Isaiah -42 -

ဟေရှာယအနာဂတ္တိကျမ်း - ၄၂

ထာဝရဘုရား၏အစေခံ

1ငါထောက်မသော ငါ့ကျွန်ရင်း၊ ငါနှစ်သက်မြတ်နိုးရာ ငါရွေးချယ်သောသူကို ကြည့်ရှုလော့။ ထိုသူ၏အပေါ်၌ ငါ့ဝိညာဉ်ကို ငါတည်စေမည်။ သူသည် လူအမျိုးမျိုးတို့ကို တရားပေးလိမ့်မည်။ 2အော်ဟစ်ခြင်း၊ ကြွေးကြော်ခြင်းကို မပြုမူ၍၊ လမ်းခရီး၌ သူ၏အသံကို အဘယ်သူမျှ မကြားစေရ။ 3နင်းနယ်လျက်ရှိသော ကျူပင်ကို မချိုး။ အတောက်သေးသော မီးစာကို မသတ်။ တရားသည် မြဲမြံခြင်းသို့ ရောက်မည်အကြောင်း စီရင်လိမ့်မည်။ 4မြေကြီးပေါ်မှာ တရားတော်ကို မတည်စေမီတွင် အားမလျော့၊ စိတ်လည်း မပျက်ရ။ သူ၏တရားကိုလည်း၊ တစ်ကျွန်းတစ်နိုင်ငံသားတို့သည် မျှော်လင့်ကြလိမ့်မည်။

5မိုးကောင်းကင်ကို ဖန်ဆင်း၍ ကြက်တော်မူထသော၊ မြေကြီးနှင့် မြေကြီးထဲက ဖြစ်သမျှတို့ကို ခင်းကျင်းတော်မူထသော၊ မြေကြီးပေါ်မှာရှိသောသူတို့အား အသက်ကိုလည်းကောင်း၊ မြေကြီးကို ကျော်နင်းသော သူတို့အား ဝိညာဉ်ကိုလည်းကောင်း ပေးတော်မူသော ဘုရားသခင် ထာဝရဘုရား မိန့်တော်မူသည်ကား၊ 6ငါထာဝရဘုရားသည် သင့်ကို တရားသဖြင့် ခေါ်ထားသည်ဖြစ်၍၊ 7လက်ဆွဲလျက် ထောက်မမည်။ သင်သည် ကန်းသောမျက်စိတို့ကို ဖွင့်စိမ့်သောငှာလည်းကောင်း၊ ချုပ်ထားသော သူတို့ကို လွှတ်စိမ့်သောငှာလည်းကောင်း၊ မှောင်မိုက်၌နေသောသူတို့ကို အမိုက်ထောင်ထဲက နုတ်ယူစိမ့်သောငှာလည်းကောင်း၊ သင့်ကို လူများနှင့် ပဋိညာဉ်ဖွဲ့စရာဖို့၊ လူအမျိုးမျိုး လင်းစရာဖို့ခန့်ထားမည်။ 8ငါသည် ထာဝရဘုရားဖြစ်၏။ ထိုနာမသည် ငါ့နာမဖြစ်၏။ ငါ့ဘုန်းကို အခြားသောသူအားလည်းကောင်း၊ ငါ့အသရေကို ရုပ်တုဆင်းတုတို့အားလည်းကောင်း ငါမပေး။ 9အရင်ဟောသော အရာတို့သည်ဖြစ်ကြပြီ။ အသစ်သောအရာတို့ကို ယခု ငါဟော၏။ မပေါ်လာမီ သင်တို့အား ငါပြနှင့်၏။

ထောမနာသီချင်း

10ပင်လယ်ကို ကူးသောသူမှစ၍၊ ပင်လယ်၌ ရှိသမျှတို့နှင့်တကွ၊ တစ်ကျွန်းတစ်နိုင်ငံအရပ်များ၊ ထိုအရပ်၌ နေသောသူများတို့၊ ထာဝရဘုရားအား အသစ်သောသီချင်းကို ဆိုကြလော့။ မြေကြီးစွန်းတို့မှ ဂုဏ်တော်ကို ချီးမွမ်းကြလော့။ 11တောနှင့်တကွ တော၌ရှိသောမြို့ရွာ၊ ကေဒါအရပ်သားတို့သည် ကြွေးကြော်ကြစေ။ ကျောက်၌နေသော သူတို့သည် သီချင်းဆိုကြစေ။ တောင်ထိပ်ပေါ်က ကြွေးကြော်ကြစေ။ 12ထာဝရဘုရားကို ချီးမြှောက်၍၊ တစ်ကျွန်းတစ်နိုင်ငံအရပ်တို့၌ ဂုဏ်တော်ကို ထင်ရှားစွာ ချီးမွမ်းကြစေ။

13ထာဝရဘုရားသည် သူရဲကဲ့သို့ ထွက်ကြွ၍၊ စစ်သူရဲကဲ့သို့ ကိုယ်စိတ်ကို ကိုယ်နှိုးဆော်တော်မူလိမ့်မည်။ အော်ဟစ်ကြွေးကြော်၍ ရန်သူတို့တစ်ဖက်၌ အားထုတ်တော်မူလိမ့်မည်။

14ငါသည် ကြာမြင့်စွာ တိတ်ဆိတ်လျက်နေပြီ။ ထိုသို့နေ၍ အောင့်ရဦးမည်လော။ သားဖွားခြင်းဝေဒနာကို ခံရသော မိန်းမကဲ့သို့ ငါအော်ဟစ်မည်။ ပင့်သက်ရှူ၍ ချက်ချင်း ဖျက်ဆီးမည်။ 15တောင်ကြီးတောင်ငယ်များကို သွေ့ခြောက်စေမည်။ သူတို့အပင် ရှိသမျှတို့ကိုလည်း ညှိုးနွမ်းစေမည်။ မြစ်များကို ကုန်းဖြစ်စေမည်။ ရေကန်များကို ခန်းခြောက်စေမည်။ 16မျက်စိကန်းသောသူတို့ကို မိမိတို့မသိသောလမ်းဖြင့် ငါဆောင်မည်။ မိမိတို့ မကျွမ်းသောခရီး၌ သွားစေမည်။ သူတို့ရှေ့မှာ မှောင်မိုက်ကို လင်းစေမည်။ ကောက်သောလမ်းကိုလည်း ဖြောင့်စေမည်။ ထိုသို့သောကျေးဇူးကို ပြုမည်။ သူတို့ကို မစွန့်ပစ်။ 17ရုပ်တုဆင်းတုကို ခိုလှုံ၍၊ ကိုယ်တော်သည် အကျွန်ုပ်တို့၏ဘုရားဖြစ်တော်မူ၏ဟု သွန်းသော ရုပ်တုတို့အား ဆိုသောသူတို့သည် လှန်ခြင်းကိုခံရ၍၊ အလွန် အရှက်ကွဲခြင်းသို့ ရောက်ကြလိမ့်မည်။

တရားတော်ကိုမကျင့်သောဣသရေလအမျိုး

18နားပင်းသောသူတို့၊ ကြားကြလော့။ မျက်စိကန်းသောသူတို့၊ သင်တို့သည် မြင်ရအံ့သောငှာ ကြည့်ရှုကြလော့။ 19ငါ့ကျွန်မှတစ်ပါး အဘယ်သူကန်းသနည်း။ ငါစေလွှတ်သောတမန်ကဲ့သို့ အဘယ်သူသည် နားပင်းသနည်း။ ငါ့မိတ်ဆွေကဲ့သို့ အဘယ်သူ ကန်းသနည်း။ ထာဝရဘုရား၏ကျွန်ကဲ့သို့ အဘယ်သူ ကန်းသနည်း။ 20သင်သည် များစွာမြင်သော်လည်း အာရုံမပြုတတ်။ နားပွင့်လျက်ရှိသော်လည်း မကြားတတ်။ 21ထာဝရဘုရားသည် မိမိဖြောင့်မတ်ခြင်းကြောင့် အားရနှစ်သက်သဖြင့်၊ တရားတော်ကို ချီးမြှောက်၍ ဂုဏ်အသရေနှင့် ပြည့်စုံစေတော်မူမည်။

22ဤလူမျိုးသည် လုယူဖျက်ဆီးခြင်းကို ခံရသောအမျိုး ဖြစ်၏။ ရှိသမျှတို့သည် တွင်း၌အချုပ်ခံရ၍၊ ထောင်ထဲမှာ ပုန်းကွယ်လျက်နေကြ၏။ ဖျက်ဆီးရာဖြစ်သောအခါ၊ အဘယ်သူမျှ မနုတ်မယူ။ လုယူရာဖြစ်သောအခါ၊ ပြန်ပေးလော့ဟု အဘယ်သူမျှမဆို။ 23သင်တို့တွင် အဘယ်သူသည် ဤစကားကို နားထောင်မည်နည်း။ နောင်ကာလဖို့ အဘယ်သူကြား၍ မှတ်မည်နည်း။ 24လုယူရာဖြစ်စေခြင်းငှာ ယာကုပ်ကိုလည်းကောင်း၊ ဓားပြတို့လက်သို့ ဣသရေလကိုလည်းကောင်း အဘယ်သူအပ်သနည်း။ ငါတို့ပြစ်မှားသော အရှင်ထာဝရဘုရား အပ်တော်မူသည် မဟုတ်လော။ သူတို့သည် နောက်တော်သို့မလိုက်၊ တရားတော်ကို မကျင့်ဘဲ နေကြ၏။ 25ထိုကြောင့်၊ ပြင်းစွာသော အမျက်တော်ထွက်ခြင်း ကြမ်းတမ်းသော စစ်တိုက်ခြင်းကို သူတို့အပေါ်သို့ သွန်းလောင်းတော်မူသဖြင့်၊ သူတို့ပတ်လည်၌ မီးရှို့၏။ သို့သော်လည်း၊ သူတို့သည် မသိကြ။ မီးလောင်သော်လည်း၊ သတိမထားဘဲနေကြ၏။

ဟေရှာယအနာဂတ္တိကျမ်း - ၄၂ (အနက်ဖွင့်)

၄။ ဘုရားသခင်၏အစေခံတော်(အခန်း၄၂)

၄၂:၁-၄ ပရောဖက်ဟေရှာယ မေရှိယသခင်ကိုအမည်နာမ“အစေခံတော်” ဟုတင်စားသုံးနှုန်းထားသည်။ ဣသရေလလူမျိုး၊ဘုရားသခင်ရွေးကောက် သောလူနည်းစုအတွက်အစေခံခြင်း(၄၃:၁၀)ဖြစ်သည်။ ကုရုမင်းအတွက်လည်း ဖြစ်သည်။ ဤကျမ်းချက်၏အနှစ်သာရသည်မြင်သာထင်လာရှိပါသည်။ အပိုဒ် ငယ်၁-၄သည်သခင်ယေရှုကိုရည်ညွှန်းသည်။ ဘုရားသခင်ရွေးကောက်ခန့်အပ် ထားသူ၊သန့်ရှင်းသောဝိညာဉ်တော်ဖြင့်ဘိသိက်ပေးထားသူဖြစ်သည်။ တပါးအမျိုးသားများကိုလည်းတရားသဖြင့်ဖြောင့်မတ်စင်ကြယ်စွာဆက်ဆံသူဖြစ်သည်။ မြေကြီးပေါ်တွင်နိုင်ငံတော်မတည်မခြင်းစိတ်ပျက်အားငယ်ခြင်းမရှိဘဲသူ့စ ကားကိုကြားချင်သိချင်ကြမည်။

၄၂:၅-၉ ဘုန်းတန်ခိုးကြီးသောအနန္တဘုရားသခင်ကမေရှိယသခင်နှင့်ထိုမေ ရှိယသခင်သည်ဖြောင့်မတ်စင်ကြယ်သောသူဖြစ်သည်။ ဘုရားသခင်သည်ဘုန်းတန်ခိုးတော်ကိုသူများအားမျှဝေပေးခြင်းမရှိ။ ဘုရားရှင်ကဲ့သို့သောတုနှိုင်းစရာတန်ခိုးရှင်မရှိ။ လူလက်ဖြင့်ပြုလုပ်သောအရုပ်ဘုရားများ၌တန်ခိုးပေးအပ်ခြင်းမရှိ။ အတိတ်ကာလသမိုင်းတွင်တန်ခိုးပြသခဲ့သကဲ့သို့အနာဂတ်ကာလတွင် လည်းထင်ရှားစေဦးမည်။

၄၂:၁၀-၁၃ ဘုရားသခင်ကဣသရေလလူမျိုးလောကလူမျိုးတော်အဖြစ် ရွေးချယ်ခေါ်ယူထားသည်။ ရန်သူများကိုအမှုစီရင်ပေးသောတန်ခိုးရှင်၊ခွန်အား ကြီးသောသူ၊မေရှိယသခင်ပေါ်ထွန်းစေသည်။ ကေဒါနှင့်သေလမှာအာရေဗျစ ကားဖြစ်သည်။ အသစ်သောသီချင်းဟုအနက်ရသည်။

၄၂:၁၄-၁၇ ယေဟောဝါဘုရားသခင်ကဣသရေလလူမျိုးအားလူ့သမိုင်း တလျှောက်စောင့်ထိန်းပုံကိုထောက်ပြထားသည်။ အတိတ်ကာလတွင်စောင့် ရှောက်ခဲ့သည်။ ပစ္စုပ္ပန်ကာလတွင်ဣသရေလရန်သူများကိုနှိမ်နှင်းပေးသည်။ အနာဂတ်ကာလတွင်ယုံကြည်သူဣသရေလလူနည်းစုအားယုယပြုစုဦးမည်။ အရုပ်ဘုရားကိုးကွယ်သူများကိုနောင်ကြဉ်စေဦးမည်။

၄၂:၁၈-၂၂ အပိုဒ်ငယ်၁၉တွင်ပါရှိသည့်အစေခံသည်မေရှိယကိုဆိုလိုသည် မဟုတ်။ ဣသရေလလူမျိုးဖြစ်သည်။ ယေဟောဝါဘုရားသခင်ကိုမသိရှိကြသော ဣသရေလနားပင်း၊ငကန်းများကိုဆိုလိုသည်။ “ထာဝရဘုရား၏ကျွန်ကဲ့သို့ မည်သူနားကန်းသနည်း။ ” ‘ငါ့ကိုမယုံကြည်၊မသိရှိအောင်မည်သူကန်းသ နည်း’ဟုတမျိုးအားဖြင့်ဆိုနိုင်သည်။ သို့မဟုတ်“ငါ့ထံတွင်ငြိမ်သက်ခြင်းမရ နိုင်အောင်မည်သူသည်စုံလုံကန်းသနည်း”ဟုဆိုနိုင်သည်။ ဣသရေလလူမျိုးကို မေရှိယသခင်နှင့်ပေါင်းဖက်နီးစပ်ဖို့ခေါ်ယူထားပါသည်။ ပဋိညာဉ်ဖွဲ့ထားပါ သည်။ သို့သော်ဘုရားသခင်နှင့်ငြိမ်းချမ်းစွာတူယှဉ်လက်တွဲခြင်းမပြု။ ဘုရား သခင်ကဣသရေလအမျိုးကိုပညတ်တရားပြဌာန်း၍ချီးမြောက်ထားသည်။ ထိုသို့ပြဌာန်းခြင်းမှာဘုရားသခင်ကိုချစ်ကြောက်ရိုသေရန်ဖြစ်သည်။ သို့သော် ဣသရေလတို့ကလက်မခံ။ နားမထောင်။ ထိုသို့နားမထောင်သဖြင့်လုယက်စီး နင်းခြင်း၊အနိုင်ကျင့်ခြင်းဖမ်းဆီးခြင်းခံရသည်။

၄၂:၂၃-၂၅ ထို့ကြောင့်ဟေရှာယက“အဘယ်သူသည်ဤစကားကိုနား မထောင်မည်နည်း။ လုယူရာဖြစ်စေခြင်းငှာယာကုပ်ကို၎င်း၊ဓါးပြတို့လက်သို့ ဣသရေလကို၎င်း၊ဘယ်သူအပ်သနည်း။ ငါတို့ပြစ်မှားသောအရှင်ထာဝရဘု ရားအပ်တော်မူသည်မဟုတ်လော”ဟုဆိုသည်။ ဘုရားသခင်က က္ကသရေလလူမျိုးတို့အပေါ် အမျက်ဒေါသပုန်းအောင်းမည်။ တိုက်ပွဲမီးလျံများ တောက်လောင်စေမည်။ သို့သော် ဣသရေလတို့ သည်ထိုအဖြစ်အပျက်မှာဘုရားသခင်၏ဆုံးမဖြတ်ဖြစ်ကြောင်းနားမလည်ကြ။ နှလုံးသွင်းခြင်းမရှိကြ။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။