2 Chronicles -34 -

ရာဇဝင်ချုပ်ဒုတိယစောင် - ၃၄

ယုဒဘုရင်ယောရှိ

(၄ရာ၊ ၂၂: ၁-၂)

1ယောရှိသည် အသက်ရှစ်နှစ်ရှိသော် နန်းထိုင်၍ ယေရုရှလင်မြို့၌ သုံးဆယ်တစ်နှစ် စိုးစံလေ၏။ 2ထိုမင်းသည် ထာဝရဘုရားရှေ့တော်၌ တရားသောအမှုကိုပြု၍၊ လက်ယာဘက်လက်ဝဲဘက်သို့ မလွှဲ၊ အဘဒါဝိဒ်လိုက်သောလမ်းသို့ လိုက်လေ၏။

ယောရှိ၏ပြုပြင်ပြောင်းလဲခြင်း

(၄ရာ၊ ၂၃: ၄-၂၀)

3အသက်တော်ငယ်စဉ်၊ နန်းစံရှစ်နှစ်တွင်၊ အဘဒါဝိဒ်၏ဘုရားသခင်ကို ဆည်းကပ်စပြု၏။ တစ်ဆယ်နှစ်နှစ်တွင် ယုဒပြည်၊ ယေရုရှလင်မြို့၌ရှိသောကုန်း၊ အာရှရပင်၊ ထုသောရုပ်တု၊ သွန်းသောရုပ်တုတို့ကို သုတ်သင်ပယ်ရှင်းစ ပြု၏။ 4ဗာလဘုရားတို့ ယဇ်ပလ္လင်များကို ရှေ့တော်၌ဖြိုချ၍၊ ယဇ်ပလ္လင်ပေါ်တွင် အမြင့်တင်ထားသော ရုပ်တုတို့ကို ခုတ်လှဲကြ၏။ အာရှရပင်များနှင့် ထုသောရုပ်တု၊ သွန်းသောရုပ်တုများကို ချိုးဖဲ့၍ ညက်ညက်ချေပြီးလျှင်၊ ယဇ်ပူဇော်သောသူတို့၏ သင်္ချိုင်းပေါ်မှာ ဖြန့်ဖြူးတော်မူ၏။ 5ယဇ်ပုရောဟိတ်တို့အရိုးကို ထိုယဇ်ပလ္လင်တည်ရာအပေါ်မှာ မီးရှို့၍၊ ယုဒပြည်နှင့် ယေရုရှလင်မြို့ကို စင်ကြယ်စေတော်မူ၏။ 6ထိုအတူ မနာရှေခရိုင်၊ ဧဖရိမ်ခရိုင်၊ ရှိမောင်ခရိုင်၊ နဿလိခရိုင် တိုင်အောင်၊ အရပ်ရပ်မြို့များတို့၌ ပေါက်တူးနှင့်လုပ်လျက်၊ 7ယဇ်ပလ္လင်တို့နှင့် အာရှရပင်တို့ကို ချိုးဖဲ့၍၊ ဣသရေလပြည် တစ်လျှောက်လုံး၌ ရှိသမျှသောရုပ်တု ဆင်းတုတို့ကို ခုတ်လှဲ၍ ညက်ညက်ချေပြီးမှ ယေရှရုလင်မြို့သို့ ပြန်တော်မူ၏။

ပညတ္တိကျမ်းကိုတွေ့ရှိခြင်း

(၄ရာ၊ ၂၂: ၃-၂၀)

8နန်းစံဆယ်ရှစ်နှစ်တွင်၊ နိုင်ငံတော်နှင့် ဗိမာန်တော်ကို စင်ကြယ်စေပြီးမှ၊ မိမိဘုရားသခင် ထာဝရဘုရား၏ အိမ်တော်ကို ပြုပြင်လိုသောငှာ၊ အာဇလိ၏သားရှာဖန်၊ မြို့ဝန် မာသေယ၊ ယောခတ်သား အတွင်းဝန်ယောအာတို့ကို စေလွှတ်တော်မူ၏။ 9ထိုသူတို့သည် ယဇ်ပုရောဟိတ်မင်း ဟိလခိထံသို့သွား၍၊ ဗိမာန်တော်သို့ လူများဆောင်ခဲ့သောငွေ၊ မနာရှေအမျိုးသား၊ ဧဖရိမ်အမျိုးသား၊ ကျန်ကြွင်းသောဣသရေလအမျိုးသားရှိသမျှ၊ ယုဒအမျိုးသား၊ ဗင်္ယာမိန်အမျိုးသား၊ ယေရုရှလင်မြို့သူမြို့သား အပေါင်းတို့လက်မှ တံခါးစောင့် လေဝိသားတို့ခံသော ငွေကိုယူ၍၊ 10ဗိမာန်တော်ကို ကြည့်ရှုပြုစုသောသူတို့၌ အပ်သဖြင့်၊ သူတို့သည် ဗိမာန်တော်ကို ပြုပြင်ခြင်းငှာ လုပ်ဆောင်သောသူ၊ 11ဗိသုကာနှင့် လက်သမားလုပ်သည်အတွက်၊ ယုဒရှင်ဘုရင် ဖျက်ဆီးသော အဆောင်တို့ကို ပြင်စရာဖို့ ဆစ်သောကျောက်များနှင့် ထုပ်၊ လျောက်၊ ရနယ်များကို ဝယ်သည်အတွက် ပေးကြ၏။ 12လုပ်ဆောင်သူတို့သည် သစ္စာစောင့်ကြ၏။ လေဝိအမျိုး၊ မေရာရိအနွယ်၊ ယာဟတ်နှင့် ဩဗဒိ၊ ကောဟတ်အနွယ်၊ ဇာခရိနှင့် မေရှုလံအစရှိသော တူရိယာမျိုးကို တီးမှုတ်လျက်၊ သီချင်းဆိုတတ်သော လေဝိသားအပေါင်းတို့သည် ကြည့်ရှုနှိုးဆော်ကြ၏။ 13ထိုသူတို့သည် ဝန်ထမ်းသောသူမှစ၍၊ အလုပ်မျိုးကို လုပ်ဆောင်သောသူ အပေါင်းတို့ကို ကြည့်ရှုအုပ်ချုပ်ကြ၏။ လေဝိသားအချို့တို့သည်လည်း စာရေး၊ တရားသူကြီး၊ တံခါးစောင့်လုပ်ကြ၏။

14ဗိမာန်တော်သို့ ဆောင်ခဲ့သောငွေကိုထုတ်သောအခါ၊ ယဇ်ပုရောဟိတ်ဟိလခိသည် မောရှေရေးထားသော ထာဝရဘုရား၏ ပညတ္တိကျမ်းစာစောင်ကို တွေ့၍၊ 15တွေ့ကြောင်းကို စာရေးတော်ရှာဖန်အားပြောလျက် ထိုကျမ်းစာကိုအပ်ပေး၏။ 16ရှာဖန်သည် ရှင်ဘုရင်ထံသို့ ယူသွား၍၊ ကိုယ်တော်ကျွန်တို့သည် မှာထားတော်မူသမျှအတိုင်း ပြုကြပါ၏။ 17ဗိမာန်တော်၌ တွေ့သောငွေကို မှုတ်၍၊ အုပ်ချုပ်သောသူနှင့် လုပ်ဆောင်သောသူတို့၌ အပ်ပါပြီဟူ၍လည်းကောင်း၊ 18ယဇ်ပုရောဟိတ်ဟိလခိသည် ကျွန်တော်၌ စာစောင်ကို အပ်ပါပြီဟူ၍လည်းကောင်း ကြားလျှောက်လျက်၊ ရှင်ဘုရင်ရှေ့တော်၌ ဖတ်ရွတ်လေ၏။ 19ရှင်ဘုရင်သည် တရားစကားကိုကြားလျှင်၊ မိမိအဝတ်ကိုဆုတ်၍၊ 20ယဇ်ပုရောဟိတ် ဟိလခိ၊ ရှာဖန်သား အဟိကံ၊ မိက္ခာသား အာဗဒုန်၊ စာရေးတော်ရှာဖန်၊ မိမိကျွန်အာသာယကို ခေါ်၍၊ 21ယခုတွေ့သောကျမ်းစကားကြောင့် ငါ့အတွက် ဣသရေလပြည်နှင့် ယုဒပြည်၌ ကျန်ကြွင်းသေးသောသူတို့အတွက် ထာဝရဘုရား၌ မေးလျှောက်ကြပါ။ ဘိုးဘေးတို့သည် ထာဝရဘုရား၏ အမိန့်တော်ကို နားမထောင်၊ ဤကျမ်းစာ၌ရေးထားသမျှအတိုင်း မကျင့်ဘဲနေသောကြောင့်၊ ထာဝရဘုရားသည် ငါတို့၌ပြင်းစွာ အမျက်ထွက်တော်မူလိမ့်မည်ဟု မိန့်တော်မူ၏။ 22ထိုကာလတွင်၊ ဟရဟတ်သားဖြစ်သော တိကဝ၏သား အချုပ်ဝန် ရှလ္လုံ၏မယား၊ ပရောဖက်မဟုလဒသည် ယေရုရှလင်မြို့၌ နေသည်ဖြစ်၍၊ ဟိလခိနှင့် ရှင်ဘုရင်၏လူတို့သည် ထိုမိန်းမထံသို့သွား၍ ပြောဆိုကြ၏။ 23မိန်းမကလည်း၊ ငါ့ထံသို့စေလွှတ်သောသူထံသို့ သင်တို့ပြန်၍ ဆင့်ဆိုရသော ဣသရေလအမျိုး၏ ဘုရားသခင်ထာဝရဘုရား၏ အမိန့်တော်ဟူမူကား၊ 24ယုဒရှင်ဘုရင်ရှေ့မှာ ဖတ်ရသောကျမ်းစာ၌ ရေးထားသမျှသောအကျိန်စကား ပြည့်စုံစေခြင်းငှာ၊ ငါသည် ဤအရပ်၌လည်းကောင်း၊ ဤအရပ်သားတို့၌လည်းကောင်း ဘေးရောက်စေမည်။ 25အကြောင်းမူကား၊ သူတို့သည် ငါ့ကိုစွန့်ကြပြီ။ မိမိလုပ်သော အရာတို့ဖြင့် ငါ့အမျက်ကိုနှိုးဆော်ခြင်းငှာ၊ အခြားတစ်ပါးသော ဘုရားတို့ရှေ့မှာ နံ့သာပေါင်းကို မီးရှို့ကြပြီ။ ထိုကြောင့် ဤအရပ်၌ ငါ့အမျက်မီးသည် မငြိမ်းဘဲလောင်ရလိမ့်မည်ဟု မိန့်တော်မူ၏။ 26ထာဝရဘုရားကို မေးလျှောက်စေခြင်းငှာ၊ သင်တို့ကိုစေလွှတ်သော ယုဒရှင်ဘုရင်ကြားသော ကျမ်းစကားကို ရည်ဆောင်၍၊ ဣသရေလအမျိုး၏ ဘုရားသခင်ထာဝရဘုရား မိန့်တော်မူကြောင်းကို ထိုရှင်ဘုရင်အား တစ်ဖန်ပြန်လျှောက်ရမည်ကား၊ 27ဤအရပ်ကိုလည်းကောင်း၊ ဤအရပ်သားတို့ကိုလည်းကောင်း၊ ငါခြိမ်းခြောက်သောစကားကို သင်သည်ကြားသောအခါ၊ နူးညံ့သောစိတ်ရှိ၍၊ ဘုရားသခင့်ရှေ့တော်၌ ကိုယ်ကိုနှိမ့်ချခြင်း၊ ကိုယ်အဝတ်ကိုဆုတ်ခြင်း၊ ငါ့ရှေ့မှာ ငိုကြွေးခြင်းကို ပြုသောကြောင့်၊ သင့်စကားကို ငါနားထောင်၏။ 28ငါသည် သင့်ကို ဘိုးဘေးစုဝေးရာသို့ ပို့ဆောင်၍၊ သင်သည် ငြိမ်ဝပ်စွာ သင်္ချိုင်းသို့ ရောက်ရလိမ့်မည်။ ဤအရပ်၌လည်းကောင်း၊ ဤအရပ်သားတို့၌လည်းကောင်း၊ ငါရောက်စေအံ့သောဘေးကို သင့်ကိုယ်တိုင် မတွေ့မမြင်ရဟု မိန့်တော်မူကြောင်းကို ဆင့်ဆိုသည်အတိုင်း၊ သူတို့သည် ရှင်ဘုရင်အား ပြန်လျှောက်ကြ၏။

ရုပ်တုကိုးကွယ်မှုကိုဖျက်သိမ်းခြင်း

(၄ရာ၊ ၂၃:၁-၂၀)

29ထိုအခါ ရှင်ဘုရင်သည် ယုဒပြည်သူ၊ ယေရုရှလင်မြို့သား အသက်ကြီးသူအပေါင်းတို့ကို ခေါ်၍၊ 30ယုဒပြည်သူ ယေရုရှလင်မြို့သား၊ ယဇ်ပုရောဟိတ်၊ လေဝိသား၊ လူအကြီးအငယ် အပေါင်းတို့နှင့်တကွ၊ ဗိမာန်တော်သို့တက်၍ ဗိမာန်တော်၌တွေ့သော ပဋိညာဉ်ကျမ်းစာရှိသမျှကို သူတို့ရှေ့မှာ ဖတ်တော်မူ၏။ 31ရှင်ဘုရင်ကလည်း၊ ထာဝရဘုရားကို ဆည်းကပ်ပါမည်။ စီရင်ထုံးဖွဲ့ချက်ပညတ်တရားကို စိတ်နှလုံးအကြွင်းမဲ့ စောင့်ရှောက်ပါမည်။ ဤကျမ်းစာ၌ပါသော ပဋိညာဉ်စကားအတိုင်း ကျင့်ပါမည်ဟု မိမိနေရာ၌ရပ်၍ အဓိဋ္ဌာန်ပြု၏။ 32စည်းဝေးသော ယုဒအမျိုးနှင့် ဗင်္ယာမိန်အမျိုးသား အပေါင်းတို့သည်၊ ထိုအဓိဋ္ဌာန်ကိုဝန်ခံရမည်အကြောင်း စီရင်တော်မူ၏။ ယေရုရှလင်မြို့သားတို့ သည်လည်း၊ ဘိုးဘေးတို့ကိုးကွယ်သော ဘုရားသခင်၏ပဋိညာဉ်တရားအတိုင်း ကျင့်ကြ၏။ 33ယောရှိမင်းသည်လည်း၊ ရွံရှာဖွယ်သောအရာရှိသမျှတို့ကို ဣသရေလအမျိုးသားပိုင်သော ပြည်အရပ်ရပ်တို့မှ ပယ်ရှား၍၊ ဣသရေလပြည်၌နေသောသူ အပေါင်းတို့သည်၊ မိမိတို့ ဘုရားသခင် ထာဝရဘုရားကို ဝတ်ပြုရမည်အကြောင်း၊ စီရင်တော်မူသဖြင့်၊ လက်ထက်တော်ကာလပတ်လုံး သူတို့သည် မဖောက်ပြန်၊ ဘိုးဘေးတို့၏ ဘုရားသခင်ထာဝရဘုရား နောက်တော်သို့ လိုက်လျက်နေကြ၏။

ရာဇဝင်ချုပ်ဒုတိယစောင် - ၃၄ (အနက်ဖွင့်)

(တ) ယောခတ်မင်း (အခန်း၃၄၊၃၅)

၃၄:၁–၇ မနာရှေမင်းဖယ်ရှားခဲ့သော ရုပ်တုဘုရားတုများ (၃၃:၁၅)ကို အာမုန်မင်းက ပြန်လည်တည်ဆောက်သည်။ အသက်(၈)နှစ်အရွယ်တွင် နန်းစံသော ယောခတ်မင်းသည် ဘိုးဘေဒါဝိဒ်မင်းကဲ့သို့ ဘုရားသခင်၏ မျက်နှာတော်ရှာသူဖြစ်သည်။ နန်းစံပြီး(၄)နှစ်အကြာတွင် တိုင်းပြည်တခွင်ပြုပြင်တည်ဆောက်ခြင်းစသည်။ အာမုန်မင်းပြန်တည်ထားသော ရုပ်တုဘုရားတုများကို အကုန်လုံးချေမှုန်းဖျက်ဆီးသည်။ အချို့ကို အမှုန့်ကြိတ်ပြာချ၍ အချို့ကို အမြစ်မှ တူးဖော်မောက်လှန် ရေမျှော်ပစ်သည်။ရှေ့ကပြသသွားသောမင်းဆိုးမင်းယုတ်တို့၏ အကျင့်ကို သင်ခန်းစာယူသည်။ သူ၏ ပြုပြင်တည်ဆောက်မှုများသည် ဣသရေလပြည်ထိ အောင်ပျံနှံ့သည်။

၃၄:၈–၁၈ ဘိုးဘေးဆရာသမားများ ပြသခဲ့ကုသည့်အတိုင်း မြို့ပြပြည်ရွာ သာယာစည်ပင်ရေးသာမက၊ သာသနာရေးတွင်လည်း အထူးတလည်စွမ်းဆောင်သည်။ ဗိမာန်တော်ကိုလည်း ပြုပြင်မွမ်းမံသည်။ ပညတ်တော်ကျမ်းကို ဘုရင့်ရှေ့တော်တွင် အစဉ်တစိုက် ရွတ်ဖတ်သရစ္ဇျယ်ခိုင်းသည်။ အမှုကြီးအမှုငယ်မရွေ:ဂရုစိုက်သည်။ ဘုရားသခင်၏ နှုတ်ကပတ်တော်ကို သွန်သင်ကြားနာစေသည်။

၃၄:၁၉–၂၈ ယောရှိမင်းသည် ကျမ်းစာပါကျိန်ခြင်းအမင်္ဂလာများ ကင်းလွှတ်ခွင့်ရမည့်အကြောင်း ကိုယ်စားလှယ်တော်များအား ပရောဖက်မဟုလဒထံသို့ စေလွှတ်မြောက်ခိုင်းသည်။ ယုဒမင်းများနှင့် ယုဒပြည်သူတို့၏ရုပ်တုဘုရားတုကိုးကွယ်မှုကြောင့် ယုဒပြည်တွင် ဘုရားသခင်၏ အမျက်ဒေါသသင့်ကြောင်းနှင့် ကာလနာရောဂါဆိုးများကျရောက်မည့်အကြောင်း ထပ်လောင်းအတည်ပြုပေးသည်။ ယောရှိမင်းသည် အောက်ကျို့နှိမ့်ချခြင်းရှိ၍ နှုတ်ကပတ်တော်ကို လေးစားယုံကြည်သောကြောင့် လွတ်ငြိမ်းချမ်းသာခွင့်ရမည်။

၃၄:၂၉–၃၂ ပရောဖက်မ၏ စကားကြားရသည်နှင့် အညီ ယောရှိမင်းသည် ပြည်သူများကိုစုစည်း၍ ဘုရားသခင်နှင့် ပဋိညာဉ်ဖွဲ့စေသည်။ ဘုရားသခင်၏နှုတ်ထွက်စကားကြားသိရပြီဖြစ်၍ လေးနက်စွာ နောင်တရဖို့လိုအပ်ကြောင်း တိုက်တွန်းအားပေးသည်။

၃၄:၃၃ ယောရှိမင်းသည် ယုံကြည်ခြင်းအားကြီးသူဖြစ်သည့်အတိုင်း ဘဝတသက်လုံးတွင် ဘုရားသခင်အားသစ္စာရှိသည်။ အပိုဒ်ငယ် ၃၃ပါ အကြောင်းအရာများကို ၄ရာ ၂၃:၄-၂၀တွင် အသေးစိတ်ရေးထားသည်။ ပညတ်တော်အတိုင်း လိုက်နာကျင့်ကြံခြင်းနှင့် ဘုရားသခင်၌ ပဋိညာဉ်ဖွဲ့ခြင်းတို့ကြောင့် ယောရှိမင်း၏ နိုင်ငံတော်သည် အေးချမ်းသာယာသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။