Ezekiel -43 -

ယေဇကျေလအနာဂတ္တိကျမ်း - ၄၃

ဗိမာန်တော်သို့ဘုရားသခင့်ဘုန်းတော်

1ထိုနောက်မှ အရှေ့ဘက်သို့မျက်နှာပြုသော တံခါးဝသို့ တစ်ဖန်ခေါ်သွား၏။ 2ဣသရေလအမျိုး၏ ဘုရားသခင့်ဘုန်းတော်သည် အရှေ့မျက်နှာမှလာ၍၊ အသံသည် သမုဒ္ဒရာသံကဲ့သို့ ဖြစ်၏။ ရောင်ခြည်တော်အားဖြင့် မြေတစ်ပြင်လုံး လင်း၏။ 3ငါမြင်သော ရူပါရုံသည် မြို့တော်ကိုဖျက်ဆီးခြင်းငှာ လာသောအခါ၊ ငါမြင်သော ရူပါရုံနှင့်တူ၏။ ထင်ရှားသောအရာတို့သည် ခေဗာမြစ်နားမှာ ငါမြင်ဖူးသော အရာများကဲ့သို့ဖြစ်၍၊ ငါသည် ပျပ်ဝပ်လျက်နေ၏။ 4ထာဝရဘုရား၏ဘုန်းတော်သည် အရှေ့ဘက်သို့ မျက်နှာပြုသော တံခါးလမ်းဖြင့် အိမ်တော်ထဲသို့ ဝင်တော်မူ၏။ 5ထိုအခါ ဝိညာဉ်တော်သည် ငါ့ကိုချီလျက် အတွင်းတံတိုင်းထဲသို့ ဆောင်သွား၍၊ ထာဝရဘုရား၏ ဘုန်းတော်သည် တစ်အိမ်လုံးကို ဖြည့်တော်မူ၏။ 6အရင်လူသည် ငါ့အနားမှာရပ်နေလျက်၊ အိမ်တော်ထဲက ငါ့အား မိန့်တော်မူသောအသံကို ငါကြားသည်ကား၊ 7အချင်းလူသား၊ ဤအရပ်သည် ငါ့ပလ္လင်တည်ရာ အရပ်၊ ငါ့ခြေဖဝါး နင်းမြဲအရပ်၊ ဣသရေလအမျိုးသားတို့တွင် အစဉ်အမြဲ ငါ့နေရာအရပ် ဖြစ်၏။ ဣသရေလရှင်ဘုရင်များနှင့် အမျိုးသားများတို့သည် မှားယွင်းခြင်း အားဖြင့်လည်းကောင်း၊ ရှင်ဘုရင်၏အသေကောင်အားဖြင့်လည်းကောင်း မြင့်ရာအရပ်တို့၌ ငါ၏နာမတော်မြတ်ကို နောက်တစ်ဖန် မရှုတ်ချရကြ။ 8သူတို့တံခါးခုံကိုလည်း ငါ့တံခါးခုံအနားမှာလည်းကောင်း၊ သူတို့တိုင်ကိုလည်း ငါ့တိုင်အနားမှာလည်းကောင်း တည်စိုက်လျက်၊ ငါနှင့် သူတို့စပ်ကြားမှာ နံရံတစ်ခုတည်းသာရှိလျက်၊ သူတို့ ပြုမိသော စက်ဆုပ်ရွံရှာဖွယ်အမှုတို့ဖြင့်၊ ငါ၏နာမတော်မြတ်ကို ရှုတ်ချသောကြောင့်၊ ငါသည်အမျက်ထွက်၍ သူတို့ကို ဖျက်ဆီးပြီ။ 9ယခုမူကား၊ သူတို့မှားယွင်းခြင်းအမှုများနှင့် ရှင်ဘုရင်၏အသေကောင်များကို ငါမှဝေးစွာ ပယ်ရှားကြစေ။ ငါသည်လည်း သူတို့တွင် အစဉ်အမြဲနေမည်။ 10အချင်းလူသား၊ ဣသရေလအမျိုးသားတို့သည် ကိုယ်ဒုစရိုက်အပြစ်ကြောင့် ရှက်ကြောက်စေခြင်းငှာ အိမ်တော်ကိုပြလော့။ အိမ်တော်ပုံကို သူတို့တိုင်းကြစေလော့။ 11သူတို့သည် ကိုယ်ပြုမိသောအမှုများကြောင့် အမှန်ရှက်ကြောက်လျှင်၊ အိမ်ပုံသဏ္ဌာန်နှင့် ထွက်ရာဝင်ရာ တံခါးဝများ၊ ကျင့်ရသမျှသောထုံးစံများ၊ စီရင်ထုံးဖွဲ့ချက် တရားအလုံးစုံတို့ကိုပြလော့။ သူတို့သည် ထုံးစံများနှင့် စီရင်ထုံးဖွဲ့ချက် အလုံးစုံတို့ကို ကျင့်စောင့်စေခြင်းငှာ သူတို့ရှေ့မှာ ရေးထားလော့။ 12တောင်ထိပ်ပေါ်မှာတည်သော အိမ်တော်၏တရားဟူမူကား၊ အိမ်တော်နယ်နိမိတ်ရှိသမျှတို့သည် အလွန်သန့်ရှင်းရကြမည်။ ဤရွေ့ကား၊ အိမ်တော်၏တရားပေတည်း။

ယဇ်ပလ္လင်

13ယဇ်ပလ္လင်အတိုင်း အရှည်ကား၊ သံတောင်ဖြင့် တိုင်းလျှင်၊ ဖိနပ်အမြင့်တစ်တောင်၊ အကျယ်တစ်တောင်၊ ပတ်လည်အနားပတ် အကျယ်တစ်ထွာရှိ၍၊ ယဇ်ပလ္လင် ပြင်ဘက်၌ တည်ရ၏။ 14အောက်အထစ်သည် မြေနှင့်နှစ်တောင်ကွာ၍ အကျယ်တစ်တောင်ရှိရမည်။ ငယ်သောအထစ်နှင့် ကြီးသောအထစ်သည် လေးတောင်ကွာ၍ အကျယ်တစ်တောင် ရှိရမည်။ 15ယဇ်ပလ္လင်အမြင့်သည်လည်း လေးတောင်ရှိရမည်။ ဦးချိုလေးချောင်းလည်း တက်ရမည်။ 16ယဇ်ပလ္လင်သည် စတုရန်းဖြစ်၍၊ အလျား တစ်ဆယ်နှစ်တောင်၊ အနံလည်း တစ်ဆယ်နှစ်တောင် ရှိရမည်။ 17အောက်အထစ်သည်လည်း စတုရန်းဖြစ်၍ အလျား တစ်ဆယ်လေးတောင်၊ အနံလည်း တစ်ဆယ်လေးတောင် ရှိရမည်။ အနားပတ်သည်လည်း အကျယ်တစ်ထွာရှိရမည်။ ဖိနပ်သည် ယဇ်ပလ္လင်ပတ်လည်၌ တစ်တောင်ထွက်၍၊ တက်ရာလမ်းသည် အရှေ့သို့ မျက်နှာပြုရမည်။

ယဇ်ပလ္လင်ကိုသန့်စင်စေခြင်း

18တစ်ဖန် အချင်းလူသား၊ အရှင်ထာဝရဘုရား မိန့်တော်မူသည်အတိုင်း၊ မီးရှို့ရာယဇ်ကိုပူဇော်၍ အသွေးကိုဖျန်းဖို့ရာ၊ ယဇ်ပလ္လင်ကိုတည်သောနေ့၌ ကျင့်ရသောတရားဟူမူကား၊ 19အမှုတော်ကိုဆောင်၍ ငါ့ထံသို့ ချဉ်းကပ်သော လေဝိအမျိုး၊ ဇာဒုတ်သား ယဇ်ပုရောဟိတ်တို့အား အပြစ်ဖြေရာယဇ်ဖို့၊ ပျိုသောနွားထီးတစ်ကောင်ကို အပ်ရမည်။ 20နွားအသွေးအချို့ကိုယူ၍ ယဇ်ပလ္လင်ဦးချို လေးချောင်း၊ အထစ်လေးထောင့်၊ အနားပတ်ကိုလူးသောအားဖြင့် သန့်ရှင်းစင်ကြယ်စေရမည်။ 21အပြစ်ဖြေရာယဇ်ဖို့ နွားကောင်ကိုယူ၍ သန့်ရှင်းရာဌာနပြင်၊ ဗိမာန်တော်အတွင်းတွင် ခန့်ထားသောအရပ်၌ မီးရှို့ရမည်။ 22ဒုတိယနေ့၌လည်း အပြစ်မရှိသော ဆိတ်သငယ်ကိုယူ၍၊ အပြစ်ဖြေရာယဇ်ဖို့ ပူဇော်ရမည်။ ယဇ်ပလ္လင်ကို နွားအသွေးနှင့် သန့်ရှင်းစေသကဲ့သို့ ဆိတ်အသွေးနှင့် သန့်ရှင်းစေရမည်။ 23ထိုသို့ယဇ်ပလ္လင်ကို သန့်ရှင်းစေပြီးသည်နောက်၊ အပြစ်မရှိ၊ ပျိုသောနွားထီးနှင့် အပြစ်မရှိသော ဆိတ်ထီးကို ထာဝရဘုရား ရှေ့တော်၌ ပူဇော်ရမည်။ 24ယဇ်ပုရောဟိတ်တို့သည် ဆားကိုတင်လျက်၊ ထိုယဇ်ကောင်တို့ကို ထာဝရဘုရားအဖို့ မီးရှို့၍ ပူဇော်ရမည်။ 25ခုနစ်ရက်ပတ်လုံး တစ်နေ့တစ်နေ့လျှင်၊ ဆိတ်တစ်ကောင်ကို အပြစ်ဖြေရာယဇ်ပြု၍ ပူဇော်ရမည်။ အပြစ်မရှိ၊ ပျိုသောနွားထီးတစ်ကောင်နှင့် သိုးထီးတစ်ကောင်ကိုလည်း ပူဇော်ရမည်။ 26ခုနစ်ရက်ပတ်လုံး ယဇ်ပလ္လင်ကို သန့်ရှင်းစင်ကြယ်စေ၍၊ ကိုယ်ကိုလည်း ယဇ်ပုရာဟိတ်အရာ၌ ခန့်ထားရကြမည်။ 27ခုနစ်ရက်စေ့သောနောက် အဋ္ဌမနေ့၌လည်းကောင်း၊ ထိုနေ့မှစ၍လည်းကောင်း၊ ယဇ်ပုရောဟိတ်တို့သည် ယဇ်ပလ္လင်ပေါ်မှာ သင်တို့မီးရှို့ရာယဇ်များနှင့် မိတ်သဟာယယဇ်များကို ပူဇော်ရကြမည်။ ငါသည်လည်း၊ သင်တို့လက်ခံမည်ဟု အရှင်ထာဝရဘုရား မိန့်တော်မူ၏။

ယေဇကျေလအနာဂတ္တိကျမ်း - ၄၃ (အနက်ဖွင့်)

(ခ) အနှစ်တထောင်ဝတ်ပြုကိုးကွယ်ခြင်း( အခန်း၄၃၊၄၄)

၄၃:၁−၅ ယေဇကျေလကျမ်းအစောပိုင်း ၁၁:၂၃ ၌ ဘုန်းတော်တိမ်တိုင်သည် ယေရုရှလင်ဗိမာန်တော်မှ ရွေ့လျားသွားသည်ဟုဆိုခဲ့သည်။ သို့သော်လည်း သခင်ခရစ်တော်နိုင်ငံတော် တည်ထောင်အုပ်စိုးဖို့ ပြန်ကြွလာသည့်အခါ ဣသရေလဘုရားသခင်၏ ဘုန်းတော်သည် ခရစ်တော်နှင့် အတူပြန်လည်ပါလာမည်။

၄၃:၆−၉ ကိုယ်တော်ဘုရား၏ လူများအလယ်တွင် ဘုရားသခင်ကိုယ်တိုင်စိုးစံမည်။ အဘယ်သူကမှ ဝိညာဉ်ရေးရာတွင် နိုင်ထက်ကလူပြုနိုင်တော့ မည်မဟုတ်။ ဘုရားသခင်၏ ဗိမာန်တော်အရိပ်အဝန်းအောက်၌ ညစ်ညမ်းသောအမှုတို့ကို ပြုကြတော့မည်မဟုတ်။

၄၃:၁၀−၁၂ ဣသရေလအမျိုးသားတို့သည် ကိုယ့်ဒုစရိုက်အပြစ်ကြောင့် အိမ်တော်ကိုရှက်ကြောက်ဖွယ် ဖြစ်စေခဲ့သော်လည်း အိမ်တော်သစ်ပန္နက်ပုံစံပုံသဏ္ဍာန်အစီအမံကို ရှုမြင်ခွင့်ရကြမည်။ နောင်တ ရသည်နှင့် တပြိုင်နက် သူတို့အား မျှော်လင့်ချက်အသစ်ပေးအပ်မည်။ (ယနေ့ယုံကြည်သူများသည်လည်း ဤနည်းတူပြုသင့်သည်)။ ဝန်းကျင်ရှိတောင်တကာထက်မြင့်သော တောင်ထိပ်ပေါ်၌ တည်မည့် ဗိမာန်တော်သည် အသန့်ရှင်းဆုံးဖြစ်ကြောင်း လူတို့အား ပြောပြရပေမည်။

ဘုရားရှင်ဘုန်းတော်၏ စစ်မှန်သော မြင်ကွင်းက ကျွန်ုပ်တို့၏ အပြစ်ဒုစရိုက်အပေါ် ကျွန်ုပ်တို့ရှက်ကြောက် ခြင်းဖြစ်ပေါ်စေပါသည်(ငယ်၊၁၀)။

ဤအကြည့်သည် ပေတရုအားညွတ်နူးစေခဲ့…

ဤမျက်နှာကို သတေဖန်တွေ့မြင်ခဲ့…

ဤနှလုံးသားပင် မာရိနှင့် အတူငိုကြွေးခဲ့…

အဓမ္မတရားတို့ဆွဲဆောင်ခြင်းမှ ရုန်းထွက်စေရာ။

–အမည်မသိစာဆို

၄၃:၁၃−၁၇ ယဇ်ပလ္လင်ပြင်အတိုင်းအတာကို ရှင်းပြသည်။ ယဇ်ပလ္လင်ကို ယဇ်ပလ္လင်အလယ်၌ တည်ထား၍ မီးအမြဲတောက်လောင်နေရသည်။ ယဇ်ပလ္လင်ဗဟိုမှ ဦးချိုလေးချောင်းထောင်တက်သည်။ အခြားယဇ်ပလ္လင်များနှင့်မတူဘဲ၊ အမြင့်လေးတောင်(ခြောက်ပေ)ရှိသည်။ သီးသန့်ဆောက်လုပ်ထားသည့် လှေကားထစ်မှ ယဇ်ပလ္လင်ပေါ်တက်ရသည်။ လူတိုင်းတက်ရောက်ခွင့်မပြုဘဲ ကန့်သတ်ထားသည်။ အလွန်မြင့်သဖြင့် ယဇ်ပလ္လင်ထိပ်သို့ တက်လှမ်းရန် သီးသန့်လမ်းပြင်ဆင်ရသည်။

၄၃:၁၈−၂၇ နောက်တစ်ခုမှာ ယဇ်ကောင်အသွေးဖျန်း၍ ပူဇော်ခြင်းအမှုကို ဣသရေလပြည်သူတရပ်လုံ:တို့က (၇)ရက်တိုင်စီရင် ကျင်းပရသော အရေးပါသည့်ပွဲဖြစ်သည်။ ဓမ္မဟောင်း ကျမ်းတွင်လည်း ထပ်ခါတလဲလဲတွေ့ရသည်။ ထွ၊၂၉:၃၇၊ဝတ်၊၁၈:၁၁၊၁၅၊၁၉၊၃၃။ ၃ရာ၊၈:၆၂−၆၅နှင့်၆ရာ၊၇:၄−၁၀ တို့တွင်ဖတ်ရှုနိုင်သည်။ (၇)ရက်ပတ်လုံး ပွဲခံပြီး’နောက် ရှစ်ရက်မြောက်သောနေ့တွင် ပုံမှန်မီးရှို့ယဇ်ပူဇော်ခြင်း လုပ်ရသည်။

အခန်းအဆုံးပိုင်းတွင် ဘုရားရှင်က နှစ်သိမ့်စကားဖြင့် အားပေးထားသည်။ သူတို့၏ ယဇ်ပူဇော်သက္ကာများသာ လက်ခံသည်မဟုတ်၊ သူတို့ကိုလည်း ဘုရားရှင်လက်ခံမည်ဟု ဆိုပါသည်။

ထိုခေတ်က ယဇ်ပရောဟိတ်များမှာ ဇာဒုတ်၏ သားများဖြစ်သည် (ငယ်၁၉)။ ဇာဒုတ်သည် ဒါဝိဒ်နှင့် ရှောလမုန်အပေါ် မယိမ်းမယိုင်သစ္စာစောင့်ထိန်းခဲ့သူ ဖြစ်သောကြောင့် သားစဉ်ဆက်တိုင်အောင် ချီးမြှောက်ခံရခြင်း ဖြစ်ဟန်ရှိသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။