Ezra -9 -

ဧဇရမှတ်စာ - ၉

လူမျိုးခြားနှင့်အိမ်ထောင်ပြုခြင်း

1ထိုအမှုပြီးမှ၊ အကြီးအကဲတို့သည် ငါ့ထံသို့လာ၍ ယဇ်ပုရောဟိတ်၊ လေဝိသားအစရှိသော ဣသရေလ အမျိုးသားတို့သည် ဤပြည်သားရင်းတို့နှင့် ပေါင်းဖော်သဖြင့်၊ ခါနာနိလူ၊ ဟိတ္တိလူ၊ ဖေရဇိလူ၊ ယေဗုသိလူ၊ အမ္မုန်လူ၊ မောဘလူ၊ အဲဂုတ္တုလူ၊ အာမောရိလူတို့ ရွံရှာဖွယ်သောအကျင့်ကို ကျင့်ကြပါ၏။ 2အကြောင်းမူကား၊ သူတို့သမီးများကို ကိုယ်ဖို့လည်းကောင်း၊ ကိုယ်သားဖို့လည်းကောင်း၊ သိမ်းယူသဖြင့်၊ သန့်ရှင်းသောအမျိုးသည် ဤပြည်သားရင်းအမျိုးနှင့် ရောနှောလျက်ရှိ၍၊ အကြီးအကဲနှင့် မင်းအရာရှိတို့သည်၊ ဤဒုစရိုက်အမှုကို အဦးပြုကြပြီတကားဟု ကြားပြောကြ၏။ 3ထိုစကားကို ငါကြားလျှင် အတွင်းအဝတ်၊ ပြင်အဝတ်ကို ဆုတ်၍ ဆံပင်နှင့်မုတ်ဆိတ်ကို နုတ်ပစ်လျက်၊ မိန်းမောတွေဝေလျက် ထိုင်နေ၏။ 4ထိုအခါ ဣသရေလအမျိုး၏ ဘုရားသခင် ထာဝရဘုရား အမိန့်တော်ကို ကြောက်ရွံသောသူအပေါင်းတို့သည်၊ သိမ်းသွားခြင်းကို ခံရသောသူတို့ ပြစ်မှားသောအပြစ်ကြောင့်၊ ငါ့ထံမှာစည်းဝေး၍၊ ညဉ့်ဦးယံ ယဇ်ပူဇော်ချိန်တိုင်အောင် ငါသည်မိန်းမောတွေဝေလျက် နေ၏။ 5ညဉ့်ဦးယံ ယဇ်ပူဇော်ချိန်တွင်၊ စိတ်ပျက်ရာမှထ၍ အတွင်းအဝတ်၊ ပြင်အဝတ်ကို ဆုတ်ပြီးလျှင်၊ ဒူးထောက်၍၊ ငါ၏ဘုရားသခင် ထာဝရဘုရားထံတော်သို့ လက်ဝါးတို့ကို ဖြန့်လျက်၊

6အို အကျွန်ုပ်ဘုရားသခင်၊ ကိုယ်တော်သို့ မမျှော်မကြည့်ဝံ့၊ ရှက်ကြောက်၍ မျက်နှာနီပါ၏။ အကျွန်ုပ်ဘုရားသခင်၊ အကျွန်ုပ်တို့ ပြုမိသော ဒုစရိုက်တို့သည် အကျွန်ုပ်တို့ ခေါင်းပေါ်မှာ အထပ်ထပ်လွှမ်းမိုး၍၊ ကြီးစွာသော အပြစ်သည် မိုးကောင်းကင်သို့ မီပါ၏။ 7ဘိုးဘေးလက်ထက်မှစ၍ ယနေ့တိုင်အောင်၊ အလွန်ပြစ်မှားပါပြီ။ ကိုယ်အပြစ်ကြောင့် ရှင်ဘုရင်နှင့် ယဇ်ပုရောဟိတ်မှစ၍၊ အကျွန်ုပ်တို့သည် ယနေ့တိုင်အောင် ခံသကဲ့သို့၊ တစ်ပါးအမျိုးသား ရှင်ဘုရင်လက်သို့ အပ်ခြင်း၊ အသေသတ်ခြင်း၊ သိမ်းသွားခြင်း၊ လုယက်ခြင်း၊ မျက်နှာပျက်ခြင်းကို ခံရပါ၏။ 8ယခုခဏတွင်၊ အကျွန်ုပ်တို့၏ ဘုရားသခင် ထာဝရဘုရားသည်၊ အကျွန်ုပ်တို့ကို ဘေးမဲ့လွှတ်၍ ကျန်ကြွင်းစေလျက်၊ သန့်ရှင်းသော ဌာနတော်၌ စွဲထားသောတံစို့ကို ပေးတော်မူသောကျေးဇူးတော် ကြီးလှပါ၏။ အကျွန်ုပ်တို့ဘုရားသခင်သည် အကျွန်ုပ်တို့မျက်စိကို လင်းစေ၍၊ အကျွန်ုပ်တို့ ကျွန်ခံနေရာ၌ အသက်ရှူပြန်ရသော အခွင့်ကို ပေးတော်မူပြီ။ 9အကျွန်ုပ်တို့သည် ကျွန်ခံလျက်နေရပါ၏။ ထိုသို့ ကျွန်ခံလျက် နေရသော်လည်း၊ အကျွန်ုပ်တို့၏ ဘုရားသခင်သည် စွန့်ပစ်တော်မမူ။ အကျွန်ုပ်တို့ အသက်လွတ်ခြင်းငှာလည်းကောင်း၊ အကျွန်ုပ်တို့ ဘုရားသခင်၏ အိမ်တော်ကို ထူထောင်၍၊ ပြိုပျက်ရာတို့ကို ပြုပြင်ခြင်းငှာလည်းကောင်း၊ ယုဒပြည် ယေရုရှလင်မြို့၌ ခိုလှုံရာအရပ်ကို အကျွန်ုပ်အား ပေးခြင်းငှာလည်းကောင်း၊ ပေရသိရှင်ဘုရင်တို့သည် အကျွန်ုပ်တို့၌ ကျေးဇူးပြုချင်သော စေတနာစိတ်ကို ပေးသနားတော်မူပြီ။ 10ယခုလည်း အိုအကျွန်ုပ်တို့၏ ဘုရားသခင်၊ ဤသို့ ပြုမိပြီးမှ၊ 11အဘယ်သို့ လျှောက်ရပါမည်နည်း။ 12ကိုယ်တော်က၊ သင်တို့သွား၍ သိမ်းယူလတ္တံ့သောပြည်သည်၊ ပြည်သူပြည်သားတို့ အညစ်အကြေးကြောင့် ညစ်ညူးသောပြည် ဖြစ်၏။ တစ်ပြည်လုံးကို ရွံရှာဖွယ်အမှုတို့နှင့် ပြည့်စေကြပြီ။ သို့ဖြစ်၍ သင်တို့သမီးကို သူတို့သားအား မပေးစားကြနှင့်။ သူတို့၏သမီးကို သင်တို့သားနှင့် မစုံဖက်စေကြနှင့်။ သူတို့ချမ်းသာနှင့် သူတို့စည်းစိမ်ကို အလျှင်းမပြုစုကြနှင့်။ သင်တို့သည် ခွန်အားကြီး၍ မြေအသီးအနှံကို စားရသောအခွင့်၊ ထိုမြေကို ကိုယ်သားမြေးတို့၌ နိစ္စအမွေမြေဖြစ်စေ၍၊ အပ်ရသော အခွင့်ရှိစေခြင်းငှာ၊ ထိုသို့ကျင့်၍ နေကြလော့ဟု ကိုယ်တော်ကျွန်၊ ပရောဖက်တို့အားဖြင့် မှာထားတော်မူသော ပညတ်စကားတော်ကို အကျွန်ုပ်တို့သည် နားမထောင်ပါတကား။ 13အကျွန်ုပ်တို့၏ ဘုရားသခင် ထာဝရဘုရားတည်းဟူသော ကိုယ်တော်သည် အကျွန်ုပ်တို့ခံထိုက်သမျှသော အပြစ်ဒဏ်ကို ပေးတော်မမူသော်လည်း၊ အကျွန်ုပ်တို့သည် ကိုယ်တိုင်ပြုမိသော ဒုစရိုက်အမှု၊ ကြီးစွာသော လွန်ကျူးခြင်းအပြစ်ကြောင့်၊ ဤမျှလောက် ခံရပြီးမှလည်းကောင်း၊ ကိုယ်တော်သည် ဤမျှလောက် ချမ်းသာပေးတော်မူပြီးမှလည်းကောင်း၊ 14အကျွန်ုပ်တို့သည် ပညတ်တရားတော်တို့ကို တစ်ဖန်လွန်ကျူး၍၊ ဤရွံရှာဖွယ်အမှုတို့ကို ပြုတတ်သောလူမျိုးနှင့် ပေါင်းဖော်လျှင် တစ်ယောက်မျှမလွတ်၊ မကျန်ကြွင်းစေခြင်းငှာ၊ အမျက်တော်ထွက်၍ အကျွန်ုပ်တို့ကို ဖျက်ဆီးတော်မူမည် မဟုတ်လော။ 15အို ဣသရေလအမျိုး၏ ဘုရားသခင် ထာဝရဘုရား၊ ကိုယ်တော်သည် ဖြောင့်မတ်တော်မူ၏။ အကျွန်ုပ်တို့သည် ယနေ့အသက်လွတ်၍ ကျန်ကြွင်းသေးသောသူ ဖြစ်ပါ၏။ ကိုယ်အပြစ်များကို ရှေ့တော်၌ တောင်းပန်ပါ၏။ ထိုအပြစ်ကြောင့်၊ ရှေ့တော်၌ နေရာမရနိုင်ပါဟု တောင်းလျှောက်လေ၏။

ဧဇရမှတ်စာ - ၉ (အနက်ဖွင့်)

(ဃ) သွေးနှောအိမ်ထောင်ပြုခြင်းနှင့် ဧဇရ၏ဆုတောင်းချက်(အခန်း ၉)

၉:၁–၂ ယေရုရှလင်တွင်ဧဇရမနေခဲ့ရသည့် ကာလရှည်အတွင်း၌ အုပ်စိုးသူမှူးကြီး၊ မတ်ရာများနှင့် ပြည်သူများသည် ယုဒအမျိုးမဟုတ်သော အခြားလူမျိုးများနှင့် သွေးနှောအိမ်ထောင်ပြုကြကြောင်း ရပ်ရွာလူကြီးများက လာရောက်တိုင်တန်းကြသည်။ ဣသရေလများ သမိုင်းကြောင်းတွင် ဘုရားသခင်၏ အရေးယူအပြစ်ပေးခြင်းသည်လည်း ထိုအချက်ပါဝင်သည်။ ထွ ၃၄:၁၆၊ တရား ၇:၃တွင် ဘုရားသခင်ကို စင်ကြယ်စွာပြုရမည်ဟု တရားတော်အတိအလင်းပြဌာန်းထားသည်။ ရွေးကောက်တော်မူထားသော လူမျိုးများအား အခြားလောကများနှင့် ရောနှောပြွမ်းတီး၍ ဒုစရိုက်လောကထဲတွင် မနေစေချင်။ တသီးတသန့် ဖြစ်စေချင်သည်။

၉:၃–၄ ထိုသို့ သွေးနှောထိမ်းမြားကြခြင်း သတင်းကြားသိသောအခါ ဧဇရသည် အံသြထိတ်လန့်သွားသည်။ စိတ်နှလုံးမချမ်းမြေ့သောကြောင့် နေဝင်မိုးချုပ်တိုင်အောင် တရားဆင်ခြင်သည်။ ဝတ်ရုံကို စုတ်ဖြဲ၍ မုတ်ဆိတ်ကျင်စွယ်များကို ဆွဲနုတ်ပစ်သည်။ ဧည့်ပရိသတ်များက အသက်ပင် မှန်မှန် မရှူရဲ ၊ မျက်လုံးအဝိုင်းသားဖြင့်ကြည့်နေကြသည်။

၉:၅–၁၅ ညဦးယံ ပူဇော်ချိန်တွင် ဧဇရသည် ဒူးထောက်လျက် ဣသရေလူမျိုးများ၏ အပြစ်ကို ယေဟောဝါဘုရားသခင်ထံ အော်ဟစ်တောင်းပန်သည်။ ပြည်သူများ၏အပြစ်ကို သူပြုသောဒုစရိုက်အပြစ်ခံယူသည်။ ပြည်သူပြည်သားများကဲ့သို့ နစ်ဝင်နေသော“ဆူး“ ကို ယခုဘဲ ဆွဲနုတ်ပေးသောဘုရားသခင်အား ကျေးဇူးတော်ချီးမွမ်းပါသည်ဟု ဆင့်ခါဆင့်ခါ တောင်းလျှောက်သည်။ အငယ် ၈၌ပါရှိသော “စို့“ကို အချို့က ဘေးကင်းလုံခြုံခြင်းဟု ယူဆ၍ အချို့က ဘုရားသခင်အား မှီခိုခြင်းဟုဆိုသည်။ Ironside ကမူ ခရစ်တော်ကိုရည်ညွှန်းသည်ဟု ဆိုသည်။

ဆူး(NKJV ကျမ်းစာမူတွင် စို့ )သည် ဟေရှာယ၏ ပရောဖက်ပြုချက်”မြဲသောအရပ်၌ တံစို့” ဖြစ်သည်မှာ သေချာသည်။ ယေရှုခရစ်တော်ပေါ်သို့ ယေဟောဝါဘုရားသခင်၏ ဘုန်းတန်ခိုးစွဲတည်ခြင်း ဖြစ်သည် (ဟေရှာ ၂၂:၂၁-၂၅)၁၅

သွေးနှောထိမ်းမြား အိမ်ထောင်ပြုခြင်းသည် ဘုရားသခင်ရှေ့တော်၌ လုံ:ဝမသင့်လျော်ဟု ဧဇရကအတိအလင်း ရှုတ်ချသည်။ ဘုရားသခင်ရှေ့မှာ အပြစ်ဝန်ခံခြင်းမှတစ်ပါး စကားကြောရှည်စရာမရှိ။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။