Hosea -12 -

ဟောရှေအနာဂတ္တိကျမ်း - ၁၂

ဧဖရိမ်၏မှားယွင်းခြင်း

1ဧဖရိမ်သည် လေကို ကျက်စားတတ်၏။ အရှေ့လေကို လိုက်တတ်၏။ နေ့တိုင်း မုသားစကားနှင့် ပျက်စီးခြင်းအကြောင်းတို့ကို များပြားစေတတ်၏။ အာရှုရိလူတို့နှင့် မိတ်သဟာယဖွဲ့လျက်နှင့်ပင်၊ အဲဂုတ္တုပြည်သို့ ဆီကို ယူသွားတတ်၏။ 2ထာဝရဘုရားသည် ယုဒအမျိုးနှင့်လည်း တရားတွေ့မှု ရှိတော်မူ၏။ ယာကုပ်၏အကျင့်တို့ကို စစ်ကြော၍ သူပြုမူသည်နှင့်အညီ အပြစ်ပေးတော်မူမည်။ 3ယာကုပ်သည် အမိဝမ်း၌ အစ်ကို၏ဖနှောင့်ကို ကိုင်၏။ ခွန်အားကြီး၍ ဘုရားသခင်နှင့် ပြိုင်လေ၏။ 4ကောင်းကင်တမန်နှင့် ပြိုင်၍ နိုင်လေ၏။ ငို၍ တောင်းပန်နှင့်ပြီ။ ကောင်းကင်ဗိုလ်ခြေအရှင် ဘုရားသခင် ထာဝရဘုရားကို ဗေသလမြို့မှာဖူးတွေ့၍၊ ငါတို့အဖို့ ဗျာဒိတ်တော်ကို ခံလေ၏။ 5ထာဝရဘုရားတည်းဟူသောနာမသည် ထိုဘုရားသခင်၏ ဘွဲ့နာမတော်ဖြစ်၏။ 6သို့ဖြစ်၍၊ သင်၏ဘုရားသခင့် ထံတော်သို့ ပြန်လာလော့။ ကရုဏာတရား၊ ဖြောင့်မတ်ခြင်းတရားကိုစောင့်ရှောက်၍၊ သင်၏ဘုရားသခင်ကို အစဉ်မပြတ်မျှော်လင့်လော့။

စီရင်ချက်ကိုဆက်လက်ဖော်ပြခြင်း

7သူသည် ကုန်သည်ဖြစ်၏။ စဉ်းလဲသော ချိန်ခွင်ကို ကိုင်တတ်၏။ သူတစ်ပါးကို ညှဉ်းဆဲခြင်းငှာ အလိုရှိ၏။ 8သို့ရာတွင်၊ ဧဖရိမ်က၊ ငါသည် ရတတ်၏။ ဘဏ္ဍာကို သိုထားပြီ။ ကြိုးစားသမျှတို့၌ အပြစ်ပါသော လွန်ကျူးခြင်းကို ရှာ၍မတွေ့ရာဟု ဆိုလိမ့်မည်။ 9ငါထာဝရဘုရားသည် သင့်ကို အဲဂုတ္တုပြည်မှ ကယ်နုတ်သော သင်၏ဘုရားသခင် ဖြစ်၏။ ဓမ္မပွဲခံစဉ်တွင် နေတတ်သကဲ့သို့ တစ်ဖန် တဲတို့၌ နေစေမည်။ 10ငါသည် ပရောဖက်တို့၌ ဗျာဒိတ်ပေးပြီ။ များစွာသော ရူပါရုံတို့ကို ပြပြီ။ ပရောဖက်များအားဖြင့် ပုံပမာတို့ကို ထားပြီ။ 11ဂိလဒ်ပြည်၌ အပြစ်ရှိ၏။ ပြည်သူပြည်သားတို့သည် အကျိုးနည်း ရှိကြပြီ။ ဂိလဂါလမြို့၌ နွားတို့ကို ယဇ်ပူဇော်၍၊ ယဇ်ပလ္လင်တို့သည် ထွန်ကြောင်းတွင် မြေအပုံပုံ ရှိသကဲ့သို့ များကြ၏။ 12ယာကုပ်သည် ရှုရိပြည်သို့ ပြေး၏။ ဣသရေလသည် မယားကိုရခြင်းငှာ အစေကျွန်ခံ၍ သိုးစုကို ထိန်းရလေ၏။ 13ထာဝရဘုရားသည် ပရောဖက်အားဖြင့် ဣသရေလအမျိုးကို အဲဂုတ္တုပြည်မှကယ်နုတ်၍၊ ပရောဖက်အားဖြင့်လည်း စောင့်မတော်မူ၏။ 14ဧဖရိမ်သည် အမျက်တော်ကို အလွန်နှိုးဆော်လေပြီ။ ထိုကြောင့်၊ လူအသက်ကို သတ်သောအပြစ်သည် သူ၌ ရောက်လိမ့်မည်။ သူကဲ့ရဲ့ခြင်းအပြစ်ကို သူ၏သခင်သည် ပြန်ပေးလိမ့်မည်။

ဟောရှေအနာဂတ္တိကျမ်း - ၁၂ (အနက်ဖွင့်)

၁၂:၁–၂ ဧဖရိမ်အမျိုးသည် လျှာနှစ်ခွဖြင့် ပြောတတ်သူများ၊ ဗလောင်ဗလဲလုပ်တတ်သူများဖြစ်သည်။ နှုတ်ပေါင်းကိုယ်ခွာ ချစ်ဟန်ဆောင်သောမိတ်ဆွေများ ဖြစ်သည်။ အာရှုရိတို့နှင့် မဟာမိတ်ပြုလျက် အဲဂုတ္တုပြည်သို့ ဆီပို့သူများဖြစ်သည်။ ဘုရားသခင်သည် ဧဖရိမ်မြို့နှင့် အပေးအယူ၊ အမြီးအမောက်မတည့်သော်လည်း ယုဒလူမျိုးနှင့် ပနာမစား။ ယာကုပ်ကို အရေးယူသကဲ့သို့ အပြစ်ပေးဒဏ်ခတ်ဦးမည်။

၁၂:၃ ယုဒဘိုးဘေးကြီး ယာကုပ်နာမည်ကို တဖန်တွေ့ရသည်။ အချို့ကျမ်းပိုဒ်များတွင် နှစ်လိုဖွယ်ရာမကောင်းသော ကျက်သရေတုံးအဖြစ် ပြောလေ့ရှိသော်လည်း ဤနေရာတွင် ဘုရားသခင်ကို ပြိုင်ဆိုင်သူဘုရားကို နပမ်းလုံး အောင်မြင်သူအဖြစ် သရုပ်ဖော်သည်။ ဘုရားသခင်ထံတော်ပါးသို့ ချဉ်းကပ်ဆက်သသူ ဖြစ်သည်။

၁၂:၄–၆ အပိုဒ်ငယ် ၄နှင့် ၅ မှ ကောင်းကင်တမန်သည် ထာဝရဘုရားသခင်က မိမိကိုယ်တိုင်ကို ရည်ညွှန်းသည်။ ဘုရားသခင်သည် ကောင်းကင်တမန်အဖြစ် ဟာဂရ(က၊ ၁၆:၇-၁၁) နှင့် အာဗြဟံထံသို့ (က၊၁၈:၁-၃၃၊ ၂၂:၁၁၊၁၅၊၁၆)၊ ယာကုပ် သို့ (က၊ ၃၁:၁၁-၁၃၊၄၈:၁၆)တို့တွင် အတွေ့ခံခဲ့ဘူးသည်။ ထွ၊၃:၂၊၆-၁၅ နှင့် တော၊၂၂:၂၂-၃၅ ကိုလည်းကြည့်ပါ။ ဧဝံဂေလိဆရာများမူ သုံးပါးတစ်ဆူ၌ ပါဝင်တော်မူသောသူ ပတ္တမြားရွှေကြုတ်မငုံခင် ကာလဖြစ်မည်ဟုဆိုကြသည်။

ဧဖရိမ်တို့၏ ဘိုးအေ ယာကုပ်သည် မိမိစွမ်းအားထက် ဘုရားသခင်၏ ဘုန်းတန်ခိုးကို အားကိုးသည် (က၊၃၂:၂၈ကိုကြည့်)။

၁၂:၇–၈ သို့သော် ဧဖရိမ်သည် ကောက်ကျစ်စဉ်းလဲသော ခါနနိ၁၀(ကုန်သည်ပွဲစား) လူဖြစ်သည်။ စဉ်းလဲသောချိန်ခွင်၊ ကလိန်ကကျစ်၊ မိမိကိုယ်ကျိုးကို ရှာစားသော ဝိသမလောဘသမား ဖြစ်သည်။

၁၂:၉ ထာဝရဘုရားသခင်က သူသည်သင်တို့အား အဲဂုတ္တုပြည်မှ ကယ်ထုတ်သောဘုရား ရှင်ဖြစ်ကြောင်း ပြန်လည်သတိပေးထားသည်။ အဲဂုတ္တုပြည်မှကယ်ထုတ်စဉ် အဝတ်တထည်ကိုယ်တစ်ခုဖြင့်ခေါ်လာခဲ့သည်။ အကယ်၍ နာခံခြင်းရှိကြလျှင် တဲတော်ပွဲတော်ကျင်းပကြသကဲ့သို့ ပုံမှန်အနေအထား ရောက်အောင် ကြွယ်ဝချမ်းသာစေမည်ဟု ဆိုသည်။ ဓမ္မပွဲခံသည့် နေ့ရက်ကဲ့သို့ ဝမ်းမြောက်မှုပေးမည်။

၁၂:၁၀–၁၂ ယေဟောဝါဘုရားသခင်က ပရောဖက်များကိုလည်း ထပ်မံသတိပေးသည်။ အရေးမပါ အရာမထင်ခဲ့။ မြောက်ပိုင်းနိုင်ငံသည် ရုပ်တုဆင်းတုကိုးကွယ်သည့် အပြစ်ဒုစရိုက်ဆိုးကြောင့် ရန်သူတို့က ဝင်ရောက်တိုက်ခိုက်ရာ ဂိလတ်နှင့်ဂိလဂါလပြည်ဟူ၍ နှစ်နိုင်ငံကွဲပြားခဲ့ကြသည်။ လူမျိုးတော်ဘိုးအေကြီး ယာကုပ်သည် ရှုရိပြည်သို့ ဒုက္ခသည်အဖြစ် ထွက်ပြေးတိမ်းရှောင်ခဲ့သည်။ မယားရဖို့ မက်ဆိုပို တေးမီးယားဒေသ၌ ဆယ်နှစ်ဆယ်မိုးအောက်ကျို့စွာဖြင့် သိုးထိန်းခဲ့ရသည်။

၁၂:၁၃ သို့သော် ဘုရားသခင်သည် လူမျိုးတော်ကို ကရုဏာတော်ရှိသောကြောင့် မောရှေခေါင်းဆောင်စေ၍ အဲဂုတ္တုပြည်မှကယ်ထုတ်ခဲ့သည်။ မောရှေကိုလည်း ပရောဖက်အရာခန့်ခဲ့သည်။

၁၂:၁၄ သို့သော်ငြားလည်း ဧဖရိမ်သည် ကျေးဇူးသစ္စာမရှိဘဲ၊ ရုပ်တု၊ ဆင်းတုကိုးကွယ်ခြင်းဖြင့် ကယ်တင်ရှ်ဘုရားသခင်ကို အမျက်ဒေါသ ဖြစ်စေကြသည်။ ဘုရားရှင်ကိုယ်တိုင်အား သွေးချောင်းစီးစေသည်။ လူ့အသတ်ကို သတ်သော လက်များသည် သူတို့အပေါ်၌ တဖန် ပြန်လည်ကျရောက်မည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။