Isaiah -45 -

ဟေရှာယအနာဂတ္တိကျမ်း - ၄၅

ကုရုဘုရင်ကိုအသုံးပြုခြင်း

1အကြင်သူ၏ရှေ့မှာ အပြည်ပြည်တို့ကို နှိမ့်ချ၍၊ ရှင်ဘုရင်တို့ကို တန်ဆာချွတ်လျက်၊ အတွင်းတံခါးတို့ကို မပိတ်ရဘဲ၊ နှစ်ရွက်ရှိသော တံခါးတို့ကို ဖွင့်ခြင်းငှာ၊ အကြင်သူ၏ လက်ယာလက်ကို ငါထောက်မ၏။ ထိုသူတည်းဟူသော ကုရုမင်း၊ ထာဝရဘုရားပေးတော်မူ၍ ဘိသိက်ခံသောမင်းအား မိန့်တော်မူသည်ကား၊ 2သင့်ရှေ့မှာ ငါသွား၍ မြင့်သောအရပ်ကို ညီစေမည်။ ကြေးဝါတံခါးတို့ကို ချိုး၍၊ သံကန့်လန့်တို့ကို အပိုင်းပိုင်းဖြတ်မည်။ 3မှောင်မိုက်၌ရှိသော ဘဏ္ဍာ၊ လုံခြုံစွာ ဝှက်ထားသောဥစ္စာတို့ကို သင့်အားငါပေးမည်။ သို့ဖြစ်၍၊ ငါသည် သင့်ကို နာမည်ဖြင့်ခေါ်သော ဣသရေလအမျိုး၏ ဘုရားသခင်၊ ထာဝရဘုရား ဖြစ်တော်မူကြောင်းကို သင်သိရလိမ့်မည်။ 4ငါ့ကျွန်ယာကုပ်၊ ငါရွေးကောက်သောသူ ဣသရေလအတွက်၊ ငါသည် သင့်ကို နာမည်ဖြင့်ခေါ်၏။ သင်သည် ငါ့ကိုမသိသော်လည်း၊ သင်၌ နာမည်သစ်ကို ထပ်၍ပေး၏။ 5ငါတစ်ပါးတည်းသာ ထာဝရဘုရားဖြစ်၏။ ငါမှတစ်ပါး အခြားသော ဘုရားသခင်မရှိ။ သင်သည် ငါ့ကို မသိသော်လည်း၊ သင်၏ခါးကို ငါစည်း၏။ 6သို့ဖြစ်၍ ငါမှတစ်ပါး အခြားသော ဘုရားမရှိ၊ ငါတစ်ပါးတည်းသာ ထာဝရဘုရား ဖြစ်ကြောင်းကို၊ နေထွက်ရာအရပ်သားနှင့် အနောက်မျက်နှာသားတို့သည် သိရကြလိမ့်မည်။ 7ငါသည် အလင်းကိုလုပ်၏။ အမိုက်ကိုလည်း ဖန်ဆင်း၏။ ငြိမ်သက်ခြင်းကို ဖြစ်စေ၏။ အမင်္ဂလာကိုလည်း ဖန်ဆင်း၏။ ခပ်သိမ်းသော အမူအရာတို့ကို ငါထာဝရဘုရား ပြုတော်မူ၏။

ဖန်ဆင်းရှင်ထာဝရဘုရား

8မိုးကောင်းကင်တို့၊ အထက်မှယိုကြလော့။ မိုးတိမ်တို့သည် တရားမိုးရွာကြစေ။ မြေကြီးသည် ပွင့်၍ ကယ်တင်ခြင်းအသီးကို သီးစေ။ ဖြောင့်မတ်ခြင်းတရားသည် တစ်ပြိုင်နက်ပေါက်စေ။ ထိုသို့ ငါထာဝရဘုရား ဖန်ဆင်း၏။

9အကြင်သူသည် မိမိကို ဖန်ဆင်းသောသူနှင့် ဆန့်ကျင်ဘက်ပြု၏၊ ထိုသူသည် အမင်္ဂလာရှိ၏။ မြေအိုးခြမ်းတို့တွင် အိုးခြမ်းပါတကား။ အိုးမြေက၊ သင်သည် အဘယ်သို့သောအရာကို လုပ်သနည်းဟု အိုးထိန်းသမားကို ဆိုရမည်လော။ ငါ့ကိုလုပ်သောသူ၌ လက်မရှိဟု သင်လုပ်သောအရာက ဆိုရမည်လော။ 10မိမိအဘအား၊ သင်သည် အဘယ်သို့သော အရာကို ဖြစ်ပွားစေသနည်း ဟူ၍လည်းကောင်း၊ မိမိအမိအား၊ သင်သည် အဘယ်သို့သော အရာကို မွေးဖွားသနည်း ဟူ၍လည်းကောင်း ဆိုသောသူသည် အမင်္ဂလာရှိ၏။

11ဣသရေလအမျိုး၏ သန့်ရှင်းသောဘုရား၊ ထိုအမျိုးကို ဖန်ဆင်းသော ထာဝရဘုရား မိန့်တော်မူသည်ကား၊ သင်တို့သည် ဖြစ်လတ္တံ့သောအမှုတို့ကို ငါ့ထံ၌ မေးမြန်းကြလော့။ ငါ့သားတို့အတွက်၊ ငါ့ကိုယ်တိုင်ပြုသော အမှုအတွက်ကြောင့်၊ ငါ့ကို စီရင်ကြလော့။ 12မြေကြီးကို ငါလုပ်လေပြီ။ မြေကြီးပေါ်မှာ လူကိုလည်း ဖန်ဆင်းလေပြီ။ မိုးကောင်းကင်ကို ကိုယ်လက်နှင့် ငါကြက်လေပြီ။ မိုးကောင်းကင်တန်ဆာအပေါင်းတို့ကို ငါခန့်ထားလေပြီ။ 13ထိုသူကိုလည်း တရားတော်အတိုင်း ငါပေါ်ထွန်းစေ၏။ သူသွားသောလမ်းကို ငါဖြောင့်စေမည်။ သူသည် ငါ၏မြို့ကို တည်ဆောက်လိမ့်မည်။ သိမ်းသွားချုပ်ထားခြင်းကို ခံရသော ငါ၏လူတို့ကို သူသည် အဖိုးမခံ၊ ဆုမယူဘဲ လွှတ်လိမ့်မည်ဟု ကောင်းကင်ဗိုလ်ခြေအရှင် ထာဝရဘုရား မိန့်တော်မူ၏။

14တစ်ဖန် ထာဝရဘုရား မိန့်တော်မူသည်ကား၊ အဲဂုတ္တုပြည်၌ ဆည်းပူးသောဥစ္စာ၊ ကုရှပြည်သား၊ အရပ်မြင့်သော သေဘအမျိုးသား ပြုစုသောကုန်သွယ်ဥစ္စာသည် သင့်ဘက်သို့ရောက်၍၊ သင်၏ဥစ္စာ ဖြစ်ရလိမ့်မည်။ ထိုသူတို့သည် သင့်နောက်သို့လိုက်၍ သံကြိုးနှင့်ချည်နှောင်လျက် လမ်း၌ လျှောက်သွားကြလိမ့်မည်။ သင့်ရှေ့မှာ ပျပ်ဝပ်၍၊ အကယ်စင်စစ် ကိုယ်တော်၌ ဘုရားသခင်ရှိတော်မူ၏။ ထိုဘုရားမှတစ်ပါး အခြားသာဘုရားသခင် မည်မျှမရှိပါဟူ၍ တောင်းပန်ကြလိမ့်မည်။

15အို ဣသရေလအမျိုး၏ ဘုရားသခင်၊ ကယ်တင်တော်မူသောဘုရား၊ အကယ်စင်စစ် ကိုယ်တော်သည် ကိုယ်ကိုထင်ရှားစွာ ပြတော်မမူသော ဘုရားသခင်ဖြစ်တော်မူ၏။ 16ရုပ်တုကိုလုပ်သော သူအပေါင်းတို့သည် ရှက်ကြောက်၍ မိန်းမောတွေဝေကြလိမ့်မည်။ အရှက်ကွဲ၍ တစ်ပြိုင်နက် ဆုတ်သွားကြလိမ့်မည်။ 17ဣသရေလအမျိုးမူကား၊ ထာဝရဘုရားအားဖြင့် ထာဝရ ကယ်တင်ခြင်းသို့ရောက်၍၊ သင်တို့သည် ရှက်ကြောက်ခြင်း၊ မှိုင်တွေခြင်းနှင့် ကမ္ဘာအဆက်ဆက် ကင်းလွတ်ကြလိမ့်မည်။

18မိုးကောင်းကင်ကို ဖန်ဆင်းတော်မူသော ထာဝရဘုရား၊ မြေကြီးကို ပြုပြင်ဖန်ဆင်း၍ အမြဲတည်စေတော်မူသော အရှင်၊ အချည်းနှီးဖန်ဆင်းသည် မဟုတ်၊ သတ္တဝါနေစရာဖို့ ဖန်ဆင်းတော်မူသော ဘုရားသခင် မိန့်တော်မူသည်ကား၊ ငါသည် ထာဝရဘုရားဖြစ်၏။ ငါမှတစ်ပါး အခြားသောဘုရား မရှိ။ 19ငါသည် တိတ်ဆိတ်စွာ မဟော။ မြေကြီးထဲမှာ မှောင်မိုက်သောအရပ်၌ မဟော။ သင်တို့သည် ကျေးဇူးမရှိဘဲ ငါ့ကိုရှာကြလော့ဟု ယာကုပ်အမျိုးအား ငါမပြော။ ငါသည် ဖြောင့်မတ်စွာပြော၍ အတည့်အလင်း ဟောတတ်သော ထာဝရဘုရားဖြစ်၏။

ထာဝရဘုရားနှင့်ဗာဗုလုန်ရုပ်တုများ

20သင်တို့သည် စည်းဝေး၍ လာကြလော့။ အတိုင်းတိုင်း အပြည်ပြည်တို့မှ ဘေးလွတ်သောသူတို့၊ စည်းဝေးကြလော့။ မိမိထုလုပ်သော သစ်သားကို ဆောင်ရွက်သောသူ၊ မကယ်တင်နိုင်သော ဘုရားကို ပတ္ထနာပြုသောသူတို့သည် ပညာမရှိကြ။ 21သတင်းကြားပြောကြလော့။ လူများကို အနီးသို့ခေါ်ခဲ့၍ တိုင်ပင်ကြစေ။ ဤအမှုကို ရှေးကာလမှစ၍ အဘယ်သူ ဖော်ပြသနည်း။ အထက်က အဘယ်သူ ဟောပြောသနည်း။ ငါထာဝရဘုရား ဟောပြောသည် မဟုတ်လော။ ငါမှတစ်ပါး အခြားသော ဘုရားသခင်မရှိ။ ငါသည် ဖြောင့်မတ်သောဘုရား၊ ကယ်တင်သောဘုရား ဖြစ်၏။ ငါမှတစ်ပါး အခြားသောဘုရားမရှိ။ 22မြေကြီးစွန်းသား အပေါင်းတို့၊ ငါ့ကိုမျှော်ကြည့်၍၊ ကယ်တင်ခြင်းကျေးဇူးကို ခံကြလော့။ ငါသည် ဘုရားသခင်ဖြစ်၏။ ငါမှတစ်ပါး အခြားသောဘုရား မရှိ။ 23ငါ့ရှေ့၌ လူတိုင်းဒူးထောက်ရမည်၊ လူတိုင်း မိမိနှုတ်နှင့် သစ္စာခံရမည်ဟု ကိုယ်ကိုကိုယ် တိုင်တည်၍ ငါကျိန်ဆိုသော တရားစကားသည် ငါ့နှုတ်မှ ထွက်သည်ဖြစ်၍၊ မပြည့်စုံဘဲ မနေရ။ 24ထာဝရဘုရားအားဖြင့်သာ ဖြောင့်မတ်ခြင်းနှင့် အစွမ်းသတ္တိကို ရပါသည်ဟု လူတိုင်းလျှောက်ရမည်။ ကိုယ်တော်ကို မနာလိုသော သူအပေါင်းတို့သည် အထံတော်သို့လာ၍၊ ရှက်ကြောက်ခြင်းသို့ ရောက်ရကြလိမ့်မည်။ 25ဣသရေလ အမျိုးသားအပေါင်းတို့သည် ထာဝရဘုရားအားဖြင့် ဖြောင့်မတ်ရာသို့ရောက်၍ ဝါကြွားကြလိမ့်မည်။

ဟေရှာယအနာဂတ္တိကျမ်း - ၄၅ (အနက်ဖွင့်)

၆။ ဘုရားသခင်ဘိသိက်ပေးထားသောကုရုမင်း(အခန်း၄၅)

၄၅:၁-၆ ဘုရားသခင်ကကုရုမင်းကိုဘိသိက်ပေးထားသည်။ (ဟေဗြဲကျမ်း တွင်မေရှိယအရအတူတူဖြစ်သည်။ )အဘယ်ကြောင့်ဆိုသော်ဘုရားသခင်ကသူ့လူများအားသူတပါးဖမ်းဆီးခြင်းလက်အောက်မှကယ်ထုတ်ရန်ပါရှန်းဧကရာဇ် ကိုအသုံးပြုသည်။ ဘုရားသခင်ကပါရှန်းမင်းအားဗာဗုလုန်အပါအဝင်တိုင်းနိုင်ငံများအားအောင်မြင်သိမ်းပိုက်ခွင့်တန်ခိုးအစွမ်းပေးထားသည်။ ဝှက်ထားသော တန်ခိုးနှင့်ကြွယ်ဝခြင်းများကိုအပ်နှံသည်။ ဘုရားသခင်ကကုရုမင်းသားဆင့် ခေါ်ရာတွင်သူ့ကိုယ်သူတစ်ပါးတည်းသာဘုရားသခင်အဖြစ်မိတ်ဆက်၍ကုရု မင်းကိုလည်းဘိသိက်ပေးထားသောသိုးထိန်းဟုခေါ်ဝေါ်သည်(၄၄:၂၈)။ အမှု တော်အတွက်အသုံးပြုဖို့ဆင့်ခေါ်သည်။ ကုရုမင်းကိုအသုံးပြု၍ဘုရားရှင်၏လူများအပေါ်တွင်ဘုရားသခင်၏ဘုန်းတန်ခိုးထင်ရှားစေမည်။ လူအပေါင်းက လည်းယေဟောဝါဘုရားသခင်၏နာမတော်ကိုချီးမွမ်းကြမည်။

၄၅:၇ အပိုဒ်ငယ်(၇)၏ဆိုလိုချက်သည်ဘုရားသခင်ကမကောင်းမှုဒုစ ရိုက်ဖန်ဆင်းကြောင်းဆိုလိုခြင်းမဟုတ်။၅၄

Delitzch က“ကနဦးခရစ်ယာန် heretic Marcion, Valetiniaus, Gnostic ဂိုဏ်းဂနများကဓမ္မဟောင်းခေတ်ဘုရားသခင်သည်ဓမ္မသစ်ခေတ် ဘုရားသခင်နှင့်မတူဟု ဤကျမ်းပိုဒ်ကိုကိုးကား၍သွန်သင်ကြသည်”၅၅ဟု ထောက်ပြသည်။

ထိုအကျင့်စာရိတ္တညံ့ဖျင်းခြင်း၊ အပြစ်ဒုစရိုက်နှင့်ပတ်သက်၍ Delitzch က ဤသို့ဆက်ပြောထားသည်။ “အကျင့်စာရိတ္တပျက်ပြားခြင်းသည်ဘုရားသ ခင်မှလာခြင်းမဟုတ်ကြောင်းသေချာပါသည်။ ဖန်ဆင်းခံသတ္တဝါများ၏စိတ် လွတ်ကိုယ်လွတ်လွန်ကြူးခြင်းဖြစ်သည်။၅၆

ဤကျမ်းပိုဒ်၏အနှစ်သာရသည်အလင်းနှင့်အမှောင်၏ဆန့်ကျင်ဘက် ဝိရောဓိတရားဖြစ်သည်။ ငြိမ်သက်ခြင်းနှင့်ဒုက္ခရုန်းကန်ခြင်းဖြစ်သည်။ အဘယ် ကြောင့်ဘုရားရှင်ကထိုအပြစ်ဆိုးကိုခွင့်လွှတ်သနည်း။ အချို့ကအလင်းနှင့်အ မှောင်ခွဲခြားသိမြင်တတ်ရန်ပါရှန်းများအားဘုရားနှစ်ပါးဖြင့်နှိုင်းယှဉ်ပြခြင်း ဖြစ်သည်ဟုဆိုကြသည်အချို့ကမူကုရုမင်းသည်ထိုအယူဝါဒလမ်းစဉ်လိုက် သည့်အထောက်အထားမရှိဟုငြင်းဆိုကြသည်။ မည်သို့ပင်ဖြစ်စေကုရုမင်းကို ဘုရားသခင်ကအသုံးပြုခြင်းဖြင့်ဣသရေလတို့ရန်သူများသည်ဘေးဥပါဒ်ကံ ကြမ္မာဆိုးငင်ကြသည်။ ဘုရားသခင်သည်ထိုဘဝအခြေအနေအားလုံးကိုကြီး ကြပ်ကြည့်ရှုသူဖြစ်သည်။

၄၅:၈ ဖြောင့်မတ်စင်ကြယ်ခြင်း(တရားမျှတခြင်း)၊ ကယ်တင်ခြင်း(ရွေး နှုတ်ခြင်း)ဟူသောဤကျမ်းပိုဒ်မှစကားသည်ဣသရေလလူမျိုးအပေါ်ကုရုမင်း၏အခိုက်အတန့်ဆောင်ရွက်မှုကိုဆိုလိုသည်။ အနှစ်တစ်ထောင်နိုင်ငံတော်ပေါ် ထွန်းသောအခါပရောဖက်ပြုချက်အားလုံးပြည့်စုံပါမည်။

၄၅:၉-၁၁ ယုဒအမျိုးသားကိုအဘယ်ကြောင့်နိုင်ငံရပ်ခြားသားများအား တိုက်ခိုက်သိမ်းပိုက်စေသနည်းဟုဘုရားသခင်ကိုမေးခွန်းထုတ်သူသည်အမင်္ဂ လာဖြစ်သည်။ အကုသိုလ်ကောင်ဖြစ်သည်။ ထိုကဲ့သို့ပင်မြေအိုးက အိုးလုပ်သူ အားသူ့ကိုပုံပျက်ပန်းပျက်ထုလုပ်ရကောင်းလားဟုမေးစရာမရှိ။ အပိုဒ်ငယ်၁၁ ကို“သင့်အနာဂတ်အတွက်ငါ့လက်ဖြင့်ပြင်ဆင်ထားသည်ကိုသင့်ခြေထောက် နှင့်ဖျက်ချင်သလား၊သို့မဟုတ်လူကဘုရားသခင်ကိုစေခိုင်းရသလား”ဟုဆို လျှင်မိမိသဘောပေါက်လွယ်မည်။ တနည်းအားဖြင့်“မင်းမှာငါ့ကိုမေးခွန်းထုတ် ပိုင်ခွင့်ရှိသလား”ဟုဆိုနိုင်သည်။

၄၅:၁၂-၁၃ လူနှင့်ကောင်းကင်၊ကောင်းကင်တန်ဆာပလာဖန်ဆင်းတော်မူ သောဘုရားသခင်ကတိုင်းတပါးသို့ဖမ်းဆီးခံရသောသူများကယ်ထုတ်ခိုင်း သည့်ကုရုမင်းသားယေရုရှလင်မြို့တော်ကိုပြန်တည်ခိုင်းသည်။ သို့သော်လည်း Artaxerxes လက်ထက်တွင်သာမြို့တော်ပြန်လည်တည်ဆောက်ခြင်းလုပ်ငန်း လက်စသပ်နိုင်သည်(နေ ၂:၈)။ ကုရုမင်းကဗာဗုလုန်မှပြန်လာသောယုဒလူများ နှင့်ပူးပေါင်း၍အုတ်မြစ်ပန္နက်ချလုပ်ငန်းစတင်ခဲ့သည်။

၄၅:၁၄-၁၇ ဣသရေလတို့ကိုရန်ဖက်ပြုခဲ့ဘူးသောသူများသည်တနေ့ သောအခါတံစိုးလက်ဆောင်ယူဆောင်၍ရောက်လာကြဦးမည်။ ဣသရေလတို့၏ဘုရား သခင်သည်စစ်မှန်သောဘုရားဖြစ်ကြောင်းသိမှတ်ယုံကြည်ရှိခိုးကြရမည်။ ထာ ဝရဘုရားကဲ့သို့သောအခြားဘုရားမရှိဟုဝန်ခံကြမည်။ ဤစကားမှာကျန်ကြွင်း သောဣသရေလတို့ကိုသင်ခန်းစာယူ၍ဘုရားသခင်ကိုချီးမွမ်းကိုးကွယ်ကြမည့် အကြောင်းဖြစ်သည်။ ဘုရားရုပ်တုများပြုလုပ်သူ၊ကိုးကွယ်သူများသည်တနေ့ သောအခါအရှက်တကွဲရှိကြဦးမည်။ ထာဝရဘုရားသခင်ကယ်နှုတ်ထားသော ဣသရေလလူနည်းစုသည်ခရစ်တော်ဘုရားဒုတိယအကြိမ်ပြန်လည်ရောက်ရှိ လာပြီးနောက်ပိုင်းတွင်ဘယ်သောအခါမှအရှက်တကွဲကြမည်မဟုတ်။

၄၅:၁၈-၁၉ ဘုရားသခင်ကကမ္ဘာမြေကြီးဖန်ဆင်းခြင်းသည်အချည်းနှီး၊ စိတ်ကူးပေါက်ရာဖန်ဆင်းခြင်းမဟုတ်။ (tohu, က၁:၂တွင်သုံးသောဝေါဟာရ နှင့်အတူတူဖြစ်သည်။ သို့သော်ဘုရားသခင်ကိုယ်တိုင်လည်းလူနှင့်သဏ္ဍာန် သူကြောင်းကိုယ်ထင်ပြသည်။ ပစ်စလက်ခက်ဖန်ဆင်းခြင်းမဟုတ်သကဲ့သို့ စည်းစနစ်မကျဖြစ်ကတတ်ဆန်းဆက်နွယ်သည်မဟုတ်။ ဘုရားသခင်သည် အရာခပ်သိမ်းဩအချုပ်အချာအရှင်သခင်၊သမ္မာတရား၊ဖြောင့်မတ်ခြင်း၏ဘု ရင်ဖြစ်ကြောင်းကိုယ်တော်တိုင်ကိုယ်ထင်ကိုယ်ရောင်ပြသည်။

၄၅:၂၀-၂၁ ဘုရားတရားမသိ၊ဘုမသိဘသိရုပ်ထုများကိုပြုလုပ်ကိုးကွယ် ကြသောအရိုင်းအစိုင်းလူရိုင်းတပါးအမျိုးသားများကိုလည်းဘုရားသခင်က ဆင့်ခေါ်ပါသည်။ ဘုရားတုများကိုပစ်ခွာ၍အနာဂတ်ကံကြမ္မာစီစဉ်ပေးသော ထာဝရဘုရားသခင်ထံစုဝေးကြဖို့ဖိတ်ခေါ်သည်။ ယေဟောဝါဘုရားသခင်တ ပါးတည်းသာလျှင်လူ့ကံကြမ္မာကိုစီရင်ပေးနိုင်သည်။ ထိုဘုရားသခင်သည်ကယ် တင်ရှင်၊ဖြောင့်မတ်သောဘုရား၊စစ်မှန်သောဘုရားဖြစ်သည်။

၄၅:၂၂-၂၅ ကယ်တင်ခြင်းရရှိဖို့တပါးအမျိုးသားများကိုလက်လှမ်းဖိတ် ခေါ်နေပါသည်။ ဒူးတိုင်းထောက်၍လျှာတိုင်းဝန်ခံကြမည့်ဘုရားရှင်ဖြစ်သည် (ရော၁၄:၁၁၊ဖိ ၂:၉ -၁၁ကိုလည်းကြည့်)အနှစ်တစ်ထောင်နိုင်ငံတော်တွင်ပြည့်စုံ မည့်ပရောဖက်ပြုချက်ဖြစ်သည်။ ထိုအခါသခင်ယေရှုခရစ်တော်သည်ဖြောင့် မတ်စင်ကြယ်ခြင်းနှင့်အစွမ်းသတ္တိဇစ်မြစ်ပါလားဟုသိရှိကြမည်။ သူ့ကိုရန်မူခဲ့ ဘူးသူအားလုံးသည်အညံ့ခံပန်းပေးကြမည်။ တံစိုးလက်ဆောင်ကိုယ်စီယူ ဆောင်လာမည်။ ဣသရေလလူမျိုးသည်ခရစ်တော်၌ဘုန်းတန်ခိုးပြည့်စုံ၍မျက် နှာပွင့်လန်းကြမည်။ ရုပ်တုဘုရား၌ထိုကဲ့သို့မရှိ။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။