Jeremiah -17 -

ယေရမိအနာဂတ္တိကျမ်း - ၁၇

ယုဒပြည်၏အပြစ်နှင့်အပြစ်ဒဏ်

1ယုဒအမျိုး၏အပြစ်သည် သံကညစ်၊ စိန်ချွန်နှင့် သူတို့နှလုံးပြား၌လည်းကောင်း၊ ယဇ်ပလ္လင်ဦးချို၌လည်းကောင်း အက္ခရာတင်၍ မှတ်သားလျက်ရှိ၏။ 2သူငယ်တို့ပင် မြင့်သောတောင်ပေါ်၊ စိမ်းသောသစ်ပင်နားမှာရှိသော ယဇ်ပလ္လင်များ၊ အာရှရပင်များကို အောက်မေ့တတ်ကြ၏။ 3အချင်းငါ၏တောင်၊ လယ်၌ရှိသော သင်၏ဥစ္စာနှင့် သိုထားသမျှသောဥစ္စာကိုလည်းကောင်း၊ ပြည်တစ်လျှောက်လုံး၌ သင်ပြစ်မှားရာ၊ မြင့်သောအရပ်တို့ကိုလည်းကောင်း၊ လုယူသောသူတို့လက်သို့ ငါအပ်မည်။ 4သင့်ကိုယ်တိုင်လည်း ငါပေးသောအမွေမှ ရွေ့သွားရလိမ့်မည်။ သင်မသိသော ပြည်တွင်၊ ရန်သူလက်၌ သင့်ကို ငါကျွန်ခံစေမည်။ အကြောင်းမူကား၊ အစဉ်လောင်သောငါ၏အမျက်မီးကို သင်တို့သည် မွှေးကြပြီ။

ကွဲပြားသောဆိုရိုးစကားများ

5ထာဝရဘုရား မိန့်တော်မူသည်ကား၊ လူကိုကိုးစား၍ လူသတ္တဝါကို အမှီပြုသဖြင့်၊ စိတ်နှလုံးထဲ၌ ထာဝရဘုရားထံတော်မှ ထွက်သွားသောသူသည် ကျိန်အပ်သောသူဖြစ်၏။ 6ထိုသူသည် လွင်ပြင်၌ရှိသော သစ်ပင်ခြောက်ကဲ့သို့ဖြစ်၍၊ ကောင်းကျိုးရောက်ကြောင်းကို မသိရ။ အဘယ်သူမျှမနေသော ဆားမြေ၊ သွေ့ခြောက်သောလွင်ပြင်၌ နေရလိမ့်မည်။ 7ထာဝရဘုရားကို ကိုးစားသောသူ၊ ထာဝရဘုရားကို မိမိကိုးစားရာ အကြောင်းဖြစ်စေသောသူသည် ကောင်းချီးမင်္ဂလာကို ခံအပ်သောသူဖြစ်၏။ 8ထိုသူသည်ကား၊ ရေရှိသောအရပ်၌စိုက်၍ မြစ်နားမှာ အမြစ်ဖြာသဖြင့်၊ ပူသောအရှိန်ရောက်ကြောင်းကို မသိ၊ အရွက်မညှိုးနွမ်း၊ မိုးခေါင်သောကာလ၌ စိုးရိမ်စရာမရှိဘဲ၊ အစဉ်အမြဲ အသီးကိုသီးတတ်သော အပင်နှင့်တူ၏။

9စိတ်နှလုံးသည် ခပ်သိမ်းသော အရာထက် စဉ်းလဲတတ်၏။ အလွန်ယိုယွင်းသော သဘောရှိ၏။ စိတ်နှလုံးသဘောကို အဘယ်သူသိနိုင်သနည်း။ 10ငါထာဝရဘုရားသည် လူအသီးအသီးတို့အား မိမိတို့အကျင့်အတိုင်း၊ မိမိတို့ခံထိုက်သော အကျိုးအပြစ်ကိုပေးခြင်းငှာ၊ နှလုံးကျောက်ကပ်တို့ကို စေ့စေ့စစ်ကြောတတ်၏။ 11ကောရငှက်သည် မိမိမဥသောဥကို ဝပ်သကဲ့သို့၊ မတရားသဖြင့် ဥစ္စာဆည်းပူးသောသူသည် အသက်ပျိုစဉ်ကပင်၊ ဆင်းရဲခြင်းသို့ ရောက်၍ အဆုံး၌ကား၊ လူမိုက်ဖြစ်လိမ့်မည်။

12ရှေ့ဦးစွာမှစ၍ မြင့်သောအရပ်၌ ဘုန်းကြီးတော်မူသော ရာဇပလ္လင်သည် ငါတို့သန့်ရှင်းရာ ဌာနတော်အရပ် ဖြစ်၏။ 13အို ဣသရေလအမျိုး၏ မျှော်လင့်စရာ အကြောင်းဖြစ်သော ထာဝရဘုရား၊ ကိုယ်တော်ကို စွန့်ပစ်သောသူအပေါင်းတို့သည် အရှက်ကွဲရကြပါလိမ့်မည်။ ငါ့ထံမှ ထွက်သွားသောသူတို့သည် မြေစာရင်းသို့ ဝင်ရကြပါလိမ့်မည်။ အကြောင်းမူကား၊ အသက်စမ်းရေတွင်း တည်းဟူသော ထာဝရဘုရားကို စွန့်ပစ်ကြသတည်း။

ကူမတော်မူရန်ဆုတောင်းခြင်း

14အို ထာဝရဘုရား၊ အကျွန်ုပ်၏အနာကို ငြိမ်းစေတော်မူပါ။ သို့ပြုလျှင်၊ အကျွန်ုပ်သည် အနာငြိမ်းပါလိမ့်မည်။ အကျွန်ုပ်ကို ကယ်တင်တော်မူပါ။ သို့ပြုလျှင်၊ အကျွန်ုပ်သည် ကယ်တင်ခြင်းသို့ ရောက်ပါလိမ့်မည်။ ကိုယ်တော်သည် အကျွန်ုပ်ချီးမွမ်းရာ ဖြစ်တော်မူ၏။ 15ထာဝရဘုရား၏ နှုတ်ကပတ်တော်သည် အဘယ်မှာရှိသနည်း။ ယခုလာပါစေတော့ဟု ဤသူတို့သည် အကျွန်ုပ်အား ဆိုတတ်ကြပါ၏။ 16အကျွန်ုပ်သည် နောက်တော်သို့လိုက်သော ဆရာ၏အရာကို မရှောင်ပါ။ အမင်္ဂလာနေ့ကို မတောင့်တပါ။ အကျွန်ုပ်ဟောပြောချက်ကို ကိုယ်တော်သိတော်မူ၏။ ကိုယ်တော်မျက်မှောက်၌ ရှိပါ၏။ 17အကျွန်ုပ်ကို ထိတ်လန့်စေတော်မမူပါနှင့်။ ဘေးရောက်သောကာလ၌ ကိုယ်တော်သည် အကျွန်ုပ်ခိုလှုံရာ ဖြစ်တော်မူ၏။ 18အကျွန်ုပ်ကို ညှဉ်းဆဲသောသူတို့သည် အရှက်ကွဲကြပါစေသော။ အကျွန်ုပ်မူကား၊ အရှက်မကွဲပါစေနှင့်။ သူတို့သည် စိတ်ပျက်ကြပါစေသော။ အကျွန်ုပ်မူကား၊ စိတ်မပျက်ပါစေနှင့်။ သူတို့အပေါ်မှာ ဘေးအန္တရာယ်ကာလကို ရောက်စေတော်မူပါ။ အထပ်ထပ်ဖျက်ဆီးတော်မူပါ။

ဥပုသ်နေ့ကိုသန့်ရှင်းစေခြင်း

19ထာဝရဘုရားသည် ငါ့အားမိန့်တော်မူသည်ကား၊ ယုဒရှင်ဘုရင် ထွက်ဝင်သော အမျိုးသားချင်း မြို့တံခါးမှစ၍၊ ခပ်သိမ်းသော ယေရုရှလင်မြို့တံခါးဝ၌ သွား၍ရပ်လျက်၊ 20လူများတို့အား ပြောဆိုရမည်မှာ၊ ဤတံခါးတို့ဖြင့် ထွက်ဝင်သော ယုဒရှင်ဘုရင်များနှင့် ယုဒပြည်သူ ယေရုရှလင်မြို့သားများ အပေါင်းတို့၊ ထာဝရဘုရား၏နှုတ်ကပတ်တော်ကို နားထောင်ကြလော့။ 21ထာဝရဘုရား မိန့်တော်မူသည်ကား၊ ဥပုသ်နေ့၌ ဝန်ကိုမထမ်းမရွက်၊ ယေရုရှလင်မြို့တံခါးဖြင့် မဆောင်မသွင်းမည်အကြောင်း၊ သတိပြုကြလော့။ 22ဥပုသ်နေ့၌ သင်တို့အိမ်ထဲက ဝန်ကို မထုတ်မဆောင်ကြနှင့်။ အဘယ်အလုပ်ကိုမျှ မလုပ်ကြနှင့်။ သင်တို့ဘိုးဘေးများကို ငါမှာထားသည်အတိုင်း၊ ဥပုသ်နေ့ကို သန့်ရှင်းစေကြလော့။ 23ဘိုးဘေးတို့သည်နားမထောင်၊ နားကိုမလှည့်ဘဲ နေကြ၏။ နားမကြား၊ ဆုံးမခြင်းကို မခံမည်အကြောင်း၊ မိမိတို့လည်ပင်းကို ခိုင်မာစေကြ၏။ 24ထာဝရဘုရား မိန့်တော်မူသည်ကား၊ သင်တို့သည် ဥပုသ်နေ့၌ ဤမြို့တံခါးဖြင့် ဝန်ကိုမသွင်းမဆောင်၊ အဘယ်အလုပ်ကိုမျှ မလုပ်၊ ဥပုသ်နေ့ကို သန့်ရှင်းစေသည်တိုင်အောင်၊ ငါ့စကားကို စေ့စေ့နားထောင်လျှင်၊ 25ဒါဝိဒ်မင်းကြီး၏ရာဇပလ္လင်ပေါ်မှာထိုင်သော ရထားစီး၊ မြင်းစီးရှင်ဘုရင်၊ မင်းသားမှစ၍ သူတို့မှူးမတ်၊ ယုဒပြည်သူ၊ ယေရုရှလင်မြို့သားတို့သည် ဤမြို့တံခါးများသို့ ဝင်လျက်ရှိကြလိမ့်မည်။ ဤမြို့သည်လည်း အစဉ်အမြဲ တည်လိမ့်မည်။ 26မီးရှို့ရာယဇ်မှစ၍ အခြားသောယဇ်များ၊ ပူဇော်သကာများ၊ မီးရှို့ရာနံ့သာပေါင်း၊ ချီးမွမ်းရာယဇ်တို့ကို ထာဝရဘုရား၏ အိမ်တော်သို့ ဆောင်ခဲ့သော သူတို့သည် ယုဒမြို့များ၊ ယေရုရှလင်မြို့ပတ်ဝန်းကျင်အရပ်များ၊ ဗင်္ယာမိန်ပြည်၊ မြေညီခရိုင်၊ တောင်ရိုးခရိုင်၊ တောင်မျက်နှာ ခရိုင်မှလာကြလိမ့်မည်။ 27သို့မဟုတ်၊ ဥပုသ်နေ့၌ဝန်ကို ထမ်းရွက်၍၊ ယေရုရှလင်မြို့ တံခါးများသို့မဝင်၊ ဥပုသ်နေ့ကို သန့်ရှင်းစေသည်တိုင်အောင်၊ သင်တို့သည် ငါ့စကားကို နားမထောင်လျှင်၊ ငါသည် ထိုမြို့တံခါးတို့ကိုမီးရှို့၍၊ ထိုမီးသည် မငြိမ်းမသေဘဲ ယေရုရှလင်မြို့ ဘုံဗိမာန်တို့ကို လောင်ရလိမ့်မည်။

ယေရမိအနာဂတ္တိကျမ်း - ၁၇ (အနက်ဖွင့်)

(င) ယေရမိ၏တည်ကြည်ခိုင်မြဲခြင်း

(အခန်း ၁၇:၁၉-၂၇)

၁၆:၁၉–၂၁ တပါးအမျိုးသားများ ရုပ်တုဆင်းတု ကိုးကွယ်ရာမှ ဘုရားသခင်ထံသို့ ကူးပြောင်းလာမည့် အကြောင်းကို ယေရမိကြိုမြင်သည်။ အပိုဒ်ငယ်(၂၁)တွင် ယုဒလူမျိုးအား ဆုံးမပဲ့ပြင်ခြင်း ခံကြစေရန် ဘုရားသခင်၏ ခိုင်မာသော သဘောထားကို တွေ့ကြရသည်။

၁၇:၁–၁၁ ယုဒတို့သည် ရုပ်တုဆင်းတု ကိုးကွယ်ခြင်းအား အရိုးစွဲကြသောကြောင့် မိမိတို့ နေရပ်ဒေသမှ မောင်းထုတ်၍ သူတပါး ဖမ်းဆီးကျွန်ပြုခံရသည်။ ဘုရားသခင်၏ တောင်တော် ယေရုရှလင်သည် လူများ ဝတ်ပြုရာ ဖြစ်သော်လည်း ကျိန်ခြင်းမင်္ဂလာ သင့်ရပြီ။ ဘုရားသခင်အား ယုံကြည်ကိုးစားခြင်းသည် ကောင်းကြီးမင်္ဂလာ ဖြစ်သော်လည်း လူများသည် အမှန်တကယ် ယုံကြည်ကိုးစားခြင်း မပြုကြ။ “မတရားသဖြင့် ဥစ္စာဆည်းပူးသူသည် အသက်ပျိုစဉ်ကပင် ဆင်းရဲခြင်းသို့ ရောက်၍ အဆုံး၌ လူမိုက်ဖြစ်သည်” ။

အပိုဒ်ငယ်(၉)သည် လူသိမထင်ရှားသော်လည်း သမ္မာတရားအစစ် ဖြစ်သည်။ လူ့စိတ်နှလုံးသည် ပီပြင်စွာ ဖော်ပြသော ကျမ်းပိုဒ်ဖြစ်သည်။ R.K. Harrison က “အန္တရယ်ကြီးမားသော ဆိုးညစ်မှု” ဟု ဆို၍ KJV ကျမ်းမှုတွင် “သေလောက်သော ရောဂါ” ဟု ဆိုသည်။

အသက်တာ တဖန်ပြောင်းလဲခြင်း မရှိသော လူ့ဇာတိသည် ဘုရားသခင်၏ ကျေးဇူးတော်နှင့် ကင်းဝေးသည်။ ဤအပိုဒ်ငယ်(၉)ကို RSV ကျမ်းတွင်မူ အပြင်းအထန် ပျက်စီးခြင်းဟု၎င်း NEB ကျမ်းမူတွင် အသဲအသန် ဖျားနာခြင်း ရောဂါဟု၎င်း ဆိုထားသည်။ ၁၅:၁၈ နှင့် ၃၀:၁၂ တွင် ကုစား၍ မပြောင်းနိုင်သော အနာရောဂါဟု ဆိုသည်။ မျိုးဆက်သစ်တိုင်း၏ ဝိညာဉ်သည် ဘုရားသခင်၏ ဝိညာဉ်တော်၌ တဖန်မွေးဖွားရန် လိုအပ်ပါသည်။ (ယော ၃:၅ နောက်ပိုင်း နှင့် တိ၃:၅ တို့ကို ယှဉ်ဖတ်ကြည့်ပါ)၂၀။

ဤကျမ်းစကားကို စိတ်နှလုံးထဲတွင် ဘဝင်ကျချင်မှ ကျမည်။ ပိုမိုနားလည်နိုင်ရန် Matthew Henry ၏ ရှင်းပြချက်ကို နားထောင်ဖတ်ရှုကြည့်ကြပါစို့။

လူ့စိတ်နှလုံးသည် ဆိုးညစ်မိုက်မဲခြင်း သိုက်မြိုယံဖြစ်သည်။ သို့သော် မိမိစိတ်နှလုံးသည် ထိုသို့ မိုက်မဲကြောင်း မထင်မှတ်ကြ။ ထိုမျှ ဆိုးရွားမည်ဟု မထင်မြင်ကြ။ အမှန်စင်စစ် လူ့စိတ်နှလုံးသည် ထင်သည်ထက် ပိုမိုဆိုးဝါးပါသည်။ မိမိစိတ်နှလုံး မိုက်မဲမှု အသိတရားတွင် လူသည် သူငယ်နှပ်စားအဆင့်သာ ရှိကြသည်။ စိတ်နှလုံး၊ လူ့အသိဉာဏ်တရားသည် ကောက်ကျစ်စဉ်းလဲမှုတွင် သရဖူဆောင်းသည်။ စဉ်းလဲယုတ်မာမှု၏ ဘူမိနက်သန်နေရာ ဖြစ်သည်။ ပါးနပ်စွာလည်း မှားယွင်းတတ်သည်။ စဉ်းလဲယုတ်မာသည်။ ယာကုပ်၏ အမည်နာမအတိုင်း ကောက်ကျစ်စဉ်းလဲသည်။ ပျားရည်စမ်းသောအဆိပ်၊ အဆိပ်ပါသော သကာကဲ့သို့ ဖြစ်သည်။ ဆေးဆိုး ပန်းရိုက်မျက်နှာထား အမျိုးမျိုး ပြောင်းလဲတတ်သော်လည်း အတွင်းသရုပ်မှာ ပုပ်ပျက်နေသည်။ ငြိမ်သက်ခြင်း ဟု နှုတ်ဖျားမှ ကြွေးကြော်သော်လည်း စိတ်နှလုံးမှာမူ ဗလောင်ဆူနေသည်။ ထိုသို့သောသူများ၏ ရင်ထဲတွင် ဘုရားသခင်မရှိ။ ဘုရားသခင်ကို မမြင်နိုင်။ ဘုရားသခင်ကိုလည်း အလိုမရှိကြ။ ငြိမ်သက်ခြင်းရှိလေဟန် လူမြင်ကောင်းအောင် လုပ်ကြသည်။ လူ့စိတ်နှလုံးသည် လိမ်ညာကောက်ကျစ်ခြင်းဖြင့် ပြည့်နှက်သည်။ မူယာမာယာ ကြွယ်ဝသည်။ ထိုသို့ ဟန်ဆောင်လိမ်ညာခြင်းက မိမိကိုယ်ကို ပြန်လည်ပျက်စီးစေပါသည်။ မိမိကိုယ်ကို လိမ်ညာခြင်းဖြင့် လှည့်ဖျားဖျက်ဆီးတတ်ကြသည်။ လူ့စိတ်နှလုံးသည် ကြောက်ခမန်းလိလိ ဆိုးညစ်သည်။ ဆိုးဝါးသည်။ အပြင်းအထန် ဆိုးဝါးသည်။ မတရားမှုကို နှစ်သက်လွယ်သည်။ အမှာအယွင်းများ၏ မိခင်၊ ပျက်စီးခြင်း၏ ဦးစီးဦးဆောင်ဖြစ်သည်။ ဘုရားသခင်၏ အလင်းဖြင့် မီးမောင်းထိုးကြည့်လျှင် အဘယ်မျှဆိုးညစ်ကြောင်း တွေ့ရှိရမည်နည်း။ မိမိစိတ်နှလုံး ဆိုးညစ်မှုကို အဘယ်သူ မြင်နိုင်မည်နည်း။ လူ့စိတ်နှလုံး ဆိုးညစ်ပုံကို မည်သူ သိရှိနိုင်သနည်း။၂၁

၁၇:၁၂-၁၈ ယုဒတို့၏ နေရာကို လုံခြုံသန့်ရှင်းသော ဌာနတော် အဖြစ် သတ်မှတ်ပေးထားသောကြောင့် ယေရမိက ဘုရားသခင်အား ချီးမွမ်းသည်။ ဣသရေလတို့၏ မျှော်လင့်ရာ ထာဝရဘုရားကို ယုဒလူမျိုးများအစား ကျေးဇူးစကား ဆိုသည်။ ကွယ်ကာစောင့်မခြင်း၊ အနာရောဂါကင်းငြိမ်းခြင်းအတွက် နာမတော် ချီးမွမ်းသည်။ ပရိသတ်ကလည်း ဘုရားသခင်က အပြစ်တရားစီရင်မည်ဟူသော ကတိတော်သည် အဘယ်မှာနည်းဟု မေးငေါ့ကြသည်။ ယေရမိက ဘုရားသခင်ထံ ထပ်မံလျှောက်လဲသည်။ သူသည် ဘုရားသခင်၏ အိုးထိန်းဘဝမှ ထွက်ပြေးရန် မကြိုးစားပါ။ ယေရုရှလင်မြို့ ပျက်စီးမည့် အမင်္ဂလာသတင်းကိုလည်း မကန့်ကွက်ရဲပါ။ ဘုရားသခင်၏ နှုတ်ကပတ်တော်စကားကိုသာ ဟောပြောပါမည်ဟု ဆိုမည်။ ဘုရားသခင်၏ နှုတ်ကပတ်တော်ကို မထီလေးစား ပြက်ယယ်ပြုသူများကိုသာ အပြစ်တရား စီရင်ဖို့ တောင်းလျှောက်သည်။

(စ) ယေရမိ၏ ဥပုသ်နေ့အကြောင်း ဒေသနာ (၁၇:၁၉–၂၇)

ဤတံခါးတို့ဖြင့် ဝင်ထွက်သွားလာသော ယုဒဘုရင်များနှင့် ယုဒပြည်သူ ယေရုရှလင်သားများသို့ ဥပုသ်နေ့အကြောင်း မိန့်တော်မူသည်။ အကယ်၍ သတိပေးချက် (ယေရုရှလင်မြို့ ပျက်သုဉ်းမည့်အကြောင်း) နာခံ၍ ယုံကြည်ခြင်းရှိကြလျှင် ဒါဝိဒ်၏ နန်းမျိုးနွယ်ဆက် ထီးမွေနန်းမွေ ခံစားကြမည်။ ဗိမာန်တော်တွင်လည်း ချမ်းမြေ့စွာဝတ်ပြုမည်ဟု ကတိတော်ပြုထားသည်။

ဣသရေလလူမျိုးအတွက် ဥပုသ်နေ့အရေးကြီးပုံကို Iriving L. Jensen က ဤသို့ ရှင်းပြထားသည်။

ဘုရားသခင် အမှန်တကယ် အလိုတော်ရှိသည်မှာ နှုတ်ကပတ်တော်နာခံခြင်း ဖြစ်သည်။ ဣသရေလများ အထွဋ်အမြတ်ထားသည့် ပညတ်တရားတစ်ခုမှာ ဥပုသ်နေ့တွင် အလုပ်မလုပ်ဘဲ ငြိမ်ဝပ်စွာဝတ်ပြုကိုးကွယ်ခြင်း ဖြစ်သည်။ (၁၇: ၂၁-၂၂)။ ထိုပညတ်တရားသည် ဘုရားသခင်၏ လူများအပါအဝင် ရုပ်တုပစ္စည်း များအားလုံးသို့လည်း အကျိုးသက်ရောက်သည်ဟု ခံယူကြသည်။ ပညတ်တော်ဆယ်ပါးသည် လူဝတ်ကြောင်များအတွက်လား၊ ခွဲခြားမရအောင် စွဲလန်းနေကြသည်။ ဥပုသ်နေ့စောင့်ထိန်းခြင်းသည် ယုဒများအတွက် ထိုမျှပြင်းထန်သလား။ ယေရမိ၏ စကားသည် ယုဒများ၏ ဥပုသ်နေ့ သဘောထားကို ဖော်ဆောင်သည်။၂၂

ယုဒလူများအတွက် ဥပုသ်နေ့သည် အရေးကြီးသကဲ့သို့ ခရစ်ယာန်အတွက်လည်း ဘုရားသခင်၏ နေ့ရက်ရှိသည်။ ထိုနေ့ရက်သည် ကိုယ်စိတ်ဝိညာဉ် နှိုးထရွှင်လန်းရာနေ့ရက် ဖြစ်သည်။ လူသားများအဖြစ် ကယ်တင်ခြင်း ပြည့်စုံသောနေ့၊ ခရစ်တော်ဘုရား ဖြစ်သည်။ ထမြောက်ရာနေ့ရက် ဖြစ်သည်။ ကိုယ်တော်ဘုရား၏ အောင်မြင်ခြင်းအား ဝမ်းမြောက်ကြိုဆိုသောနေ့ရက်သစ် ဖြစ်သည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။