Isaiah -47 -

ဟေရှာယအနာဂတ္တိကျမ်း - ၄၇

ဗာဗုလုန်မြို့ကိုစီရင်ခြင်း

1အို ဗာဗုလုန် သတို့သမီးကညာ၊ ဆင်း၍ မြေမှုန့်၌ထိုင်လော့။ အို ခါလဒဲသတို့သမီး၊ ရာဇပလ္လင်မရှိဘဲ မြေပေါ်မှာထိုင်လော့။ သင့်ကို နူးညံ့သိမ်မွေ့သောသူဟူ၍ နောက်တစ်ဖန်မခေါ်ရ။ 2ကြိတ်ဆုံကိုယူ၍ စပါးကို ကြိတ်လော့။ မျက်နှာဖုံးကို ဖွင့်လော့။ ရှည်သောအင်္ကျီကို ချွတ်လော့။ ပေါင်အဝတ်ကိုပင့်၍ မြစ်ကိုကူးလော့။ 3သင်သည် အဝတ်အချည်းစည်းရှိ၍၊ အရှက်ကွဲခြင်းကို ခံရမည်။ ငါသည် အပြစ်ဒဏ်ကို ပေးမည်။ အဘယ်သူနှင့်မျှ မိတ်သဟာယမဖွဲ့။

4ငါတို့ကို ရွေးနုတ်သောသူကား၊ ကောင်းကင်ဗိုလ်ခြေအရှင် ထာဝရဘုရား၊ ဣသရေလအမျိုး၏ သန့်ရှင်းသောဘုရားတည်းဟူသော ဘွဲ့နာမရှိတော်မူ၏။

5အို ခါလဒဲသတို့သမီး၊ တိတ်ဆိတ်စွာ ထိုင်လော့။ မိုက်ရာသို့ သွားလော့။ သင့်ကို နိုင်ငံတို့၏အရှင်မဟူ၍ နောက်တစ်ဖန် မခေါ်ရ။ 6ငါသည် ငါ၏လူတို့ကိုအမျက်ထွက်သောကြောင့်၊ ငါ၏အမွေကိုရှုတ်ချ၍ သင့်လက်သို့ အပ်လိုက်၏။ သင်သည် သနားသောစိတ်မရှိ။ အသက်ကြီးသူတို့အပေါ်မှာ လေးသောထမ်းပိုးကို တင်လေပြီ။ 7သင်ကလည်း၊ ငါသည် အရှင်မ၏အရာ၌ အစဉ်အမြဲနေမည်ဟု ထင်သောကြောင့်၊ ဤအမှုအရာတို့ကို မဆင်ခြင်။ သင်၌ နောက်ဆုံးဖြစ်လတ္တံ့သောအမှုကို မအောက်မေ့။ 8ထိုကြောင့်၊ ကာမဂုဏ်၌ပျော်မွေ့၍၊ သောကကင်းလွတ်လျက် နေသောသူ၊ ငါရှိ၏။ ငါမှတစ်ပါး အဘယ်သူမျှမရှိ။ ငါသည် မုဆိုးမကဲ့သို့ ထိုင်၍မနေရ။ သားဆုံးခြင်းကို ငါမခံရဟု အောက်မေ့သောသူ၊ နားထောင်လော့။ 9သင်သည် ပြုစားသောအတတ်နှင့် နတ်ဝိဇ္ဇာအတတ်များတို့ကို အလွန်ပြုစုသော်လည်း၊ တစ်နေ့တစ်ခဏခြင်းတွင် သားဆုံးခြင်းနှင့် လင်ဆုံးခြင်းတည်းဟူသော ဘေးနှစ်ပါးတို့သည် သင်၌ရောက်လိမ့်မည်။ သင်၏အပေါ်၌ အကုန်အစင် သင့်ရောက်လိမ့်မည်။ 10သင်သည် ကိုယ်ပြုသော အဓမ္မအမှုကို ကိုးစားပြီ။ ငါ့ကို အဘယ်သူမျှမမြင်ဟု ဆိုပြီ။ သင့်ဉာဏ်နှင့် သင့်ပညာအတတ်သည်၊ သင်၏စိတ်ကို မှောက်လှန်သည်ဖြစ်၍၊ သင်ကငါရှိ၏၊ ငါမှတစ်ပါး အဘယ်သူမျှမရှိဟု အောက်မေ့ပြီ။ 11ထိုကြောင့်၊ အဆုံးမထင်သော ဘေးဥပဒ်သည် သင်၏အပေါ်မှာ ရောက်လိမ့်မည်။ သင်သည် မဖြေနိုင်သော အပြစ်ဒဏ်နှင့်လည်းကောင်း၊ မမျှော်လင့်နိုင်အောင် ချက်ချင်း ဖျက်ဆီးခြင်းနှင့်လည်းကောင်း တွေ့ကြုံရလိမ့်မည်။ 12သင်သည် ငယ်သောအရွယ်မှစ၍၊ ကြိုးစားအားထုတ်သော နတ်ဝိဇ္ဇာအတတ်နှင့်၊ ပြုစားသောအတတ် အမျိုးမျိုးတို့ကို အမှီပြု၍ တည်နေလော့။ အကျိုးကို ရကောင်းလျှင် ရလိမ့်မည်။ နိုင်ကောင်းလျှင် နိုင်လိမ့်မည်။ 13သင်သည် များပြားသောတိုင်ပင်ခြင်းအားဖြင့် ပင်ပန်းလှပြီ။ မိုးကောင်းကင်ကို ကြည့်ရှုသောသူ၊ ကြယ်နက္ခတ်တို့ကို မှတ်သောသူ၊ သင်၌ဖြစ်လတ္တံ့သောအမှုကို၊ လ၏အခြင်းအရာအားဖြင့် ဟောတတ်သော သူတို့သည်ထ၍ သင့်ကိုယခု ကယ်တင်ကြစေ။ 14သူတို့သည် အမှိုက်ကဲ့သို့ဖြစ်၍ မီးရှို့ခြင်းကို ခံရကြလိမ့်မည်။ မီးအရှိန်မှ မိမိတို့ကို မကယ်မနုတ်ရကြ။ နွေးစရာဖို့ မီးတစ်ခဲမျှ၊ လှုံစရာဖို့ မီးအလျှင်းမျှ မကျန်ရစ်ရ။ 15သင်နှင့် ဝိုင်းညီ၍ အမှုဆောင်ရွက်သောသူ၊ သင်ငယ်သော အရွယ်မှစ၍ သင်နှင့် ဖောက်ကားရောင်းဝယ်သောသူတို့သည် သင်၌ ထိုသို့ဖြစ်ကြ၍၊ ကိုယ်စီကိုယ်စီ မိမိနေရာအရပ်သို့လွှဲသွားသဖြင့်၊ သင့်ကို ကယ်တင်သောသူ တစ်စုံတစ်ယောက်မျှ မရှိရ။

ဟေရှာယအနာဂတ္တိကျမ်း - ၄၇ (အနက်ဖွင့်)

၈။ ဗာဗုလုန်ပျက်စီးခြင်း(အခန်း၄၇)

၄၇:၁-၄ ဗာဗုလုန်ကိုနန်းကျမဒီ ဘုရင်ပျိုမနှင့်ပုံနှိုင်းထားသည်။ သရဖူစွန့် လွှတ်ပြီး မြစ်ရိုးတလျှောက်တွင် တောက်တိုမယ်ရအစေခံမ လုပ်နေ ရသည်။ မျက်နှာအုတ်လျက်ကြိတ်ဆုံတွင် ဆန်ဖွတ်နေရပြီ။ ယခုမူ လူတစ်ယောက်မှမကျန် မျိုးတုန်းအောင် ဘုရားသခင်က အရေးယူအပြစ်ပေးမည်။ အဘယ်ကြောင့်ဆို သော် တချိန်က ဣသရေလတို့၏ အရှင်သခင်၊ ကယ်တင်ရှင်သဖွယ်လေထွား ခဲ့သည်။

၄၇း၅-၁၅ ဒုစရိုကျအပွစျ (၄) မြိုးဖွငျ့ ဗာဗုနျလုနျကို တရားစီရငျမညျ။

၁။ ဘုရားသခင်က ဘုရား၏လူများအား ဖမ်းဆီးခေါ်ဆောင်ခိုင်းသော်လည်းရက်စက်ကြမ်းကြုတ်စွာ ဆက်ဆံကျွန်ပြုဖို့မခိုင်း။ ယခုအခါတွင် “နိုင်ငံ တို့၏အရှင်မ” အဖြစ်ခံယူချင်သည်။ သို့သော် ဘုရားရှင်က “နိုင်ငံတို့၏အရှင်မအဖြစ် ဘယ်သောအခါမှမဖြစ်ရ” ဟုဆိုသည်။

၂။ သူ့စည်းစိမ်ဥစ္စာဓနအား ဘယ်အရာကမှမဖျက်ဆီးနိုင်လေ.မောက်မာဝါ ကြွားထောင်လွှားခဲ့သည်။ သို့သော် တနေ့သောအခါ အမိမဲ့သားရေနည်းငါး ကူဖေါ်လောက်ဖက်မရှိသော မုဆိုးမဖြစ်ဦးမည်။ ကံဆိုးမသွားလေရာ မိုးလိုက်လို့ ရွာဦးမည်ဟု ဆိုသည်။

၃။ ညစ်ညမ်းယုတ်မာသော လမ်းစဉ်ဖြင့် သူတပါးကို နိုင်စားခဲ့သည်။ မတရား မသန့်ရှင်းသော နည်းဖြင့် စီးပွားရှာစားခဲ့သည်။ ထိုအမူအရာများသည် မည်သူ မှမသိမမြင်ရ စိတ်ထဲမှာကြွားထားသော်လည်း ကံတူအကျိုးပေးခံစား ရဦးမည်။ ဝဋ်လည်ဦးမည်။

၄။ ဗေဒင်ကိန်းဂဏာန်း၊ အောက်လမ်းပညာများကို သုံးစားခဲ့သည်။ ထိုအကြောင်းကို Jennings က “သူ၏ညစ်ပတ်စုတ်ပဲ့မှု စုံလင်အောင် ယေ ဟောဝါဘုရားက ဖြည့်ဆည်းပေးသည်”၅၈ ဟုဆိုသည်။ ထိုအပြင်ဒုစရိုက် အယူ အမှားမောဟတရား အတွက် ဘုရားသခင်က မီးပုံထဲသို့ ရှို့ပစ်မည်မဟုတ်။ ကိုယ့် ထိုက်နှင့်ကိုယ့်ကံဖြစ်သည်။ မည်သူမှမကယ်နိုင်သောပျက်စီးခြင်းလမ်းသို့ရေ စုန်မျှောရမည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။