Isaiah -8 -

ဟေရှာယအနာဂတ္တိကျမ်း - ၈

ဟေရှာယ၏သားသည်လူမျိုးတော်အတွက်နိမိတ်

1တစ်ဖန် ထာဝရဘုရားက၊ သင်သည် ကြီးသော ကျောက်သင်ပုန်းကိုယူပြီးလျှင်၊ အသော့လုယက် မြန်မြန်ဖျက်လော့ဟု ဆိုလိုသော၊ မဟေရရှာလလဟာရှဗတ်ဟူသော အက္ခရာစာလုံးကို လူဘာသာအားဖြင့် ရေးထားလော့ဟု ငါ့အား မိန့်တော်မူ၏။ 2ထိုအခါ သက်သေခံစေခြင်းအလိုငှာ၊ ယုံလောက်သောသက်သေ၊ ယဇ်ပုရောဟိတ်ဥရိယနှင့် ယေဗရခိ၏သား ဇာခိရိတို့ကို ငါခေါ်ထား၏။ 3ထိုနောက်မှ ငါသည် ပရောဖက်ကတော်ကို ချဉ်းသဖြင့်၊ သူသည် ပဋိသန္ဓေစွဲယူ၍ သားယောက်ျားကို ဖွားမြင်လေ၏။ ထာဝရဘုရားကလည်း၊ ထိုသားကို မဟေရရှာလလဟာရှဗတ်ဟူသော အမည်ဖြင့် မှည့်လော့။ 4အကြောင်းမူကား၊ ထိုသူငယ်သည် အမိအဘဟု မခေါ်တတ်မီ၊ ဒမာသက်မြို့၏စည်းစိမ်၊ ရှမာရိမြို့၌ လုယက်သောဥစ္စာကို အာရှုရိရှင်ဘုရင်သည် သိမ်းသွားလိမ့်မည်ဟု မိန့်တော်မူ၏။

အာရှုရိဘုရင်လာရောက်လိမ့်မည်

5တစ်ဖန် ထာဝရဘုရားက၊ ဤလူမျိုးသည် ဖြည်းညင်းစွာစီးသော ရှိလောင်ချောင်းကို ငြင်းပယ်၍၊ 6ရေဇိန်နှင့် ရေမလိသားတို့၌ ဝမ်းမြောက်ကြသောကြောင့်၊ 7ထာဝရဘုရားသည် အလုံးအရင်းပါသော အာရှုရိရှင်ဘုရင်တည်းဟူသော၊ ခွန်အားဗလကြီး၍ များသောမြစ်ရေနှင့် သူတို့ကို လွှမ်းမိုးစေတော်မူသဖြင့်၊ ထိုမြစ်သည် မိမိချောင်းများကို လွှမ်း၍၊ မိမိကမ်းများကိုလျှံလျက်၊ 8ယုဒပြည်ကို ချင်းနင်းလွှမ်းမိုးဖြန့်သွား၍၊ လည်ပင်းတိုင်အောင်မီလိမ့်မည်။ သူ၏အတောင်တို့ကိုလည်း ဖြန့်သဖြင့်၊ ကိုယ်တော်၏မြေတစ်ပြင်လုံးကို အုပ်မိုးလိမ့်မည်၊ အို ဧမာနွေလဟု မိန့်တော်မူ၏။

9အချင်းလူများတို့၊ သင်းဖွဲ့၍ မှိုင်တွေကြလော့။ ဝေးသောပြည်သားအပေါင်းတို့၊ နားထောင်ကြလော့။ ခါးစည်း၍ မှိုင်တွေကြလော့။ ခါးစည်း၍ မှိုင်တွေကြလော့။ 10တိုင်ပင်ကြလော့။ သင်တို့အကြံသည် ပျက်လိမ့်မည်။ စီရင်ကြလော့။ စီရင်သည်အတိုင်း မတည်ရ။ အကြောင်းမူကား၊ ဘုရားသခင်သည် ငါတို့ဘက်၌ရှိတော်မူ၏။

ပရောဖက်အားသတိပေးခြင်း

11ဤလူမျိုး၏ဘာသာဓလေ့အတိုင်း၊ ငါမကျင့်ရမည်အကြောင်း၊ ထာဝရဘုရားသည် တန်ခိုးပြလျက်၊ ငါ့ကို သွန်သင်၍ မိန့်တော်မူသည်ကား၊ 12သင်းဖွဲ့ခြင်းဟု၊ ဤလူမျိုးဆိုသမျှအတိုင်း၊ သင်တို့သည် သင်းဖွဲ့ခြင်းဟု မဆိုကြနှင့်။ သူတို့ကြောက်တတ်သောအရာကို မကြောက်ကြနှင့်။ မထိတ်လန့်ကြနှင့်။ 13ကောင်းကင်ဗိုလ်ခြေ အရှင်ထာဝရဘုရားကို ရိုသေခြင်းရှိကြလော့။ ထိုဘုရားကိုသာ ကြောက်ရွံ့ခြင်း၊ ထိတ်လန့်ခြင်း ရှိကြလော့။ 14ထိုသို့ပြုလျှင်၊ ထိုဘုရားသည် သင်တို့ခိုလှုံရာ ဖြစ်တော်မူလိမ့်မည်။ သို့ရာတွင် ဣသရေလလူနှစ်မျိုးတို့ ထိမိ၍လဲစရာကျောက်၊ မှားယွင်းစရာကျောက်၊ ယေရုရှလင်မြို့သားတို့၌ ကျော့ကွင်းနှင့် ထောင်ချောက် ဖြစ်တော်မူလိမ့်မည်။ 15ထိုသူအများတို့သည် ထိမိ၍ တိမ်းလဲကျိုးပဲ့ခြင်း၊ ကျော့မိဖမ်းဆီးခြင်းသို့ ရောက်ကြလိမ့်မည်။ 16ဤသက်သေခံချက်ကို ငါ့တပည့်တို့တွင် ထုပ်ထား၍၊ ပညတ်တရားကို တံဆိပ်ခတ်လော့ဟု မိန့်တော်မူ၏။ 17ယာကုပ်အမျိုးသားတို့တွင် မျက်နှာတော်ကို ကွယ်ထားတော်မူသော ထာဝရဘုရားကို ငါသည် ဆိုင်းငံ့လျက် မျှော်လင့်မည်။ 18ငါမှစ၍ ငါ့အား ထာဝရဘုရားပေးတော်မူသော သူငယ်တို့သည် ရှိကြ၏။ ဇိအုန်တောင်ပေါ်မှာ ကျိန်းဝပ်တော်မူသော ကောင်းကင်ဗိုလ်ခြေအရှင် ထာဝရဘုရားထံတော်က၊ ဣသရေလအမျိုး၌ ပုပ္ပနိမိတ်နှင့် အံ့ဖွယ်သောအရာ ဖြစ်စေခြင်းငှာ ပေးတော်မူသတည်း။ 19တိုးတိုးပြော၍ မန္တန်သရဇ္ဈာယ်တတ်သော နတ်ဝင်နှင့် စုန်းတို့၌ ဆည်းကပ်ကြလော့ဟု သင်တို့အား ဆိုလျှင်မူကား၊ လူတို့သည် မိမိတို့ဘုရားသခင်၌ မဆည်းကပ်အပ်သလော။ အသက်ရှင်သောသူ၏အမှုမှာ အသက်သေသောသူ၌ ဆည်းကပ်အပ်သလော။ 20တရားတော်ကိုလည်းကောင်း၊ သက်သေခံတော်မူချက်ကိုလည်းကောင်း နားထောင်ကြကုန်။ သူတို့ပြောသောစကားသည် နှုတ်ကပတ်တော်နှင့်မညီလျှင်၊ သူတို့၌ အရုဏ်မတက်သေး။

ဒုက္ခဆင်းရဲကာလ

21ပင်ပန်းခြင်းနှင့် မွတ်သိပ်ခြင်းကိုခံလျက် လွန်သွားရကြလိမ့်မည်။ မွတ်သိပ်သောအခါလည်း ကိုယ်ကိုကိုယ်နှောင့်ယှက်၍၊ မိမိတို့ ရှင်ဘုရင်နှင့် မိမိတို့ဘုရားသခင်ကို ကျိန်ဆဲကြလိမ့်မည်။ 22အထက်သို့ မျှော်သည်ဖြစ်စေ၊ မြေကြီးကို ကြည့်သည်ဖြစ်စေ၊ ဒုက္ခဆင်းရဲနှင့် မှောင်မိုက်အတိရှိပါ၏။ ထူထပ်သောမှောင်မိုက်နှင့် တွေ့၍၊ အလင်းကွယ်ပျောက်ရာသို့ နှင်ထုတ်ခြင်းကို ခံရကြလိမ့်မည်။

ဟေရှာယအနာဂတ္တိကျမ်း - ၈ (အနက်ဖွင့်)

၂။ အံ့ချီးဖွယ်ရာမေရှိယနယ်မြေ(အခန်း၈-၁၀)

၈:၁-၄ ဘုရားသခင်ကဟေရှာယအား“ဟေရရှာလဟာရှဗတ်”စကား လုံးကိုပီပီသသရေးခိုင်းသည်။ သက်သေအဖြစ်ယဇ်ပုရောဟိတ်ခုရိယနှင့်ယေဗရခိ၏သားဇာခရိကိုလည်းခေါ်ခိုင်းထားသည်။ ရေးထားသောစာ၏အဓိပ္ပာယ် မှာ“အသော့အလုအယက်မြန်မြန်ဖျက်လော့”ဟုအနက်ရသည်။ အာရှုရိယများ က ရှုရိယပြည်နှင့်ဣသရေလပြည်တိုက်ခိုက်ဖျက်ဆီးမည့်အကြောင်းဖြစ်သည်။ ဟေရှာယ၏ဒုတိယသားကင်ပွန်းတပ်ရာတွင်ပေးမည့်အမည်နာမအနက်အဓိ ပ္ပါယ်ဘုရားသခင်ကဖွင့်ပြခြင်းဖြစ်သည်။

၈:၅-၁၀ ဣသရေလနှင့်ပက်သက်သောစကားတခွန်းကိုလည်းဘုရားသ ခင်ကအမိန့်ရှိသည်။ အဘယ်ကြောင့်ဆိုသော်မြောက်ပိုင်းနိုင်ငံသားများသည် ဘုရားသခင်ပေးသော ရှိလောင် ချောင်းကိုငြင်းပယ်ကြသောကြောင့်ရေစီးအဟုန် ပြင်းသောမြစ်ရေကိုစီးဆင်းဖြတ်သန်းစေသည်။ (ရှိလောင်ကိုယော၉:၇တွင် လည်းတွေ့ရသည်။) ထိုရေသည်ယေရုရှလင်မှလျှို့ဝှက်စွာစီးဆင်းသောရေဖြစ် ၍၊ ဘုရားသခင်နှုတ်ကပတ်တော်သင်္ကေတအမှတ်အသားဖြစ်သည်။ သို့မဟုတ် ဘုရားသခင်အားယုံကြည်ကိုးစားခြင်းးလက္ခဏာဖြစ်သည်။ ဥဖရတ်မြစ်ရေသည်ဣသရေလနှင့်ရှုရိပြည်ကိုအနိုင်ယူအောင်မြင်မည့် အာရှုရိပြည် သင်္ကေတဖြစ်သည်။ ယုဒပြည်ကိုလည်းအောင်မြင်လွှမ်းမိုးမည်။ ဧမာနွေလ ဘုရားနယ်မြေသို့ပျံ့နှံ့မည်။ သို့သော်အားလုံးဝါးမြိုမည်မဟုတ်။ လည်ပင်းထိသာ နစ်မြုပ်မည်။ ယုဒတို့၏ရန်သူများသည် ဆင်ကြံကြံသော်လည်းကြံစည်သည့်အ တိုင်းမအောင်မြင်နိုင်ကြ။ အဘယ်ကြောင့်ဆိုသော်ယုဒလူမျိုးကိုဘုရားသခင်က သံယောဇဉ်မပြတ်။

၈:၁၁-၁၅ ဘုရားသခင်ကဟေရှာယအားသူ့လူများသို့သတိပေးခိုင်းထားသည်။ ကြောက်အား လန့်အားဖြင့်စစ်မရောက်မီမြှားကုန်၍ ရန်သူများထံသို့အညံ့ ခံပူပေါင်းခြင်းမပြုရန်နှင့်ဘုရားသခင်ကိုခိုလှုံကြလျှင်လုံခြုံကြမည်။ ဣသရေလလူမျိုးကျောက်ခလုတ်ကန်သင်းအားတိုက်မိသူများသည်လဲကျကြမည်။

၈:၁၆-၁၈ ဘုရားသခင်ဖော်ပြသောနှုတ်ကပတ်တော်ရှိသမျှအားလုံးပြီး ပြည့်စုံသည့်အခါသမယမရောက်မချင်းစိတ်နှလုံးတွင်မြဲမြံစွာစွဲမှတ်ကြဖို့ ဟေရှာယကိုမိန့်မှာခိုင်းသည်။ ဟေရှာယကလည်းသူ့လူများအပေါ်ဘုရားသခင်က ထူးခြားစွာပေးထားသောဗျာဒိတ်များအားပြီးပြည့်စုံသည့်အချိန်ထိမျှော်လင့် ချက်ဖြင့်စောင့်မျှော်သည်။ ဟေရှာယ(ယေဟောဝါဘုရား၏အစေခံ) Shearjashub(အနည်းငယ်သာပြန်လာမည်)။ မဟေရရှာလလဟာရှဗတ်(မြန် မြန်ဖျက်)ဟူသောထူးထူးခြားခြားအမည်နာမများသည် ဣသရေလတို့အပေါ် ဘုရားသခင်၏ ကရုဏာတော်နှင့်ရန်သူများအပေါ်တရားစီရင်မည့်အကြောင်းအချက်များဖြစ်သည်။

၈:၁၉ ဟေရှာယကသူ့လူများအားမန္တန်သရဇ္စျာယ်တတ်သောနတ်ဝင်နှင့် စုန်းကဝေများကိုမဆည်းကပ်ရန်သတိပေးလိုက်သည်။ လူမှန်လျှင်အသက်ရှင် သောဘုရားသခင်ကိုသာကိုးစားရသည်။ အသက်မရှိ၊အသေကောင်များကိုကိုး ကွယ်ခြင်းသည်လည်းထိုအမှုအကျင့်များနှင့်ထူးမခြားနားဖြစ်နေသည်။

ကြီးမားသောအခက်အခဲတိုင်းသည်လူ့ဝိညာဉ်ရေးရာနောက်ဆက်တွဲ ပေါက်ကွဲမှုများဖြစ်သည်။ ထိုအတိုင်းပင်ယုဒနှင့်ဣသရေလတို့ဖမ်းဆီးခြင်းမခံ ကြမီဝိညာဉ်ရေးရာအသိရှုပ်ထွေးခဲ့သည်။ ထို့ကြောင့်လည်းခရစ်တော်ဘုရားလူ့ဇာတိခံယူခြင်းနှင့်အသေတော်ခံတော်မူခြင်းအကြောင်းဖန်လာသည်။ ယနေ့ ခေတ်ကာလတိုင်အောင်ထိုအတိုင်းဖြစ်နေကြသည်။ ထို့ကြောင့်ဘုရားသခင်ကလိုအပ်သောလမ်းညွှန်မှုနှင့်ဝိညာဉ်ရေးရာလိုအပ်ချက်များကိုသမ္မာကျမ်းစာ တွင်ရေးသားပေးခြင်းဖြင့်စောင့်ရှောက်ထောက်မနေပါသည်(၂တိ၃:၁၆၊၁၈)။၁၉

၈:၂၀-၂၂ ဓမ္မသစ်ဆရာဟူသမျှသည်ဘုရားသခင်၏နှုတ်ကပတ်ဖြင့်စစ် ဆေးစမ်းသပ်ခြင်းခံရမည်။ သင်ကြားပို့ချက်များသည်သမ္မာကျမ်းစာနှင့်မကိုက် ညီလျှင်“အခြားသူများအားအလင်းပေးနိုင်မည်မဟုတ်”။ အမှားမှားအယွင်း ယွင်းသည်ငတ်မွတ်ဆင်းရဲခြင်းဖိစီးမှုဒဏ်ခံကြမည်။ ဘုရားသခင်ကိုပြစ်မှား ကြမည်။ ဘုရားသခင်ကိုတလွဲအထင်မှားကြမည်။ သို့သော်ရှာသာရှာသည်၊ အဖြေမှန်တွေ့မည်မဟုတ်။ ဒုက္ခဆင်းရဲနှင့်မှောင်မိုက်အထိသာရောက်သွား မည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။