Jeremiah -23 -

ယေရမိအနာဂတ္တိကျမ်း - ၂၃

အနာဂတ်အတွက်မျှော်လင့်ချက်

1ထာဝရဘုရား မိန့်တော်မူသည်ကား၊ ငါ့ထံမှာ ကျက်စားသောသိုးတို့ကို ဖျက်ဆီး၍၊ အရပ်ရပ်သို့ ကွဲပြားစေသော သိုးထိန်းတို့သည် အမင်္ဂလာရှိကြ၏။ 2ထိုကြောင့်၊ ဣသရေလအမျိုး၏ဘုရားသခင် ထာဝရဘုရား မိန့်တော်မူသည်ကား၊ ငါ၏လူတို့ကို ကျွေးမွေးရသော သိုးထိန်းတို့အမှုမှာ သင်တို့သည် ငါ၏သိုးစုကိုမကြည့်ရှု၊ မပြုစု၊ အရပ်ရပ်သို့ ကွဲပြားစေ၍ နှင်ထုတ်သောကြောင့်၊ သင်တို့ပြုသော ဒုစရိုက်အပြစ်ကို သင်တို့အပေါ်မှာ ငါသက်ရောက်စေမည်ဟု ထာဝရဘုရား မိန့်တော်မူ၏။ 3တစ်ဖန် မိန့်တော်မူသည်ကား၊ ငါ၏သိုးစုကို ငါနှင်ထုတ်သော ပြည်ရှိသမျှတို့၌ ကျန်ကြွင်းသောသိုးတို့ကို ငါစုဝေး၍၊ နေရင်းသိုးခြံသို့ တစ်ဖန် ငါဆောင်ခဲ့ဦးမည်။ သူတို့သည်လည်း၊ သားဖွား၍ များပြားကြလိမ့်မည်။ 4သူတို့ကို ကျွေးမွေးသောသိုးထိန်းတို့ကို သူတို့အပေါ်မှာ ငါခန့်ထားသဖြင့်၊ သူတို့သည် နောက်တစ်ဖန် ကြောက်ခြင်း၊ ထိတ်လန့်ခြင်း မရှိရကြ။ ဆုံးမခြင်းကိုလည်းမခံရကြဟု ထာဝရဘုရား မိန့်တော်မူ၏။

5ထာဝရဘုရားမိန့်တော်မူသည်ကား၊ သန့်ရှင်းသောအညွန့်ကို ဒါဝိဒ်အဖို့ ငါပေါက်စေသည်အတိုင်း၊ ဉာဏ်ကောင်းသော ရှင်ဘုရင်တစ်ဦးသည် စိုးစံ၍၊ မြေကြီးပေါ်မှာ တရားသဖြင့် ဖြောင့်မတ်စွာ စီရင်ရာကာလသည် ရောက်လိမ့်မည်။ 6ထိုမင်းလက်ထက်၌ ယုဒပြည်သည် ကယ်တင်ခြင်းသို့ရောက်၍၊ ဣသရေလပြည်လည်း ငြိမ်ဝပ်စွာ နေရလိမ့်မည်။ ထိုမင်းသည် ယေဟောဝါဇေဒကနု ဟူသော ဘွဲ့နာမရှိလိမ့်သတည်း။ 7သို့ဖြစ်၍၊ ထာဝရဘုရားမိန့်တော်မူသည်ကား၊ ဣသရေလအမျိုးသားတို့ကို အဲဂုတ္တုပြည်မှ နုတ်ဆောင်သော ထာဝရဘုရား အသက်ရှင်တော်မူသည်ဟူ၍ မကျိန်ဆိုဘဲ၊ 8ဣသရေလအမျိုးသား အစဉ်အဆက်တို့ကို မြောက်ပြည်မှစ၍၊ နှင်ထုတ်ဖူးသော ပြည်ရှိသမျှတို့မှ ပို့ဆောင်သော ထာဝရဘုရား အသက်ရှင်တော်မူသည်ဟူ၍ ကျိန်ဆိုရသောကာလသည် နောက်တစ်ဖန် ရောက်လိမ့်မည်။ သူတို့သည် နေရင်းပြည်၌ တစ်ဖန် နေရကြလိမ့်မည်။

ပရောဖက်များအတွက်ဗျာဒိတ်

9ပရောဖက်များနှင့် ဆိုင်သော စကားဟူမူကား၊ ထာဝရဘုရားကြောင့်လည်းကောင်း၊ သန့်ရှင်းသော စကားတော်ကြောင့်လည်းကောင်း ငါ့စိတ်ပျက်လျက်ရှိ၏။ ငါ့အရိုးရှိသမျှတို့သည် လှုပ်ရှားကြ၏။ ယစ်မူးသောသူနှင့် စပျစ်ရည်နိုင်သောသူကဲ့သို့ ငါဖြစ်၏။ 10အကြောင်းမူကား၊ မတရားသောမေထုန်၌ မှီဝဲသောသူတို့သည် တစ်ပြည်လုံး၌ အနှံ့အပြားရှိကြ၏။ ထိုသူတို့ကြောင့် တစ်ပြည်လုံး မြည်တမ်းရ၏။ တော၌ ကျက်စားရာအရပ်တို့သည် သွေ့ခြောက်ကြ၏။ ပြည်သားများလိုက်သောလမ်းသည် မဖြောင့်၊ သူတို့အစွမ်းသတ္တိသည် တရားဘက်၌ မနေတတ်။ 11ပရောဖက်နှင့် ယဇ်ပုရောဟိတ်နှစ်ပါးတို့သည် ဘုရားကို မရိုမသေပြုကြပြီ။ ငါ့အိမ်၌ပင် သူတို့ပြုသော အဓမ္မအမှုကို ငါတွေ့ပြီဟု ထာဝရဘုရားမိန့်တော်မူ၏။ 12ထိုကြောင့်၊ သူတို့သွားသောလမ်းသည် မှောင်မိုက်၌ ချောတတ်သော လမ်းကဲ့သို့ဖြစ်၍၊ သူတို့သည် တွန်းတိုးခြင်းကို ခံရ၍ လဲကြလိမ့်မည်။ အကြောင်းမူကား၊ သူတို့သည် ဆုံးမခြင်းကို ခံရသောကာလ၌ သူတို့အပေါ်မှာ ဘေးဥပဒ်ကို သင့်ရောက်စေမည်ဟု ထာဝရဘုရား မိန့်တော်မူ၏။ 13ရှမာရိပြည်သား ပရောဖက်တို့၌လည်း၊ မိုက်သောသဘောကို ငါမြင်ပြီ။ သူတို့သည် ဗာလဘုရားကို မှီဝဲ၍ ပရောဖက်ပြုသဖြင့်၊ ငါ၏လူ ဣသရေလအမျိုးသားတို့ကို မှားယွင်းစေကြပြီ။ 14ယေရုရှလင်မြို့သား ပရောဖက်တို့၌လည်း၊ စက်ဆုပ်ရွံရှာဖွယ်သော သဘောကို ငါမြင်ပြီ။ သူတို့သည် မတရားသော မေထုန်၌မှီဝဲလျက်၊ မုသားကိုလည်းသုံးလျက်၊ အဓမ္မပြုသောသူတို့ကို အားပေးတတ်သဖြင့်၊ အဘယ်သူမျှမိမိပြုသော အဓမ္မအမှုကို မစွန့်။ ထိုသူ ရှိသမျှတို့သည် ငါ၌ သောဒုံမြို့သားကဲ့သို့လည်းကောင်း၊ ယေရုရှလင်မြို့သားတို့သည် ဂေါမောရမြို့သားကဲ့သို့လည်းကောင်း ဖြစ်ကြ၏။ 15ထိုကြောင့်၊ ကောင်းကင်ဗိုလ်ခြေအရှင် ထာဝရဘုရားသည် ပရောဖက်တို့အမှု၌ မိန့်တော်မူသည်ကား၊ သူတို့ကို ဒေါနနှင့် ငါကျွေးမည်။ ဆေးခါးကိုလည်း သောက်စေမည်။ ယေရုရှလင်မြို့သားပရောဖက်တို့သည် မူလအမြစ်ဖြစ်၍၊ အဓမ္မအမှုသည် တစ်ပြည်လုံးကို နှံ့ပြားလေပြီ။

16ကောင်းကင်ဗိုလ်ခြေအရှင် ထာဝရဘုရားမိန့်တော်မူသည်ကား၊ ပရောဖက်ပြု၍ သင်တို့အား ဟောတတ်သောဆရာတို့၏စကားကို နားမထောင်ကြနှင့်။ သူတို့သည် သင်တို့အား အချည်းနှီးဟောတတ်ကြ၏။ ထာဝရဘုရား၏ နှုတ်တော်ထွက်သို့မလိုက်၊ ကိုယ်အလိုအလျောက် ရူပါရုံကိုမြင်သည်အတိုင်း ဟောပြောတတ်ကြ၏။ 17ထာဝရဘုရား၏နှုတ်ကပတ်တော်ကို မထီမဲ့မြင်ပြုသော သူတို့အား၊ သင်တို့သည် ငြိမ်ဝပ်ခြင်းရှိကြလိမ့်မည်ဟု ဟောတတ်ကြ၏။ မိမိတို့စိတ်နှလုံး ခိုင်မာခြင်းသဘောသို့ လိုက်သောသူတို့အား၊ သင်တို့သည် ဘေးဥပဒ်နှင့် မတွေ့ရကြဟု ဟောတတ်ကြ၏။ 18ထိုသူတို့တွင် အဘယ်သူသည် ထာဝရဘုရားနှင့် တိုင်ပင်ဘက်ပြုသနည်း။ အဘယ်သူသည် အမှုတော်ကို ကြားမြင်သနည်း။ အဘယ်သူသည် နှုတ်ကပတ်တော်ကို နားထောင်၍ ကြားသနည်း။ 19ထာဝရဘုရား၏ လေပွေတော်သည် ပူသောအရှိန်နှင့် ထွက်၏။ ပြင်းစွာသော လေပွေဖြစ်၍၊ မတရားသော သူတို့ခေါင်းပေါ်မှာ ပြင်းစွာတိုက်လိမ့်မည်။ 20ထာဝရဘုရားသည် လက်စသတ်၍၊ အကြံအစည်တော်ကို ပြည့်စုံစေတော်မမူမီ အမျက်တော်မငြိမ်းရ။ နောက်ကာလ၌ သင်တို့သည် ရှင်းလင်းစွာ နားလည်ကြလိမ့်မည်။ 21ငါမစေလွှတ်ဘဲ ထိုပရောဖက်တို့သည် ပြေးကြပြီ။ ငါမမှာထားဘဲ သူတို့သည် ကိုယ်အလိုအလျောက် ဟောပြောကြပြီ။ 22ထိုသူတို့သည် ငါနှင့် တိုင်ပင်ဘက်ပြုလျှင်၊ ငါ့စကားကို ငါ၏လူမျိုးအားဆင့်ဆို၍၊ ငါ၏လူမျိုးကို မတရားသောလမ်းမှလည်းကောင်း၊ မကောင်းသော အကျင့်ဓလေ့မှလည်းကောင်း လွဲသွားစေကြပြီ။

23ငါသည် နီးသောအရပ်၌သာ ဘုရားဖြစ်သလော။ ဝေးသောအရပ်၌လည်း ဘုရားဖြစ်သည်မဟုတ်လောဟု ထာဝရဘုရား မေးတော်မူ၏။ 24ငါမမြင်စေခြင်းငှာ အဘယ်သူသည် မထင်ရှားသောအရပ်၌ ပုန်းရှောင်၍ နေနိုင်သနည်းဟု ထာဝရဘုရားမေးတော်မူ၏။ ငါသည် ကောင်းကင်မြေကြီးကို နှံ့ပြားသည် မဟုတ်လောဟု ထာဝရဘုရား မေးတော်မူ၏။ 25ငါသည် အိပ်မက်မြင်ပြီ၊ အိပ်မက်မြင်ပြီဟု၊ ငါ့နာမကို အမှီပြု၍၊ မုသားဖြင့်ဟောပြောသော ပရောဖက်တို့၏ စကားကို ငါကြားပြီ။ 26ထိုပရောဖက်တို့သည် အဘယ်မျှကာလပတ်လုံး ဤသို့ ကြံစည်ကြလိမ့်မည်နည်း။ သူတို့သည် မုသားစကားကို ဟောပြောတတ်ကြ၏။ ကိုယ်စိတ်နှလုံးလှည့်စားသည်အတိုင်း ဟောပြောတတ်ကြ၏။ 27ဘိုးဘေးတို့သည် ဗာလကြောင့် ငါ့နာမကိုမေ့လျော့သကဲ့သို့၊ သူတို့သည် အိမ်နီးချင်း တစ်ယောက်ကိုတစ်ယောက် ပြောတတ်သော အိပ်မက်များအားဖြင့် ငါ၏လူမျိုးသည် ငါ့နာမကိုမေ့လျော့စေမည်ဟု အကြံရှိကြသည်တကား။ 28အိပ်မက်မြင်သော ပရောဖက်သည် အိပ်မက်စကားကို ပြောပါလေစေ။ ငါ၏နှုတ်ကပတ်တော်ကို ခံရသောသူသည် နှုတ်ကပတ်စကားတော်ကို မှန်ကန်စွာ ဟောပြောပါလေစေ။ အဖျင်းသည် စပါးနှင့် အဘယ်သို့ဆိုင်သနည်းဟု ထာဝရဘုရား မိန့်တော်မူ၏။ 29ငါ၏ နှုတ်ကပတ်တော်သည် မီးကဲ့သို့လည်းကောင်း၊ ကျောက်ကိုထုချေသော သံတူကဲ့သို့လည်းကောင်း ဖြစ်သည်မဟုတ်လောဟု ထာဝရဘုရား မေးတော်မူ၏။ 30သို့ဖြစ်၍၊ ငါ့စကားတော်ကို အိမ်နီးချင်း တစ်ယောက်မှတစ်ယောက် ခိုးသောပရောဖက်တို့ကို ငါသည် ဆန့်ကျင်ဘက်ပြုမည်ဟု ထာဝရဘုရား မိန့်တော်မူ၏။ 31မိမိတို့အလိုအလျောက် ဟောပြောလျက်နှင့် အမိန့်တော်ရှိသည်ဟုဆိုသော ပရောဖက်တို့ကို ငါသည် ဆန့်ကျင်ဘက်ပြုမည်ဟု ထာဝရဘုရား မိန့်တော်မူ၏။ 32မှားသောအိပ်မက်ကို ဟောပြော၍၊ မုသားစကားနှင့် အချည်းနှီးစကားအားဖြင့် ငါ၏လူမျိုးကို မှားယွင်းစေသောပရောဖက်တို့ကို ငါသည် ဆန့်ကျင်ဘက်ပြုမည်။ သူတို့ကို ငါမစေလွှတ်၊ မမှာထားသောကြောင့်၊ ဤလူမျိုးသည် ကျေးဇူးမရှိဟု ထာဝရဘုရား မိန့်တော်မူ၏။

ထာဝရဘုရား၏ဝန်ထုပ်ဝန်ပိုး

33ဤလူမျိုးတွင် ဆင်းရဲသားဖြစ်စေ၊ ပရောဖက်ဖြစ်စေ၊ ယဇ်ပုရောဟိတ်ဖြစ်စေ၊ တစ်စုံတစ်ယောက်က၊ ထာဝရဘုရား၏ ဗျာဒိတ်တော် အဘယ်သို့နည်းဟု သင့်ကိုမေးလျှင်၊ ပြန်ပြောရမည်မှာ၊ သင်တို့နှင့်ဆိုင်သော ဗျာဒိတ်တော်ဟူမူကား၊ သင်တို့ကို ငါစွန့်ပစ်မည်ဟု ထာဝရဘုရား မိန့်တော်မူ၏။ 34ထာဝရဘုရား၏ ဗျာဒိတ်တော်ရှိသည်ဟု ပြောဆိုသော ပရောဖက်၊ ယဇ်ပုရောဟိတ်၊ ပြည်သူပြည်သားကိုလည်းကောင်း၊ ထိုသူ၏ အိမ်သူအိမ်သားတို့ကိုလည်းကောင်း၊ ငါသည် ဒဏ်ပေးမည်။ 35သင်တို့က၊ ထာဝရဘုရားသည် အဘယ်သို့ ပြန်ပြောတော်မူသနည်း ဟူ၍လည်းကောင်း၊ အဘယ်သို့ မိန့်တော်မူသနည်း ဟူ၍လည်းကောင်း၊ အိမ်နီးချင်း၊ ညီအစ်ကိုချင်း တစ်ယောက်ကိုတစ်ယောက် မေးမြန်းရမည်။ 36ထာဝရဘုရား၏ ဗျာဒိတ်တော်ရှိသည်ဟူ၍ နောက်တစ်ဖန် မဆိုရ။ လူတိုင်း မိမိစကားမှတစ်ပါး အခြားသောဗျာဒိတ်တော်မရှိရ။ အကြောင်းမူကား၊ သင်တို့သည် အသက်ရှင်တော်မူသောဘုရား၊ ငါတို့၏ ဘုရားသခင်တည်းဟူသော ကောင်းကင်ဗိုလ်ခြေအရှင် ထာဝရဘုရား၏စကားတော်ကို ဖျက်ကြပြီ။ 37ထာဝရဘုရားသည် သင့်အား အဘယ်သို့ ပြန်ပြောတော်မူသနည်း။ ထာဝရဘုရားသည် အဘယ်သို့ မိန့်တော်မူသနည်းဟု ပရောဖက်ကိုမေးလော့။ 38သင်တို့က၊ ထာဝရဘုရား၏ဗျာဒိတ်တော်ဟု ဆိုကြသည်ဖြစ်၍၊ ထာဝရဘုရား မိန့်တော်မူသည်ကား၊ ထာဝရဘုရား၏ ဗျာဒိတ်တော်ရှိသည်ဟု မဆိုရမည်အကြောင်း၊ ငါပညတ်သော်လည်း၊ သင်တို့သည် ထာဝရဘုရား၏ ဗျာဒိတ်တော်ရှိသည်ဟူသော စကားကို သုံးကြသောကြောင့်၊ 39ငါသည် သင်တို့ကိုလည်းကောင်း၊ သင်တို့နှင့် ဘိုးဘေးတို့အား ငါပေးသော မြို့ကိုလည်းကောင်း၊ ငါ့ထံမှ အကုန်အစင်ကျုံး၍ ပစ်လိုက်မည်။ 40အစဉ်အမြဲ မမေ့လျော့နိုင်သော ထာဝရကဲ့ရဲ့ခြင်းနှင့် အရှက်ကွဲခြင်းကို သင်တို့အပေါ်မှာ သက်ရောက်စေမည်။

ယေရမိအနာဂတ္တိကျမ်း - ၂၃ (အနက်ဖွင့်)

(ဆ) ပရောဖက်ပြုချက်နှင့် မှန်ကန်သောမင်း (၂၃:၁–၈)

ဘုရားသခင်၏ လူသားများအား ပြုစုစောင့်ရှောက်ရန် တာဝန်ပျက်ကွက်ကြသောကြောင့် အုပ်စိုးသူမင်း (သိုးထိန်း)များ ပြစ်တင်ရှုတ်ချခြင်း ခံကြရသည်။ သို့သော်လည်း ကျန်ကြွင်းသောလူနည်းစုများကို ဘုရားသခင်က ပြန်လည်စုစည်း၍ သစ္စာရှိသောသိုးထိန်းများ ပေးမည်။ အကြီးဆုံးသိုးထိန်း မေရှိယအား ဘုရင်အဖြစ် ပေးမည်။ ထိုအကြောင်းနှင့် ဆက်နွယ်၍ ယနေ့ယုံကြည်သူ လူများအား Kellyက ဤသို့ သတိပေးထားသည် လူကြိုက်မများသော်လည်း မရှိမဖြစ် လိုအပ်ချက်ဖြစ်၍ မှတ်သားပါ။

ဤပရောဖက်ပြုချက်သည် မေရှိယသခင် ယေရှုအကြောင်း ဖြစ်သည်။ သို့သော်လည်း မေရှိယသခင်သည် ယေရှုဖြစ်ကြောင်း ဣသရေလများလောက် နှီးနွယ်ပတ်သက်ခြင်း မရှိကြ။ ဤအချက်သည် အဓိကအရေးကြီးသောအချက် ဖြစ်သည်။ မမေ့ပျောက်ဖို့ လိုသည်။ အကယ်၍ ထိုပရောဖက်ပြုချက်သည် ယနေ့ခရစ်ယာန်များ၏ ယုံကြည်ခြင်းနှင့် မပတ်သက်၊ အသင်းတော်၌ လက်တွေ့ မကျင့်သုံးလျှင် မှားယွင်းချွတ်ချော်သည်။ ရိုးသားဖြောင့်မတ်ခြင်းသည် တစ်လောကလုံးတွင် အကောင်းဆုံးသော လမ်းစဉ် ဖြစ်သည်။ သင့်နီးနားချင်းများအတွက် အနာမခံ၊ အကောင်းမပြဘဲ၊ မည်သည့်အရာမှ အကျိုးရလာဒ်မရနိုင်။ သင့်အိမ်နီးနားချင်းက တစုံတစ်ခုငြူစူလာလျှင် ဆုံးရှုံးပြီသာမှတ်။ လူမှုပတ်ဝန်းကျင်တွင် ထိုကဲ့သို့ ကြုံတွေ့ရသကဲ့သို့ ဝိညာဉ်ရေးရာနယ်ပယ်တွင်လည်း ရှိသည်။ ပို၍ အရေးပါသည်။ ဣသရေလလူများထဲသို့ မဝင်ကြည့်လျှင် ဣသရေလတို့၏ ဆိုးညစ်မှု၊ လိမ်လည်ကောက်ကျစ်မှုကို နားလည်နိုင်မည် မဟုတ်။၂၆

အပိုဒ်ငယ်(၅)တွင် မေရှိယကို ဒါဝိဒ်၏ အညွှန့်(သားတော်)ဟု၎င်း၊ ဇာ ၃:၈ တွင် “ငါ၏ ကျွန်တည်းဟူသောအညွှန့်” ဟု၎င်း၊ ဇာ ၆:၁၂တွင် “အညွှန့်အမည်ရှိ သောသူ” ဟု၎င်း၊ ဟေရှာ ၄:၂တွင် “ထာဝရဘုရား၏အညွှန့်” ဟု၎င်း ဖော်ညွှန်းထားသည်။ ထိုကျမ်းချက်(၄)ပိုဒ်ကို အာဘော်ယူ၍ ဓမ္မသစ်ကျမ်းတွင် ရှင်ဘုရင်၊ အစေခံ၊ လူသားတော်၊ ဘုရားသားတော်အဖြစ် ပုံဖော်ကြသည်။

“ဘုရားသခင်သည် ဖြောင့်မတ်စင်ကြယ်သည်” ကယ်တင်ရှင်ဘုရား ဖြစ်သောကြောင့် ယေဟောဝါဇေဒကနု (ငယ်၆)ဟု ခေါ်ကြသည်။ ယေဟောဝါဘုရား နာမတော်(၇)ခုမှ တစ်ခု ဖြစ်သည်။ M’CHEYNE ကယေဟောဝါဘုရားသခင်၏ နာမတော်ကြီးမြတ်ပုံကို ယေဟောဝါဇေဒကနု-ဖြောင့်မတ်စင်ကြယ်သောဘုရားသခင် ခေါင်းစဉ်ဖြင့် တေးသီချင်းစပ်ဆိုထားသည်။

ယေဟောဝါဇေဒကနု

ငါသည်ဘုရားသခင်၏ ကျေးဇူးတော်ခံစားရန် မထိုက် ငါ့အန္တရာယ်ကိုမမြင်၊ ငါဝန်ကိုမကြောက် သူငယ်ချင်းများက ကားတိုင်ပေါ်က ယေရှုအကြောင်းပြောပြသော်လည်း ယေဟောဝါဇေဒကနုသည်ငါ့ အတွက်မှန်းမသိခဲ့။

ဟေရှာယ၏ ကန္တရဘဝ၊ ယောဟန်၏ ရိုးရှင်းသောဘဝစာမျက်နှာ ဖတ်ရစဉ်အခိုက် စိတ်ချမ်းသာပျော်ရွှင်ခဲ့ရ။ ကားတိုင်ပေါ်မှ အသွေးတော်ကြောင်း ပြောပြကြသော်လည်း ယေဟောဝါဇေဒကနုသည် ငါ့အတွက် အဓိပ္ပာယ်မရှိ။

ဇိအုန်သမီးများနှယ် မျက်ရည်စများ တလိမ့်လိမ်စီးလျက် ငါ့ဝိညာဉ်များရွှဲရွှဲစိုအောင် ငိုကြွေးမိသည်။ ငါ့အပြစ်များကို ကားတိုင်တွင် သံမှိုနှက်ပစ်သော်လည်းယေဟောဝါဇေဒကနုသည် ငါ့အတွက်မဟုတ်။ မြင့်ရာအရပ်မှ ကျေးဇူးတော်အလင်း ထွန်းတောက်သောအခါ အလန့်တကြား နိုးထမိသည်။ သေချင်စိတ် ပေါက်မိသည်။ ခိုလှုံမှီတွယ်ရာမရှိ၊ လုံခြုံရာရှာမတွေ့၊ ယေဟောဝါဗေဒကနု ဘုရားရှင်သာ တတ်နိုင်သည်။

စိုးရိမ်ကြောက်လန့်စိတ်များ နာမတော်မျက်၌ ပျောက်လွင့်ကြ၊ ငါ့အပြစ်ဗလပွနှင့် ရောက်ရဲပြီ။ အခမဲ့ပေးသော သက်စမ်းရေသောက်ဖို့လေ၊ ယေဟောဝါဇေဒကနုသည် ငါ၏အရာခပ်သိမ်း ဖြစ်လေပြီ။ ယေဟောဝါဇေဒကနု၊ ငါ့ရတနာ၊ ငါ၏ ဝါးကြွားရာ ယေဟောဝါဇေဒကနု၊ ဘယ်သောအခါမှ မခွဲနိုင်အထံတော်မှ နေရလျှင်ရေဘေးမြေဒဏ် အရင်မြင်ပြီ။ငါ့လေး၊ ငါ့မြှား၊ ငါ့ဒိုင်း၊ ငါ့ချပ်ဝတ်တန်ဆာ။

သေမင်းအရိပ် ချိုင့်ဝှမ်းလွင်ပြင် အပြောကျယ်ပါစေ အသက်ရှူမပျက်ကျော်ဖြတ်မည်၊ ငါ၏အားနည်းချက်ကို ဘုရားရှင်တော် ဖြည့်ဆည်းပေးထား အသက်ထက်ဆုံးတိုင် ချီးမွမ်းမည်၊ ယေဟောဝါစေဒကနု

ROBERT MURRAY M’CHEYNE. ထိုမေရှိယသည် ဘုရားလူများအား နေရင်းဌာနသို့ ပြန်လည်ပို့ဆောင်မည့်သူ ဖြစ်သည်။

(ဇ) ပရောဖက်ပြုချက်နှင့် ယုဒမိစ္ဆာပရောဖက်များ(၂၃:၉–၄၀)

၂၃:၉–၂၂ အခန်းကြီး(၂၃)သည် ဣသရေလနှင့် ယေရုရှလင်တွင် လိမ်ညာလှည့်စားသော မိစ္ဆာပရောဖက်များ ရှုတ်ချသည့်သင်ခန်းစာ ဖြစ်သည်။ အကယ်၍ ဘုရား နှုတ်ကပတ်တော် နာခံခြင်း ရှိကြလျှင် ဘုရားသခင်၏ အပြစ်တရားစီရင်ခြင်းကို ကြောက်ရွံ့၍ အပြစ်ဒုစရိုက်များ ရပ်စဲကြလျှင်၊ နောင်ကာလတွင် ငြိမ်သက်ခြင်း ပြန်လည်ခံစားကြရမည်။ လက်ရှိ ပြုမူလုပ်ဆောင်ချက်များသည် ဘုရားသခင်အလိုတော်နှင့် ကင်းဝေးဆန့်ကျင်နေသည်။

၂၃:၂၃–၂၉ နေရာတိုင်းတွင် ရှိ၍ အရာခပ်သိမ်းကို သိရှိတော်မူသော သဗ္ဗုညုတဉာဏ်တော်ရှင် ဘုရားသခင်သည် မိစ္ဆာပရောဖက်များ၏ စိတ်ကူးအကြံအစည်များကို သိမြင်သည်။ လူသူများအား ရုပ်တုဆင်းတု ကိုးကွယ်ရန် ဖျားယောင်း သွေးဆောင်ကြပုံကို သိသည်။ ဗာလ ပရောဖက်များ၏ စကားသည် အိပ်မက်စကားများသာ ဖြစ်သည်။ လေပွေစကားများသာ ဖြစ်သည်။ ဘုရားသခင်၏ စကားတော်နှင့်ပင် မနှိုင်းအပ်။ ဘုရားရှင်၏ နှုတ်ကပတ်တော်သည် မီးကဲ့သို့အလင်းရှိ၍၊ ကျောက်ထုတူကဲ့သို့ အချိန်စီးသည်။ ဗာလပရောဖက်စကားသည် အဖျင်းဖြစ်၍ နှုတ်ကပတ်တော်သည် ဆန်စေ့ဖြစ်သည်။

၂၃:၃၀–၃၂ ဤဗာလမိစ္ဆာပရောဖက်များနှင့် ဘုရားသခင်၏ နှုတ်ကပတ်တော်သည် ပြဒါးတစ်လမ်းသံတစ်လမ်း ဖြစ်သည်။ ထိုအကြောင်းကို YATES က ဤ သို့ရှင်းပြသည်။

မိစ္ဆာပရောဖက်ဆရာများသည် ဘုရားသခင်၏ အမိန့်အာဏာဖြင့် ဟောကြားယောင်ဆောင်ကြသည်။ သို့သော်လည်း ပြောစကားများသည် ကောက်ကျစ် စဉ်းလဲခြင်းနှင့် မုသာစကားများ ဖြစ်သည်။ ပရောဖက် ယေရမိက အချက်(၃)ချက်ဖြင့် ထောက်ပြသည်။ ထိုသူများသည် ဘုရားသခင်ကို အမှန်တကယ်မသိရှိကြ။ အကျင့်စာရိတ္တ ညံ့ဖျင်းဖောက်ပြားသူများ ဖြစ်သည်။ ပရိတ်သတ်များထံသို့ ခွန်အားဆောက်တည်ဖွယ်ရာ တရားဒေသနာ မပေးကြ။ အပြစ်ဒုစရိုက် ကျူးလွန်တက်ကြွကြသည်။ နမော်နမဲ့ ဖြစ်ကတက်စမ်း လုပ်တတ်ကြသည်။ တာဝန်ဝတ္တရားများကိုလည်း အသေအချာ နားမလည်။ ဘုရားသခင် သိကျွမ်းရာတွင် အနိမ့်ဆုံးအလွှာများ ဖြစ်သည်။ ဘုရားသခင်၏ မြင့်မြတ်ခြင်း ဇာတိတော်ကို မသိနားမလည်းဘဲ အသံကုန် ဟစ်အော်ယုံမျှနှင့် ပရိသတ်များ မည်သို့ တရားမှန် သိရှိနိုင်ကြမည်နည်း။ ထိုလူများ ဟောကြားချက်ဖြင့် ဣသရေလများ မပျက်စီးလျှင် မည်သို့ ပျက်စီးနိုင်ကြမည်နည်း။၂၈

ထိုကဲ့သို့သော ပရောဖက်မျိုး ယနေ့ယုံကြည်သူများအကြားတွင်လည်း ရှိနေကြသည်ကို သတိပြုပါ။

၂၃:၃၃–၄၀ ထိုအခိုက်တွင် ပရိသတ်က ယေရမိအား “ဘုရားသခင်၏ ဗျာဒိတ်တော် အဘယ်နည်း” သိသာထင်ရှားအောင် ပြပါဟု စိန်ခေါ်ကြသည်။ ယေရမိကလည်း သင်တို့ပင်လျှင် ဘုရားသခင်၏ ဗျာဒိတ်တော်၊ ဝန်ထုပ်ဝန်ပိုးများ ဖြစ်သည်။ သင်တို့ကို ဘုရားသခင်အဆက်အသွယ် ဖြတ်တောက်မည်ဟု ဖြေသည်။ (ဝန်ထုပ်ဝန်ပိုးဟူသော စကားလုံး ဤနေရာတွင် မသုံးရန်တားမြစ်ထားသည်။ ထိုထက် ယဉ်ပါးနားခံလာသော ဗျာဒိတ်တော်ကို အစားထိုး သုံးခိုင်းသည်)။ အကယ်၍ နှုတ်ကပတ်တော် နာခံခြင်း မရှိကြလျှင် ပြင်းပြင်းထန်ထန် အရေးယူမည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။