ဝတ်ပြုရာကျမ်း - ၁၉
ဝတ်ပြုရာကျမ်း - ၁၉ (အနက်ဖွင့်)
(ခ) နေ့စဉ်အသက်တာ (အခန်း ၁၉)
၁၉:၁–၂၅ သန့်ရှင်းစင်ကြယ်ရခြင်းအကြောင်းရင်းမှာ “သင်တို့ ဘုရားသခင် ငါထာဝရဘုရားသည် သန့်ရှင်းသောကြောင့် သင်တို့သည်လည်း သန့်ရှင်းခြင်းရှိရမည်” (ငယ်၂)ဟူသောကျမ်းစကား ဖြစ်သည်။ ဤကျမ်းချက်တွင် လိုက်နာရမည့် စည်းမျဉ်းနိယာမ အမျိုးမျိုး ပြဌာန်းထားသည်။
မိဘနှစ်ပါးကို ရိုသေစောင့်ရှောက်ရမည်။ ဤအချက်သည် ပညတ်တော်ဆယ်ပါးတွင် ပဉ္စမအချက် အဖြစ် ပြဌာန်းထားပြီးဖြစ်သည် (ငယ်၃)။
ဘုရားသခင်၏ ဥပုသ်တော်နေ့ကို သန့်ရှင်း စင်ကြယ်စေရမည်။ ပညတ်တော်ဆယ်ပါးမှ စတုတ္ထ အချက်ဖြစ်သည်။
ရုပ်တုဆင်းတု ဘုရားတု မကိုးကွယ်ရ။ ပညတ်တော်ဆယ်ပါးမှ ဒုတိယအချက်ဖြစ်သည်။
အပြစ်ဖြေရာယဇ်ပူဇော်သက္ကာကို တတိယနေ့တွင် မစားရ (ငယ် ၅-၈)။
လယ်ကွင်းပြင် ရိတ်သိမ်းသောအခါ အစွန်အဖျားကို မရှိဆင်းရဲသားများအတွက် ချန်ထားပေးရမည် (ငယ် ၉-၁၀)။ ဤနေရာတွင် ပါရှိသော ကောက်ပင်နှင့် စပျစ်သီးများသည် နမူနာပေးခြင်းဖြစ်သည်။ အခြားသီးနှံများလည်း ပါဝင်သည်။
ခိုးမှု၊ လိမ်လည်မှု၊ လှည့်စားမှုမပြုရ (ငယ်၁၁)။ ပညတ်တော်ဆယ်ပါးမှ အဋ္ဌမအချက်ဖြစ်သည်။
ဘုရားသခင်၏နာမတော်ကို မမှန်မကန်သော သက်သေ၌ ကျိန်ဆိုခြင်း မပြုရ(ငယ်၁၂)။ ပညတ်တော်ဆယ်ပါးမှ တတိယအချက်ဖြစ်သည်။
မတရားရယူခြင်း မရသင့်သောဝေစုကို ရယူလက်ခံခြင်း၊ အနိုင်အထက်လုယူခြင်း၊ အဆမတန်ခိုင်းခြင်းတို့ကို တားမြစ်သည် (ငယ်၁၃)။
နားမကြားသူအား ဆဲဆိုခြင်း၊ မျက်စိမမြင်သူအား လမ်းမှားပြခြင်းတို့ကို ရှုတ်ချသည်(ငယ်၁၄)။ အချင်းချင်းရိုသေလေးစားခြင်းဖြင့် ယေဟောဝါဘုရားသခင်၏ ဘုန်းတော်ထင်ရှားစေရမည်(ငယ်၁၄)။ သက်ကြီးရွယ်အိုများ (ငယ်၃၂)၊ မရှိဆင်းရဲသားများ (ငယ်၂၅၊ ၂၆၊ ၄၃)တို့ကို ကရုဏာထားရမည်။ ထိုသို့ ပြုခြင်းသည် ဘုရားသခင်အား ချစ်ကြောက်ခြင်းဖြစ်သည်။
တရားစီရင်ရာတွင် မျက်နှာလိုက်ခြင်းကို တားမြစ်သည်(ငယ်၁၅)။
မိမိနှင့် သက်ဆိုင်သူများအား ဖီလာဆန့်ကျင်ခြင်း၊ အသက်ဘေးအန္တရာယ်ကို ရှုတ်ချသည် (ငယ်၁၆)။
အခြားညီအစ်ကိုအား မုန်းတီးခြင်းမရှိရ။ “စိတ်အခုအခံမရှိစေရ။ ကိုယ်နှင့်စပ်ဆိုင်သောသူ၌ ရှိသောအပြစ်ကို တတ်တိုင်းမရှိစေဘဲ၊ အမှတ်ဆုံးမရမည်” (ငယ် ၁၇)။ ရင်ထဲတွင် အောင့်အီးမြိုသိပ်မထားရ။ ရင်းနှီးပွင့်လင်းစွာ ဆက်ဆံပါ။
ကလဲ့စားချေခြင်း၊ ရက်စက်ကြမ်းကြုတ်စွာ ဆက်ဆံခြင်းမပြုရ(ငယ်၁၈)။ အပိုဒ်ငယ်(၁၈) ဒုတိယပိုင်းတွင် “မိမိနှင်စပ်ဆိုင်သူများကို ကိုယ်နှင့်အတူချစ်လော့” ဟူသောကျမ်းစကားသည် ပညတ်တရားအားလုံး၏ အချုပ်အချာဖြစ်သည် ဒုတိယအကြီးဆုံး ပဋိညာဉ်တရားဖြစ်သည် (မာ၁၂:၃၁)ဟု ဆိုသည်။ အကြီးမြတ်ဆုံးပညတ်ချက်ကို တရား ၆:၄-၅ တွင် တွေ့နိုင်သည်။
အပိုဒ်ငယ် ၁၉တွင် အမျိုးမတူသော တရိစ္ဆာန်များထားစပ်ခြင်းကို တားမြစ်သည်။ တိရစ္ဆာန်အားလုံး အကျုံးဝင်သည်။
အမျိုးမတူသော မျိုးစေ့ရောစပ်ခြင်း။ ဝါနှင့်သိုးမွှေးရော၍ အထည်ရက်ခြင်းမပြုလုပ်ရ။ ဘုရားသခင်သည် အထူးသန့်ရှင်းစင်ကြယ်သော ဘုရားရှင်ဖြစ်သည်။ သို့ကြောင့် ဘုရားရှင်၏ လူများကိုလည်း သန့်ရှင်းစင်ကြယ်စေချင်သည်။ အပြစ်ဒုစရိုက်နှင့် ကင်းဝေးစေချင်သည်။
ကာမပိုင်ရှိကျွန်မနှင့် ဖောက်ပြန်လျှင် ထိုကျွန်မကို သေဒဏ်ပေးရသည်။ သခင်ကိုမူ ဒုစရိုက်ဖြေရာယဇ်ပူဇော်ရသည် (ငယ် ၂၀-၂၂)။
ခါနန်ပြည်တွင် အခြေတကျနေထိုင် စိုက်ပျိုးသောအခါ ပထမ (၃)နှစ်တွင် သီးသောသီးနှံများကို အရေဖျားမလှီးသော သီးနှံဟု သတ်မှတ်ပြီး မစားရ။ စတုတ္ထနှစ် သီးနှံကို ဘုရားသခင်ထံ ပေးလှူကြရမည်။ ပဉ္စမနှစ်သီးနှံမှစ၍ စားသုံးကြရမည် (ငယ် ၂၃-၂၅)။ စတုတ္ထနှစ်သီးနှံသည် လေဝိအမျိုးသားများအတွက် ဖြစ်သည်။
၁၉:၂၆–၃၇ အခြားတားမြစ်ပြဌာန်းချက်များမှာ အသွေးမသွန်းသော အသားများ စားသုံးခြင်း (ငယ်၂၆) မကောင်းသောအတတ်ပညာ သင်ယူလုပ်စားခြင်း(ငယ် ၂၆)၊ အုန်းမှုတ်ခွက်ပုံစံ ဆံပင်ရိတ်ခြင်း၊ ပါးမုန်းရိတ်ခြင်း(ငယ်၂၇)၊ သေသောသူလွမ်းဆွတ် သတိရသောအားဖြင့် မိမိအသွေးအသားညှဉ်းဆဲ လှီးဖြတ်ခြင်း အနာတရဖြစ်အောင် ပြုလုပ်ခြင်း၊ အမာရွတ်ကျန်ရှိစေခြင်း (ငယ် ၂၈)၊ ရုပ်တုဘုရားတုကိုးကွယ်သူများပြုလုပ်ကြသည့်အတိုင်း မိမိသမီးကို ပြည့်တန်ဆာလုပ်ခိုင်းခြင်း (ဇိမ်ခေါင်း လုပ်ခြင်းလည်း အကြုံးဝင်သည်) (ငယ်၂၉)။ ဥပုသ်နေ့ ကျိုးစေခြင်း (ငယ်၃၀) ဗေဒင်၊ ယတြာချေခြင်း၊ နတ်၊ စုန်းရှာဖွေမေးမြန်းခြင်း (ငယ်၃၁)၊ သက်ကြီးရွယ်အိုများ မထီလေးစားခြင်း (ငယ်၃၂)။ သူစိမ်းဧည့်သည်များ မဖွယ်မရာ ဆက်ဆံခြင်း (ငယ်၃၃-၃၄)။ စီးပွားရေးလုပ်ငန်းတွင် သမ္မာအာဇီဝမဟုတ်ဘဲ၊ ဝိသမလောဘတတ်ခြင်း (ငယ်၃၅-၃၇)တို့ဖြစ်သည်။ ဖော်ပြပါအချက်များသည် အဓိကဆိုလိုရင်းများကို နမူနာပေးခြင်းဖြစ်၍ ထိုအချက်များနှင့် ပတ်သက်သောအမှုအရာများလည်း အကြုံးဝင်သည်။
ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။
တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။