Ezekiel -34 -

ယေဇကျေလအနာဂတ္တိကျမ်း - ၃၄

သိုးထိန်းအတုအယောင်များ

1တစ်ဖန် ထာဝရဘုရား၏ နှုတ်ကပတ်တော်သည် ငါ့ဆီသို့ရောက်လာ၍၊ 2အချင်းလူသား၊ သင်သည် ဣသရေလအမျိုး သိုးထိန်းတို့တစ်ဖက်၌ ပရောဖက်ပြု၍ ဟောပြောလျက်၊ သိုးထိန်းတို့အား အရှင်ထာဝရဘုရား မိန့်တော်မူသောစကားကိုဆင့်ဆိုရမည်မှာ၊ ကိုယ်ကိုသာ ကျွေးမွေးသော ဣသရေလအမျိုး သိုးထိန်းတို့သည် အမင်္ဂလာရှိကြ၏။ သိုးထိန်းသည် သိုးတို့ကို မကျွေးမွေးရသလော။ 3သင်တို့သည် သိုးနို့ကို စားကြ၏။ သိုးမွေးကိုဝတ်ကြ၏။ ဆူဖြိုးသောသိုးတို့ကိုလည်း သတ်ကြ၏။ သို့ရာတွင်၊ သိုးတို့ကို မကျွေးမွေးပါတကား။ 4အားနည်းသောသိုးကို မ မစကြ၊ နာသောသိုးတို့ကို ဆေးမကုကြ၊ အရိုးကျိုးသောသိုးကို အဝတ်နှင့်မစည်းကြ၊ သူတစ်ပါးနှင်သော သိုးကို လိုက်၍မဆောင်ခဲ့ကြ၊ ပျောက်သောသိုးကို မရှာကြ၊ အနိုင်အထက်ပြု၍ ကြမ်းတမ်းစွာ စီရင်ကြပြီ။ 5ထိန်းသောသူမရှိသောကြောင့် သိုးတို့သည် ကွဲပြားကြ၏။ ကွဲပြားလျက်နေသောအခါ ခပ်သိမ်းသော တောသားရဲစားစရာ ဖြစ်ကြ၏။ 6ငါ့သိုးတို့သည် တောင်များ၊ မြင့်သောကုန်းများ အပေါ်မှာလဲ၍ မြေတစ်ပြင်လုံးတွင် အရပ်ရပ်သို့ ကွဲပြားပျံ့လွင့်လျက်နေ၍၊ အဘယ်သူမျှ မလိုက်မရှာကြ။ 7သို့ဖြစ်၍၊ အချင်းသိုးထိန်းတို့၊ ထာဝရဘုရား၏အမိန့်တော်ကို နားထောင်ကြလော့။ 8အရှင်ထာဝရဘုရား မိန့်တော်မူသည်ကား၊ ငါအသက်ရှင်သည်အတိုင်း၊ သိုးထိန်းမရှိ၊ အဘယ်သိုးထိန်းမျှ ငါ့သိုးတို့ကိုမရှာ၊ သိုးထိန်းတို့သည် ငါ့သိုးတို့ကို မကျွေးမွေး၊ ကိုယ်ကိုသာကျွေးမွေးသဖြင့်၊ ငါ့သိုးတို့သည် လုယူရာ၊ ခပ်သိမ်းသော တောသားရဲစားစရာ ဖြစ်သောကြောင့်၊ 9အချင်းသိုးထိန်းတို့၊ ထာဝရဘုရား၏အမိန့်တော်ကို နားထောင်ကြလော့။ 10အရှင်ထာဝရဘုရား မိန့်တော်မူသည်ကား၊ ငါသည်သိုးထိန်းတို့ တစ်ဖက်၌နေ၏။ ငါ့သိုးများကို သူတို့၌ငါတောင်း၍ သိုးထိန်းအရာကို နုတ်မည်။ သိုးထိန်းတို့သည် နောက်တစ်ဖန် ကိုယ်ကို မကျွေးမွေးရကြ။ ငါ့သိုးများကို သူတို့ပါးစပ်မှငါနုတ်၍ နောက်တစ်ဖန် မကိုက်မစားရကြ။

ကောင်းသောသိုးထိန်း

11အရှင်ထာဝရဘုရား မိန့်တော်မူသည်ကား၊ ငါသည်ကိုယ်တိုင်လိုက်၍ ငါ့သိုးတို့ကိုရှာမည်။ 12ကွဲပြားလျက်ရှိသော မိမိသိုးတို့တွင် သိုးထိန်းရောက်သောအခါ ကြိုးစား၍ရှာသကဲ့သို့၊ ငါသည်လည်း ငါ့သိုးတို့ကို ကြိုးစား၍ရှာမည်။ မိုးအုံ့၍ မိုက်သောနေ့၌ သူတို့ကွဲပြားသော အရပ်ရပ်တို့က ငါနုတ်ဆောင်မည်။ 13အတိုင်းတိုင်းအပြည်ပြည်တို့က ခေါ်ခဲ့၍ စုဝေးစေပြီးလျှင်၊ သူတို့နေရင်းပြည်သို့ ပို့ဆောင်မည်။ ဣသရေလတောင်တို့အပေါ်၊ မြစ်တို့အနား အစရှိသောနေစရာအရပ်ရပ်တို့၌ ကျွေးမွေးမည်။ 14ကောင်းသော ကျက်စားရာအရပ်၌ ကျွေးမွေးမည်။ မြင့်သော ဣသရေလတောင်တို့အပေါ်မှာ သူတို့ခြံရှိလိမ့်မည်။ သူတို့သည် ဣသရေလတောင်တို့အပေါ်မှာ ကောင်းသောခြံ၌အိပ်၍၊ ကြွယ်ဝသော ကျက်စားရာ၌ ကျက်စားကြလိမ့်မည်။ 15ငါသည် ငါ့သိုးများကို ကျွေးမွေးမည်။ အိပ်ရာကိုလည်း ငါပေးမည်။ 16ပျောက်သောသိုးကို ငါရှာမည်။ သူတစ်ပါးနှင်သောသိုးကို လိုက်၍ဆောင်ခဲ့မည်။ အရိုးကျိုးသော သိုးကို အဝတ်နှင့်စည်းမည်။ အားနည်းသော သိုးကို မစမည်။ ဆူဖြိုး၍ အားရှိသောသိုးကိုကား၊ တရားအတိုင်းကျွေးမွေး၍ ကွပ်မျက်မည်ဟု အရှင်ထာဝရဘုရား မိန့်တော်မူ၏။ 17အရှင်ထာဝရဘုရား မိန့်တော်မူသည်ကား၊ အို ငါ့သိုးတို့၊ တိရစ္ဆာန်အမျိုးမျိုးတို့ကိုလည်းကောင်း၊ သိုးထီးနှင့် ဆိတ်ထီးတို့ကိုလည်းကောင်း ငါပိုင်းခြားမည်။ 18သင်တို့သည် ကောင်းသော ကျက်စားရာအရပ်၌ စားသည်သာမက၊ ကျန်သောမြက်ပင်ကိုနင်းသော အမှုသည် သာမညအမှုဖြစ်သည်ဟု ထင်မှတ်ကြသလော။ ကြည်သောရေကိုသောက်သည်သာမက၊ ကျန်သောရေကို ခြေနှင့် နောက်စေသောအမှုသည် သာမညအမှုဖြစ်သည်ဟု ထင်မှတ်ကြသလော။ 19သင်တို့နင်းသော မြက်ပင်ကိုလည်းကောင်း၊ ခြေနှင့် နောက်စေသော ရေကိုလည်းကောင်း၊ ငါ့သိုးတို့သည် စားသောက်ရကြမည်လော။

20သို့ဖြစ်၍၊ ထိုသူတို့အား အရှင်ထာဝရဘုရားမိန့်တော်မူသည်ကား၊ ဆူဖြိုးသော တိရစ္ဆာန်တို့နှင့် ပိန်ကြုံသောတိရစ္ဆာန်တို့ကို ငါသည် ကိုယ်တိုင်ပိုင်းခြားမည်။ 21သင်တို့သည် အားနည်းသောသိုးတို့ကို အရပ်ရပ်သို့ ကွဲပြားစေခြင်းငှာ နံပါးနှင့်လည်းကောင်း၊ ပခုံးနှင့်လည်းကောင်းတိုး၍ ချိုနှင့်ခွေ့သောကြောင့်၊ 22ငါသည် ငါ့သိုးတို့ကို ကယ်တင်သဖြင့်၊ သူတို့သည် နောက်တစ်ဖန် လုယူရာမဖြစ်ရကြ။ တိရစ္ဆာန်အမျိုးမျိုးတို့ကိုလည်း ငါပိုင်းခြားမည်။ 23သိုးထိန်းတစ်ဦးကိုလည်း ငါခန့်ထား၍ သူသည် ကျွေးမွေးလိမ့်မည်။ ငါ၏ကျွန်ဒါဝိဒ်သည် သူတို့ကို ကျွေးမွေး၍ သိုးထိန်းလုပ်ရလိမ့်မည်။ 24ငါထာဝရဘုရားသည် သူတို့၏ဘုရားသခင် ဖြစ်မည်။ ငါ၏ကျွန်ဒါဝိဒ်သည်လည်း သူတို့၏မင်း ဖြစ်ရလိမ့်မည်။ ငါထာဝရဘုရား ပြောပြီ။ 25သူတို့နှင့် ငြိမ်သက်ခြင်းပဋိညာဉ်ကို ငါဖွဲ့၍၊ ဆိုးသောသားရဲတို့ကို ထိုပြည်၌ ပယ်ဖြတ်မည်။ သူတို့သည် လွင်ပြင်၌ ငြိမ်ဝပ်စွာနေ၍ တော၌ အိပ်ပျော်ကြလိမ့်မည်။ 26သူတို့ကိုလည်းကောင်း၊ ငါ၏တောင်တော်ပတ်လည်၌ ရှိသော အရပ်တို့ကိုလည်းကောင်း ငါကောင်းချီးပေး၍၊ အချိန်တန်လျှင် မိုးကိုရွာစေသဖြင့်၊ ကောင်းချီးမိုးရေကျရလိမ့်မည်။ 27တောသစ်ပင်သည် အသီးကို သီးလိမ့်မည်။ မြေသည်လည်း အသီးအနှံကို ပေးလိမ့်မည်။ ပြည်သားတို့သည် ငြိမ်ဝပ်စွာ နေရကြလိမ့်မည်။ သူတို့ထမ်းသော ထမ်းပိုးကြိုးကို ငါဖြတ်၍၊ အနိုင်အထက်စေခိုင်းသော သူတို့လက်မှ ကယ်နုတ်သောအခါ၊ ငါသည် ထာဝရဘုရားဖြစ်ကြောင်းကို သိရကြလိမ့်မည်။ 28နောက်တစ်ဖန် တစ်ပါးအမျိုးသားတို့သည် မလုမယူရကြ။ ပြည်သားရဲတို့သည်လည်း ကိုက်၍မစားရကြ။ အဘယ်သူမျှ မကြောက်စေဘဲ၊ သူတို့သည် ငြိမ်ဝပ်စွာ နေရကြလိမ့်မည်။ 29အသရေရှိသောဥယျာဉ်ကိုလည်း သူတို့အဖို့ ငါပြုစုမည်။ နောက်တစ်ဖန် ပြည်၌ အစာအာဟာရ ခေါင်းပါး၍၊ သူတို့သည် မွတ်သိပ်ခြင်းကို မခံရကြ။ တစ်ပါးအမျိုးသားတို့၏ကဲ့ရဲ့ခြင်းကိုလည်း မခံရကြ။ 30သူတို့၏ဘုရားသခင် ငါထာဝရဘုရားသည် သူတို့နှင့်အတူ ရှိကြောင်းကိုလည်းကောင်း၊ ဣသရေလအမျိုးသား တည်းဟူသော သူတို့သည် ငါ၏လူဖြစ်ကြောင်းကိုလည်းကောင်း သိရကြလိမ့်မည်ဟု အရှင်ထာဝရဘုရား မိန့်တော်မူ၏။ 31ငါ၏ကျက်စားရာအရပ်၌ရှိသော ငါ့သိုးတို့၊ သင်တို့သည် လူဖြစ်ကြ၏။ ငါသည်လည်း သင်တို့၏ဘုရားသခင် ဖြစ်သည်ဟု အရှင်ထာဝရဘုရား မိန့်တော်မူ၏။

ယေဇကျေလအနာဂတ္တိကျမ်း - ၃၄ (အနက်ဖွင့်)

(ခ) အငှါးသိုးထိန်းနှင့်သိုးထိန်းကောင်း (အခန်း ၃၄)

၃၄:၁−၆ သိုးထိန်းများ(အုပ်စိုးသူအစိုးရ)သည် သိုးများကို (ပြည်သူလူထု)၏ အရေးအရာကို အမှန်တကယ်စိတ်ဝင်စားလေဟန်နှင့် မိမိတို့ကိုယ်ကျိုးစီးပွားကိုသာ ရှေးရှုသူများ ဖြစ်သည်။ ရက်စက်ကြမ်းကြုတ်စွာ စီမံအုပ်ချုပ်ကြသဖြင့် သိုးများပြန့်ကြဲ ကွဲလွင့်ကြသည်။

ယနေ့ခေတ်ကာလတွင်လည်း ဘာသာရေးခေါင်းဆောင်များသည် သိုးများထိန်းကျောင်းကျွေးမွေးမည့် နည်းလမ်းကောင်းသင်ယူလိုစိတ်မရှိကြပါ။ အကျိုးအမြတ်ရရှိမည့်နည်းလမ်းကိုသာ ရှာကြံကြသည်။ သိုးများကို အလုပ်အကျွေးပြုလိုသော၊ သိုးအုပ်အတွက်နမူနာ ကောင်းပြသနိုင်သော သိုးထိန်းကောင်းရရှိဖို့ရန် ဘုရားသခင်ထံ အမြဲတန်းဆုတောင်း ကျေးဇူးတော်ချီးမွမ်းရမည်။

ဘုရားသခင်းသည် သိုးအုပ်ကို သာ၍ ဆိုးရွားစွာမပျက်စီးစေဖို့ ဦးစွာ ကွဲလွင့်ပြန့်ကြဲစေရန် အခွင့်ပေးခြင်း ဖြစ်သည်(ငယ် ၁၀)။ ထိုအကြောင်းကို Yates ကဤသို့ ရှင်းပြထားသည်။

ယေဇကျေလလက်ထက်၌ မှားယွင်းသောဓမ္မဆရာများ၏ ကြေကွဲဖွယ်ဖြစ်ရပ် ရုပ်ပုံလွှာကို ချယ်မှုန်း ရေးဖွဲ့ထားသည်။ တာဝန်မဲ့သိုးထိန်းများက သူတို့ကိုယ်ကျိုးစီးပွားကို ဖူးဖူးမှုတ် အလေးထားရှာနေစဉ် သိုးများမှာ ထိန်းကွပ်သူကင်းမဲ့ ဆာလောင်မွတ်သိပ်စွာဖြင့် ပြန့်ကြဲကွဲလွင့် ကုန်ကြသည်။ သူတို့၏ စားဝတ်နေရေး ပြေလည်ဖို့ သူတို့ကိုယ်တိုင် အရေးထားရှာဖွေနေရသော်လည်း ပျင်းကြောဆွဲ ဇိမ်ယစ်နေသော သိုးထိန်းတို့က သူတို့အတွက် တစ်မိနစ်မျှ အချိန်ပေး စဉ်းစားလိုခြင်း မရှိကြပေ။၂၉

၃၄:၇−၁၀ ထို့ကြောင့် ဘုရားသခင်သည် သိုးထိန်းများအား ထိုအငှါးသိုးထိန်းများလက်ထဲမှ ကယ်နုတ်ရန်ဆန္ဒရှိခဲ့သည်။ သိုးများကို ပြန်လည်စုသိမ်း၍ သိုးတစ်ကောင်ချင်း၏ လိုအပ်ချက်များဖြည့်ဆည်းပေးခြင်းဖြင့် ကောင်းချီးပေးလိုသည်။ အကြီးမြတ်ဆုံးကောင်းချီးမင်္ဂလာမှာ ဘုရားသခင်နှင့် သိုးများ ပြန်လည်ပေါင်းစည်းခြင်းတည်းဟူသော ဘုရားနှင့်လူ ကျွမ်းဝင်သော မိတ်သဟာယ ဖွဲ့ခြင်းဖြစ်သည်။

၃၄:၁၁−၁၆ ဘုရားသခင်ကိုယ်တော်တိုင် သူတို့ သိုးထိန်းဖြစ်မည်။ သိုးများကို ကတိတော်မြေသို့စုစည်းကာ၊ သူတို့အပေါ် (နှစ်တစ်ထောင်ကာလ၌) အုပ်စိုးမည်။ ဘုရားသခင်က သိုးများအုပ်စိုးမည့်အကြောင်းကို ဆရာကြီး D. L. Moody က ဤသို့ရှင်းပြသည်။

ငါ(ပြု)မည် ဆိုသည်မှာ သိုးများကိုယ်စား ဘုရားသခင်ပြုမည့်အရာဖြစ်ကြောင်း သတိပြုပါ။

သိုးထိန်းနှင့်သိုးများ

ငယ် ၁၁။ ငါသည်….ငါသိုးတို့ကိုရှာမည်။

ငယ် ၁၂။ ငါသည်… နှုတ်ဆောင်မည်။

ငယ် ၁၃။ ငါသည်… ခေါ်ခဲ့၍….။

ငယ် ၁၃။သူတို့ကို စုစည်းစေပြီးလျှင်…။

ငယ် ၁၃။ …… နေရင်းပြည်သို့ ပို့ဆောင်မည်။

ငယ် ၁၄။ သူတို့ကို… ကျွေးမွေးမည်။

ငယ် ၁၅။ သူတို့ကို…အိပ်ယာပေးမည်။

ငယ် ၁၆။ အရိုးကျိုးသော သိုးကို အဝတ်စည်းပေးမည်။

ငယ် ၁၆။ အားနည်းသောသိုးကို မစမည်။

သိုးတို့သည် ဘုရားသခင်၏ ကောင်းသော သိုးခြံ၌ လဲလျောင်းအိပ်စက်ရသော်လည်း၊ ဘုရားသခင်၏ စားကျက်မြက်ခင်း၌ တစ်ကောင်မျှမရှိကြ။ ၃၀

အချို့ဆရာများက ဓမ္မဟောင်းကာလ ဘုရားသခင်သည် အကြင်နာကင်းမဲ့၍ ကြမ်းကြုတ်သည်။ ဓမ္မသစ် ကာလဘုရားသခင်နှင့် ဆန့်ကျင်ဘက် ဖြစ်သည်ဟု အဓွန့်တက်ကြသည်။၃၁ John Taylor က ဓမ္မဟောင်းသိုးထိန်းနှင့် ဓမ္မသစ်သိုးထိန်း အကြောင်းကို ဤသို့လှပစွာ သွယ်ယှက်ရှင်းပြသည်။

အပိုဒ်ငယ် ၁၂ တွင် သိုးထိန်းက လမ်းပျောက်သော သိုးကို လိုက်လံရှာဖွေခြင်းမြင်ကွင်းမှာ လု ၁၅:၄ ၌ ပျောက်သောသိုးကို လိုက်လံရှာဖွေခြင်း ပုံဥပမာ၏ ရှေ့ပြေးအရိပ်ဖြစ်သည်။ ခရစ်တော်က ယေဇကျေလလမ်းကို အခြေပြုခြင်းဖြစ်သည်မှာ သံသယရှင်းသည်။ ဤအချက်က ဓမ္မဟောင်းကာလ ဘုရားသခင်သည် နူးညံ့သိမ်မွေ့၍ အကြင်နာတရားပြည့်ဝသော ဘုရားဖြစ်ကြောင်းထင်ရှားသည်။ ဣသရေလတို့၏ ယာဝေးဘုရားနှင့် ဓမ္မသစ်ကာလ သခင်ယေရှုခရစ်၏ အဖခမည်းတော် ဘုရားသခင်ကြား သွေးခွဲသပ်လျှိုမှုကိုလည်း လွင့်စင်ပပျောက်စေသည်။ နူးညံ့ကြင်နာတတ်သော သိုးထိန်းအကြောင်းကို အခြားကျမ်းများတွင်လည်း ဖော်ပြပြောဆိုထားပါသည် (ဆာ ၇၈:၅၂။ ၇၉:၁၃။ ၈၀:၁။ ဟေရှာ ၄၀:၁၁ ၄၉:၉။ ယေ ၃၁:၁၀ တို့ကို ဖတ်ပါ)၃၂

၃၄:၁၇−၂၄ အတ္တလွန်ကဲ၍ ကြမ်းကြုတ်သော သိုးထိန်းများလက်ထဲမှ သိုးများကို ဘုရားသခင်ကယ်နုတ်မည်။ အငယ် ၂၃ နှင့် ၂၄ တွင်ပါရှိသော “ငါ၏ကျွန်ဒါဝိဒ်” သည် ဒါဝိဒ် အမျိုးမှဆင်းသက်လာသော သခင်ယေရှုကိုရည်ညွှန်းသည်။ ဟေဗြဲယုံကြည်သူ David Baron က ဤသို့ရှင်းပြထားသည်။

ယုဒလူမျိုးများ နားလည်စေရန် မေရှိယသခင်အား ဒါဝိဒ်မျိုးနွယ်ထဲမှ အကြီးမြတ်ဆုံးသော သားတော်ဟုဖော်ပြညွှန်း အသုံးပြုထားသည်။ ဒါဝိဒ်မျိုးနွယ်သို့ပြုထားသော ကတိတော်ကို ဗဟိုပြုခြင်းဖြစ်သည်။ ထို့ကြောင့် Kimehi ၏ ယေဇကျေလအနက်ဖွင့်ကျမ်း ၃၄:၂၄ တွင် “ငါ၏ကျွန်ဒါဝိဒ်−အမျိုးမှ မေရှိယပေါ်ထွန်း၍ ထိုမျိုးစေ့အားဖြင့် ကယ်တင်ခြင်းရရှိစေမည်”ဟု ဆိုပါသည်။ ၃၇:၂၄ တွင်လည်း “မေရှိယသခင်−သူ၏နာမတော်ကိုဒါဝိဒ်ဟုလည်း ခေါ်ဆိုကြမည်။ အကြောင်းဆိုသော်ဒါဝိဒ်၏ မျိုးဆက်မှ မွေးဖွားပေါ်ထွန်းသူ ဖြစ်သည်”ဆိုသည်။ ယုဒအစဉ်အလာအရလည်း လက်တွေ့ကျသည်။၃၃

၃၄:၂၅−၃၁ ဘုရားသခင်၏ သိုးများအနာဂတ် ဘဝလုံခြုံရေးနှင့် ကြွယ်ဝချမ်းသာခြင်းအကြောင်းဖော်ပြထားသည်။ ငြိမ်သက်ခြင်းပဋိညာဉ် (ငယ် ၂၅) ကောင်းချီးမင်္ဂလာ ခံစားကြရမည်(ငယ် ၂၆)။အသရေရှိသော ဥယျာဉ်ဖြစ်စေမည် (ငယ် ၂၉)။ ခရစ်တော်ကိုယ်တိုင် တစ်ပါးတည်းသော ဘုရင်အဖြစ် အုပ်စိုးမည်။ စံပြနမူနာယူရသော အုပ်စိုးသူမင်းဖြစ်မည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။