနေ့ခေတ်ကာလယုံကြည်သူများက သင်ခန်းစာယူ ထိုက်သည်။ ဘုရားသခင်၏ တရားတော်နှင့်မညီသော ကိစ္စရပ်များ ရှောင်ရှားသတိထားရမည်။

၄၈:၁၁–၁၇ မောဘများသည် သမိုင်းကြောင်းအစဉ်အလာကောင်း ရှိသူများမဟုတ်။ အိုးတစ်လုံးပြီးတစ်လုံး ပြောင်းထည့်ထားသောစပျစ်ရည် အသစ်နှင့်တူသည်။ သို့ကြောင့် စနစ်တကျ နေသားကျခြင်းမရှိ။ သူတို့ယုံ ကြည်ကိုးစားခဲ့သော ခါလဒဲသားများက သတ်ဖြတ်ကြဦးမည်။ ဣသရေလများက ဗေသေလနွားရုပ်ကိုးကွယ်သကဲ့သို့ မောဘများက ဃ့နသျ အရုပ်ကို ကိုးကွယ်ကြသောကြောင့် အရှက်တကွဲ အကျိုးနည်း ဖြစ်ကြမည်။ ဝမရှိဝိလုပ်ကြသောကြောင့် အောက်ခြေမှစ၍ လဲကျမည်။ ထောင်လွှားဝါကြွားသူများ ပြိုလဲဆုံးရှုံးကြမည်။ တိုင်းသူ ပြည် သားများရောက်တက်တက်ရာရာ ထွက်ပြေးကြမည်။ မြို့ကြီးမြို့ပြကြီး များပျက်စီး၍ လွင်တီးခေါင်ပြင်ဖြစ်ကြမည်။ အဘယ်ကြောင့်ဆိုသော် မောဘလူများသည် ဣသရေလများကို ပြက်ယယ်ပြုရယ်မောဟားတိုက် ခဲ့ကြသဖြင့် ဘုရားသခင်၏ အမျက်တော်ဖလားတလှည့် သောက်သုံး ကြရမည်။

၄၈:၂၈–၃၉ တစ်ချိန်က ဆောင့်ကြွားကြွားဖြင့်သွေးနားထင်ရောက်ခဲ့ သူများသည် ယခုအခါ ကြက်ကလေးများ၊ ငှက်ကလေးများပမာ ပုန်းအောင်းနေကြသည်။ ထိုသူများ၏ မောက်မာ ဟော့ရမ်းခဲ့မှုများသည်လည်း ပျက်စီးပျောက်လွှင့်ကုန်သည်။ ပျော်ရွှင် အူမြူးခြင်းများသည်လည်း တိမ်ကော ပပျောက်ကုန်သည်။ မောဘပြည်အနှံ့အပြား၌ ငိုကြွေး ကြမည်။ ရုပ်တုဆင်းတု ကိုးကွယ်ခြင်း၏အပြစ်ဒဏ် ခံကြရမည်။ ကိရဟရက်မြို့သားများသည် ဆုံးရှုံးရသော ဥစ္စာပစ္စည်းများအတွက် နှမြောတသစွာဖြင့် အော်ဟစ် ငိုယိုကြသည်ဆိုခြင်းမှာ မောဘသားများ ကြေကွဲဝမ်းနည်းကြမည့်အကြောင်း တင်စားထားသည်။

၄၈:၄၀–၄၇ ဗာဗုလုန်သားများသည် မိုးယံထက်တွင် ရွှေလင်းယုန် အုပ်ပျံဝဲသကဲ့သို့ မောဘပြည်သို့ အရှိန်အဟုန်ဖြင့် ပျံဝဲလာကြသည်။ တမြို့နယ်လုံး ဖျက်ဆီးပစ်မည်။ လွတ်မြောက်သူတစုံတစ်ယောက်မှ မရှိရ။ ပြည်သူပြည်သားများ ထွက်ပြေးတိမ်းရှောင်သွားကြသော်လည်း တစ်နေ့သောအခါ ပြန်လည်စုစည်း စည်ပင်ဝပြောကြမည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။