Ezekiel -11 -

ယေဇကျေလအနာဂတ္တိကျမ်း - ၁၁

မတရားတိုင်ပင်သူကိုအပြစ်ပေးခြင်း

1ထိုနောက် ဝိညာဉ်တော်သည် ငါ့ကိုချီ၍၊ အရှေ့ဘက်သို့မျက်နှာပြုသော ထာဝရဘုရား၏အိမ်တော် အရှေ့တံခါးသို့ ဆောင်သွား၍၊ တံခါးဝ၌ လူနှစ်ကျိပ်ငါးယောက် ရှိ၏။ သူတို့တွင် မင်းပြုသောသူ၊ အဇုရသားယာဇညာ၊ ဗေနာယသား ပေလတိတို့ကို ငါမြင်၏။ 2ဗျာဒိတ်တော်အသံကား၊ အချင်းလူသား၊ ဤသူတို့သည် မကောင်းသောအကြံကိုကြံစည်၍၊ ဤမြို့၌ မတရားသော တိုင်ပင်ခြင်းကို ပြုသောသူဖြစ်ကြ၏။ 3သူတို့က၊ အမှုမရောက်သေး။ အိမ်ဆောက်ကြကုန်အံ့။ ဤမြို့သည် အိုးကင်း၊ ငါတို့သည် အမဲသားဖြစ်သည်ဟု ဆိုတတ်ကြ၏။ 4သို့ဖြစ်၍ အိုလူသား၊ သူတို့တစ်ဖက်၌ ပရောဖက်ပြု၍ ဟောပြောလော့ဟု မိန့်တော်မူ၏။ 5ထိုအခါ ထာဝရဘုရား၏ ဝိညာဉ်တော်သည် ငါ့အပေါ်သို့ သက်ရောက်၍၊ သင်သည်ဟောပြောလော့။ ထာဝရဘုရား မိန့်တော်မူသည်ကား၊ အို ဣသရေလအမျိုး၊ သင်တို့သည် ဤသို့ပြောဆိုကြပြီ။ သင်တို့ ကြံစည်သမျှတို့ကို ငါသိ၏။ 6သင်တို့သည် ဤမြို့၌သူရဲတို့ကို များပြားစေ၍၊ မြို့လမ်းတို့ကို သူရဲများနှင့် ပြည့်စေကြပြီ။ 7ထိုကြောင့် အရှင်ထာဝရဘုရား မိန့်တော်မူသည်ကား၊ သင်တို့ထားသော သူရဲတို့သည် အမဲသားဖြစ်၏။ ဤမြို့သည် အိုးကင်းဖြစ်၏။ သို့သော်လည်း၊ သင်တို့ကို မြို့ထဲကငါထုတ်မည်။ 8သင်တို့သည် ဓားကိုကြောက်သည်ဖြစ်၍၊ ငါသည် ထိုဓားကို သင်တို့အပေါ်သို့ ရောက်စေမည်ဟု အရှင်ထာဝရဘုရား မိန့်တော်မူ၏။ 9ငါသည် သင်တို့ကို မြို့ထဲကထုတ်ပြီးလျှင်၊ တစ်ကျွန်းတစ်နိုင်ငံသားတို့၏ လက်သို့အပ်၍ အပြစ်ဒဏ်ကို စီရင်မည်။ 10သင်တို့သည် ဓားဖြင့်ဆုံးရှုံးကြ၍၊ ဣသရေလပြည်စွန်းမှာ ငါစစ်ကြောစီရင်သဖြင့်၊ ငါသည် ထာဝရဘုရား ဖြစ်ကြောင်းကို သင်တို့သိရကြလိမ့်မည်။ 11ဤမြို့သည် သင်တို့၏ အိုးကင်းမဖြစ်ရ၊ သင်တို့သည်လည်း၊ အိုးကင်း၌ အမဲသားမဖြစ်ရကြ။ ဣသရေလပြည်စွန်းမှာ ငါစစ်ကြောစီရင်သဖြင့်၊ ငါသည် ထာဝရဘုရားဖြစ်ကြောင်းကို သင်တို့သိရကြလိမ့်မည်။ 12အကြောင်းမူကား၊ သင်တို့သည် ငါ၏တရားလမ်းသို့ မလိုက်၊ ငါ့စီရင်ချက်တို့ကို မစောင့်၊ သင်တို့ပတ်လည်၌ နေသော လူမျိုးတို့၏ ထုံးစံဓလေ့တို့ကိုလိုက်ကြပြီဟု မိန့်တော်မူ၏။ 13ထိုဗျာဒိတ်တော်စကားကို ငါသည်ဆင့်ဆို၍ ဟောပြောစဉ်တွင်၊ ဗေနာယသား ပေလတိသည် သေ၏။ ငါသည်လည်း ပျပ်ဝပ်၍၊ အို အရှင်ထာဝရဘုရား၊ ကျန်ကြွင်းသော ဣသရေလအမျိုးသားတို့ကို ဆုံးရှုံးစေတော်မူမည်လောဟု ကျယ်သောအသံနှင့် ကြွေးကြော်၏။

ပြန်လည်ပြုပြင်ပေးမည့်ကတိတော်

14တစ်ဖန် ထာဝရဘုရား၏နှုတ်ကပတ်တော်သည် ငါ့ဆီသို့ရောက်လာ၍၊ 15အချင်းလူသား၊ ယေရုရှလင် မြို့သူမြို့သားတို့က၊ ထာဝရဘုရားထံတော်မှ ဝေးစွာထွက်သွားကြလော့။ ဤပြည်ကို ငါတို့အား အပိုင်ပေးတော်မူပြီဟု သင်၏ညီအစ်ကို၊ သင်၏အမျိုးသားချင်း၊ ဣသရေလ အမျိုးသားအပေါင်းတို့အား ဆိုတတ်ကြ၏။ 16ထိုကြောင့်၊ အရှင်ထာဝရဘုရား မိန့်တော်မူသည်ကား၊ သင်၏အမျိုးသားချင်းတို့ကို တစ်ပါးအမျိုးသားတို့ နေရာဝေးသောအရပ်သို့ ငါပြောင်းစေ၍၊ အတိုင်းတိုင်းအပြည်ပြည်တို့၌ ဖြန့်ကြဲသော်လည်း၊ သူတို့ရောက်သောပြည်တို့၌ ငါသည်သူတို့အဖို့ သန့်ရှင်းရာဌာနကဲ့သို့ ခဏဖြစ်လိမ့်မည်။ 17အရှင်ထာဝရဘုရား မိန့်တော်မူသည်ကား၊ သူတို့ကို ဖြန့်ကြဲသော လူအမျိုးမျိုးနေရာ အတိုင်းတိုင်းအပြည်ပြည်တို့မှ ငါသိမ်းယူ၍၊ စုဝေးပြီးလျှင်၊ ဣသရေလပြည်ကို ပေးမည်။ 18သူတို့သည် ထိုပြည်သို့ရောက်၍၊ စက်ဆုပ်ရွံရှာဖွယ်သော အမှုအရာရှိသမျှတို့ကို ပယ်ရှားကြလိမ့်မည်။ 19ငါသည်လည်း၊ ညီညွတ်သောစိတ်နှလုံးနှင့် အသစ်သောသဘောကို သွင်းပေးမည်။ သူတို့ကိုယ်ခန္ဓာထဲက ကျောက်နှလုံးကိုနုတ်၍၊ အသားနှလုံးကို ပေးသောကြောင့်၊ 20သူတို့သည် ငါစီရင်ထုံးဖွဲ့သော ပညတ်တရားလမ်းသို့လိုက်၍ စောင့်ရှောက်သဖြင့်၊ ငါ၏လူ ဖြစ်ကြလိမ့်မည်။ ငါသည်လည်း သူတို့၏ ဘုရားသခင်ဖြစ်မည်။ 21သို့မဟုတ်လျှင်၊ စက်ဆုပ်ရွံရှာဖွယ်သော အမှုအရာတို့၏အလိုသို့ စိတ်နှလုံးအားဖြင့် လိုက်သောသူတို့၏အပြစ်ကို၊ သူတို့၏ခေါင်းပေါ်သို့ ငါရောက်စေမည်ဟု အရှင်ထာဝရဘုရား မိန့်တော်မူ၏။

ဘုန်းအသရေတော်ထွက်ခွာသွားခြင်း

22ထိုအခါ ခေရုဗိမ်တို့သည် အတောင်တို့ကို ဖြန့်၍၊ ဘီးတို့သည်လည်း လိုက်ကြ၏။ ဣသရေလအမျိုး၏ ဘုရားသခင့် ဘုန်းတော်သည်လည်း သူတို့အပေါ်၌ ရှိတော်မူ၏။ 23ထာဝရဘုရား၏ ဘုန်းတော်သည် မြို့ထဲကတက်၍၊ မြို့အရှေ့မှာရှိသော တောင်ပေါ်၌ ရပ်တော်မူ၏။ 24ဝိညာဉ်တော်သည်လည်း၊ ဘုရားသခင်၏ဗျာဒိတ်ရူပါရုံအားဖြင့် ငါ့ကိုချီ၍ သိမ်းသွားသော သူတို့နေရာ၊ ခါလဒဲပြည်သို့ ဆောင်သွားတော်မူ၏။ ငါမြင်ခဲ့ပြီးသော ဗျာဒိတ်ရူပါရုံသည်လည်း ငါနှင့်ကွာ၍ တက်သွား၏။ 25ထာဝရဘုရား ပြတော်မူခဲ့ပြီးသော အမှုအရာရှိသမျှတို့ကို ငါသည် သိမ်းသွားခြင်းကိုခံရသော သူတို့အား ကြားပြောလေ၏။

ယေဇကျေလအနာဂတ္တိကျမ်း - ၁၁ (အနက်ဖွင့်)

(ဆ) ဆိုးညစ်သောမင်းများ၏ တိုင်ပင်ခြင်းကို ငြင်းပယ်ခြင်း (အခန်း၁၁)

၁၁:၁−၃ နှစ်ဆယ့်ငါးပါးသော (မင်းသားများ)က ယေရုရှလင်မြို့သူမြို့သားများအား စိုးရိမ်ကြောက်ရွံ့ခြင်းမရှိကြဖို့ နှစ်သိမ်ဖျောင်းဖျကြသည်။ အခါတိုင်း ကဲ့သို့ ပုံမှန်နေရန် အားပေးကြသည်။ ဘုရားသခင်၏ ဗျာဒိတ်တော် မူကား ထိုလူများကို အယုံကြည်မရှိကြ ဖို့ဆိုလိုသည်။ ထိုမင်းတို့သည် သူတို့ကိုသူတို့ အိုးကင်းဟု ခံယူ၍ ပြည်သူများကို အမဲသားအဖြစ်လုံခြုံစေမည် ဖြစ်သည်။ ထိုနှစ်ဆယ့်ငါးယောက်တို့၏ စကားများသည် ဘုရားသခင်၏ နှုတ်ကပတ်တော်နှင့် ဖီလာဖြစ်သည်။ သူတို့က”ပျက်စီးခြင်း မကျရောက်နိုင်သေး။ အိမ်ယာဆောက်၍ ..ပျော်ပျော်နေကြ”ဟုဆိုသည်။ ဘုရားသခင်ကမူ ပရောဖက်ယေရမိကို (ယေ၊၂၉:၄−၁၁)၌ ယေရုရှလင်မြို့ ပျက်သုဉ်းတော့မည်ဖြစ်သောကြောင့် ဖမ်းဆီးခံယုဒလူတို့အား ဗာဗုလုန်တွင် အိမ်ယာဆောက်လုပ်ကြဖို့‌‌‌‌ ပြောသည်။ ဖြောင့်မတ်ခြင်းမရှိသော ထိုမင်းသားများသည် ဖမ်းဆီးခံရသူများအား အတုအယောင် မျှော်လင့်ချက်များပေးကြသည်။ ဘုရားသခင်၏ အမျက်တော် မီးလျှံမီးကျည်များ ယေရုရှလင်မြို့အပေါ် ကျရောက်တော့မည့်ဆဲဆဲ ဖြစ်သော်လည်း ထိုနှစ်ဆယ့်ငါးယောက်သောမင်းတို့က လုံခြုံစိတ်ချမှု အပြည့်အဝရှိသည်ဟု ထင်မှတ်နေဆဲ။

ထိုနည်းတူ ယနေ့ခေတ်ကာလတွင်လည်း အမည်ခံ ခရစ်ယာန်များစွာတို့က ဒုစရိုက်နွံထဲ၌ ကျင်လည်နေဆဲမှာပင် ဘုရားသခင်၏ အပြစ်တရားစီရင်ခြင်းမှ သူတို့ကိုယ်ကိုသူတို့ ကင်းလွတ်လိမ့်မည်ဟု လွဲမှားစွာစိတ်ချ ယုံကြည်နေကြသည်။ သို့သော်လည်း အပြစ်တရားစီရင်ရာနေ့ရက်ကာလတွင် ဘုရားသခင်က သူတို့အား “သင့်ကိုငါမသိ”ဟု ငြင်းပယ်လိမ့်မည်။

၁၁:၄−၁၂ ထိုသူတို့၏ ပုံဆောင်ချက်အဓိပ္ပါယ်အနက်ကောက်ယူမှု မှားယွင်းသဖြင့် ဘုရားသခင်၏ ဝိညာဉ်တော်က ယေဇကျေလကို ကွဲလွဲစွာ အနက်ဖွင့်စေသည်။ ယေရုရှလင်မြို့တော်သည် အိုးကင်းဖြစ်၍ အသတ်ခံမည့်သူများမှာ အမဲသားဖြစ်သည်။ သူတို့ကိုယ်တိုင် မြို့တော်နှင့် အလှမ်းဝေးရာသို့ သွား၍ဣသရေလပြည်၏ နယ်စွန်နယ်ဖျားဒေသတွင် တရားစီရင်ခြင်းခံရမည်(၄ရာ၊၂၅:၁၈−၂၁။ ယေ၊၅:၂၄−၂၇ တို့ကိုကြည့်ပါ။)

၁၁:၁၃ ဗေနာယသား ပေလတိ(နှစ်ဆယ့်ငါးဦး၏ ခေါင်းဆောင်ဖြစ်ဟန်တူသည်) သည်ရုတ်တရက် လဲကျ‌သေဆုံးသည်။ လွဲမှားသောတိုင်ပင်မှုနှင့် အကြံပေးချက်၏ အကျိုးဆက်ဟု ယူဆရဖွယ်ရှိသည်။ ထိုအခါ ယေဇကျေလသည် ဘုရားသခင်ထံချက်ချင်း ဒူးထောက်ပြပ်ဝပ်၍ ကျန်ကြွင်းသော ဣသရေလအမျိုးသားများအတွက် ကြားခံ ဆုတောင်းသည်။

(ဇ) ကျန်ကြွင်းသူများကိုစောင့်ရှောက်မည့်ကတိတော် (၁၁:၁၄−၂၁)

၁၁:၁၄−၁၅ ဘုရားရှင်က ယေဇကျေလအား ယေရုရှလင်မြို့၌ မှီတင်းနေထိုင်သူများ အကြောင်းကို ပြောပြသည်။ သူတို့သည် ယုဒပြည်နှင့် ယေရုရှလင်မြို့မှ ဖမ်းဆီးခေါ်ဆောင်သွားခြင်း ခံရသူတို့ကို ဘုရားသခင်ထံမှ ဝေးရာသို့ ထွက်သွားကြလော.။ ဤယုဒပြည်နှင့် ယေရုရှလင်ကို ကြွင်းကျန်သူတို့သာ ပိုင်ဆိုင်သည်ဟု ပြောကြသည်။

၁၁:၁၆−၂၁ ဖမ်းဆီးခေါ်ဆောင်ခံရသူများအပေါ် စိုးစဉ်းမျှသာ ကျေးဇူးကရုဏာကိုပြဦးမည်ဟု ကတိပြုသည်။ အရပ်ရပ်သို့ ပြန်ကြဲသော သူတို့အား ပြန်လည်စုဝေးစေ၍ ဣသရေလပြည်ကို ပြန်လည်၍ ထူထောင်စေဦးမည်။ ရုပ်တုဆင်းတုကိုးကွယ်ခြင်းလုံးဝ ကင်းရှင်းကာ သန့်ရှင်းစင်ကြယ်စေမည်။ နာခံတတ်သောနှလုံးသားအသစ်ကို ထည့်ပေးမည်။ K.M.Yatesက ဤသို့မှတ်ချက်ပြုထားသည်။

ယေဇကျေလသည် တက်ကြွသောဝိညာဉ်ရေးရာ၌ ယေရမိနောက်လိုက်ဖြစ်သည်။ ၎င်းမှာဘုရားရှင်နှစ်သက်သော နှလုံးသားနည်းလမ်း ဖြစ်သည်။ စိတ်နှလုံးကို ပြုပြင်၍မရပါ။ အသစ်ဖြင့်အစားထိုးရသည်။ အသွင်သဏ္ဍာန်ဟောင်းကို အတိတ်တွင်ချွတ်ခွါ ထားရစ်ခဲ့ရမည်။ ဝိညာဉ်ပိုင်းတွင် ယာဝေဘုရားနှင့်ပိုမိုထိတွေ့လာမည်။ ထိုသို့အားဖြင့် စဉ်းစားတွေးခေါ်ခြင်း၊ ဝတ်ပြုခြင်း၊ ကျင့်ကြံပြုမူခြင်းတို့၌ ပုံသဏ္ဍာန်ပြောင်းလဲခြင်း ခံရလာမည်။ စိတ်နှလုံး(ဝိညာဉ်) သစ်ဆိုသည်မှာ ဘုရားသခင်ထံမှ အထူးလက်ဆောင်မွန် ဖြစ်ပါသည်(၁၈:၃၁၊၃၆:၂၆ တို့နှင့် ယှဉ်ဖတ်ပါ)။၁၂

မကျင်လည်ခဲ့ဘူးသော သူစိမ်းမြေသို့ ဖမ်းဆီးခေါ်ဆောင်ခံရသူများ၏ မျှော်လင့်ချက်မှာ ဘုရားသခင်၏ ကတိတော်အပေါ်မှာ အခြေပြုသည်။ ညီညွတ်သောစိတ်နှလုံး(အသားနှလုံး)နှင့် အသစ်သော သဘော(ဝိညာဉ်)ကို ထည့်ပေးမည်။ ၎င်းသည်ခြွင်းချက်မရှိပါ။ ပဋိညာဉ်သစ်ကာလတွင် ဤကတိတော်ကို ဖြည့်ဆည်းပေးနေဆဲ ဖြစ်ပါသည်။

အိုယေရှုရှင်၊ သခင့်မျက်နှာတော်သာဖူးပါရစေ ငါ့သခင်၊ငါ့ဘဝ၊ ငါ့မျှော်လင့်ချက်၊ ငါ၏ခပ်သိမ်း ရှောင်တိမ်းပြေးလွှားစရာ ဘယ်မှာရှာမတွေ့၊ မျက်မှောက်တော်သာ ဘေးကင်းပုန်းခိုရာ။

Samuel Medley.

(ဈ) ဘုန်းတော်တိမ်တိုက်သည် သံလွင်တောင်ပေါ်သို့ ရွှေ့ပြောင်းခြင်း(၁၁:၂၂−၂၅)

ဤအခန်း၏ အဆုံးပိုင်တွင် ဘုရားသခင်၏ ဘုန်းတော်တိမ်တိုက်သည် ယေရုရှလင်အရှေ့ဘက်သံလွင်တောင်သို့ ရွေ့လျားသွားကြောင်း မြင်ရသည်။ ထိုအကြောင်းကို George William က ဤသို့ မှတ်ချက်ချသည်။

အလိုတော်မရှိဘဲ အနားယူသည်။ ထိုပလ္လင်တော်သည် အသန့်ရှင်းဆုံးသော ဌာန ဖြစ်သည်(၈:၄)။ အိမ်တော်တံခါးခုံသို့ ရွေ့သွားသည်(၉:၃)။ တံခါးခုံအထက်သို့ တက်သည်(၁၀:၄)။ အရှေ့ဘက်တံခါးဝသို့ ရွေ့လျားသည်(၁၀:၁၉)။ နောက်ဆုံး၌ မြို့တော်အရှေ့ဘက်ရှိတောင် (သံလွင်တောင်) ပေါ်ရွေ့သားသည်(၁၁:၂၃)။ ဘုရားသခင်သည် ဣသရေလလူနှင့် ဗိမာန်တော်ကိုချစ်သောကြောင့် တဝဲလည်လည် မခွါချင့် ခွါချင်နှင့် ခွဲခွါခဲ့သည်။ (မပြည့်စုံလာသေးသော) အနာဂတ်ကာလ(၄၃:၂) တိုင်အောင် ပြန်လာဦးမည်မဟုတ်ပေ။၁၃

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။