Hosea -13 -

ဟောရှေအနာဂတ္တိကျမ်း - ၁၃

ဣသရေလတို့အပေါ်စီရင်ချက်

1ဧဖရိမ်သည် နှုတ်မြွက်သောအခါ သူတစ်ပါးကြောက်လန့်တတ်၏။ သူသည် ဣသရေလအမျိုး၌ မြင့်မြတ်၏။ နောက်တစ်ဖန် ဗာလဘုရားအားဖြင့် ပြစ်မှားသောကြောင့် သေ၏။ 2ယခုမှာ အထပ်ထပ်ပြစ်မှား၍ ကိုယ်ဉာဏ်ပညာအားဖြင့် အရည်သွန်းသော ငွေရုပ်တု၊ ဆရာသမား လုပ်တတ်သော ရုပ်တုဆင်းတုများကို ကိုယ်အဖို့ လုပ်ကြ၏။ လုပ်ပြီးမှ ယဇ်ပူဇော်သောသူသည် နွားသငယ်ကို နမ်းစေဟု ဆိုတတ်ကြ၏။ 3ထိုကြောင့်၊ သူတို့သည် နံနက်မိုးတိမ်ကဲ့သို့လည်းကောင်း၊ စောစောကွယ်ပျောက်တတ်သော နှင်းကဲ့သို့လည်းကောင်း၊ ကောက်နယ်တလင်းမှ လေပွေတိုက်သွားသော ဖွဲကဲ့သို့လည်းကောင်း၊ မီးဖိုထဲကထွက်သော မီးခိုးကဲ့သို့လည်းကောင်း ဖြစ်ရကြလိမ့်မည်။ 4သို့ရာတွင်၊ ငါထာဝရဘုရားသည် သင့်ကို အဲဂုတ္တုပြည်မှ ကယ်နုတ်သော သင်၏ဘုရားသခင်ဖြစ်၏။ ငါမှတစ်ပါး အခြားသော ဘုရားသခင်ကို သင်မသိပြီ။ ငါမှတစ်ပါး ကယ်တင်နိုင်သော သခင်မရှိ။ 5အလွန်သွေ့ခြောက်သော အရပ်တည်းဟူသော တော၌ပင် သင့်ကို ငါသိပြီ။ ကျက်စားရာအရပ်၌ ဝပြောစွာ စားရကြ၏။ 6ဝသောအခါ ဝါကြွားသောစိတ်ရှိ၍ ငါ့ကို မေ့လျော့ကြ၏။ 7ထိုကြောင့်၊ သူတို့၌ ငါသည် ခြင်္သေ့ကဲ့သို့ ဖြစ်မည်။ လမ်းနားမှာ ချောင်းသော ကျားသစ်ကဲ့သို့ သူတို့ကို ချောင်းမြောင်းမည်။ 8သားပျောက်သော ဝံမကဲ့သို့ သူတို့ကို ငါဆီးကြို၍၊ သူတို့နှလုံး၌ ဖုံးသောအမြှေးကို ဆုတ်ဖဲ့မည်။ ခြင်္သေ့မကဲ့သို့ တွေ့သောအရပ်၌ပင် ငါကိုက်စားမည်။ တောသားရဲဖြစ်၍ အပိုင်းပိုင်း ဆွဲဖြတ်မည်။

9အို ဣသရေလ၊ သင့်ကို ကယ်တင်နိုင်သောအရှင် ငါ့ကို သင်သည် ဆန့်ကျင်ဘက်ပြုသောကြောင့် အကျိုးနည်းရှိ၏။ 10သင်၏ ရှင်ဘုရင်သည် အဘယ်မှာ ရှိသနည်း။ သင့်နေရာမြို့ ရှိသမျှတို့၌ ကယ်တင်ပါစေသော။ သင်၏တရားသူကြီးတို့သည် အဘယ်မှာ ရှိကြသနည်း။ 11ရှင်ဘုရင်နှင့် မင်းများကို ပေးပါဟု သင်တောင်းသောကြောင့်၊ ငါအမျက်ထွက်၍ ရှင်ဘုရင်ကို ပေးပြီ။ တစ်ဖန်ပြင်းစွာ အမျက်ထွက်၍ ရှင်ဘုရင်ကို ပယ်ရှားပြီ။

12ဧဖရိမ်ပြုသော ဒုစရိုက်ကို ငါထုပ်ထား၍ သူ၏အပြစ်ကို သိုမှီးပြီ။ 13သူသည် သားဖွားသော မိန်းမကဲ့သို့ ဝေဒနာကို ခံရချိန်နီးပြီ။ မိုက်သောအမျိုးသားဖြစ်၏။ သားဖွားရာဝမ်းဝ၌ ကြာမြင့်စွာ နေပါသည်တကား။

14သူတို့ကို မရဏနိုင်ငံတန်ခိုးမှ ငါကယ်လွှတ်မည်။ သေမင်းလက်မှလည်း ရွေးမည်။ အို သေမင်း၊ သင့်ကို ကာလနာစွဲစေမည်။ အို မရဏနိုင်ငံ၊ သင်၌ ဖျက်ဆီးသောဘေးကို ရောက်စေမည်။ နောင်တရမည်အကြောင်းကို ပမာဏမပြု။

15မိမိညီအစ်ကိုတို့တွင် အသီးများစွာ သီးတတ်သော်လည်း၊ အရှေ့လေလာလိမ့်မည်။ ထာဝရဘုရား၏လေသည် တောမှလာ၍ သူ၏စမ်းရေတွင်းကို ခန်းခြောက်စေသဖြင့် ရေပြတ်လိမ့်မည်။ ဘဏ္ဍာတိုက်၌ ရှိသမျှသော တန်ဆာအကောင်းအမြတ်တို့ကို ရန်သူ လုယူလိမ့်မည်။ 16ရှမာရိမြို့သည် မိမိဘုရားသခင်ကို ပုန်ကန်သောကြောင့် ပျက်စီးလိမ့်မည်။ မြို့သားတို့သည် ဓားဖြင့်လဲ၍ သေကြလိမ့်မည်။ သူငယ်တို့သည် မြေပေါ်မှာ ဆောင့်ဖွပ်ခြင်းကိုလည်းကောင်း၊ ကိုယ်ဝန်ဆောင်သော မိန်းမတို့သည် ဝမ်းခွဲခြင်းကိုလည်းကောင်း ခံရကြလိမ့်မည်။

ဟောရှေအနာဂတ္တိကျမ်း - ၁၃ (အနက်ဖွင့်)

၁၃:၁ ရုပ်တုဆင်းတု မကိုးကွယ်ကြခင်က ဧဖရိမ်တို့ကို အခြားမျိုးနွယ်များက မော်မကြည့်ရဲကြ။ ဣသရေလတို့စကားပြောလျှင် နှုတ်ဆိတ်နာခံခဲ့ကြသည်။ သို့သော် ဗာလဘုရားကိုးကွယ်ကြသည့်အခါတွင်မူ အခြားသူများကလည်း သူလိုကိုယ်လိုဘဲဟု ထင်မှတ်လာကြသည်။ သူတို့ကဲ့သို့ပင် သေမျိုးဖြစ်ကြောင်း သိရှိလာသည်။

၁၃:၂–၃ အချိန်ကြာသည်နှင့်အမျှ ရုပ်တုဆင်းတုကိုးကွယ်သူ ပိုမိုများပြားလာကြသည်။ ရွှေနွားသူငယ်ရုပ်တုကို နမ်းရှုပ်သည့်အကြောင်းမမောနိုင်မပန်းနိုင်၊ စကားဖောင်ဖွဲ့ကြသည်။ သူတို့သည် မီးခိုးခေါင်းတိုင်မှထွက်သော မီးခိုးငွေ့များလေတိုက်ရာ လွင့်မျောပျောက်ကွယ်သကဲ့သို့ ပျောက်ကွယ်သွားကြမည်။

၁၃:၄–၈ ထာဝရဘုရားသခင်သည် သူတို့အား အဲဂုတ္တုပြည်၏ ကျွန်ဘဝမှ ခေါ်ထုတ်ပေးသူဖြစ်သည့်အပြင် ကန္ထာရခရီးတလျှောက်တွင်လည်း မတောင့်မတ မကြောင့်မကြအောင် ကျွေးမွေးထောက် ပံ့စောင့်ရှောက်သည်။ ယခုကာလတွင်မူ ထိုအရှင်သခင်အား မေ့လျော့ကြပြီ။ ထို့ဘုရားသခင်သည် သားရဲကဲ့သို့ပြန်လာမည်။

၁၃:၉–၁၃ ဘုရားသခင်က သားရဲကဲ့သို့ပြန်လာလျှင် အဘယ်သူကကာကွယ်တော့မည်နည်း။ ဧဖရိမ်တို့၏ အပြစ်ဒုစရိုက်များကို စာချွန်တော်တွင် ကမ္ဗည်းတင် ရေးမှတ်ထားပြီး။ တရားစီရင်ရာနေ့အထိ သိမ်းဆည်းထားသည်။ မီးနေသည်မိန်းမသည် နာကျင်စွာဝေဒနခံစားသော်လည်း ထိုကလေးသည် အပြင်သို့ထွက်မလာဘဲ သားအိမ်ထဲသို့ပြန်ဝင်သကဲ့သို့ အခံရခက်သည်။ ဆိုလိုသည်မှာ ဣသရေလတို့သည် စီရင်ခြင်းခံရမည်ကို သိကြသော်လည်း နောင်တမရ၊ ခေါင်းမာကြသည့်အကြောင်းဖြစ်သည်။

၁၃:၁၄ RSV ကျမ်းမူက ဤကျမ်းပိုဒ်အစပိုင်းကို “ဤသူများကို မရဏာနိုင်ငံ၏ တန်ခိုးလက်မှကယ်နှုတ်ရမည်လော” ဟုမေးခွန်းပုံစံဖြင့်ဖော်ပြထားသည်။ သေခြင်းမှကယ်နှုတ်မည်လား။ “မကယ်ဘူး” ဟုမဆိုပါ။ မျက်စိတော်အောက်မှာ သနားသက်ညှာစရာမတွေ့။ ကာလနာ မရဏာသေမင်းသာ ခေါ်၍ ဤလူများအား ပျက်စီးခြင်းမရဏာနိုင်ငံသို့ခေါ် သွားခိုင်းမည်။ ဤကျမ်းပိုဒ်သည် ၁ကော၊ ၁၅:၅၅ နှင့် တခြားစီဖြစ်သည်။

၁၃:၁၅–၁၆ အရှေ့လေတည်းဟူသော အာရှုရိတို့၏ လက်ချက်ကြောင့် ဣသရေလနှင့် ရှမာရိပြည်သည် ကြောက်မက်ဖွယ်ပျက်စီးမည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။