Jeremiah -30 -

ယေရမိအနာဂတ္တိကျမ်း - ၃၀

ထာဝရဘုရား၏ကတိတော်များ

1ထာဝရဘုရား၏နှုတ်ကပတ်တော်သည် ယေရမိသို့ ရောက်လာ၍၊ 2ဣသရေလအမျိုး၏ ဘုရားသခင် ထာဝရဘုရားမိန့်တော်မူသည်ကား၊ သင့်အား ငါပြောသမျှသော စကားတို့ကို ရေးထားလော့။ 3ထာဝရဘုရား မိန့်တော်မူသည်ကား၊ ယခု သိမ်းသွားခြင်းကိုခံရသော ငါ၏လူ ဣသရေလအမျိုးနှင့် ယုဒအမျိုးသားတို့ကို ငါဆောင်ခဲ့ရသော အချိန်ကာလသည် ရောက်လိမ့်မည်။ သူတို့ဘိုးဘေးတို့အား ငါပေးသောပြည်သို့ ငါပြန်လာစေသဖြင့်၊ သူတို့သည် ပိုင်ရကြလိမ့်မည်ဟု မိန့်တော်မူ၏။

4ဣသရေလအမျိုးနှင့် ယုဒအမျိုးကို ရည်မှတ်၍ ထာဝရဘုရားမိန့်တော်မူသောစကားဟူမူကား၊ 5ငါသည် ထိတ်လန့်ခြင်းစကားသံကို ကြားရ၏။ ငြိမ်သက်ခြင်းမရှိ။ ကြောက်ရွံ့ဖွယ်သော အကြောင်းသာ ရှိ၏။ 6ယောက်ျားသည် သားဖွားတတ်သလောဟု မေးမြန်းကြည့်ရှုကြလော့။ မိန်းမသည် သားဖွားခြင်း ဝေဒနာကိုခံရသောအခါ၊ မိမိခါး၌ လက်တင်သကဲ့သို့ ယောက်ျားတိုင်းပြု၍၊ ခပ်သိမ်းသောသူတို့သည် မျက်နှာပျက်လျက် ရှိကြသည်ကို အဘယ်ကြောင့် ငါမြင်ရသနည်း။ 7အလိုလေး၊ ထိုနေ့ရက်ကား ခိုင်းနှိုင်းစရာမရှိ။ ကြီးသောနေ့ရက်ဖြစ်၏။ ယာကုပ်အမျိုး၌ အမှုရောက်သော နေ့ရက်ဖြစ်၏။ သို့ရာတွင်၊ သူတို့သည် ကယ်တင်ခြင်းသို့ ရောက်ကြလိမ့်မည်။ 8ကောင်းကင်ဗိုလ်ခြေအရှင် ထာဝရဘုရားမိန့်တော်မူသည်ကား၊ ထိုနေ့ရက်၌ သူတို့ထမ်းရသော ထမ်းပိုးကို သူတို့လည်ပင်းမှ ငါချိုးပယ်မည်။ သူတို့ကို ချည်နှောင်သော ကြိုးများကို ငါဖြတ်မည်။ တစ်ပါးအမျိုးသားတို့သည် နောက်တစ်ဖန် သူတို့ကို မစေစားရကြ။ 9သူတို့သည် မိမိတို့ဘုရားသခင် ထာဝရဘုရား၏အမှုကိုလည်းကောင်း၊ သူတို့အဖို့ ငါပေါ်ထွန်းစေလတ္တံ့သော ရှင်ဘုရင်ဒါဝိဒ်၏ အမှုကိုလည်းကောင်း ဆောင်ရွက်ရကြမည်။

10သို့ဖြစ်၍၊ ထာဝရဘုရားမိန့်တော်မူသည်ကား၊ အို ငါ့ကျွန်ယာကုပ်၊ မကြောက်နှင့်။ အို ဣသရေလအမျိုး၊ စိတ်မပျက်နှင့်။ သင့်ကို ဝေးသောအရပ်မှလည်းကောင်း၊ သင်၏အမျိုးသားတို့ကို သိမ်းသွားရာ ပြည်မှလည်းကောင်း၊ ငါနုတ်ယူဆောင်ခဲ့သဖြင့်၊ ယာကုပ်အမျိုးသည် ပြန်လာ၍၊ ခြောက်လှန့်သောသူမရှိ၊ ငြိမ်ဝပ်ချမ်းသာစွာ နေရလိမ့်မည်ဟု မိန့်တော်မူ၏။ 11တစ်ဖန် မိန့်တော်မူသည်ကား၊ သင့်ကို ကယ်တင်ခြင်းငှာ သင်နှင့်အတူငါရှိ၏။ ငါသည် သင့်ကို ငါကွဲပြားစေသော တိုင်းနိုင်ငံရှိသမျှတို့ကို ဆုံးစေသော်လည်း၊ သင့်ကိုမဆုံးစေ။ သို့ရာတွင်၊ အပြစ်ကို ရှင်းရှင်းမလွှတ်ဘဲ၊ အတော်အတန်ဆုံးမမည်။ 12ထာဝရဘုရားမိန့်တော်မူသည်ကား၊ သင့်အနာသည် ပျောက်ခဲ၏။ သင်ခံရသောဝေဒနာသည် ပြင်းလှ၏။ 13သင့်အနာကိုစည်းအံ့သောငှာ အဘယ်သူမျှ သင့်အမှုကိုမစောင့်။ အနာပျောက်စေနိုင်သော ဆေးကို အဘယ်သူမျှမကု။ 14သင်၏မိတ်ဆွေရှိသမျှတို့သည် သင့်ကို မေ့လျော့၍ မမေးမရှာဘဲ နေကြ၏။ သင့်အပြစ်သည်ကြီး၍၊ သင်ပြုသော ဒုစရိုက်သည် များပြားသောကြောင့်၊ ရန်သူပေးတတ်သောအနာနှင့် သင့်ကို ငါနာစေပြီ။ ကြမ်းတမ်းသောသူ ပေးတတ်သောဒဏ်ကို ငါပေးပြီ။ 15သင်သည် အနာကိုခံရသည်ဖြစ်၍၊ အဘယ်ကြောင့် ငိုကြွေးသနည်း။ သင်၏အပြစ်ကြီးသောကြောင့်၊ သင်ခံရသောဝေဒနာသည် ပျောက်ခဲ၏။ သင်ပြုသောဒုစရိုက် များပြားသောကြောင့်၊ ဤသို့ငါဆုံးမရ၏။ 16သို့ရာတွင်၊ သင့်ကို ကိုက်စားသောသူအပေါင်းတို့သည် ကိုက်စားခြင်း၊ သင်၏ရန်သူအပေါင်းတို့သည် သိမ်းသွားခြင်း၊ သင့်ကို လုယူဖျက်ဆီးသော သူအပေါင်းတို့သည် လုယူဖျက်ဆီးခြင်းကို ခံရကြမည်။ 17ထာဝရဘုရား မိန့်တော်မူသည်ကား၊ သူတစ်ပါးတို့က၊ သင်သည် စွန့်ပစ်ခြင်းကို ခံရသောသူဟူ၍လည်းကောင်း၊ အဘယ်သူမျှ မကြည့်ရှု မပြုစုသော ဇိအုန်မြို့ဟူ၍လည်းကောင်းခေါ်သော်လည်း၊ သင်၏အနာရောဂါများကိုငါပျောက်စေ၍၊ ကျန်းမာပကတိ ဖြစ်စေမည်။

18ထာဝရဘုရား မိန့်တော်မူသည်ကား၊ သိမ်းသွားခြင်းကိုခံရသော ယာကုပ်အမျိုးသားတို့၏တဲများကို ငါဆောင်ခဲ့ဦးမည်။ သူတို့အိမ်များကိုသနားဦးမည်။ မြို့သည်လည်း၊ မိမိကုန်းပေါ်မှာ တစ်ဖန်တည်လျက်ရှိလိမ့်မည်။ နန်းတော်၌လည်း၊ ရှေးထုံးစံအတိုင်း နေကြလိမ့်မည်။ 19ထိုသူတို့အထဲက ကျေးဇူးကိုချီးမွမ်းခြင်းအသံ၊ ရွှင်မြူးသောသူတို့၏အသံသည် ထွက်လိမ့်မည်။ ငါသည် သူတို့ကို မနည်းစေဘဲ များပြားစေမည်။ နှိမ့်ချခြင်းသို့ မရောက်၊ ချီးမြှောက်ခြင်းသို့ ရောက်စေမည်အကြောင်း စီရင်မည်။ 20အမျိုးသားတို့သည် အရင်ကဲ့သို့ဖြစ်၍၊ ပရိသတ်တို့သည် ငါ့ရှေ့မှာ တည်ကြလိမ့်မည်။ ညှဉ်းဆဲသော သူအပေါင်းတို့ကို ငါသည် အပြစ်ပေးမည်။ 21သူတို့၏မင်းသည် သူတို့အမျိုး ဖြစ်လိမ့်မည်။ သူတို့အထဲက ပေါ်ထွန်းသောသူသည် သူတို့ကို အုပ်စိုးရလိမ့်မည်။ ငါသွေးဆောင်၍ သူတို့သည် ငါ့ထံသို့ ချဉ်းကပ်ကြလိမ့်မည်။ ငါ့ထံသို့ ချဉ်းကပ်လိုသောငှာ၊ အဘယ်သူသည် မိမိစိတ်ကိုတန်းစေသနည်း။ 22ထိုအခါ သင်တို့သည် ငါ၏လူဖြစ်၍၊ ငါသည်လည်း သင်တို့၏ဘုရားသခင်ဖြစ်မည်ဟု ထာဝရဘုရား မိန့်တော်မူ၏။ 23ထာဝရဘုရား၏ လေပွေတော်သည် ပူသောအရှိန်နှင့် ထွက်၏။ ပြင်းစွာသောလေပွေဖြစ်၍၊ မတရားသော သူတို့ခေါင်းပေါ်မှာ ပြင်းစွာတိုက်လိမ့်မည်။ 24ထာဝရဘုရားသည် လက်စသတ်၍၊ အကြံအစည်တော်ကို ပြည့်စုံစေတော်မမူမီ၊ ပြင်းစွာသော အမျက်တော်မငြိမ်းရ။ နောင်ကာလ၌ သင်တို့သည် နားလည်ကြလိမ့်မည်။

ယေရမိအနာဂတ္တိကျမ်း - ၃၀ (အနက်ဖွင့်)

၆။ ပြန်လည်စုစည်း ထူထောင်မည့်အကြောင်း ပရောဖက်ပြုချက် (အခန်း၃၀)

အခန်း၃၀–၃၃ တွင်ရွေးနှုတ်ခြင်းနှင့် မျှော်လင့်ချက် ရောင်ခြည် သန်းလာမည့်အကြောင်း ရေးထားသည်။ CLYDE T.FRANCISO က ဤသို့သရုပ်ဖော်ထားသည်။

ယေရမိအနာဂတ္တိကျမ်းတွင် ဤမျှ စိတ်လှုပ်ရှားဖွယ်ရာ ကောင်းသောအခန်း မပါရှိခဲ့ပါ။ ငိုခြင်း၊ ဝမ်းနည်းခြင်း၊ တရားစီရင်ခြင်းများဖြင့် ပြည့်နှက်ခဲ့သော်လည်း အနာဂတ်မျှော်လင့်ချက်ရောင်ခြည် ပေးနိုင်သည်။ ယေရမိ၏ စိတ်နှလုံး ပျော်ရွှင်မှုကို ဤအခန်းတွင် အကုန်အစင်သွန်းလောင်းထားသည်။၃၃

ဘမ်းဆီးခေါ်ဆောင်ခြင်းမှ လွတ်မြောက်လာခြင်းသည် ပရောဖက်ပြုချက် တချို့တဝက် ပြည့်စုံခြင်း ဖြစ်သည်။ ဤအခန်းများတွင် အနာဂတ်အဆုံးပိုင်းကာလနှင့် တစ်မျိုးသားလုံး ပြန်လည်စုစည်းကြမည့်အကြောင်း ရေးထားသည်။

ဣသရေလလူမျိုးများ ပြန်လည်စည်းလုံး နှိုးထကြရမည့်အကြောင်း ပရောဖက်ပြုချက်ဖြစ်၍ အရေးကြီးသော သင်ခန်းစာ ဖြစ်သည်။ ပေါ်လွင်ထင်ရှားလူ သိများသော ပဋိညာဉ်သစ်အကြောင်း ဖြစ်သည်။ ထိုအချိန်ကာလသည် “ယာကုပ်၏ ဘေးဒုက္ခ” ကာလ (ဘေးဒဏ်ကြီးကာလ နောက်ပိုင်း (၃၀:၄-၁၇) ဖြစ်သည်။ ဘုရားသခင်က အချို့ပဋိညာဉ်များကို ထိန်ဝှက်ထားသည်။ ပြန်လည် စုစည်းမည့် အကြောင်းကို ရည်ဆောင်၍ ယေရမိအား မြေတစ်ကွက် ဝယ်ခိုင်းထားသည်ကို သတိပြုပါ။

(က) သုံ့ပန်းများ ပြန်လည်စုစည်းခြင်း (အခန်း၃၀)

၃၀:၁–၁၁ ဣသရေလ နှင့်ယုဒလူမျိုးများ ပြန်လည်သင့်မြတ် ပေါင်းစည်းကြမည်။ ပထမဦးစွာ ယာကုပ်၏ ဘေးဒုက္ခ(ဘေးဒဏ်ကြီး)ကာလ ကျရောက်မည်။ ထိုအချိန်တွင် တပါးအမျိုးသားများ၏ ဘုန်းတန်ခိုး ကြီးထွားခြင်းကို ဘုရားရှင်က ရပ်စဲပစ်မည်။ ဒါဝိဒ်ဘုရင်သို့ ပြုထားသည့် ကတိတော် ပြည့်စုံမည်ဆိုသည်မှာ ဒါဝိဒ်မျိုးရိုးမှ ဆင်းသက်လာသော သခင်ယေရှု ပေါ်ထွန်းမည့်အကြောင်း ဖြစ်သည်။ အချို့ကမူ ဒါဝိဒ်ဘုရင် ပြန်လည်ထမြောက်လာကြမည်ဟု ယူဆကြသည်။

၃၀:၁၂–၁၇ တိုင်းသူပြည်သားလူများ၏ ဆင်းရဲဒုက္ခ ဝေဒနာများသည် ကုသ၍ မရောက်နိုင်။ သို့ကြောင့် ဒဏ်ရာဒဏ်ချက်များ ဘေးဒုက္ခများကို ဘုရားရှင်က အနာရောဂါ ပျောက်ကင်း ချုပ်ငြိမ်းစေမည်။

၃၀:၁၈–၂၄ ဤကျမ်းပိုဒ်များသည် အနှစ်တစ်ထောင်ကာလအတွင်း ချမ်းမြေ့ဖွယ် ကျေးလက်မြင်ကွင်း ဖြစ်သည်။ နောက်ဆုံးအပိုဒ်ငယ်(၂)ခုတွင် မကောင်းဆိုးဝါးများ အပြစ်စီရင်မည့်အကြောင်း ရေးသားထားသည်။ ထို့နောက် ရွေးကောက်ထားသော ဣသရေလလူမျိုး ကောင်းကြီးမင်္ဂလာ ခံစားကြမည့်အကြောင်း နောက်အခန်းတွင် ဆက်လက်ဖော်ပြထားသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။