Ezekiel -1 -

ယေဇကျေလအနာဂတ္တိကျမ်း - ၁

ဘုရားသခင်ကိုမြင်သောပထမဗျာဒိတ်

(၁:၁-၇:၂၇)

ဘုန်းတန်ခိုးဆိုင်ရာဗျာဒိတ်

1သက္ကရာဇ်သုံးဆယ်ပြည့်၊ ယေခေါနိမင်းကြီးနန်းကျ ပဉ္စမနှစ်၊ စတုတ္ထလငါးရက်နေ့၌ ငါသည် သိမ်းသွားသောသူတို့တွင် ခေဗာမြစ်နားမှာရှိနေစဉ်၊ 2မိုးကောင်းကင်ပွင့်၍ ဘုရားသခင်၏ ဗျာဒိတ်ရူပါရုံတို့ကိုမြင်ရ၏။ 3ထိုအခါ ခါလဒဲပြည်၊ ခေဗာမြစ်နားမှာ ထာဝရဘုရား၏နှုတ်ကပတ်တော်သည် ယဇ်ပုရောဟိတ် ဗုဇိသားယေဇကျေလ အမည်ရှိသော ငါဆီသို့ရောက်၍၊ ထာဝရဘုရား၏လက်တော်သည် ငါ့အပေါ်မှာ တင်လျက်ရှိ၏။

4ငါကြည့်ရှု၍၊ ပြင်းစွာသောလေ၊ ကြီးစွာသော မိုးတိမ်၊ ထွန်းလင်းသော မီးစက်သည် မြောက်မျက်နှာမှ ပေါ်လာ၏။ မီးစက်ထဲက ဟရှမေလရွှေရောင် ထွက်လေ၏။ 5ထိုမီးစက်ထဲမှာ သတ္တဝါလေးပါးတို့သည် ထင်ရှားကြ၏။ ထိုသတ္တဝါတို့၏ အဆင်းသဏ္ဌာန်ဟူမူကား၊ လူ၏ပုံသဏ္ဌာန်ကိုဆောင်၍၊ 6မျက်နှာလေးခုစီ၊ အတောင်လည်းလေးခုစီရှိကြ၏။ 7ခြေထောက်သည် ဖြောင့်သော ခြေထောက်ဖြစ်၏။ ခြေဖဝါးသည် နွားသငယ်၏ ခြေဖဝါးကဲ့သို့ ဖြစ်၍ ဦးသစ်သောကြေးဝါကဲ့သို့ တောက်လေ၏။ ကိုယ်လေးမျက်နှာ အတောင်အောက်၌ လူလက်ရှိ၏။ 8ထိုလေးပါးတို့သည် မျက်နှာတို့နှင့်လည်းကောင်း၊ အတောင်တို့နှင့်လည်းကောင်း ပြည့်စုံကြ၏။ 9အတောင်ချင်း တစ်ခုနှင့်တစ်ခု စပ်လျက်ရှိ၍၊ ထိုသတ္တဝါတို့သွားသောအခါ တစ်ပါးမျှမလည်ဘဲ တည့်တည့် သွားတတ်ကြ၏။ 10မျက်နှာအဆင်းသဏ္ဌာန်ဟူမူကား၊ သတ္တဝါ လေးပါးတို့သည် လက်ယာဘက်၌ လူမျက်နှာ၊ ခြင်္သေ့မျက်နှာနှင့် လည်းကောင်း၊ လက်ဝဲဘက်၌ နွားမျက်နှာ၊ ရွှေလင်းတမျက်နှာနှင့်လည်းကောင်း ပြည့်စုံကြ၏။ 11အတောင်များတို့သည် အထက်သို့ပြန့်၍၊ အတောင်နှစ်ခုချင်း စပ်လျက်၊ နှစ်ခုဖြင့် ကိုယ်ကိုဖုံးလျက်ရှိကြ၏။ 12ထိုသတ္တဝါတို့သည် ဝိညာဉ်တော်သွားခွင့်ရှိသည်အတိုင်း သွားကြ၏။ သွားသောအခါတစ်ပါးမျှမလည်ဘဲ တည့်တည့် သွားတတ်ကြ၏။ 13ထိုသတ္တဝါတို့၏ အဆင်းအရောင်သည်ကား၊ တောက်သော မီးခဲအရောင်၊ မီးခွက်အရောင်နှင့် တူ၏။ မီးသည်တောက်လျက် သတ္တဝါတို့တွင် အနှံ့အပြားလှည့်လည်၍ မီးထဲက လျှပ်စစ်ပြက်လေ၏။ 14သတ္တဝါတို့သည်လည်း လျှပ်စစ်နွယ်ကဲ့သို့ အရောင်တောက်၍၊ ပြေးလျက် ပြန်လာလျက် ရှိကြ၏။

15ထိုသတ္တဝါတို့ကို ငါ့ကြည့်ရှုစဉ်၊ သူတို့အနားမှာ လေးပိုင်းရှိသော ရထားဘီးတစ်ခုစီ ထင်ရှား၏။ 16ထိုရထားဘီးတို့၏ အဆင်းအရောင်သည်ကား၊ ကျောက်မျက်ရွဲ အဆင်းအရောင်နှင့် တူ၏။ ထိုလေးခုတို့သည် အဆင်းအရောင် တညီတည်းရှိကြ၏။ ပုံသဏ္ဌာန်မူကား၊ ဘီးတစ်ခုအထဲ၌ ဘီးတစ်ခုတပ်သကဲ့သို့ ဖြစ်၏။ 17သွားသောအခါ ဘီးလေးမျက်နှာတို့သည် တညီတည်းဖြစ်၍ မလည်ဘဲ သွားတတ်ကြ၏။ 18ဘီးဝန်းတို့သည်လည်း မြင့်၍ ကြောက်မက်ဖွယ်ဖြစ်ကြ၏။ ထိုလေးပါးတို့သည် မျက်စိနှင့်ပြည့်ကြ၏။ 19သတ္တဝါတို့သည် သွားသောအခါ၊ ဘီးတို့သည်လည်း ထက်ကြပ်ပါကြ၏။ 20သတ္တဝါတို့သည် မြေကြီးနှင့်ကွာ၍ တက်သောအခါ၊ ဘီးတို့သည်လည်း တက်ကြ၏။ ဝိညာဉ်တော်သွားခွင့်ရှိသည်အတိုင်း၊ သူတို့သည်လည်း သွားကြ၏။ ဘီးတို့သည်လည်း သူတို့နှင့် ထက်ကြပ်တက်၍ လိုက်ကြ၏။ သတ္တဝါတို့၏ဝိညာဉ်သည် ဘီးတို့၌ရှိ၏။ 21သူတို့သွားသောအခါ ဘီးတို့သည် သွားကြ၏။ သူတို့ရပ်သောအခါ ဘီးတို့သည် ရပ်ကြ၏။ သူတို့သည် မြေကြီးနှင့်ကွာ၍ တက်သောအခါ၊ ဘီးတို့သည်လည်း သူတို့နှင့် ထက်ကြပ်တက်၍ လိုက်ကြ၏။ အကြောင်းမူကား၊ သတ္တဝါတို့၏ ဝိညာဉ်သည် ဘီးတို့၌ရှိ၏။

22ထိုသတ္တဝါတို့၏ ခေါင်းများအပေါ်မှာ မိုးမျက်နှာကြက်၏ အဆင်းအရောင်သည်ရှိ၍၊ ကြောက်မက်ဖွယ်သော ကျောက်သလင်းမျက်နှာကြက်ကဲ့သို့ ဖြစ်၏။ 23မိုးမျက်နှာကြက်အောက်မှာ သူတို့အတောင်များသည် တစ်ခုသို့တစ်ခုတည့်တည့် ပြန့်လျက်ရှိ၍၊ ပြင်ဘက်၌လည်း ကိုယ်ကိုဖုံးစရာဖို့ အတောင်နှစ်ခုစီ ရှိ၏။ 24သူတို့သွားသောအခါ သမုဒ္ဒရာရေသံကဲ့သို့လည်းကောင်း၊ အနန္တတန်ခိုးရှင်၏ အသံတော်ကဲ့သို့လည်းကောင်း၊ အတောင်တို့ မြည်သောအသံကို ငါကြား၏။ စကားသံသည်လည်း လူအလုံးအရင်း၏စကားသံကဲ့သို့ဖြစ်၏။ ရပ်သောအခါ အတောင်တို့ကိုချလျက်နေကြ၏။ 25ရပ်၍အတောင်တို့ကို ချသောအခါ၊ သူတို့၏ ခေါင်းများအပေါ်မှာ မိုးမျက်နှာကြက်ထဲက စကားသံသည် ထွက်၏။

26သူတို့၏ခေါင်းများအထက်၊ မိုးမျက်နှာကြက်အပေါ်၌လည်း နီလာကျောက်ကဲ့သို့ အဆင်းအရောင်ရှိသော ရာဇပလ္လင်သဏ္ဌာန်ပေါ်၏။ ပလ္လင်သဏ္ဌာန်အပေါ်၌လည်း လူပုံသဏ္ဌာန်ကဲ့သို့ပေါ်၏။ 27ပလ္လင်အတွင်း၌လည်းကောင်း၊ ပတ်လည်၌လည်းကောင်း၊ ခါးသဏ္ဌာန်မှသည် အထက်ပိုင်း၌ ဟရှမေလရွှေအရောင်နှင့် မီးအရောင်ကဲ့သို့ ထင်ရှား၏။ အောက်ပိုင်း၌ မီးအရောင်ကဲ့သို့ ထင်ရှား၍ ပတ်လည်၌ ထွန်းတောက်လေ၏။ 28ထိုသို့ ထွန်းတောက်သော အရောင်သည် မိုးရွာသောနေ့တွင်၊ မိုးတိမ်၌ပေါ်သော သက်တံ၏ အရောင်ကဲ့သို့ ဖြစ်၏။ ဤရွေ့ကား၊ ထာဝရဘုရား၏ဘုန်းတော်သဏ္ဌာန် အဆင်းအရောင်ဖြစ်သတည်း။

ယေဇကျေလအနာဂတ္တိကျမ်း - ၁ (အနက်ဖွင့်)

၁။ ယေဇကျေလအား ဘုရားရှင်ကခေါ်ယူခွဲခန့်ခြင်း (၁:၁−၃:၂၁)

(က) ယေဇကျေလအခြေအနေ (၁:၁−၃)

ကျမ်းဖွင့်ဖွင့်ချင်းမှာပင် ယေဇကျေလသည် ဖမ်းဆီးခံ သုံ့ပန်းအကျဥ်းသားအဖြစ် တနယ်တကျေး ရောက်ရှိနေရသော်လည်း ဇာတိချက်ကြွေ ယေရုရှလင်မြို့ကြီး ပျက်သုဉ်းမည့်အကြောင်း ၆−နှစ်/၇−နှစ်ခန့် ကြိုတင်ပရောဖက်ပြုနိုင်ခဲ့သည်။ထိုစဉ်က ယေဇကျေလသည် (“သက္ကရာဇ်သုံးဆယ်ပြည့် “ စာသားအရ) အသက် ၃၀−ခန့် ဖြစ်လိမ့်မည်။ ကျမ်းစာစောင်ရှေ့ပိုင်း အခန်း ၂၄ ခုကို ယေရုရှလင်မြို့ မပျက်သုဉ်းမီ၊ ဗာဗုလုန်သို့ ပထမအကြိမ် ဖမ်းဆီးခါ်ဆောင်ခြင်းပြီး နောက်ပိုင်းကြားကာလ၌ ရေးသားခြင်းဖြစ်သည်။

(ခ)ပလ္လင်ပေါ်၌ ဘုန်းတော်ဖြင့်စံပယ်သော ဘုရားရှင်ရူပါရုံ (၁:၄−၂၇)

အခန်း(၁) သည် ဖမ်းဆီးကျွန်ဖြစ်ခံရသူများထံသို့ ဘုရားသခင်ထင်ရှားပြသည့် ရူပါရုံဖြစ်သည်။ ပထမဦးစွာ မြောက်ဘက်မှမိုးတိမ် ထွန်းလင်းသော မီးစက်ကြီးမြင်ရသည်။ ထိုမီးစက်ထဲတွင် မျက်နှာလေးဘက်စီ၊အတောင်လေးခုစီရှိသော သတ္တဝါလေးကောင် (ခြင်္သေ့၊ နွား၊ လင်းယုန်၊လူ) ၄တွေ့ရသည်။ အတောင်များအောက်တွင် ဖြောင့်တန်းသော ခြေထောက်များနှင့် လက်များရှိကြသည်။ ထိုသတ္တဝါများသည် ဘယ်ညာအလှည့်ဘဲ ရှေ့တည့်တည့်တူရူ သွားကြသည်။ ထိုသတ္တဝါများသည် ဘုရားသခင်၏ ဖန်ဆင်းခြင်း၊အံ့ဖွယ်တန်ခိုး၊လျှင်မြန်ခြင်းနှင့် ဉာဏ်ပညာတော်တို့ကို ဖော်ကျူးသည်။ တိုင်းနိုင့်ငံ၊ လူမျိုးတို့က တိမ်တိုက်အထက် ပလ္လင်တော်မှာ စံပယ်သောဘုရားရှင်ကို မေ့လျော့နေသည်။ ဖန်ဆင်းရှင် ဘုရားသခင်အစား ထိုဖန်ဆင်းခံ သတ္တဝါလေးပါးကို ဝတ်ပြုကိုးကွယ်ကြသည်။

မိုးတိမ်အထက် ပလ္လင်တော်အပေါ်၌ ဘုရားသခင်သည် ဘုန်းတော်ဖြင့် စံပယ်တော်မူသည်ကို မြင်၏။ သတ္တဝါလေးပါး၏ နံဘေးတွင်ရထားဘီး တစ်ခုစီရှိ၏။ ဘီးတစ်ခုစီအတွင်း၌ ကန့်လန့်ထောင့်ချိုး(ဟန်ချက်ညှိ) ဘီးတစ်ထပ် တပ်ထားဟန်ရှိ၏။ သတ္တဝါတို့၏ စိတ်ဝိညာဉ်သည် ဘီး၌ရှိ၏။ ထိုပလ္လင်ရထားကို သတ္တဝါလေးပါးက ဆွဲကြသည်။ ဘီးများသည်မြေကြီး…ပေါ်မှာရှိ၍ သတ္တဝါ လေးပါးကပြင်ညီတစ်ချက်ကို ထမ်းထားကြသည်။ ပြင်ညီပေါ်၌ ပလ္လင်တော်ရှိသည်။ ဤသည်ကား ပရောဖက်ပြုဖို့ရာ ဘုရားသခင်ကယေဇကျေလသို့ ဖော်ပြသော ဘုန်းရူပါရုံ ဖြစ်သည်။

ထိုရူပါရုံ ကျမ်းချက်က F. W. Faber အားခန့်ညားသော ဓမ္မတေးတစ်ပုဒ်သီဖွဲ့ရန် လှုံ့ဆော်ခဲ့သည်။

ယေဇကျေလက ၄၃:၃၌ “ငါမြင်သောရူပါရုံသည် မြို့တော်ကို ဖျက်ဆီးရန်လာသောအခါ၊ သူ၅…”(NKJV Marg) ဖြစ်သည်ဟု ရှင်းပြသည်။ တနည်းဆိုသော် ယေရုရှလင်မြို့ကို တရားစီရင်ရန် မြောက်ဖက်အရပ်မှ ဘုရားဘုန်းတော် ကြွလာခြင်းကို သရုပ်ဖော်ခြင်းဖြစ်သည်။ မြောက်အရပ်မှ ဗာဗုလုန်တို့သည် ဘုရားသခင်စေလွှတ်သော ကိုယ်စားလှယ်ဖြစ်သည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။