Isaiah -27 -

ဟေရှာယအနာဂတ္တိကျမ်း - ၂၇

ဣသရေလအတွက်ကယ်တင်ခြင်း

1ထိုကာလ၌ ထာဝရဘုရားသည် ပြေးတတ်သော မြွေလဝိသန်ကိုလည်းကောင်း၊ လိမ်သော မြွေလဝိသန်ကိုလည်းကောင်း ခိုင်ခံ့ကြီးမားသော ဓားတော်နှင့် ဒဏ်ပေး၍၊ ပင်လယ်၌ရှိသော နဂါးကိုလည်း သတ်တော်မူလိမ့်မည်။

2ထိုကာလ၌ စပျစ်ဥယျာဉ်ကို အကြောင်းပြု၍၊ ဤသို့ သီချင်းဆိုကြလော့။ 3ငါထာဝရဘုရားသည် ဥယျာဉ်စောင့်ဖြစ်၏။ မခြားမလပ် ရေလောင်းမည်။ အဘယ်သူမျှ မဖျက်စေခြင်းငှာ၊ နေ့ညမပြတ် စောင့်ရှောက်မည်။ 4ငါ့အမျက် ငြိမ်းပြီ။ ဆူးပင်မျိုးကိုမူကား၊ စစ်ပွဲ၌ ငါတွေ့ပါစေသော။ ချက်ချင်းတိုက်၍ တစ်ပြိုင်နက်မီးရှို့မည်။ 5သို့မဟုတ် ငါ၏အစွမ်းသတ္တိကို ကိုးစား၍၊ ငါနှင့် မိတ်သဟာယ ဖွဲ့ကြစေ။ ငါနှင့် မိတ်သဟာယဖွဲ့ကြစေသော။

6နောင်ကာလ၌ ယာကုပ်သည် အမြစ်ကျလိမ့်မည်။ ဣသရေလသည် စိမ်းလန်း၍ အဖူးအငုံထွက်သဖြင့်၊ လောကီနိုင်ငံကို အသီးနှင့် ပြည့်စေလိမ့်မည်။ 7သူ့ကို ညှဉ်းဆဲသောသူတို့ကို ညှဉ်းဆဲတော်မူသည် နည်းတူ၊ သူ့ကို ညှဉ်းဆဲတော်မူသလော။ သူ့ကိုသတ်သောသူတို့သည် အသေသတ်ခြင်းကို ခံရကြသည် နည်းတူ၊ သူသည် အသေသတ်ခြင်းကို ခံရသလော။ 8သူ့ကိုစွန့်ပစ်၍ အတော်အတန် ဆုံးမတော်မူ၏။ အရှေ့လေ လာသောအခါ၊ ပြင်းစွာသောလေဖြင့် တိုက်သွားတော်မူ၏။ 9ထိုသို့ ယာကုပ်အမျိုးသည် ယဇ်ပလ္လင်ကျောက်တို့ကို ထုံးကျောက်ကဲ့သို့ ချိုးဖဲ့၍၊ အာရှရပင်နှင့် ရုပ်တုတို့ကို လှဲသောအခါ၊ မိမိအပြစ်ပြေ၍၊ အပြစ်ပြေရှင်းခြင်း အကျိုးကျေးဇူးရှိသမျှကို ခံရလိမ့်မည်။ 10သို့သော်လည်း၊ ခိုင်ခံ့သောမြို့သည်၊ ဆိတ်ညံသောအရပ်၊ တောကဲ့သို့စွန့်၍ ပစ်ထားသောနေရာ ဖြစ်လိမ့်မည်။ ထိုအရပ်၌ နွားသငယ်သည် ကျက်စားလျက်၊ အိပ်လျက်နေ၍၊ အညွန့်များကို ကိုက်စားလိမ့်မည်။ 11အခက်အလက်တို့သည် သွေ့ခြောက်သောအခါ ချိုးခြင်းသို့ရောက်၍၊ မိန်းမတို့သည် လာ၍ မီးရှို့ကြလိမ့်မည်။ အကြောင်းမူကား၊ ပညာမဲ့သောအမျိုးဖြစ်၏။ ထိုကြောင့်၊ ဖန်ဆင်းပြုပြင်တော်မူသောသူသည် မသနား၊ ကျေးဇူးမပြုဘဲ နေတော်မူလိမ့်မည်။

12အိုဣသရေလ အမျိုးသားတို့၊ ထိုကာလ၌လည်း၊ ထာဝရဘုရားသည် မြစ်ကြီးမှစ၍၊ အဲဂုတ္တုမြစ်တိုင်အောင် သစ်သီးများကို သိမ်းယူတော်မူသဖြင့်၊ သင်တို့သည် တစ်ယောက်နောက်တစ်ယောက်၊ ကောက်သိမ်းခြင်းကျေးဇူးတော်ကို ခံရကြလိမ့်မည်။ 13ထိုကာလ၌လည်း၊ ကြီးသောတံပိုးကို မှုတ်ရလိမ့်မည်။ အာရှုရိပြည်၌ ပျောက်သောသူ၊ အဲဂုတ္တုပြည်၌ စွန့်ပစ်သောသူတို့သည် လာ၍၊ ယေရုရှလင်မြို့တွင်၊ သန့်ရှင်းသောတောင်ပေါ်မှာ ထာဝရဘုရားရှေ့တော်၌ ဝတ်ပြု၍ ကိုးကွယ်ကြလိမ့်မည်။

ဟေရှာယအနာဂတ္တိကျမ်း - ၂၇ (အနက်ဖွင့်)

၃။ ရွေးနှုတ်ထားသောဣသရေလများအတွက်

တေးသီချင်း(အခန်း၂၇)

၂၇:၁ ရောက်လာမည့်ဘုရားသခင်နေ့ရက်တွင် ပြေးတတ်သောမြွေ လဝိသန်(အာရှုရိ)၊ လိမ်သောမြွေလဝိသန်(ဗာဗုလုန်)၊ ပင်လယ်၌ရှိသောနဂါး(အဲ ဂုတ္တု) တို့ကိုယေဟောဝါဘုရားသုတ်သင်ဖယ်ရှားပေးမည်။ အချို့ကျမ်းစာပညာ ရှင်များကထိုမကောင်းဆိုးဝါးသုံးကောင်စလုံးသည်ဗာဗုလုန်ကိုရည်ညွှန်းသည်ဟုဆိုကြသည်။ အချို့ကစာတန်မာရ်နတ်ဟုဆိုကြသည်။ လောကတခွင်ကိုမွှေ နှောက်နိုင်စွမ်းရှိသောမြွေဆိုးသို့မဟုတ်နဂါးဖြစ်သည်ဟုဆိုကြသည်။ (က ၃:၁၊ ဗျာ၁၂:၃၊ ၁၃:၂၊ ၁၆:၃)။

၂၇:၂-၆ ထိုနေ့ရက်ကာလတွင် ဘုရားသခင်ရွေးနှုတ်ထားသောစပျစ်ဥယျဉ် (ဣသရေလ)သည်ဘုရားရှင်အားချီးမွမ်းသီဆိုကြမည်။ ဘုရားသခင်ကစပျစ်ဥ ယျာဉ်အားနေ့ညဉ့်မပြတ်စောင့်ကြပ်မည်။ အမျက်ဒေါသသင့်ခြင်းအလျဉ်းမရှိ စေရ။ အကယ်၍ထိုစပျစ်ဥယျာဉ်အားမျက်စောင်းထိုးရန်ညိုးဖွဲ့သူပေါ်ပေါက် လျှင်ဘုရားသခင်ကထိုရန်သူများအားပေါင်းမြက်ပင်၊ဆူးပင်များကဲ့သို့မီးရှို့ပစ် မည်။ ဘေးမသီရန်မခလုံခြုံအောင်ကွယ်ကာစောင့်ရှောက်မည်။ အနှစ်တစ်ထောင် ခရစ်တော်နိုင်ငံတော်တွင်ဣသရေလအမျိုးသည်ဖူးငုံသီးပွင့်မည်။ လောကနိုင်ငံ တစ်ခုလုံးတွင်ဣသရေလအသီးအပွင့်များပြည့်ဝဝေဆာစေမည်။

၂၇:၇-၉ ဘုရားသခင်သည်ဣသရေလအမျိုးအား အခြားသောတပါးလူ မျိုးကဲ့သို့သဘောမထားနိုင်။ ဣသရေလလူမျိုးအပေါ်ထားရှိသောသဘောထားသည် ရည်ရွယ်ချက်အကန့်အသတ်ရှိသည်။ ဘုရားကိုမချစ်ဘဲ၊ရုပ်တုဆင်းတု များကိုကိုးကွယ်ကြသောကြောင့်နိုင်ငံရပ်ခြားသို့မောင်းထုတ်ဆုံးမသည်။ ထိုသို့ အရေးယူအပြစ်ပေးခြင်းမှာဣသရေလလူမျိုးကိုရုပ်တုဆင်းတုဘုရားတုမကိုး ကွယ်ကြစေရန်ပညာပေးခြင်းဖြစ်သည်။ ဘုရားစစ်ဘုရားမှန်ထာဝရဘုရားကိုသာယုံကြည်ကိုးစားစေချင်သည်။

၂၇:၁၀-၁၁ ထိုကာလတွင်ယေရုရှလင်မြို့ပျက်သုန်းကြောင်းတွေ့ရမည်။ ထွက်လာသောရွက်နုမြက်သစ်များကနွားသငယ်များကစားကြမည်။ အခက်အ လက်များကိုအိမ်ရှင်မများကအခြောက်လှမ်း၍လောင်စာလုပ်ကြမည်။ အဘယ် ကြောင့်ဆိုသော်ထိုသူများသည်ဝိညာဉ်ရေးရာအသိတရားမပြည့်ဝကြ။

၂၇:၁၂-၁၃ ထိုနေ့ရက်ကာလ၌ဣသရေလတို့အဝင်၌စစ်မှန်သောအသီး နှင့်မကောင်းသောအသီးများကိုရွေးချယ်မည်။ မြစ်ရိုးတလျှောက်အပင်ရှိသမျှကိုလှုပ်ခါမည်။ အာရှုရိပြည်၊အဲဂုတ္တုအနှံ့တွင်ပြန့်ကြဲပျောက်လွင့်နေသောယုဒလူများကိုပြန်လည်စုစည်းမည်။ ယေရုရှလင်သို့ပြန်လည်ခေါ်ဆောင်၍ဘုရားသ ခင်ကိုအတူတကွဝတ်ပြုကိုးကွယ်ကြမည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။