Hosea -9 -

ဟောရှေအနာဂတ္တိကျမ်း - ၉

ဣသရေလတို့ခံရမည့်ပြစ်ဒဏ်

1အို ဣသရေလအမျိုး၊ တစ်ပါးအမျိုးသားကဲ့သို့ ဝမ်းမြောက်ရွှင်မြူးသောစိတ်ရှိ၍ မခုန်နှင့်။ ကိုယ်ဘုရားသခင်၌ မဆည်းကပ်၊ အခြားသောဘုရားနှင့် မှားယွင်းပြီ။ ကောက်နယ်တလင်းရှိသမျှတို့၌ မှားယွင်းခကို နှစ်သက်တတ်၏။ 2ကောက်နယ်တလင်းအားဖြင့် အသက်မမွေးရ။ စပျစ်သီးနယ်ရာ ကျင်းအားဖြင့်လည်း အသက်မမွေးရ။ စပျစ်ရည်သစ်လည်း သူတို့ မျှော်လင့်သည်အတိုင်း မထွက်ရ။ 3ဧဖရိမ်အမျိုးသားတို့သည် ထာဝရဘုရား၏မြေတော်၌မနေရဘဲ အဲဂုတ္တုပြည်သို့ ပြန်သွား၍၊ အာရှုရိပြည်၌ မစင်ကြယ်သောအစာကို စားရကြမည်။ 4စပျစ်ရည်သွန်းလောင်းရာ ပူဇော်သကာကို ထာဝရဘုရားအား မပြုရကြ။ ပူဇော်သောယဇ်တို့ကို နှစ်သက်တော်မမူရ။ ထိုယဇ်အသားသည် မသာလိုက်၍ ငိုကြွေးမြည်တမ်းသော သူတို့၏အစာကဲ့သို့ဖြစ်၍၊ စားသောသူအပေါင်းတို့သည် ညစ်ညူးခြင်းသို့ ရောက်ကြလိမ့်မည်။ သူတို့အစာကို ကိုယ်တိုင်စားကြစေ။ ထာဝရဘုရား၏အိမ်တော်ထဲသို့ မသွင်းစေနှင့်။ 5ဓမ္မပွဲနေ့၊ ထာဝရဘုရားအဖို့ ဆောင်သော ပွဲနေ့တို့၌ သင်တို့သည် အဘယ်သို့ ပြုကြလိမ့်မည်နည်း။ 6ပျက်စီးရာထဲက သူတို့သည် ထွက်သွားကြပြီ။ အဲဂုတ္တုပြည်၌စု၍ မင်ဖိမြို့၌ သင်္ဂြိုဟ်ကြလိမ့်မည်။ ငွေတန်ဆာဆင်သော နေရာဘုံဗိမာန်များကို ဆူးအမျိုးမျိုးတို့သည် လွှမ်းမိုးကြလိမ့်မည်။ 7စစ်ကြောရသော အချိန်ရောက်လေပြီ။ အပြစ်ပေးရသောအချိန် ရောက်လေပြီ။ ဣသရေလအမျိုး သိရလိမ့်မည်။ ပရောဖက်သည် အမိုက်ဖြစ်၏။ ဝိညာဉ်ဆုကျေးဇူးကိုခံသောသူသည် အရူးဖြစ်၏။ သင်၌ အပြစ်ကြီးသည်အတိုင်း ကြီးစွာသော ဖျက်ဆီးခြင်းကို ခံရ၏။ 8ဧဖရိမ်ကင်းစောင့်သည် မိမိဘုရားဘက်မှာ နေ၏။ ပရောဖက်သည် ပြုလေသမျှတို့၌ မုဆိုးကျော့ကွင်း ဖြစ်၏။ သူ၏ဘုရားအိမ်တွင် ဘေးပြုသောသူ ဖြစ်၏။ 9ဂိဗာမြို့ လက်ထက်ကဲ့သို့ သူတို့သည် ကိုယ်ကို အလွန်ညစ်ညူးစေကြပြီ။ သူတို့အပြစ်ကို အောက်မေ့၍ ဒုစရိုက်များကို စစ်ကြောတော်မူမည်။

ဣသရေလတို့အပြစ်နှင့်ပြစ်ဒဏ်

10တော၌ စပျစ်သီးကဲ့သို့ ဣသရေလအမျိုးကို ငါတွေ့၏။ သီးစသော သင်္ဘောသဖန်းပင်၌ အဦးဆုံးမှည့်သော သင်္ဘောသဖန်းသီးကဲ့သို့ သင်တို့ဘိုးဘေးများကို ငါမြင်၏။ သူတို့သည် ကိုယ်အလိုအလျောက် ဗာလပေဂုရဘုရားထံသို့သွား၍၊ ထိုရှက်ဖွယ်သောအရာအဖို့ ကိုယ်ကို အပ်နှံသဖြင့် တပ်မက်သည်အတိုင်း စက်ဆုပ်ရွံရှာဖွယ်သော အမှုတို့ကို ပြုကြ၏။ 11ဧဖရိမ်၏ဘုန်းသည် ငှက်ကဲ့သို့ ပျံသွားလိမ့်မည်။ သားဖွားခြင်း၊ ကိုယ်ဝန်ဆောင်ခြင်း၊ ပဋိသန္ဓေယူခြင်း မရှိရ။ 12သားသမီးတို့ကို ကျွေးမွေးသော်လည်း၊ တစ်ယောက်ကိုမျှ မကျန်စေခြင်းငှာ ငါလုယူမည်။ အကယ်၍ သူတို့ကို ငါစွန့်ပစ်သောအခါ အမင်္ဂလာရှိကြလိမ့်မည်။ 13ဧဖရိမ်သည် တုရုမြို့ကဲ့သို့ ငြိမ်ဝပ်ရာအရပ်၌ တည်ဟန်ရှိသော်လည်း၊ မိမိသားသမီးတို့ကို လူသတ်လက်သို့ အပ်ရလိမ့်မည်။ 14အို ထာဝရဘုရား၊ ပေးသနားတော်မူပါ။ အဘယ်သို့ ပေးတော်မူရမည်နည်း။ ကိုယ်ဝန်မဆောင်သော ဝမ်း၊ နို့မထွက်သော သားမြတ်ကို ပေးတော်မူပါ။

ဣသရေလတို့ကိုစီရင်ခြင်း

15ဂိလဂါလမြို့၌ သူတို့ပြုသမျှသောဒုစရိုက်ရှိ၍၊ ထိုအရပ်၌ သူတို့ကို ငါမုန်း၏။ သူတို့ဒုစရိုက်အပြစ်ကြောင့် ငါ့အိမ်မှ ငါနှင်ထုတ်မည်။ နောက်တစ်ဖန် သူတို့ကိုမချစ်။ သူတို့ မင်းအပေါင်းတို့သည် ပုန်ကန်တတ်သောသူ ဖြစ်ကြ၏။ 16ဧဖရိမ်သည် အထိအခိုက်ခံရသောကြောင့်၊ အမြစ်သွေ့ခြောက်လျက်ရှိ၍ အသီးကို မသီးနိုင်ရာ။ သားဖွားသော်လည်း၊ အချစ်ဆုံးသောသားတို့ကို ငါသတ်မည်။ 17ငါ့ဘုရားသခင်၏ စကားတော်ကို နားမထောင်သောကြောင့် စွန့်ပစ်တော်မူ၍၊ သူတို့သည် တစ်ပါးအမျိုးသားတို့တွင် အရပ်ရပ်သို့ လှည့်လည်ရကြမည်။

ဟောရှေအနာဂတ္တိကျမ်း - ၉ (အနက်ဖွင့်)

(ဋ) မိမိတို့ဆိုးညစ်မှုကြောင့် ဣသရေလများဖမ်းဆီး ကျွန်ပြုခံရမည်(၉:၁–၁၀:၁၅)

၉:၁–၂ ဣသရေလလူမျိုးတို့သည် ရွှင်လန်းဝမ်းမြောက်ခြင်းရှိကြမည်မဟုတ်။ ရုပ်တုဘုရားများက သူတို့မျော်လင့်ထားသလို ကြွယ်ဝချမ်းသာမှုကို မပေးနိုင်ကြပေ။ ရုပ်တုဆင်းတုများကိုးကွယ်ခြင်းမှာ ဝိညာဉ်ရေးရာ အကျင့်ဖောက်ပြားခြင်းပင် ဖြစ်သည်။ Francis Shaeffer က ဤသို့ရှင်းပြသည်။

ဘုရားသခင်၏ နှုတ်တော်ထွက်စကားတော်ကို သတိပြုကြည့်ပါ။ ထိုအမျိုးသမီးသည် ရိပ်သိမ်းချိန်ကောက်နယ်သလင်း၌ လွတ်လပ်လေဟန်ရှိသည်။ အခကြေးငွေယူပြီး ကောက်နယ်သလင်းပြင်၌ ယောက်ျားတကာနှင့် မွေ့ယာခင်းသည်။ ဘုရားသခင်၏လူများသည် ထိုလူစားမျိုး ဖြစ်သွားကြပြီ။ အသက်ရှင်သော ဘုရားသခင်၏ ဇနီးမယားသည် ဤနည်းအတိုင်းဖောက်ပြန်နေကြသည်။၈

၉:၃–၄ သူတို့၏ဖောက်ပြန်မှုကြောင့် ဖမ်းဆီးကျွန်ပြုခြင်းခံကြရမည်။ အဲဂုတ္တုဆိုသည်မှာ တကယ့်အဲဂုတ္တုပြည်ကို ဆိုလိုသည် မဟုတ်။ အဲဂုတ္တုပြည်၌ ကျွန်ပြုခံခဲ့ခြင်းမျိုးကဲ့သို့ အာရှုရိတို့၏ ဖမ်းဆီးကျွန်ပြုခြင်းခံခဲ့ရသည်။ ရုပ်တုဆင်းတုနှင့် ယေဟောဝါဘုရားအား ရောနှော၍ ကိုးကွယ်ကြသည်။ ထိုကဲ့သို့သော ကိုးကွယ်ခြင်းမျိုးသည် သူတို့အတွက် အကျိုးအာနိသင်မဖြစ်စေသကဲ့သို့ ဘုရားသခင်စိတ်တော်နှင့် မထိတွေ့နိုင်ပါ။

၉:၅–၉ မိမိတို့ပျော်မွေ့ရာ မွေးရပ်ဌာနတွင် ပွဲလမ်းသဘင်ကျင်းပခွင့် ရကြတော့မည်မဟုတ်။ ထို့ထက်ဆိုးသည့် ကျေးကျွန်ဘဝဖြစ်သည်။ ဧဖရိမ်၏တဲများကို တောဆူးခြုံဖုံးလွှမ်းလိမ့်မည်။ ယဇ်ပူဇော်မည့် သူများအစား တောနွယ်မြက်ရိုင်းပင်များ ပြိုင်းပြိုင်းထပေါက်ရောက်ကြမည်။ ပရောဖက် အတုအယောင်များနှင့်အတူ ပြည်နှင်ဒဏ်ခံရမည့် အချိန်နီးကပ်လာချေပြီ။

၉:၁၀–၁၇ ဣသရေလတို့သည် ကတိတော်ပြုခဲ့သည့်အတိုင်း အဦးဆုံးသီးသော သင်္ဘောသဖန်းပင် အသီးများဖြစ်သည်။ သို့သော် ဖန်ဆင်းရှင်ဘုရားကို မေ့လျော့ပစ်၍ ရွံရှာဖွယ်ရုပ်တုဆင်းတု ကိုးကွယ်ကြသောအခါ သူတို့အား သားသမီးမရသော အမြှုံဖြစ်စေသည်။ အပိုဒ်ငယ်(၁၂) တွင်ပါသည့်ငါစွန့်ပစ်သောအခါ ဆိုသည့်စကားအရ တယောက်မကျန်သေကြေကြမည် မဟုတ်ကြောင်း နားလည်ရသည်(ငယ် ၁၇ နှင့်ယှဉ်ဖတ်ပါ)။ ယောက်ျားကလေးများ မွေးဖွားမှု နည်းလာမည်။ အကြောင်းမှာ သူတို့၏ ဆိုးညစ်ယုတ်ညံ့မှုကြောင့် ကောင်းချီးမင်္ဂလာ ရေစီးကြောင်း ပြောင်းလဲလာမည်။ “သားဖွားခြင်း၊ ကိုယ်ဝန်ဆောင်ခြင်း၊ ပဋိပန္ဓေယူခြင်းမရှိ” ဟုဗျာဒိတ်တော် ထုတ်ထားသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။