Daniel -1 -

ဒံယေလအနာဂတ္တိကျမ်း - ၁

ဒံယေလနှင့်အဖော်များ

(၁:၁-၆:၂၈)

ဣသရေလလူငယ်များ

1ယုဒရှင်ဘုရင်ယောယကိမ် နန်းစံသုံးနှစ်တွင်၊ ဗာဗုလုန်ရှင်ဘုရင် နေဗုခဒ်နေဇာသည် ယေရုရှလင်မြို့သို့ ချီလာ၍ ဝန်းရံလေ၏။ 2ထာဝရဘုရားသည် ယုဒရှင်ဘုရင် ယောယကိမ်မှစ၍ ဗိမာန်တော်တန်ဆာအချို့တို့ကို နေဗုခဒ်နေဇာလက်သို့ အပ်နှံတော်မူ၍၊ ထိုတန်ဆာများကို နေဗုခဒ်နေဇာမင်းသည် ရှိနာပြည်၌ရှိသော မိမိဘုရား၏ကျောင်းသို့ ယူသွားပြီးလျှင်၊ ရွှေတိုက်၌ သွင်းထားတော်မူ၏။ 3ထိုအခါ ရှင်ဘုရင်သည် မိန်းမစိုးအုပ် အာရှပေနတ်ကိုခေါ်တော်မူ၍၊ 4မကောင်းသော လက္ခဏာကင်းလျက်၊ လှသောအဆင်းသဏ္ဌာန်နှင့် ပြည့်စုံ၍၊ ကောင်းသောဉာဏ်နှင့် တကွ အထူးထူးအပြားပြားသော အတတ်ပညာများကို လေ့ကျက်၍၊ နန်းတော်၌ အမှုထမ်းခြင်းငှာ တတ်စွမ်းနိုင်သောလူပျိုတို့ကို ဣသရေလ မင်းမျိုးမင်းသားထဲက ရွေးကောက်၍၊ ခါလဒဲဘာသာအတတ်ကိုသင်စေဟု အမိန့်တော်ရှိ၏။ 5ပွဲတော်မှ ကြွင်းသောအစာနှင့် သောက်တော်မူသော စပျစ်ရည်ကို နေ့တိုင်းပေး၍ သုံးနှစ်ကျွေးမွေးပြီးမှ၊ အမှုတော်ထမ်းရမည်အကြောင်း စီရင်တော်မူ၏။ 6ထိုသူတို့တွင် ယုဒအမျိုးသား ဒံယေလ၊ ဟာနနိ၊ မိရှေလ၊ အာဇရိတို့သည်ပါကြ၏။ 7မိန်းမစိုးအုပ်သည် ထိုသူတို့ကို အမည်နာမလဲ၍၊ ဒံယေလကို ဗေလတရှာဇာ၊ ဟာနနိကို ရှာဒရက်၊ မိရှေလကို မေရှက်၊ အာဇရိကို အဗေဒနေဂေါဟု၊ အသီးအသီး အမည်အသစ်ကိုပေး၏။

8ဒံယေလမူကား၊ ပွဲတော်မှကြွင်းသောအစာနှင့် သောက်တော်မူသော စပျစ်ရည်ကို မသောက်မစားဘဲ၊ ညစ်ညူးခြင်းကို ရှောင်မည်ဟုအကြံရှိ၍၊ မိမိကို မညစ်ညူးစေမည်အကြောင်း၊ မိန်းမစိုးအုပ်ကို အခွင့်တောင်း၏။ 9ဘုရားသခင် ပြုပြင်တော်မူသောအားဖြင့်၊ မိန်းမစိုးအုပ်သည် ဒံယေလကို အလွန်ချစ်သနားသော်လည်း၊ 10ငါ့သခင်ကြည့်ရှုစေခြင်းငှာ မိန်းမစိုးအုပ်ခန့်ထားသော စားတော်ကဲကို ငါကြောက်၏။ သင်တို့အစားအသောက်ကို စီရင်တော်မူပြီ။ သင်တို့မျက်နှာသည် အရွယ်တူ လူပျိုတို့၏ မျက်နှာလောက် အဆင်းမလှသည်ကို မြင်တော်မူလျှင်၊ သင်တို့အတွက် ငါသည် ရာဇဝတ်သင့်၍ အသက်မလွတ်ရဟု ဒံယေလကို ပြောဆို၏။ 11ထိုအခါ ဒံယေလ၊ ဟာနနိ၊ မိရှေလ၊ အာဇရိတို့ကို ကြည့်ရှုစေခြင်းငှာ မိန်းမစိုးအုပ်ခန့်ထားသော စားတော်ကဲကို ဒံယေလက၊ 12အကျွန်ုပ်တို့ စားသောက်စရာဖို့ ဟင်းသီးဟင်းရွက်နှင့် ရေကိုသာ ဆယ်ရက်ပတ်လုံးပေးစမ်းပါ။ 13ထိုနောက်၊ အကျွန်ုပ်တို့မျက်နှာနှင့်၊ ပွဲတော်မှ ကြွင်းသော အစာကိုစားသော လူပျိုတို့၏မျက်နှာကို သခင်ရှေ့၌ စစ်တော်မူပါစေ။ ကိုယ်တော်တိုင်မြင်ပြီးမှ၊ အကျွန်ုပ်တို့ကို စီရင်တော်မူပါဟု ပြောလျှင်၊ 14စားတော်ကဲသည် ဝန်ခံ၍ ဆယ်ရက်စုံစမ်းလေ၏။ 15ဆယ်ရက်စေ့လျှင် သူတို့မျက်နှာသည်၊ ပွဲတော်မှ ကြွင်းသောအစာကို စားသော လူပျိုအပေါင်းတို့၏ မျက်နှာထက် အဆင်းလှ၍ ဖွံ့ဝလျက်ရှိ၏။ 16ထိုအခါ စားတော်ကဲသည် သူတို့အစာကိုလည်းကောင်း၊ သူတို့သောက်ဖို့ စပျစ်ရည်ကိုလည်းကောင်း ရုပ်သိမ်း၍၊ ဟင်းသီး ဟင်းရွက်နှင့်သာ ကျွေးမွေး၏။ 17ဘုရားသခင်သည် ထိုလုလင်လေးယောက်တို့အား အထူးထူးသော သိပ္ပံအတတ်ပညာတို့ကို သိစေခြင်းငှာ၊ ထိုးထွင်း၍ နားလည်နိုင်သော ဉာဏ်သတ္တိကို ပေးသနားတော်မူ၏။ ဒံယေလသည်လည်း ဗျာဒိတ်ရူပါရုံနှင့် အိပ်မက်ကိုနားလည်နိုင်သော ဉာဏ်ပညာနှင့် ပြည့်စုံ၏။

18နန်းတော်သို့ သွင်းစေခြင်းငှာ ချိန်းချက်တော်မူသော အချိန်ရောက်သော်၊ မိန်းမစိုးအုပ်သည် လုလင်များတို့ကိုခေါ်၍ နန်းတော်သို့ သွင်းလေ၏။ 19ရှင်ဘုရင်သည် ထိုလုလင်တို့နှင့် ဆွေးနွေးမေးမြန်းတော်မူပြီးလျှင်၊ ဒံယေလ၊ ဟာနနိ၊ မိရှေလ၊ အာဇရိတို့နှင့် တူသောသူ တစ်ယောက်မျှမရှိသောကြောင့်၊ သူတို့သည် အထံတော်၌ ခစားရသော အခွင့်အရာကို ရကြ၏။ 20ရှင်ဘုရင်မေးတော်မူသမျှသော အတတ်ပညာကို ထိုလုလင်တို့သည် နိုင်ငံတော်၌ရှိသမျှသော မာဂုပညာရှိ၊ ဗေဒင်တတ်များထက်သာ၍ ဆယ်ဆတတ်ကြသည်ကို တွေ့မြင်တော်မူ၏။ 21ဒံယေလသည် ကုရုမင်းကြီးနန်းစံ ပထမနှစ်တိုင်အောင် ရှိနေသတည်း။

ဒံယေလအနာဂတ္တိကျမ်း - ၁ (အနက်ဖွင့်)

၁။ ဒံယေလနှင့်အဖော်တို့၏ခိုင်မြဲသောယုံကြည်မှု (အခန်း ၁)

၁:၁-၇ ယောယကိမ်မင်း ယေရုရှလင်တွင် နန်းစံ (၃) နှစ်ပြည့်သောနှစ်တွင် ဗာဗုလုန်ဘုရင်နေဗုခပ်နေဇာသည် စစ်သည်ဗိုလ်ပါ အလုံးအရင်းဖြင့် လာရောက် ဝိုင်းရံတိုက်ခိုက်သည်။ နေဗုခပ်နေဇာမင်းကြီးက ယုဒလူငယ်လူရွယ်များနှင့် ပညာတတ်များကို သူ့အားခစားလုပ်ကျွေးစေသည်။ ထိုလူငယ်လူရွယ်ပညာတတ်များထဲတွင် ဒံယေလ၊ ဟာနနိ၊ မိရှေလနှင့် အာ‌‌ဇရိတို့လည်း ပါဝင်သည်။ ခါလဒဲနာမည်များမှာ ဗေလတရှာဇာ၊ ရှာဒရက်၊ မေရှက်၊ အဗေဒနဂေါတို့ဖြစ်သည်။ ဘုရင့်အမိန့်အရ ဘုရင့်စားကြွင်းစားကျန်များကို ပွဲတော်တည်ကြရသည်။ ထိုအစားအစာများသည် များသောအားဖြင့် မသန့်ရှင်းသောအစာများဖြစ်သည်။ ဓမ္မဟောင်းပညတ်ချက်များအရဆိုလျှင် ရုပ်တုဆင်းတု ကိုးကွယ်ခြင်းဖြစ်သည်။ စားကြွင်းစားကျန်များသည် ယုဒထုံးစံအရ မစင်ကြယ်။

အပိုဒ်ငယ် ၁ နှင့် ယေ ၂၅:၁ အကြားတွင် ကွာဟချက်တွေ့ရသည်။ ဤကျမ်းပိုဒ်တွင် နေဗုခပ်နေဇာသည် ယေရုရှလင်အား ယောယကိမ် နန်းစံတတိယနှစ်တွင် သိမ်းပိုက်သည်ဟုဆိုိုသည်။ ယေရမိကျမ်းတွင်မူ ယေရောကိမ်နန်းစံ စတုတ္ထနှစ်တွင် နေဗုခပ်နေဇာ ပထမနှစ် နန်းစံသည်ဟု ဆိုထားသည်။ ဤကွာခြားချက်သည် ယုဒလူမျိုးနှင့် ဗာဗုလုန်တို့၏ သမိုင်းမှတ်ချက်ရာကွာခြားချက် ဖြစ်သည်။

၁:၈-၁၂ ဒံယေလသည် ထိုအစားအစာများကို စားသုံးရန် ငြင်းပယ်သည်။ ပွဲတော်ကျစားကောင်းသောက်ဖွယ်များအစား ဟင်းသီးဟင်းရွက်နှင့် ရေကို သာပေးရန် တောင်းဆိုသည်။ စားတော်ကဲ အာရှပေနတ် Ashpenaz သည် (ယုဒထုံးစံနှင့် ယုဒဘုရားမသိသူ)ထို စကားကြားသောအခါ အံ့သြတုန်လှုပ်မိသည်။ အကယ်၍ ထိုတောင်းဆိုသည့်အတိုင်း မလုပ်ပေးလျှင် တခုခု ဖြစ်မည်စိုးရိမ်သည်။ သို့ကြောင့် တောင်းဆိုသည့်အတိုင်း လိုလေသေးမရှိရအောင် လုပ်ပေးသည်။

၁:၁၃-၂၁ ဟင်းသီးဟင်းရွယ်သက်သတ်လွတ်စားရသောအခါ သက်သတ်လွတ်စားသောသူများနှင့် မျက်နှာယှဉ်ကြည့်ရန် တောင်းဆိုသည့်အတိုင်း ဆယ်ရက်လွန်မြောက်သောအခါ ဒံယေလတို့အဖွဲ့သည် အသားစားသူများထက် ဆယ်ဆအဆင်းလှကြောင်း တွေ့ရသည်။ သို့ကြောင့် သူတို့အကျင့်ကို ဘုရင်က အသိအမှတ်ပြုသည်။ ဘုရားသခင်က အသိဉာဏ်ပညာ၊ အထူးထူးသော သိပ္ပံအတတ်ပညာ၊ ထိုးထွင်းနားလည်နိုင်သော ဉာဏ်သတ္တိတို့ကို ပေးသနားတော်မူသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။