Jeremiah -31 -

ယေရမိအနာဂတ္တိကျမ်း - ၃၁

ပြည်တော်ပြန်တို့၏၀မ်းမြောက်ခြင်း

1ထာဝရဘုရားမိန့်တော်မူသည်ကား၊ ထိုကာလ၌ ငါသည် ဣသရေလအဆွေအမျိုးအပေါင်းတို့၏ ဘုရားသခင်ဖြစ်၍၊ သူတို့သည် ငါ၏လူဖြစ်ကြလိမ့်မည်။ 2တစ်ဖန်မိန့်တော်မူသည်ကား၊ ဓားဘေးနှင့် လွတ်သောသူတို့သည် တော၌ကျေးဇူးကိုခံရကြပြီ။ ငါသည် ကြွသွား၍ ဣသရေလအမျိုးကိုချမ်းသာပေးမည်။ 3ထာဝရဘုရားသည် အဝေးကထင်ရှား၍ မိန့်တော်မူသည်ကား၊ အကယ်စင်စစ် ထာဝရမေတ္တာနှင့် သင့်ကိုငါချစ်၏။ ထိုကြောင့်၊ ကရုဏာကျေးဇူးကို သင်၌ ကြာမြင့်စွာပြ၏။ 4အို ဣသရေလ သတို့သမီးကညာ၊ သင့်ကိုတစ်ဖန် ငါတည်ဆောက်သောကြောင့်၊ သင်သည် တည်ဆောက်ခြင်းသို့ ရောက်လိမ်မည်။ သင်သည် တစ်ဖန်ပတ်သာနှင့် တန်ဆာဆင်လျက်၊ ရွှင်မြူးခြင်းကို ပြုသောသူတို့နှင့်အတူ ကခုန်လျက်သွားလိမ့်မည်။ 5ရှမာရိတောင်ပေါ်မှာ စပျစ်ဥယျာဉ်ကို တစ်ဖန်စိုက်လိမ့်မည်။ ဥယျာဉ်လုပ်သောသူတို့သည် စိုက်ပျိုး၍၊ အသီးကို ကိုယ်အလိုအလျောက် စားရကြလိမ့်မည်။ 6ဧဖရိမ်တောင်ပေါ်မှာ ကင်းစောင့်တို့က၊ ထကြလော့။ ငါတို့ ဘုရားသခင် ထာဝရဘုရားရှိတော်မူရာ ဇိအုန်တောင်သို့ သွားကြကုန်အံ့ဟု ကြွေးကြော်ရသောအချိန်ကာလသည် ရောက်လိမ့်မည်။ 7ထာဝရဘုရားမိန့်တော်မူသည်ကား၊ ယာကုပ်အမျိုးအား၊ ရွှင်လန်းစွာ သီချင်းဆိုကြလော့။ လူမျိုးတို့၏အထွတ်၌ ကြွေးကြော်ကြလော့။ အို ထာဝရဘုရား၊ ကိုယ်တော်၏လူမျိုးတည်းဟူသော၊ ကျန်ကြွင်းသော ဣသရေလအမျိုးသားကိုကယ်တင်တော်မူပြီဟု မြွက်ဆိုလျက် သတင်းကြားလိုက်၍ ချီးမွမ်းကြလော့။ 8သူတို့ကို မြောက်ပြည်မှ ငါဆောင်ခဲ့၍၊ မြေကြီးစွန်းမှစုသိမ်းမည်။ မျက်စိကန်းသောသူ၊ ခြေဆွံ့သောသူ၊ ကိုယ်ဝန်ဆောင်သောမိန်းမ၊ သားဖွားခြင်းဝေဒနာကိုခံရသောမိန်းမများလည်း ပါလျက်၊ ကြီးစွာသောအစည်းအဝေးတို့သည် ပြန်လာကြလိမ့်မည်။ 9ငိုကြွေးလျက် လာကြလိမ့်မည်။ ဆုတောင်းပတ္ထနာပြုလျက်ရှိသော ထိုသူတို့ကို ငါပို့ဆောင်မည်။ မြစ်နားမှာလျှောက်သောလမ်း၊ ထိမိ၍ မလဲရသောလမ်းဖြောင့်တို့၌ ငါသွေးဆောင်မည်။ အကြောင်းမူကား၊ ငါသည် ဣသရေလအမျိုး၏အဘဖြစ်၏။ ဧဖရိမ်အမျိုးသည် ငါ၏ သားဦးဖြစ်၏။

10အို လူမျိုးတို့၊ ထာဝရဘုရား၏အမိန့်တော်ကို နားထောင်ကြလော့။ ဝေးသောအရပ်ရပ်တို့၌ ကြွေးကြော်၍၊ ဣသရေလ အမျိုးသားတို့ကို အရပ်ရပ်သို့ ကွဲပြားစေသောသူသည် တစ်ဖန် စုသိမ်းပြီးလျှင်၊ သိုးထိန်းသည် မိမိသိုးစုကိုစောင့်တတ်သကဲ့သို့ စောင့်တော်မူမည်ဟု ကြားပြောကြလော့။ 11အကြောင်းမူကား၊ ထာဝရဘုရားသည် ယာကုပ်အမျိုးကို ရွေးနုတ်တော်မူပြီ။ သူ့ထက်အားကြီးသော သူ၏လက်မှ ကယ်လွှတ်တော်မူပြီ။ 12ထိုကြောင့် အမျိုးသားတို့သည်လာ၍၊ ဇိအုန်တောင်ထိပ်၌ သီချင်းဆိုကြလိမ့်မည်။ ထာဝရဘုရားပြုတော်မူခြင်း ကျေးဇူးတည်းဟူသော ဆန်စပါး၊ စပျစ်ရည်၊ ဆီ၊ သိုးသငယ်၊ နွားသငယ်တို့ကိုရအံ့သောငှာ စည်းဝေးကြလိမ့်မည်။ သူတို့စိတ်ဝိညာဉ်သည် ရေလောင်းသော ဥယျာဉ်ကဲ့သို့ဖြစ်၍၊ နောက်တစ်ဖန် ညှိုးငယ်ခြင်း မရှိရ။ 13ထိုအခါ သမီးကညာသည် ကခုန်လျက်၊ လူပျို၊ လူအိုတို့နှင့်တကွ ပျော်မွေ့လိမ့်မည်။ သူတို့ ညည်းတွားခြင်းအရာ၌ ဝမ်းမြောက်ခြင်းကို ငါဖြစ်စေမည်။ သူတို့သည် ဝမ်းနည်းခြင်းကို ခံရသောနောက်၊ စိတ်သက်သာ၍ ရွှင်လန်းမည်အကြောင်းကို ငါပြုမည်။ 14ယဇ်ပုရောဟိတ်တို့ကိုလည်း ဆူဖြိုးသော အမဲသားနှင့် ဝစွာ ကျွေးမည်။ ငါ၏လူတို့သည်လည်း ငါ့ကျေးဇူးနှင့် ဝပြောကြလိမ့်မည်ဟု ထာဝရဘုရား မိန့်တော်မူ၏။

ဣသရေလတို့အပေါ်ထားရှိသည့်ကရုဏာ

15ထာဝရဘုရား မိန့်တော်မူသည်ကား၊ ရာမအရပ်၌ သည်းစွာသော ညည်းတွားငိုကြွေးခြင်းအသံကို ကြားရ၍၊ ရာခေလသည် မိမိသားတို့မရှိသောကြောင့်၊ ငို၍ စိတ်မပြေနိုင်။ 16ထာဝရဘုရား မိန့်တော်မူသည်ကား၊ သင်သည် ငိုကြွေးသံကို ချုပ်လော့၊ မျက်ရည်မကျစေနှင့်။ သင်သည် ကိုယ်ကျင့်သော အကျင့်၏ အကျိုးကိုခံရလိမ့်မည်။ သင်၏သားတို့သည် ရန်သူပြည်မှ ပြန်လာကြလိမ့်မည်။ 17သင်၏အဆုံး၌ မျှော်လင့်စရာအကြောင်းရှိ၏။ သင်၏သားတို့သည် နေရင်းပြည်သို့ ပြန်လာကြလိမ့်မည်ဟု ထာဝရဘုရား မိန့်တော်မူ၏။

18ဧဖရိမ်က၊ ကိုယ်တော်သည် အကျွန်ုပ်ကို ဆုံးမတော်မူပြီ။ အကျွန်ုပ်သည် ရိုင်းသောနွားလားကဲ့သို့ ဆုံးမခြင်းကို ခံရပါပြီ။ အကျွန်ုပ်ကို သွေးဆောင်တော်မူပါ။ သို့ပြုလျှင်၊ အကျွန်ုပ်သည် ပြန်လာပါမည်။ အို ထာဝရဘုရား၊ ကိုယ်တော်သည် အကျွန်ုပ်၏ ဘုရားသခင် ဖြစ်တော်မူ၏။ 19ပြန်လာသောနောက်၊ အကျွန်ုပ်သည် အမှန်နောင်တရပါ၏။ ဆုံးမတော်မူခြင်းကို ခံရသောနောက်၊ အကျွန်ုပ်သည် ကိုယ်ပေါင်ကို ရိုက်ပါ၏။ အသက်ငယ်စဉ် ပြုမိသောအပြစ်ကြောင့် အသရေပျက်ခြင်းကို ခံရသဖြင့်၊ ရှက်ကြောက်၍ မှိုင်တွေလျက်ရှိပါ၏ဟု ကိုယ်ကို အပြစ်တင်၍ မြည်တမ်းသောစကားကို ငါသည် ဆက်ဆက်ကြားရပြီ။ 20ဧဖရိမ်သည် ငါ၏ချစ်သားဖြစ်သလော။ ချစ်ဖွယ်သော သူငယ်ဖြစ်သလော။ သူ၏အကြောင်းကို ငါပြောလေရာရာ၌ ငါသည် အလွန်တရာ အောက်မေ့လျက်နေ၏။ ထိုကြောင့်၊ ငါသည် သူ့အတွက် စိတ်ကြင်နာခြင်းရှိ၏။ အကယ်စင်စစ် သူ့ကိုငါကယ်မသနားမည်ဟု ထာဝရဘုရားမိန့်တော်မူ၏။ 21လမ်း၌ မှတ်တိုင်တို့ကိုစိုက်လော့။ အလံတိုင်တို့ကို ထူလော့။ လိုက်သွားသောလမ်းမကို စိတ်စွဲလမ်းလော့။ အို ဣသရေလ သတို့သမီးကညာ၊ ပြန်လာလော့။ သင်၏နေရာ ဤမြို့များသို့ ပြန်လာလော့။ 22အို ဖောက်ပြန်သော သတို့သမီး၊ သင်သည် အဘယ်မျှကာလပတ်လုံး လှည့်လည်၍ နေလိမ့်မည်နည်း။ ထာဝရဘုရားသည် မြေကြီးပေါ်မှာ ထူးဆန်းသောအမှုကို စီရင်တော်မူ၍၊ မိန်းမသည် ယောက်ျားကို ပတ်ဝိုင်းလိမ့်မည်။

23ဣသရေလအမျိုး၏ ဘုရားသခင်၊ ကောင်းကင်ဗိုလ်ခြေအရှင် ထာဝရဘုရားမိန့်တော်မူသည်ကား၊ သိမ်းသွားခြင်းကို ခံရသောသူတို့ကို ငါဆောင်ခဲ့ပြန်သောအခါ၊ ယုဒပြည်၏မြို့ရွာတို့၌ နေသောသူတို့က၊ အို ဖြောင့်မတ်ခြင်း နေရာအရပ်၊ အို သန့်ရှင်းခြင်းနေရာတောင်၊ ထာဝရဘုရားသည် သင့်ကိုကောင်းချီးပေးတော်မူစေသတည်း ဟူသောစကားကို တစ်ဖန် သုံးကြလိမ့်မည်။ 24ထိုအရပ်၌ ယုဒပြည်သူ၊ ယုဒမြို့ရွာသား အပေါင်းတို့သည်၊ လယ်လုပ်သောသူနှင့် သိုးထိန်းသောသူများ ပါလျက်၊ အတူနေရကြလိမ့်မည်။ 25ငတ်မွတ်သော သူအပေါင်းတို့ကို ငါကျွေးမွေးမည်။ ညှိုးငယ်သောသူအပေါင်းတို့ကို ငါသက်သာစေမည်ဟု မိန့်တော်မူ၏။ 26ထိုနောက်၊ ငါသည် နိုး၍ကြည့်ရှုသောအခါ၊ အိပ်ပျော်ခြင်းအားဖြင့် အားရလျက်ရှိ၏။

ပဋိညာဉ်တရားသစ်

27ထာဝရဘုရား မိန့်တော်မူသည်ကား၊ ငါသည် ဣသရေလပြည်၊ ယုဒပြည်၌ လူမျိုးစေ့နှင့် တိရစ္ဆာန်မျိုးစေ့ကို ကြဲရသော အချိန်ကာလရောက်လိမ့်မည်။ 28ငါသည် သူတို့ကို နုတ်ပယ်ဖြိုချ မှောက်လှန်ဖျက်ဆီး ညှဉ်းဆဲခြင်းအမှုကို ပြုဖူးသည်နည်းတူ၊ တစ်ဖန် တည်ဆောက် စိုက်ပျိုးခြင်းအမှုကို ပြုဦးမည်ဟု မိန့်တော်မူ၏။ 29ထိုကာလ၌ အဘသည် ချဉ်သောစပျစ်သီးကို စားသောကြောင့်၊ သားသည် သွားကျိန်းခြင်းကို ခံရ၏ဟု မဆိုရကြ။ 30လူတိုင်း မိမိအပြစ်ကြောင့် မိမိသေရမည်။ ချဉ်သောစပျစ်သီးကို စားသောသူတိုင်း သွားကျိန်းခြင်းကိုခံရမည်။

31ထာဝရဘုရား မိန့်တော်မူသည်ကား၊ ငါသည် 32ဤလူမျိုး၏ ဘိုးဘေးတို့ကိုလက်ဆွဲ၍ အဲဂုတ္တုပြည်မှ ဆောင်သွားသောအခါ၊ သူတို့၌ ငါပေးသောပဋိညာဉ်တရားနှင့် ခြားနားသော ပဋိညာဉ်တရားသစ်ကို ဣသရေလ အမျိုးသား၊ ယုဒအမျိုးသားတို့၌ ငါပေးသော အချိန်ကာလရောက်လိမ့်မည်။ အရင်ငါပေးဖူးသော ပဋိညာဉ်တရားကို သူတို့သည်ဖျက်၍၊ ငါသည်လည်း သူတို့ကို ရွံရှာ၏။ 33နောင်ကာလအခါ ဣသရေလအမျိုးသားတို့၌ ငါပေးအံ့သော ပဋိညာဉ်တရားဟူမူကား၊ ငါထာဝရဘုရားသည် ငါ၏ပညတ်တရားကို သူတို့အတွင်းထဲသို့ သွင်းမည်။ သူတို့နှလုံးပေါ်မှာ ရေးထားမည်။ ငါသည် သူတို့၏ဘုရားဖြစ်မည်။ သူတို့သည်လည်း ငါ၏လူ ဖြစ်ကြလိမ့်မည်။ 34ထိုသူတို့က၊ ထာဝရဘုရားကို သိလော့ဟု၊ အမျိုးသားချင်း၊ ညီအစ်ကိုအချင်းချင်း တစ်ယောက်ကို တစ်ယောက် ဆုံးမဩဝါဒမပေးရကြ။ အကြောင်းမူကား၊ အငယ်ဆုံးသောသူမှစ၍ အကြီးဆုံးသောသူတိုင်အောင်၊ ထိုသူအပေါင်းတို့သည် ငါ့ကိုသိကြလိမ့်မည်။ ထိုအခါ ငါသည် သူတို့အပြစ်များကို သည်းခံမည်။ သူတို့ပြုသောဒုစရိုက်များကို မအောက်မေ့ဘဲနေမည်ဟု ထာဝရဘုရားမိန့်တော်မူ၏။ 35နေ့အချိန်၌ လင်းစရာဖို့ နေကိုခန့်ထား၍၊ ညအချိန်၌ လင်းစရာဖို့ လနှင့်ကြယ်တို့ကို စီရင်တော်မူထသော၊ သမုဒ္ဒရာကိုဆုံးမ၍ လှိုင်းတံပိုးကို ဟုန်းစေတော်မူထသော၊ ကောင်းကင်ဗိုလ်ခြေအရှင် ထာဝရဘုရားဟူသောဘွဲ့နာမရှိတော်မူသော ထာဝရဘုရား မိန့်တော်မူသည်ကား၊ 36ထိုတရားတို့သည် ငါ့ရှေ့မှာကွယ်ပျောက်လျှင်၊ ဣသရေလအမျိုးသည် ငါ့ရှေ့မှာ အမျိုးတိမ်မြုပ်၍ အစဉ် ကွယ်ပျောက်လိမ့်မည်ဟု မိန့်တော်မူ၏။ 37တစ်ဖန် ထာဝရဘုရား မိန့်တော်မူသည်ကား၊ အထက်မိုးကောင်းကင်ကို တိုင်းထွာနိုင်လျှင်လည်းကောင်း၊ မြေကြီးအောက်ဆုံး အမြစ်တို့ကိုလိုက်၍ စစ်နိုင်လျှင်လည်းကောင်း၊ ဣသရေလအမျိုးသားအပေါင်းတို့ကို သူတို့ပြုမိသမျှသော အပြစ်တို့ကြောင့် ငါစွန့်ပစ်မည်ဟု မိန့်တော်မူ၏။

38တစ်ဖန် ထာဝရဘုရား မိန့်တော်မူသည်ကား၊ ဟာနနေလရဲတိုက်မှစ၍ မြို့ထောင့်တံခါးတိုင်အောင်၊ မြို့တော်ကို ထာဝရဘုရားအဖို့ တည်ထောင်ရသော အချိန်ကာလသည် ရောက်လိမ့်မည်။ 39ဂါရက်တောင်ကိုလွန်၍ မျဉ်းကြိုးနှင့် တန်းချလိမ့်မည်။ ဂေါသတောင်ကိုလည်း ဝိုင်းမိလိမ့်မည်။ 40အရှေ့ဘက်မြင်းတံခါးရှိသော မြို့ထောင့်တိုင်အောင်၊ အသေကောင်များ၊ ပြာများစွန့်ပစ်ရာချိုင့် တစ်လျှောက်လုံးနှင့်၊ ကေဒြုန်ချောင်းအတွင်းတွင်၊ လယ်ပြင်ရှိသမျှတို့သည် ထာဝရဘုရားအဖို့ သန့်ရှင်းကြလိမ့်မည်။ နောက်တစ်ဖန် နုတ်ပယ်ဖြိုချခြင်း အလျှင်းမရှိရဟု မိန့်တော်မူ၏။

ယေရမိအနာဂတ္တိကျမ်း - ၃၁ (အနက်ဖွင့်)

(ခ) နိုင်ငံတော် ပြန်လည်ထူထောင်ခြင်း(၃၁:၁–၃၀)

၃၁:၁–၂၀ ဣသရေလမြောက်ပိုင်းသားများ ပြန်လည်စုစည်းကြမည့် အကြောင်းအားရ ကြည်နူးဖွယ်ရာ ရေးထားသည်။ ကမ္ဘာအနှံ့အပြားရှိ ဣသရေလလူမျိုးများ ပြန်လည်စုစည်းလာကြမည်။ အလွမ်းအဆွေး မျက်ရည်များ ခမ်းခြောက်၍ ပျော်ရွှင်ခြင်းသီချင်း ဆိုကြမည်။ ရာခေလ၏ မျက်ရည်သည် ဣသရေလသားများ သုံ့ပန်းအဖြစ် ဖမ်းဆီးခေါ်ဆောင်ကြသောကြောင့် ငိုကြောရှည်သည်။ ဣသရေလများ နောင်တရကြ၍ ဘုရားသခင်က အပြစ်ခွင့်လွှတ်သောအခခါ ထိုမျက်ရည်သည်လည်း ခမ်းခြောက်မည်။ အပိုဒ်(၁၅)ကို မ၂:၁၈တွင် ပါရှိသည့် ဟေရုဒ်မင်းက သားယောက်ျားများ အစုလိုက်အပြုံလိုက် သတ်ဖြတ်စဉ် သားသည် မိခင်များ၏မျက်ရည်ကျခြင်းနှင့် ဆက်စပ်ခိုင်းနှိုင်းထားသည်။ ထိုအကြောင်းကို KELLY ကဤသို့ ဆက်စပ်ရှင်းပြသည်။

သန့်ရှင်းဝိညာဉ်တော် ဖော်ပြခြင်းဖြင့် ထိုကျမ်းနှစ်ပိုဒ် ဆက်စပ်မိသည်။ အလွန်ကြေကွဲဝမ်းနည်းဖွယ်ရာ ဖြစ်ခဲ့သော်လည်း ယခုအချိန်တွင် ဝမ်းနည်းစရာ မရှိတော့ပါ။ တော်ဝင်မင်းသား နွားတင်းကုပ်တွင် မွေးဖွားခြင်းသည်လည်း ဝမ်းနည်းစရာ ဖြစ်ပါသည်။ ထိုသို့ မွေးဖွားခြင်းသည်လည်း ဝမ်းနည်းစရာ ဖြစ်ပါသည်။ ထိုသို့မွေးဖွားခြင်းသည် နာကျင်ဆူးရှခဲ့သော်လည်း ကြည့်တတ်လျှင် အဘက်တွင် အကြီးမြတ်ဆုံးသော ပျော်ရွှင်ခြင်း ဖြစ်သည်။ မေရှိယသခင် ဖွားမြင်တော်မူခြင်းသည် ဣသရေလမြေ ကမ္ဘာမိုးမြေတစ်ခုလုံးအား လှန့်နိုးသည့်အချက်ပေးခေါင်းလောင်းသံ ဖြစ်သည်။ ဘုရားသခင်၏ ဇာတိတော်ကို ယုံကြည်ခြင်း ရှိလျှင် အမှန်တကယ် ကောင်းကြီး ခံစားကြမည်။ သို့သော် မယုံကြည်ကြ။ ထိုသို့ မယုံကြည်သည့်အပြင် အရှက်တကွဲ အကျိုးနည်းစေကြသည်။ ဧဒုံသားကို ပလ္လင်တင်ကြသည်။ ထိုအချိန်မှ စ၍ တိုင်းပြည် မငြိမ်မသက်ဖြစ်သည်။ ဆိုးသွမ်း ယုတ်ညစ်သည်။ မိခင် ရာခေလမျက်ရည်ကျသည်။ အဘယ်သူမျှ ချောမောနှစ်သိမ့်သူမရှိ။ သို့ကြောင့် ပထမပိုင်းကျမ်းကို သန့်ရှင်းဝိညာဉ်တော်က ရှင်မဿဲခရစ်ဝင်ကျမ်းတွင် ပြန်လည်ဖော်ပြထားသည်။၃၄

၃၁:၂၁–၂၂ နောင်တရ၍ ပြန်လာကြမည့် ဣသရေလများအတွက် အပြန်လမ်း တလျှောက်တွင် အမှတ်အသားတိုင်လုံးကြီးများနှင့် သင်္ကေတလက္ခဏာများ ပြထားသည်။ မယုံကြည်သော မှောင်မိုက်နေ့ရက်များ ကျော်လွန်ပြီးမြောက်သွားပြီ။ ဘုရားသခင်က ပတ်ဝန်းကျင်အသစ် ပြုပြင်ပေးထားသည်။ အမျိုးသမီး ကအမျိုးသားကို ပိုးပန်းမည်။ ဤနေရာတွင် အမျိုးသမီးသည် ဣသရေလဖြစ်၍ အမျိုးသားသည် ယေဟောဝါဘုရား ဖြစ်သည်။ ထိုအကြောင်းက WILLIAM က “ဣသရေလ ပျိုကညာသည် ရုပ်တုဆင်းတုနောက်သို့ လင်ရှာခြင်း ရပ်စဲ၍ ဧမာနွေဘုရား ရင်ခွင်သို့ ချဉ်းဝင်မည်၃၅ ဟု ဆိုသည်။

ORTHODOX အယူအဆရှိသော KELLY က အပိုဒ်ငယ်(၂၂) အကြောင်းကို ဤသို့ ရှင်းပြထားသည်။

ဤကျမ်းပိုဒ်ကို ပျိုကညာ မာရီက သခင်ဘုရား မွေးဖွားခြင်းအကြောင်း ကျမ်းပိုဒ်အဖြစ် အချို့ဖခင်ကြီးများနှင့် ဒေသနာရှင်များက ကိုးကားကြသည်။ ဤပရောဖက်ပြုချက်သည် အသေးငယ်ဆုံးသော ကျမ်းချက် မဟုတ်ပါ။ အမျိုးသမီးက အမျိုးသား ပိုးပန်းခြင်းနှင့် ပျိုကညာက သားမွေးဖွားခြင်းသည် အကြောင်းအရာအားလုံး မတူညီပါ။ အမျိုးသားက အမျိုးသမီးပိုးပန်းခြင်းဖြင့် ကလေးရခြင်းသည် လုံလောက်သောအဖြေဟု မဆိုနိုင်ပါ။၃၆

၃၁:၂၃–၃၀ ယုဒများပြန်လည်စုစည်းပြီးမြို့ပြပြည်ရွာပြန်လည်ထူထောင် ကြမည်။ ထိုအခိုက်တွင်ယေရမိသည် နှစ်နှစ်ခြိုက်ခြိုက် အိပ်ပျော်ရာမှ နိုးထသူ ပမာ အားအင်ပြည့်ဝ ရွှင်လန်းသည်။ ယုဒနှင့် ဣသရေလလူမျိုးများ ပြန်လည် ကောင်းစားကြမည်။ လူများသည် မိမိတို့ ပြုကျင့်သည့်အကျင့်စရိုက်အတိုင်း အရေးယူအပြစ်ပေးခြင်း ခံကြမည်။ သို့သော် မိဘဘိုးဘွားများ၏ အပြစ်မွေ မပါ။

(ဂ) ပဋိညာဉ်သစ်ဖွင့်ပြခြင်း(၃၁:၃၁–၄၀)

ပညတ်တရားဖြင့် မဟုတ်၊ ကျေးဖူးတော်တရားဖြင့် ဣသရေလနှင့် ယုဒလူများသို့ ဘုရားသခင် ကပဋိညာဉ်သစ် ပြုမည့်နေ့ရက်သည် တစ်နေ့ပြီးတစ်နေ့ နီးသထက် နီးလာသည်။ လူများသည် အသစ်သောသတ္တဝါ ဖြစ်ကြသောကြောင့် ကမ္ဘာမိုးမြေအရှင်သခင် ဘုရားရှင်ကို သိကျွမ်းရှိခိုးကြမည် (ဟေဗြဲ၈:၈-၁၃၊ ၁၀:၁၅-၁၇ကို ကြည့်)။

ဣသရေလနှင့် ယုဒလူများအား ဘုရားသခင်က ပဋိညာဉ်သစ် ပြုမည် (ငယ်၃၁)။ ချို့ယွင်းချက် ရှိသော မောရှေပညတ်ကျမ်းကဲ့သို့ မဟုတ်။ ဘုရားသခင် လုပ်ဆောင်မည့်အချက် လူ့ဝတ္တရားများကို အသားပေးထားသည်။ အပိုဒ်ငယ် (၃၃)နှင့်(၃၄)တွင် “ငါလုပ်မည်” ဟု ဆိုသည်။ ယေရှုခရစ်တော်သည် ပဋိညာဉ်သစ် ဖော်ဆောင်သူ ဖြစ်သည်။ အဘယ်ကြောင့်ဆိုသော် ခရစ်တော်အားဖြင့် ကောင်းကြီးမင်္ဂလာ ခံစားကြ၍ ဘဝလုံခြုံရေးလည်း ရရှိကြသည်။ (ဟေဗြဲ၉:၁၅)။ ထိုပဋိညာဉ်သစ်ကို အသွေးတော်ဖြင့် ရေးသားထားသည်(လု ၁၂:၂၀)။ သို့သော် ခရစ်တော်ဘုရား ဒုတိယအကြိမ် မကြွရောက်လာမချင်း ဣသရေလလူမျိုး အတွက် အကျိုးသက်ရောက်မှု ရှိသည်။ ဥပမာအားဖြင့် နာခံခြင်းသည် ပညတ်တရားကြောင့် မဟုတ်၊ ကျေးဇူးတော်ကြောင့် ဖြစ်သည်။ ဘုရားသခင်သည် ထိုသူများ၏ ဘုရားသခင်ဖြစ်သကဲ့သို့ ထိုသူများသည်လည်း ဘုရားသခင်၏ လူများ ဖြစ်ကြသည်။ ထိုသူများ၏ အပြစ်ဒုစရိုက် ဆိုးဝါးမှုများကို ဘုရားသခင်က အမှတ်မထား အကုန်ခဝါချသည်။ အနှစ်တစ်ထောင်ကာလ ရောက်သောအခါ ဝေနေယျသတ္တဝါအပေါင်းက ဘုရားသခင်သည် စကြာဝဠာ မိုးမြေဘုရား ဖြစ်ကြောင်း သိရှိကြမည်။ (ငယ်၃၄)

ဣသရေလလူမျိုး လူ့လောကမှ ပျောက်ကွယ်မည့်အကြောင်းကို အပိုဒ်ငယ် (၃၅၊၃၆) တွင် ရှင်းပြထားသည်။ နေကြယ်လနှင့် ပင်လယ်သမုဒ္ဒရာများ ပျောက်ကွယ်လျှင် ဣသရေလလူမျိုးများသည်လည်း လူမြင်ကွင်းမှ ပျောက်ကွယ်သွားမည်။ ယခုကာလတွင် ပတ်ဝန်းကျင် မသန့်ရှင်းသောကြောင့် နောင်အနာဂတ်တွင် သန့်ရှင်းစင်ကြယ်သောဘုရားသခင်အဖို့ ယေရုရှလင်မြို့လည်း ပြန်လည်တည်ဆောက်ကြရမည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။