Jeremiah -18 -

ယေရမိအနာဂတ္တိကျမ်း - ၁၈

အိုးထိန်းသမားနှင့်အိုးမြေ

1ယေရမိသို့ရောက်လာသော ထာဝရဘုရား၏နှုတ်ကပတ်တော်ဟူမူကား၊ 2သင်သည် ထ၍ အိုးထိန်းသမားအိမ်သို့ သွားလော့။ ထိုအရပ်၌ ငါ့စကားကို ငါကြားစေမည်ဟု မိန့်တော်မူသည်အတိုင်း၊ 3ငါသည်သွား၍၊ အိုးထိန်းစက်နှင့် လုပ်လျက်ရှိသော အိုးထိန်းသမားကိုတွေ့၏။ 4အိုးမြေဖြင့် လုပ်သောအိုးသည်၊ အိုးထိန်းသမားလက်၌ပျက်စီးသောကြောင့်၊ သူသည် အလိုအလျောက်အသစ်ပြုပြင်၍၊ အခြားသောအိုးကို လုပ်ပြန်လေ၏။ 5ထိုအခါ ထာဝရဘုရား၏ နှုတ်ကပတ်တော်သည် ငါ့ဆီသို့ရောက်လာ၍၊ ထာဝရဘုရား မိန့်တော်မူသည်ကား၊ 6အို ဣသရေလအမျိုး၊ အိုးထိန်းသမားပြုသကဲ့သို့ သင်တို့ကိုငါမပြုနိုင်သလော။ အို ဣသရေလအမျိုး၊ အိုးမြေသည် အိုးထိန်းသမားလက်၌ရှိသကဲ့သို့ သင်တို့သည် ငါ့လက်၌ရှိကြ၏။ 7အကြင်တိုင်းနိုင်ငံကို နုတ်ပယ်ဖြိုချ ဖျက်ဆီးခြင်းငှာ ငါအမိန့်တော်ရှိ၏။ 8ငါ့အမိန့်တော်နှင့် ဆိုင်သော ထိုတိုင်းနိုင်ငံသည် မိမိဒုစရိုက်ကို စွန့်ပစ်လျှင်၊ ငါကြံစည်သောဘေးဒဏ်ကို ငါနောင်တရမည်။ 9အကြင်တိုင်းနိုင်ငံကို တည်ထောင်ပြုစုခြင်းငှာ ငါအမိန့်တော်ရှိ၏။ 10ထိုတိုင်းနိုင်ငံသည် ငါ့စကားကို နားမထောင်၊ ငါ့မျက်မှောက်၌ ဒုစရိုက်ကိုပြုလျှင်၊ သူ၏အကျိုးအလိုငှာ ပြုစုမည်ဟူသော စကား၌ပါသောကျေးဇူးကို ငါနောင်တရမည်။

11ယခုမှာ ထာဝရဘုရား မိန့်တော်မူသည်ကား၊ သင်တို့အဖို့ ဘေးဒဏ်ကို ငါပြင်ဆင်၏။ သင်တို့ကို ဆန့်ကျင်ဘက်ပြု၍ ငါကြံစည်၏။ သို့ဖြစ်၍၊ ဆိုးသောလမ်းမှ အသီးအသီး ပြန်လာကြလော့။ သင်တို့လိုက်သောလမ်းနှင့် သင်တို့ကျင့်သော အကျင့်ကို ဖြောင့်စေကြလော့ဟု၊ ယုဒပြည်သူ၊ ယေရုရှလင်မြို့သားတို့အား ဆင့်ဆိုလော့။ 12သူတို့ကလည်း၊ မျှော်လင့်စရာမရှိ။ ငါတို့သည် ကိုယ်အလိုသို့ လိုက်မည်။ ငါတို့၌ ဆိုးသောစိတ်နှလုံး ခိုင်မာခြင်းရှိသည်အတိုင်း၊ အသီးအသီးပြုမည်ဟု ဆိုကြ၏။

ဣသရေလတို့၏ရွံရှာဖွယ်အမှု

13သို့ဖြစ်၍၊ ထာဝရဘုရား မိန့်တော်မူသည်ကား၊ ထိုသို့သောအမှုကို အဘယ်သူကြားဖူးသနည်းဟု သာသနာပလူတို့တွင် မေးကြလော့။ ဣသရေလသတို့သမီးကညာသည် အလွန်စက်ဆုပ် ရွံရှာဖွယ်သောအမှုကို ပြုလေပြီ။ 14လွင်ပြင်၌ရှိသော ကျောက်ကို မစွန့်၊ လေဗနုန်တောင်၏မိုးပွင့်ကို အဘယ်သူ စွန့်မည်နည်း။ အခြားတစ်ပါးသောအရပ်မှစီးလာ၍ ချမ်းဧသော မြစ်ရေသည် ခန်းခြောက်လိမ့်မည်လော။ 15ငါ၏လူတို့သည် ငါ့ကိုမေ့လျော့၍၊ အချည်းနှီးသောအရာရှေ့မှာ နံ့သာပေါင်းကို မီးရှို့ကြပြီ။ ရှေးကာလမှစ၍ လိုက်ဖူးသော လမ်းတို့၌ လဲတတ်သောကြောင့်၊ အခြားသောလမ်း၊ မြေမဖို့သောလမ်းသို့ လိုက်ကြပြီတကား။ 16ထိုသို့ပြု၍ မိမိတို့ပြည်ကို လူဆိတ်ညံရာအရပ်၊ အစဉ်ကဲ့ရဲ့သံကြားရာအရပ် ဖြစ်စေသဖြင့်၊ လမ်း၌လျှောက်သွားသော သူအပေါင်းတို့သည်အံ့ဩ၍၊ မိမိတို့ခေါင်းကို ညိတ်ကြလိမ့်မည်။ 17ငါသည် အရှေ့လေကဲ့သို့ သူတို့ကို ရန်သူရှေ့မှာ လွင့်စေမည်။ ဘေးရောက်သောကာလ၌ သူတို့အား မျက်နှာကိုမပြ၊ ကျောကိုပြမည်။

ယေရမိအပေါ်ကြံစည်ခြင်း

18သူတို့ကလည်း လာကြ။ ယေရမိတစ်ဖက်၌ ကြံစည်ကြကုန်အံ့။ ယဇ်ပုရောဟိတ်သည် တရားအမှု၌လည်းကောင်း၊ ပညာရှိသောသူသည် အကြံပေးခြင်းအမှု၌လည်းကောင်း၊ ပရောဖက်သည် ဟောပြောခြင်းအမှု၌လည်းကောင်း အရှုံးမခံရ။ လာကြ။ ယေရမိကို လျှာနှင့်ရိုက်ကြကုန်အံ့။ သူ၏စကားကို နားမထောင်ဘဲ နေကြကုန်အံ့ဟုဆိုကြ၏။

19အို ထာဝရဘုရား၊ အကျွန်ုပ်ကို ကြည့်ရှုတော်မူပါ။ အကျွန်ုပ်နှင့် ရန်တွေ့သောသူတို့၏စကားကို မှတ်တော်မူပါ။ 20ကျေးဇူးပြုသောအတွက် အပြစ်ပေးသင့်ပါမည်လော။ သူတို့သည် အကျွန်ုပ်အသက်ဖို့ တွင်းကို တူးကြပါပြီ။ အကျွန်ုပ်သည် သူတို့ အကျိုးအလိုငှာ လျှောက်၍၊ သူတို့မှအမျက်တော်ကို လွှဲခြင်းငှာ၊ ရှေ့တော်၌ ရပ်နေကြောင်းကို အောက်မေ့တော်မူပါ။ 21ထိုကြောင့်၊ သူတို့ကို ဓားဘေးသို့လည်းကောင်း၊ သူတို့သားသမီးများကို မွတ်သိပ်ခြင်းသို့လည်းကောင်း အပ်တော်မူပါ။ သူတို့မိန်းမတို့သည် သားများဆုံး၍ မုဆိုးမဖြစ်ကြပါစေသော။ လူကြီးတို့သည် အသေသတ်ခြင်းကို ခံရ၍၊ လူပျိုတို့လည်း စစ်တိုက်ပွဲ၌ ဓားဖြင့် ဆုံးကြပါစေသော။ 22စစ်တိုက်သော ရန်သူများကို သူတို့ရှိရာသို့ ချက်ချင်းရောက်စေတော်မူသောအခါ၊ သူတို့အိမ်သားများ အော်ဟစ်ကြပါစေသော။ အကြောင်းမူကား၊ အကျွန်ုပ်ကို ထောင်ခြင်းငှာ တွင်းကိုတူးကြပါပြီ။ အကျွန်ုပ်သွားရာလမ်း၌ ကျော့ကွင်းကို ဝှက်ထားကြပါပြီ။ 23အို ထာဝရဘုရား၊ အကျွန်ုပ်အသက်ကို သတ်ခြင်းငှာ၊ သူတို့ ကြံစည်သမျှကို ကိုယ်တော်သိတော်မူ၏။ သူတို့ကို အပြစ်မှ လွှတ်တော်မမူပါနှင့်။ မျက်မှောက်တော်၌ သူတို့အပြစ်ကို ချေတော်မမူပါနှင့်။ ရှေ့တော်၌ ဆုံးရှုံးကြပါစေသော။ အမျက်တော်ထွက်သောအခါ၊ သူတို့ကို စီရင်တော်မူပါ။

ယေရမိအနာဂတ္တိကျမ်း - ၁၈ (အနက်ဖွင့်)

(ဆ) အိုးထိန်းသမား အိမ်ရောက်ယေရမိ (အခန်း၁၈)

၁၈:၁–၁၂ ဘုရားသခင်ကို အိုးထိန်းသည်၊ ယုဒ (ဤနေရာတွင် ဣသရေလဟုသုံးသည်) ကို မြေအိုးအဖြစ် ပုံနှိုင်းထားသည်။ မြေအိုးများကွဲခြင်းသည် အိုးထိန်းသည် ဘုရားသခင်၏ အမှားအယွင်းမဟုတ်။ ဣသရေလတို့၏ အပြစ်ဖြစ်သည်။ ဘုရားသခင် လက်တော်ထဲရှိ ရွှံ့စေးမြေသည် အလိုတော်အတိုင်း ပြုပြင်နိုင်စွမ်း ရှိသည်။ မင်္ဂလာတရား ဖြစ်စေနိုင်သကဲ့သို့ အမင်္ဂလာလည်း ဖြစ်စေနိုင်သည်။ အကယ်၍ နောင်တရခြင်း မရှိလျှင် ဘေးအန္တရာယ် ရင်ဆိုင်ကြရမည်။ သို့သော် နောင်ကြဉ်ခြင်း မရှိ။ မိမိသဘောအတိုင်း ထင်ရာစိုင်းနေကြသည်။

၁၈:၁၃–၁၇ ယုဒတို့၏ အပြုအမူအနေအထိုင်များသည် မသင့်မလျှော်၊ လမ်းလွဲနေကြသည်ဟု ဘုရားသခင်က ရှုတ်ချသည်။ ရုပ်တုဆင်းတု ကိုးကွယ်ခြင်းဖြင့် အကျင့်ဖောက်ပြန်ကြ၍ ပျက်စီးခြင်းကို လက်ယပ်ခေါ်နေကြသည်။ ထိုသူ များ၏ နေရပ်ဌာနသည် လူခြေတိတ်ဆိတ် လွင်တီးခေါင်ပြင် အဖြစ်တွေ့မြင်ဦးမည်။ RSV ကျမ်းမူက အပိုဒ်ငယ်(၁၄)ကို လေဗနုန်ရေခဲတောင်ထိပ်ရှိ ကျောက်ဆောင်များကို မည်သူစွန့်သနည်း” ဟု ဆိုသည်။ လူသည် သဘာဝ ရုပ်ဝတ္ထုပစ္စည်းအပေါ်တွင် တည်မှီသော်လည်း ဘုရားသခင်က အသက်စမ်းရေ မေ့လျှော့ကြပါစေ၊ အသက်ရှင်သော စမ်းရေကြည်သည် စီးမြဲ စီးနေမည်။၂၃

၁၈:၁၈ ယေရုရှလင်သားများသည် ပရောဖက်ယေရမိစကားကို ဆန့်ကျင်လျက် ရန်မူကြသည်။ ရှိရင်းစွဲ ပရောဖက်နှင့် ယဇ်ပုရောဟိတ်များနှင့် ပူးပေါင်းလျက်ပုန်ကန်ကြသည်။

၁၈:၁၉–၂၃ သို့သော်လည်း ယေရမိသည် ထိုသူများအတွက် ဘုရားသခင်ထံတော်သို့ ဆုတောင်းပေးသည်။ စိတ်နှလုံး ခံယူချက်များ ပြောင်းလဲစေလိုသည်။ ကျေးဇူးတော်ကာလ၌လည်း ယုံကြည်သူများ၏ ဆုတောင်းခြင်းသည် ထိုဆုတောင်းခြင်းမျိုး ဖြစ်ရမည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။