Proverbs -5 -

သုတ္တံကျမ်း - ၅

မစင်ကြယ်မှုကိုသတိပေးခြင်း

1-2ငါ့သား၊ သင်သည် သမ္မာသတိရှိ၍၊ သင့်၏နှုတ်ခမ်းသည် သိပ္ပံအတတ်ကို စောင့်မည်အကြောင်း၊ ငါ့ပညာကို မှတ်ကျုံး၍၊ ငါပေးသောဉာဏ်သို့ သင့်နားကိုလှည့်လော့။ 3အကြောင်းမူကား၊ အမျိုးပျက်သောမိန်းမ၏နှုတ်ခမ်းသည် ပျားလပို့ကဲ့သို့ ယိုတတ်၍၊ သူပြောသောစကားသည် ဆီထက်ချောသော်လည်း၊ 4အဆုံး၌ကား၊ သူသည် ဘင်းခါးရွက်ကဲ့သို့ခါး၍၊ သန်လျက်နှင့်အမျှ ထက်၏။ 5သူ၏ခြေတို့သည် သေခြင်းသို့ဆင်း၍၊ သူသွားရာလမ်းသည် မရဏနိုင်ငံသို့ ရောက်တတ်၏။ 6သင်သည် အသက်လမ်းကိုမဆင်ခြင်ရအောင်၊ သူ့ထုံးစံဓလေ့တို့သည် တရွေ့ရွေ့ပြောင်းလဲသဖြင့်၊ သင်သည် နားမလည်နိုင်ရ။ 7သို့ဖြစ်၍ ငါ့သားတို့၊ ငါ့စကားကို နားထောင်ကြလော့။ ငါဟောပြောချက်တို့ကို မပယ်ကြနှင့်။ 8ထိုသို့သောမိန်းမကို ဝေးစွာရှောင်သွားလော့။ သူ့နေရာ တံခါးဝသို့မချဉ်းနှင့်။ 9သို့မဟုတ် သင်သည် ကိုယ်ဂုဏ်အသရေကို သူတစ်ပါး၌လည်းကောင်း၊ ကိုယ်အသက်ကို ကြမ်းတမ်းသော သူတို့၌လည်းကောင်းအပ်လိမ့်မည်။ 10တစ်ပါးအမျိုးသားတို့သည် သင်၏စည်းစိမ်နှင့် ပြည့်ဝကြလိမ့်မည်။ သင်လုပ်၍ ရသောဥစ္စာသည် တစ်ပါးအမျိုးသားအိမ်သို့ ရောက်လိမ့်မည်။ 11နောက်ဆုံး၌ သင့်အသား၊ သင့်ကိုယ်ကာယဆွေးမြေ့သောအခါ၊ 12ငါသည် သွန်သင်ခြင်းကို မုန်းလေပြီတကား။ ဆုံးမခြင်းကို စိတ်နှလုံးထဲမှာ မထီမဲ့မြင်ပြုလေပြီတကား။ 13ငါ့ဆရာတို့၏စကားကို နားမထောင်ဘဲ၊ ငါ့အား သွန်သင်သော သူတို့၏စကားကို နားမခံဘဲနေလေပြီတကား။ 14စည်းဝေးသောပရိသတ်များအလယ်၌ ဒုစရိုက်မျိုးကို ကုန်စင်လုသည်တိုင်အောင် ငါပြုလေပြီတကားဟု မြည်တမ်းရလိမ့်မည်။

15ကိုယ်ဆိုင်သော ရေအိုးကိုသုံး၍၊ ကိုယ်ရေတွင်းထဲက ထွက်သောစမ်းရေကို သောက်လော့။ 16သင်၏စမ်းရေများပြား၍၊ လမ်းများအနားမှာ စီးသောမြစ်များ ဖြစ်စေလော့။ 17တစ်ပါးအမျိုးသားနှင့် ပေါင်းဖက်၍ မဆိုင်စေဘဲ၊ ကိုယ်တစ်ပါးတည်းသာ ဆိုင်စေလော့။ 18သင်၏စမ်းရေတွင်း၌ မင်္ဂလာရှိစေ၍၊ အသက်အရွယ်ပျိုစဉ်ကာလ၊ ပေါင်းဖော်သော မယားနှင့်အတူ ပျော်မွေ့လော့။ 19သူသည် စုံမက်တတ်သောသမင်မ၊ နှစ်လိုဖွယ်သော ဒရယ်မကဲ့သို့ဖြစ်၍၊ သူ၏သားမြတ်တို့သည် သင်၏အလိုဆန္ဒကို အစဉ်ပြေစေ၍၊ သူ့ကိုချစ်သောစိတ်နှင့် အစဉ်ယစ်မူးလျက်နေလော့။ 20ငါ့သား၊ သင်သည် အမျိုးပျက်သောမိန်းမနှင့် အဘယ်ကြောင့် ယစ်မူးသနည်း။ ပြည့်တန်ဆာမ၏ရင်ပတ်ကို အဘယ်ကြောင့် ဖက်ယမ်းသနည်း။ 21လူသွားလာသမျှသောလမ်းတို့သည် ထာဝရဘုရားမျက်မှောက်တော်၌ရှိကြ၍၊ သွားလာသမျှသော အခြင်းအရာတို့ကို စူးစမ်းတော်မူ၏။ 22အဓမ္မလူသည် မိမိပြုသော ဒုစရိုက်အပြစ်ဖြင့်ဖမ်းမိခြင်း၊ မိမိအပြစ်ကြိုးတို့ဖြင့် ချည်နှောင်ခြင်းကိုခံရလိမ့်မည်။ 23သူသည် အလွန်မိုက်သောကြောင့် မှားယွင်း၍၊ သွန်သင်ခြင်းကိုမခံရဘဲ သေသွားရလိမ့်မည်။

သုတ္တံကျမ်း - ၅ (အနက်ဖွင့်)

(ဇ) အကျင့်ပျက်မိုက်မဲခြင်း (အခန်း ၅)

၅:၁–၂ ရှောလမုန်က ငယ်ရွယ်နုပျိုသော သူ့သားအား အပြစ်ဒုစရိုက်များက ဝိုင်းရံထားသဖြင့် စိတ်ပူသည်။ သူများပေးသောအကြံဉာဏ်ဩဝါဒ နာခံခြင်းသည် ကြီးမားသော အကျိုးဖြစ်သည်။ ပညာရှိစကားများသည် စင်ကြယ်၍ မှန်ကန်သည်။ ဘေးအန္တာရယ်မှ ကွယ်ကာပေးသည်။ ဘုရားသခင်၏ နှုတ်ကပတ်တော်က လူ့ဘဝဘေးအန္တရာယ်ကြမ္မာဆိုးမှ ကွယ်ကာစောင့်ထိန်းပေးပါသည်။ ထို့ကြောင့် ပေါလုက တိမောသေကား ပရောဖက်အတုများ၏ စကားနားမယောင်၊ ယုံကြည်ခြင်း ခိုင်မြဲဖို့ အားပေးတိုက်တွန်း ထားသည် (၂တိ ၃:၁၃-၁၇)

၅:၃ အခန်းကြီး (၅) သည် အဓိက သင်ခန်းစာသည် သင်ခန်းစာရိုး “ပြည့်တန်ဆာမ” အကြောင်းဖြစ်သည်။ အမျိုးပျက်သောမိန်းမဆိုသည်မှာ ပြည့်တန်ဆာမကို ဆိုလိုသည်။ ပြည့်တန်ဆာမကဲ့သို့ ငွေရဖို့ဆိုလျှင် မည်သည့်အလုပ်မဆို လုပ်ဝံ့သောမိန်းမ ဖြစ်သည်။ အပြစ်ဒုစရိုက်၏ သင်္ကေတ၊ မိစ္ဆာဘာသာရေးနှင့် ဘုရားတုကိုးကွယ်ခြင်း အမှတ်လက္ခဏာ၊ စုံစမ်းခြင်းလက္ခဏာ ဖြစ်သည်။ သူမ၏ နှုတ်ခမ်းသည် ပျားရည်ကဲ့သို့ ချိုသည်။ အပြောချိုသည်။ ပျော့သည်။ လှသည်။ သို့သော် အဆိပ်ပါသည်။

၅:၄ အစပထမတွင်မူ မက်မော်တပ်မက်စရာ ဖြစ်သည်။ သို့သော် အဆုံးတွင်မူ တမာရွက်ကဲ့သို့ ခါးသည်။ အပြစ်ဒုစရိုက်ကို သရုပ်ဖော်သော ရှေးပုံပြင်ဖြစ်သည်။ သို့သော်လည်း ဆွဲဆောင်မှုရှိနေဆဲ။ မာယာထောင်ချောက် ကြွယ်နေဆဲ။

ထိုသူမနှင့်အတူတူ ပေါင်းဖက်လျှင် ဒုက္ခအမြောက်အမြား ရောက်မည်။ သိက္ခာမဲ့မည်။ ကဲ့ရဲ့ခြင်းခံရမည်။ ထို့အပြင် ကာလသားရောဂါ၊ အိမ်ထောင်ရေးပျက်ပြားခြင်း၊ စိတ်ရောဂါဖောက်ပြန်ခြင်းနှင့် အခြားရောဂါများ ရရှိသွားမည်။

၅:၅–၆ သူမနှင့်ပေါင်းသင်းဆက်ဆံသူများကို သေခြင်းမှ မရဏာနိုင်ငံထိ ခေါ်ဆောင်သွားသည်။ မိမိဘဝနှင့်ပတ်ဝန်းကျင် ကောင်းစားဖို့ တခုမှမစဉ်းစား။ အကျင့်လက္ခဏာများသည် တည်ငြိမ်ခြင်းမရှိ။ ဖရိုမရဲဖြစ်သည်။ မိမိဘဝအမှန်ကိုလည်း စဉ်းစားသိရှိခြင်းမရှိ။ ထိုသူမအတွက် ဖြောင့်ဖြူးသာယာသောလမ်း မရှိ။ သူလျှောက်သောလမ်းသည် ခလုတ်ကန်သင်း၊ ဆူးညှောင့်များဖြစ်သည်။(Moffatt)

၅:၇ အတွေ့အကြုံ သင်ခန်းစာအရ ဆုံးမသောဩဝါဒစကားအား သူ့သားများက နားထောင်ကြရန်၊ ဆုံးမစကားများကို ပစ်ပယ်ခြင်းမပြုရန် ကြပ်မက်စွာ သတိပေးလိုက်သည်။

၅:၈ အကြီးမားဆုံးသော ဘဝလုံခြုံရေး အာမခံချက်မှာ ဘေးဥပါဒ်ရောက်နိုင်သော စုံစမ်းခြင်းများကို ခပ်ဝေးဝေးမှ ရှောင်ရှားရသည်။ မကောင်းသောအမှုအရာများအား စုံစမ်းနောက်ပြောင်ခြင်း၊ ပါဝင်ပတ်သက်ခြင်း အလျဉ်းမပြုရ။ ကံကိုယုံ၍ ဆူးပုံမနင်းရ။ ဘုရားသခင်၏ ကွယ်ကာစောင်မမှုကို မစုံစမ်းရ။

အချို့ကိစ္စရပ်များသည် ခပ်ဝေးဝေးမှ ရှောင်ရသည်။ ယောသပ်သည် ကိုယ်ပေါ်ရှိ အဝတ်အစားကိုသာ အဆုံးရှုံးခံသည်။ အပြစ်သွေးဆောင်ရာသို့မလိုက်ပါ။ ထိုကဲ့သို့ မိမိကိုယ်ကို စောင့်ထိန်းနိုင်ရသည်။

စုံစမ်းစစ်ဆေးခြင်းကြုံတွေ့လျှင် အခြားတနေရာသို့ ရှောင်ထွက်ပါ။ သို့မဟုတ် ယတိပြတ်စိတ်ဆုံးဖြတ်ပါ။ အပိုဒ်ငယ် (၈)က သွန်သင်ပါသည်။

၅:၉–၁၀ အမျိုးပျက်သောသူနှင့် ပေါင်းသင်းဆက်ဆံလျှင် သင့်အကောင်းဆုံး ရွှေရောင်နေ့ရက်များ ညိုးနွမ်းသွားမည်။ အချိန်မတန်မီ သင့်အသက် ဆုံးရှုံးသွားမည်။ ဂုဏ်သိက္ခာညိုးနွမ်း၍ လူတောမတိုးနိုင်အောင် ဖြစ်သွားမည်။

လူတောသူတောတွင် ဂုဏ်သိက္ခာရှိရှိ ကျင်လည်နိုင်ရန် ဂုဏ်အသရေရှိဖို့ လိုအပ်သည်။ ရုပ်ရှင်ဇာတ်လမ်းများတွင် နောက်သိက္ခာအတွက် ငွေညှစ်ခြင်းခံရပုံ တွေ့မြင်ဖူးကြပါလိမ့်မည်။ အကယ်၍ တောင်းသောငွေ မပေးလျှင် လူသိရှင်ကြား အထုတ်ဖြေကြမည်ဟု ချိမ်းခြောက်သဖြင့် ငွေနှင့်အရှက်သိက္ခာလဲကြသည်ကို တွေ့ဖူးကြပေမည်။

၅:၁၁ နောက်ဆုံးတွင် ခန္ဓာကိုယ်လည်း ခြပိုးစား၍ ဆွေးမြေ့သွားမည်။ လူမြင်မကောင်း၊ ကြားမကောင်းသော ရောဂါဆိုး၊ ဆစ်ပလစ်ဖိုး၊ မျက်စိကန်းခြင်း၊ AIDS နှင့် စိတ်ချောက်ခြားဖွယ်ရာရောဂါ ရရှိသွားမည်။

၅:၁၂–၁၃ နောင်တမရအောင် ညကြိုတင်သတိပေးထားသည်။ ခလုတ်ထိမှ အမိတဖို့ပြောသည်။ “မိဘစကားနားမထောင်၊ ဥပုသ်စာဖြေကျောင်း၏ သွန်သင်ချက်များ မနာခံ မှုကြောင့် ဘဝကြွေရက် စောမိလေခြင်းဟု နောင်တမရစေချင်။ ပြဿနာပင် လယ်အိုးကြီး ရှောင်လွဲနိုင်သော်လည်း ခဲတလုံး ခလုတ်တိုက်မိခြင်းကြောင့် ဘဝတစ်ခုလုံး မပြိုလဲစေချင်။

၅:၁၄ သို့မဟုတ်လျှင် တနေ့တွင် လူပုံအလယ်မှာ အရှက်တကွဲ အကျိုးနဲရလိမ့်မည်။ မိမိအတွေးမှား၊ အကြံမှားများကို လူပုံအလယ်တွင် နောင်တရမည့်အကြောင်း သတိပေးထားသည်။

၅:၁၅–၁၆ ရှောလမုန်က သူ့သားအား ငယ်ရွယ်နုပျိုစဉ် ပေါင်းဖက်စုံမက်သောဇနီးနှင့် ဘဝတသက် ဆက်ဆံဖို့ ဆုံးမသည်။ ချစ်ခင်နှစ်သက်သော သားမယားနှင့် အိမ်ထောင်မိသားစု ဘဝကုန်လွန်စေချင်သည်။

KJV ကျမ်းမူက မိမိချစ်ခင်နှစ်သက်သော ကြင်ယာနှင့်ပေါင်းဖက်ခြင်းသည် မင်္ဂလာတပါးဖြစ်သည်။ သန့်ရှင်းစွာ လက်ထပ်ထိမ်းမြားသော ဇနီးနှင့်သားသမီး ထွန်းကားကြပါဟု ဆိုသည်။

NKJV ကျမ်းမူတွင် မေးခွန်းပုံစံနှင့် ပြောင်းထားသည်။ “သင့်ထံမှ စီးဆင်းသောစမ်းရေကို တနယ်တကျေး၊ မြို့လယ်လမ်းမပေါ်မှာ စီးဆင်းစေမှာလား” ဟု ဆိုသည်။ မိမိဂုဏ်အသရေများကို မလိုအပ်သောနေရာ၊ အကျင့်ပျက်သောမိန်းမထံ ဖြုန်းတီးပစ်မှာလား။

Knox က ဤသို့ ဖွင့်ဆိုထားသည်။ “သင့်စမ်းရေထွက်များကို မြို့လယ်လမ်းမပေါ်သို့ အလဟဿ မစီးဆင်းစေပါနှင့်” ဤနေရာသည် စမ်းရေထွက်သည့်ဇနီး၊ စီးသောရေသည် သားသမီးများဖြစ်သည်။ မြို့လယ်လမ်းမပေါ်သို့ စီးဆင်းသောရေမှာ မျက်ရည်ကျခြင်းဖြစ်သည်။

၅:၁၇ ဖြူစင်သော အိမ်ထောင်ပြုခြင်းသည် လူနှစ်ယောက်၏ဘဝကို တဘဝသို့ ပေါင်းစပ်ခြင်း၊ ရင်သွေးငယ် သားသမီးများ၏ ပျော်စံရာ ဂေဟာတည်ဆောက်ခြင်း ဖြစ်သည်။ ထို့ကြောင့် ဤကျမ်းပိုဒ်၏ အနှစ်သာရသည် မိဘများ သာယာသောအိမ်ထောင်စု တည်ထောင်ဖို့ ဆုံးမခြင်းဖြစ်သည်။ သားသမီးများနှင့် မိဘများအကြား ဆက်ဆံရေး ပြေလည်ဖို့ မိဘများအတွက် သုတ္တံစကား ဖြစ်သည်။

၅:၁၈ ဤနေရာမှ စမ်းရေတွင်းသည် ကာမပိုင်မိန်းမကို ဆိုလိုသည်။ ငယ်ရွယ်နုပျိုစဉ်က ပေါင်းဖော်သောမိန်းမအပေါ် သစ္စာစောင့်ထိန်းရမည်။ ထိုအကြောင်းကို Michael Grriffiths က “စမ်းချောင်းမှ စီးဆင်းသောရေသည် ကုန်ခမ်းခြင်းမရှိနိုင်။ နွေးထွေးသောမေတ္တာစမ်းရေသည် မိမိမှတဆင့် အခြားသူများသို့လည်း တသွင်သွင် စီးဆင်း လက်ဆင့်ကမ်းသွားစေနိုင်သည်”၇ ဟုဆိုသည်။

၅:၁၉–၂၀ တရားဝင် လက်ထပ်ထိမ်းမြားထားသော မယားနှင့် လင်ဝတ်၊ မယားဝတ် ကျေပြွန်စွာ ချစ်ခင်ဆက်ဆံကြပါ။ ချစ်ခြင်းမေတ္တာထား၍ တဦးနှင့်တဦး အပြန်အလှန်ပြုစုကြပါ။ သူ၏သားမြတ်များက သင့်ကိုသာယာစေပါစေ။ မယားကလည်း မိမိလင်သားအား စိတ်ရွှင်လန်းသာယာအောင် ပြုစုရမည်။

အဘယ်ကြောင့် အမျိုးယုတ်သော မိန်းမရင်ခွင်တွင် မိမိဘဝကို ဖျက်ဆီးချင်သနည်း။ အဘယ်ကြောင့် အဆိပ်လူးသော သကာကို မှီဝဲချင်သနည်း။

၅:၂၁–၂၂ လူ့အသိတွင် ဒုစရိုက်ပြုသောနေရာကို မည်သူမှမမြင်၊ မည်သူမှမသိ ဟု ထင်ကောင်းထင်ပေမည်။ ဘုရားသခင် မသိမမြင်သောနေရာ မရှိ။ ဘုရားသခင်က အားလုံးကို မြင်နေသည်။ ကမ္ဘာမြေပေါ်မှ ပုန်းလျှိုးကွယ်လျှိုးအပြစ်ကလေးသည် ကောင်းကင်မှ လှမ်းကြည့်လျှင် လယ်ပြင်မှာ ဆင်ကောင်သွားသကဲ့သို့ ထင်ရှားနေပါသည်။

လူသည် ဒုစရိုက်အပြစ်ကို ကျူးလွန်နိုင်သော်လည်း အဝေးသို့လည်း ဖယ်ရှားနိုင်ရန် မလွယ်ကူပါ။ အပြစ်တခုကျူးလွန်မိလျှင် အစဉ်အဆက် တဆွေလုံးတမျိုးလုံး လိုက်ပါသည်။ ထိုအကြောင်းကို Jay Adams ကဤသို့ ရှင်းပြသည်။

အပြစ်ဒုစရိုက်ကို ဖြတ်ပစ်ဖို့မလွယ်။ သို့သော် မဖြတ်တောက်လျှင် မိမိကိုယ်ကို ချည်နှောင်ဝါးမြိုသွားမည်။ ဒုစရိုက်ကြိုးက မလှုပ်နိုင်အောင် ချည်နှောင်သည်။ မိမိကျစ်သောကြိုးက ခိုင်မြဲအောင် တုတ်နှောင်သဖြင့် ဒုစရိုက်ကျေးကျွန်လုံးလုံး ဖြစ်သွားတော့သည်။၈

၅:၂၃ Ellicott က ဤကျမ်းပိုဒ်သည် စိတ်အလိုလိုက်သူ၏ ဘဝနိဂုံးဖြစ်သည်ဟု ဆိုသည်။ မိမိဘဝကို မထိန်းကျောင်းနိုင်သူ၏ ဘဝအဖြေ ဖြစ်သည်။ မိုက်မဲစွာဘဝပျက်စီး၍ သေဆုံးရသည်။ (Moffatt)

ကဗျာဆရာ Shelly က ဤကျမ်းချက်ကို သရော်ထားသည်။ မယားငယ်ပေါင်းစုံ၊ လင်တယောက်ပြီးတယောက် ထည်လဲယူသူများ၏ စိတ်ပျက်ဖွယ်ရာ ဘဝနိဂုံးကို ရှုတ်ချထားသည်။ Griffiths ကမူ မိမိကိုယ်ကို သတ်သေခြင်း၊ သားသမီးများကို သေရွာသွားစေခြင်း ဖြစ်သည်ဟု ဆိုသည်။ G.Sampson က “စိုပြေသောလူ့ဘဝကို ခြောက်သယောင် ထစေခြင်း၊ အသုံးမဝင်အောင် ပြုလုပ်၍ ပစ်ပယ်ခြင်း ဖြစ်သည်” ဟုဆိုသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။

Recent Views: 0