Jeremiah -2 -

ယေရမိအနာဂတ္တိကျမ်း - ၂

ဣသရေလတို့နောင်တရရန်

1တစ်ဖန် ထာဝရဘုရား၏ နှုတ်ကပတ်တော်သည် ငါ့ဆီသို့ရောက်၍၊ သင်သည် ယေရုရှလင်မြို့သို့ သွားပြီးလျှင်၊ 2အော်ဟစ်ရမည်အရာဟူမူကား၊ ထာဝရဘုရားက၊ လယ်မလုပ်သောတောအရပ်၌ သင်သည် ငါ့နောက်သို့ လိုက်သောအခါ၊ အသက်အရွယ်နုငယ်၍ ခံရသောကျေးဇူးကိုလည်းကောင်း၊ ထိမ်းမြားပေးစားခြင်းနှင့် ယှဉ်သော ချစ်ခြင်းမေတ္တာကိုလည်းကောင်း ငါအောက်မေ့၏။ 3ထိုအခါ ဣသရေလအမျိုးသည် ထာဝရဘုရားအဖို့ သန့်ရှင်း၏။ စီးပွားတော်အဖို့ အဦးသီးသော အသီးဖြစ်၏။ သူတို့ကို လုယူသောသူ အပေါင်းတို့သည် အပြစ်ရှိကြ၏။ ထိုသူတို့အပေါ်မှာ ဘေးဥပဒ်ရောက်ရသည်ဟု ထာဝရဘုရား မိန့်တော်မူ၏။

ဘိုးဘေးများလွန်ကျူးသည့်အပြစ်

4အို ယာကုပ်အမျိုးနှင့် ဣသရေလအမျိုးအနွယ်အပေါင်းတို့၊ ထာဝရဘုရား၏ နှုတ်ကပတ်တော်ကို နားထောင်ကြလော့။ 5ထာဝရဘုရား မိန့်တော်မူသည်ကား၊ သင်တို့၏ဘိုးဘေးတို့သည် ငါ့ထံမှဝေးစွာထွက်သွား၍၊ အနတ္တလမ်းသို့လိုက်လျက်၊ အနတ္တသက်သက် ဖြစ်ရမည်အကြောင်း၊ ငါ၌အဘယ်မည်သောအပြစ်ကို တွေ့ကြသနည်း။ 6သူတို့က၊ ငါတို့ကို အဲဂုတ္တုပြည်မှကယ်နုတ်၍၊ တောတစ်လျှောက်လုံး၊ လွင်ပြင်၊ မြေတွင်းနှင့် ပြည့်စုံသောပြည်၊ သွေ့ခြောက်၍ သေမင်းအရိပ် လွှမ်းမိုးသောပြည်၊ ခရီးသွားသောသူ၊ နေရာကျသောသူ မရှိသော ပြည်တစ်လျှောက်လုံးသို့ ပို့ဆောင်သော ထာဝရဘုရားသည် အဘယ်မှာရှိတော်မူသနည်းဟု မမေးကြ။ 7ဝပြောသောပြည်၏အသီးအနှံ ဆီဥဆီကြည်ကိုစားစေခြင်းငှာ သင်တို့ကို ငါဆောင်သွင်း၍၊ သင်တို့သည် ဝင်စားသောအခါ၊ ငါ့ပြည်ကို ညစ်ညူးစေ၍၊ ငါ၏အမွေကို ရွံရှာဖွယ်ဖြစ်စေကြသည်တကား။ 8ယဇ်ပုရောဟိတ်တို့က၊ ထာဝရဘုရားသည် အဘယ်မှာရှိတော်မူသနည်းဟု မမေးကြ။ ကျမ်းတတ်တို့သည် ငါ့ကိုမသိကြ။ သင်းအုပ်တို့ သည် ငါ့ကိုပြစ်မှားကြ၏။ ပရောဖက်တို့သည် ဗာလကိုအမှီပြု၍ ဟောပြောလျက်၊ ကျေးဇူးမဲ့သောလမ်းသို့ လိုက်ကြ၏။

လူမျိုးတော်အားစွဲဆိုသည့်အမှု

9ထိုကြောင့်၊ သင်တို့နှင့် သင်တို့သားသမီးများကို ငါစစ်ကြောမည်ဟု ထာဝရဘုရား မိန့်တော်မူ၏။ 10ခိတ္တိမ်ကျွန်းတို့သို့ ကူး၍ ကြည့်ရှုကြလော့။ ကေဒါပြည်သို့ လူကိုစေလွှတ်၍၊ ထိုသို့ဖြစ်ဖူးပြီလောဟု စေ့စေ့ကြည့်ရှုဆင်ခြင်ကြလော့။ 11အခြားတစ်ပါးသောလူမျိုး ကိုးကွယ်သောဘုရားသည် ဘုရားမဟုတ်သော်လည်း၊ ပြောင်းလဲဖူးပြီလော။ ငါ၏လူမျိုးသည် ကျေးဇူးမပြုနိုင်သော အရာဖို့ မိမိတို့ဘုန်းကို ပြောင်းလဲကြပြီတကား။ 12ထာဝရဘုရားမိန့်တော်မူသည်ကား၊ အို မိုးကောင်းကင်တို့၊ ထိုအမှုကို မိန်းမောတွေဝေ၍၊ ကြက်သီးမွေးညင်း ထသည်တိုင်အောင် ထိတ်လန့်လျက်နေကြလော့။ 13ငါ၏လူတို့သည် အသက်စမ်းရေတွင်းတည်းဟူသော၊ ငါ့ကိုစွန့်ပစ်၍၊ ရေမလုံ၊ ပဲ့ပျက်သောရေကျင်းတို့ကို တူးသောအားဖြင့် ဒုစရိုက်နှစ်ပါးကို ပြုကြပြီ။

သစ္စာဖောက်မှု၏အကျိုးဆက်များ

14ဣသရေလသည် ကျွန်ဖြစ်သလော။ ကျွန်သားပေါက် ဖြစ်သလော။ အဘယ်ကြောင့် လုယူခြင်းကို ခံရသနည်း။ 15ခြင်္သေ့တို့သည် သူ့ကိုဟောက်၍ အသံမြည်ကြပြီ။ သူ၏ပြည်ကို ဖျက်ဆီးကြပြီ။ သူ၏မြို့တို့သည် မီးလောင်သောကြောင့်၊ အဘယ်သူမျှ မနေရ။ 16နောဖမြို့သားနှင့် တာပနက်မြို့သားတို့သည် သင်၏ဦးထိပ်ကို စားကြပြီ။ 17သင့်ကို ပို့ဆောင်တော်မူသော သင်၏ဘုရားသခင် ထာဝရဘုရားကို သင်သည်စွန့်သောကြောင့်၊ ထိုသို့သောအပြစ် ရောက်သည် မဟုတ်လော။ 18ယခုမှာ သင်သည် ရှိဟောရမြစ်ရေကို သောက်အံ့သောငှာ၊ အဲဂုတ္တုလမ်းသို့ အဘယ်ကြောင့် လိုက်သနည်း။ ဥဖရတ်မြစ်ရေကို သောက်အံ့သောငှာ၊ အာရှုရိလမ်းသို့ အဘယ်ကြောင့် လိုက်သနည်း။ 19သင်၏ ဒုစရိုက်သည် သင့်ကိုဆုံးမမည်။ သင်၏ဖောက်ပြန်ခြင်းသည် သင့်ကို အပြစ်ပေးမည်။ သို့ဖြစ်၍ သင်၏ဘုရားသခင် ထာဝရဘုရားကို စွန့်ပစ်သောအမှု၊ ငါ့ကိုမကြောက်ဘဲ နေသောအမှုသည်၊ မကောင်းသောအမှု၊ ခါးသောအမှုဖြစ်သည်ကို သိမြင်ရမည်ဟု ကောင်းကင်ဗိုလ်ခြေအရှင် ထာဝရဘုရား မိန့်တော်မူ၏။

ထာဝရဘုရားကို၀တ်ပြုရန်ငြင်းဆန်ခြင်း

20ရှေးကာလ၌ သင်ထမ်းရသောထမ်းပိုး၊ သင်၌ချည်သော နှောင်ဖွဲ့ခြင်းကို ငါချိုးချွတ်၍ သင်က၊ အကျွန်ုပ်သည် မမှားယွင်းဘဲနေပါမည်ဟု ကတိထားသော်လည်း၊ မြင့်သောတောင်ရှိသမျှ အပေါ်၌လည်းကောင်း၊ စိမ်းသောသစ်ပင်ရှိသမျှ အောက်၌လည်းကောင်း၊ ကိုယ်ကိုချ၍ ပြည့်တန်ဆာလုပ်လေ၏။ 21အကောင်းဆုံးသော စပျစ်နွယ်ပင်အမျိုးစစ်ဖြစ်သော သင့်ကို ငါစိုက်ပျိုးသော်လည်း၊ သင်သည် ငါ့ရှေ့မှာ အဘယ်မျှလောက် ဖောက်ပြန်၍၊ အမျိုးမစစ်သော စပျစ်နွယ်ပင် ဖြစ်ပါသည်တကား။ 22သင်သည် ပေါက်ဆပ်ပြာနှင့် ရေချိုး၍၊ ချက်သော ဆပ်ပြာအများကို သုံးသော်လည်း၊ သင်၏အပြစ်သည် ငါ့ရှေ့မှာထင်ရှားသည်ဟု အရှင်ထာဝရဘုရား မိန့်တော်မူ၏။ 23သင်ကလည်း၊ ငါသည် ညစ်ညူးခြင်းမရှိ၊ ဗာလဘုရားတို့နောက်သို့ မလိုက်ဟု အဘယ်သို့ ဆိုနိုင်သနည်း။ ချိုင့်၌ သင်လိုက်သောလမ်းကို ကြည့်ရှုလော့။ သင်ပြုသောအမှုတို့ကို ဝန်ခံလော့။ လျင်မြန်စွာပြေး၍ လှည့်လည်တတ်သော ကုလားအုတ်မ ပါတကား။ 24တော၌ လှည့်လည်၍ ကိလေသာရာဂစိတ်နှင့် လေကိုရှူတတ်သော မြည်းရိုင်းမပါတကား။ အချိန်ရောက်သောအခါ အဘယ်သူ ဆီးတားနိုင်သနည်း။ သူ့ကိုရှာအံ့သောငှာ အဘယ်သူမျှ ပင်ပန်းခြင်းကို မခံရ။ အချိန်စေ့သောအခါ သူ့ကိုတွေ့လိမ့်မည်။ 25သင်၏ခြေနင်းကို မပျက်စေနှင့်။ ရေငတ်ခြင်းအကြောင်းကို မပြုနှင့်ဟု ဆိုသော်လည်း၊ သင်က မျှော်လင့်စရာမရှိ၊ အလျှင်းမရှိ။ သူတစ်ပါးတို့ကို ငါချစ်၍၊ သူတို့နောက်သို့ လိုက်မည်ဟု ပြန်ပြော၏။

ဣသရေလအပြစ်ဒဏ်ခံသင့်ခြင်း

26ဖမ်းမိသောသူခိုးသည် ရှက်သကဲ့သို့၊ ဣသရေလအမျိုး၏ ရှင်ဘုရင်၊ မင်းသား၊ ယဇ်ပုရောဟိတ်၊ ပရောဖက်နှင့်တကွ အမျိုးသားများတို့သည် ရှက်ကြ၏။ 27သစ်တုံးအား၊ ကိုယ်တော်သည် အကျွန်ုပ်အဘဖြစ်တော်မူ၏ ဟူ၍လည်းကောင်း၊ ကျောက်အားလည်း၊ ကိုယ်တော်သည် အကျွန်ုပ်ကို ဖွားမြင်တော်မူပြီ ဟူ၍လည်းကောင်းဆိုလျက်၊ စင်စစ် ငါ့ကို မျက်နှာမပြု၊ ကျောခိုင်းကြသော်လည်း၊ အမှုရောက်လျှင်မူကား၊ ထတော်မူပါ၊ အကျွန်ုပ်တို့ကို ကယ်မတော်မူပါဟု လျှောက်တတ်ကြ၏။ 28ကိုယ်အဖို့ သင်လုပ်သောဘုရားတို့သည် အဘယ်မှာရှိကြသနည်း။ အမှုရောက်သောအခါ သူတို့သည် တတ်နိုင်လျှင် ထ၍ ကယ်ကြပါလေစေ။ အို ယုဒပြည်၊ သင်သည် မြို့များအရေအတွက်ရှိသည်အတိုင်း၊ သင်၏ဘုရားများ ရှိပါသည်တကား။ 29ထာဝရဘုရား မိန့်တော်မူသည်ကား၊ သင်တို့သည် အဘယ်အကျိုးအလိုငှာ ငါနှင့် တရားတွေ့ကြမည်နည်း။ သင်တို့ရှိသမျှသည် ငါ့ကို ပြစ်မှားကြပြီ။ 30ငါသည် သင်တို့သားများကို အချည်းနှီးဒဏ်ပေးပြီ။ သူတို့သည် ဆုံးမခြင်းကို မခံကြ။ သင်တို့၏ဓားသည် လုယူဖျက်ဆီးတတ်သော ခြင်္သေ့ကဲ့သို့၊ သင်တို့၏ ပရောဖက်များကိုဖျက်ဆီးလေပြီ။

31ယခုဖြစ်သော အမျိုးသားတို့၊ ထာဝရဘုရား၏အမိန့်တော်ကို ဆင်ခြင်ကြလော့။ ငါသည် ဣသရေလအမျိုး၌ တောကဲ့သို့လည်းကောင်း၊ မှောင်မိုက်နိုင်ငံကဲ့သို့လည်းကောင်း ဖြစ်ဖူးသလော။ ငါ၏လူတို့က၊ ငါတို့သည် အရပ်ရပ်သို့ လည်မည်။ ကိုယ်တော်ထံသို့ နောက်တစ်ဖန် မချဉ်းကပ်ဟု အဘယ်ကြောင့် ဆိုကြသနည်း။ 32အပျိုမသည် မိမိ၌ဆင်သော တန်ဆာကိုလည်းကောင်း၊ မင်္ဂလာဆောင် သတို့သမီးသည် မိမိခါးပန်းကိုလည်းကောင်း မေ့လျော့နိုင်သလော။ သို့သော်လည်း၊ ငါ၏လူတို့သည် မရေတွက်နိုင်အောင် များစွာသောကာလပတ်လုံး ငါ့ကို မေ့လျော့ကြပြီ။ 33သင်သည် ရည်းစားကိုရှာခြင်းငှာ သင်တို့ ဘာသာဓလေ့တို့ကို အဘယ်ကြောင့်ပြုပြင်သနည်း။ သင်၏အသိအကျွမ်းတို့ကို သွေးဆောင်လေပြီတကား။ 34ထိုမှတစ်ပါး၊ အနိုင်အထက်ပြုသည်ကို သင်မတွေ့။ အပြစ်မရှိသော ဆင်းရဲသားတို့ကို အသေသတ်၍၊ သွန်းသော အသွေးသည် သင်၏အဝတ်စွန်း၌ ထင်ရှား၏။ 35ထိုသို့သော အပြစ်များရှိသော်လည်း သင်က၊ ငါ၌အပြစ်မရှိသောကြောင့်၊ ဘုရားသခင်၏အမျက်တော်သည် ငါမှလွဲသွားလိမ့်မည်ဟု ဆိုပါသည်တကား။ ငါ၌အပြစ်မရှိဟုဆိုသောကြောင့်၊ သင့်ကို ငါစစ်ကြောစီရင်မည်။ 36သင်သည် အရပ်ရပ်သို့ ပြောင်းလဲခြင်းငှာ၊ အဘယ်ကြောင့် ဤမျှလောက်လှည့်လည်သနည်း။ အာရှုရိပြည်ကို ရှက်ကြောက်သည်နည်းတူ၊ အဲဂုတ္တုပြည်ကို ရှက်ကြောက်လိမ့်မည်။ 37သင်သည် မိမိလက်ကို မိမိခေါင်းပေါ်မှာတင်လျက်၊ ထိုပြည်မှ အမှန်ထွက်သွားရလိမ့်မည်။ အကြောင်းမူကား၊ သင်ခိုလှုံသောအရာတို့ကို ထာဝရဘုရားသည်ပယ်တော်မူသောကြောင့်၊ ခိုလှုံ၍ အကျိုးကို မရနိုင်ရာ။

ယေရမိအနာဂတ္တိကျမ်း - ၂ (အနက်ဖွင့်)

၂။ ပြည်ပသို့ ယေရမိအမှုတော်(အခန်း၂–၁၀)

(က) ယုဒတို့၏သစ္စာပျက်ခြင်း(၂:၁–၃:၅)

၂:၁–၃ အခန်း၂မှ ၁၉ထိ ယုဒများကိုရှုတ်ချထားသည်။ ယုဒလူမျိုးသည် တခါက ဘုရားသခင်၏ အချစ်တော်လူမျိုးစုဖြစ်သည်။ ယေဟောဝါဘုရားရှင်က စိတ်ရှည်စွာ သည်းခံခဲ့သည်။ ဘုရားသခင်ရှေ့တွင် သန့်ရှင်းသောလူမျိုး ဖြစ်သည်။ ဘေးအန္တရာယ်များကိုလည်း ကွယ်ကာပေးသည်။ ယခုမူကား ဇောက်ထိုး ပြောင်းပြန် ဖြစ်ကုန်ပြီ။ ထိုအကြောင်းကို Kyle Yates ကဤသို့ရှင်းပြ သည်။

ပျားရည်စမ်း ခရီးပြီးဆုံးသွားပြီ။ ဘုရားသခင်က ဣသရေလလူမျိုးအား နွေထွေးစွာ ဆက်ဆံခဲ့ပုံ၊ အချစ်စစ်အချစ်မှန်ဖြင့် ချစ်ခင်ယုယပုံများကို ပြန်လည် မြင်ယောင်စေသည်။ မပျက်ပြယ်နိုင်သော မေတ္တာ၊ ပျော်ရွှင်သောအသက်တာ၊ မျှော်လင့်ချက် ဘဝဂီတသံစဉ်များ ပေးခဲ့သည်။ ဘုရားသခင်ရှေ့တွင် သန့်ရှင်းစင်ကြယ် မြင့်မြတ်ခဲ့သည်။ ဣသရေလတို့ ဝတ်ပြုကိုးကွယ်သမျှတွင် မတင့်တယ်။ မစင်ကြယ်သောဘုရား ဟူ၍ မရှိ။ အပြစ်မူတမှုံ မမြင်။ သို့သော် ယခုတွင်မူတခန်းရပ် ပြည့်ဖုံးကားချလိုက်သည်။ ဘုရားသခင်၏ စိတ်တော် ထိခိုက်စေကြပြီး စိတ်ပျက်စေကြပြီ။ ဣသရေလတို့အပြစ် ကွင်းကျယ်တွင် ပျော်စံနေကြပြီ။ ကတိက ဝတ်လည်း မတည်။ အခြားဘုရားငယ်များ ကိုးကွယ်ကြပြီ။ သို့ကြောင့် ယေဟောဝါဘုရား၏ ချစ်ခြင်းမေတ္တာ တုံးကြပြီ။ အရှက်ရစရာအကျင့်ဆိုး၌ ကျင်လည်နေကြပြီ။၄

၂:၄–၁၉ အဘယ်ကြောင့် ထိုသို့ ပြောင်းလဲမျက်နှာများကြသနည်းဟု ဘုရားရှင်က မေးပါသည်။ ပြည်သူပြည်သား၊ ယဇ်ပုရောဟိတ်များ အုပ်စိုးသူမင်းများနှင့် ပရောဖက်များအပေါ် ပြုတော်မူသော ဘုရားသခင်၏ အမှုတော်များ မေ့လျှော့ကုန်ကြပြီ။ စိတ်နှလုံးကြမ်းတမ်းသော ခိတ္တမ်ပြည်နှင့် ကေဒါပြည်သားများပင်လျှင် သူတို့ရုပ်တုဘုရားအပေါ် သစ္စာမပျက် စည်းစောင့်ကြသည်။ ဘုရားသခင်၏ မေတ္တာခံယူသော ယုဒလူမျိုးကား ဘုရာသခင်ကို သစ္စာဖေါက်လျက်ရုပ်တု ဆင်းတုလင်ငယ်နောက် ပါသွားကြပြီ။ မေတ္တာရှင် ဘုရားသခင်ကို အဘယ်ကြောင့် နောက်ကျောခိုင်းပြီး အာရှုရိနှင့် အဲဂုတ္တုပြည်တို့၏ ကျွန်ခံချင်ကြသနည်း။

၂:၂၀–၂၅ အငယ်၂၀တွင် “ရှေးကာလ၌ သင်ထမ်းရသောထမ်းဘိုးသည် သင်၌ ချည်သောနှောင်ဖွဲ့ခြင်းကို ငါချိုးချွတ်၍” ဟု ဆိုထားသည်။ အဲဂုတ္တုပြည်မှ ပြန်လည်ရွေးနှုတ် ခေါ်ထုတ်ခြင်းကို ဆိုလိုသည်။ သို့မဟုတ်” ထမ်းပိုးဟောင်းကို ချိုးပစ်ခဲ့ကြပြီ။ အချုပ်အနှောင်မှ လွတ်မြောက်ကြပြီ၊ ငါနှင့် မဆိုင်တော့ပါ” (RSV)ဟု နားလည်နိုင်သည်။ ဆိုလိုသည်မှာ ယုဒလူမျိုးသည် ဘုရားမဲ့တရားမဲ့ မဟုတ်ကြတော့ပါ။ ဘုရားသခင်က စီစစ် ခေါ်ထုတ်သူများဖြစ်၏။ တစ်နည်းအားဖြင့် ယုဒလူမျိုးများ ရုပ်တုဆင်းတု ပြန်ကိုးကွယ်လာကြခြင်းလည်း ဖြစ်နိုင်သည်။ ဘုရားသခင်က ယုဒလူမျိုးအား မြင့်မတ်စင်ကြယ်သောလူမျိုး ဖြစ်စေချင်သည်။ အကောင်းဆုံးသော စပျစ်နွယ်၊ မျိုးစစ်သောအပင် အဖြစ် စိုက်ပျိုးသည်။ သို့သော်လည်း မျိုးမစစ်သောအပင်အဖြစ်သို့ ဖောက်ပြန်ရောက်ရှိသွားသည်။ ယုဒတို့၏ အပြစ်အညစ်များကို ဆပ်ပြာဖြင့် စင်ကြယ်အောင် မသန့်ရှင်းစေနိုင်။ မိတ်လာ၍ ကိလေသာစိတ်ဖြင့် ဂဏှာမငြိမ်ပြေးလွှားနေသောမြည်းရိုင်းမကဲ့သို့ ဆက်စလူးခါသည်။ မရေရာ မသေချာသူများနှင့် မိတ်ဆွေဖွဲ့ကြပြီးတကား။

၂:၂၆–၃၇ ဣသရေလအိမ်တွင် အပြစ်ဒုစရိုက်ပေါင်းစုံ ကျရောက်၍ အကူအညီ အော်ခေါ်သော်လည်း သူတို့ကိုးကွယ်သည့်ဘုရားများက မကူညီနိုင်ပါ။ ဘုရားသခင်၏ လမ်းတော်မလိုက်ခြင်း၊ မထီမဲ့မြင်ပြုခြင်းများသည် ဘုရားသခင်အားပြည့်တန်ဆာမ အမူအကျင့်များကို ဘုရားရှင်စီရင်မည်။ ဘုရားသခင်၏ သွန်သင် ဦးဆောင်မှုကို ငြင်းပယ်ခဲ့ကြသောကြောင့် ပြည်နှင်ဒဏ်သင့်ကြမည်။ ဘုရားသခင် အရေးယူဆုံးမမည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။