Jeremiah -29 -

ယေရမိအနာဂတ္တိကျမ်း - ၂၉

ပြည်နှင်ဒဏ်ခံသူများထံပေးစာ

1ရှင်ဘုရင်ယေခေါနိနှင့်တကွ မိဖုရားအစရှိသော မိန်းမစိုးများ၊ ယုဒပြည် ယေရုရှလင်မြို့ မှူးတော်မတ်တော်များ၊ လက်သမား၊ ပန်းပဲသမားများတို့သည် ယေရုရှလင်မြို့မှ သွားသောနောက်၊ 2ယုဒရှင်ဘုရင် ဇေဒကိသည် ဗာဗုလုန်ရှင်ဘုရင် နေဗုခဒ်နေဇာထံ၊ ဗာဗုလုန်မြို့သို့ စေလွှတ်သော ရှာဖန်သားဧလာသာနှင့် ဟိလခိသား ဂေမရိတွင်၊ ပရောဖက်ယေရမိသည်စာရေး၍ ယေရုရှလင်မြို့မှ ဗာဗုလုန်မြို့သို့ နေဗုခဒ်နေဇာ သိမ်းသွားခြင်းကို ခံရသော အသက်ကြီးသူ၊ 3ယဇ်ပုရောဟိတ်၊ ပရောဖက်၊ ဆင်းရဲသား ကျန်ကြွင်းသမျှတို့နေရာသို့ ယေရုရှလင်မြို့မှ ပေးလိုက်သောစာဟူမူကား၊ 4ဣသရေလအမျိုး၏ ဘုရားသခင်၊ ကောင်းကင်ဗိုလ်ခြေအရှင် ထာဝရဘုရားသည် ယေရုရှလင်မြို့မှ ဗာဗုလုန်မြို့သို့ သိမ်းသွားစေတော်မူသော သူအပေါင်းတို့အားမိန့်တော်မူသည်ကား၊ 5အိမ်တို့ကိုဆောက်၍ နေရာချကြလော့။ 6ဥယျာဉ်တို့ကို စိုက်ပျိုး၍ အသီးကို စားကြလော့။ သင်တို့သည် ထိုပြည်၌ ခေါင်းပါးခြင်းမရှိ၊ တိုးပွားများပြားမည်အကြောင်း၊ မယားနှင့်နေ၍ သားသမီးကိုဖွားမြင်ကြလော့။ သားသမီးတို့ကိုလည်း၊ အချင်းချင်း တစ်ယောက်ကိုတစ်ယောက် ပေးစား၍၊ တစ်ဖန် သားသမီးကို ဖွားမြင်စေကြလော့။ 7ငါသည် သင်တို့ကို သိမ်းသွားစေသော မြို့သည်လည်း၊ ငြိမ်သက်ခြင်းရှိမည်အကြောင်းကို ပြုစု၍၊ ထိုမြို့အဖို့အလိုငှာ၊ ထာဝရဘုရားအား မေတ္တာပို့ကြလော့။ ထိုမြို့၏ငြိမ်သက်ခြင်းအားဖြင့်၊ သင်တို့သည်လည်း ငြိမ်သက်ခြင်း ရှိကြလိမ့်မည်။ 8ဣသရေလအမျိုး၏ဘုရားသခင်၊ ကောင်းကင်ဗိုလ်ခြေအရှင် ထာဝရဘုရား မိန့်တော်မူသည်ကား၊ သင်တို့တွင်ရှိသော ပရောဖက်ဆရာ၊ အနာဂတ်ဆရာတို့သည် သင်တို့ကို မလှည့်စားကြစေနှင့်။ သင်တို့မြင်စေသော အိပ်မက်တို့ကိုလည်း မယုံမမှတ်ကြနှင့်။ 9တစ်ဖန် မိန့်တော်မူသည်ကား၊ ထိုဆရာတို့သည် ငါစေလွှတ်သောသူ မဟုတ်ဘဲ၊ ငါ့နာမကို အမှီပြု၍ မုသားစကားကို ဟောပြောတတ်ကြ၏။ 10တစ်ဖန်မိန့်တော်မူသည်ကား၊ ဗာဗုလုန်မြို့၌ အနှစ်ခုနစ်ဆယ်စေ့သောအခါ၊ သင်တို့ကို ငါအကြည့်အရှု ကြွလာမည်။ ငါထားသော ကတိကောင်းကို တည်စေ၍၊ သင်တို့ကို ဤပြည်သို့ ငါပို့ဆောင်ဦးမည်။ 11တစ်ဖန် မိန့်တော်မူသည်ကား၊ ငါသည် သင်တို့ကို အကျိုးနည်းစေခြင်းငှာ ကြံစည်သောအကြံမဟုတ်ဘဲ၊ သင်တို့သည် မျှော်လင့်သောအကျိုးကိုရမည်အကြောင်း၊ ငြိမ်ဝပ်စေခြင်းငှာသာ၊ သင်တို့အဖို့ ကြံစည်သော အကြံတို့ကို ငါသိ၏။ 12တစ်ဖန် မိန့်တော်မူသည်ကား၊ သင်တို့သည် ငါ့ကိုခေါ်၍ သွားလာကြလိမ့်မည်။ ဆုတောင်းသောအခါ သင်တို့စကားကို ငါနားထောင်မည်။ 13ငါ့ကိုရှာသောအခါ စိတ်နှလုံးအကြွင်းမဲ့နှင့် ရှာလျှင် တွေ့ကြလိမ့်မည်။ 14ငါသည်လည်း၊ သင်တို့အတွေ့ကိုခံမည်။ အထက်က ငါနှင်ထုတ်၍ သင်တို့ခံရသော သိမ်းသွားခြင်းအမှုကို ငါသည်ဖြေရှင်းခြင်းငှာ၊ တိုင်းနိုင်ငံအရပ်ရပ်တို့မှ သင်တို့ကို ငါစုသိမ်းပြီးလျှင်၊ အထက်က ငါနှင်ထုတ်၍ သင်တို့ရှုံးသောပြည်သို့ တစ်ဖန် ငါဆောင်ခဲ့ဦးမည်ဟု ထာဝရဘုရားမိန့်တော်မူ၏။

15ထာဝရဘုရားသည် ငါတို့အဖို့ပရောဖက်များကို ဗာဗုလုန်မြို့၌ ပေါ်ထွန်းစေတော်မူပြီဟု သင်တို့ ဆိုကြသည်ဖြစ်၍၊ 16ဒါဝိဒ်၏ရာဇပလ္လင်ပေါ်မှာထိုင်သော ရှင်ဘုရင်မှစ၍၊ ဤမြို့၌ နေသောသူ အပေါင်းတည်းဟူသော၊ သင်တို့နှင့်အတူ သိမ်းသွားခြင်းကို မခံရသော သင်တို့ညီအစ်ကိုများကိုရည်မှတ်၍၊ 17ကောင်းကင်ဗိုလ်ခြေအရှင် ထာဝရဘုရား မိန့်တော်မူသည်ကား၊ သူတို့အပေါ်မှာ ဓားဘေး၊ မွတ်သိပ်ခြင်းဘေး၊ ကာလနာဘေးတို့ကို ငါစေလွှတ်မည်။ မစားနိုင်အောင် အလွန်ညံ့သောသင်္ဘောသဖန်းသီးကဲ့သို့ ငါဖြစ်စေမည်။ 18သူတို့ကို ဓားဘေး၊ မွတ်သိပ်ခြင်းဘေး၊ ကာလနာဘေးဖြင့် ငါညှဉ်းဆဲမည်။ ငါနှင်ရာအရပ်ရပ်တို့၌ လူအမျိုးမျိုးတို့တွင်၊ သူတို့သည် ကျိန်ဆဲရာ၊ အံ့ဖွယ်ရာ၊ ကဲ့ရဲ့သံကိုကြားရာ၊ အသရေရှုတ်ချရာဖြစ်မည်အကြောင်း၊ မြေပေါ်မှာ တိုင်းနိုင်ငံရှိသမျှတို့၏နှောင့်ယှက်ခြင်းသို့ သူတို့ကိုငါအပ်မည်ဟု ထာဝရဘုရား မိန့်တော်မူ၏။ 19အကြောင်းမူကား၊ ငါသည်စောစောထ၍၊ အထပ်ထပ်မှာထားစေလွှတ်သော ငါ၏ကျွန်ပရောဖက်တို့၏စကားကို သူတို့သည် နားမထောင်ကြဟု ထာဝရဘုရား မိန့်တော်မူ၏။ 20ထိုကြောင့် သိမ်းသွားခြင်းကိုခံရ၍၊ ယေရုရှလင်မြို့မှ ဗာဗုလုန်မြို့သို့ ငါစေလွှတ်သောသူအပေါင်းတို့၊ ထာဝရဘုရား၏စကားကို နားထောင်ကြလော့ဟု မိန့်တော်မူ၏။

21ဣသရေလအမျိုး၏ဘုရားသခင်၊ ကောင်းကင်ဗိုလ်ခြေအရှင် ထာဝရဘုရားမိန့်တော်မူသည်ကား၊ ငါ၏နာမကိုအမှီပြု၍ သင်တို့အား မုသားစကားကို ဟောပြောသော၊ ကောလာယသား အာဟပ်နှင့် မာသေယသား ဇေဒကိတို့ကို ဗာဗုလုန်ရှင်ဘုရင်နေဗုခဒ်နေဇာလက်သို့ ငါအပ်၍၊ ထိုမင်းသည် သူတို့ကို သင်တို့မျက်မှောက်၌ သတ်လိမ့်မည်။ 22ဗာဗုလုန်မြို့သို့ သိမ်းသွားခြင်းကို ခံရသော ယုဒအမျိုးသားအပေါင်းတို့က၊ ဗာဗုလုန်ရှင်ဘုရင်သည် မီးရှို့သောဇေဒကိနှင့် အာဟပ်ကဲ့သို့၊ ထာဝရဘုရားသည် သင့်ကိုဖြစ်စေတော်မူပါစေဟု ထိုသူတို့ကို ပုံဆောင်၍ ကျိန်ဆဲကြလိမ့်မည်။ 23အကြောင်းမူကား၊ သူတို့သည် ဣသရေလအမျိုး၌ အဓမ္မအမှုကို ပြုကြပြီ။ သူ့မယားတို့ကို ပြစ်မှားကြပြီ။ ငါမမှာထားဘဲ၊ ငါ၏နာမကို အမှီပြု၍ မုသားစကားကို ဟောပြောကြပြီ။ ငါသိသည်အတိုင်း သက်သေဖြစ်သည်ဟု ထာဝရဘုရား မိန့်တော်မူ၏။

ရှေမာယ၏စာ

24နဟေလံရွာသား ရှေမာယကိုလည်း ပြောရမည်မှာ 25ဣသရေလအမျိုး၏ဘုရားသခင်၊ ကောင်းကင်ဗိုလ်ခြေအရှင် ထာဝရဘုရားမိန့်တော်မူသည်ကား၊ သင်သည် ငါ၏နာမကိုအမှီပြု၍၊ ယဇ်ပုရောဟိတ်မာသေယသား ဇေဖနိအစရှိသော ယဇ်ပုရောဟိတ်များတို့နှင့် ယေရုရှလင်မြို့သားရှိသမျှတို့ကို စာပေးလိုက်၍၊ 26သင်သည် ဗိမာန်တော်၌ လူစောင့်ကိုခန့်ထားသဖြင့်၊ ပရောဖက်လုပ်သောအရူးရှိသမျှကို ထောင်ထဲမှာလှောင်၍ ထိတ်ခတ်စေခြင်းငှာ၊ ထာဝရဘုရားသည် ယဇ်ပုရောဟိတ်ယောယဒ၏ကိုယ်စား သင့်ကို ယဇ်ပုရောဟိတ်အရာ၌ ခန့်ထားတော်မူ၏။ 27သို့ဖြစ်၍၊ သင်တို့တွင် ပရောဖက်လုပ်သော အာနသုတ်ရွာသားယေရမိကို အဘယ်ကြောင့် မဆုံးမသနည်း။ 28သူကလည်း၊ ဤအမှု ကြာလိမ့်မည်။ အိမ်တို့ကိုဆောက်၍ နေရာချကြလော့။ ဥယျာဉ်တို့ကို စိုက်ပျိုး၍ အသီးကို စားကြလော့ဟု၊ ဗာဗုလုန်မြို့၌နေသော ငါတို့ကိုမှာလိုက်ပါပြီတကားဟု၊ 29ရှေမာယပေးလိုက်သောစာကို ယဇ်ပုရောဟိတ်ဇေဖနိသည် ပရောဖက်ယေရမိရှေ့မှာ ဖတ်လေ၏။ 30ထိုအခါ နဟေလံရွာသား ရှေမာယကိုရည်မှတ်၍၊ ထာဝရဘုရား မိန့်တော်မူသည်ကား၊ ငါမစေလွှတ်ဘဲ ရှေမာယသည် သင်တို့အား ပရောဖက်ပြု၍ မုသား၌ခိုလှုံစေသောကြောင့်၊ 31-32ထာဝရဘုရားမိန့်တော်မူသည်ကား၊ နဟေလံရွာသားရှေမာယနှင့် သူ၏အမျိုးကို ငါသည်ဒဏ်ပေးမည်။ ဤအမျိုးသားတို့တွင်၊ သူ၏ လူတစ်ယောက်မျှ နေရသောအခွင့် မရှိရ။ ထာဝရဘုရားမိန့်တော်မူသည်ကား၊ သူသည် ထာဝရဘုရားကို ပုန်ကန်စေခြင်းငှာ သွန်သင်သောကြောင့်၊ ငါ၏လူမျိုး၌ ငါပြုလတ္တံ့သော ကျေးဇူးကို သူသည်မမြင်ရဟု၊ သိမ်းသွားခြင်းကို ခံရသောသူအပေါင်းတို့ကို စာပေးလိုက်ရမည်အကြောင်း ထာဝရဘုရား၏နှုတ်ကပတ်တော်သည် ယေရမိသို့ ရောက်လာ၍ မှာထားတော်မူ၏။

ယေရမိအနာဂတ္တိကျမ်း - ၂၉ (အနက်ဖွင့်)

(ဆ) ဗာဗုလုန်ရှိမန်ယုဒများသို့ယေရမိစကား(အခန်း၂၉)

၂၉:၁–၉ ဤစကားသည် ဗာဗုလုန်ပြည်သို့ ကာလရှည်ကြာ ဖမ်းဆီးကျွန်ပြုခြင်း ခံရသောသူများ အားမိစ္ဆာပရောဖက်များနှင့် ဘုရားသခင်နာမတော် ဟုဆို၍ ရောက်လာကြသူများအား ဆန့်ကျင်သတိထားကြရန် ပရောဖက်ယေရမိ ရေးသားသောစာဖြစ်သည်။

၂၉:၁၀-၁၄ ဗာဗုလုန်သို့ ဖမ်းဆီးခေါ်ဆောင်ခြင်း ခံရသူများသည် နှစ်ပေါင်း(၇၀) ကြာသောအခါ မိမိတို့နေရပ် ဌာနေသို့ ပြန်ရောက်ကြမည်ဟု ဘုရားသခင်က ကတိတော်ပေးထားသည်။

အပိုဒ်ငယ်(၁၃) သည်ဘုရားသခင်အား ရှာဖွေသူများသို့ အားပေးစကား ဖြစ်သည်။ အောင်မြင်ခြင်း ရှာဖွေသူများသို့ သတ္တိသွေးထိုးပေးသည်။

ဘုရားသခင်၏ စကားသည် ထိုခေတ်ကာလ အပြစ်နွံထဲတွင် ရုန်းကန်သူများအတွက် အားဆေးတစ်ခွက် ဖြစ်သည်။ စိတ်ပျက်အားငယ်သည့် အချိန်တွင် အားပေးစကား၊ သတ္တိသွေးများသည် ရွှေထက် အဖိုးထိုက်တန်သည်။ အချိန်ဒေသမရွေး အသုံးတည့်သည်။ ကိုယ်တော် ပိုင်ဆိုင်သူတိုင်းသည် ကိုယ်တော်ကို ကြည့်ရင်း ဖြင့်အသက်ရှင်ကြသည်။ ဘုရားသခင်၏ လက်တော်များသည် အားနွဲ့သူများအား ကူညီဖို့ အစဉ်ဖွင့်ထားသည်။ အမှန်တကယ် လိုချင်သူများ သည်ရှာဖွေကြသောကြောင့် ရှာဖွေသည့်အတိုင်း ရရှိကြသည်။ ကြိုးစားပမ်းစားရှာဖွေသူသည် ဘုရားရှင်၏ လက်ဆောင် တွေ့ရှိကြသည်။ စိတ်နှလုံးအကြွင်းမဲ့ဖြင့် ရှာဖွေသူများသည် ဘုရားရှင်ကို အမှန်တကယ် တွေ့ရှိအောင် ပွဲဆင်ကြသည်။ ဘုရားသခင်သည် သူ့သားသမီးများကို စင်ကြယ်ခြင်း၊ ချမ်းမြေ့ခြင်း၊ ပျော်ရွှင်ခြင်း၊ အောင်မြင်ခြင်း ရရှိစေချင်သည်။ ထိုသို့ အောင်ပွဲဆင်ကြလျှင် ဘုရားသခင်လည်း ဝမ်းသာသည်။၃၂

၂၉:၁၅–၃၂ ဗာဗုလုန် ရောက်ရှိသူများအကြားမှ မိစ္ဆာပရောဖက်များက ယေရုရှလင်တွင် ကျန်ကြွင်းသောသူများသည် ဓါးဘေး၊ ငတ်ဘေးနှင့်ရောဂါ ဘယဆိုးများ ခံစားကြသည်ဟု သွားပုပ်လေလွင့် ဆိုကြသည်။ ဘုရားသခင်၏ နှုတ်ကပတ်တော် မနာခံငြင်းဆန်ကြသောကြောင့် ဒုက္ခခံစားကြသည် ဟုပြောင်းပြန် ဆိုကြသည်။ မိစ္ဆာပရောဖက်(၂)ပါး ကောလာယသား အာဟပ်နှင့် မာသေယသား ဇေဒကိတို့ ပေါ်ထွန်းခဲ့သည်။ ထို့အပြင်န ဟေလံရွာသား ရှေမာယကလည်း ယေရုရှလင် ယဇ်ပုရောဟိတ်များ တာဝန်မကျေသည့်အကြောင်း အပြစ်တင်စာများ ရေးသားသည်။ ပရောဖက်ယေရမိကိုလည်း ထောင်ချဖို့ တိုက်တွန်းသည်။ ယဇ်ပုရောဟိတ်ဇေဖနိက ထိုစာကို ယေရမိအား ဖတ်ပြသည်။ နောက်ကာလ မကြာမီရှေမာယ မိသားစုသည် အားလုံးသေကြေ မျိုးတုံးကြသည်။ ရှေမာယ ကိုယ်တိုင်လည်း ဖမ်းဆီးခြင်းကာလကို မမြင်လိုက်ရရှာ။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။