Hosea -2 -

ဟောရှေအနာဂတ္တိကျမ်း - ၂

1သင်တို့ညီအစ်ကိုများကို ငါ၏လူဟူ၍လည်းကောင်း၊ သင်တို့နှမများကို သနားစုံမက်အပ်သောသမီး ဟူ၍လည်းကောင်း တစ်ဖန် ခေါ်ကြလော့။

သစ္စာမဲ့သူအတွက်ချစ်ခြင်းမေတ္တာ

2သင်တို့အမိနှင့် ဆွေးနွေးကြလော့။ သူသည် ငါ့မယားမဟုတ်၊ ငါသည်လည်း သူ့လင်မဟုတ်ကြောင်းကို ဆွေးနွေးကြလော့။ ပြည့်တန်ဆာမျက်နှာကိုပယ်၍ မှားယွင်းခြင်းအမှုကို ရှောင်စေ။ 3မရှောင်လျှင် သူ၏အဝတ်ရှိသမျှကို ငါချွတ်၍၊ သူဖွားသောနေ့၌ အဝတ်မရှိသကဲ့သို့ အဝတ်မပါ၊ ပြင်၌ ထုတ်ထားမည်။ လွင်ပြင်ကဲ့သို့ သုတ်သင်မည်။ သွေ့ခြောက်သော မြေကဲ့သို့ ဖြစ်စေလျက် ရေအငတ်ထား၍ သေစေမည်။ 4သူ၏သားသမီးတို့သည် သူမျောက်မထား၍ရသော သားသမီးဖြစ်သောကြောင့် သူတို့ကို ငါမသနားမစုံမက်ဘဲ နေမည်။ 5သူတို့အမိသည် ပြည့်တန်ဆာဖြစ်၏။ သူတို့ကို ပဋိသန္ဓေယူသောသူသည် ရှက်ဖွယ်သောအမှုကို ပြုပြီ။ သူကလည်း၊ ငါ့မုန့်၊ ငါ့ရေ၊ ငါ့သိုးမွေး၊ ငါ့ပိုက်ဆန်၊ ငါ့ဆီ၊ ငါသောက်သောအရည်တို့ကို ပေးတတ်သော ငါ့ရည်းစားများ နောက်သို့ ငါလိုက်မည်ဟုဆိုပြီ။ 6သို့ဖြစ်၍၊ သူ့ကိုဆူးစောင်ရန်းနှင့် ကာထားမည်။ ထွက်စရာမရှိစေခြင်းငှာ သူ့ပတ်လည်၌ ကျောက်ရိုးကိုလည်း တည်မည်။ 7သူသည် ရည်းစားတို့ကို လိုက်သော်လည်း မမီ၊ ရှာသော်လည်း မတွေ့ဘဲနေရသောအခါ၊ လင်ဟောင်းထံသို့ ငါပြန်သွားမည်။ ယခုနေရာထက် အရင်နေရာ သာ၍ကောင်းသည်ဟု ဆိုလိမ့်မည်။ 8ဆန်စပါး၊ စပျစ်ရည်၊ ဆီတို့ကို ငါပေးသနားသည် ဟူ၍လည်းကောင်း၊ ဗာလဘုရားအား ပူဇော်သောရွှေနှင့် ငွေကို သူ၌ ငါများပြားစေသည် ဟူ၍လည်းကောင်း သူသည် မအောက်မေ့ပါတကား။ 9သို့ဖြစ်၍၊ စပါးရိတ်ရာကာလ၌ ငါ့စပါးကိုလည်းကောင်း၊ စပျစ်ရည်လုပ်ရာကာလ၌ ငါ့စပျစ်ရည်ကိုလည်းကောင်း၊ သူ၏ကိုယ်ကို ဖုံးလွှမ်းစရာ ငါ့သိုးမွေးနှင့် ပိုက်ဆန်ကိုလည်းကောင်း ငါသိမ်းယူမည်။ 10ယခုပင် သူ၏ရည်းစားများရှေ့၌ သူ့အဝတ်ကို ငါလှစ်လှန်၍ အရှက်ခွဲမည်။ ငါ့လက်မှ အဘယ်သူမျှ သူ့ကိုမနုတ်ရ။ 11သူရွှင်လန်းစရာအကြောင်းရှိသမျှနှင့် ပွဲခံခြင်း၊ လဆန်းနေ့၊ ဥပုသ်နေ့စောင့်ခြင်း၊ ပရိသတ်စည်းဝေးခြင်း အလုံးစုံတို့ကို ငါပြတ်စေမည်။ 12ဤသည်ကား၊ ငါ့ရည်းစားပေးသော ဆုလက်ဆောင်ဖြစ်သည်ဟု သူဆိုရာ စပျစ်ဥယျာဉ်၊ သင်္ဘောသဖန်းဥယျာဉ်တို့ကို ငါသုတ်သင်ပယ်ရှင်း၍၊ လွင်ပြင်ဖြစ်စေသဖြင့် တောသားရဲတို့သည် ကိုက်စားကြလိမ့်မည်။ 13ဗာလဘုရားတို့အား နံ့သာပေါင်းကိုမီးရှို့၍ နှာခေါင်းဆွဲနှင့် လည်ဆွဲတန်ဆာကို ဆင်လျက် ရည်းစားများနောက်သို့ လိုက်သဖြင့်၊ ငါ့ကို မေ့လျော့၍ ဗာလဘုရားတို့ လက်ထက်၌ ပြုမိသောအပြစ်နှင့် အလျောက် ငါစီရင်မည်ဟု ထာဝရဘုရား မိန့်တော်မူ၏။

လူမျိုးတော်အပေါ်ထာဝရဘုရား၏မေတ္တာ

14သို့ရာတွင်၊ သူ့ကို တစ်ဖန်ငါဖြားယောင်းမည်။ တောလမ်းဖြင့် ပို့ဆောင်သော်လည်း၊ နှစ်သိမ့်စေသော စကားကိုပြောမည်။ 15တောတစ်ဖက်၌ စပျစ်ဥယျာဉ်တို့ကိုလည်းကောင်း၊ အာခေါ်ချိုင့်၌ မျှော်လင့်ရာတံခါးကိုလည်းကောင်း ငါပေးမည်။ သူသည် အသက် ငယ်စဉ်ကာလ၊ အဲဂုတ္တုပြည်မှ ထွက်လာသောအခါ၊ သီချင်းဆိုသကဲ့သို့၊ တောတစ်ဖက်သို့ ရောက်သောအခါ သီချင်းဆိုရလိမ့်မည်။ 16ထာဝရဘုရားမိန့်တော်မူသည်ကား၊ ထိုကာလ၌ သင်သည်ငါ့ကို သခင်ဟူ၍ မခေါ်ရ၊ ခင်ပွန်းဟူ၍ ခေါ်ရမည်။ 17အခြားတစ်ပါးသော သခင်တို့၏ဘွဲ့နာမများကို သူ၏နှုတ်မှ ငါပယ်၍၊ ထိုဘွဲ့နာမများကို နောက်တစ်ဖန် မမှတ်မိမမြွက်ဆိုရ။ 18ထိုကာလ၌ ငါသည် သူတို့အတွက်၊ တောသားရဲ၊ မိုးကောင်းကင်ငှက်၊ မြေပေါ်မှာ တွားတတ်သောတိရစ္ဆာန်များနှင့် မိတ်သဟာယဖွဲ့၍၊ လေး၊ ဓား၊ စစ်တိုက်လက်နက်တို့ကို မြေပေါ်က ပယ်ရှားသဖြင့် သူတို့သည် စိုးရိမ်ခြင်းမရှိဘဲ အိပ်ရကြလိမ့်မည်။ 19ငါသည် ကိုယ်အဖို့ သင့်ကို အစဉ်အမြဲသိမ်းယူမည်။ ဖြောင့်မတ်ခြင်း၊ တရားသဖြင့် စီရင်ခြင်း၊ ချစ်သနားစုံမက်ခြင်းနှင့် အညီ ကိုယ်အဖို့ သင့်ကိုသိမ်းယူမည်။ 20သစ္စာစောင့်ခြင်းနှင့်အညီ သိမ်းယူ၍၊ သင်သည် ထာဝရဘုရားကို သိရလိမ့်မည်။ 21ထာဝရဘုရား မိန့်တော်မူသည်ကား၊ ထိုကာလ၌ ငါသည် နားထောင်မည်။ မိုးကောင်းကင်စကားကို နားထောင်၍၊ သူသည် မြေကြီးစကားကို နားထောင်မည်။ 22မြေကြီးသည်လည်း ဆန်စပါး၊ စပျစ်ရည်၊ ဆီတို့၏စကားကို နားထောင်၍၊ သူတို့သည်လည်း ယေဇရေလစကားကို နားထောင်ကြလိမ့်မည်။ 23ထိုသတို့သမီးကို မျိုးစေ့ကဲ့သို့ မြေ၌ ကိုယ်အဖို့ငါကြဲမည်။ မသနားမစုံမက်အပ်သော သတို့သမီးကို ငါသနားစုံမက်မည်။ ငါ၏ လူမဟုတ်သော သူကိုလည်း သင်သည်ငါ၏လူဖြစ်သည်ဟု ငါဆိုမည်။ သူကလည်း ကိုယ်တော်သည် အကျွန်ုပ်၏ဘုရားသခင် ဖြစ်တော်မူသည်ဟု လျှောက်လိမ့်မည်ဟုမိန့်တော်မူ၏။

ဟောရှေအနာဂတ္တိကျမ်း - ၂ (အနက်ဖွင့်)

၂:၁ အခန်း ၂ တွင် လူမျိုးတော်၌ ကြွင်းကျန်သော သစ္စာရှိသူများသို့ စကားပြောခြင်းဖြစ်သည်။ သင်တို့ညီအစ်ကိုများကို အမ္မီ(ငါ၏လူ)၊ ညီအစ်ကိုများကို ရုဟာမ(ကရုဏာတော်ခံစားသူ) ဟုခေါ်ဆိုရန် ပြောကြားသည်။

၃။ ဣသရေလလူမျိုးများ သစ္စာမတည်မှုကြောင့် ကြောက်မက်ဖွယ်ရာ တရားစီခြင်းခံရမည့်အကြောင်း သတိပေးချက်(၂:၂–၁၃)

၂:၂–၃ သစ္စာရှိသော ယုံကြည်သူအကြွင်းကျန်များသည် ရုပ်တုဆင်းတုကိုးကွယ်ခြင်းအလားသဏ္ဍာန်တူ သောပြည့်တန်ဆာမအကျင့်ကို စွန့်လွှတ်ကာ ပြန်လာကြမည့် ဣသရေလူထုကြီးနှင့် ပေါင်းဖက်မိကြလိမ့်မည်။ သို့မဟုတ်ပါက မိမွေးတိုင်းဖမွေးတိုင်း အဝတ်ဗလာဖြင့် ဘုရားရှင်က အရှက်ရစေမည်။

၂:၄– ၅ အပြစ်ဒုစရိုက်သားတို့၏ သားသမီးတို့သည်လည်း ပြည့်တန်ဆာများ၏သားသမီးများကဲ့သို့ ဖြစ်သောကြောင့် သနားကရုဏာတော်ကို မခံရကြ။ အကြောင်းမှာ မှားယွင်းသောဘုရား နောက်သို့ သူတို့ကောက်ကောက်ပါ လိုက်နေကြသည်။ ရှိသမျှစိမ်းစည်ဥစ္စာ၊ အဝတ်ပိတ်စနှင့် စားဖွယ်ဘောဇဉ်များဖြင့် အချည်းနှီးပူဇော် ကိုးကွယ်နေကြသည်။

၂:၆–၇ (ပထမလင်ဖြစ်သော) ဘုရားသခင်ထံတော်သို့ ပြန်မလာမချင်း သူသွားရာ လမ်းခရီးကို နည်းလမ်းစုံဖြင့် ပိတ်ဆိုးဟန့်တားနှောက်ယှက်မည်။ ဆိုးယုတ်သောအကျင့်များကို ပြုပြင်၍ ရုပ်တုဆင်းတုကိုးကွယ်မှုအား စွန့်လွှတ်စေမည်။

၂:၈ သူမ၏အသက်တာဘဝ စားဝတ်နေရေး လိုအပ်ချက်များမှစ၍ ဗာလဘုရားသို့ တလွဲတချော်ပူဇော်နေသော ရွှေငွေရတနာများသည် ဘုရားသခင် ပေးသနားခြင်းဖြစ်ကြောင်း မသိကျိုးကျွံပြုနေသည်။ ဘုရားသခင်ထံကျေးဇူးတုံ့ပြန်ခြင်း မရှိကြ။

၂:၉–၁၀ ထို့ကြောင့် ကျေးဇူးကန်းသော သူမကို အစားအသောက်၊ အဝတ်အစားမစခြင်းမှစ၍ အလုံးစုံဖြတ်တောက်ပစ်မည်။ သူမရည်းစားများရှေ့၌ အဝတ်ဗလာနတ္တိဖြင့်အရှက်ရရန် ကိုယ်ကိုဖုံးလွှမ်းသည့် အဝတ်ကို လှန်ပစ်မည်။

၂:၁၁–၁၃ ပျော်ရွှင်စရာ ပြုလုပ်သောပွဲခံခြင်း ဥပုသ်စောင့်ခြင်းနှင့် ပရိသတ်စုဝေခြင်းတို့ကို ဖြတ်တောက်ပစ်မည်။ စပျစ်ဥယျာဉ် ၊ သင်္ဘောသဖန်းဥယျာဉ် တို့ကို သုတ်သင်ပယ်ရှင်း၍ လွင်တီးခေါင်ဖြစ်မည်။ ဗာလဘုရားကို ကိုးကွယ်ပူဇော်သည့်တိုင်း ပြစ်ဒဏ်ပေးခြင်း ခံရမည်။ (ဥယျာဉ်ခြံထွက်အသီးနှံကြွယ်ဝခြင်းမှာ သူမ၏ရုပ်တုဘုရားချစ်သူများပေးသော အခဥစ္စာဟု ထင်မှတ်မှားနေကြသည်)။

၄။ ဣသရေလတို့ကောင်းစားဦးမည့်အကြောင်း (၂:၁၄-၂၃)

၂း၁၄-၁၇ ထိုအရေးယူအပြစ်စီရင်ခြင်းမုန် တိုင်းစဲလေသော ဣသရေလလူမျိုးတို့ ငြိမ်သက်ချမ်းသာ ရကြမည်။ စပျစ်ဥယျာဉ်ခြံမြေ ဖွံ့ဖြိုးစေသဖြင့် အဲဂုတ္တုပြည်မှ ထွက်မြောက်လာစဉ် လွတ်လပ်မှု တေးသီချင်းဟစ်ကြွေးခဲ့ကြသကဲ့သို့ ပျော်ရွှင်ဝမ်းမြောက်ကြမည်။ ဘုရားရှင်ကိုလည်း Baali (ငါ့သခင်) ဟူ၍ မခေါ်ဘဲ Ishi(ငါ့လင်) ဟုခေါ်လိမ့်မည်။ လူအပေါင်းတို့သည် ဗာလဟူသောအမည်ကို မေ့ပျောက်သွားသည့်တိုင်အောင် ဗာလဘုရားအား ကိုးကွယ်မှုမှ ကင်းလွတ်စင်ကြယ်စေမည်။

၂:၁၈–၂၀ တောသတ္တဝါများနှင့် မြေပေါ်သို့ ကတိတော်ပြုတော်မူခဲ့သည့်အတိုင်း သားရဲတိရိစ္ဆာန်တို့ကလည်း အခြားသတ္တဝါများအား ရန်ပြုတော့မည်မဟုတ်။ တိုင်းသူပြည်သားများမှာ ဘေးကင်းရန်ကွာလျက် ဘဝစည်းစိမ်အိုးအိမ် လုံခြုံမှုရှိကြသည်။ စစ်မက်ပြိုင်ဆိုင် တိုက်ခိုက်ခြင်းများ ဆုံးခန်းတိုင်လိမ့်မည်။ ဣသရေလလူမျိုးသည် ထာဝရ ဘုရားနှင့် ထာဝရကာလ စုံဖက်ပေါင်းသင်းသွားကြမည်။ ဘုရားသခင်၏ဖြောင့်မတ်ခြင်း၊ စင်ကြယ်ခြင်း၊ တရားမျှတခြင်း၊ ချစ်ခြင်းမေတ္တာ၊ ကရုဏာတော်ကို ယုံကြည်သူတိုင်းအပြည့်အဝ ခံစားကြရမည်။

၂:၂၁–၂၃ ထိုနေ့ရက်ကာလ၌ ယေဇရေလ (ဣသရေလ)တို့သည် ကွဲလွင့်ကြရတော့မည်မဟုတ်။ မိမိတို့ဇာတိချက်ကြွေ မွေးရပ်မြေသို့ ပြန်လည်နေထိုင်ကြရမည်။ ကောင်းကင်မှကောင်းကြီးမင်္ဂလာ မိုးရွာသွန်း၍ မြေကြီးထဲမှလည်း ပဒေသာပင်ပေါက်ရောက်မည်။ အသီးအနှံများဝေဆာ ပြည့်ဖြိုးမည်။ ဤကျမ်းကို William က ဤသို့ထောက်ခံထားသည်။

ယေဇရေလ (ဣသရေလ) မျိုးစေ့ကို ဘုရားသခင်ကိုယ်တိုင် ထိုအရပ်မြေ၌ ပျိုးကြဲမည်(ငယ်၂၃)။ဝိုင်နှင့် ဆီများအံ့မခန့် ပြည့်မောက်လျှံကျစေမည်။ မြေကြီးက ရွှေသီးသောကြောင့် ထောမနာပြုကြလိမ့်မည်။ မြေကြီးက ကောင်းကြီးပေးအပ်သည့်တိုင် ကောင်းကင်ကလည်း မင်္ဂလာသွန်းလောင်းမည်။ လိုအပ်သော မိုးရေ၊ ရာသီဥတု ပေးသနားတော်လိမ့်မည်။ ဘုရားသခင်၏ နာမတော်မြတ်၌ တောင်းလျှောက်သမျှကို လိုလေသသေးမရှိ ရရှိပြည့်စုံစေမည်။ အကြောင်းမှာ ထာဝရဘုရားသခင်သည် ကြီးမြတ်တော်မှုသော အရှင်သခင်ဖြစ်၏ ကမ္ဘာလောကအတွက် လိုအပ်သော ရေ၊လေ ၊ အပူချိန် မျှတစွာပေးသနားဖြင့် မြေကြီ:သည် သီးနှံဝေဆာ ဖွံ့ဖြိုးလျက် ကျက်သရေမင်္ဂလာနှင့် ပြည့်စုံလိမ့်မည်။ အသီးအနှံ၊ ဆီနှင့် ဝိုင်များ အလျှံပယ်ဖြစ်စေသောကြောင့် မိုးကောင်းကင်နှင့်ကမ္ဘာမြေကြီ:သည် မေတ္တာတော်နှင့် ကွင်းဆက်များ ဖြစ်ကြလိမ့်မည်။ ထိုသို့ဖြင့် ဣသရေလလူမျိုးတိုအပေါ် ဘုရားသခင်၏ ကရုဏာတော်သက်ရောက်သဖြင့် ဣသရေလလူများကလည်း ဘုရားသခင်အား သူတို့၏ ဘုရားစစ် ဘုရားမှန်ဖြစ်ကြောင်း သိရှိကိုးကွယ်ကြမည်။၆

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။