Ezra -10 -

ဧဇရမှတ်စာ - ၁၀

လူထု၏တုံ့ပြန်ခြင်း

1ထိုသို့ဧဇရသည် ဘုရားသခင်၏အိမ်တော်ရှေ့မှာ ပျပ်ဝပ်လျက်၊ မျက်ရည်ကျလျက် တောင်းပန်၍ ပတ္ထနာပြုသောအခါ၊ အလွန်များစွာသော ပရိသတ်၊ ဣသရေလအမျိုး ယောက်ျား၊ မိန်းမ၊ သူငယ်တို့သည် ဧဇရထံမှာ စည်းဝေး၍ အလွန်ငိုကြွေးကြ၏။ 2ဧလံအမျိုး၊ ယေဟေလသား ရှေကနိကလည်း၊ ငါတို့သည် ကိုယ်ဘုရားသခင်ကို ပြစ်မှား၍၊ ဤပြည်၌နေသော တစ်ပါးအမျိုးသား မိန်းမတို့နှင့် စုံဖက်ကြပြီ။ သို့ရာတွင် ဤအမှုမှာ ဣသရေလအမျိုး မျှော်လင့်စရာ ရှိသေး၏။ 3သို့ဖြစ်၍ အရှင်ဘုရားအစရှိသော ငါတို့ ဘုရားသခင်၏ ပညတ်တရားကို ကြောက်ရွံ့သောသူတို့ သတိပေးသည်အတိုင်း၊ ဤမိန်းမများနှင့် သူတို့သားသမီးများရှိသမျှကို စွန့်ပယ်မည်ဟု ငါတို့၏ဘုရားသခင့် ရှေ့တော်၌ အဓိဋ္ဌာန်ပြုကြကုန်အံ့။ ဤအမှုကို တရားရှိသည်အတိုင်း စီရင်ကြကုန်အံ့။ 4ထတော်မူပါ။ ဤအမှုကို ကိုယ်တော်ဆိုင်ပါ၏။ အကျွန်ုပ်တို့သည်လည်း ဝိုင်း၍ မစကြပါမည်။ ရဲရင့်သော စိတ်ရှိ၍ ပြုတော်မူပါဟု ဧဇရအား ပြန်ပြောကြလျှင်၊ 5ဧဇရသည်ထ၍ ယဇ်ပုရောဟိတ်အကြီး၊ လေဝိသား၊ ဣသရေလအမျိုးသား အပေါင်းတို့သည် ထိုစကားအတိုင်း ပြုရမည်အကြောင်း သူတို့အားအကျိန်ပေး၍ သူတို့သည် ကျိန်ဆိုကြ၏။

6ထိုအခါ ဧဇရသည် ဘုရားသခင်၏အိမ်တော် ရှေ့ကထ၍၊ ဧလျာရှိပ်သားယောဟနန် အခန်းသို့သွား၏။ ရောက်သောအခါ မုန့်ကိုမစား၊ ရေကိုမသောက်ဘဲ နေ၏။ အကြောင်းမူကား၊ သိမ်းသွားခြင်းကို ခံဖူးသော သူတို့ပြစ်မှားသော အပြစ်ကြောင့် ညည်းတွားမြည်တမ်းလေ၏။ 7သိမ်းသွားခြင်းကို ခံရသော အမျိုးသားအပေါင်းတို့သည်၊ ယေရုရှလင်မြို့သို့ စည်းဝေးစေမည်အကြောင်း၊ 8မင်းများနှင့် အသက်ကြီးသူများ စီရင်သည်အတိုင်း၊ သုံးရက်အတွင်းတွင် မရောက်သောသူ မည်သည်ကား၊ သိမ်းသွားခြင်း၊ အမျိုးသားပရိသတ်ထဲက နှင်ထုတ်ခြင်းကိုခံ၍၊ သူ၏ဥစ္စာရှိသမျှသည် ကျိန်ဆိုအပ်သောဥစ္စာ ဖြစ်စေမည်အကြောင်း၊ ယေရုရှလင်မြို့မှ စ၍ ယုဒပြည်တစ်လျှောက်လုံး၌ ကြော်ငြာကြ၏။

9ယုဒအမျိုးနှင့် ဗင်္ယာမိန်အမျိုးသားယောက်ျား အပေါင်းတို့သည် သုံးရက်အတွင်းတွင်၊ ယေရုရှလင်မြို့မှာ စည်းဝေး၍ နဝမလအရက်နှစ်ဆယ်တွင်၊ လူအပေါင်းတို့သည် ထိုအမှုကြောင့်လည်းကောင်း၊ သည်းထန်စွာ မိုးရွာသောကြောင့်လည်းကောင်း၊ တုန်လှုပ်လျက် ဘုရားသခင်၏ အိမ်တော်ဦးရှေ့မှာ ထိုင်နေကြ၏။ 10ထိုအခါ ယဇ်ပုရောဟိတ်ဧဇရသည် ထ၍၊ သင်တို့သည် ပြစ်မှားကြပြီ။ ဣသရေလအမျိုး၌ အပြစ်လေးစေခြင်းငှာ တစ်ပါးအမျိုးသားမိန်းမတို့နှင့် စုံဖက်ကြပြီတကား။ 11သို့ဖြစ်၍ ဘိုးဘေးတို့၏ ဘုရားသခင် ထာဝရဘုရားအား တောင်းပန်ကြလော့။ အလိုတော်အတိုင်း ပြုလျက်၊ ဤပြည်သားတို့နှင့်လည်းကောင်း၊ တစ်ပါးအမျိုးသား မိန်းမတို့နှင့်လည်းကောင်း ကွာကြလော့ဟု သူတို့အားဆို၏။ 12ပရိသတ်အပေါင်းတို့ကလည်း၊ ကိုယ်တော် မိန့်တော်မူသည်အတိုင်း အကျွန်ုပ်တို့သည် ပြုပါမည်။ 13သို့ရာတွင် လူအများရှိပါ၏။ သည်းထန်စွာ မိုးရွာသောကာလ ဖြစ်ပါ၏။ အကျွန်ုပ်တို့သည် အိမ်ပြင်မှာ မရပ်မနေနိုင်ပါ။ ဤအမှုသည် တစ်ရက်နှစ်ရက်တွင် ပြီးနိုင်သောအမှု မဟုတ်ပါ။ ပြစ်မှားသောသူ အများရှိပါ၏။ 14ငါတို့ ပရိသတ်အပေါင်းကို အုပ်ချုပ်သော အကြီးအကဲတို့သည် စီရင်သဖြင့်၊ အကျွန်ုပ်တို့နေရာမြို့ရွာ၌ တစ်ပါးအမျိုးသားမိန်းမနှင့် စုံဖက်သော သူအပေါင်းတို့သည် ချိန်းချက်သောအချိန်တို့၌ မြို့အသီးသီး အသက်ကြီးသူများ၊ တရားသူကြီးများနှင့် အတူလာ၍ ဤအမှုကြောင့် ပြင်းစွာထွက်သော ငါတို့ဘုရားသခင်၏ အမျက်တော်ကို ဖြေကြပါစေဟု ကြီးစွာသောအသံနှင့် ပြန်ပြောကြ၏။

15အာသဟေလသား ယောနသန်နှင့် တိကဝသား ယဟာဇိသာလျှင် ထိုအမှုကိုပြုစုကြ၏။ လေဝိသား မေရှုလံနှင့် ရှဗ္ဗသဲတို့သည် ဝိုင်းညီကြ၏။ 16သိမ်းသွားခြင်းကို ခံရသော အမျိုးသားတို့သည် ဝန်ခံကြသည်နှင့်အညီ၊ ယဇ်ပုရောဟိတ်ဧဇရသည် ရွေးချယ်၍ အဆွေအမျိုးအလိုက် အမည်များကို မှတ်သားသော အဆွေအမျိုးသူကြီးတို့သည် ဒသမလတစ်ရက်နေ့တွင် ထိုအမှုကို စစ်ကြောခြင်းငှာ ထိုင်နေကြ၏။ 17တစ်ပါးအမျိုးသားမိန်းမနှင့် စုံဖက်သောသူ အပေါင်းတို့ကို ပထမလတစ်ရက်နေ့တိုင်အောင် အကုန်အစင် စစ်ကြောစီရင်ကြ၏။

တစ်ပါးအမျိုးသားမိန်းမနှင့်စုံဖက်သူများ

18တစ်ပါးအမျိုးသားမိန်းမနှင့် စုံဖက်သော ယဇ်ပုရောဟိတ်အမျိုးသားဟူမူကား၊

ယောရှုအမျိုး ယောဇဒက်သားနှင့် သူ၏ညီ မာသေယ၊ ဧလျေဇာ၊ ယာရိပ်၊ ဂေဒလိတည်း။ 19သူတို့သည် မယားနှင့်ကွာမည်ဟု ကတိထားကြ၏။ ပြုမိသော အပြစ်ကြောင့် သိုးကို ယဇ်ပူဇော်ကြ၏။ 20ထိုမှတစ်ပါး၊ ဣမေရအမျိုး ဟာနန်နှင့် ဇေဗဒိ၊ 21ဟာရိမ်အမျိုး မာသေယ၊ ဧလိယ၊ ရှေမာယ၊ ယေဟေလ၊ ဩဇိ၊ 22ပါရှုရအမျိုး ဧလိဩနဲ၊ မာသေယ၊ ဣရှမေလ၊ နာသနေလ၊ ယောဇဗဒ်၊ ဧလာသ။

23လေဝိသားယောဇဗဒ်၊ ရှိမိ၊ ကေလာယတည်းဟူသော ကေလိတ၊ ပေသာဟိ၊ ယုဒ၊ ဧလျေဇာ၊

24သီချင်းသည် ဧလျာရှိပ်၊ တံခါးစောင့် ရှလ္လုံ၊ တေလိမ်၊ ဥရိ၊

25ဣသရေလအမျိုးထဲက ပါရုတ်အမျိုး ရာမိ၊ ယေဇိ၊ မာလခိ၊ မျာမိန်၊ ဧလာဇာ၊ မာလခိယ၊ ဗေနာယ၊ 26ဧလံအမျိုးမတ္တနိ၊ ဇာခရိ၊ ယေဟေလ၊ အာဗဒိ၊ ယေရမုတ်၊ ဧလျာ၊ 27ဇတ္တုအမျိုး ဧလိဩနဲ၊ ဧလျာရှိပ်၊ မတ္တနိ၊ ယေရမုတ်၊ ဇာဗဒ်၊ အာဇိဇ၊ 28ဗေဗဲအမျိုး ယောဟနန်၊ ဟာနနိ၊ ဇဗ္ဗဲ၊ အာသလဲ၊ 29ဗာနိအမျိုး မေရှုလ၊ မလ္လုတ်၊ အဒါယ၊ ယာရှုပ်၊ ရှာလ၊ ရာမုတ်၊ 30ပါဟတ်မောဘအမျိုး အဒန၊ ခေလာလ၊ ဗေနာယ၊ မာသေယ၊ မတ္တနိ၊ ဗေဇလေလ၊ ဗိနွိ၊ မနာရှေ၊ 31ဟာရိမ်အမျိုး ဧလျေဇာ၊ ဣရှိယ၊ မာလခိ၊ ရှေမာယ၊ ရှိမောင်၊ ဗင်္ယာမိန်၊ မလ္လုတ်၊ ရှေမရိ၊ 32-33ဟာရှုံအမျိုး မတ္တနဲ၊ မတ္တသ၊ ဇာဗဒ်၊ ဧလိဖလက်၊ ယေရမဲ၊ မနာရှေ၊ ရှိမိ၊ 34ဗာနိအမျိုး မာဒဲ၊ အာမရံ၊ ဝေလ၊ ဗေနာယ၊ ပေဒိ၊ ခေလု၊ 35-36ဝါနိ၊ မေရမုတ်၊ ဧလျာရှိပ်၊ မတ္တနိ၊ မတ္တနဲ၊ ယာသော၊ 37-38ထိုမှတစ်ပါး၊ ဗာနိ၊ ဗိနွိ၊ ရှိမိ၊ 39-40ရှေလမိ၊ နာသန်၊ အဒါယ၊ မာခနဒေဗဲ၊ ရှာရှဲ၊ ရှာရဲ၊ 41အာဇရေလ၊ ရှေလမိ၊ ရှေမရိ၊ ရှလ္လုံ၊ အာမရိ၊ ယောသပ်၊ 42-43နေဗောအမျိုး ယေယေလ၊ မတ္တိသိ၊ ဇာဗဒ်၊ ဇေဗိန၊ ယာဒေါ၊ ယောလ၊ ဗေနာယတည်း။ 44ဤသူအပေါင်းတို့သည် တစ်ပါးအမျိုးသားမိန်းမနှင့် စုံဖက်၍ သားသမီးကို မြင်ရကြပြီ။

ဧဇရမှတ်စာပြီး၏။

ဧဇရမှတ်စာ - ၁၀ (အနက်ဖွင့်)

(င)တိုင်းတပါးသားမယားအား နှင်ထုတ်သည့် ယုဒတရားဓမ္မ (အခန်း ၈)

၁၀:၁–၅ ဧဇရ၏ နှလုံးသည်းပွတ်ကြားမှ ရှိုက်သံနှော၍ ဆုတောင်းသံကြားရသော ပရိသတ်များသည်လည်း ရှိုက်ကြီးတငင် ငိုကြွေးကြသည်။ ပရိသတ်ထဲမှ ရှေကနိသည် မအောင့်အီးနိုင်သဖြင့် အပြစ်ကျူးလွန်မိကြကြောင်း ဝန်ခံသည်။ မညီသောထမ်းပိုးထမ်းမိကြောင်း သိရှိဝန်ခံကြလျှင် မျှော်လင့်ချက်ရှိကြောင်း ဧဇရက ပြန်လည်နှစ်သိမ့်အားပေးသည်။ ဧဇရက တိုင်းတပါးသားမယားများကို ကွာရှင်းမောင်းထုတ်ခိုင်းသည်။ ယဇ်ပုရောဟိတ်၊ လေဝိအမျိုးသားများနှင့် ဣသရေလ လူကြီးသူမများက တမျိုးသားလုံးနောင်တရစရာအဖြစ် သတ်မှတ်ခံယူ၍ ကျမ်းကျိန်သစ္စာပြုကြသည်။

၁၀:၆–၈ တိုင်းတပါးကျွန်ဘဝမှ ပြန်လည်ရောက်ရှိလာသူများသည် ယေရုရှလင်တွင် ချိန်းချက်စုစည်း၍အပြစ်ဝန်ချတောင်းပန်ကြသည်။ ချိန်းဆိုထားသည့် သုံးရက်အတွင်းမရောက်လာသူများကို အဆက်အသွယ် ဖြတ်တောက်ကြသည်။ပေါင်းသင်းဆက်ဆံ မေးထူးခေါ်ပြောခြင်းမလုပ်၊ ဝိုင်းကြဉ်ပထုတ်ကြသည်။ ဥစ္စာပစ္စည်းများကိုလည်း ကျိန်စာသင့်စေကြသည်။

၁၀:၉–၁၁ ယေရုရှလင်နှင့် အနီးပတ်ဝန်းကျင်ရှိ ယုဒနှင့် ဗင်္ယာမိန်အမျိုးအားလုံး ချိန်းဆိုသည့်ရက်အတွင်း ရောက်ရှိလာကြသည်။ ထိုစဉ် မိုးရာသိမဟုတ်ဘဲ၊ မိုးပြင်းထန်စွာရွာသွန်းသောကြောင့် ပွဲမသိမ်းနိုင်ကြ။ ထိုအခါ ဧဇရက ယုဒလူတို့ ပြစ်မှားသော အပြစ်ဒုစရိုက်ကို ထောက်ပြသည်။

၁၀:၁၂–၁၇ ဘုရားသခင်၏ ပညတ်တရားကို ကျူးလွန်ပြစ်မှားသောကြောင့် ထိုသို့အချိန်အခါမဟုတ် မိုးပြင်းထန်ကြောင်း အစည်းအဝေးတက်ရောက်သူတိုင်းနားလည် သဘောပေါက်ကြသည်။ ထိုမိုးသည်နေ့ရက်စဉ်ဆက်သဲကြီးမကြီး ရွာသွန်းသဖြင့် သာမန်မိုး မဟုတ်မှန်း ဝန်ခံကြသည်။ သို့ဖြင့် တမြို့ပြီးတမြို့ စစ်ဆေးကြရသည်။ ထိုအယူအဆကို လူလေးဦးကကန့်ကွက်သော်လည်း ကန့်ကွက်ချက်မအောင်မြင်။ သို့ဖြင့် နှစ်ပါတ်အတွင်းတွင် တရားသူကြီးများက လိုက်လံ စစ်ဆေးသည်။(၃)လအတွင်းတွင် ပြဿနာကြည်အေးသွားသည်။

၁၀:၁၈–၄၄ ထိုအရေးအခင်း စစ်ဆေးပုံကို ရှင်းပြထားသည်။ ပထမဦ:စွာ ယဇ်ပုရောဟိတ်များ (ငယ် ၁၈-၂၂)၊ လေဝိအမျိုး (ငယ် ၂၃၊၂၄)၊ နောက်ဆုံးတွင် အခြားဣသရေလပြည်သူပြည်သားများ (ငယ် ၂၅-၄၃)စစ်ဆေးကြသည်။ အငယ် ၄၄ကို “ရုပ်တုဘုရားကိုးကွယ်သည့် မယားများနှင့် ထိုမယားဖြင့်ရရှိသော သားသမီးများအားလုံး“ဟု ဖတ်ရှုလျှင် ပိုမိုပြည့်စုံရှင်းလင်းသည်။ ထိုသို့ ကွာရှင်းမောင်းထုတ်ခိုင်းသော်လည်း သားသမီးတို့၏ မယားစရိတ်ထောက်ပံ့ရသည်။ ထိုဝမ်းနည်းဖွယ်ရာ ဇာတ်လမ်းသည် မေရှိယသခင် ပေါ်ထွန်းရာမျိုးဇာတ်ကြောင်းတွင် အဟန့်အတား အနှောင့်အယှက်များဖြစ်သည်။

မညီညာသောထမ်းပိုးမထမ်းဖို့ ၂ကော ၆:၁၄-၁၈တွင်လည်း ထပ်မံတားမြစ်ထားသည်။ ဘုရားသခင် သားသမီးအကြား၌ မရှိအပ်။ သို့သော် ၁ကော ၇:၁၂-၁၃တွင်မူ မယုံကြည်သူ အိမ်ထောင်ဘက်အား အသက်တာ၌ ပြောင်းလဲစေရသည်ဟုဆိုသည်။ ဘုရားသခင်ကျေးဇူးတော်သည် မယုံကြည်သူများကိုလည်း ပစ်ပယ်မထားပါ။ ယုံကြည်သူများ၏ အစွဲအလန်းတခုအဖြစ် အသုံးချနိုင်လျှင် အကျိုးရှိပါသည်။

ဧဇရမှတ်စာသည် ဝိညာဉ်ရေးရာနိုးကြားရေး သင်ခန်းစာဖြစ်သည်။ ဘုရားသခင်၏ နှုတ်ကပါတ်တော်ကို ဖတ်ရှုဆင်ခြင်၍ လက်တွေ့ဘဝတွင် အသုံးချနိုင်သည်။ သန့်ရှင်းသူများက အခြားသူများအတွက် ဆုတောင်းပေးခြင်း၊ အသင်းတော်အတွက် ဆုတောင်းပေးခြင်းသည် ဘုရားသခင်ရှေ့တွင် ကြီးမားသောအမှုတော် ပြုခြင်းဖြစ်သည်။

မှတ်စု

၁။ (နိဒါန်း) W.Graham Scroggie,Know Your Bible, Vol.1 Old Testament,p.90(စုစုပေါင်း ၈၈၀ ဆိုသည်မှာ စာလုံးပေါင်းမှားကူးခြင်းဖြစ်သည်။)

၂။ (နိဒါန်း)19:8-6:18 and 7:12-16 are in Aramaic.

၃။ (နိဒါန်း) Scroggie,Know Your Bible, Vol.1.,p.91.

၄။ (၂:၅၉-၆၃) ဤနေရာတွင် ဥရိမ်နှင့် သုမိမ် အကြောင်းကို အသေအချာ မသိရပါ။ Ryrie Study Bible, New King James Version p.135 တွင်မူအိပ်ကပ်တဘက်တချက်တွင် တလုံးစီထည့်ထားသော ကျောက်မျက်ရတနာဖြစ်သည်။ ဘုရားသခင်၏ အလိုတော် အဓိပ္ပါယ်ဆောင်သော မဲပေါက်ခြင်းမှတ်အသား ဖြစ်သည်ဟု ဆိုသည်။ ထွ ၂၈:၃၀၊ ဝတ် ၈:၈၊ တော ၂၇:၂၁၊ တရား ၃၃:၈၊ ၁ရာ ၂၈:၆၊နေ ၇:၆၅တို့တွင်လည်းကြည့်ပါ။

၅။ (၃:၁- ၇) Jeshua (သို့) Yeshua သည် ဟေဗြဲဘာသာစကားဖြင့် ယေရှုဖြစ်သည်။

၆။ (၄:၆) ငယ် ၆-၂၃ သည် သမိုင်းစဉ်ဖြစ်သည်။ ဧဇရ၊နေဟမိနှင့် ဧသတာသမိုင်းစဉ်ဇယားကိုကြည့်ပါ။

၇။ (၄:၇-၂၃) ရှေးကျသော အင်္ဂလိပ်စာပေတွင် ခါလဒဲဟုအသုံးများသည်။

၈။ (၆:၁၆) Edward Dennett, Exposition of the Book of Ezra: Restoration from Babylon,p.55.

၉။ (၆:၁၇−၂၂) Ibid,pp.55.56.

၁၀။ (၇:၁−၅) G.Cambell Morgan,Searchlights from the World,p.131.

၁၁။ (၇:၆−၁၀) ဆာလံကျမ်း ၁ရေးသားသူကို မသိကြသော်လည်း ကျမ်းစာပညာရှင်အများစုကမူ ဧဇရဟုယုံကြည်ကြသည်။ “ဆာလံ ၁၁၉ကဲ့သို့ ဘုရားသခင်၏စကားတော်နှင့် ပြည့်ဝသည်။”

၁၂။ (၇:၂၇−၂၈) သမ္မာကျမ်းစာတွင် ယေရုရှလင်သို့ ချီတက်ကြသည်ဟု သုံးထားသည်။ မြေမျက်နှာပြင် အနေအထားအရ မြေပြင်ညီ၍ သွားသည်ဟုဆိုသင့်သော်လည်း တောင်ကုန်းပေါ်တွင်ရှိသော ဗိမာန်တော်ကို ဦးတည်ရည်ညွှန်းသွားဟန်ရှိသည်။ ဝိညာဉ်ရေးရာ ရှုထောင့်အရဆိုလျှင်လည်း ဘုရားသခင်အိမ်တော်သို့ တက်သည်ဟု သုံးလျှင် ပိုမိုသင့်လျှော်ပါသည်။

၁၃။ (၉:၅−၁၅) H.A.Ironside ” Notes on the Book of Ezra ” in Notes on Ezra, Nehemiah and Esther,p.90.

***********************

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။