Ezekiel -42 -

ယေဇကျေလအနာဂတ္တိကျမ်း - ၄၂

သန့်ရှင်းရာအရပ်

1ထိုနောက်မှ မြောက်လမ်းဖြင့် ပြင်တံတိုင်းထဲသို့ ခေါ်သွား၍၊ အိမ်တော်မြောက်ဘက်၊ လွတ်လပ်သော အရပ်ရှေ့မှာရှိသော အခန်းများကို ပြလေ၏။ 2ထိုအခန်းတို့သည် မြောက်တံခါးအထိ၊ အလျား အတောင်တစ်ရာ၊ အနံ အတောင်ငါးဆယ်ရှိကြ၏။ 3အတောင်နှစ်ဆယ်ရှိသော အတွင်းတံတိုင်းရှေ့၊ ပြင်တံတိုင်း ကျောက်ခင်းရှေ့တွင် တစ်ဖက်တစ်ချက်၌ နံရံအခန်း သုံးဆင့်ရှိ၏။ 4ထိုအခန်းများရှေ့မှာ တစ်တောင်ကျယ်သော လမ်းနှင့်တကွ အတွင်းဘက်သို့ဝင်၍၊ အနံ ဆယ်တောင်ရှိသော စင်္ကြံရှိ၏။ အခန်းတံခါးတို့သည် မြောက်ဘက်သို့ မျက်နှာပြုကြ၏။ 5အထက်ခန်းတို့သည် ကျဉ်းကြ၏။ သူတို့၏ကြမ်းပြင်သည် အောက်ခန်းကြမ်းပြင်၊ အလယ်ခန်း ကြမ်းပြင်နှင့်မညီ၊ အထဲသို့ဝင်လျက် ရှိကြ၏။ 6အကြောင်းမူကား၊ အခန်းသုံးဆင့်ရှိသော်လည်း၊ ထိုအခန်းတို့သည် အခြားတံတိုင်းကဲ့သို့ တိုင်မရှိ၊ သို့ဖြစ်၍၊ အောက်ခန်းနှင့် အလယ်ခန်းထက် သာ၍ကျဉ်းကြ၏။ 7ထိုအခန်းများ တစ်ဖက်တစ်ချက်၊ ပြင်တံတိုင်းဘက်မှာ အခန်းများရှေ့၌ကာသော နံရံသည် အလျား အတောင်ငါးဆယ်ရှိ၏။ 8ပြင်တံတိုင်းနှင့် ဆိုင်သောအခန်းတို့သည် အလျား အတောင်ငါးဆယ်ရှိကြ၏။ ဗိမာန်တော်ရှေ့မှာ အလျားသည် အတောင်တစ်ရာ ရှိ၏။ 9ပြင်တံတိုင်းမှလာ၍၊ ထိုအခန်းများခြေရင်း အရှေ့ဘက်၌ ဝင်ရာလမ်းရှိ၏။ 10အိမ်တော်တောင်ဘက်၊ လွတ်လပ်သောအရပ်ကိုကာသော တံတိုင်းနံရံ၌လည်း အခန်းများရှိကြ၏။ 11ထိုအခန်းစုရှေ့မှာ ရှိသောစင်္ကြံမှစ၍ အခန်းအလျားအနံ၊ ထွက်ရာဝင်ရာ တံခါးရှိသမျှတို့သည် မြောက်အခန်းစုနှင့် ပုံသဏ္ဌာန်တူကြ၏။ 12တောင်ခန်းတံခါးတို့သည်လည်း မြောက်ခန်းတံခါးတို့နှင့် တူသည်ဖြစ်၍၊ တံတိုင်းတစ်ဖက်တစ်ချက်၊ အရှေ့သို့မျက်နှာပြုသော စင်္ကြံဦး၌ ဝင်ရာတံခါးဝရှိ၏။

13တိုင်းသောသူကလည်း၊ လွတ်လပ်သောအရပ်ရှေ့မှာ မြောက်ခန်းနှင့် တောင်ခန်းတို့သည် သန့်ရှင်းသောအခန်း၊ ထာဝရဘုရားထံတော်သို့ချဉ်းကပ်သော ယဇ်ပုရောဟိတ်တို့သည် အလွန်သန့်ရှင်းသောအရာများကို စားရသောအခန်း ဖြစ်ကြ၏။ ထိုအရပ်သည် သန့်ရှင်းသောကြောင့် အလွန်သန့်ရှင်းသောအရာ၊ ဘောဇဉ်ပူဇော်သကာ၊ အပြစ်ဖြေရာယဇ်၊ ဒုစရိုက်ဖြေရာယဇ်တို့ကို ထားရာအရပ်ဖြစ်၏။ 14ယဇ်ပုရောဟိတ်တို့သည် ဝင်သောအခါ အမှုတော်ဆောင် အဝတ်ကိုဝတ်လျက်၊ သန့်ရှင်းသောအရပ်မှ ပြင်တံတိုင်းသို့ မထွက်ရ။ ထိုအဝတ် သန့်ရှင်းသောကြောင့် ချွတ်ထား၍ အခြားသောအဝတ်ကို ဝတ်ပြီးမှ၊ လူများရှိရာသို့ ထွက်သွားရကြမည်ဟု ငါ့အားပြောဆို၏။

ဗိမာန်တော်မြေယာအကျယ်အဝန်း

15အတွင်းဗိမာန်တော်ကို တိုင်းပြီးသည်နောက်၊ အရှေ့တံခါးပြင်သို့ ခေါ်သွား၍၊ 16တိုင်းစရာကျူလုံးနှင့် အရှေ့မျက်နှာကိုတိုင်းလျှင် ကျူလုံးအပြန် ငါးရာရှိ၏။ 17မြောက်မျက်နှာကိုတိုင်းလျှင်လည်း ကျူလုံး အပြန်ငါးရာရှိ၏။ 18တောင်မျက်နှာကိုတိုင်းလျှင်လည်း ကျူလုံး အပြန်ငါးရာရှိ၏။ 19အနောက်မျက်နှာကိုတိုင်းလျှင်လည်း ကျူလုံး အပြန်ငါးရာရှိ၏။ 20လေးမျက်နှာကိုတိုင်း၍ ပတ်လည်၌ရှိသော တံတိုင်းသည် သန့်ရှင်းသောအရပ်၊ မသန့်ရှင်းသောအရပ်တို့ကို ပိုင်းခြားလျက်၊ အလျား အပြန်ငါးရာ၊ အနံလည်း အပြန်ငါးရာရှိ၏။

ယေဇကျေလအနာဂတ္တိကျမ်း - ၄၂ (အနက်ဖွင့်)

(၁၄) ယဇ်ပုရောဟိတ်များ၏နေရာတိုင်ခင်း(၄၂:၁−၁၄)

ဗိမာန်တော်၏ မြောက်ဘက်နှင့် တောင်ဘက်နှစ်ခုစလုံးတွင် ယဇ်ပုရောဟိတ်များအတွက် နေရာထိုင်ခင်းပြင်ဆင်ထားသည်။ ထိုနေရာများသည် ယဇ်ပုရောဟိတ်တို့ သန့်ရှင်းသောယဇ်ပူဇော်သက္ကာကို စားသုံးရာနှင့် ယဇ်ပူဇော်ရာ၌ ဆင်မြန်းရသောဝတ်ရုံများ သိမ်းဆည်းရာ နေရာဖြစ်သည်။

(၁၅) အပြင်ခန်း၏အတိုင်းအတာပမာဏ (၄၂:၁၅−၂၀)

အတွင်းပိုင်းတိုင်းတာရာ ကျူလုံးအပြန်ငါးရာစီ ရှိ၍ စတုရန်းပုံဖြစ်သည်။ အပိုဒ်ငယ်(၂၀)၌ ပါရှိသည့် သန့်ရှင်းသော အရပ်၊ မသန့်ရှင်းသောအရပ်ဟူသော စကားသည်နားလည်ရခက်သည်။ ဘုရားတရားနှင့်ဆိုင်သော အခန်းနှင့်လူဝတ်ကြောင်နှင့် ဆိုင်သောအခန်းဟု ဆိုရမည်။ ဘုရားတရားဝတ်ပြုရာနှင့် နေ့စဉ်အသက်တာ ကွဲပြားသကဲ့သို့ ခြားနားသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။