Isaiah -28 -

ဟေရှာယအနာဂတ္တိကျမ်း - ၂၈

ဧဖရိမ်အမျိုးကိုစီရင်ခြင်း

1စပျစ်ရည်နှင့် ယစ်မူးသောသူတို့၏နေရာ ကြွယ်ဝသော ချိုင့်ဦးတွင်၊ ဧဖရိမ်အမျိုး သေသောက်ကြူးတို့၏ မာနသရဖူနှင့်၊ သူတို့၌ ညှိုးနွမ်းတတ်သော ဘုန်းအသရေ၏ပန်းပွင့်သည် အမင်္ဂလာရှိ၏။ 2ထာဝရဘုရား၌ ခွန်အားတန်ခိုးကြီးသောသူသည်၊ မိုးသီးပါလျက် ဖျက်ဆီးသော မိုးသက်မုန်တိုင်း ကဲ့သို့လည်းကောင်း၊ ပြင်းစွာထ၍ လွှမ်းမိုးသော ရေကြီးကဲ့သို့လည်းကောင်း၊ မြေတိုင်အောင် ပြင်းစွာချပစ်လိမ့်မည်။ 3ဧဖရိမ်အမျိုး သေသောက်ကြူးတို့၏ မာနသရဖူသည်၊ ကျော်နင်းခြင်းကို ခံရလိမ့်မည်။ 4ကြွယ်ဝသော ချိုင့်ဦးတွင်၊ သူတို့၌ ညှိုးနွမ်းတတ်သော ဘုန်းအသရေ၏ပန်းပွင့်သည်၊ နွေကာလမစေ့မီ အလျင်သီးသော အသီးကဲ့သို့ ဖြစ်လိမ့်မည်။ ထိုအသီးကို မြင်သောသူသည် မြင်လျက်၊ လက်နှင့် ကိုင်လျက်ပင် စားတတ်၏။

5ထိုကာလ၌လည်း၊ ကောင်းကင်ဗိုလ်ခြေအရှင် ထာဝရဘုရားသည်၊ ကျန်ကြွင်းသော မိမိလူတို့၌ ဘုန်းရှိသောသရဖူ၊ အသရေတင့်တယ်သော ဦးရစ် ဖြစ်တော်မူလိမ့်မည်။ 6တရားမှုကို စီရင်သောသူတို့အား တရားစီရင်သော ဉာဏ်ကိုလည်းကောင်း၊ ရန်သူမျိုး တံခါးတိုင်အောင် စစ်မှုကိုလှန်သောသူတို့အား၊ ခွန်အားဗလကိုလည်းကောင်း ပေးတော်မူလိမ့်မည်။

7သို့သော်လည်း၊ ထိုသူတို့သည် စပျစ်ရည်ကြောင့် မှားယွင်းကြပြီ။ သေရည်သေရက်ကြောင့် လမ်းလွဲကြပြီ။ ယဇ်ပုရောဟိတ်နှင့် ပရောဖက်တို့သည် သေရည်သေရက်ကြောင့် မှားယွင်းကြပြီ။ စပျစ်ရည်နှင့် မွှန်ကြပြီ။ သေရည်သေရက်ကြောင့် လမ်းလွဲကြပြီ။ ဗျာဒိတ်ခံသည်အရာ၌ မှားယွင်းလျက်၊ တရားစီရင်သည်အရာ၌ ထိမိ၍ လဲလျက်နေကြ၏။ 8သူတို့စားပွဲ ရှိသမျှတို့သည်၊ လွတ်လပ်ရာ မရှိသည်တိုင်အောင်၊ အန်ဖတ်နှင့်လည်းကောင်း၊ အညစ်အကြေးနှင့်လည်းကောင်း ပြည့်လျက်ရှိကြ၏။ 9သူတို့က၊ အဘယ်သူကို ပညာသွန်သင်ချင်သနည်း။ အဘယ်သူကို တရားနားလည်စေချင်သနည်း။ ငါတို့သည် နို့နှင့် ကွာစရှိသောသူ၊ အမိသားမြတ်နှင့် အနိုင်ကွာရသောသူ ဖြစ်ကြသလော။ 10ပညတ်တစ်ခုပေါ်မှာ တစ်ခု၊ တစ်ခုပေါ်မှာ တစ်ခု၊ တစ်နည်းပေါ်မှာ တစ်နည်း၊ တစ်နည်းပေါ်မှာ တစ်နည်း၊ သည်ဘက်မှာ အနည်းငယ်၊ ဟိုဘက်မှာ အနည်းငယ်ရှိပါသည်တကားဟု ဆိုကြ၏။ 11အကယ်စင်စစ်၊ စကားမပြီသောနှုတ်၊ ရိုင်းသောလျှာနှင့် ဤလူမျိုးကို မိန့်တော်မူလိမ့်မည်။ 12ဤသို့ပြုလျှင် ငြိမ်ဝပ်လိမ့်မည်။ ပင်ပန်းသောသူတို့သည် ငြိမ်ဝပ်ကြစေ။ ဤသို့ပြုလျှင် သက်သာလိမ့်မည်ဟု မိန့်တော်မူသော်လည်း၊ သူတို့သည် နားမထောင်ကြ။ 13ထိုကြောင့်၊ သူတို့သည် သွားရာတွင်၊ လှန်ဆုတ်၍ ကျိုးပဲ့ကျော့မိ ဖမ်းဆီးခြင်းသို့ ရောက်မည်အကြောင်း၊ ထာဝရဘုရား၏ နှုတ်ကပတ်တော်သည် သူတို့၌ ပညတ်တစ်ခုပေါ်မှာ တစ်ခု၊ တစ်ခုပေါ်မှာ တစ်ခု၊ တစ်နည်းပေါ်မှာ တစ်နည်း၊ တစ်နည်းပေါ်မှာ တစ်နည်း၊ သည်ဘက်မှာ အနည်းငယ်၊ ဟိုဘက်မှာ အနည်းငယ် ဖြစ်ရလိမ့်မည်။

ယေရုရှလင်မြို့ကိုသတိပေးခြင်း

14သို့ဖြစ်၍၊ ဆဲရေးတတ်သော ယေရုရှလင်မြို့သား အကြီးအကြပ်တို့၊ ထာဝရဘုရား၏ နှုတ်ကပတ်တော်ကို နားထောင်ကြလော့။ 15သင်တို့က၊ ငါတို့သည် သေမင်းနှင့် မိတ်သဟာယ ဖွဲ့ကြပြီ။ မရဏနိုင်ငံနှင့် အကျွမ်းဝင်ကြပြီ။ လွှမ်းမိုးသောဘေးသည် ချင်းနင်းသောအခါ၊ ငါတို့ရှိရာသို့ မရောက်ရ။ ငါတို့သည် မုသားကိုကိုးစားကြ၏။ လှည့်စားခြင်းအောက်၌ ပုန်းကွယ်၍ နေကြ၏ဟု ဆိုတတ်သောကြောင့်၊ 16အရှင်ထာဝရဘုရားက၊ စုံစမ်းသောအမြစ်ကျောက်တည်းဟူသော၊ မလှုပ်နိုင်အောင် မြဲမြံသော တိုက်ထောင့်အမြစ် ကျောက်မြတ်ကို ဇိအုန်တောင်ပေါ်မှာ ငါချထား၏။ ထိုကျောက်ကို အမှီပြုသောသူသည် ပြေးရသောအကြောင်း မရှိ။ 17တရားမှုကို ဆုံးဖြတ်ခြင်း၊ ဖြောင့်မတ်စွာ စီရင်ခြင်းကို မျဉ်းကြိုးနှင့် မှန်ထုပ်အားဖြင့် ငါပြုမည်။ မိုးသီးရွာ၍ ကိုးစားရာမုသားကို ပယ်ရှားလိမ့်မည်။ ပုန်းကွယ်ရာအရပ်ကိုလည်း ရေလွှမ်းမိုးလိမ့်မည်။ 18သင်တို့သည် သေမင်းနှင့်ဖွဲ့သော မိတ်သဟာယပျက်လိမ့်မည်။ မရဏနိုင်ငံနှင့် အကျွမ်းဝင်ခြင်းသည် အထမမြောက်ရ။ လွှမ်းမိုးသောဘေးသည် ချင်းနင်းသောအခါ၊ သင်တို့ကိုလည်း ကျော်နင်းလိမ့်မည်။ 19ချင်းနင်းစဉ်တွင် ပါသွားလိမ့်မည်။ နံနက်အချိန်ရောက်မြဲ အစဉ်အတိုင်း၊ နေ့ညမပြတ် ချင်းနင်းသည်ဖြစ်၍၊ သတင်းကြားကာမျှအားဖြင့် ထိတ်လန့်ခြင်းအကြောင်း ရှိလိမ့်မည်။ 20ခုတင်သည် ကိုယ်မဆန့်လောက်အောင်တို၏။ စောင်သည်လည်း မခြုံလောက်အောင် ငယ်၏။ 21ထာဝရဘုရားသည် အမှုတော်တည်းဟူသော၊ ထူးခြားသော အမှုတော်ကို ပြုခြင်းငှာလည်းကောင်း၊ အလုပ်တော်တည်းဟူသော၊ လုပ်မြဲမဟုတ်သော အလုပ်တော်ကို လက်စသတ်ခြင်းငှာလည်းကောင်း၊ ပေရဇိမ်တောင်ပေါ်မှာ ပြုသကဲ့သို့ ထတော်မူမည်။ ဂိဗောင်ချိုင့်ထဲမှာ ရှိသကဲ့သို့ အမျက်ထွက်တော်မူမည်။ 22ယခုမှာ သင်တို့သည် သာ၍ပြင်းစွာသော ဆုံးမခြင်းနှင့် လွတ်မည်အကြောင်း၊ နောက်တစ်ဖန် ဆဲရေးခြင်းကို မပြုကြနှင့်။ ပြည်တစ်ပြည်လုံး၌ အနှံ့အပြား စီရင်ဆုံးဖြတ်သော သုတ်သင်ပယ်ရှင်းခြင်းရှိလိမ့်မည်ဟု ကောင်းကင်ဗိုလ်ခြေသခင် အရှင်ထာဝရဘုရားထံတော်၌ ငါကြားရပြီ။

ဘုရားသခင်၏ဉာဏ်တော်

23ငါပြောသံကိုကြား၍ မှတ်ကြလော့။ ငါ့စကားကို စေ့စေ့ နားထောင်နာယူကြလော့။ 24လယ်လုပ်သောသူသည် မျိုးစေ့ကို ကြဲခြင်းငှာ၊ မြေကိုဆွလျက်၊ မြေစိုင်ကိုချေလျက် အစဉ် လယ်ထွန်တတ်သလော။ 25လယ်မျက်နှာကို ညှိပြီးမှ စမုန်နက်မျိုးစေ့၊ ဇီယာမျိုးစေ့ကို ကြဲသည်မဟုတ်လော။ ဂျုံစပါးမျိုးစေ့ကို အတန်းတန်းစိုက်၍၊ မုယောစပါးနှင့် ကောက်စပါးမျိုးစေ့ အသီးအသီးတို့ကို သူတို့အရပ်၌ ကြဲသည်မဟုတ်လော။ 26အကြောင်းမူကား၊ သူ၏ဘုရားသခင်သည် စီရင်တတ်သော ဉာဏ်ကိုပေးတော်မူ၏။ သူ့ကိုလည်း သွန်သင်တော်မူ၏။ 27စမုန်နက် မျိုးစေ့ကိုလည်း ပျဉ်ပြားနှင့် မနယ်တတ်။ ဇီယာစေ့ပေါ်၌လည်း လှည်းဘီးကို မလှိမ့်တတ်။ စမုန်နက်စေ့ကို တုတ်နှင့်လည်းကောင်း၊ ဇီယာစေ့ကို ကြိမ်လုံးနှင့်လည်းကောင်း ရိုက်တတ်၏။ 28ဂျုံစပါးကိုကား နယ်တတ်၏။ သို့သော်လည်း၊ အစဉ်နယ်တတ်သည် မဟုတ်။ လှည်းဘီးနှင့် မြင်းတို့ကို နှင်သော်လည်း၊ စပါးကို ညက်စေတတ်သည် မဟုတ်။ 29ထိုအမှုသည်လည်း၊ ကောင်းကင်ဗိုလ်ခြေအရှင် ထာဝရဘုရား အကြံပေးတော်မူသောအမှုတည်း။ အကြံပေးတော်မူခြင်းသည် အံ့ဩဖွယ်ဖြစ်၏။ ဉာဏ်တော်သည်လည်း ထူးဆန်းပေ၏။

ဟေရှာယအနာဂတ္တိကျမ်း - ၂၈ (အနက်ဖွင့်)

(စ)ဣသရေလနှင့်ယေရုရှလင်တို့ကျဆုံးခြင်းနှင့်ပြန်လည်ထမြောက်ကြခြင်း (အခန်း၂၈-၃၅)

၁။ ဧဖရိမ်၊ဣသရေလသို့အမင်္ဂလာ(အခန်း၂၈)

၂၈:၁-၄ ရှမာရိတို့သည် မာနသရဖူ၊ ဣသရေလ(ဧဖရိမ်)အရက်သမားတို့၏ ဘုန်းအသရေပန်းပွင့်သည် ညှိုးနွမ်းတတ်သည်။ တောင်ထိပ်မြို့တော်၏ ဘုန်းအသရေသည်အချိန်မတန်မီပွင့်၍အသီးမကောင်းသောအသီးကဲ့သို့ဖြစ်သွားမည်။ မြို့ကြီးသားများသည်မူးယဇ်သောက်စားလျက်ရုပ်ဝတ္တုပစ္စည်းနောက်သို့၎င်း၊ ကာမတဏှာနောက်၎င်းရမ္မက်ကြီးကြသောကြောင့်ကြွေရက်စောကြမည်။ အ သီးမတန်မီဆွတ်ချခံရသောသင်္ဘောသဖန်းပင်ကဲ့သို့ထို့မြို့တော်ကိုအာရှုရိသား များကတိုက်ခိုက်ဆွတ်ယူဖို့တကဲကဲပြင်ဆင်နေကြသည်။

၂၈:၅-၆ ထာဝရဘုရားသခင်၏အသရေတင့်တယ်သောဦးရစ်သရဖူသည် ညှိုးနွမ်းခြင်းမရှိသောကြောင့်ခရစ်တော်ဘုရားတဖန်ပြန်လည်ကြွလာ၍နိုင်ငံ တော်တည်ထောင်သောအခါကျန်ကြွင်းသောဣသရေလသားများကကျေနပ်စွာ ဆောင်းကြရမည်။ ဘုရားရှင်ကဧဖရိမ်ခေါင်းဆောင်များကိုစစ်တောင်းလော့၊အ စွမ်းသတ္တိ၊တရားစီရင်သောတန်ခိုးပေးသောကြောင့်ရန်သူများကိုအောင်မြင် ကြမည်။ ရန်သူမြို့တံခါးထိအောင်ပန်းဆင်ကြမည်။

၂၈:၇-၈ ယုဒလူများဘက်သို့တဖန်မြှားဦးလှည့်သည်။ ယုဒလူများသည် လည်းဣသရေလသားများကဲ့သို့ပင်မူးယဇ်သောက်စားလျက်စားပွဲကိုအန်ဖတ် ဖြင့်ပေကျံစေကြသည်။ ယဇ်ပုရောဟိတ်များနှင့်ပရောဖက်များသည်လည်းနှုတ် ကပတ်တော်နာခံခြင်းမရှိကြ။

၂၈:၉-၁၀ ဘာသာရေးခေါင်းဆောင်များက ဘုရားသခင်ကိုစော်ကားကြ သည်။ သူတို့ကိုဘုရားသခင်ကသူငယ်နှပ်စားများကဲ့သို့ ဆက်ဆံသည်ဟုဆင် ခြေဆင်လက်ပေးကြသည်။ ဘုရားသခင်ကထိုသူများကို လူမမယ်စာမမြောက် ဥခွံကျွတ်စကဲ့သို့အမှန်တကယ်သဘောထားပါသလား။ စကားတလုံးတည်း သာပြောတတ်သေးသောသူငယ်ကဲ့သို့မှတ်သလား(ဟေဗြဲကျမ်းတွင်)၃၆။

၂၈:၁၁-၁၃ ဘုရားသခင်က“ဟုတ်ကဲ့၊ထိုကဲ့သို့မှတ်ပါသည်”ဟုဆိုသည်။ “ငါ့စကားကိုနားလည်သော်လည်းနားမထောင်ချင်သောအချိန်မှစ၍သင်တို့ထံသို့ ရပ်ခြားသားကျူးကျော်ရေးသမား (အာရှုရိ)များကိုစေလွှတ်မည်”။ သူတို့၏ နှုတ်ထွက်စကားများသည်ဘုရားသခင်၏နှုတ်ကပတ်တော်မနာခံသူများအ တွက်တရားစီရင်ခြင်း အမိန့်အာဏာကဲ့သို့ပြင်းထန်သည်။ နှုတ်ကပတ်တော်ကို မနာခံ၊မခံယူသူများသည်အခြားလူများ၏စကားကိုနာခံစေမည်။ ဘုရားသခင် သည်ဘုရားဖြစ်သည့်အလျောက် အလိုတော်အတိုင်းစီရင်ပိုင်ခွင့်ရှိသည်။ ထိုစ ကားကို Jennings ဤသို့ထောက်ခံသည်။

အရှင်းလင်းဆုံး၊ အရိုးသားဆုံးစကားဖြစ်ပါသည်။ နှုတ်ကပတ်တော်မနာခံ၊ ငြင်းပယ်သူများတွင်တာဝန်ရှိပါသည်။ နှုတ်ကပတ်တော်မနာခံမှု သာမက၊ ငြင်းဆန်ကြသောကြောင့်အရေးယူခြင်းခံရမှာထိုက်တန်ပါသည်။၃၇

၂၈:၁၄-၁၅ ယုဒခေါင်းဆောင်များကအာရှုရိသားများ ကျူးကျော်တိုက် ခိုက်ခြင်းရန်မှကင်းလွတ်ရန် အဲဂုတ္တုနှင့်မဟာမိတ်ပြုခြင်းအပေါ်ဂုဏ်ယူဝင့် ကြွားကြသည်။ သို့သော်ထိုမဟာမိတ်ပြုခြင်းကသူတို့ကိုမရဏနိုင်ငံသို့ပို့ဆောင် သည်ကိုမသိကြ။ မုသာစကားနှင့်လှည့်စားခြင်းကိုယုံမှားကြပြီ။ သေမင်းနှင့်စာချုပ်ချုပ်ခြင်း၊ မရဏနိုင်ငံနှင့်အကျွမ်းဝင်ခြင်းဟူသောစကားသည် စာပေသဒ္ဒါ အားဖြင့်အနက်ကောက်ယူရန်မဟုတ်။ ယုဒပြည်သည်အဲဂုတ္တုပြည်နှင့်မိဿဟာ ယပြုသောကြောင့် ယာမမင်းကိုမကြောက်၊ မရဏာနိုင်ငံသို့သွားဖို့မစိုးရိမ်ဟုဆိုလိုသည်။ အချို့ကျမ်းစာပညာရှင်များက နောင်အနာဂတ်တွင် ယုဒပြည်နှင့်သားရဲတို့မဟာမိတ်ပြုကြမည့်အကြောင်းဖြစ်သည်ဟုအနက်ဖွင့်ကြသည်။ (ဒံ၉:၂၇)

၂၈:၁၆-၁၇ ဘုရားသခင်သည်မေရှိယတစ်ပါးတည်းကိုသာယုံကြည်ကိုးစား ကြဖို့၊ မလှုပ်နိုင်သောမြဲမြံသည့်တိုက်ထောက်မြစ်အဖြစ်ယုံကြည်စိတ်ချဖို့ပြော ထားသည်။ မေရှိယသခင်ကိုကိုးစားတည်မှီသူများသည်ဘယ်သောအခါယိုင်လဲ ခြင်းမရှိရ။ မေရှိယသခင်ကတရားမျှတခြင်း၊ ဖြောင့်မတ်စင်ကြယ်ခြင်းအုပ်စိုး မည်။ အပြစ်စီရင်ခြင်းခံစားစေသောယုံမှားခြင်းများကိုလည်းပယ်ရှားပေးမည်။

၂၈:၁၈-၂၂ ကျူးကျော်သူများဝင်ရောက်လာသောအခါယုဒတို့၏နိုင်ငံ ရေးတန်ခိုးအစွမ်းကပြည်သူများကိုကာကွယ်ခြင်းမပြုနိုင်။ ဝင်ရောက်လာ သော ရန်သူတိုင်းက အိမ်တွင်း ထိအောင် ကျူးကျော်ဝင်ရောက်လာကြမည်။ ထိုအခါယုဒပြည်သူများသည်ဘုရားသခင်၏သတိပေးစကားများကိုပြန်လည် အမှတ်ရကြမည်။ “ခုတင်သည်ကိုယ်မဆန့်လောက်အောင်တို၏။ စောင်သည် လည်းမခြုံလောက်အောင်ငယ်၏”ထိုစကားသည်ထိုသူများအားဘေးရန်လုံခြုံ ပေးမည့်ကတိတော်စောင့်ထိန်းဖို့ချို့ယွင်းကြသည့်အကြောင်းဖြစ်သည်။ သို့ သော်ထိုသူများ၏နောင်တစကားများသည်နောက်ကျနေပြီ။ ဘုရားသခင်သည် သူလူများ၏ရန်သူများတရားစီရင်သကဲ့သို့သူ့လူများကိုလည်းအရေးယူအပြစ် ပေးမည်။ အရေးယူချက်မှာတိုင်းတပါးသားများထဲသို့ဝကွက်အပ်နှံသည်။ ညှဉ်း ပန်းနှိပ်စက်ခြင်း၊ ဖိစီခြင်း၊ ကြိမ်းမောင်းခြင်းတနေ့ပြီးတနေ့ပိုမိုခံကြရမည်။

၂၈:၂၃-၂၉ ဤပရောဖက်ပြုချက်နှင့်ပတ်သက်၍ Herbert vandrer lugt ၏ဖွင့်ဆို ချက်ကို ဖတ်ရှုကြည့်ကြရအောင်။

ဘုရားသခင်က သူ့လူများနှင့်ဆက်ဆံပုံကိုလယ်သမားလုပ်ငန်းအသွင်အ ပြင်(၃)မျိုးဖြင့် ရှင်းပြထားသည်။ ပထမဦးစွာလယ်သမားသည် စိုက်ပျိုးဖို့အဆင် သင့်မဖြစ်မခြင်း၊ လယ်ကိုထွန်ယက်ချေမွသည်(ငယ်၂၄)။ ထိုကဲ့သို့ပင်ယုံကြည်သူများ၏အသက်တာတွင်လည်းအကြံအစည်တော်စံချိန်မမီမခြင်းလှုပ်နှိုးနေပါသည်။ မြေသားထွန်ယက်ပြီးသောအခါ လယ်သမားမျိုးစေ့ကိုအလုံအလောက် ကြဲသည်(ငယ်၂၅-၂၆)။ ထိုကဲ့သို့ပင်ဘုရားသခင်သည်စီချိန်စံညွှန်းမီသောမျိုး စေ့များကိုစနစ်တကျရွေးချယ်သည်။ ကန့်သတ်ချက်အရည်အသွေးပြည့်မီရန် လိုအပ်သောတန်ဆာပလာအရာများကိုလည်းအားဖြည့်ပေးသည်။ နောက်ဆုံး တွင်လယ်သမားသည်ကောက်နှံများကိုရိတ်သိမ်းသည်။ ကောက်လှိုင်းများချွေ ချသည်(ငယ်၂၇၊၂၈)။ ဘုရားသခင်သည်မတန်တဆအလေးများကိုမသုံးပါ။ ကောက်လှိုင်းများနှင့်တန်ရာတန်ရာကိရိယာများသုံးပါသည်။ ထိုကဲ့သို့ပင်ယုံ ကြည်သူများကိုလည်း မနိုင်မနင်းမတန်မဆဝန်များမထမ်းခိုင်းပါ။ တန်ရာတန် ရာခံနိုင်ရည်ရှိသလောက်သာခိုင်းပါသည်။၃၈

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။