Jeremiah -3 -

ယေရမိအနာဂတ္တိကျမ်း - ၃

သစ္စာဖောက်ဣသရေလ

1ယောက်ျားစွန့်ပစ်သော မိန်းမသည် ထွက်သွား၍၊ အခြားသောသူ၏ မယားဖြစ်ပြီးမှ၊ အရင်လင်သည် ထိုမိန်းမကို ပြန်၍ယူသင့်သလော။ ထိုသို့ပြုသောပြည်သည် ညစ်ညူးသည်မဟုတ်လောဟု ဆိုလေ့ရှိလျက်နှင့်၊ သင်သည် များစွာသော ရည်းစားတို့၌ မှီဝဲ၍ မှားယွင်းသော်လည်း၊ ငါ့ထံသို့ ပြန်လာပါဟု ထာဝရဘုရား မိန့်တော်မူ၏။ 2မြင့်သောအရပ်များကို မျှော်ကြည့်၍၊ လင်မနေဖူးသောအရပ် တစ်စုံတစ်ခုကိုရှာလော့။ အာရပ်လူသည် တော၌စောင့်သကဲ့သို့၊ သင်သည် လမ်းတို့၌စောင့်နေ၍၊ မတရားသော မေထုန်အားဖြင့်လည်းကောင်း၊ အဓမ္မအမှုအားဖြင့်လည်းကောင်း ပြည်ကို ညစ်ညူးစေပြီ။ 3မိုးခေါင်၍ နောက်မိုးတိုင်အောင် မရွာသော်လည်း၊ သင်သည် ပြည့်တန်ဆာနဖူးရှိ၍၊ ရှက်ခြင်းသဘောကို ပယ်ရှားပြီ။ 4ယခုမှစ၍ သင်က၊ အကျွန်ုပ်အဘ၊ ကိုယ်တော်သည် အကျွန်ုပ်အသက်ငယ်စဉ်၊ စောင့်မပါပြီဟု ငါ့အား အော်ဟစ်ပါစေသော။ 5ဘုရားသခင်သည် အစဉ်အမျက်ထွက်တော်မူမည်လော။ အဆုံးတိုင်အောင် အပြစ်ကို မှတ်တော်မူမည်လောဟု ဆိုပါစေသော။ ထိုသို့ဆိုသော်လည်း၊ တတ်နိုင်သမျှအတိုင်း အဓမ္မအမှုကို ပြုပါသည်တကား။

နောင်တရရန်ဖိတ်ခေါ်ခြင်း

6ယောရှိမင်းကြီးလက်ထက်၊ ထာဝရဘုရားသည် ငါ့အား မိန့်တော်မူသည်ကား၊ ဖောက်ပြန်သော ဣသရေလအမျိုး ပြုသောအမှုကို သင်မြင်ပြီလော။ မြင့်သောတောင်ရှိသမျှ အပေါ်သို့တက်၍လည်းကောင်း၊ စိမ်းသောသစ်ပင်ရှိသမျှ အောက်၌လည်းကောင်း ပြည့်တန်ဆာလုပ်လေပြီ။ 7သူသည် ထိုအမှုအလုံးစုံတို့ကို ပြုပြီးမှ၊ ငါ့ထံသို့ ပြန်လာပါဟု ငါပြောသော်လည်း၊ သူသည် ပြန်၍မလာ။ ထိုအမှုကို သူ၏ညီမ၊ သစ္စာပျက်သောညီမယုဒသည် ကြည့်မြင်လေ၏။ 8ဖောက်ပြန်သော ဣသရေလသည် မတရားသောမေထုန်ကိုပြု၍၊ မှားယွင်းသောအပြစ်များကြောင့်၊ သူနှင့်ငါကွာ၍ ဖြတ်စာကို အပ်သော်လည်း၊ သစ္စာပျက်သောညီမ ယုဒသည်လည်း၊ မကြောက်ဘဲသွား၍၊ ပြည့်တန်ဆာလုပ်ကြောင်းကို ငါမြင်ရ၏။ 9သူသည် မတရားသောမေထုန်ကိုပြု၍ အလွန်လော်လည်သောအားဖြင့် ပြည်ကိုညစ်ညူးစေ၍၊ ကျောက်နှင့်လည်းကောင်း၊ သစ်တုံးနှင့်လည်းကောင်း မှားယွင်းလေ၏။ 10ထိုမျှလောက်အပြစ်ရှိသော်လည်း၊ သစ္စာပျက်သောညီမယုဒသည် ငါ့ထံသို့ စိတ်နှလုံးအကြွင်းမဲ့ ပြန်၍မလာ။ ပြန်လာဟန်ဆောင်သည်ဟု ထာဝရဘုရား မိန့်တော်မူ၏။

11တစ်ဖန် ထာဝရဘုရားသည် ငါ့အား မိန့်တော်မူသည်ကား၊ သစ္စာပျက်သောယုဒသည် ဖောက်ပြန်သောဣသရေလထက် အပြစ်ကြီး၏။ 12သင်သည်သွား၍ မြောက်မျက်နှာသို့ ဟစ်ကြော်ရမည်စကားဟူမူကား၊ အို ဖောက်ပြန်သော ဣသရေလ၊ ပြန်လာပါဟု ထာဝရဘုရား မိန့်တော်မူ၏။ သင်၌ ငါသည် မျက်မုန်းကျိုးခြင်းကိုမပြု၊ ကရုဏာစိတ်သဘောရှိ၏။ အစဉ်အမျက်ထွက်တတ်သည် မဟုတ်ဟု ထာဝရဘုရား မိန့်တော်မူ၏။ 13သင်သည် ငါ့စကားကို နားမထောင်။ သင်၏ ဘုရားသခင် ထာဝရဘုရားကိုပြစ်မှား၍၊ စိမ်းသောသစ်ပင်ရှိသမျှ အောက်၌တွေ့သော ဧည့်သည်တို့နှင့် မှားယွင်းသောအပြစ်ရှိကြောင်းကို ဝန်ချရုံမျှသာ ပြုလော့ဟု ထာဝရဘုရား မိန့်တော်မူ၏။ 14အို ဖောက်ပြန်သော သူငယ်တို့၊ ပြန်လာကြလော့ဟု ထာဝရဘုရား မိန့်တော်မူ၏။ ငါသည် သင်တို့ကို ရွံရှာဖူးသော်လည်း၊ သင်တို့မြို့များထဲက တစ်မြို့လျှင် လူတစ်ယောက်၊ အမျိုးသားချင်းအစုစုထဲက တစ်စုလျှင် လူနှစ်ယောက်ကို ရွေးယူ၍ ဇိအုန်မြို့သို့ ပို့ဆောင်မည်။ 15ငါသည် နှစ်သက်သောသူတို့ကို သင်းအုပ်အရာ၌ ခန့်ထား၍၊ သူတို့သည် ဉာဏ်ပညာနှင့် ပြည့်စုံလျက် သင်တို့ကို အုပ်ကြလိမ့်မည်။ 16ထိုကာလတွင် သင်တို့သည် ပြည်တော်၌ တိုးပွားများပြားသောအခါ၊ ထာဝရဘုရား၏ ပဋိညာဉ်သေတ္တာတော်ဟူ၍ နောက်တစ်ဖန် မပြောမဆိုရ။ ထိုသေတ္တာတော်ကို စိတ်မစွဲလမ်း၊ မအောက်မေ့၊ မပြုစုရ။ နောက်တစ်ဖန်မလုပ်ရဟု ထာဝရဘုရား မိန့်တော်မူ၏။ 17ထိုအခါ ယေရုရှလင်မြို့ကို ထာဝရဘုရား၏ပလ္လင်ဟူ၍ ခေါ်ကြလိမ့်မည်။ လူမျိုးအပေါင်းတို့သည်လည်း၊ ထာဝရဘုရား၏ နာမတော်ကိုအမှီပြု၍၊ ထိုပလ္လင်သို့ စည်းဝေးကြလိမ့်မည်။ နောက်တစ်ဖန် မိမိတို့၌ ဆိုးသောစိတ်နှလုံး ခိုင်မာခြင်းသဘောသို့လိုက်၍ မကျင့်ရကြ။ 18ထိုကာလ၌ ယုဒအမျိုးသည် ဣသရေလအမျိုးနှင့် ပေါင်းဖော်လျက်၊ မြောက်မျက်နှာအရပ်က တစ်စုတည်းလာ၍၊ သင်တို့ဘိုးဘေးများ အမွေခံဖို့၊ ငါပေးဖူးသောပြည်သို့ရောက်ကြလိမ့်မည်။

19ငါသည်သင့်ကို သားတို့တွင် အဘယ်သို့ထားရအံ့နည်း။ သာယာသောပြည်၊ တိုင်းနိုင်ငံအပေါင်းတို့၏ထွတ်၊ ဘုန်းကြီးသော အမွေခံရာပြည်ကို သင့်အား အဘယ်သို့ပေးရအံ့နည်းဟု ငါမေးသောအခါ၊ သင်သည် ငါ့ကို အကျွန်ုပ်အဘဟူ၍ ခေါ်ရလိမ့်မည်။ ငါ့ထံမှလွှဲ၍ မသွားရဟု ငါပြန်ပြော၏။

20အို ဣသရေလအမျိုး၊ မယားသည် မိမိခင်ပွန်း၌ သစ္စာဖျက်သကဲ့သို့၊ အကယ်စင်စစ် သင်တို့သည် ငါ၌သစ္စာဖျက်ကြပြီဟု ထာဝရဘုရား မိန့်တော်မူ၏။ 21ဣသရေလ အမျိုးသားတို့သည် မြင့်သောအရပ်တို့၌ ငိုကြွေး၍ တောင်းပန်သောအသံကို ငါကြားရပြီ။ အကြောင်းမူကား၊ သူတို့သည် လမ်းလွှဲ၍၊ မိမိတို့ဘုရားသခင် ထာဝရဘုရားကို မေ့လျော့ကြပြီ။ 22အို ဖောက်ပြန်သောသူငယ်၊ သင်တို့ပြန်လာကြလော့။ ဖောက်ပြန်ရာများကို ငါပြုပြင်မည်။ သူတို့ကလည်း၊ အကျွန်ုပ်တို့သည် ကိုယ်တော်ထံသို့ လာကြပါ၏။ ကိုယ်တော်သည် အကျွန်ုပ်တို့၏ဘုရားသခင် ထာဝရဘုရား ဖြစ်တော်မူ၏။ 23အကယ်စင်စစ် ကုန်းများနှင့် တောင်ရိုးများတို့သည် အချည်းနှီးသက်သက်ဖြစ်ကြ၏။ အကယ်စင်စစ် အကျွန်ုပ်တို့၏ ဘုရားသခင် ထာဝရဘုရားသည် ဣသရေလအမျိုးကို ကယ်တင်ရာအကြောင်းဖြစ်တော်မူ၏။ 24ရှက်ဖွယ်သောအရာသည် အကျွန်ုပ်တို့၏ ဘိုးဘေးဥစ္စာတည်းဟူသော သူတို့ သိုးနွား၊ သားသမီးများကို အကျွန်ုပ်တို့ ငယ်သောအရွယ်ကပင် စား၍ကုန်ပါပြီ။ 25အကျွန်ုပ်တို့သည် ရှက်ကြောက်လျက် အိပ်ရကြ၏။ အသရေပျက်ခြင်း၌ နစ်မွန်းကြ၏။ အကြောင်းမူကား၊ အကျွန်ုပ်တို့သည် ငယ်သောအရွယ်မှစ၍ ယခုတိုင်အောင် ဘိုးဘေးနှင့်တကွ အကျွန်ုပ်တို့၏ဘုရားသခင် ထာဝရဘုရား၏စကားတော်ကို နားမထောင်။ အကျွန်ုပ်တို့၏ဘုရားသခင် ထာဝရဘုရားကို ပြစ်မှားပါပြီဟု ဆိုကြ၏။

ယေရမိအနာဂတ္တိကျမ်း - ၃ (အနက်ဖွင့်)

၃:၁–၅ တရား ၂၄:၁-၄တွင် ကွာရှင်းသော မိန်းမသည် အခြားယောက်ျား နှင့် အိမ်ထောင်ပြုပြီးလျှင် ပထမ အိမ်ထောင်နှင့် တဖန်ပြန်လည် ပေါင်းဖော်ခြင်း မပြုရဟု ပြဌာန်းထားသည်။ ယုဒလူမျိုးတို့သည် ရည်းစားအများအပြား ရှိသည်။ ထိုသို့များပြားသည့်တိုင်အောင် ဘုရားသခင်က အထံတော်သို့ ပြန်လာဖို့ ဖိတ်ခေါ်နေသည်။ အရှက်မရှိ ပြည့်တန်ဆာမကဲ့သို့ သူ့မြေကို ညစ်ညမ်းခြင်းမျိုးစုံဖြင့် ညစ်ပေစေခဲ့မှုများအတွက် နောင်တရပါပြီဟု နှုတ်ဖျားဖြင့် ဟန်ဆောင်စကား ပြောသော်လည်း သူ့စကားနှင့် သူ့အပြုအမူကို ဘုရားရှင် သိနေသည်။

(ခ) ယုဒတို့ အနာဂတ်သည် နောင်တတရားပေါ်တွင် တည်ခြင်း(၃:၆–၆:၃၀)

(၁)အတိတ်အပြစ်နှင့်အနာဂတ်ကောင်းကြီးမင်္ဂလာ(၃:၆–၁၈)

၃:၆–၁၄ ဣသရေလ မြောက်ဘုရင်သည် ဘုရားသခင်ထံတော်တွင် မွေ့လျော်ခြင်းကို အလိုမရှိ၊ ငြင်းဆန်လျက် ပြည့်တန်ဆာအကျင့်စရိုက်၌သာ ပျော်ပိုက်သည်။ အာရှုရိများ၏ ဖမ်းဆီးကျွန်ပြုခြင်းကို ခံနေရမှန်း ယုဒများကြုံတွေ့နေကြသော်လည်း ဘုရားသခင်ထံလာဖို့ ခေါင်းမာနေကြဆဲ။ ဖောက်ပြန်သော ဣသရေလအမျိုး ဆယ်မျိုးသည် ကတိသစ္စာမတည်သော ယုဒလူမျိုးထက် ဖြောင့်မတ်သေးသည်။ နောင်တရ၍ အထံတော်သို့ ပြန်လည်တိုးဝင်ရန် ဘုရားသခင်က ဖိတ်ခေါ်သည်။ ဘုရားသခင်ကို ဝန်ခံကိုးစားစေချင်သည်။ ထိုသို့ကျိုးနွံကြလျှင် ဘုရားသခင်က ဇိအုန်တောင် သို့ပြန်ခေါ်ဆောင်မည်။

ဣသရေတို့သည် အကျင့်ယုတ်မာ ဖောက်ပြန်ကြသောကြောင့် ဘုရားသခင် ကမျက်နှာလွှဲကြောင်း အပိုဒ်ငယ်(၈)တွင် တွေ့ရသည်။ မ ၁၉:၉ပါ ယုံကြည်သူများ သို့ ခရစ်တော်ပြောသော စကားသည်လည်း ထိုယုဒများပုံစံ မချိုးကြရန် သတိပေးခြင်း ဖြစ်သည်။ အိမ်ထောင်ဖက်သည် အကျင့်စာရိတ္တ ဖောက်လွဲဖောက်ပြန်ပြု၍ ယုတ်ညံ့လျှင် လင်မယား ကွာရှင်းနိုင်သည်ဟု ဆိုလိုရာ ရောက်ပါသည်။ မာလ ၂:၁၆တွင် လင်မယားကွာရှင်းခြင်း မပြုရန် တားမြစ်ပြဌာန်းသော်လည်း လင်မယားကွာရှင်းမှု အားလုံးနှင့် မသက်ဆိုင် ။ ကျမ်းနှင့်မညီသော လင်မယားကွာရှင်းခြင်းကိုသာ တားမြစ်ပါသည်။

၃:၁၅–၁၈ ဤကျမ်းပိုဒ်များသည် အနှစ် တစ်ထောင်ကာလအတွက် ဖြစ်ပါသည်။ ငါသည် နှစ်သက်သောသူတို့ကို သင်းအုပ်အရာ၌ ခန့်ထား၍သူတို့သည် ဉာဏ်ပညာနှင့် ပြည့်စုံမည်။ ထာဝရဘုရား၏ ပဋိညာဉ်သေတ္တာတော် တည်၍ နောက်တဖန် မပြောမဆိုရ။ အဘယ့်ကြောင့်ဆိုသော် မေရှိယသခင်ကိုယ်တော်တိုင် ထိုသူများနှင့် အတူတကွစိုးစံမည်။ ယေရုရှလင်မြို့တော်သည် ကမ္ဘာအချက်အချာ နေရာဖြစ်၍ဘုရားသခင်၏ ပလ္လင်တော်စိုးစံရာ မြို့တော်ဟု ခေါ်ဆိုကြမည်။ ကမ္ဘာအနှံ့သို့ ပြန့်ကြဲနေသော ယုဒလူမျိုးနှင့် ဣသရေလလူမျိုးသည်လည်း ပြန်လည် စုစည်းတလုံးတဝတည်း ပြန်ဖြစ်ကြမည်။

(၂) နောင်တရရန် လိုအပ်ခြင်း(၃:၁၉–၄:၄)

အနာဂတ်ကာလတွင် ယေဟောဝါဘုရားရှင်နှင့် သူ့လူများအကြား အနာဂတ်ဆက်ဆံရေးကို တွေ့ရသည်။ ဘုရားသခင်သည် သူ့လူများကို ကောင်းစားစေချင်သည်။ သို့သော် ကျူးလွန်ခဲ့သော အပြစ်ဒုစရိုက်များက ကောင်းကြီးမင်္ဂလာမခံစားနိုင်အောင် ပိတ်ဆို့ဟန့်တားနေသည်။ ယခုမျက်ရည်ကျနေပြီ။ ဘုရားသခင်က သနားသောကြောင့် တဖန်အခွင့်အရေးပေးသည်။ အထံတော်သို့ ပြန်လာဖို့ ဖိတ်ခေါ်သည်။ ရုပ်တုဆင်းတု ကိုးကွယ်ခြင်းကို ပစ်ခွာ၍ ဘုရားသခင်၏ ကယ်တင်ခြင်း ခံစားရနိုင်မည်။ ဘုရားတရားကို နောက်ကြောခိုင်းခြင်းကြောင့် အရှက်အကြောက်ရရှိခဲ့ကြသည်။ ရွံရှာဖွယ်ဖြစ်ခဲ့ကြသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။