Revelation -12 -

ဗျာဒိတ်ကျမ်း - ၁၂

မိန်းမနှင့်နဂါးကြီး

1ကောင်းကင်၌ ကြီးစွာသော နိမိတ်လက္ခဏာ ဟူမူကား၊ မိန်းမတစ်ဦးသည် နေကိုဝတ်လျက်၊ လကို ခြေဖြင့်နင်းလျက်၊ မိမိခေါင်းပေါ်၌ ကြယ်ဆယ်နှစ်လုံးဖြင့်ပြီးသော သရဖူကို ဆောင်းလျက်ပေါ်လာ၏။- 2ထိုမိန်းမသည် ကိုယ်ဝန်ဆောင်၍ ဖွားအံ့သော ဝေဒနာ ပြင်းသောကြောင့် အော်ဟစ်လေ၏။- 3ကောင်းကင်၌ အခြားသော နိမိတ်လက္ခဏာ ပေါ်လာသည်ကား၊ အဆင်းနီသော နဂါးကြီးသည် ခေါင်းခုနစ်လုံး၊ ချိုဆယ်ချောင်းနှင့်တကွ ခေါင်းပေါ်၌ သရဖူခုနစ်ဆူကို ဆောင်းလျက်ရှိ၏။-ဒံ၊ ၇:၇။ 4သူ၏အမြီးသည် ကောင်းကင်ကြယ် သုံးစုတစ်စုကို ဆွဲငင်၍ မြေကြီးသို့ချလိုက်လေ၏။ သားကိုဖွားလုသော မိန်းမသည် ဖွားသောအခါ၊ နဂါးသည် ထိုသားကို ကိုက်စားမည့်အကြံနှင့် မိန်းမရှေ့၌ရပ်နေ၏။- 5ထိုမိန်းမသည် လူမျိုးတကာတို့ကို သံလှံတံနှင့် အုပ်စိုးလတ္တံ့သော သားယောက်ျားကို ဖွားမြင်၏။ ထိုသားကို ဘုရားသခင်ထံသို့လည်းကောင်း၊ ပလ္လင်တော်သို့လည်းကောင်း ချီယူတော်မူ၏။-ဟေရှာ၊ ၆၆:၇။ ဆာ၊ ၂:၉။ 6မိန်းမသည် အရက်တစ်ထောင်နှစ်ရာခြောက် ဆယ်ပတ်လုံး တော၌ ကျွေးမွေးခြင်းကို ခံရမည်အကြောင်း ဘုရားသခင် ပြင်ဆင်တော်မူသော အရပ်သို့ ပြေးလေ၏။

7ကောင်းကင်၌ စစ်ဖြစ်၏။ မိက္ခေလနှင့် သူ၏ ကောင်းကင်တမန်တို့သည် နဂါးကို စစ်တိုက်ကြ၏။ နဂါးနှင့် သူ၏တမန်တို့သည် စစ်တိုက်၍ မနိုင်ကြ။ ကောင်းကင်၌လည်း သူတို့နေစရာမရှိ။-ဒံ၊ ၁၀:၁၃၊၂၁၊ ၁၂:၁။ ယုဒ၊ ၉။ 8-9ထိုအခါ ဤလောကတစ်နိုင်ငံလုံးကို လှည့်ဖြား၍ မာရ်နတ်စာတန် အမည်ရှိသော ရှေးမြွေဟောင်းတည်း ဟူသော နဂါးကြီးကိုလည်းကောင်း၊ သူနှင့်အတူ သူ၏တမန်တို့ကိုလည်းကောင်း၊ မြေကြီးသို့ ချလိုက်ကြ၏။-က၊ ၃:၁။ လု၊ ၁၀:၁၈။ 10ကောင်းကင်ဘုံ၌ ကြီးသောအသံကား၊ ယခုမှာ ကယ်တင်ခြင်း ဖြစ်၏။ တန်ခိုးတော်လည်း ဖြစ်၏။ ငါတို့ ဘုရားသခင်၏ နိုင်ငံတော်နှင့် သူ၏ခရစ်တော်၏ အာဏာတော်စက်လည်း ဖြစ်၏။ အကြောင်းမူကား၊ ငါတို့ညီအစ်ကိုများကို ငါတို့ဘုရားသခင်ရှေ့တော်၌ နေ့ညမပြတ် အပြစ်တင်သောရန်သူကို အောက်သို့ ချလေပြီ။-ယောဘ၊ ၁:၉-၁၁။ ဇာ၊ ၃:၁။ 11သူတို့သည် သိုးသငယ်၏ အသွေးအားဖြင့်လည်းကောင်း၊ မိမိတို့သက်သေခံချက် နှုတ်ကပတ်တရားအားဖြင့်လည်းကောင်း အောင်မြင်၍၊ အသေခံသည်တိုင်အောင် ကိုယ်အသက်ကို မနှမြောကြ။- 12ထိုကြောင့် ကောင်းကင်နှင့် ကောင်းကင်သားတို့ ရွှင်လန်းကြလော့။ မြေကြီးနှင့် ပင်လယ်သည် အမင်္ဂလာရှိ၏။ အကြောင်းမူကား၊ မာရ်နတ်သည် မိမိကာလ တစ်ခဏသာရှိသည်ကို သိ၍၊ ပြင်းစွာသော ဒေါသအမျက်နှင့်တကွ သင်တို့ရှိရာသို့ ဆင်းလေပြီဟု ဆိုကြသည်ကို ငါကြား၏။

13ထိုနဂါးသည် မြေကြီးသို့ ကိုယ်ကျသည်ကို သိမြင်လေသော်၊ သားယောက်ျားကို ဖွားမြင်သော မိန်းမကို ညှဉ်းဆဲ၏။- 14မိန်းမသည် ထိုမြွေနှင့်လွတ်၍၊ တစ်ကာလ၊ နှစ်ကာလ၊ ကာလတစ်ဝက်ပတ်လုံး ကျွေးမွေးခြင်းကို ခံရာ အရပ်တည်းဟူသော တောအရပ်သို့ ပျံနိုင်မည့်အကြောင်း၊ ရွှေလင်းတကြီး၏ အတောင်နှစ်ဖက်ကို ရလေ၏။-ဒံ၊ ၇:၂၅၊ ၁၂:၇။ 15ထိုအခါ၊ မိန်းမကို ရေအဟုန်ဖြင့် မျောသွားစေခြင်းငှာ၊ နဂါးသည် မိမိခံတွင်းထဲကမြစ်ရေစီးသကဲ့သို့ ရေကို မိန်းမနောက်၌ ထုတ်ပစ်လေ၏။- 16မြေကြီးသည် မိန်းမကို မစ၍ မိမိခံတွင်းကို ဖွင့်ပြီးလျှင်၊ နဂါး၏ ခံတွင်းထဲက ထုတ်ပစ်သောမြစ်ရေကို မျိုလေ၏။- 17နဂါးသည် မိန်းမကို အငြိုးထား၏။ ဘုရားသခင်၏ ပညတ်တော်တို့ကို ကျင့်၍ ယေရှု၏ သက်သေခံတော်မူချက်ကို စွဲလမ်းသောသူတည်းဟူသော ထိုမိန်းမ၌ ကြွင်းသော အမျိုးအနွယ်ကို စစ်တိုက်ခြင်းငှာ သွား၏။-

ဗျာဒိတ်ကျမ်း - ၁၂ (အနက်ဖွင့်)

(ဈ) ဘေးဒဏ်ကြီးကာလ၏ သော့ချက်ပုံပန်းသဏ္ဍာန် (အခန်း ၁၂–၁၅)

၁၂:၁ ကောင်းကင်၌ ကြီးစွာသော နိမိတ် လက္ခဏာ ပေါ်ပေါက်လာမည်။ မိန်းမတစ်ဦးသည် နေကိုဝတ်လျက်၊ လကို ခြေဖြင့် နင်းလျက်၊ ခေါင်းပေါ်၌ ကြယ်ဆယ့်နှစ်လုံးဖြင့် ပြီးသော သရဖူကို ဆောင်းလျက်ပေါ်လာ၏။ ထိုအမျိုးသမီးသည် ဣသရေလဖြစ်သည်။ နေ၊ ကြယ်နှင့်လမှာ ကတိတော်ပြုထားသော အနာဂတ်နိုင်ငံတော်ဖြစ်သည်။ မိဘ၊ ညီအစ်ကိုမောင်နှမများကို အလုပ်အကျွေးပြုသော ယောသပ်၏ နောက်ဆုံးကာလ အုပ်စိုးခြင်းမျိုးဖြစ်သည် (က ၃၇:၉-၁၁)။

၁၂:၂ ထိုမိန်းမသည် ကလေးမျက်နှာမြင်ရတော့မည့် ကိုယ်ဝန်သည် အရင့်အမာကဲ့သို့ဖြစ်၏။ ဤကျမ်းပိုဒ်တွင် ဣသရေလ တို့၏ သမိုင်းကြောင်းကို အဓိကတွေ့မြင်ရမည်။ ကြားချောင်လွတ်နေသော ကြားကာလဟူ၍ ချန်မထား သမိုင်းအထင်အရှားရှိသည်။

၁၂:၃ နောက်လက္ခဏာတခုမူကာ၊ အဆင်းနီသော နဂါးကြီးဖြစ်သည်။ ခေါင်းခုနှစ်လုံး၊ ဦးချိုဆယ်ချောင်းရှိ၍ ထိုခေါင်းများပေါ်၌ သရဖူအသီးသီး ဆောင်းထားသည်။ ထိုနဂါးမှာ စာတန်မာရ်နတ်ဖြစ်သည်။ သို့သော် ဤကျမ်းပိုဒ်နှင့် ကျမ်းပြိုင်ဖြစ်သော ၁၃:၁ တွင် ရောမအင်ပါယာ တန်ခိုးကြီးထွားခြင်းကို ဖော်ပြထားရာ စာတန်၏ လောကခွန်အား ဖြင့် ပုံဖော်ထားသည်။

၁၂:၄–၅ နဂါးမြီးသည် ကောင်းကင်ကြယ် သုံးစုတစုကို မြေကြီပေါ်သို့ရိုက်ချ၏။ ဘေးဒဏ်ကြီးကာလ အလယ်တွင် ကောင်းကင်နိုင်ငံ၌လည်း စစ်ဖြစ်လျက် ကောင်းကင်သားများ မြေကြီးပေါ်သို့ ပစ်ချခံရမည့်အကြောင်းဖြစ်သည် (၈-၉)။

မိန်းမကြီး၏ မွေးကာစကလေးကို ထိုနဂါးကြီးမြိုချဖို့ ဟန်ပြင်နေသည်။ ရောမလက်ပါးစေ မဟာဟေရုဒ်က မွေးဖွားခါစ ယုဒရှင်ဘုရင်သစ်ကို ဖျက်ဆီးဖို့ ကြိုးပမ်းခြင်းဖြစ်သည်။ သား ယောက်ျားမှာ သံမဏိလှံတံကိုကိုင်၍ လူမျိုးအပေါင်းကို အုပ်စိုးမည့် ယေရှုဖြစ်ကြောင်း ထင်ရှားသည်။ ဤကျမ်းပိုဒ်တွင် ကိုယ်တော်ဘုရား မွေးဖွားခြင်းမှ ထမြောက်ခြင်းကို မှတ်တမ်းတင်ထားသည်။

၁၂:၆ ပစ္စုပ္ပန်အသင်းတော်ကာလကို အငယ် ၅နှင့်၆တွင် ဖော်ပြထားသည်။ ဘေးဒဏ်ကြီးကာလအလယ်တွင် ဣသရေလလူမျိုးသည် ကန္တရ တနေရာရာတွင် ပုန်းခိုနေမည်။ (တချို့က ကျောက်ဂူဟုယူဆကြသည်)။ သုံးနှစ်ခွဲတိတိ ပုန်းခိုနေမည်။

၁၂:၇ ကောင်းကင်၌လည်း မိက္ခေလဦးဆောင်သော ကောင်းကင်တမန်တို့က တဘက်၊ နဂါးနှင့် အပေါင်းအပါ တို့ကတဘက် စစ်ဖြစ်ကြသည်။ ထိုအချိန်သည် ဘေးဒဏ်ကြီးကာလ၏ အထွဋ်အထိပ်ရောက်ချိန်ဖြစ်သည်။ မိက္ခေလနှင့် တမန်များသည် ဣသရေလ လူမျိုးများနှင့် ဆက်စပ်ပတ်သက်လာမည် (ဒံ ၁၂:၁)

၁၂:၈–၉ နဂါးနှင့် အပေါင်းအပါ တစ်စုသည် စစ်ရှုံးသောကြောင့် ကောင်းကင်၌ နေစရာမရှိတော့ပါ။ ရှေးမြွေဟောင်းဟူသော စာတန်နည်းတူ မြေကြီးပေါ်သို့ ချလိုက်သည်။ သို့သော် နောက်ဆုံး ကံကြမ္မာဂြိုလ် စီးခြင်း မဟုတ်သေး (၂၀:၁-၃၊ ၁၀ ကိုဆက်ကြည့်)။ ရှေးမြွေဟောင်း၊ မာရ်နတ်စာတန်ဟူသော နဂါး၊ တကမ္ဘာလုံးကို လှည့်စားသောနဂါး ဟု ရှင်ယောဟန်က ဆိုထားသည်။

၁၂:၁၀ စာတန်နှင့် အပေါင်းပါ ပစ်ချခံရသော အခါ ယခုမှာ ကယ်တင်ခြင်းရောက်ပြီ။ ဘုရားသခင်၏ လူများ အောင်ပွဲခံရာ၊ ဘုရားသခင်၏ နေ့ရက်ရောက်လေပြီဟု ကြွေးကြော်ကြသည်။ အနှစ်တထောင် နိုင်ငံတော်စတင်လေပြီ။ ငါတို့ညီအစ်ကို များကို—–နေ့ည၌ မပြတ် အပြစ်တင်သော ရန်သူအား အောက်သို့ချလေပြီ။

၁၂:၁၁ ဆက်လက်၍ ကြွေးကြော်ကြသည်မှာ- ညှဉ်ပန်းနှိပ်စက်ခံရသော

ယုံကြည်သူများသည် သိုးသူငယ်၏ အသွေးတော်နှင့် သက်သေခံချက် နှုတ်ကပတ်တော်အားဖြင့် စာတန်မာရ်နတ်ကို အောင်ပွဲခံပြီဟု ဆိုကြသည်။ အောင်ပွဲသည် ခရစ်တော်၏ အသေခံခြင်းနှင့် အသနားခံတော်မူခြင်း၏ တန်ခိုးတော်အပေါ် သက်သေခံခြင်း၌ အခြေပြုသည်။ ကိုယ်တော်၌ သစ္စာရှိကြသည့်အကြောင်းကို သူတို့အသွေးများဖြင့် သက်သေခံတံဆိပ် ခတ်နှိပ်ကြပြီ။

၁၂:၁၂–၁၃ နဂါးကြီး ကျဆုံးသောကြောင့် ကောင်းကင်တွင် ပျော်ရွှင်စရာဖြစ်သော်လည်း လောကအတွက်မူ အမင်္ဂလာဖြစ်သည်။ စာတန်သည် သူ့အချိန်တိုတောင်းကြောင်း သိသဖြင့် ဒေါသပိုထွက်နိုင်သည်။ အထူးသဖြင့် မေရှိယ ပြန်လာသောအခါ ကောင်းကြီးခံစားရမည့် ဣသရေလလူမျိုးအပေါ်တွင် အမုန်းအာဃာတ တရားပိုမိုကြီးထွား သောင်းကျန်းမည်။

၁၂:၁၄ သစ္စာရှိသော လက်တဆုတ် ဣသရေလများသည် ရွှေလင်းယုန် တောင်ပံများ ပေါက်လျက် ကျွေးမွေးခြင်းခံရာ တောအရပ်သို့ ခိုအောင်းကြရမည်။ (အချို့က ထိုရွှေလင်းယုန်တောင်ပံရှိသော ငှက်ဆိုသည်မှာ အထူးလေယာဉ် ပျံကြီးဟု ယူဆကြသည်)။ ထိုပုန်းခိုသော ကာလသည် သုံးနှစ်ခွဲကြာမည်။ ကျမ်းစာက တကာလ၊ နှစ်ကာလ၊ ကာလတဝက် ဟုဆိုသည်။ ထိုသို့ ထိုမိန်းမလွတ်မြောက်သောကြောင့် နဂါးကြီးသည် လောကကြီးအား ရေလွှမ်းမိုးစေရန် ခံတွင်းထဲမှ မြစ်ရေ တသွင်သွင် စီးထွက်စေသည်။ ထိုမိန်းမနောက်သို့ လိုက်စေသည်။ သို့သော် မြေငလျင်ကြီးက ထိုရေများကို မျိုချလိုက်သောကြောင့် နဂါးကြီး၏ ကြိုးပမ်းချက်သည် သဲထဲရေသွန်ဖြစ်သွားသည်။

၁၂:၇ ထို့ကြောင့် နဂါးဟူသော ရှေးမြွေကြီးသည် ယုဒလူမျိုးများအား လက်တုံ့ပြန်ရန် လိုက်ရှာနေသည်။ အငြိုးထားသည်။ ဘုရားသခင်၏ ပညတ်တော်ကို ကျင့်၍၊ ယေရှု၏ သက်သေခံတော်မူချက်ကို စွဲလန်းသော ထို လက်တဆုတ်စာ ဣသရေလ လူမျိုးကို စစ်တိုက်ရန် အသင့်ရှိနေသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

Recent Views: 0

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။

Recent Views: 0