Isaiah -26 -

ဟေရှာယအနာဂတ္တိကျမ်း - ၂၆

အောင်ပွဲခံသီချင်း

1ထိုကာလ၌ ယုဒပြည်မှာ သီချင်းဆိုလတ္တံ့သော စကားဟူမူကား၊ ငါတို့၌ ခိုင်ခံ့သောမြို့ရှိ၏။ ကယ်တင်ခြင်း ကျေးဇူးကို ပြအိုး၊ ရင်တားအရာ၌ စီရင်ခန့်ထားတော်မူလိမ့်မည်။ 2တံခါးတို့ကို ဖွင့်ကြလော့။ 3သစ္စာစောင့်၍ ဖြောင့်မတ်သောလူမျိုးဝင်ပါစေ။ စိတ်နှလုံးတည်ကြည်သောသူသည် ကိုယ်တော်၌ ခိုလှုံသောကြောင့်၊ ငြိမ်သက်ခြင်းသက်သက်ရှိမည့်အကြောင်း စောင့်ရှောက်တော်မူလိမ့်မည်။ 4ထာဝရဘုရား၌ အစဉ်အမြဲ ခိုလှုံကြလော့။ ထာဝရဘုရားသည် နိစ္စထာဝရခိုလှုံရာ ဖြစ်တော်မူ၏။ 5မြင့်သောအရပ်၌ နေသောသူတို့ကို ရှုတ်ချတော်မူ၏။ မြင့်မြတ်သောမြို့ကို ဖြို၍၊ မြေတိုင်အောင် နှိမ့်ချလျက် မြေမှုန့်ထဲမှာ ထားတော်မူ၏။ 6ကျော်နင်းခြင်းကို ခံရလိမ့်မည်။ ဆင်းရဲသောသူနှင့် ငတ်မွတ်သောသူတို့သည် ကျော်နင်းကြလိမ့်မည်။

7ဖြောင့်မတ်သောသူသည် ဖြောင့်သောလမ်း၌ သွားတတ်၏။ အို ဖြောင့်မတ်တော်မူသောဘုရား၊ ကိုယ်တော်သည် ဖြောင့်မတ်သောသူ၏ လမ်းခရီးကို ပြင်ဆင်တော်မူ၏။ 8အို ထာဝရဘုရား၊ အကျွန်ုပ်တို့သည် တရားတော်လမ်း၌သွားလျက်၊ ကိုယ်တော်ကိုမျှော်လင့်၍၊ ကိုယ်တော်၏အမည်၊ ဘွဲ့နာမတော်ကို စိတ်နှလုံး၌ တသလျက်ရှိပါ၏။ 9ညအခါ အကျွန်ုပ်သည် စိတ်နှလုံးနှင့် ကိုယ်တော်ကို တောင့်တပါ၏။ နံနက်အခါ အကျွန်ုပ်သည် အတွင်းဝိညာဉ်အားဖြင့် ကိုယ်တော်ကိုရှာပါ၏။ မြေပေါ်မှာ အမှုကိုစစ်ကြောစီရင်တော်မူသောအခါ၊ လောကီသားတို့သည် တရားကိုသင်ကြ၏။ 10မတရားသောသူသည် ကျေးဇူးကိုခံရသော်လည်း၊ တရားကို မသင်တတ်ပါ။ တရားကျင့်ရာပြည်၌ပင် အဓမ္မပြု၍၊ ထာဝရဘုရား၏ဘုန်းတော်ကို ပမာဏမပြုတတ်ပါ။ 11အို ထာဝရဘုရား၊ လက်တော်ကို ချီတော်မူသော်လည်း၊ သူတို့သည် မမြင်မမှတ်ကြပါ။ သို့သော်လည်း၊ ကိုယ်တော်၏ လူတို့အဖို့ စိတ်အားကြီးတော်မူကြောင်းကို၊ သူတို့သည် မြင်၍ အရှက်ကွဲကြပါလိမ့်မည်။ ကိုယ်တော်၏ ရန်သူတို့ကို မီးလောင်ရပါလိမ့်မည်။

12အို ထာဝရဘုရား၊ ကိုယ်တော်သည် အကျွန်ုပ်တို့အား ငြိမ်သက်ခြင်းကို ပေးတော်မူလိမ့်မည်။ အကြောင်းမူကား၊ အကျွန်ုပ်တို့၏ အမှုရှိသမျှတို့ကို အကျွန်ုပ်တို့အဖို့ ပြုတော်မူ၏။ 13အကျွန်ုပ်တို့၏ ဘုရားသခင်ထာဝရဘုရား၊ ကိုယ်တော်မှတစ်ပါး အခြားသောသခင်တို့သည် အကျွန်ုပ်တို့ကို အစိုးရကြပြီ။ ယခုမူကား၊ ကိုယ်တော်အားဖြင့်သာ နာမတော်ကို ချီးမွမ်းကြပါမည်။ 14ထိုသခင်တို့သည် သေကြပါပြီ။ တစ်ဖန် အသက်မရှင်ရကြပါ။ သင်္ချိုင်းသားဖြစ်၍ ထမြောက်ခြင်း မရှိရကြပါ။ သူတို့ကို ကြည့်ရှုဖျက်ဆီး၍၊ သူတို့၏အမှတ်မျှ မရှိစေခြင်းငှာ ပယ်ရှင်းတော်မူပြီ။ 15အိုထာဝရဘုရား၊ အကျွန်ုပ်တို့အမျိုးကို တိုးပွားစေတော်မူပြီ။ အကျွန်ုပ်တို့အမျိုးကို တိုးပွားစေသဖြင့်၊ ဘုန်းကြီးတော်မူ၏။ ပြည်တော်ကို ပတ်ဝန်းကျင်၌ ကျယ်စေတော်မူပြီ။ 16အို ထာဝရဘုရား၊ သူတို့သည် ဆင်းရဲခံရသောအခါ၊ ကိုယ်တော်၌ ဆည်းကပ်ကြပါပြီ။ ဆုံးမတော်မူသောအခါ၊ ဆုတောင်းပတ္ထနာစကားကို သွန်းလောင်းကြပါပြီ။ 17ကိုယ်ဝန်ဆောင်သောမိန်းမသည် သားဖွားချိန်နီးသောအခါ နာကျင်၍၊ နာကျင်ခြင်းဝေဒနာကြောင့် အော်ဟစ်သကဲ့သို့၊ ထိုအတူ၊ အို ထာဝရဘုရား၊ အကျွန်ုပ်တို့သည် ရှေ့တော်၌ ဖြစ်ကြပါပြီ။ 18အကျွန်ုပ်တို့သည် ကိုယ်ဝန်ဆောင်၍ နာကျင်ခြင်းဝေဒနာကို ခံရသော်လည်း၊ လေကိုဖွားသကဲ့သို့ ဖြစ်ကြပါပြီတကား။ ပြည်သားတို့သည် ကယ်တင်ခြင်းသို့မရောက်ကြ။ လောကီသားတို့သည် မလဲကြပါ။

19ကိုယ်တော်၏ လူသေတို့သည် အသက်ရှင်ကြပါလိမ့်မည်။ ငါ၏အသေကောင်တို့သည်လည်း ထမြောက်ကြပါလိမ့်မည်။ မြေမှုန့်၌နေသော သူတို့၊ နိုး၍ သီချင်းဆိုကြလော့။ အကြောင်းမူကား၊ ကိုယ်တော်၏နှင်းသည် မြက်ပင်တို့ကိုပေါက်စေသော နှင်းကဲ့သို့ဖြစ်၍၊ မြေသည်လည်း မိမိသင်္ချိုင်းသားတို့ကို ထုတ်ဖော်ရပါလိမ့်မည်။

20ငါ၏လူတို့၊ လာကြ။ အတွင်းအခန်းထဲသို့ ဝင်၍၊ သင်တို့ကို ကွယ်ကာသော တံခါးများကို ပိတ်ထားကြ။ အမျက်ကာလ လွန်သည်တိုင်အောင် ခဏသာပုန်းရှောင်၍ နေကြလော့။ 21အကြောင်းမူကား၊ ထာဝရဘုရားသည် မြေကြီးသားတို့ကို၊ သူတို့ဒုစရိုက်ကြောင့် အပြစ်ပေးလိုသောငှာ၊ မိမိအရပ်ဌာနထဲက ထွက်တော်မူ၏။ ထိုအခါ မြေကြီးသည် မိမိ၌ရှိသောအသွေးကို ဖော်ပြရလိမ့်မည်။ မိမိ၌ အသေခံရသောသူတို့ကို နောက်တစ်ဖန် ဝှက်၍မထားရ။

ဟေရှာယအနာဂတ္တိကျမ်း - ၂၆ (အနက်ဖွင့်)

၂။ ယုဒတို့၏ခိုင်ခံ့သော ကာလတေးကဗျာ(အခန်း၂၆)

၂၆:၁-၄ ပြန်လည်စုစည်းထားသောလူနည်းစုများသည်ဘုရားသခင်အား ယုံကြည်ကိုးစား၍တွယ်တာမှီခိုကြသည်။ ဘုရားသခင်၏မြို့တော်သည်လူ့မြို့ ပြည်ရွာနှင့်ဆန့်ကျင်ဘက်ဖြစ်သည်။ (၂၄:၁၀)။ ဖြောင့်မတ်သောပြည်သားများ (ရွေးနှုတ်ထားသောဣသရေလလူနည်းစု)သည်ယေဟောဝါဘုရားသခင်ထံမှ ပြည့်စုံသောငြိမ်သက်ခြင်းအသက်တာကိုအပြည့်အဝခံစားကြသည်။ အပိုဒ်ငယ် ၃ကိုအမေရိကန်တေးကဗျာ Philip P.Bliss က “ဤကျမ်းပိုဒ်သည်ကျမ်းစာ အုပ်တအုပ်လုံးတွင်အနှစ်သက်ဆုံးကျမ်းပိုဒ်ဖြစ်သည်။ ”ဟုဆိုသည်။ “ကိုယ် တော်ထံတည်လျှင် ငြိမ်သက်ခြင်းစုံလင်၊ကိုယ်ကိုယုံကြည်လျှင်စိတ်နှလုံးဝိညာဉ်ကြည်လင်ပေ”ဟုစပ်ဆိုခဲ့သည်။၃၄

Moodyကအပိုဒ်ငယ်၃နှင့်၄ကို “ငြိမ်သက်ခြင်းသစ်ပင်သည်ကျောက် ဆောင် ကာလတွင်အမြစ်စွဲသောကြောင့်ခိုင်ခံမြဲမြံပေသကိုး”၃၅ ဟုဆိုသည်။ “In YAH, the Lord”ဟုဆိုရာတွင်“YAHသည် YHWH၏အတိုကောက်စကား လုံးဖြစ်သည်။

“ထာဝရတည်မြဲသောအင်အား” သို့မဟုတ် “ကာလ၏ကျောက်ဆောင်”ဟုအနက်ရသည်။ (NKJV Margin) Augustus Topladyက ဤကျမ်းပိုဒ်ကို တေးကဗျာဖွဲ့ဆိုရာအင်္ဂလိပ်ဓမ္မသီချင်းများတွင်ပေါ်လွင်ထင်ရှားလူကြိုက်များ သော တေးစာသားဖြစ်ခဲ့သည်။ မိုးသက်လေပြင်းနှင့်ကွယ်ကာလုံခြုံရာကျောက်ဂူ အဖြစ်ဖေါ်ကျူးထားသည်။

ခိုလှုံရာကျောက််

ကျောက်ဆောင်ဂူ၊ငါ့အတွက်လုံခြုံပေ

အထံတော်သို့တိုးဝင်ခိုလှုံရစေသား၊

ရေနှင့်သွေးများစီးဆင်းရာ

မြစ်ပမာစီးခသော်လည်း

ဒုစရိုက်များကိုလည်းစင်ကြယ်ပေး

တန်ခိုးတော်ဖြင့်အပြစ်ကင်းစင်လေ။

နောက်ဆုံးကာလပင့်သက်ရှု၍

မရဏာထံသို့မျက်စိမှိတ်ခါနီး

နားမလည်နိုင်သောလူ့လောကအကြောင်း

စဉ်းစားခိုက်

ကိုယ်တော်ကိုပလ္လင်ပေါ်မှာဖူးမြော်ရ။

ကျောက်ဆောင်ဂူငါ့အတွက်လုံခြုံပေ

အထံတော်သို့တိုးဝင်ခိုလှုံရစေသား။

၂၆:၅-၆ လူ့ယဉ်ကျေးမှုမြင့်မားခြင်းမာနနှင့်ပလွှားမှုကိုဆင်းရဲသားများ ၏ခြေဖဝါးများကဟားတိုက်ရီမောလိမ့်မည်။ မြို့ပြလူမှုအဆင့်အတန်းများ သည်လည်းသူဖုန်းစားများကတက်နင်းကြလိမ့်မည်။

၂၆:၇-၁၅ အပိုဒ်ငယ်၇-၁၉သည်ဘေးဒဏ်ကြီးကာလကျော်လွန်လွတ် မြောက်သောဣသရေလလူနည်းစု၏ဆုတောင်းခန်းဖြစ်သည်။ ထိုသူများ၏ လျှောက်ရမည့်ဘဝလမ်းခရီးကိုဘုရားသခင်ကပြုပြင်ဖြောင့်ဖြူးစေသည်။ ထို့ ကြောင့်ဘုရားရှင်ကိုယ်တော်တိုင်အားဖူးမြင်ချင်ကြသည်။ ဘုရားသခင်၏ပြု ပြင်ဆုံးမခြင်းသည် ဆိုးသွမ်းသူများဖြောင့်မတ်ခြင်းတရား သင်ခန်းစာရရှိကြဖို့ ဖြစ်သည်။ ဘုရားသခင်သည်လူယုတ်မာများအပေါ်သို့ လက်တော်လှုပ်ရှားဖို့အဆင့်သင့်ဖြစ်နေသည်။ လှုပ်ရှားလိုက်လျှင်အရှက်ရကြမည်။ ထို့နောက် နောင်ကြဉ်ကာလိမ္မာရေးခြားရှိ၍ ငြိမ်သက်ခြင်းရရှိကြမည်။ ဣသရေလလူနည်းစုများကိုတပါးအမျိုးသားသခင်များစွာကအုပ်စိုးကြမည်။ သို့သော်ထာဝရဘုရားသခင်တစ်ပါးတည်းသာလျှင်သခင်အစစ်အမှန်ဖြစ်သည်။ ဘုရားသခင်၏လူများကို ဆန့်ကျင်ပုန်ကန်သောတိုင်းနိုင်ငံများပေါ်လာတော့မည်မဟုတ်။ ဤကျမ်းပိုဒ် သည်သေလွန်သွားသောလူဆိုးများပြန်လည်ထမြောက်ခြင်းမရှိဟုမဆိုလိုပါ။ တပါးအမျိုးသားအစိုးရက ဣသရေလအမျိုးကိုစိုးမိုးအုပ်ချုပ်မည်မဟုတ်ဟုဆိုလိုသည်။

၂၆:၁၆-၁၉ ဣသရေလသည်မီးဖွားဖို့ဝေဒနာအလူးအလဲခံစားရသောမိ ခင်ကဲ့သို့ဖြစ်ပါသည်။ ဘာမှမလုပ်နိုင်ပါ။ ယေဟောဝါဘုရား၏ကတိတော်သည် တည်မြဲသောကြောင့်သူ့လူများ၏ဆုတောင်းသံများကိုအဖြေပေးသည်။ ထို့ နောက်မြေပေါ်သို့နှင်းရည်(သန့်ရှင်းဝိညာဉ်တော်)သွန်းလောင်းသဖြင့်ဣသရေ လလူမြက်ခင်းပင်များသည်ပြန်လည်စုစည်းနလံထူထောင်လာကြမည်။

၂၆:၂၀-၂၁ ဘုရားသခင် ဆန့်ကျင်သူများအား ဘုရားသခင်ကအမျက်ဒေါ သဖလားလောင်းထည့်စဉ်တွင် ဘုရားသခင်ကိုသစ္စာရှိသောယုံကြည်သူလူနည်း စုသည် ဘေးကင်းလုံခြုံစွာဗိမာန်တော်တွင်ခိုလှုံနေကြမည်။ ဘေးသီရန်ခခြင်းမ ရှိရ။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။