Jeremiah -1 -

ယေရမိအနာဂတ္တိကျမ်း - ၁

1-3ယုဒရှင်ဘုရင် အာမုန်သားယောရှိမင်း နန်းစံဆယ်သုံးနှစ်တွင်လည်းကောင်း၊ ယုဒရှင်ဘုရင်ယေရှိသားယောယကိမ် လက်ထက်၌လည်းကောင်း၊ ယုဒရှင်ဘုရင်ယောရှိသား ဇေဒကိမင်း နန်းစံဆယ်တစ်နှစ်စေ့၍ ပဉ္စမလတွင်၊ ယေရုရှလင်မြို့သားတို့ကို သိမ်းသွားချုပ်ထားသည်တိုင်အောင်၊ ထာ၀ရဘုရား၏ဗျာဒိတ်တော်ကိုခံရသော ဗင်္ယာမိန်ပြည်၊ အာနသုတ်မြို့နေ ဟိလခိသား ယဇ်ပုရောဟိတ်ယေရမိစကားမှာ၊

ယေရမိကိုရွေးကောက်ခြင်း

4ထာဝရဘုရား၏နှုတ်ကပတ်တော်သည် ငါ့ဆီသို့ရောက်၍ မိန့်တော်မူသည်ကား၊ 5သင့်ကို အမိဝမ်းထဲ၌ ငါမဖန်ဆင်းမီ သင့်ကိုငါသိပြီ။ မဖွားမီကပင် သင့်ကို ငါသန့်ရှင်းစေ၍၊ လူအမျိုးမျိုးတို့အဖို့၊ ပရောဖက်အရာ၌ ခန့်ထားပြီဟု မိန့်တော်မူ၏။ 6ငါကလည်း၊ အို အရှင်ထာဝရဘုရား၊ အကျွန်ုပ်သည် မဟောမပြောတတ်ပါ။ သူငယ်ဖြစ်ပါ၏ဟု လျှောက်လျှင်၊ 7ထာဝရဘုရားကလည်း၊ အကျွန်ုပ်သည်သူငယ်ဖြစ်ပါ၏ဟု မပြောနှင့်။ အကြင်သူရှိရာသို့ သင့်ကိုငါစေလွှတ်၏။ ထိုသူရှိရာသို့ သင်သွားရမည်။ အကြင်စကားကို ငါမှာထား၏။ ထိုစကားကို သင်ဆင့်ဆိုရမည်။ 8သူတို့ကို မကြောက်နှင့်။ သင့်ကိုကယ်နုတ်ခြင်းငှာ သင်နှင့်အတူ ငါရှိသည်ဟု မိန့်တော်မူပြီးမှ၊ 9လက်တော်ကိုဆန့်၍ ငါ့နှုတ်ကိုတို့တော်မူလျက်၊ သင်၏နှုတ်၌ ငါ့စကားကိုငါသွင်းထားပြီ။ 10ကြည့်ရှုလော့။ သင်သည် နုတ်ပယ်ဖြိုချ ဖျက်ဆီးမှောက်လှဲရသောအခွင့်၊ တည်ဆောက်စိုက်ပျိုးရသောအခွင့်နှင့် သင့်ကို လူအမျိုးမျိုးတို့၏ တိုင်းနိုင်ငံများအပေါ်မှာ ယနေ့ငါခန့်ထားပြီဟု မိန့်တော်မူ၏။

ရူပါရုံနှစ်ရပ်

11တစ်ဖန် ထာဝရဘုရား၏နှုတ်ကပတ်တော်သည် ငါ့ဆီသို့ရောက်၍၊ ယေရမိ၊ သင်သည် အဘယ်အရာကိုမြင်သနည်းဟု မေးတော်မူလျှင် ငါက၊ အကျွန်ုပ်သည် ဗာတံကိုင်းကိုမြင်ပါ၏ဟု လျှောက်သော်၊ 12ထာဝရဘုရားက၊ သင်သည် မှန်ကန်စွာမြင်ပြီ။ အကြောင်းမူကား၊ ငါ့စကားကိုပြည့်စုံစေခြင်းငှာ၊ ငါစောင့်နေမည်ဟု မိန့်တော်မူ၏။

13တစ်ဖန် ထာဝရဘုရား၏ နှုတ်ကပတ်တော်သည် ဒုတိယအကြိမ် ငါ့ဆီသို့ရောက်၍၊ သင်သည် အဘယ်အရာကို မြင်သနည်းဟု မေးတော်မူလျှင် ငါက၊ အကျွန်ုပ်သည် ဆူပွက်သောအိုးကင်းကို မြင်ပါ၏။ မြောက်ဘက်သို့ မျက်နှာပြုလျက်ရှိပါ၏ဟု လျှောက်လျှင်၊ 14ထာဝရဘုရားက၊ မြောက်မျက်နှာဘက်က ဘေးဥပဒ်သည်၊ ဤပြည်သားတို့အပေါ်သို့ ထွက်လာလိမ့်မည်။ 15အကြောင်းမူကား၊ မြောက်တိုင်းနိုင်ငံသား အမျိုးမျိုးအပေါင်းတို့ကို ငါခေါ်၍၊ သူတို့သည် လာပြီးလျှင်၊ ယေရုရှလင်မြို့ တံခါးဝများတို့၌လည်းကောင်း၊ မြို့ရိုးပတ်ဝန်းကျင်အရပ်ရပ်တို့၌လည်းကောင်း၊ ယုဒမြို့ရွာအလုံးစုံတို့၌လည်းကောင်း မိမိတို့ ရာဇပလ္လင်များကို အသီးအသီး တည်ထားကြလိမ့်မည်။ 16ပြည်သူပြည်သားတို့သည် ငါ့ကိုစွန့်သောအပြစ်၊ အခြားသောဘုရားတို့အား နံ့သာပေါင်းကိုမီးရှို့သောအပြစ်၊ မိမိတို့လက်ဖြင့် လုပ်သောအရာကို ကိုးကွယ်သောအပြစ် ရှိသမျှတို့ကြောင့်၊ သူတို့ကိုငါစစ်ကြော၍၊ အပြစ်နှင့်အလျောက် စီရင်မည်။ 17သို့ဖြစ်၍ သင်သည် ခါးပန်းကိုစည်း၍ထလော့။ ငါမှာထားသမျှကို သူတို့အားဟောပြောလော့။ သူတို့ရှေ့မှာ သင့်ကို ငါအရှက်မခွဲရမည်အကြောင်း သူတို့ကို မကြောက်နှင့်။ 18ကြည့်ရှုလော့။ ယုဒရှင်ဘုရင်၊ မင်းသား၊ ယဇ်ပုရောဟိတ်၊ ပြည်သူပြည်သားတည်းဟူသော တစ်နိုင်ငံလုံး တစ်ဖက်၌၊ ခိုင်ခံ့သောမြို့၊ သံတိုင်၊ ကြေးဝါထရံအရာ၌ သင့်ကို ယနေ့ငါခန့်ထား၏။ 19သူတို့သည် သင့်ကိုစစ်တိုက်၍ မနိုင်ရကြ။ သင့်ကို ကယ်နုတ်ခြင်းငှာ၊ သင်နှင့်အတူ ငါရှိသည်ဟု ထာဝရဘုရား မိန့်တော်မူ၏။

ယေရမိအနာဂတ္တိကျမ်း - ၁ (အနက်ဖွင့်)

၁။ နိဒါန်း၊ယေရမိအားပရောဖက်ရာထူးခန့်အပ်ခြင်း(အခန်း၁)

၁:၁–၁၀ ပထမဆုံးအခန်းတွင် ယေရမိသည် ဟိလကိ၏ သားဖြစ်ကြောင်း မိတ်ဆက်ထားသည်။ ဟိလကိသည် အာနသုတ်မြို့၌ ဗင်္ယာမိန်အနွယ်ဝင် ယဇ်ပုရောဟိတ် တစ်ပါး ဖြစ်သည်။ မမွေးဖွားခင်ကပင် ပရောဖက်အဖြစ် ဘိသိက်ပေးထားခံရသူ ဖြစ်သည်(ငယ်၅)။ ဓလေ့ထုံးစံအားဖြင့်(ငယ်၆)၊ တန်ခိုးတော်အားဖြင့် (ငယ်၈၊၉) ရှေးကုသိုလ် ပါရမီအားဖြင့် (ငယ်၁၀၊၁၁) ဘိသိက်ပေးထားသည်။ ထိုအကြောင်းကို William Kelly က ဤသို့ ဆိုထားသည်။

ဟေရှာယနှင့် နှိုင်းယှဉ်လျှင် စရိုက်လက္ခဏာနှင့် ဟန်ပန်မတူညီမှုများ တွေ့ရမည်။ ဣသရေလလူမျိုးသည် လောကသားများ ဗဟိုပြုရမည့် ရွေးကောက်တော်မူသော လူမျိုးတော် ဖြစ်ကြောင်း အတိအလင်း မဆိုထားသော်လည်း ဘုရားသခင်နှင့် ဝိညာဉ်ရေးရာ ဆက်နွယ်ပုံကို တွေ့ရသည်။ စိတ်နှလုံး မာကြောခါးသီး နေသရွေ့ ယုဒလူမျိုးသည်လည်း အပြစ်စီရင်ခြင်း ခံရမည့်အကြောင်းကို ဘုရား သခင်၏ ဝိညာဉ်တော်က ယေရမိအား ဖွင့်ပြထားသည်။ ပရောဖက်များ၏ ဘဝအသက်တာများကို လေ့လာလျှင် ယေရမိကဲ့သို့ ကိုယ်တိုင် အတွေ့အကြုံ၊ အတွေးအမြင်၊ နည်းလမ်းနှင့် အသိဝိညာဉ်ရှိသူ ရှားပါးသည်။၃

၁:၁၁–၁၉ ထို့နောက် ယေဟောဝါ ဘုရားသခင်က ပရောဖက်ယေရမိအား မျက်ဝါးထင်ထင် ရူပါရုံပြသသည်။ ဗာတံ(ဗာဒံ)ကိုင်း နှင့် ဆူပွတ်သောအိုး တွေ့ ရသည်။ ဗာတံတိုင်းကို မြင်ရခြင်းသည် ဘုရားသခင်ဗျာဒိတ်တော် ပြည့်စုံခါနီးကြောင်း အမှတ်သင်္ကေတ (ငယ်၁၁၊၁၂) ဖြစ်သည်။ ဆူပွတ်နေသောအိုး မြောက်ဘက်သို့ မျက်နှာပြုသည်မှာ ယုဒများရုပ်တု ဆင်းတုကိုးကွယ်ကြသောကြောင့် ဘုရားသခင် အမျက်တော် ဟုန်းဟုန်းတောက်၍ မြောက်အရပ်ရှိ ဗာဗုလုန်တို့ဝင် ရောက်မည့်အကြောင်း ဖြစ်၏။ (ငယ်၁၃-၁၆)ယုဒဘုရင်များနန်းမျိုးနန်းနွယ် များ၊ယဇ်ပုရောဟိတ်နှင့်နိုင်ငံသားများကံကြမ္မာငင်ကြမည့်အကြောင်း၊ သို့သော် ဘုရားသခင်က ကူညီစောင့်ရှောက်မည့်အကြောင်း ဟောသောအခါ တိုင်းသူ ပြည်သားများက မကျေနပ်ဘဲဆန့်ကျင်ရန် ရှာကြသည်။ သို့သော် ဘုရားသခင်သည် ယေရမိနှင့်အတူ ရှိနေသောကြောင့် ဘေးရန်မသင့်နိုင် (ငယ်၁၇-၁၉)။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။