Ezekiel -44 -

ယေဇကျေလအနာဂတ္တိကျမ်း - ၄၄

အရှေ့အရပ်ပြင်တံခါး

1ထိုနောက်၊ သန့်ရှင်းရာအရပ်အရှေ့သို့ မျက်နှာပြုသော ပြင်တံခါးသို့ဆောင်သွား၍၊ ထိုတံခါးသည် ပိတ်လျက်ရှိ၏။ 2ထာဝရဘုရားကလည်း၊ ဤတံခါးကိုမဖွင့်ဘဲ ပိတ်ထားလျက်ရှိရမည်။ လူများမဝင်ရကြ။ အကြောင်းမူကား၊ ဣသရေလအမျိုး၏ ဘုရားသခင် ထာဝရဘုရားဝင်တော်မူသောကြောင့် ပိတ်ထားလျက်ရှိရမည်။ 3မင်းသားအဖို့ဖြစ်၏။ မင်းသားသည် ထာဝရဘုရားရှေ့တော်၌ စားသောက်၍ ထိုတံခါးဝမှာ ထိုင်ရလိမ့်မည်။ မင်းသားသည် ထိုတံခါးမုခ်ဖြင့် ထွက်ဝင်ရလိမ့်မည်ဟု မိန့်တော်မူ၏။

ဗိမာန်တော်သို့ဝင်ရောက်ခွင့်

4ထိုအခါ အိမ်တော်ရှေ့၊ မြောက်တံခါးလမ်းဖြင့် ငါ့ကိုဆောင်သွား၍ ထာဝရဘုရား၏ဘုန်းတော်သည် ထာဝရဘုရား၏အိမ်တော်ကို ဖြည့်တော်မူသဖြင့်၊ ငါသည်ပျပ်ဝပ်လျက်နေ၏။ 5ထာဝရဘုရားကလည်း၊ အချင်းလူသား၊ စေ့စေ့ကြည့်ရှု၍ မှတ်လော့။ ထာဝရဘုရား၏ အိမ်တော်အဖို့ ငါစီရင်ထုံးဖွဲ့ချက် ပညတ်တရားရှိသမျှတို့ကို နားထောင်လော့။ အိမ်တော်ဝင်ရာတံခါးဝနှင့် သန့်ရှင်းရာဌာနမှ ထွက်ရာတံခါးဝရှိသမျှတို့ကို စေ့စေ့မှတ်လော့။ 6ပုန်ကန်တတ်သောသူ ဣသရေလအမျိုးသားတို့အား အရှင်ထာဝရဘုရား၏အမိန့်တော်ကို ဆင့်ဆိုရမည်မှာ၊ အို ဣသရေလအမျိုးသားတို့၊ 7သင်တို့သည် ငါ့ဘောဇဉ်တည်းဟူသော ဆီဥနှင့်အသွေးကို ပူဇော်သောအခါ၊ ငါ့ဗိမာန်ကိုညစ်ညူးစေခြင်းငှာ၊ အရေဖျားလှီးခြင်းကို မခံသောစိတ်နှင့် အရေဖျားလှီးခြင်းကို မခံသောကိုယ်ရှိသော တစ်ပါးအမျိုးသားတို့ကို ငါ၏သန့်ရှင်းရာဌာနထဲသို့ သွင်း၍နေရာချသဖြင့်၊ စက်ဆုပ်ရွံရှာဖွယ်သော အမှုများကိုပြုမိသည်ဖြစ်၍၊ ရောင့်ရဲသောစိတ်ရှိကြလော့။ စက်ဆုပ်ရွံရှာဖွယ်သောအမှုများအားဖြင့် ငါ့ပဋိညာဉ်ကို ဖျက်ကြပြီ။ 8ငါ၏သန့်ရှင်းရာဌာနကို မစောင့်။ ထိုဌာန၌ စောင့်သောသူတို့ကို ကိုယ်အလိုအလျောက်ခန့်ထားကြပြီ။

9အရှင်ထာဝရဘုရား မိန့်တော်မူသည်ကား၊ ဣသရေလအမျိုးသားတို့တွင်နေ၍၊ အရေဖျားလှီးခြင်းကို မခံသောစိတ်နှင့် အရေဖျားလှီးခြင်းကိုမခံသောကိုယ်ရှိသော တစ်ပါးအမျိုးသားသည် ငါ၏သန့်ရှင်းရာဌာနထဲသို့ မဝင်ရ။

လမ်းလွှဲသောလေဝိသားများ

10ဣသရေလအမျိုးသားတို့သည် ငါ့ထံမှထွက်၍ လမ်းလွှဲပြီးလျှင်၊ မိမိတို့ရုပ်တုများနောက်သို့ လိုက်သွားသောအခါ၊ ငါ့ထံမှထွက်၍ လမ်းလွှဲသော လေဝိသားတို့သည်လည်း ကိုယ်အပြစ်ကိုခံရကြမည်။ 11သို့ရာတွင်၊ ငါ၏သန့်ရှင်းရာဌာနနှင့်ဆိုင်သောအမှုစောင့်ဖြစ်၍၊ ဗိမာန်တော်၌တံခါးတို့ကို စောင့်လျက်၊ အမှုတော်ကို ဆောင်ရွက်လျက် နေရကြမည်။ မီးရှို့ရာယဇ်နှင့် လူများပူဇော်သော ယဇ်ကောင်တို့ကိုသတ်၍၊ လူများကိုယ်စား အမှုတော်ကို ဆောင်ရွက်ရကြမည်။ 12သူတို့သည် ရုပ်တုတို့ရှေ့မှာ လူများအမှုကို ဆောင်ရွက်သဖြင့်၊ ဣသရေလအမျိုးထိမိ၍ ဒုစရိုက် အပြစ်ထဲသို့ လဲစရာအကြောင်း ဖြစ်ဖူးသောကြောင့်၊ သူတို့တစ်ဖက်၌ ငါကျိန်ဆို၍၊ သူတို့သည် ကိုယ်အပြစ်ကိုခံရကြမည်။ 13ယဇ်ပုရောဟိတ်လုပ်၍ ငါ့ထံသို့မချဉ်းကပ်ရကြ။ အလွန်သန့်ရှင်းသော ငါ့ဌာန၌ သန့်ရှင်းသောအရာတို့ကို မချဉ်းကပ်ရကြ။ ကိုယ်အရှက်ကွဲခြင်း၊ ကိုယ်ပြုမိသော စက်ဆုပ်ရွံရှာဖွယ်အမှုတို့ကို ခံရကြမည်။ 14အိမ်တော်ကိုစောင့်၍၊ အိမ်တော်၌ ခပ်သိမ်းသောအမှုတို့ကို ဆောင်ရွက်စေခြင်းငှာ ငါခန့်ထားမည်။

လေဝိအမျိုး

15ဣသရေလ အမျိုးသားတို့သည် ငါ့ထံမှထွက်၍ လမ်းလွှဲသောအခါ၊ ငါ၏သန့်ရှင်းရာဌာနကို စောင့်နေသော လေဝိအမျိုးဖြစ်သော ဇာဒုတ်သား၊ ယဇ်ပုရောဟိတ်တို့သည် ငါ့အမှုကိုဆောင်ခြင်းငှာ ငါ့ထံသို့ ချဉ်းကပ်ရကြမည်။ ငါ့အား ဆီဥနှင့်အသွေးကိုပူဇော်ခြင်းငှာ အရှေ့မှာ ရပ်ရကြမည်ဟု အရှင်ထာဝရဘုရား မိန့်တော်မူ၏။ 16ထိုသူတို့သည် ငါ၏သန့်ရှင်းရာဌာနထဲသို့ဝင်၍ ငါ့အမှုကိုဆောင်ခြင်းငှာ၊ ငါ့စားပွဲအနားသို့ ချဉ်းကပ်၍ ငါ့အမှုစောင့်ဖြစ်ရကြမည်။

17သူတို့သည် အတွင်းတံတိုင်းတံခါး အတွင်းသို့ ဝင်သောအခါ၊ ပိတ်အဝတ်ကိုသာ ဝတ်ရကြမည်။ အတွင်းတံတိုင်း တံခါးအတွင်း၌ အမှုတော်ကိုဆောင်ရွက်စဉ်၊ သိုးမွေးအဝတ်ကို မဝတ်ရကြ။ 18ခေါင်းပေါ်မှာ ပိတ်ဦးထုပ်ကို ဆောင်း၍၊ ခါး၌ ပိတ်ဘောင်းဘီကို ဝတ်ရကြမည်။ ချွေးထွက်စေသော အဝတ်ကို မဝတ်ရကြ။ 19လူများရှိရာ ပြင်တံတိုင်းသို့ ထွက်သွားသောအခါ၊ အမှုတော်ကို ဆောင်စဉ်တွင် ဝတ်သောအဝတ်ကို ချွတ်၍၊ သန့်ရှင်းသောအခန်းတို့၌ ထားပြီးလျှင်၊ အခြားသောအဝတ်ကို ဝတ်ရကြမည်။ အရင်အဝတ်ကိုဝတ်လျက် လူများတို့ကို မသန့်ရှင်းစေရကြ။ 20မိမိတို့ဆံပင်ကိုလည်း မရိတ်ရ၊ မရှည်စေခြင်းငှာ ဖြတ်ရမည်။ 21ယဇ်ပုရောဟိတ်သည် အတွင်းတံတိုင်းထဲသို့ ဝင်သောအခါ စပျစ်ရည်ကို မသောက်ရ။ 22မုဆိုးမနှင့် မစုံဖက်ရ။ လင်ကွာသောမိန်းမနှင့် မစုံဖက်ရ။ ဣသရေလအမျိုး အပျိုကညာနှင့် သော်လည်းကောင်း၊ ယဇ်ပုရောဟိတ်၏ မယားဖြစ်ဖူးသော မုဆိုးမနှင့်သော်လည်းကောင်း စုံဖက်ရမည်။ 23ငါ၏လူတို့သည် သန့်ရှင်းသောအရာ၊ မသန့်ရှင်းသော အရာတို့ကိုလည်းကောင်း၊ စင်ကြယ်သောအရာ၊ မစင်ကြယ် သောအရာတို့ကိုလည်းကောင်း ပိုင်းခြား၍သိစေခြင်းငှာ သွန်သင်ရကြမည်။ 24တရားတွေ့မှုကို စီရင်လျှင်၊ ငါ၏ဓမ္မသတ်အတိုင်း စီရင်ရကြမည်။ ငါ၏ဓမ္မပွဲတို့ကို ဆောင်ရွက်လျှင်၊ ငါစီရင်ထုံးဖွဲ့ချက် တို့ကိုလည်းကောင်း၊ ငါ၏ဥပုသ်နေ့တို့ကိုလည်းကောင်း စောင့်ရှောက်ရကြမည်။ 25အသေကောင်ကိုချဉ်း၍ ကိုယ်ကို မညစ်ညူးစေရ။ သို့ရာတွင်၊ ကိုယ်မိဘ၊ သားသမီး၊ ညီအစ်ကို၊ လင်မနေသောနှမအတွက် ကိုယ်ကို ညစ်ညူးစေရသော အခွင့်ရှိ၏။ 26သန့်ရှင်းခြင်းကိုပြုပြီးမှ ခုနစ်ရက်နေရမည်။ 27သန့်ရှင်းရာဌာန၌ အမှုတော်ကိုဆောင်ခြင်းငှာ အတွင်းတံတိုင်း သန့်ရှင်းရာဌာနထဲသို့ ဝင်သောနေ့တွင်၊ အပြစ်ဖြေရာယဇ်ကို ပူဇော်ရမည်ဟု အရှင်ထာဝရဘုရား မိန့်တော်မူ၏။ 28ထိုအရာသည် ယဇ်ပုရောဟိတ်တို့၏အမွေဥစ္စာဖြစ်ရမည်။ ငါသည် သူတို့အမွေဥစ္စာဖြစ်၏။ ဣသရေလပြည်၌ သူတို့အား အမွေမြေကို မပေးရ။ ငါသည် သူတို့၏အမွေမြေဖြစ်၏။ 29ပူဇော်သောမုန့်ညက်နှင့် အပြစ်ဖြေရာယဇ်၊ ဒုစရိုက်ဖြေရာယဇ်ကို စားရကြမည်။ ဣသရေလအမျိုးသား ကျိန်ဆို၍ ပူဇော်သမျှတို့ကိုလည်း သိမ်းယူရကြမည်။ 30အဦးသီးသော အသီးအမျိုးမျိုးနှင့်၊ ချီးမြှောက်ရာ ပူဇော်သကာအလုံးစုံတို့ကို ယဇ်ပုရောဟိတ်သည် သိမ်းယူရမည်။ သူသည်သင့်အိမ်၌ ကောင်းကြီးမင်္ဂလာကို သက်ရောက်စေခြင်းငှာ၊ အဦးနယ်သော မုန့်စိမ်းကို သူ၌လှူရမည်။ 31ငှက်ဖြစ်စေ၊ သားဖြစ်စေ၊ အလိုလိုသေသောအကောင်၊ သားရဲကိုက်၍ သေသောအကောင်ကို ယဇ်ပုရောဟိတ်မစားရ။

ယေဇကျေလအနာဂတ္တိကျမ်း - ၄၄ (အနက်ဖွင့်)

၄၄:၁−၃ အပြင်ဘက် အရှေ့ဘက်တံခါးပေါက်ကို အမြဲပိတ်ထားရသည်။ အဘယ့်ကြောင့်ဆိုသော် ဘုရားသခင်သည် ဗိမာန်တော်သို့ ပြန်ကြွလာလျှင် နောက်တဖန်ပြန်လည်ထွက်ခွါတော့မည့် မဟုတ်။ ထိုတံခါးပေါက်စမုတ်ဆောင်သည် မင်းသားအတွက် စံပယ်ရာနှင့် စားပွဲဝင်ရာဖြစ်သည်။ အချို့ကမင်းသားဆိုသည်မှာ မေရှိယသခင်ကိုယ်တော်တိုင်ဟုယူဆသည်။ အချို့ကမူ ဒါဝိဒ်မျိုးနွယ်မှ ဆင်းသက်လာသော တစ်စုံတစ်ဦးက ရင်ခွင်ပိုက်အုပ်စိုးမည်ဟု ထင်မြင်ကြသည်။ W. Grant ကမူ ထိုမင်းသားသည် ခရစ်တော် ကိုယ်တော်တိုင်မဟုတ်နိုင်ဟု ထောက်ပြသည်။

အဘယ့်ကြောင့်ဆိုသော် သူ့၌ သားအများပြားရှိသည်(၄၆:၁၆)။ ထို့ပြင် အပြစ်အတွက် ယဇ်ပူဇော်ရသည် (၄၅:၂၂)၃၉ ဟုဆိုသည်။

၄၄:၄−၉ ဗိမာန်တော်ရှေ့သို့ ယေဇကျေလရောက် သွားသောအခါ အိမ်တော်တခုလုံးဖုံးလွှားသော ဘုရားဘုန်းတော်သည် သူ့ကိုလည်းလွှမ်းခြုံသွားကြောင်း ခံစားရသည်။ ဘုရားသခင်ရှေ့တော်၌ ခယဝတ်ပြုသူများ၏ စည်းဝေးခြင်းတွင် ဘုရားဘုန်းတော်ထင်ရှားသဖြင့် စိတ်နှလုံးဝမ်းမြောက်ရွှင်လန်း မှုဖြစ်စေကြောင်း အပိုဒ်ငယ်(၄)က သွန်သင်ပါသည်။

ကိုယ်တော်ဘုရားက ယေဇကျေလအား အိမ်တော်ဆိုင်ရာပညတ်တရားနှင့် အဝင်အထွက်တံခါးများကို စေ့စပ်သေချာစွာ ကြည့်ရှုမှတ်သားစေသည်(ငယ်၅)။ ထို့အပြင် ဗိမာန်တော်ထဲသို့ တပါးအမျိုးသားသူစိမ်းသူရံစားများ ဝင်ထွက်အမှုဆောင်ခြင်းကို ခွင့်မပြုရန် တားမြစ်သည် (ငယ် ၆−၉)။

၄၄:၁၀−၁၆ ရုပ်တုဆင်းတုကိုးကွယ်ခဲ့ဘူးခြင်းကြောင့် ထိုကာလမှစ၍ လေဝိအမျိုးတို့ကို အစေအပါးအဖြစ်သာထားတော့သည်။ ယဇ်ပုရောဟိတ်အမှုကို ဇာဒုတ်၏သားမများသာလျှင် ဆောင်ရွက်ကြရသည်။ ဇာဒုတ်၏သားများသည် ဒါဝိဒ်မင်းဒုက္ခရောက်ချိန်၌ သစ္စာရှိရှိရပ်တည်ခဲ့ကြသူများ ဖြစ်သည် (၂ရာ၊၁၅:၂၄။ ၃ရာ၊၁:၃၂၊ ၂:၂၆−၂၇၊၃၅ တို့ကိုဖတ်)။ လေဝိ သားများယဇ်ပုရောဟိတ်အဖြစ်မှ ဖယ်ရှားခံရခြင်းမှာ ဧလိမိသားစုအပေါ်ကျိန်ဆဲခြင်း သို့မဟုတ် ဣသရေလရှင်ဘုရင်များကို သစ္စာမဲ့ခြင်းတို့ကြောင့် ဖြစ်ဟန်ရှိသည်။ ဤနေရာ၌ အပြစ်ဒုစရိုက်၏ အကျိုးဆက်မှာ ခါးသီး၍ သစ္စာတည်ကြည်ခြင်းသည် ဆုလာဘ်ရလမ်းဖြစ်ကြောင်း နားလည်ရသည်။

၄၄:၁၇−၁၉ အမှုတော်ဆောင်သောယဇ်ပုရောဟိတ်များသည် ချည်သားဝတ်ရုံကိုသာ ဝတ်ဆင်ရမည်။ သိုးမွှေးထည် မဝတ်ရ။ သန့်ရှင်းသော အမှုတော်ဆောင်ဝတ်ရုံဖြင့် လူများကို စင်ကြယ်ပေးခြင်း မပြုလုပ်ရ (ငယ် ၁၉)ဆိုသည်မှာ သန့်ရှင်းရာဌာနဝတ္တရားများဆောင်ရွက်သည့် ဘာသာရေးထုံးတမ်းကိုသာ ရည်ညွှန်းသည်။ ယဇ်ပုရောဟိတ်များနေ့စဉ် ဆောင်ရွက်ရသော တာဝန်ပိုင်းနှင့် ပက်သက်ခြင်းမရှိပါ။ (ထွ၊၂၉:၃၇။ ၃၀:၂၉။ ဝတ်၊၆:၁၈−၂၇။ ဟဂ္ဂဲ၊၂:၁၀−၁၂)။

၄၄:၂၀−၂၂ ယဇ်ပုရောဟိတ်များလိုက်နာရမည့်စည်းကမ်းမှာ ဆံပင်မရှည်ရန် ဖြစ်ညှပ်ရမည်။ မရိတ်ရ။ စပျစ်ရည်မသောက်ရ။ အသရေရှိသော အိမ်ထောင်ဘက်ရှိရမည်။ မုဆိုးမ၊ တခုလပ်မယူရ။

၄၄:၂၃−၂၄ ဇာဒုတ်၏ သားများသည် ဓမ္မဆရာနှင့် တရားသူကြီးတာဝန်ကိုလည်း ထမ်းဆောင်ကြရမည်။ ဘုရားသခင်၏ လူသားများအားသန့်ရှင်းခြင်းနှင့် မသန့်ရှင်းခြင်း၊ စင်ကြယ်ခြင်းနှင့်မစင်ကြယ်ခြင်းများကို ခွဲခြားနားလည်ရန် လမ်းညွှန်သွန်သင်ရမည်။

၄၄:၂၅−၂၇ လူသေကောင်ကို ကိုင်တွယ်ထိတွေ့မိလျှင် ဘာသာရေးထုံးတမ်းနှင့်အညီ မိမိကိုယ်ကို စင်ကြယ်အောင်ပြုရမည်။ မိဘ−သားသမီး၊ ညီအစ်ကို လင်မရှိသောနှမအတွက် ခြွင်းချက်ရှိသည်။

၄၄:၂၈−၃၁ ဘုရားသခင်ထံ ရည်စူးတင်လှူသောအရာများကို သူတို့ဥစ္စာအဖြစ်ခံစားရကြမည်။ ဘုရားသခင်သည် သူတို့ အတွက် အမွေဥစ္စာဖြစ်သည်။ လောက၌ သူတို့ဖို့ ဥစ္စာပစ္စည်းများရှိရန်မလို။ ယနေ့ခေတ်တွင်လည်း ဘုရားသခင်အမှုဆောင်များ ထိုအတိုင်းခံယူနှလုံးသွင်းသင့်သည်။ ကိုယ်တော်ဘုရားကိုသာ တင်းပြည့်ကျပ်ပြည့် မှီခိုအားထားစေချင်သည်။ လောကအနှောင်အဖွဲ့သံယောဇဉ်များမှ ကင်းလွတ်ကာ ခပ်သိမ်းသော အခြေအနေ၌ ရှင်ပေါလုကဲ့သို့ ရောင့်ရဲတင်းတိမ်စိတ် ရှိရမည်(ဖိ၊ ၄:၁၁)။ သို့သော် ထိုအရာတို့သည် အလိုအလျောက်ရောက်လာမည် မဟုတ်သောကြောင့် ကျွန်ုပ်တို့လေ့ကျင့်သင်ယူရပါမည်။ ဆာ ၇၃: ၂၅−၂၆ တွင် ပါရှိသည့်အတိုင်း “ကိုယ်တော်မှတပါး အကျွန်ုပ်၌ အဘယ်သူရှိပါမည်နည်း။ မြေကြီးပေါ်မှာ ကိုယ်တော်ဘုရားကိုသာ အလိုရှိပါသည်။ အကျွန်ုပ်၏ အသားနှင့်စိတ်နှလုံးပျက်ပြုန်းသော်လည်း ဘုရားရှင်သည် အကျွန်ုပ်နှလုံး၏ အစွမ်းသတ္တိ အကျွန်ုပ်၏ အစဉ်အမြဲခံစားရာ ဖြစ်တော်မူ၏” ဟုဆိုနိုင်ရမည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။