Ezekiel -36 -

ယေဇကျေလအနာဂတ္တိကျမ်း - ၃၆

ဣသရေလတို့အတွက်ကောင်းချီး

1တစ်ဖန် အချင်းလူသား၊ ဣသရေလတောင်တို့အား ပရောဖက်ပြု၍ ဆင့်ဆိုရမည်မှာ၊ အို ဣသရေလတောင်တို့၊ ထာဝရဘုရား၏ အမိန့်တော်ကို နားထောင်ကြလော့။ 2အရှင်ထာဝရဘုရား မိန့်တော်မူသည်ကား၊ ရန်သူက၊ အေ့ဟေ၊ ထာဝရတောင်တို့သည် ငါတို့လက်သို့ ရောက်ကြပြီဟု သင်တို့တစ်ဖက်၌ ဆိုမိသောကြောင့်၊ 3ပရောဖက်ပြု၍ အရှင်ထာဝရဘုရား၏ အမိန့်တော်ကို ဆင့်ဆိုရမည်မှာ၊ သင်တို့သည် ကျန်ကြွင်းသော တစ်ပါးအမျိုးသားတို့ သိမ်းယူရာဖြစ်ရသည်တိုင်အောင်၊ သင်တို့ကို သုတ်သင်ပယ်ရှင်း၍ ပတ်လည် ကိုက်စားသောကြောင့်လည်းကောင်း၊ သင်တို့သည် လူများပြောဆိုရာ၊ ကဲ့ရဲ့ရာဖြစ်သောကြောင့်လည်းကောင်း၊ 4အို ဣသရေလတောင်တို့၊ အရှင်ထာဝရဘုရား၏ အမိန့်တော်ကို နားထောင်ကြလော့။ အရှင်ထာဝရဘုရားသည် တောင်ကြီး၊ တောင်ငယ်၊ မြစ်ရေစီးရာ၊ ချိုင့်ရာ၊ သုတ်သင်သောလွင်ပြင်မှစ၍၊ ပတ်လည်၌နေသော တစ်ပါးအမျိုးသား အကျန်အကြွင်းတို့သည် လုယူကဲ့ရဲ့၍၊ မြို့သားစွန့်သွားသောမြို့တို့အား မိန့်တော်မူသည်ကား၊ 5အကယ်စင်စစ် ငါ့ပြည်ကိုလုယူစရာဖို့ ပစ်ထားခြင်းငှာ အလွန်ဝမ်းမြောက်သောစိတ်၊ အငြိုးထားသောစိတ်ရှိ၍၊ ကိုယ်တိုင်လုယူစရာဖို့ စီရင်သော ဧဒုံအမျိုးသားအပေါင်းတို့နှင့် ကျန်ကြွင်းသော တစ်ပါးအမျိုးသားတို့ တစ်ဖက်၌ ငါသည် ဒေါသမီးထွက်၍ ပြောထားပြီ။ 6သို့ဖြစ်၍၊ ဣသရေလပြည်ကို ရည်မှတ်၍ ပရောဖက်ပြုလျက်၊ တောင်ကြီး၊ တောင်ငယ်၊ မြစ်ရေစီးရာ၊ ချိုင့်ရာတို့အား အရှင်ထာဝရဘုရား၏ အမိန့်တော်ကို ဆင့်ဆိုရမည်မှာ၊ သင်တို့သည် တစ်ပါးအမျိုးသားတို့ ကဲ့ရဲ့ခြင်းကိုခံရသောကြောင့်၊ ငါသည် ဒေါသအမျက်ထွက်၍ ပြောပြီ။ 7အရှင်ထာဝရဘုရား မိန့်တော်မူသည်ကား၊ အကယ်စင်စစ် သင်တို့ပတ်လည်၌နေသော တစ်ပါးအမျိုးသားတို့သည် ကိုယ်အရှက်ကွဲခြင်းကို ခံရကြလိမ့်မည်ဟု ငါကျိန်ဆိုပြီ။ 8အို ဣသရေလတောင်တို့၊ သင်တို့မူကား၊ အပင်ပေါက်၍ ငါ၏လူဣသရေလအမျိုးသားတို့အဖို့ အသီးကို သီးရကြလိမ့်မည်။ သူတို့ ပြန်လာချိန်နီးပြီ။ 9ငါသည် သင်တို့ဘက်၌နေ၍ သင်တို့ရှိရာသို့ ပြန်လာသဖြင့်၊ သင်တို့အပေါ်မှာ လယ်လုပ်၍ မျိုးစေ့ကြဲကြလိမ့်မည်။ 10သင်တို့အပေါ်မှာ လူများတည်းဟူသော ဣသရေလအမျိုးသားအပေါင်းတို့ကို ငါပြန့်ပွားစေသဖြင့်၊ သူတို့သည် မြို့များ၌နေ၍ ပျက်စီးသောအရပ်များကို ပြုပြင်ကြလိမ့်မည်။ 11သင်တို့အပေါ်မှာ လူနှင့်တိရစ္ဆာန်တို့ကို ငါများပြားစေသဖြင့်၊ သူတို့သည်ပွားများ၍ သားမြေးအစဉ်အဆက် ရှိကြလိမ့်မည်။ နေရင်းအရပ်တို့၌ ငါနေရာချ၍၊ အရင်ပြုသကဲ့သို့ ငါကျေးဇူးပြုမည်။ ငါသည် ထာဝရဘုရားဖြစ်ကြောင်းကို သင်တို့သိရကြလိမ့်မည်။ 12သင်တို့အပေါ်မှာ လူများတည်းဟူသော ငါ၏လူဣသရေလအမျိုးသားတို့သည် သွားလာမည်အကြောင်း ငါပြုမည်။ သူတို့သည် သင်တို့ကိုသိမ်းယူ၍ အမွေခံရသဖြင့်၊ နောက်တစ်ဖန် သင်တို့ကြောင့် သားမဆုံးရှုံးရကြ။ 13အရှင်ထာဝရဘုရား မိန့်တော်မူသည်ကား၊ အချင်းပြည်၊ သင်သည် လူတို့ကို ကိုက်စားတတ်၏။ ကိုယ်အမျိုးသားတို့ကို လုယူဖျက်ဆီးတတ်၏ဟု သူတစ်ပါးဆိုသောကြောင့်၊ 14နောက်တစ်ဖန် သင်သည် လူတို့ကို မကိုက်မစားရ။ ကိုယ်အမျိုးသားတို့၌ လုယူဖျက်ဆီးခြင်းကို မပြုရဟု အရှင်ထာဝရဘုရား မိန့်တော်မူ၏။ 15နောက်တစ်ဖန် အတိုင်းတိုင်းအပြည်ပြည် ကဲ့ရဲ့အပြစ်တင်သော စကားကိုမကြားရ။ နောက်တစ်ဖန် ကိုယ်အမျိုးသားတို့၌ လုယူဖျက်ဆီးခြင်းကို မပြုရဟု အရှင်ထာဝရဘုရား မိန့်တော်မူ၏။

ဣသရေလတို့၏ဘဝသစ်

16တစ်ဖန် ထာဝရဘုရား၏ နှုတ်ကပတ်တော်သည် ငါ့ဆီသို့ ရောက်လာ၍၊ 17အချင်းလူသား၊ ဣသရေလအမျိုးသားတို့သည် ကိုယ်ပြည်၌နေသောအခါ၊ အလိုအလျောက် ကျင့်ကြံပြုမူသောအားဖြင့် ထိုပြည်ကို ညစ်ညူးစေကြ၏။ သူတို့ အကျင့်ဓလေ့သည် ငါ့ရှေမှာ ဥတုရောက်သော မိန်းမ၏အညစ်အကြေးကဲ့သို့ ဖြစ်၏။ 18ထိုပြည်၌ လူအသက်ကိုသတ်သောအပြစ်၊ ရုပ်တုတို့နှင့် ညစ်ညူးစေသောအပြစ်ကြောင့်၊ ငါသည် ဒေါသအမျက်ကို သွန်းလောင်းပြီ။ 19အတိုင်းတိုင်းအပြည်ပြည်သို့ ငါကွဲပြားပျံ့လွင့်စေပြီ။ သူတို့ ကျင့်ကြံပြုမူသည်အတိုင်း ငါစီရင်ပြီ။ 20သို့ရာတွင် တစ်ကျွန်းတစ်နိုင်ငံသို့ ရောက်သောအခါ ဤသူတို့သည် ထာဝရဘုရား၏လူဖြစ်ကြ၏။ ကိုယ်ပြည်မှ ထွက်သွားရကြ၏ဟု သူတစ်ပါးပြောဆိုသဖြင့်၊ ငါ၏နာမမြတ်ကိုရှုတ်ချသောကြောင့်၊ 21ဣသရေလအမျိုးသားရောက်ရာ တစ်ကျွန်းတစ်နိုင်ငံအရပ်ရပ်တို့၌ ရှုတ်ချသော ငါ၏နာမမြတ်ကို ငါနှမြော၏။ 22သို့ဖြစ်၍၊ အရှင်ထာဝရဘုရား၏အမိန့်တော်ကို ဣသရေလအမျိုးသားတို့အား ဆင့်ဆိုရမည်မှာ၊ အို ဣသရေလအမျိုး၊ သင်တို့ကိုထောက်၍ ဤအမှုကို ငါပြုသည်မဟုတ်။ သင်တို့ရောက်သမျှသောအရပ်တို့၌ လူအမျိုးမျိုးတို့ရှေ့မှာ ရှုတ်ချသော ငါ၏နာမမြတ်ကိုသာ ထောက်၍ ပြု၏။ 23တစ်ပါးအမျိုးသားတို့ အလယ်၌ သင်တို့ရှုတ်ချသော ငါ၏မဟာနာမတော်ကို ငါချီးမြှောက်မည်။ သူတို့ မျက်မှောက်၌ သင်တို့အားဖြင့် ငါသည် ချီးမြှောက်ရာသို့ ရောက်သောအခါ၊ ငါသည် ထာဝရဘုရား ဖြစ်ကြောင်းကို သူတို့သိရကြလိမ့်မည်ဟု အရှင်ထာဝရဘုရား မိန့်တော်မူ၏။ 24အကြောင်းမူကား၊ သင်တို့ကို အတိုင်းတိုင်း အပြည်ပြည်တို့က ငါခေါ်ခဲ့၍ စုဝေးစေပြီးလျှင်၊ သင်တို့ နေရင်းပြည်သို့ ပို့ဆောင်မည်။ 25သင်တို့အပေါ်မှာ သန့်ရှင်းသောရေကို ဖျန်းသဖြင့်၊ သင်တို့ကို ခပ်သိမ်းသော အညစ်အကြေးမှစ၍ ခပ်သိမ်းသော ရုပ်တုတို့နှင့် ကင်းစင်စေမည်။ 26စိတ်နှလုံးသစ်ကို ငါပေးမည်။ သဘောသစ်ကို သွင်းထားမည်။ သင်တို့ကိုယ်ခန္ဓာထဲက ကျောက်နှလုံးကိုနုတ်၍ အသားနှလုံးကို ပေးမည်။ 27ငါ့ဝိညာဉ်ကိုလည်း သင်တို့အထဲသို့ သွင်းပေးသဖြင့်၊ သင်တို့သည် ငါ၏တရားလမ်းသို့လိုက်၍၊ ငါစီရင်တော်မူချက်တို့ကို စောင့်ရှောက်ကြလိမ့်မည်။ 28ဘိုးဘေးတို့အား ငါပေးသောပြည်၌ သင်တို့သည်နေရ၍ ငါ၏လူဖြစ်ကြလိမ့်မည်။ ငါသည်လည်း သင်တို့၏ဘုရားသခင်ဖြစ်မည်။ 29သင်တို့ကို အညစ်အကြေးရှိသမျှတို့နှင့် ငါကင်းလွတ်စေမည်။ အစာခေါင်းပါးခြင်းဘေးကို ပယ်ရှားခြင်းငှာ၊ ဆန်စပါးကိုမှာလိုက်၍ များပြားစေမည်။ 30သင်တို့သည် မွတ်သိပ်၍ တစ်ပါးအမျိုးသားတို့ ကဲ့ရဲ့ခြင်းနှင့် လွတ်စေမည်အကြောင်း၊ သစ်ပင်အသီးနှင့် မြေအသီးအနှံကို ငါများပြားစေမည်။ 31ထိုအခါ သင်တို့သည် ကိုယ်ကျင့်ဖူးသော အကျင့်ဆိုးနှင့် မကောင်းသောအမှုတို့ကို အောက်မေ့၍၊ ကိုယ်ဒုစရိုက်အပြစ်၊ စက်ဆုပ်ရွံရှာဖွယ်သော အမှုတို့ကြောင့် ကိုယ်ကိုကိုယ် ရွံရှာကြလိမ့်မည်။ 32သင်တို့ကိုထောက်၍ ဤအမှုကို ငါပြုသည်မဟုတ်ဟု သိမှတ်ကြလော့။ အို ဣသရေလအမျိုး၊ ကိုယ်ပြုမိသောအမှုကြောင့် ရှက်ကြောက်လျက်၊ မိန်းမောတွေဝေလျက်နေကြလော့ဟု အရှင်ထာဝရဘုရား မိန့်တော်မူ၏။ 33အရှင်ထာဝရဘုရား မိန့်တော်မူသည်ကား၊ သင်တို့ဒုစရိုက်အပြစ်ရှိသမျှတို့ကို ငါရှင်းလင်းသောအခါ၊ မြို့များ၌လူနေစေ၍ ပျက်စီးသောအရပ်တို့သည် ပြုပြင်ခြင်းရှိကြလိမ့်မည်။ 34လျှောက်သွားသောသူအပေါင်းတို့၏ မျက်မှောက်၌ စွန့်ပစ်ဖူးသော မြေတွင် တစ်ဖန်လယ်လုပ်ကြလိမ့်မည်။ 35ထိုအခါ သူတစ်ပါးတို့က၊ အရင်စွန့်ပစ်သော ဤမြေသည် ဧဒင်ဥယျာဉ်ကဲ့သို့ ဖြစ်လေပြီ။ သုတ်သင် ပယ်ရှင်းပျက်စီးသော မြို့တို့သည်လည်း ခိုင်ခံ့၍ မြို့သားတို့နှင့် ပြည့်စုံကြပြီဟု ပြောကြလိမ့်မည်။ 36ထိုအခါ ပျက်စီးသောအရပ်တို့ကို ငါထာဝရဘုရား ပြုပြင်ကြောင်းကိုလည်းကောင်း၊ စွန့်ပစ်သောမြေတွင် လယ်လုပ်ကြောင်းကိုလည်းကောင်း၊ သင်တို့ပတ်လည်၌နေရစ်သော တစ်ပါးအမျိုးသားတို့သည် သိရကြလိမ့်မည်။ ငါထာဝရဘုရားသည် မိန့်မြွက်သည်အတိုင်း ပြုမည်။ 37အရှင်ထာဝရဘုရား မိန့်တော်မူသည်ကား၊ ဣသရေလအမျိုးအဖို့ ဤအမှုကို ငါပြုရမည်အကြောင်း၊ သူတို့သည် ငါ့ကို တောင်းပန်ရကြမည်။ သိုးများပြားသကဲ့သို့ ထိုအမျိုးသားချင်းတို့ကို များပြားစေမည်။ 38ပျက်စီးသောမြို့တို့သည် သန့်ရှင်းသော သိုးစုတည်းဟူသော၊ ဓမ္မပွဲခံချိန်တွင် ယေရုရှလင်သိုးစုကဲ့သို့သော လူစုတို့နှင့် ပြည့်စုံ၍၊ ငါသည် ထာဝရဘုရားဖြစ်ကြောင်းကို သိရကြလိမ့်မည်ဟု မိန့်တော်မူ၏။

ယေဇကျေလအနာဂတ္တိကျမ်း - ၃၆ (အနက်ဖွင့်)

(ဃ) လူများနှင့် လယ်ယာမြေ ပြန်လည်ထူထောင်ခြင်း (အခန်း ၃၆)

အခန်းငယ် ၂၅:၃၀ကို ကြည့်၍ အခန်း(၃၆)ကို “ယေဇကျေလဧဝံဂေလိသတင်းကောင်း”ဟု ကျမ်းဂန်ပညာရှင်များက တင်စားကြသည်။

၃၆:၁−၇ ဘုရားသခင်၏ လူမျိုးတော်ကို နှိပ်စက်၍ အိုးအိမ်လယ်ယာမြေများကို သိမ်းဆည်းကြသော လူမျိုးများအား ဘုရားသခင်က အရေးယူအပြစ်ပေးပါသည်။ ထိုလူမျိုးများအနက် ဧဒုံလူမျိုးကို ယေဟောဝါ ဘုရားက သီးသန့်တရားစီရင်မည်။

၃၆:၈−၁၅ ဣသရေလ ရေမြေတောတောင်နှင့် မြို့ပြပြည်ရွာများ၌ လူအများ မှီတင်းနေထိုင်ကြမည်။တိုင်းနိုင်ငံသားများက ဣသရေလတို့အား အထင်မသေးဝံ့တော့ဘဲ မော်ကြည့်ရမည်။

၃၆:၁၆−၂၁ တောတောင်ရေမြေမျှသာ မြေဆီပြည့်ဝစေသည်မဟုတ်။ ကမ္ဘာအရပ်ရပ်သို့ ကွဲလွင့်နေသော ဣသရေလလူမျိုးများကို ဘူမိနက်သန်မြေသို့ ပြန်လည်စုစည်းစေလိမ့်မည်။ သူတို့သည် အသွေးသွန်းခြင်း ရုပ်တုကိုးကွယ်ခြင်းဖြင့် ဘုရားသခင်၏ဂုဏ်အသရေကို ညှိုးနီမ်းစေသောကြောင့် ဝေးမြေရပ်ခြားသို့ ကွဲလွင့်ရောက်ရှိ သွားခြင်းဖြစ်သည်။

၃၆:၂၂−၂၃ အငယ်(၂၂)ကို ပေါလုက ရောမ ၂:၂၄ ၌ တပါးအမျိုးသားများနှင့် ပညတ်တရား ဆက်ဆံရေးအဖြစ် ပြန်လည်ကိုးကားထားသည်။ နေရပ်ဌာနီ သို့ပြန်လည်စုစည်းမိခြင်းမှာ ဣသရေလတို့၏ အစွမ်းအစ ရှေးကုသိုလ်ကံကြောင့် မဟုတ်။ ဘုရားသခင်က ကရုဏာတော်ဖြစ်သည်။

၃၆:၂၄−၂၈ အငယ် ၂၄−၂၈ တွင် ဣသရေလတို့၏ ဝိညာဉ်ရေးရာ ပြန်လည်ရှင်သန်ခြင်းကို ရှင်းပြသည်။ ဘုရားသခင်က ဣသရေလလူမျိုးအား စိတ်နှလုံးသစ်၊ ဝိညာဥ်သစ်(အသစ်တဖန်မွေးဖွားခြင်း) ပေးသနားမည်။ မစင်ကြယ်ခြင်းမှ ကယ်နှုတ်မည်။ Keil က ဤအပိုဒ်ငယ်အတွက် မှတ်ချက်ပြုသည်။

အပြစ်ဒုစရိုက်မှစင်ကြယ်ပေးခြင်း (Cleansing from sins) ဆိုသည်မှာ ဖြောင့်မတ်ရာရောက်စေခြင်း (Justification) ဖြစ်သည်။ သန့်ရှင်းစေခြင်း (Sanctification)နှင့် မရောထွေးသင့်ပါ။ သန့်ရှင်းစေခြင်းတွင် သန့်ရှင်းသောဝိညာဉ်တော်က အဟောင်းဖြစ်သော ကျောက်ခဲနလုံးသားကို ဖယ်ရှား၍ အသစ်ဖြစ်သော အသားနှလုံးသားကို ထည့်သွင်းပေးသည်။ သို့မှသာ ထိုလူသည် ဘုရားသခင်၏ ပညတ်တရားကို ဖြည့်ဆည်းနိုင်၍ အသက်တာသစ်၌ လျှောက်လှမ်းနိုင်မည်။ ၃၄

အသစ်တဖန် မွေးဖွားခြင်းအကြောင်းကို သခင်ယေရှုက နိကောဒင်အား သိနားလည်စေချင်သကဲ့သို့ ဤကျမ်းပိုဒ်ကလည်း ဤသရေလလူမျိုးတို့ထံ စေလွှတ်သော ယေဇကျေလအားဘုရားသခင်က ရှင်းလင်းစွာ သိနားလည်စေချင်သည်(ယော၊၃:၁၀ ယှဉ်)။

၃၆:၂၉−၃၀ ဆန်ရေစပါးနှင့် ကောက်ပဲသီးနှံ များအလွန်ဖြစ်ထွန်းအောင်မြင်သဖြင့် နောက်တဖန်အငတ်ဘေး မကြုံကြရ။ လိုလေသေးမရှိ ဘုရားရှင်ပံ့ပို့မစသော်လည်း သူတို့နှင့်ထိုက်တန်လွန်း၍ မဟုတ်။ဘုရားရှင်၏နာမတော် ထင်ရှားစေဖို့ ဖြစ်သည်။

၃၆:၃၁−၃၈ အိမ်နီးနားချင်း တိုင်းနိုင်ငံများကလည်း ဣသရေလမြေ၌ ဘုရားသခင်က လူဦးရေတိုးပွားစေခြင်းကို မျက်ဝါးထင်ထင် တွေ့မြင်အသိအမှတ်ပြုလာကြသည်။ ဘုရားသခင်ကို စူးစမ်းသိကျွမ်းလာကြမည်။ ယေရုရှလပွဲတော်ရက်များ၌လည်း သိုးအုပ်များကြိတ်ကြိတ်တိုး စည်ကားကြမည်။ ဗာဗုလုန်ပြည်မှ ယုဒများပြန်လည် ရောက်ရှိလာကြခြင်းဖြင့် ဤပရောဖက်ပြုချက်အချို့အဝက် ပြည့်စုံခဲ့ပြီ။ ပရောဖက်ပြုချက်အားလုံး ပြည့်စုံလာရန်မှာ လက်ချိုးမျှော်စောင့်ရဦးမည်။ ခရစ်တော်အုပ်စိုးသောနိုင်ငံတော် တည်ထောင်သည့်အခါ လုံးဝ ပြီးပြည့်စုံလာလိမ့်မည်။

ခေတ်ကာလအခြေအနေအရဆိုလျှင် ၁၉၄၈ ခုနှစ်တွင် ဣသရေလနိုင်ငံပေါ်ထွန်းလာသည်။ ယုဒလူများသည်လည်း မယုံတဝက်ဖြင့် မွေ့ရပ်မြေသို့ ပြန်လည်စုစည်းလာကြပြီ။ ဤအဖြစ်အပျက်က သခင်ခရစ်တော် ပြန်လည်ကြွလာလုနီးပြီဖြစ်ကြောင်း အတိတ်နိမိတ်များ ဖြစ်သည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။