Jeremiah -4 -

ယေရမိအနာဂတ္တိကျမ်း - ၄

နောင်တရရန်ဖိတ်ခေါ်ခြင်း

1အို ဣသရေလအမျိုး၊ သင်သည် ပြန်လာလိုလျှင် ငါ့ထံသို့ပြန်လာပါ။ သင်၏ရွံရှာဖွယ်တို့ကို ပယ်လိုလျှင် ငါ့ထံမှမရွှေ့ရ။ 2သင်ကလည်း၊ ထာဝရဘုရားအသက်ရှင်တော်မူသည်ဟု သစ္စာစောင့်ခြင်း၊ တရားစီရင်ခြင်း၊ ဖြောင့်မတ်ခြင်းအားဖြင့် ကျိန်ဆိုလိမ့်မည်။ လူအမျိုးမျိုးတို့သည်လည်း၊ ထိုဘုရားသခင်အားဖြင့် မိမိတို့ကိုကောင်းချီးပေး၍၊ ထိုဘုရားသခင်ကို အမှီပြုလျက် ဝါကြွားကြလိမ့်မည်ဟု ထာဝရဘုရား မိန့်တော်မူ၏။

3ထာဝရဘုရားသည် ယုဒပြည်သူ ယေရုရှလင်မြို့သားတို့အား မိန့်တော်မူသည်ကား၊ သင်တို့၏လယ်ကို ထွန်ကြလော့။ ဆူးပင်တို့တွင် မျိုးစေ့ကို မကြဲကြနှင့်။ 4အို ယုဒပြည်သူ ယေရုရှလင်မြို့သားတို့၊ ထာဝရဘုရားအဖို့အလိုငှာ အရေဖျားလှီးမင်္ဂလာကိုခံ၍၊ သင်တို့နှလုံးအရေဖျားကို လှီးဖယ်ကြလော့။ သို့မဟုတ်၊ သင်တို့၏အကျင့် မကောင်းသောကြောင့်၊ ငါ့အမျက်သည် မီးကဲ့သို့ထွက်၍၊ အဘယ်သူမျှ မငြိမ်းနိုင်အောင် လောင်လိမ့်မည်။

ယုဒပြည်ကိုခြိမ်းခြောက်ခြင်း

5ယုဒပြည်၌ တံပိုးမှုတ်ကြလော့ဟု၊ ယေရုရှလင်မြို့မှစ၍ တစ်ပြည်လုံးကြွေးကြော်၍ သတင်းကြားကြလော့။ စည်းဝေး၍ ခိုင်ခံ့သောမြို့များ အတွင်းသို့ ဝင်ကြကုန်အံ့ဟု အရပ်ရပ်၌ အနှံ့အပြား ကြွေးကြော်ကြလော့။ 6ဇိအုန်တောင်ပေါ်မှာ အလံကိုထူကြလော့။ လွတ်အောင်ပြေးကြလော့။ ရပ်၍ မနေကြနှင့်။ အကြောင်းမူကား၊ ကြီးစွာသောပျက်စီးခြင်း ဘေးဥပဒ်ကို မြောက်မျက်နှာမှ ငါသည်ဆောင်ခဲ့မည်။ 7ခြင်္သေ့သည် မိမိနေရာခြုံထဲက ထွက်လာပြီ။ တိုင်းနိုင်ငံတို့ကို ဖျက်ဆီးသောသူသည် လမ်း၌လာဆဲရှိ၏။ သင်၏ပြည်ကို လူဆိတ်ညံရာအရပ် ဖြစ်စေခြင်းငှာ၊ သူသည် မိမိနေရာမှ ထွက်လာသည်ဖြစ်၍၊ သင်၏မြို့တို့သည် လူမနေနိုင်အောင်ပျက်စီးခြင်းသို့ ရောက်ကြလိမ့်မည်။ 8ထိုအကြောင်းကြောင့် လျှော်တေအဝတ်ကို ဝတ်စည်းလျက်၊ ငိုကြွေးမြည်တမ်း၍ အော်ဟစ်ကြလော့။ အကြောင်းမူကား၊ ထာဝရဘုရား၏ ပြင်းစွာသော အမျက်တော်သည် ငါတို့မှလွှဲရှောင်၍မသွားသေး။ 9ထိုအခါ ရှင်ဘုရင်နှင့် မှူးမတ်တို့သည် စိတ်ပျက်ကြလိမ့်မည်။ ယဇ်ပုရောဟိတ်တို့သည် မိန်းမောတွေဝေလျက်၊ ပရောဖက်တို့သည် ထိတ်လန့်လျက်ရှိကြလိမ့်မည်ဟု ထာဝရဘုရားမိန့်တော်မူ၏။

10ငါကလည်း၊ အို အရှင်ထာဝရဘုရား၊ သန်လျက်သည် အသက်ကိုထိသည်တိုင်အောင် ခွင်းသော်လည်း၊ သင်တို့သည် ငြိမ်သက်ခြင်း ရှိကြလိမ့်မည်ဟု ကိုယ်တော်သည် မိန့်တော်မူသောအားဖြင့်၊ ဤလူများနှင့်တကွ ယေရုရှလင်မြို့သားတို့ကို အလွန်လှည့်စားတော်မူပါပြီ တကားဟု လျှောက်ဆို၏။

11ထိုကာလ၌ ဤလူများနှင့် ယေရုရှလင်မြို့သားတို့ကို ရည်မှတ်၍ ဆိုရမည်ကား၊ ပူသောလေသည် တော၌ မြင့်သောအရပ်က ငါ၏လူမျိုးသတို့သမီးထံသို့ လာလိမ့်မည်။ အမှော်လွင့်စေခြင်း၊ သန့်ရှင်းစေခြင်းငှာ လာသောလေမဟုတ်။ 12ထိုလေထက်ပြင်းသော လေသည် ငါ့အလိုကို ပြည့်စုံစေခြင်းငှာ လာလိမ့်မည်။ ယခုပင် သူတို့ကို ငါ့ကိုယ်တိုင် စစ်ကြောစီရင်မည်။

ယုဒပြည်ကိုဝန်းရံခြင်း

13လာသောမင်းသည် မိုးတိမ်ကဲ့သို့ လာလိမ့်မည်။ သူ၏ရထားတို့သည် လေပွေကဲ့သို့ဖြစ်ကြ၏။ သူ၏မြင်းတို့သည် ရွှေလင်းတထက် သာ၍ လျင်မြန်ကြ၏။ ငါတို့သည် အမင်္ဂလာရှိကြ၏။ ပျက်စီးခြင်းသို့ ရောက်ကြပြီ။ 14အို ယေရုရှလင်မြို့၊ သင်သည် ကယ်တင်ခြင်းသို့ ရောက်ခြင်းငှာ၊ သင်၏စိတ်နှလုံးကို ဒုစရိုက်အပြစ်နှင့် ကင်းစင်စေလော့။ သင်၏ အဓမ္မအကြံအစည်တို့သည် အဘယ်မျှကာလပတ်လုံး သင်၏အထဲ၌ တည်နေရမည်နည်း။ 15ဒန်ပြည်၌ အသံကို ကြားရ၏။ ဧဖရိမ်တောင်ပေါ်မှာ ဒုက္ခသတင်းကို ဟစ်ကြော်ကြ၏။ 16အပြည်ပြည်တို့၌ သတင်းကြားကြလော့။ ယေရုရှလင်မြို့ကိုရည်မှတ်၍ ကြွေးကြော်ကြလော့။ ကင်းစောင့်တို့သည် ဝေးသောပြည်က လာ၍၊ ယုဒမြို့များတစ်ဖက်၌ ထူးကြလိမ့်မည်။ 17လယ်ကိုစောင့်သောသူများကဲ့သို့၊ ထိုသူတို့သည် ယုဒပြည်ကို ဝန်းရံကြ၏။ အကြောင်းမူကား၊ ထိုပြည်သည် ငါ့ကိုပုန်ကန်ပြီ။ 18သင်လိုက်သောထုံးစံနှင့် သင်ကျင့်သော အကျင့်တို့သည် သင့်အပေါ်မှာ ဤအမှုကို သက်ရောက်စေပြီ။ သင်သည် ထိုသို့သောအမှုနှင့်တွေ့၍ ခါးစပ်သောစိတ်၊ နာကြည်းသောစိတ်ရှိရာ၏ဟု ထာဝရဘုရား မိန့်တော်မူ၏။

မိမိလူမျိုးအတွက်ပူဆွေးခြင်း

19ငါ့အသည်းသည်နာ၏။ ငါ့အသည်းသည် နာ၏။ ငါ့နှလုံးအရေဖျားလည်း နာ၏။ ငါ့အထဲ၌ ငါ့နှလုံးပူဆွေး၏။ ငါသည် တိတ်ဆိတ်စွာ မနေနိုင်။ အကြောင်းမူကား၊ အို ငါ့ဝိညာဉ်၊ သင်သည် တံပိုးမှုတ်သံနှင့် စစ်တိုက်သံကို ကြားရ၏။ 20ပျက်စီးပြီ၊ ပျက်စီးပြီဟု အထပ်ထပ်ဟစ်ကြော်ရ၏။ တစ်ပြည်လုံး ပျက်စီးပြီ။ ငါ၏တဲတို့သည် ခဏချင်းတွင် ပျက်စီးကြပြီ။ ငါ၏ ကုလားကာတို့သည် ချက်ချင်းပျက်စီးကြပြီ။ 21ငါသည် အဘယ်မျှကာလပတ်လုံး အလံကိုမြင်ရအံ့နည်း။ အဘယ်မျှကာလပတ်လုံး တံပိုးသံကို ကြားရအံ့နည်း။

22အကယ်စင်စစ် ငါ၏လူတို့သည် ထိုင်းမှိုင်း၍ ငါ့ကိုမသိကြ။ မိုက်သောသူငယ်ဖြစ်၍ ဉာဏ်မရှိကြ။ မကောင်းသောအမှုတို့၌ လိမ္မာကြ၏။ ကောင်းသောအမှုတို့ကို မပြုတတ်ကြ။

ကျရောက်လာမည့်ဘေး

23ငါသည် မြေကြီးကိုကြည့်ရှု၍ လွတ်လပ်လဟာဖြစ်၏။ မိုးကောင်းကင်ကိုလည်း ငါကြည့်ရှု၍ အလင်းမရှိ။ 24တောင်တို့ကိုလည်း ငါကြည့်ရှု၍၊ သူတို့နှင့်တကွ ကုန်းရှိသမျှတို့သည် တုန်လှုပ်လျက်နေကြ၏။ 25ငါကြည့်ရှု၍ လူမရှိ။ မိုးကောင်းကင်ငှက် အပေါင်းတို့သည် ပြေးကြပြီ။ 26ငါကြည့်ရှု၍ ဝပြောသောပြည်သည် တောဖြစ်လေပြီ။ မြို့များတို့သည် ပြိုပျက်လျက် ရှိကြ၏။ ထာဝရဘုရားရှေ့၊ ပြင်းစွာသော အမျက်တော်ရှေ့၌ ထိုသို့သောအခြင်းအရာတို့သည် ဖြစ်ရကြ၏။

27ထာဝရဘုရား မိန့်တော်မူသည်ကား၊ တစ်ပြည်လုံး ပျက်စီးရာဖြစ်လိမ့်မည်။ ပျက်စီးခြင်းကို ငါမဆီးတား၊ 28ထိုကြောင့်၊ မြေကြီးသည် ညည်းတွားလိမ့်မည်။ မိုးကောင်းကင်လည်း နက်လိမ့်မည်။ ငါသည်ပြောပြီးမှ နောင်တမရှိ။ ကြံပြီးမှ အကြံမပျက်ရ။ 29မြင်းစီးသူရဲနှင့် လေးကိုင်သူရဲတို့ ဟစ်သောအသံကြောင့်၊ မြို့သားအပေါင်းတို့သည် တောအုပ်သို့ ပြေးသွားကြ၏။ ကျောက်ပေါ်သို့ တက်ကြ၏။ မြို့ရှိသမျှတို့ကို စွန့်ပစ်၍နေသောသူ တစ်ယောက်မျှမရှိရ။ 30သင်သည် ပျက်စီးခြင်းသို့ရောက်သောအခါ အဘယ်သို့ ပြုလိမ့်မည်နည်း။ နီမောင်းသောအဝတ်ကို ဝတ်သော်လည်းကောင်း၊ ရွှေတန်ဆာကို ဆင်သော်လည်းကောင်း၊ သင်၏မျက်နှာစုတ်ပဲ့သည်တိုင်အောင် ဆေးသုတ်သော်လည်းကောင်း၊ သင်၏တင့်တယ်ခြင်းကို အချည်းနှီးပြ၏။ သင်၏ရည်းစားတို့သည် သင့်ကိုစွန့်၍၊ သင်၏အသက်ကို သတ်ခြင်းငှာ ရှာကြံကြ၏။ 31အကယ်စင်စစ် သားဖွားသောမိန်းမညည်းသံ၊ သားဦးဖွားသော မိန်းမ၏ဝေဒနာခံရာအသံကဲ့သို့၊ ဇိအုန်သတို့သမီး အော်ဟစ်သံကို ငါကြားရ၏။ ထိုသတို့သမီးက၊ အကျွန်ုပ်သည် အမင်္ဂလာရှိပါ၏။ လူသတ်များကြောင့်၊ အကျွန်ုပ်စိတ်ပျက်ပါ၏ဟု မိမိလက်ဝါးကိုဖြန့်၍ ငိုကြွေးလျက်နေ၏။

ယေရမိအနာဂတ္တိကျမ်း - ၄ (အနက်ဖွင့်)

(၃) မြောက်အရပ်မှတရားစီရင်ခြင်းအမင်္ဂလာ(၄:၅–၃၁)

၄:၅–၁၃ ဘုရားသခင်ထံတော်သို့ ပြန်လာကြလျှင် ထိုသူတို့နှင့်အတူ မေရှိယသခင်ကိုယ်တိုင် စိုးစံ၍လူမျိုးများအား ကောင်းကြီးမင်္ဂလာ သွန်းလောင်းမည်။ သို့ကြောင့် ယုဒလူမျိုးနှင့် ယေရုရှလင်အား ရုပ်တုဆင်းတု ကိုးကွယ်ခြင်းပစ်ခွာကြရန် ဘုရားရှင်က ထပ်မံသတိပေးသည်။ တစ်နည်းအားဖြင့် ကျူးကျော်ရေးသမားများ (ဗာဗုလုန်)ကို ခြင်္သေ့၊ လေပူရိုင်း၊ မိုးတိမ်။ လေပွေနှင့် လင်းတငှက်များအဖြစ် ဘုရားသခင်က စေလွှတ်မည်။ ဘုရားသခင် ပေးထားသော ငြိမ်သက်ခြင်း၊ ကတိတော်နှင့် မျက်မှောက်ကာလ တရားစီရင်မည့်အကြောင်း မဆက်စပ်ပေးနိုင်မှုကိုအခန်းငယ် (၁၀)တွင် တင်ပြထားသည်။ ဘုရားသခင်သည် ဘယ်သောအခါမှ ကတိသစ္စာ မပျက်ကြောင်း ယေရမိယုံကြည်သည်။ အလင်းရောင်ထဲသို့ ရောက်ရှိသောအခါ သံသယအမှောင် တဖျောက်ကျူးလွန်ခဲ့ကြောင်း ပြန်သတိရသည်။ ယုံကြည်သူများသည်လည်း ဘေးအန္တရာယ်နှင့် စိတ်ပျက်အားငယ်ခြင်း ကြုံတွေ့သောအခါ ထိုကဲ့သို့ဖြစ်တတ်သည်ကို သတိပြုပါ။ သို့ကြောင့် ခရစ်ယာန်အသက်တာတွင် ယုံကြည်ခြင်း အပေါ် သံသယရှိခြင်းနှင့် သံသယအား ယုံကြည်ခြင်း ထက် ယုံကြည်ခြင်းအပေါ် ခိုင်မာတည်ကြည်ဖို့ နှင့်သံသယအား ပိုမိုသံသယ ထားဖို့လိုအပ်ပါသည်။

၄:၁၄–၁၈ ယုဒများသည် အကျင့်စရိုက်ဆိုး၊ ဒုစရိုက်အပြစ်မှ လွတ်ထွက် ရန်အမှန်တကယ် လိုအပ်နေပြီ။ အဘယ်ကြောင့်ဆိုသော် ဘုရားသခင်သတိပေးထားသော ယုဒများကို ချေမှုန်းဖျက်ဆီးမည့် မြောက်ပိုင်းအရပ်မှ ဒန်လူမျိုးနှင့် ဧဖရိမ်ထောင်က ချီတက်လာနေကြပြီ။ ယုဒများ၏ အပြစ်ဒုစရိုက်ထောင်လိုပုံမှု၊ ဘုရားသခင်ကို ပုန်ကန်မှုတို့ကြောင့် ယေရုရှလင်မြို့အား ဖျက်ဆီးရန် မြောက် ပိုင်းသားများအား ဘုရားသခင်က အခွင့်အရေးပေးနေပြီ။

၄:၁၉–၂၂ သူ့လူများ၏ အပြစ်ဒုစရိုက် မိုက်မဲမှုကြောင့် ပရောဖက်ယေရမိ ဝမ်းနည်းကြေကွဲပုံကို အပိုဒ်ငယ်၁၉-၂၁တွင် ဖော်ပြထားသည်။ “အို၊ ငါ့ဝိညာဉ်၊ ငါ့ဝိညာဉ်” ဆိုသည်မှာ ”ငါအသဲနာ၏။ အရေဖျားလည်းနာ၏ နှလုံးပူဆွေး၏။ အောင့်မခံနိုင်” ဟု ဆိုလိုသည်။ စစ်မက်ရေးရာ ဖြစ်ပွား၍ မီးလောင်ပြာကို ပျက်စီးကြမည့်အကြောင်း မမြင်ရက်။ တချိန်က စည်းကားသိုက်မြိုက်သော မြို့တော်အား လွင်တီးခေါင်ပြင် ဖြစ်မည် မတွေးရဲ။ အပိုဒ်ငယ်(၂၁)တွင်” အဘယ်မျှကာလပတ်လုံး တံပိုးသံကို ကြားရအံ့နည်း” ဟူသောမေးခွန်းအပိုဒ်ငယ် (၂၂)တွင်” ငါ၏ လူများထိုင်းမှိုင်းမိုက်မဲခြင်းနှင့် မကောင်းသော ဒုစရိုက်မှ ပြန်ထွက်လာသည့်တိုင်အောင်” ဟု ဖြေထားပါသည်။

၄:၂၃–၃၁ ယုဒပြည်တွင် ကပ်ဆိုးကျရောက်မည့်အကြောင်း ရူပါရုံတွေ့မြင်ပုံကို ယေရမိက ဟောကြားထားသည်။ ဘုရားသခင်က သတိပေးထားသည်။ ထိုကျရောက်မည့် ကပ်ဆိုးသည် နောက်ဆုံးအကြိမ် မဟုတ်သေးပါ။ ဘုရားသခင်၏ အကြံအစည်တော်သည် တပွဲတိုးမဟုတ်။ လှပကြော့မော့ခဲ့သော ယေရုရှလင်ထံမှ သားဘွားသည့်ညည်းသံ၊ သားဦးဖွားသောမိန်းမ၏ ဝေဒနာသံကြားကြရဦးမည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။