Ezekiel -18 -

ယေဇကျေလအနာဂတ္တိကျမ်း - ၁၈

ပြစ်မှားသောဝိညာဉ်သည်သေရမည်။

1တစ်ဖန် ထာဝရဘုရား၏နှုတ်ကပတ်တော်သည် ငါ့ဆီသို့ရောက်လာ၍၊ 2အဘတို့သည် ချဉ်သောစပျစ်သီးကိုစား၍ သားတို့သည် သွားကျိန်းလျက်ရှိကြ၏ဟု၊ သင်တို့သည် ဣသရေလပြည်ကိုရည်မှတ်၍ စကားပုံကိုသုံးသောအခါ အဘယ်သို့ဆိုလိုသနည်း။ 3အရှင်ထာဝရဘုရား မိန့်တော်မူသည်ကား၊ ငါအသက်ရှင်သည်အတိုင်း နောက်တစ်ဖန် ဣသရေလပြည်၌ ထိုစကားပုံကိုသုံးရသော အကြောင်းမရှိရ။ 4ဝိညာဉ်အပေါင်းတို့ကိုငါပိုင်၏။ အဘ၏ဝိညာဉ်ကို ငါပိုင်သကဲ့သို့ သား၏ဝိညာဉ်ကိုလည်း ငါပိုင်၏။ ပြစ်မှားသောဝိညာဉ်သည် အသက်သေရမည်။ 5လူမည်သည်ကား၊ သဘောဖြောင့်၍ တရားသောအမှု၊ ဟုတ်မှန်သောအမှုကို ပြုလျှင်လည်းကောင်း၊ 6တောင်ပေါ်မှာမစား၊ ဣသရေလအမျိုး ကိုးကွယ်သော ရုပ်တုတို့ကို မဖူးမမျှော်၊ သူ့မယားကို မပြစ်မှား၊ ဥတုရောက်သော မိန်းမကို မချဉ်းကပ်၊ 7အဘယ်သူကိုမျှ မညှဉ်းဆဲ၊ ကြွေးစားပေါင်ထားသောဥစ္စာကို ပြန်၍မပေးဘဲမနေ၊ သူ့ဥစ္စာကို အနိုင်အထက်မလုမယူ၊ ငတ်မွတ်သောသူကို ကျွေးမွေး၍၊ အဝတ်မရှိသောသူကို အဝတ်နှင့် ဖုံးလွှမ်းလျှင်လည်းကောင်း၊ 8အတိုးစား၍ ငွေကိုမချေး၊ အဓမ္မအမှုကို လက်မခံ၊ သူတစ်ပါးအမှုကို တရားသဖြင့်စီရင်ခြင်း၊ 9ငါစီရင်ထုံးဖွဲ့သည် အတိုင်းကျင့်၍ သစ္စာစောင့်ခြင်းကို ပြုလျှင်လည်းကောင်း၊ ထိုသူသည် ဖြောင့်မတ်သောသူဖြစ်၏။ အကယ်စင်စစ် အသက်ရှင်ရလိမ့်မည်ဟု အရှင်ထာဝရဘုရား မိန့်တော်မူ၏။

10သို့ရာတွင်၊ ထိုသူ၏သားသည် ဓားပြတိုက်သောသူ၊ လူအသက်ကို သတ်သောသူ၊ အရင်ဆိုခဲ့ပြီးသော ဒုစရိုက်တစ်စုံတစ်ခုကို ပြုသောသူ၊ 11အရင်ဆိုခဲ့ပြီးသော သုစရိုက်ကိုမပြု၊ တောင်ပေါ်မှာစားခြင်း၊ သူ့မယားကိုပြစ်မှားခြင်း၊ 12ဆင်းရဲငတ်မွတ်သောသူကို ညှဉ်းဆဲခြင်း၊ သူ့ဥစ္စာကို အနိုင်အထက်လုယူခြင်း၊ ပေါင်ထားသောဥစ္စာကို ပြန်၍မပေးဘဲနေခြင်း၊ ရုပ်တုကို ဖူးမျှော်ခြင်း၊ ရွံရှာဖွယ်သော အမှုကိုပြုခြင်း၊ 13အတိုးစား၍ငွေချေးခြင်းကိုပြုသော သူဖြစ်လျှင်၊ အသက်ရှင်ရမည်လော။ အသက်မရှင်ရ။ ထိုရွံရှာဖွယ်သောအမှုများကိုပြုသောကြောင့်၊ စင်စစ်အသေသတ်ခြင်းကိုခံရမည်။ သေထိုက်သောအပြစ်ရှိ၏။

14သို့ရာတွင်၊ ထိုသူ၏သားသည် အဘပြုသမျှသော ဒုစရိုက်တို့ကို မြင်၍ဆင်ခြင်သဖြင့်၊ ထိုသို့သော အမှုတို့ကိုမပြု၊ 15တောင်ပေါ်မှာမစား၊ ဣသရေလအမျိုးကိုးကွယ်သော ရုပ်တုတို့ကို မဖူးမမျှော်၊ သူ့မယားကိုမပြစ်မှား၊ 16အဘယ်သူကိုမျှ မညှဉ်းဆဲ၊ ပေါင်ထားသော ဥစ္စာကိုမသိမ်း၊ သူ့ဥစ္စာကို အနိုင်အထက်မလုမယူ၊ ငတ်မွတ်သောသူကို ကျွေးမွေးခြင်း၊ အဝတ်မရှိသောသူကို အဝတ်နှင့်ဖုံးလွှမ်းခြင်း၊ 17ဆင်းရဲသော သူကိုချမ်းသာပေးခြင်း၊ အတိုးမစားဘဲငွေချေးခြင်းကိုပြု၍ ငါစီရင်ထုံးဖွဲ့ချက်တို့ကို စောင့်ရှောက်လျှင်၊ ထိုသူသည် အဘ၏အပြစ်ကြောင့် အသေခံရမည်မဟုတ်။ စင်စစ်အသက်ရှင်ရလိမ့်မည်။ 18အဘမူကား၊ မိမိညီအစ်ကိုကို အထပ်ထပ်ညှဉ်းဆဲလျက်၊ သူ့ဥစ္စာကို အနိုင်အထက်လုယူလျက်၊ မိမိအမျိုးသားချင်းတို့တွင် မကောင်းသောအမှုကို ပြုသောအပြစ်ကြောင့်၊ အသေသတ်ခြင်းကို ခံရမည်။ 19သင်တို့ကလည်း၊ အဘယ်သို့နည်း။ သားသည် အဘ၏အပြစ်ကို မခံရသလောဟု မေးကြသော်၊ သားသည် တရားသောအမှု၊ ဟုတ်မှန်သောအမှုကိုပြု၍၊ ငါစီရင်ထုံးဖွဲ့သမျှအတိုင်း ကျင့်စောင့်လျှင်၊ စင်စစ် အသက်ရှင်ရလိမ့်မည်။ 20ပြစ်မှားသောသူသည် အသေခံရမည်။ သားသည် အဘ၏အပြစ်ကို မခံရ။ အဘသည် သား၏အပြစ်ကို မခံရ။ တရားသောသူသည် တရားစွာပြုခြင်း အကျိုးကိုလည်းကောင်း၊ မတရားသောသူသည် မတရားစွာပြုခြင်း အပြစ်ကိုလည်းကောင်း ခံရလိမ့်မည်။ 21သို့ရာတွင်၊ မတရားသောသူသည် မိမိပြုမိသမျှသော ဒုစရိုက်တို့ကို ကြဉ်ရှောင်လျက်၊ ငါစီရင်ထုံးဖွဲ့သမျှတို့ကို စောင့်ရှောက်၍၊ တရားသောအမှု၊ ဟုတ်မှန်သောအမှုတို့ကို ပြုလျှင်၊ သေခြင်းနှင့်လွတ်၍ စင်စစ် အသက်ရှင်ရလိမ့်မည်။ 22ပြုမိသမျှသော ဒုစရိုက်အပြစ်တို့ကို သူ့တစ်ဖက်၌မမှတ်ရ။ ပြုမိသော ဖြောင့်မတ်ခြင်းအမှုကြောင့် အသက်ရှင်ရလိမ့်မည်။ 23မတရားသောသူသည် မိမိအကျင့်တို့ကိုရှောင်၍ အသက်မရှင်၊ အသေခံခြင်းအမှု၌ ငါသည် အနည်းငယ်သောပျော်မွေ့ခြင်း ရှိသလော။ 24သို့ရာတွင် တရားသောသူသည် ဖောက်ပြန်၍၊ အဓမ္မအမှုကိုလည်းကောင်း၊ မတရားသောသူပြုသမျှသော စက်ဆုပ်ရွံရှာဖွယ် အမှုတို့ကိုလည်းကောင်းပြုလျှင်၊ အသက်ရှင်ရမည်လော။ အရင်ပြုသမျှသော ဖြောင့်မတ်ခြင်းအမှုတို့ကို မမှတ်၊ သူသည် လွန်ကျူးသောအမှု၊ ပြစ်မှားသောအပြစ်ကြောင့် အသေသတ်ခြင်းကို ခံရလိမ့်မည်။

25သို့သော်လည်း သင်တို့က၊ ထာဝရဘုရားစီရင်ချက်မဖြောင့်ဟု ဆိုကြသည်တကား။ အို ဣသရေလအမျိုး၊ ငါစီရင်ချက်သည် ဖြောင့်၍၊ သင်တို့စီရင်ချက် ကောက်သည်မဟုတ်လော။ 26တရားသောသူသည် တရားသောအမှုကိုပယ်၍ အဓမ္မအမှုကိုပြုလျှင်၊ ထိုအမှုကြောင့် သေရမည်။ ပြုမိသောအဓမ္မအမှုကြောင့် အသေသတ်ခြင်းကို ခံရမည်။ 27ထိုအတူ၊ မတရားသောသူသည် မိမိပြုမိသော အဓမ္မအမှုကိုရှောင်၍၊ တရားသောအမှု၊ ဟုတ်မှန်သော အမှုကိုပြုလျှင်၊ မိမိအသက်ကို ကယ်နုတ်ရလိမ့်မည်။ 28ပြုမိသမျှသော အဓမ္မအမှုတို့ကို ဆင်ခြင်၍ ရှောင်သောကြောင့်၊ သေခြင်းနှင့်လွတ်၍ စင်စစ်အသက်ရှင်ရလိမ့်မည်။ 29သို့သော်လည်း ဣသရေလအမျိုးက၊ ထာဝရဘုရားစီရင်ချက်မဖြောင့်ဟု ဆိုကြသည်တကား။ အို ဣသရေလအမျိုး၊ ငါစီရင်ချက်သည် ဖြောင့်၍၊ သင်တို့စီရင်ချက် ကောက်သည် မဟုတ်လော။ 30သို့ဖြစ်၍၊ အို ဣသရေလအမျိုး၊ သင်တို့ အသီးအသီးကျင့်ကြသည်အတိုင်း အကျိုးအပြစ်ကို ငါစီရင်မည်။ သင်တို့သည် အဓမ္မအမှုရှိသမျှတို့ကို စွန့်ပစ်၍ ပြောင်းလဲကြလော့။ ပြောင်းလဲကြလော့။ ဒုစရိုက်အပြစ်ကြောင့် ထိမိ၍ ဆုံးခြင်းသို့မရောက်ကြနှင့်။ 31သင်တို့သည် ပြုသမျှသော လွန်ကျူးခြင်းအမှုတို့ကိုစွန့်ပစ်၍ အသစ်သောနှလုံး၊ အသစ်သောစိတ်သဘောကို ပြင်ဆင်ကြလော့။ အို ဣသရေလအမျိုး၊ သင်တို့သည် အဘယ်ကြောင့် အသေသတ်ခြင်းကို ခံလိုသနည်း။ 32အသေခံရသောသူ၏အသေခံခြင်းအမှု၌ ငါသည်ပျော်မွေ့ခြင်းမရှိ။ ထိုကြောင့်၊ ပြောင်းလဲ၍ အသက်ရှင်ကြလော့ဟု အရှင်ထာဝရဘုရား မိန့်တော်မူ၏။

ယေဇကျေလအနာဂတ္တိကျမ်း - ၁၈ (အနက်ဖွင့်)

(တ) စပျစ်သီးချဉ်ပုံဥပမာဖြင့် ငြင်းပယ်ခြင်း (အခန်း ၁၈)

၁၈:၁−၄ ယုဒလူမျိုးတွင် သူတို့အပြစ်ဖုံးကွယ်ဖို့ ဘိုးဘေးတို့အား အပြစ်ဖို့သော စကားပုံရှိသည်။

“ဘိုးဘေးတို့က စပျစ်သီးချဉ်စားခဲ့သောကြောင့်သားသမီးများတိုင်အောင် သွားကျိန်းကြပြီ။“

ဘုရားရှင်က ထိုစကားပုံကို ငြင်းပယ်သည်။ လူတိုင်းမိမိတို့ ပြစ်မှားသည့် ဒုစရိုက်အတွက် တာဝန်ရှိကြသည်။

၁၈:၅−၂၄ ထို့နောက် ဘုရား၏ တရားစီရင်နိယာမကို ပုံဥပမာအမျိုးမျိုးပေး၍ ရှင်းပြသည်။

၁။ အပြစ်ဒုစရိုက်ကို ရှောင်ဖယ်၍ ဖြောင့်မတ်စွာ ကျင့်ကြံသူသည် အမှန်ဧကန် အသက်ရှင်မည်(ငယ်၅−၉)။

၂။ ဖြောင့်မတ်သူ၏ ဆိုးညစ်သော သားသည် အမှန်ဧကန်သေရမည် (ငယ်၊ ၁၀−၁၃)။ ယုဒများသည် ကျွန်ဘဝတွင်ဖြစ်စေ၊ သခင်ယေရှုခေတ်တွင်ဖြစ်စေ၊ သူတို့ကိုသူတို့ အာဗြဲဟံ၏ သားများဖြစ်ကြောင့်၊ ဂုဏ်ယူပြောဆိုလေ့ရှိကြသည်(လု၊ ၃:၈။ ယော၊ ၈:၃၉)။ မိမိတို့မျက်မှောက် ဘဝဆိုးညစ်လျှင် အာဗြဲဟံအား ဘိုးဘေးတော်စပ်လည်း ဘာမျှအသုံးမဝင်ဟု ဘုရားရှင်က ဖော်ပြသည်။ ကျွန်ုပ်တို့တွင် အခြားသူတို့အား ဝိညာဉ်ရေးဆက်နွယ်မှု၌ နူးညံ့ကြင်နာသော စိတ်နှလုံးရှိကြသည်။ သို့သော် အမှန်ဧကန်ဖြောင့်မတ်စင်ကြယ် ဘိုးဘေးတို့၏ ဦးဆောင်မှုသည် သားသမီးများ၏ အမွေခံပတ်ဝန်းကျင် ကောင်းဖြစ်သည်။

၃။ အဘမဖြောင့်မတ်သော်လည်း သားသမီးဖြောင့်မတ်လျှင် ထိုသားသမီးသည် အမှန်ဧကန် အသက်ရှင်မည်(ငယ်၁၄−၁၇)။ သို့သော်လည်း မဖြောင့်မတ်သောအဘမူကား မဖြောင့်မတ်သည့်အတိုင်း အမှန်ဧကန်သေရမည်(ငယ် ၁၈)။

၄။ မတရားဆိုးညစ်သောသူသည် အမှန်ဧကန်နောင်တရ၍ အပြစ်ဒုစရိုက်ကို စွန့်ခွါလျှင် အသက်ရှင်မည်(ငယ် ၂၁−၂၃)။

၅။ တရားဖြောင့်မှန်သူသည် ဖြောင့်မတ်ခြင်းလမ်းမှသွေ ဖည်ဖောက်ပြန်၍ အဓမ္မမှုကို ပြုကျင့်လျှင် သေရမည်(ငယ် ၂၄)။

အငယ် (၂၀)နှင့် ထွ ၂၀:၅သည် ဝိရောဓိမဖြစ်ပါ။ မိဘ၏ မှားယွင်းမှုသည် သားသမီးအပေါ် အကျိုးသက်ရောက်မှုရှိကြောင်း ထွက်မြောက်ရာကျမ်း၌ ဖော်ပြချက်မှာ ယေဘူယျမှန်ကန်သည်။ ဤနေရာ၌သွန်သင်သော လူတိုင်းတစ်ဦးချင်းစီ မိမိကျင့်ဆောင်လျှောက်လှမ်းမှုအတွက် မိမိတာဝန်ဟုဆိုခြင်းမှာလည်း မှန်ကန်သည်။

အပိုဒ်ငယ်(၂၀)တွင် ပါရှိသည့်ပြစ်ဒဏ်မှာ ထာဝရကာလအတွက်မဟုတ် ယာယီပြစ်ဒဏ် ဖြစ်သည်။ ပစ္စုပ္ပန်ပြုမှားသော ဒုစရိုက်ကြောင့် ရုပ်ခန္ဓာသေဆုံးရသည်။ အငယ် ၅−၂၄ သွန်သင်မှုသဘောတရားမှာ ထာဝရအသက်တာနှင့် သက်ဆိုင်ခြင်းမရှိပါ။ အကယ်၍သက်ဆိုင်သည် ဟုဆိုလိုခြင်းဖြစ်လျှင် အကျင့်သီလအားဖြင့် ကယ်တင်ခြင်းရဖို့ အတင်းကြိုးပမ်းကြပေလိမ့်မည်(ငယ် ၅−၉)။ ဖြောင့်မတ်ခြင်းတရား၏ အခန်းကဏ္ဍလည်း ပျောက်ဆုံးသွားလိမ့်မည်။ ဤအချက်နှင့်ပက်သက်၍ သခင်ယေရှုက ဓမ္မသစ်ကျမ်း၌ (ဧ ၂:၈−၉ နှင့် ယော ၁၀:၂၈) တို့တွင် ရှင်းလင်းစွာ သွန်သင်ထားကြောင်းတွေ့ရပါသည်။

၁၈:၂၅−၃၂ လူတို့က ဘုရားသခင်အား တရားဖြောင့်မတ်မူမရှိကြောင်း ဆက်၍အဓွန့်တက်ကြသည်။ ဘုရားရှင်က အပြစ်ဒုစရိုက်မှ စွန့်ခွါထွက်လာလျှင် ဆိုးယုတ်သူသည် ကယ်တင်ခြင်းရရှိနိုင်ကြောင်းနှင့် ထိုကဲ့သို့ပြုစေရန်လည်း ဘုရားသခင်အလိုရှိကြောင်း၊ ၎င်းသည် မဖြောင့်မတ်ခြင်းမဟုတ်သလို မတရားမှု လည်းမဟုတ်ကြောင်း ရှင်းပြသည်။

ဘုရားရှင်က အပြစ်ခွင့်လွှတ်သောအခါ လွန်ကျူးခဲ့သမျှ အပြစ်ဒုစရိုက်များကို အမှတ်မထား၊ အကုန်အစင်မေ့ပစ်ခြင်း ဖြစ်သည်(ငယ်၂၂)။ ထိုသို့ဆိုရာတွင် မှတ်ဉာဏ်မကောင်း၍ မေ့လျော့ခြင်းမဟုတ်။ ယေရှုခရစ်တော်၏ အပြစ်ဖြေခြင်း အမှုတော်အပေါ် အပြည့်အဝ ကျေနပ်အားရတော်မူ သောကြောင့် ဖြစ်သည်။ ယုံကြည်သူများအတွက် လုံလောက်သော အဖြေ စကားပေတည်း။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။