Ezekiel -2 -

ယေဇကျေလအနာဂတ္တိကျမ်း - ၂

ယေဇကျေလကိုခေါ်ခြင်း

1ထိုဗျာဒိတ်ရူပါရုံကို ငါသည်မြင်သောအခါ ပျပ်ဝပ်လျက်နေ၏။ တစ်ဦးသောသူကလည်း၊ အချင်းလူသား၊ မတ်တတ်နေလော့။ သင့်အား ငါပြောမည်ဟု ငါ့အားဆိုသံကို ငါကြား၏။ 2ထိုသို့ဆိုသောအခါ ဝိညာဉ်တော်သည် ငါ့အထဲသို့ဝင်၍ မတ်တတ်နေစေသဖြင့်၊ ငါနှင့်ပြောသောသူ၏ စကားကို ငါကြားသည်ကား၊ 3အချင်းလူသား၊ ငါ့ကိုပုန်ကန်တတ်သော အမျိုးတည်းဟူသော၊ ယနေ့တိုင်အောင် ဘိုးဘေးတို့နှင့်တကွ ငါတို့အစဉ်ပုန်ကန်၍၊ ပြစ်မှားသော ဣသရေလအမျိုးသားတို့ ရှိရာသို့ သင့်ကိုငါစေလွှတ်မည်။ 4ရဲသောမျက်နှာနှင့် ခိုင်မာသော နှလုံးရှိသော အမျိုးသားတို့ရှိရာသို့ သင့်ကို ငါစေလွှတ်၍၊ သင်က၊ အရှင်ထာဝရဘုရား မိန့်တော်မူသည်ဟု သူတို့အားပြောရမည်။ 5သူတို့သည် ပုန်ကန်တတ်သောအမျိုးဖြစ်၍၊ နားထောင်သည်ဖြစ်စေ၊ နားမထောင်သည်ဖြစ်စေ၊ မိမိတို့တွင် ပရောဖက်ရှိသည်ကို သိရကြမည်။ 6အချင်းလူသား၊ သင်သည် ဆူးပင်အမျိုးမျိုးနှင့် တွေ့၍၊ ကင်းမြီးကောက်တို့တွင် နေရသော်လည်း သူတို့ကို မကြောက်နှင့်။ သူတို့စကားကိုလည်း မကြောက်နှင့်။ သူတို့သည် ပုန်ကန်တတ်သော အမျိုးဖြစ်၍၊ သူတို့စကားကို မကြောက်နှင့်။ သူတို့ မျက်နှာရည်ကြောင့် စိတ်မပျက်နှင့်။ 7သူတို့သည် အလွန်ပုန်ကန်တတ်သောသဘောရှိသည်ဖြစ်၍၊ နားထောင်သည်ဖြစ်စေ၊ နားမထောင်သည် ဖြစ်စေ၊ ငါ့စကားကို သူတို့အား ဟောပြောရမည်။ 8အချင်းလူသား၊ ငါပြောသောစကားကို နားထောင်လော့။ ထိုပုန်ကန်တတ်သော အမျိုးကဲ့သို့ ပုန်ကန်သောသဘော မရှိနှင့်။ သင့်ပါးစပ်ကို ဖွင့်၍ ငါပေးသောအရာကို စားလော့ဟု မိန့်တော်မူလျှင်၊ 9ငါကြည့်၍ စာလိပ်ပါသောလက်သည် ငါ့ဆီသို့ ဆန့်လျက်ရှိ၏။ 10ထိုစာလိပ်ကို ငါ့ရှေ့မှာဖွင့်ဖြန့်သောအခါ၊ တစ်ဖက်တစ်ချက်၌အက္ခရာတင်၍ ငိုကြွေးမြည်တမ်းခြင်းအချက်၊ စိတ်မသာညည်းတွားခြင်း အချက်၊ အမင်္ဂလာအချက်များ ပါသတည်း။

ယေဇကျေလအနာဂတ္တိကျမ်း - ၂ (အနက်ဖွင့်)

(ဂ) ဣသရေလလူမျိုးသို့ ပရောဖက်ပြုရန် ခန့်အပ်ခြင်း (၁:၂၈−၃:၂၁)

(၁) လူများ၏အကျင့်လက္ခဏာ− ပုန်ကန်ခြင်း (၁:၂၈−၂:၇)

ယေဇကျေလသည် ပြပ်ဝပ်နေစဉ် ဝိညာဉ်တော်က သူ့ထဲဝင်၍ မတ်တပ်ရပ်စေသည် ထိုနောက် ပုန်ကန်၍ ထောင်လွှားသော ယုဒအမျိုးသို့ ပရောဖက်ပြုရန်စေလွှတ်သည်။ ယေဇကျေလအား ကြောက်ရွံ့စိတ်ကင်း၍ ယုံကြည််စိတ်ချစွာနာခံရန်မှာကြားသည်။

ဘုရားသခင်က ယေဇကျေလကို “အချင်းလူသား”၆ဟုခေါ်သည်။ ဤဝေါဟာရကို ယေဇကျေကျမ်းတွင် ၉၉−ကြိမ်တိတိ သုံးထားသဖြင့် အရေးကြီးသည်။ ထူးခြားလေးနက်သည်။ ထိုအချက်ကို Taylor ဤသို့ရှင်းပြထားသည်။

“အချင်းလူသား“ဆိုသည့်စကားကို ယေဇကျေလအား ကြီးမြတ်ခန့်ငြားသောရူပါရုံကို ပြသစဉ် ဦးဆုံးသုံးနှုန်းခဲ့သည်။ “လူသား” ဟူသောဝေါဟာရသည် ဟေဗြဲဘာသာ၌ အထူးအသုံးအနှုန်း ဖြစ်သည်။ ၎င်းစကားအားဖြင့် ယေဇကျေလကို လူသားဇာတိ၌ သာရှိနေကြောင်း မိမိအဆင့်အနေအထားအား သတိရစေသည်။ “သား“ဆိုရာတွင် ဇာတိသဘောပါသည်။ “အာဒမ်“သို့မဟုတ်“လူ“ဟူသောစကားနှင့်တွဲလျှင် သာမန်လူထက် ပိုမိုထူးခြားလေးနက်မှု မရှိပါ။ ဗဟုကိန်းမှာ “လူသားများ” ဖြစ်သည်။၇

ဒံယေလခေတ် (၇:၁၃−၁၄)တွင် ဤဝေါဟာရကို မေရှိယသခင်နှင့်ဆက်စပ်၍ စတင်သုံးစွဲသည်။ အေဒီ ၁−ရာစုနှစ်သို့ရောက်သော် မေရှိယသခင်အား လုံးလုံးရည်ညွှန်းသော အသုံးအနှုန်း ဖြစ်လာသည်။

သခင်ယေရှုက ဤစကားလုံးကို ရွေးချယ်သုံးစွဲခြင်းမှာ ဒွိဟအကျိုးဆက် ထွက်ပေါ်စေလို၍ ဖြစ်သည်။ ထိုသို့ သုံးစွဲခြင်းဖြင့် ကိုယ်ကိုကိုယ် မေရှိယအဖြစ်ကျေညာသည်ဟု ဂျူးယဇ်ပုရောဟိတ်တို့က စွတ်စွဲခြင်းမှ ရှောင်လွဲနိုင်သည်။ ထို့ပြင် သခင်ယေရှု၏ ဇာတိတော်ပုဂ္ဂိုလ်ဖြစ်ခြင်းကို ဝိညာဉ်ရေးထိုးထွင်း သိမြင်နိုင်သူများအားလည်း ပိတ်ဆို့ငြင်းပယ်ခြင်း မရှိတော့ပေ။၈

(၂) သတင်းစကား၏ သဘာဝ − စာလိပ်ကဖွင့်ပြသော တရားစီရင်ခြင်း (၂:၈−၃:၃)

၂:၈−၁၀ လူမျိုးတော်အား တရားစီရင်မည့်အကြောင်း၊ ဝမ်းနည်းဖွယ်ရာမင်္ဂလာသတင်းစကား ရေးသားထားသည့် စာလိပ်ကို ယေဇကျေလအား စားခိုင်းသည်။

သူ၏ အမှုတော်ဆောင်ခြင်းမှာ လူကြိုက်များသော အလုပ်မဟုတ်ကြောင်း ကြိုတင်သတိပေးသည်။ ၎င်းမှာ စစ်မှန်သော ဧဝံဂေလိဟောပြောခြင်းသည် သူတို့အား ထိုးနှက်ခြင်းအဖြစ် ကယ်တင်ခြင်းမရသေးသောသူများက မှတ်ယူနိုင်ကြောင်း ကျွန်ုပ်တို့ကို သတိပေးချက်လည်း ဖြစ်သည်။ သို့သော် အချို့သူများအဖို့မူ ကျွန်ုပ်တို့သည် ကယ်တင်ရှင်များ ဖြစ်ကြသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။