Hosea -1 -

ဟောရှေအနာဂတ္တိကျမ်း - ၁

1ယုဒရှင်ဘုရင်ဩဇိမင်း၊ ယောသံမင်း၊ အာခတ်မင်း၊ ဟေဇကိမင်း၊ ဣသရေလရှင်ဘုရင် ယောရှသား ယေရောဗောင်မင်းတို့လက်ထက်၊ ဗေရိ၏သား ဟောရှေသို့ ရောက်လာသော ထာဝရဘုရား၏နှုတ်ကပတ်တော် အစအဦးဟူမူကား၊

ဟောရှေ၏မိသားစု

2သင်သွား၍ ပြည့်တန်ဆာမိန်းမနှင့်တကွ သူဖွားမြင်သော သားသမီးတို့ကို သိမ်းပိုက်လော့။ အကြောင်းမူကား၊ ပြည်သားတို့သည် ထာဝရဘုရားကိုစွန့်ပစ်၍ အထပ်ထပ်မှားယွင်းကြပြီဟု ဟောရှေအား မှာထားတော်မူသည်အတိုင်း၊ 3ဟောရှေသည်သွား၍ ဒိဗလိမ်သမီးဂေါမာကို သိမ်းပိုက်သဖြင့်၊ သူသည် ပဋိသန္ဓေယူ၍ ဟောရှေ၌ သားယောက်ျားကို ဖွားမြင်လေ၏။ 4ထာဝရဘုရားကလည်း၊ ထိုသားကို ယေဇရေလအမည်ဖြင့် မှည့်လော့။ အကြောင်းမူကား၊ ခဏကြာပြီးမှ ယေဇရေလအသက်ကို သတ်သောအပြစ်ကြောင့်၊ ယေဟုအမျိုးကို ငါသည်ဒဏ်ပေး၍ ဣသရေလအမျိုး၏ နိုင်ငံကို ဆုံးစေမည်။ 5ဣသရေလလေးကို ယေဇရေလချိုင့်၌ ငါချိုးသောနေ့ချင်းတွင် ထိုအမှုပြည့်စုံလိမ့်မည်ဟု မိန့်တော်မူ၏။

6တစ်ဖန် ပဋိသန္ဓေယူ၍ သမီးကိုဖွားမြင်လေ၏။ ထိုသမီးကို လောရုဟာမာအမည်ဖြင့် မှည့်လော့။ အကြောင်းမူကား၊ ငါသည် ဣသရေလအမျိုးကို နောက်တစ်ဖန် မသနားမစုံမက်ဘဲ ဧကန်အမှန်ပယ်ရှင်းမည်။ 7ယုဒအမျိုးကိုကား သနားစုံမက်ဦးမည်။ သို့ရာတွင် လေး၊ ဓား၊ စစ်တိုက်လက်နက်၊ မြင်း၊ မြင်းစီးသူရဲအားဖြင့် မကယ်တင်၊ သူတို့၏ ဘုရားသခင်ထာဝရဘုရားအားဖြင့် ကယ်တင်မည်ဟု မိန့်တော်မူ၏။

8လောရုဟာမာကို နို့ခွာသောအခါ၊ အမိသည် ပဋိသန္ဓေယူပြန်၍ သားယောက်ျားကို ဖွားမြင်လေ၏။ 9ထိုသားကို လောအမ္မိအမည်ဖြင့် မှည့်လော့။ အကြောင်းမူကား၊ သင်တို့သည် ငါ၏လူမဟုတ်။ ငါသည်လည်း သင်တို့၏ ဘုရားသခင်မဟုတ်။

ဣသရေလနိုင်ငံပြန်လည်ထူထောင်ခြင်း

10သို့ရာတွင်၊ ဣသရေလအမျိုးသားတို့သည် မခြင်နိုင်၊ မရေတွက်နိုင်သော သမုဒ္ဒရာသဲလုံးနှင့်အမျှ များကြလိမ့်မည်။ သင်တို့သည် ငါ၏လူမဟုတ်ဟု ထိုသူတို့အား ပြောဆိုရာအရပ်၌ပင်လျှင်၊ သူတို့သည် အသက်ရှင်တော်မူသော ဘုရားသခင်၏သားဟု ခေါ်ဝေါ်ခြင်းကို ခံရကြလိမ့်မည်။ 11ထိုအခါ ယုဒအမျိုးသားတို့နှင့် ဣသရေလအမျိုးသားတို့သည် စုဝေးပေါင်းဖော်၍ မင်းတစ်ဦးတည်းကို ချီးမြှောက်သဖြင့် ထိုပြည်ထဲက ထွက်လာကြလိမ့်မည်။ ယေဇရေလနေ့သည် ကြီးမြတ်သောနေ့ ဖြစ်ရလိမ့်မည်ဟု မိန့်တော်မူ၏။

ဟောရှေအနာဂတ္တိကျမ်း - ၁ (အနက်ဖွင့်)

၁။ ဟောရှေ၏သားသမီး သုံးယောက်အမည်များဖြင့် ဣသရေလတို့၏ ငြင်းပယ်မှုကို ပုံဖော်ခြင်း(၁:၁– ၉)

၁:၁-၅ ဘုရားသခင်က ဗေရိ၏သား ဟောရှေအားပြည့်တန်ဆာမိန်းမကို ယူခိုင်းသည်။ (နိဒါန်း ကိုလည်းကြည့်။ ပြည့်တန်ဆာမိန်းမပျက်ကို ယူခိုင်းသည့်အကြောင်း စဉ်းစားစရာများစွာရှိသည်)။ ထိုမိန်းမမှာ ဒိဗလိမ်၏သမီး ဂေါမာ ဖြစ်သည်။

ပထမသားကို ယေဇရေလ (ဘုရားသခင်ကွဲလွင့်စေမည်ဟုအနက်ရသည်)ဟု ကင်ပွန်းတတ်သည်။ ဣသရေလလူမျိုးတို့အပေါ် ဘုရားသခင်ပြုမည့်အမှု လက္ခဏာအရိပ်အယောင်ပေးခြင်းဖြစ်သည်။ အာရှုရိစစ်တပ်သည် ယေဇရေလချိုင့်ဝှမ်းတွင် ဣသရေလတို့ကို ချေမှုန်းသုတ်သင်ခဲ့သည်။

၁:၆-၇ ဒုတိယသမီးရသော် လောရုဟာမ (အကြင်နာကင်းမဲ့ခြင်းဟု အနက်ရသည်)ဟု နာမည်ပေးသည်။ နာမ်ပညတ် သဘောအရ ဣသရေလတို့အပေါ် သနားကရုဏာဆိတ်သုဉ်းသဖြင့် အာရှုရိနိုင်ငံက ယုဒပြည်ကို ခြွင်းချန်လျက် ဣသရေပြည်အား ကျူးကျော်တိုက်ခိုက် သိမ်းပိုက်ကာ ကျွန်အဖြစ် ဖမ်းဆီးခေါ်ဆောင်သွား လိမ့်မည်။

၁:၈-၉ တတိယသား၏နာမည်ကို လောအမ္မိ (တစိမ်းလူဟု အနက်ရသည်) ဟုမှည့်ခေါ်သည်။ ဘုရားသခင်က ဣသရေလတို့အား သူ့လူမျိုးတော်အဖြစ် အသိအမှတ်မပြုလိုတော့ပါ။ အချို့က ဤတတိယသား၏ အမည်ကိုအကြောင်းပြုလျက် ဟောရှေကိုယ်တိုင်က မိမိသွေးသားအစစ် ဟုတ်မဟုတ် သံသယဖြင့်မှည့်ခေါ် လေသလားဟုစောကြောကြသည်။

၂။ ဣသရေလတို့ ပြန်လည်စုစည်းစေမည့် ကတိတော်(၁:၁၀–၂:၁)

၁:၁၀–၁၁ သို့သော် ဣသရေလလူမျိုးအပေါ် ဤအပြစ်ပေးခြင်းသည် အခိုက်အတန့်မျှသာဖြစ်မည်။ ဤသရေလလူမျိုးနှင့် ယုဒလူတို့အား ဘုရားသခင်ပေါင်းစည်းစေပြီး လူမျိုးတော်အဖြစ် ပြန်လည်သိမှတ်မည်။ ခရစ်တော်ဒုတိယအကြိမ် ပြန်ကြွလာသောအခါ မျက်ဝါးထင်ထင် ကြုံတွေ့ကြရမည်။

အငယ် (၁၀) နေနာက်ပိုင်းသည် ဣသရေလလူမျိုးအကြောင်းဖြစ်သည်။ ဤကျမ်းပိုင်းကိုပေါလုက ရောမ၉:၂၆ တွင် တပါးအမျိုးသားအား ခေါ်ဆောင်ခြင်း၌ ကိုးကားထားသည်။ ဓမ္မဟောင်းကျမ်းပိုဒ်များကို ဓမ္မသစ်ကျမ်း၌ ညွှန်းခြင်းသည် ဘုရားရှင်ကိုယ်တိုင်ဝိညာဉ်တော်ဖြင့် ဖွင့်ပြပေးခြင်းဖြစ်သည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။