Jeremiah -15 -

ယေရမိအနာဂတ္တိကျမ်း - ၁၅

ယုဒပြည်အတွက်ကံကြမ္မာဆိုး

1တစ်ဖန် ထာဝရဘုရားသည် ငါ့အားမိန့်တော်မူသည်ကား၊ မောရှေနှင့် ရှမွေလသည် ငါ့ရှေ့မှာဆုတောင်းသော်လည်း၊ ဤလူမျိုးကို ငါမသနား။ ငါ့ထံမှ ထွက်သွားစေခြင်းငှာနှင်ထုတ်လော့။ 2အကျွန်ုပ်တို့သည် အဘယ်အရပ်သို့ ထွက်သွားရပါမည်နည်းဟု မေးမြန်းလျှင်၊ သင်ကလည်း၊ သေတန်သောသူတို့သည် သေခြင်းသို့လည်းကောင်း၊ ကွပ်မျက်တန်သော သူတို့သည် ကွပ်မျက်ခြင်းသို့လည်းကောင်း၊ ငတ်မွတ်တန်သောသူတို့သည် ငတ်မွတ်ခြင်းသို့လည်းကောင်း၊ သိမ်းသွားချုပ်ထားတန်သော သူတို့သည် သိမ်းသွားချုပ်ထားခြင်းသို့လည်းကောင်း ထွက်သွားကြဟု ထာဝရဘုရား မိန့်တော်မူကြောင်းကို သူတို့အားဆင့်ဆိုလော့။ 3သူတို့ကို သတ်ရသောဓား၊ ဆွဲဖြတ်ရသောခွေး၊ ကိုက်စားရသောမိုးကောင်းကင်ငှက်နှင့် သားရဲတည်းဟူသော ရန်သူလေးမျိုးကို သူတို့တစ်ဖက်၌ ငါခန့်ထားမည်။ 4ယုဒရှင်ဘုရင်ဟေဇက်သား မနာရှေမင်းသည် ယေရုရှလင်မြို့၌ပြုသောအမှုကြောင့်၊ ထိုသူတို့ကို မြေကြီးပေါ်မှာအတိုင်းတိုင်း အပြည်ပြည်တို့၌ အနှောင့်အယှက်ကိုခံစေမည်။ 5အို ယေရုရှလင်မြို့၊ သင့်ကို အဘယ်သူသနားလိမ့်မည်နည်း။ သင်နှင့်အတူ အဘယ်သူ ညည်းတွားလိမ့်မည်နည်း။ သင့်ကို ကျန်းမာ၏လောဟုမေးအံ့သောငှာ၊ အဘယ်သူလမ်းလွှဲလိမ့်မည်နည်း။ 6ထာဝရဘုရားမိန့်တော်မူသည်ကား၊ သင်သည် ငါ့ကိုစွန့်ပစ်၍ ဆုတ်သွားပြီ။ ထိုကြောင့်၊ ငါသည် လက်ကိုဆန့်၍ သင့်ကိုဖျက်ဆီးမည်။ ငါသည် နောင်တရ၍ငြီးငွေ့ပြီ။ 7ပြည်တံခါးဝ၌ သူတို့ကို ဆန်ကောနှင့်ငါလှေ့မည်။ သူတို့သားသမီးများကို ငါရှုံးစေမည်။ ငါ၏လူမျိုးသည် မိမိလိုက်သွားသောလမ်းမှ မပြန်လာသောကြောင့်၊ သူတို့ကိုငါဖျက်ဆီးမည်။ 8သူတို့မုဆိုးမတို့သည် သမုဒ္ဒရာသဲလုံးနှင့် အမျှမက၊ ငါ့ရှေ့မှာများပြားကြလိမ့်မည်။ မွန်းတည့်အချိန်၌ အမိကို တိုက်ဖျက်သော လုလင်ကိုငါခေါ်ခဲ့၍၊ ကြောက်မက်ဖွယ်သောလုပ်ကြံခြင်းကို ချက်ချင်းဖြစ်စေမည်။ 9သားခုနစ်ယောက်ကို ဖွားမြင်သောမိန်းမသည် အားလျော့၍ အသက်ချုပ်လေ၏။ ညအချိန်မရောက်မီ သူ၏နေဝင်လေ၏။ သူသည် ရှက်ကြောက်မှိုင်တွေလျက်နေရ၏။ ကျန်ကြွင်းသောသူတို့ကိုလည်း၊ ရန်သူတို့ရှေ့မှာ၊ ဓား၌ငါအပ်မည်ဟု ထာဝရဘုရားမိန့်တော်မူ၏။

ထာဝရဘုရားထံမြည်တမ်းခြင်း

10အို မိခင်၊ ငါ၌ အမင်္ဂလာရှိ၏။ မိခင်သည် တစ်ပြည်လုံးရန်တွေ့သောသူ၊ ငြင်းဆန်သောသူဖြစ်သော ငါ့ကို ဖွားမြင်ပါပြီ။ ငါသည် သူတစ်ပါးကို အတိုးနှင့် မချေး။ သူတစ်ပါးသည်လည်း ငါ့ကိုအတိုးနှင့်မချေး။ သို့သော်လည်း၊ လူခပ်သိမ်းတို့သည် ငါ့ကို ကျိန်ဆဲတတ်ကြ၏။ 11ထာဝရဘုရား မိန့်တော်မူသည်ကား၊ အကယ်စင်စစ် သင့်ကို ငါချမ်းသာပေးမည်။ အမှုရောက်သောကာလ၊ ညှဉ်းဆဲခြင်းကိုခံရသော ကာလ၌၊ ရန်သူသည် သင့်ထံမှာတောင်းပန်မည်အကြောင်း၊ အကယ်စင်စစ် ငါစီရင်မည်။

12သံချင်းတိုက်သောအခါ မြောက်ပြည်သံကိုလည်းကောင်း၊ သံမဏိကိုလည်းကောင်း ချိုးနိုင်သလော။ 13သင်၏ပြည် တစ်လျှောက်လုံး၌ သင်ပြုသောအပြစ်များကြောင့်၊ သင်၏ဥစ္စာဘဏ္ဍာကို အဖိုးမခံဘဲ လုယူသော သူတို့လက်သို့ ငါပေးမည်။ 14သင်မသိသောပြည်သို့ ရန်သူနှင့်အတူ သင့်ကိုငါသွားစေမည်။ သင်တို့ကို လောင်သောမီးသည် ငါ့အမျက်အားဖြင့် ရှို့လျက်ရှိ၏။

15အို ထာဝရဘုရား၊ ကိုယ်တော်သည် သိတော်မူ၏။ အကျွန်ုပ်ကိုအောက်မေ့လျက် အကြည့်အရှုကြွလာ၍၊ အကျွန်ုပ်ကို ညှဉ်းဆဲသောသူတို့ကို တရားသဖြင့် ပေးတော်မူပါ။ သူတို့ကိုသည်းခံ၍၊ အကျွန်ုပ်ကို သုတ်သင်ပယ်ရှင်းတော် မမူပါနှင့်။ အကျွန်ုပ်သည် ကိုယ်တော်အတွက် ကဲ့ရဲ့ခြင်းခံရကြောင်းကို အောက်မေ့တော်မူပါ။ 16ကောင်းကင်ဗိုလ်ခြေအရှင် ဘုရားသခင် ထာဝရဘုရား၊ အကျွန်ုပ်တွေ့သော နှုတ်ကပတ်တော်စကားကို ခံယူပါပြီ။ နှုတ်ကပတ်တော်သည် အကျွန်ုပ် ဝမ်းမြောက်ရွှင်လန်းစရာအကြောင်း ဖြစ်ပါ၏။ နာမတော်ဖြင့် အကျွန်ုပ်ကို ခေါ်ဝေါ်ပါ၏။ 17ပွဲခံသောသူ အစည်းအဝေး၌ အကျွန်ုပ်မထိုင်ပါ။ ပျော်ရွှင်ခြင်းအမှုကို မပြုပါ။ လက်တင်တော်မူသောကြောင့်၊ တစ်ယောက်တည်း ထိုင်ပါပြီ။ အကျွန်ုပ်ကို ဒေါသအမျက်နှင့် ပြည့်စေတော်မူပြီ။ 18အကျွန်ုပ်ခံရသောဝေဒနာသည် အဘယ်ကြောင့် မြဲပါသနည်း။ မပျောက်လို၊ မပျောက်နိုင်သောအနာကို အဘယ်ကြောင့် ခံရပါသနည်း။ အကယ်စင်စစ် ကိုယ်တော်သည်ပျောက်တတ်၍၊ လှည့်စားသောရေကဲ့သို့ အကျွန်ုပ်၌ ဖြစ်တော်မူပါပြီတကား။

19ထိုကြောင့်၊ ထာဝရဘုရား မိန့်တော်မူသည်ကား၊ သင်သည်ပြန်လာလျှင်၊ သင့်ကိုငါဆောင်ခဲ့၍၊ သင်သည် ငါ၏အမှုကို ထမ်းရလိမ့်မည်။ သင်သည် မြတ်သောအရာနှင့် ယုတ်သောအရာတို့ကို ပိုင်းခြားခွဲထားလျှင်၊ ငါ့နှုတ်ကဲ့သို့ ဖြစ်ရလိမ့်မည်။ သူတို့သည် သင့်ထံသို့ ပြန်လာကြလိမ့်မည်။ သင်သည် သူတို့ရှိရာသို့ ပြန်၍မသွားရ။ 20ငါသည်လည်း သင့်ကို ဤလူမျိုးတစ်ဖက်၌ ခိုင်ခံ့သောကြေးဝါမြို့ရိုး ဖြစ်စေမည်။ သူတို့သည် သင့်ကိုတိုက်၍ မနိုင်ရကြ။ ငါသည် သင့်ကို နုတ်ယူကယ်တင်ခြင်းငှာ သင့်ဘက်၌နေမည်။ 21လူဆိုးလက်မှ သင့်ကိုငါနုတ်၍၊ ကြောက်မက်ဖွယ်သော သူတို့လက်မှ ရွေးယူမည်ဟု ထာဝရဘုရား မိန့်တော်မူ၏။

ယေရမိအနာဂတ္တိကျမ်း - ၁၅ (အနက်ဖွင့်)

၁၅:၁–၄ ပရောဖက် ယေရမိက ကြားဝင်ဆောင်ရွက်ပေးသော်လည်း ယုဒလူများသည် အလိုက်ကမ်းဆိုး မသိကြ။ ဆိုးသွမ်းမြဲ ဆိုးသွမ်းယုတ်ကမ်းကြသည်။ သို့ကြောင့် စီရင်ပြီးသည့်အတိုင်း ဓါးဘေး၊ ငတ်မွတ်ဘေး ကျရောက်သည့်အပြင် ဖမ်းဆီးခေါ်ဆောင်ခြင်း ခံကြသည်။ မောရှေနှင့် ရှမွေလကဲ့သို့သော ရွှေပြည်အေးဆရာကြီးများပင်လျှင် ဘုရားရှင်၏ အပြစ်တရား စီရင်ခြင်းကို မပြောင်းလဲစေနိုင်ကြ။ ယေရုရှလင်တွင် မနာရှဲဘုရင်၏ ရုပ်တုဆင်းတု ကိုးကွယ်မှုနှင့် မောလက်ဘုရား ကိုးကွယ်မှု (၄ရာ၂၁:၁-၁၆) တို့ကြောင့် အပြစ်တရားစီရင်ခြင်း ခံကြရမည်။

၁၅:၅–၉ ဘုရားသခင်၏ သတိပေးမှု ပဲ့ပြင်ဆုံးမမှု မနာခံကြသောကြောင့် ယေရုရှလင်မြို့သည် နှမြောဖွယ်ရာ ပြိုလဲပျက်စီးခဲ့သည်။ သားသမီးများနှင့် သိုက်သိုက်ဝန်းဝန်း ပျော်ရွှင်ခဲ့သော မိန်းမကြီးသည် ဥကွဲသိုက်ပျက်ခဲ့ရပြီ။ သားသမီးများ ဖရိုဖရဲ ပျောက်လွှင့်ကုန်သည်။

၁၅:၁၀–၁၈ ယုဒလူများက ပရောဖက်ယေရမိကို အကြောင်းမရှိ မုန်းတီးကြသည်။ သို့သော်လည်း ရန်သူများက ယုဒပြည်လာရောက် ချဉ်းနင်းသော အခါအပြစ်မရှိကြောင်း ထင်ရှားမည်ဟု ဘုရားရှင်က ကတိတော်ပေးထားသည်။ ယုဒများသည် မြောက်ပြည်မှ သံချောင်း (ခါလဒဲရှန်)ကို ချိုးနှိမ်နိုင်မည် မဟုတ်။ တွန်းလှန်ချိုးဖျက်ဖို့ နေနေသာသာ ထိုခါလဒဲများက ယုဒတို့၏ စည်းစိမ်ဥစ္စာများကို လူယူသွားမည်။ ပရောဖက်ကြီးသည် ဘုရားသခင်ကို သစ္စာရှိရှိ ယုံကြည်သူ ဖြစ်လျက်နှင့် ညှဉ်းပန်းနှိပ်စက်ခြင်း ဆင်းရဲဒုက္ခ ကြုံတွေ့နေသောကြောင့် နားမလည်နိုင်အောင် ဖြစ်နေသည်။ သို့သော် အဆုံးတွင်မူ ဘုရားသခင်၏ နှုတ်ကပတ်တော်ကို ဆင်ခြင်ခြင်းဖြင့် ပျော်ရွှင်ခြင်း၊ ချမ်းမြေ့ခြင်း ရရှိသည်။

၁၅:၁၉–၂၁ ယေရမိ၏ အတွေးသည် ဘုရားသခင်၏ အဖြေစကားနှင့် အံချော်နေသည်။ ယေရမိ၏ အတွေးများသည် အချိန်တိုင်းတွင် စိတ်နာကျင်စရာများသာ ဖြစ်ခဲ့သည်။ ယုဒလူများသည် ဘုရားရှင်ထံတော်ပါး မှထွက်သွားကြသဖြင့် မြတ်သောအရာမှ ယုတ်သောအရာ ဖြစ်ခဲ့ကြသည်။ ရန်သူများ ရောက်လာကြမည်။ သို့သော် ယေရမိသည် ထိုလူများထံသို့ သွားရမည်မဟုတ်။ ထိုအကြောင်းကို G.Campbell Morgan က ဤသို့ဆိုထားသည်။

ယေရမိသည် စိတ်နှလုံးတော်တည်ရာမရ၊ လေလွင့်နေသော အခါ ဘုရားသခင်ထံမှ သမ္မာတရားရရှိဖို့ တစ်ယောက်တည်း အာရုံပြုဆုတောင်းသည်။ ထိုသို့ဖြင့် တဖြည်းဖြည်း တစ်စပြီးတစ်စ ဘုရားသခင်၏ နှုတ်တော်ထွက် စကားများကို ကြားသိလာသည်။ ၁၇ ဘုရားသခင်က ပရောဖက် ယေရမိအား ကြေးဝါမြို့ရိုးသဖွယ် ခိုင်ခံ့စေသဖြင့် တော်လှန်ဖိစီးသူများက မပြိုလဲနိုင်။ ဘုရားသခင်က သူစေတမန်အား အမြဲ ကွယ်ကာ စောင့်ထိန်းပေးသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။