Ezekiel -3 -

ယေဇကျေလအနာဂတ္တိကျမ်း - ၃

1တစ်ဖန်၊ အချင်းလူသား၊ သင်တွေ့သောအရာကို စားလော့။ ဤစာလိပ်ကို စားပြီးလျှင်၊ ဣသရေလအမျိုးသားတို့ရှိရာသို့ သွား၍ ဟောပြောလော့ဟု မိန့်တော်မူသည်အတိုင်း၊ 2ငါသည် ပါးစပ်ကိုဖွင့်စဉ် ထိုစာလိပ်ကို ခွံ့တော်မူလျက်၊ 3အချင်းလူသား၊ ငါပေးသော ဤစာလိပ်ကို စား၍ ဝမ်းပြည့်စေလော့ဟု မိန့်တော်မူသည်အတိုင်း၊ ငါသည်စား၍ ပါးစပ်၌ပျားရည်ကဲ့သို့ ချို၏။

4တစ်ဖန်၊ အချင်းလူသား၊ ဣသရေလအမျိုးသားတို့ရှိရာသို့သွား၍ ငါ့စကားကို ဟောပြောလော့။ 5သင်မသိမကျွမ်း၊ နားလည်ခဲသော စကားကို ပြောတတ်သော လူမျိုးရှိရာသို့ သင့်ကို ငါစေလွှတ်သည် မဟုတ်။ ဣသရေလ အမျိုးရှိရာသို့ စေလွှတ်၏။ 6သင်မသိမကျွမ်း၊ နားလည်ခဲသောစကား၊ အလျှင်းနားမလည်နိုင်သော စကားကို ပြောတတ်သော လူအမျိုးမျိုးတို့ ရှိရာသို့ စေလွှတ်သည်မဟုတ်။ အကယ်၍ ထိုသို့သော သူတို့ရှိရာသို့စေလွှတ်လျှင်၊ သင့်စကားကို နားထောင်ကြလိမ့်မည်။ 7ဣသရေလအမျိုးတို့မူကား၊ သင့်စကားကို နားမထောင်ကြ။ ငါ့စကားကိုပင် နားမထောင်ကြ။ ဣသရေလအမျိုးသားအပေါင်းတို့သည် ခိုင်မာသော နဖူးနှင့် ခိုင်မာသော နှလုံးရှိကြ၏။ 8သို့ရာတွင်၊ သူတို့မျက်နှာတစ်ဖက်၌ သင်၏မျက်နှာကိုလည်းကောင်း၊ သူတို့နဖူးတစ်ဖက်၌ သင်၏နဖူးကိုလည်းကောင်း ငါခိုင်ခံ့စေပြီ။ 9သင်၏နဖူးကို ကျောက်ထက်မက၊ စိန်ထက်သာ၍ ခိုင်မာစေပြီ။ သူတို့သည် ပုန်ကန်တတ်သော အမျိုးဖြစ်၍၊ သင်သည် မကြောက်နှင့်။ သူတို့မျက်နှာရည်ကြောင့် စိတ်မပျက်နှင့်ဟု မိန့်တော်မူ၏။

10တစ်ဖန်၊ အချင်းလူသား၊ သင့်အားငါပြောလတ္တံ့သမျှသောစကားတို့ကို နားထောင်၍ နှလုံးသွင်းလော့။ 11သိမ်းသွားခြင်းကို ခံရသော သင်၏အမျိုးသားချင်းတို့ ရှိရာသို့သွား၍၊ အရှင်ထာဝရဘုရားမိန့်တော်မူသည်ဟု၊ သူတို့နားထောင်သည် ဖြစ်စေ၊ နားမထောင်သည် ဖြစ်စေ၊ ဟောပြောလော့ဟု မိန့်တော်မူ၏။

ခေဗာမြစ်နားမှယေဇကျေလ

12ထိုအခါ ဝိညာဉ်တော်သည် ငါ့ကိုချီ၍၊ ထာဝရဘုရားကျိန်းဝပ်တော်မူရာ အရပ်မှ ဘုန်းတော်သည် မင်္ဂလာရှိစေသတည်းဟု၊ ငါ့နောက်၌ ကြီးစွာသော လှုပ်ရှားခြင်းအသံကို ငါကြား၏။ 13တစ်ခုနှင့် တစ်ခု စပ်လျက်ရှိသော သတ္တဝါတို့၏အတောင်များ မြည်သံကိုလည်းကောင်း၊ သူတို့အနားမှာ ဘီးများမြည်သံကိုလည်းကောင်း၊ ကြီးစွာသော လှုပ်ရှားခြင်းအသံကိုလည်းကောင်း ငါကြားရ၏။ 14ဝိညာဉ်တော်သည် ငါ့ကိုချီသွားတော်မူ၍၊ ငါသည်ခါးသောစိတ်၊ ပူပန်သောစိတ်နှင့် လိုက်ရ၏။ ထာဝရဘုရား၏လက်တော်သည် ငါ့အပေါ်မှာ လေးလံစွာတင်လျက်ရှိ၏။ 15သိမ်းသွားခြင်းကိုခံရ၍၊ ခေဗာမြစ်နား၊ တေလဗိဗရွာမှာ နေရာကျသော သူတို့ရှိရာသို့ ငါရောက်၍၊ သူတို့နေရာအရပ်၌ ခုနစ်ရက်ပတ်လုံး မိန်းမောတွေဝေလျက်နေ၏။

ကင်းစောင့်အရာ၌ခန့်ထားခြင်း

(ယေဇ၊ ၃၃:၁-၉)

16ခုနစ်ရက်လွန်မှ ထာဝရဘုရား၏နှုတ်ကပတ်တော်သည် ငါ့ဆီသို့ ရောက်လာ၍၊ 17အချင်းလူသား၊ သင့်ကို ဣသရေလအမျိုးတွင် ကင်းစောင့်အရာ၌ ငါခန့်ထားသောကြောင့်၊ ငါသတိပေးသော စကားကိုနားထောင်၍ သူတို့အား ဆင့်ဆိုလော့။ 18သင်သည် အမှန်သေလိမ့်မည်ဟု၊ လူဆိုးအား ငါပြောလျက်နှင့် သင်သည် သတိမပေး၊ လူဆိုး၏ အသက်ကို ချမ်းသာစေခြင်းငှာ၊ လူဆိုးအား သတိပေးသောစကားကို မပြောဘဲနေလျှင် ထိုလူဆိုးသည် မိမိအပြစ်၌ သေလိမ့်မည်။ သူ၏အသက်ကိုကား၊ သင်၌ငါတောင်းမည်။ 19သို့မဟုတ်၊ သင်သည် လူဆိုးကို သတိပေးလျက်နှင့် သူသည် မိမိပြုသော ဒုစရိုက်ကိုလည်းကောင်း၊ မိမိလိုက်သော အဓမ္မလမ်းကိုလည်းကောင်း မရှောင်ဘဲနေလျှင်၊ မိမိအပြစ်၌ သေလိမ့်မည်။ သင်မူကား၊ ကိုယ်အသက်ဝိညာဉ်ကို ကယ်နုတ်လေပြီ။ 20တစ်ဖန်တုံ၊ ဖြောင့်မတ်သောသူသည် ဖောက်ပြန်၍ ဒုစရိုက်ကိုပြုလျှင်လည်းကောင်း၊ ထိမိ၍ လဲစရာအကြောင်းကို သူ့ရှေ့မှာ ငါထားလျှင်လည်းကောင်း သူသည် သေလိမ့်မည်။ သင်သည် သတိမပေးသောကြောင့်၊ သူသည် မိမိအပြစ်၌ သေလိမ့်မည်။ သူကျင့်ဖူးသော တရားကို ပမာဏမပြုရ။ သူ၏အသက်ကိုကား၊ သင်၌ငါတောင်းမည်။ 21သို့မဟုတ်၊ ဖြောင့်မတ်သောသူသည် ဒုစရိုက်ကို မပြုမည်အကြောင်း၊ သင်သည်သတိပေး၍ သူသည် ဒုစရိုက်ကို မပြုဘဲနေလျှင်၊ သတိပေးသော ကျေးဇူးကြောင့် စင်စစ် အသက်ချမ်းသာလိမ့်မည်။ သင်သည်လည်း၊ ကိုယ်အသက်ဝိညာဉ်ကို ကယ်နုတ်လေပြီဟု မိန့်တော်မူ၏။

စကားအသောယေဇကျေလ

22တစ်ဖန် ထာဝရဘုရား၏လက်တော်သည် ငါ့အပေါ်မှာတင်ပြီးလျှင်၊ သင်ထ၍ လွင်ပြင်သို့ သွားလော့။ ထိုအရပ်၌ ငါပြောမည်ဟု မိန့်တော်မူသည်အတိုင်း၊ 23ငါသည် ထ၍ လွင်ပြင်သို့သွား၏။ ရောက်သောအခါခေဗာမြစ်နားမှာ ငါမြင်ဖူးသော ထာဝရဘုရား၏ဘုန်းတော်သည် ရပ်တော်မူ၍၊ ငါသည် ပျပ်ဝပ်လျက်နေ၏။ 24ဝိညာဉ်တော်သည် ငါ့အထဲသို့ဝင်၍ မတ်တတ်နေစေလျက်၊ သင်သွားလော့။ ကိုယ်အိမ်၌ ပုန်းရှောင်၍ နေလော့။ 25အချင်းလူသား၊ သင်သည် ကြိုးနှင့်ချည်နှောင်ခြင်းကိုခံ၍ သူတို့တွင် မထွက်ရ။ 26သင်သည် သူတို့ကို မဆုံးမဘဲနေစေခြင်းငှာ၊ စကားအလျက် သင့်လျှာကို အာခေါင်၌ ကပ်စေမည်။ အကြောင်းမူကား၊ သူတို့သည် ပုန်ကန်တတ်သောအမျိုးဖြစ်ကြ၏။ 27သို့ရာတွင် သင့်အားငါပြောသောအခါ သင့်နှုတ်ကို ငါဖွင့်မည်။ သင်က၊ အရှင်ထာဝရဘုရားမိန့်တော်မူ၏ဟု သူတို့အား ဟောပြောရမည်။ နားထောင်သောသူသည် နားထောင်စေ၊ နားမထောင်သောသူသည် နားမထောင်ဘဲနေစေ။ သူတို့သည် ပုန်ကန်တတ်သောအမျိုးဖြစ်ကြသည်ဟု မိန့်တော်မူ၏။

ယေဇကျေလအနာဂတ္တိကျမ်း - ၃ (အနက်ဖွင့်)

၃:၁−၃ ယေဇကျေလကလည်း အမိန့်အတိုင်း စာလိပ်ကို ဝါးမြိုစားချလိုက် သည်။ ဗျာဒိတ်ကျမ်းစီရင်သူ တမန်တော်ယောဟန်သည်လည်း စာလိပ်ကို စားခဲ့ဖူးသည်(ဗျာ၊ ၁၀:၈−၁၀)။ ပရောဖက်နှင့် သွန်သင်သူတိုင်း နှုတ်ကပတ်တော်ကို မိမိဖြစ်ခြင်းထဲ စိမ့်ဝင်ပျံ့နှံ့အောင် နှလုံးသွင်းခြင်းကိုဆိုလိုသည်(၃:၁၀)။

(၃) လူ့သဘောသဘာဝ− ရိုင်းပျခြင်းနှင့် စိတ်နှလုံးမာကြောခြင်း (၃:၄−၁၁)

စိတ်နှလုံးမာကြောခက်ထန်၍ နာခံခြင်းမရှိ၊ မထုံတက်တေးလူမျိုးထံသို့ ယေဇကျေလအား စေလွှတ်မည်ဟု ထပ်မံအတည်ပြုသည်။ (ဤနေရာတွင် ယုဒလူမျိုးကို ဣသရေလဟုသုံးနှုန်းသည်)။ ဘာသာစကားအတားအဆီးကို ကျော်လွှားဖို့ မခက်ခဲပါ။ ကျော်လွှားဖို့ အခက်ခဲဆုံးမှာ မနာခံ၊ ပုန်ကန်တတ်သော စိတ်နှလုံးအတားအဆီးဖြစ်ကြောင်း သာသနာပြုဆရာများက ပြောလေ့ရှိပါသည်။ ယေဇကျေလသည် ထိုသို့ပုန်ကန် ခက်ထန်သည့် စိတ်နှလုံးရှိသော ဇာတိမြေမှယုဒလူများနှင့် ဖမ်းဆီးခံ ယုဒလူများထံ ဟောပြောရန်စေလွတ်ခြင်း ဖြစ်သည်။ ကြောက်ရွံ့ခြင်း မရှိရန် လိုအပ်သည်။

ဘုရားသခင်၏ စစ်မှန်သောအစေခံသည် တည်ကြည်ကြန့်ခိုင်သော စိတ်နှလုံးရှိရန် လိုအပ်သော်လည်း ခက်ထန်မာကြောသော စိတ်နှလုံးမရှိရပါ။

(၄) ပရောဖက်၏ အခန်းကဏ္ဍ − ကင်းစောင့်သူ (၃:၁၂−၂၁)

၃:၁၂−၁၅ ထို့နောက် ဘုရားသခင်သည် ယေဇကျေလအား ခေဗာမြစ်နားသို့ ဆောင်ကြဉ်းသွားပြီး ၇−ရက်ပတ်လုံး ငြိမ်သက်တိတ်ဆိတ်စွာ နေစေ၏။ ထိုအကြောင်းကို Kyle Yates က ဤသို့ဖော်ပြသည်။

ဘုရားသခင်က ယေဇကျေလအား သူ့နေအိမ်မှ ဖမ်းဆီးခံရသူများကို နေရာချထားသော တေလဗိရွာနားသို့ ခေါ်ဆောင်သောအခါ ငြင်းဆိုတင်းခံခြင်းငှါ မတတ်နိုင်တော့ဘဲ စိတ်နှလုံးမသာမယာလိုက်ရ၏။ ဘုရားသခင်ကစိတ်ရှုပ်ထွေးနောက်ကျိနေသော ဖမ်းဆီးခံ ယုဒလူတို့ထံ ချက်ချင်းနှုတ်ကပတ်တော် ထမပြောစေပါ။ ၇−ရက်ပတ်လုံး ငြိမ်ဆိတ်စွာ တွေးတော ဆင်ခြင်စေသည်။ ဖမ်းဆီးခံယုဒလူတို့၏ အခက်ခဲပြသနာများနှင့် မရှိမဖြစ် လိုအပ်သောအရာများနှင့် စိတ်ပျက်သိမ်ငယ်နေသော စိတ်ဓါတ်ရေးရာ အခြေအနေအမှန်ကို သိမြင်လာစေသည်။ ဓမ္မဆရာတစ်ဦးသည် အခန်းပြူတင်းမှတဆင့် မိမိလူတို့၏ ဘဝအသက်တာကို နားလည်အောင် ကြည့်ရှုလေ့လာနိုင်လျှင် သူတို့လိုအပ်ချက်များကို ဖြည့်ဆည်းပေးရင်း ကောင်းစွာ ဦးဆောင်နိုင်ပေလိမ့်မည်။၉

၃:၁၆−၂၁ ယေဇကျေလသည် ဘုရားသခင်၏ စကားတော်အား ကြားပြောသူ၊ အလိုတော်နှင့်မညီသည်များ မလုပ်မိအောင် သတိပေးသူ၊ ကင်းစောင့်သူ ဖြစ်သည်။ အသွေးနှင့်ဆိုင်သော ဒုစရိုက်အပြစ်များကို ဓမ္မဟောင်း(ငယ် ၁၈−၂၀)၌ သာမက ဓမ္မသစ်ကျမ်း သွန်သင်ချက်တွင်လည်း (တမန်၊၂၀:၂၆) တွေ့ရှိရသည်။ ဘုရားသခင်ထံတော်မှ သတင်းစကား သယ်ဆောင်ထားသူသည် အလွန်တာဝန်ကြီး လှပေသည်။ သို့သော် တွေ့လေရာကြုံသမျှ အလေနတော လိုက်လံဟောပြော အပ်သည်မဟုတ်။ ယေဇကျေလကို ဘုရားသခင်က နှုတ်ပိတ်ထားသည်။ ဘုရားသခင်လမ်းဖွင့်ပေးသည့် အချိန်အခါနှင့် အခွင့်အရေးကို စောင့်စေသည်။ ယနေ့ယုံကြည်သူများသည်လညည်း သက်သေခံခြင်းအမှု၌ ဘုရားဦးဆောင်မှုကို အကင်းပါးစွာ နားစ္င့င်အပ်သည်။ တခါတရံ နှုတ်ဆိတ်နေဖို့ လိုသည်။ သို့သော်လည်း သက်သေခံရမည့် အချိန်၌ ရေငုံနှုတ်ပိတ်နေတတ်သူများစွာထဲ၌ မပါဝင်ဖို့လည်းလိုအပ်ပါသည်။

၂။ ယုဒတရားစီရင်ခြင်းနှင့် ယေရုရှလင်၏ သရုပ်သကန် (၃:၂၂−၂၄:၂၇)

(က) ကျရောက်လာမည့် စီရင်ခြင်းကို သရုပ်ဖော် မည့်အထောက်အကူ (၃:၂၂−၅:၁၇)

ပေတရုက ဘုရားသခင်အိမ်တော်သားများသည် စစ်ကြောစီရင်ခြင်း ဦးဆုံ:ခံရမည်ဟု ဆိုသည်(၁ပေ၄:၁၇)။ ထို့ကြေင့်ဘာသာ ရေ:ဗဟိုချက်မဖြစ်သည့် ယေရုရှလင် ဗိမာန်တော်မှ အစပြုပါမည်။

(၁) ဘုရားသခင်ခွင့်မပြုမချင်း ဆွံ့အဟန်ဆောင်စေခြင်း (၃:၂၂−၂၇)

ယေဇကျေလသည် ဘုရားသခင်စေခိုင်းတော်မူသည့်အတိုင်း ခေဗာမြစ်အနီး လွင်ပြင်သို့ ဦးစွာ သွားသည်။ ထို့နောက်ဝိညာဉ်တော်သည် ယေဇကျေလထဲ သို့ဝင်၍ စကားဆွံ့အလျက် မိမိအိမ်၌သာ အနှောင်အဖွဲ ခံရသည့်အလား ပုန်းအောင်း နေစေသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။