Isaiah -39 -

ဟေရှာယအနာဂတ္တိကျမ်း - ၃၉

ဗာဗုလုန်ပြည်မှစေတမန်များ

(၄ရာ၊ ၂၀:၁၂-၁၉။ ၆ရာ၊ ၃၂း၂၇-၃၁)

1ထိုကာလအခါ ဗာလဒန်သား၊ ဗာဗုလုန်မင်းကြီး မေရောဒပ္ဗါလဒန်သည် ဟေဇကိမင်းနာ၍၊ အနာပျောက်သည်ကို ကြားသောကြောင့်၊ မေတ္တာစာနှင့် လက်ဆောင်ပါလျက်၊ တမန်တို့ကို စေလွှတ်လေ၏။ 2ဟေဇကိမင်းသည် သူတို့ရောက်သောကြောင့် ဝမ်းမြောက်၍၊ ရွှေတိုက်မှစသော ရွှေ၊ ငွေ၊ နံ့သာမျိုး၊ အဖိုးထိုက်သော နံ့သာဆီ၊ လက်နက်တိုက်နှင့် ဘဏ္ဍာတော်အလုံးစုံတို့ကိုပြလေ၏။ နန်းတော်မှစ၍ နိုင်ငံတော်အရပ်ရပ်၌ မပြသောအရာ တစ်စုံတစ်ခုမျှမရှိ။

3ထိုအခါ ပရောဖက် ဟေရှာယသည် ဟေဇကိမင်းကြီးထံတော်သို့ သွား၍၊ ထိုသူတို့သည် အဘယ်သို့ ပြောကြပါသနည်း။ အဘယ်ပြည်မှ အထံတော်သို့ လာကြပါသနည်းဟု မေးလျှောက်သော်၊ ဟေဇကိမင်းက၊ ဝေးသောအရပ်၊ ဗာဗုလုန်ပြည်မှ ရောက်လာကြသည်ဟု ပြန်ပြော၏။ 4နန်းတော်၌ အဘယ်အရာကိုမြင်ကြပြီနည်းဟု မေးပြန်လျှင်၊ ဟေဇကိမင်းက၊ နန်းတော်၌ ရှိသမျှကို မြင်ရကြပြီ။ ဘဏ္ဍာတော်တွင် ငါမပြသောအရာ တစ်စုံတစ်ခုမျှမရှိဟု ပြန်ပြော၏။ 5ထိုအခါ ဟေရှာယက၊ ကောင်းကင်ဗိုလ်ခြေအရှင် ထာဝရဘုရား၏ နှုတ်ကပတ်တော်ကို နားထောင်လော့။ 6နန်းတော်၌ ရှိသမျှကိုလည်းကောင်း၊ ယနေ့တိုင်အောင် ဘိုးဘေးတို့သည် ဆည်းပူးသမျှကိုလည်းကောင်း၊ ဗာဗုလုန်မြို့သို့ ယူသွားရသောကာလသည် ရောက်လိမ့်မည်။ တစ်စုံတစ်ခုမျှ မကျန်ကြွင်းရဟု ထာဝရဘုရား မိန့်တော်မူ၏။ 7သင်နှင့်နွယ်၍ရသော သင်၏သားမြေးတို့ကိုလည်းယူသွား၍၊ သူတို့သည် ဗာဗုလုန်ရှင်ဘုရင်၏နန်းတော်၌၊ လူပျိုတော် လုပ်ရကြလိမ့်မည်ဟု ဟေဇကိမင်းအား ပြောဆိုလေ၏။ 8ဟေဇကိမင်းကလည်း၊ သင်ပြန်ရသော ထာဝရဘုရား၏နှုတ်ကပတ်တော်ကောင်းပါ၏ ဟူ၍လည်းကောင်း၊ အကယ်စင်စစ် ငါ့လက်ထက်၌ ငြိမ်သက်ခြင်းနှင့် သစ္စာစောင့်ခြင်းရှိရလိမ့်မည်ဟူ၍လည်းကောင်း၊ ဟေရှာယအားဆိုလေ၏။

ဟေရှာယအနာဂတ္တိကျမ်း - ၃၉ (အနက်ဖွင့်)

(ဂ)ဟိဇကိမင်း၏အပြစ်ဒုစရိုက်(အခန်း၃၉)

၃၉:၁-၇ အခန်း၃၉တွင်ဟိဇကိမင်း၏မှားယွင်းသောပြုမူ မှုကိုသမိုင်းမှတ် တမ်းတင်ထားသည်။ အပြစ်ဒုစရိုက်ကြီးမှာဗာဗုလုန်မင်း၏သံတမန်လက်ခံခြင်း ဖြစ်သည်။ အာရှုရိတို့၏ဘေးရန်ကာကွယ်ရန်ဗာဗုလုန်သားများကကူညီစွမ်း ဆောင်နိုင်မည်ဟုထင်မှတ်ခဲ့သည်။ ထိုသတင်းစကားဟေရှာယကြားသောအခါ ဘုရားသခင်ကမနှစ်သက်ကြောင်းသိသည်။ ဗာဗုလုန်သားများကယုဒများကို တဖက်လှည့်ဖမ်းဆီးကျွန်ပြုကြသည်။ မင်းညီမင်းသားမှူးမတ်များသည်ဗာဗု လုန်ဈေးတွင်ဈေးခေါင်းဖြစ်ကြရသည်။ ဤပရောဖက်ပြုချက်ကိုနှစ်ပေါင်း(၇၀) ကကြိုတင်ဟောပြောခြင်းဖြစ်သည်။ ယုဒတို့၏အဓိကရန်သူသည်အာရှုရိများမ ဟုတ်။ ဗာဗုလုန်သားများဖြစ်သည်။

၃၉:၈“ဘုရားသခင်၏နှုတ်ကပတ်တော်သည်ကောင်းပါ၏”ဟုဟိဇကိ မင်းဝန်ခံသည်။ ဘုရားရှင်ကိုဝန်ခံလျက်သူ့လက်ထက်တွင်တိုင်းသူပြည်သား လူအများသည်တရားတော်နှင့်အညီစည်ပင်ဝပြောစွာရှိနေကြမည်။ ကျီးလန့် စာစားခြင်းမရှိရဟုဆိုသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။