Daniel -9 -

ဒံယေလအနာဂတ္တိကျမ်း - ၉

မိမိလူမျိုးအတွက်ဆုတောင်းခြင်း

1ယေရုရှလင်မြို့ပျက်စီး၍ အနှစ်ခုနစ်ဆယ် လွန်စေမည်ဟု၊ 2ထာဝရဘုရား၏ ဗျာဒိတ်တော်ကို ပရောဖက်ယေရမိ ခံဖူးသည်ဖြစ်၍၊ ခါလဒဲနိုင်ငံကို အစိုးရသော မေဒိအမျိုး၊ အာရွှေရုသားဒါရိ နန်းစံပထမနှစ်တွင်၊ ငါ ဒံယေလသည် ထိုနှစ်ပေါင်းအရေအတွက်ကို ကျမ်းစာအားဖြင့် သိရသောကြောင့်၊ 3အစာကိုရှောင်လျက်၊ လျှော်တေအဝတ်ကို ဝတ်လျက်၊ ပြာနှင့် လူးလျက်၊ အရှင်ဘုရားသခင့်ထံတော်သို့ ချဉ်းကပ်၍ ဆုတောင်းပတ္ထနာ ပြု၏။ 4ထိုသို့ အပြစ်ကို ဖော်ပြတောင်းပန်၍ ငါကိုးကွယ်သော ဘုရားသခင် ထာဝရဘုရားထံ ငါပြုသောပတ္ထနာဟူမူကား၊ ကိုယ်တော်ကိုချစ်၍ ပညတ်တော်တို့ကိုစောင့်သော သူတို့အား သစ္စာတော်မပျက်၊ ကရုဏာတရားကို စောင့်တော်မူထသော၊ အလွန်ကြီးမြတ်၍ ကြောက်ရွံ့ဖွယ်ဖြစ်တော်မူသော အရှင်ဘုရားသခင်၊ 5အကျွန်ုပ်တို့သည် ပြစ်မှားမိပါပြီ။ ဒုစရိုက်ကို ပြုမိပါပြီ။ မတရားသဖြင့် ကျင့်မိပါပြီ။ ပုန်ကန်မိပါပြီ။ စီရင်ထုံးဖွဲ့တော်မူသော တရားလမ်းမှ လွှဲမိပါပြီ။ 6အကျွန်ုပ်တို့၏ ရှင်ဘုရင်၊ မင်းသား အသက်ကြီးသူမှစ၍ ပြည်သူပြည်သားအပေါင်းတို့အား ကိုယ်တော်၏အခွင့်နှင့်ဟောပြောသော ကိုယ်တော်၏ကျွန်၊ ပရောဖက်တို့၏စကားများကို အကျွန်ုပ်တို့သည် နားမထောင်ဘဲ နေကြပါပြီ။

7အိုဘုရားရှင်၊ ကိုယ်တော်သည် တရားနှင့် ဆိုင်တော်မူ၏။ ကိုယ်တော်ကို ပြစ်မှားသောအပြစ်ကြောင့် နှင်ထုတ်တော်မူ၍ နီးသောပြည်၊ ဝေးသောပြည်၊ အရပ်ရပ်တို့၌နေရသော ယုဒပြည်သူ၊ ယေရုရှလင်မြို့သားမှစ၍ ဣသရေလလူအပေါင်းတည်းဟူသော အကျွန်ုပ်တို့သည် ယနေ့၌ရှိသည်အတိုင်း၊ မျက်နှာပျက်ခြင်းနှင့် ဆိုင်ကြပါ၏။ 8အိုဘုရားရှင်၊ ကိုယ်တော်ကို ပြစ်မှားသောကြောင့်၊ အကျွန်ုပ်တို့၏ရှင်ဘုရင်၊ မင်းသား၊ အသက်ကြီးသူမှစ၍ အကျွန်ုပ်တို့သည် မျက်နှာပျက်ခြင်းနှင့် ဆိုင်ကြပါ၏။ 9အကျွန်ုပ်တို့သည် ကိုယ်တော်ကို ပုန်ကန်သော်လည်း၊ အကျွန်ုပ်တို့အရှင် ဘုရားသခင်သည် ကရုဏာကိုပြခြင်း၊ အပြစ်ကို ဖြေရှင်းခြင်းအခွင့်နှင့် ဆိုင်တော်မူ၏။ 10အကျွန်ုပ်တို့၏ ဘုရားသခင်ထာဝရဘုရားသည် ကျွန်တော်ရင်း၊ ပရောဖက်တို့ဖြင့် အကျွန်ုပ်တို့၌ ထားတော်မူသော ပညတ်တရားတော်လမ်းသို့ လိုက်ခြင်းငှာ၊ ဗျာဒိတ်တော်အသံကို အကျွန်ုပ်တို့သည် နားမထောင်ဘဲနေကြပါပြီ။ 11အကယ်စင်စစ် ဣသရေလအမျိုးသားအပေါင်းတို့သည် ဗျာဒိတ်တော်အသံကို နားမထောင်၊ လွှဲသွား၍ ပညတ်တရားတော်ကို လွန်ကျူးကြပါပြီ။ သို့ဖြစ်၍၊ ကိုယ်တော်ကို ပြစ်မှားသောအပြစ်ကြောင့်၊ ကျိန်ဆိုတော်မူခြင်းတည်းဟူသော ဘုရားသခင်၏ကျွန်မောရှေ၏ ပညတ္တိကျမ်း၌ မှတ်သားသောအကျိန်ကို အကျွန်ုပ်တို့ အပေါ်သို့ သွန်းလောင်းတော်မူ၏။ 12အကျွန်ုပ်တို့တစ်ဖက်၊ အကျွန်ုပ်တို့ကိုအုပ်သော တရားသူကြီးတို့ တစ်ဖက်၌ မိန့်တော်မူသော စကားတော်ကို တည်စေ၍၊ အကျွန်ုပ်တို့အပေါ်မှာ ကြီးစွာသောဘေးဥပဒ်ကို ရောက်စေတော်မူပြီ။ အကြောင်းမူကား၊ ယေရုရှလင်မြို့၌ ဘေးရောက်သကဲ့သို့ ကောင်းကင်အောက်တွင် အဘယ်အရပ်၌မျှ မရောက်စဖူးပါ။ 13မောရှေ၏ပညတ္တိကျမ်းစာ၌ မှတ်သားသည်အတိုင်း၊ ဤဘေးဥပဒ်ရှိသမျှသည် အကျွန်ုပ်တို့အပေါ်မှာ ရောက်ပါပြီ။ အကျွန်ုပ်တို့သည် ဒုစရိုက်များကိုရှောင်၍ သမ္မာတရားတော်ကို နားလည်ခြင်းအလိုငှာ၊ အကျွန်ုပ်တို့ ဘုရားသခင်ထာဝရဘုရားထံတော်၌ မတောင်းပန်ဘဲ နေကြပါပြီတကား။ 14ထိုကြောင့် ထာဝရဘုရားသည် ဘေးဥပဒ်ကိုစောင့်၍၊ အကျွန်ုပ်တို့အပေါ်သို့ ရောက်စေတော်မူပြီ။ အကျွန်ုပ်တို့၏ ဘုရားသခင်ထာဝရဘုရားသည် ပြုတော်မူသမျှတို့၌ ဖြောင့်မတ်တော်မူ၏။ အကျွန်ုပ်တို့သည် ဗျာဒိတ်တော်အသံကို နားမထောင်ဘဲ နေကြပါပြီတကား။

15တန်ခိုးကြီးသောလက်တော်ဖြင့် ကိုယ်တော်၏လူတို့ကို အဲဂုတ္တုပြည်မှနုတ်ဆောင်၍ ယနေ့၌ရှိသည်အတိုင်း အသရေတော်ကို ထင်ရှားစေတော်မူသော အကျွန်ုပ်တို့၏အရှင်ဘုရားသခင်၊ အကျွန်ုပ်တို့သည် ပြစ်မှားမိပါပြီ။ မတရားသဖြင့် ပြုမိပါပြီ။ 16အိုဘုရားရှင်၊ ဖြောင့်မတ်တော်မူခြင်း တရားတော်ရှိသမျှတို့နှင့် အညီ၊ သန့်ရှင်းသော တောင်တော်တည်းဟူသော ကိုယ်တော်၏ ယေရုရှလင်မြို့မှ ပြင်းစွာသော ဒေါသအမျက်တော်ကို လွှဲတော်မူပါဟု အကျွန်ုပ်တောင်းပန်ပါ၏။ အကြောင်းမူကား၊ အကျွန်ုပ်တို့ အပြစ်များမှစ၍ ဘိုးဘေးတို့၏အပြစ်များကြောင့်၊ ယေရုရှလင်မြို့နှင့် ကိုယ်တော်၏လူစုသည် ပတ်ဝန်းကျင်၌ရှိသော သူတို့တွင် ကဲ့ရဲ့စရာအကြောင်း ဖြစ်ပါ၏။ 17ယခုမူကား၊ အကျွန်ုပ်တို့ဘုရားသခင်၊ ကိုယ်တော်၏ကျွန်ပြုသော ပတ္ထနာစကားကို နားထောင်တော်မူပါ။ ဆိတ်ညံလျက်ရှိသော သန့်ရှင်းရာဌာနတော်ကို ဘုရားရှင်၏အကျိုးတော်ကြောင့်၊ မျက်နှာတော် ရောင်ခြည်ကို ထွန်းလင်းစေတော်မူပါ။ 18အကျွန်ုပ်၏ဘုရားသခင်၊ နားတော်ကိုလှည့်၍ နားထောင်တော်မူပါ။ မျက်စိတော်ကိုဖွင့်၍ အကျွန်ုပ်တို့ ပျက်စီးရာများကိုလည်းကောင်း၊ နာမတော်ဖြင့် သမုတ်သောမြို့ကိုလည်းကောင်း ကြည့်ရှုတော်မူပါ။ အကျွန်ုပ်တို့သည် ကိုယ်ကုသိုလ်ကို အမှီမပြု၊ မဟာကရုဏာတော်ကိုသာ အမှီပြု၍ ပတ္ထနာစကားကို ရှေ့တော်၌ ဆက်ကပ်ပါ၏။ 19အို ဘုရားရှင်၊ နားထောင်တော်မူပါ။ အို ဘုရားရှင်၊ အပြစ်ကိုလွှတ်တော်မူပါ။ အို ဘုရားရှင်၊ နားထောင်၍ ပြုတော်မူပါ။ အကျွန်ုပ်၏ဘုရားသခင်၊ ကိုယ်တော်အတွက် ဖင့်နွှဲတော်မမူပါနှင့်။ ကိုယ်တော်၏မြို့၊ ကိုယ်တော်၏လူစုသည် နာမတော်ဖြင့် သမုတ်ခြင်းရှိပါသည်ဟု ဆုတောင်းပတ္ထနာပြု၏။

သီတင်းခုနစ်ဆယ်

20ထိုသို့ ဆုတောင်းပတ္ထနာပြု၍၊ ကိုယ်အပြစ်ကိုလည်းကောင်း၊ အမျိုးသားချင်း ဣသရေလလူတို့၏အပြစ်ကိုလည်းကောင်း ဖော်ပြတောင်းပန်၍၊ ငါကိုးကွယ်သော ဘုရားသခင်၏ သန့်ရှင်းသောတောင်တော်အဖို့ ငါပြုသောပတ္ထနာစကားကို၊ ငါ၏ဘုရားသခင် ထာဝရဘုရားရှေ့တော်၌ ဆက်ကပ်လျက်နေ၍၊ 21ဆုတောင်းသောအမှုမပြီးမီ မြွက်ဆိုစဉ်တွင် ယခင်ဗျာဒိတ် ရူပါရုံ၌ထင်ရှားသောသူ၊ ဂါဗြေလသည် လျင်မြန်စွာပျံ၍ လာသဖြင့် ညဥ့်ဦးယံပူဇော်ချိန်၌ ငါရှိရာသို့ ရောက်၍၊ 22နှုတ်ဆက်လျက်၊ အချင်းဒံယေလ၊ ငါသည် သင်၌ ဉာဏ်ပညာ တိုးပွားစေမည်အကြောင်း ထွက်လာပြီ။ 23သင်သည် ဆုတောင်းစပြုသောအခါ အမိန့်တော်ရှိသည်ဖြစ်၍ သင့်အားကြားပြောခြင်းငှာ ငါရောက်လာပြီ။ သင်သည် အလွန်ချစ်အပ်သောသူဖြစ်၏။ ထိုကြောင့် ဗျာဒိတ်တော်အချက်ကို ဆင်ခြင်၍ နားလည်ရသောအခွင့်ရှိ၏။

24လွန်ကျူးခြင်းအမှုကို ဆီးတား၍ အပြစ်ကို တံဆိပ်ခတ်စေခြင်းငှာလည်းကောင်း၊ ဒုစရိုက်အပြစ်ကို ဖြေရှင်း၍ ထာဝရကုသိုလ်ကို သွင်းစေခြင်းငှာလည်းကောင်း ဗျာဒိတ်ရူပါရုံနှင့် အနာဂတ္တိဗျာဒိတ်တော်တို့ကို တံဆိပ်ခတ်၍၊ အလွန်သန့်ရှင်းသော အရပ်ဌာနကို လိမ်းစေခြင်းငှာလည်းကောင်း၊ သီတင်းခုနစ်ဆယ်ကို သင်၏ အမျိုးသားချင်းအဖို့နှင့် သင်၏ သန့်ရှင်းသောမြို့အဖို့ ဆုံးဖြတ်ခြင်းရှိ၏။ 25ထိုကြောင့်၊ ယေရုရှလင်မြို့ကို တစ်ဖန် တည်ထောင်ပြုစုစေခြင်းငှာ အမိန့်တော်ရှိသည် နေ့မှစ၍ ခရစ်တော်သခင်၏ လက်ထက်တိုင်အောင် ခုနစ်သီတင်းနှင့် ခြောက်ဆယ်နှစ်သီတင်းကြာလိမ့်မည်ဟု သိမှတ်နားလည်လော့။ အနှောင့်အယှက် ခံရသောကာလ၌ မြို့လမ်းကို တစ်ဖန် တည်ထောင်ပြုစုရမည်ဟု စီရင်ဆုံးဖြတ်ခြင်းရှိ၏။ 26ထိုသီတင်း ခြောက်ဆယ်နှစ်သီတင်းလွန်ပြီးမှ ခရစ်တော် သည် အခွင့်မရဘဲ အသေသတ်ခြင်းကို ခံရလိမ့်မည်။ ထိုနောက်မှလာသော သခင်၏လူတို့သည် မြို့တော်ကိုလည်းကောင်း၊ သန့်ရှင်းရာဌာနကိုလည်းကောင်း ဖြိုဖျက်ကြလိမ့်မည်။ ရေလွှမ်းမိုးသောအားဖြင့် ဆုံးရှုံးခြင်းဖြစ်လိမ့်မည်။ အဆုံးတိုင်အောင် စစ်တိုက်ခြင်း၊ ပျက်စီးရာနှင့်ဆိုင်သော စီရင်ဆုံးဖြတ်ခြင်းရှိလိမ့်မည်။ 27တစ်သီတင်းတွင် လူအများတို့နှင့် ပဋိညာဉ်ဖွဲ့ခြင်းရှိ၍ ထိုသီတင်းတစ်ဝက်တွင် ယဇ်ပူဇော်ခြင်းနှင့် ဆက်ကပ်ခြင်းကို ပပျောက်စေလိမ့်မည်။ ရွံရှာဖွယ်သောအရာ၏ အထွတ်ပေါ်သို့ ဖျက်ဆီးသောသူသည်ရောက်၍ စီရင်ဆုံးဖြတ်သော သုတ်သင်ပယ်ရှင်းခြင်းသည် ပျက်စီးအပ်သော သူတို့ကို မလွှမ်းမိုးမီတိုင်အောင် ထိုသို့ဖြစ်လိမ့်မည်ဟု ကြားပြော၏။

ဒံယေလအနာဂတ္တိကျမ်း - ၉ (အနက်ဖွင့်)

၉။ ရက်သတ္တပါတ်ခုနှစ်ဆယ်၊ တပါးအမျိုးသားများ ကြီ:စိုးမည့်အကြောင်း ဒံယေလ၏ ဗျာဒိတ်ရူပါရံ (အခန်း ၉)

၉:၁-၂ မေရိပြည်တွင် ဒါရိမင်း နန်းစံချိန်မှ အဖြစ်အပျက်များဖြစ်သည်။ ယေရမိအနာဂတ္တိကျမ်းအရ ဒံယေလ၏ မြင်ရသော ရူပါရုံသည် နှစ်ပေါင်း(၇၀) ဖမ်းဆီးခံရသည့်ကာလ အဆုံးသတ်တော့မည်အကြောင်း ဖြစ်သည်။

၉:၃-၁၉ သူ၏အပြစ်နှင့်သူ့လူများ၏ အပြစ်ဒုစရိုက်များကို (ကျွန်ုပ်တို့ဟု သုံးနှုန်းသည်) ဝန်ချတောင်းပန်ပြီးသောအခါ ယေရုရှလင်နှင့် ယုဒပြည် အပေါ်သို့ပြုထားသောကတိတော် ပြည့်စုံမည့်အချိန်ကာလကို သိချင်သည်။ ပရောဖက်၏ဆုတောင်းချက်ကို ဘုရားသခင်ကြားနာ၍ အဖြေစကားပေးသည်မှာ “ရက်သတ္တပေါင်းခုနှစ်ဆယ်” ဖြစ်သည်။ “သမ္မာကျမ်းစာ ၏ကျောရိုးပရောဖက်ပြုချက်” ဟုလည်းဆိုကြသည်။

ဒံယေလ၏ အာရုံပြုဆုတောင်းချက်မှာ ဘုရားသခင်ကောင်းမြတ်ခြင်းလက္ခဏာ (ကောင်းမြတ်ခြင်း၊ ဥပေက္ခာပြုတတ်ခြင်း၊ သစ္စာတော်၊ ဖြောင့်မတ်ခြင်း၊ အပြစ်ခွင့်လွှတ်ခြင်း၊ ဂရုဏာတော်နှင့်) သူ့လူမျိုးအပေါ်စိတ်ပါဝင်စားမူ (ကိုယ်တော်၏ လူစု၊ ကိုယ်တော်၏ မြို့၊ ကိုယ်တော်၏ သန့်ရှင်းသောတောင်၊ ကိုယ်တော်၏ စင်ကြယ် သောဌာနတော်) ဖြစ်သည်။

၉:၂၀-၂၃ ဒံယေလက အာရုံပြုဆုတောင်းနေစဉ် ဂါဗြေလသည် လျင်မြန်စွာပျံလာ၍ ညဦးယံပူဇော်ချိန်၌ ဒံယေလ၏ဉာဏ်ပညာတိုးပွားစေမည့်အကြောင်း လာပြောသည်။ သင်သည် အလွန်ချစ်အပ်သောသူဖြစ်သည်။ ဗျာဒိတ်တော်အချက်ကို ဆင်ခြင်၍ နားလည်ရသောအခွင့်ရှိ၏ဟုဆိုသည်။ ထို့နောက် ယုဒလူမျိုးတို့ အနာဂတ်ကုသိုလ်ကံ၊ ရက်သတ္တတပတ်ပေါင်း ခုနှစ်ဆယ်အကြောင်းကို ရူပါရုံပေးလိုက်သည်။ ဤနေရာတွင် “ရက်သတ္တတပတ်” သည် ခုနစ်နှစ် ကာလညီမျှမည်။ ဘုရားသခင်ပေးသော ဗျာဒိတ်ရူပါရုံသည် အထိမခံရွှေပန်းကန်၊ အတိမ်းအစောင်းမခံနိုင်သောကြောင့် စကားစုတစု၊ တပိုဒ်ပြီးတပိုဒ် အသေးစိတ်လေ့လာရန် လိုအပ်ပါသည်။

၉:၂၄ အလွန်သန့်ရှင်းသောအရပ်ဌာနကို လိမ်းစေခြင်းငှါ၎င်း၊ သီတင်းခုနှစ်ဆယ်ကို သင်၏အမျိုးသားနှင့်သင်၏ သန့်ရှင်းသောမြို့အဘို့ ဆုံးဖြတ်ခြင်းရှိ၏။ ပရောဖက်ပြုချက်ပါ သီတင်းပတ်သည်နှစ်များဖြစ်ကြောင်း သမိုင်းကြောင်းအရ သိရှိပြည့်စုံလာခဲ့သည်။ သီတင်းပတ် (၇၀)ကို နှစ်ပေါင်း(၄၉၀)ဖြစ်သွားသည်။ သီတင်းပတ်(၇၀)ကို (၇)ပတ်စီဖြင့်ပိုင်းခြားပြီးလျှင် (၆၂)ပတ် ထပ်ပေါင်းပါက တပတ်ပိုလိမ့်မည်။ ဤရက်သတ္တပတ်(၇၀) ကုန်ဆုံးလွန်မြောက်သောအခါ အောက်ပါအဖြစ်အပျက်များ ကြုံတွေ့ကြမည်။

အပြစ်ဒုစရိုက်ကိုဖြေရှင်းခြင်း။ ဤကျမ်းပိုင်းသည် ယေဘုယျအားဖြင့် ဣသရေလလူမျိုးများ၏ အပြစ်ဒုစရိုက်အကြောင်းဖြစ်၏။ အထူးသဖြင့် မေရှိယသခင်အား ငြင်းပယ်ခဲ့ကြသည့်မူလစရိုက်၏ အရင်းအမြစ်ဖြစ်သည်။ ခရစ်တော်ဘုရား ဒုတိယအကြိမ်ကြွလာသောအခါ ယုံကြည်ခြင်းဖြင့် ခရစ်တော်ထံသို့ပြန်လည်ရောက်ရှိ၍ ဣသရေတို့၏ အပြစ်ဒုစရိုက်များ ခွင့်လွှတ်မည့် အကြောင်းဖြစ်သည်။

လွန်ကျူးခြင်းအမှုကို ဆီးတားခြင်း။ လွန်ကျူးသောအမှုများ ဆီးတားဖို့ရန်သည် ကရာနီတရားပေါ်တွင်သာ အခြေပြုသည်။ သို့သော်လည်း အနာဂတ်ကာလတွင် ဣသရေလလူများသည် ခရစ်တော်၏ ပြည့်စုံသော အမှုတော်ကို ယုံကြည်လက်ခံကြသောကြောင့် အကျိုးဖြစ်ထွန်း ကောင်းစားကြရမည်။

ထာဝရကုလိုလ်သွင်းစေခြင်း၊ ဤအချက်သည်လည်း ခရစ်တော်စကား ဒုတိယအကြိမ်ပြန်လည်ကြွလာခြင်းနှင့် အနှစ်တထောင် အုပ်စိုးခြင်းအပေါ်၌ အခြေတည်သည်။ ထိုကာလရောက်သောအခါ ခရစ်တော်ဘုရားသည် ဖြောင့်မတ်ခြင်းအရင်းအမြစ်စိုးစံမည်။ နိုင်ငံတော် ထာဝရတည်သကဲ့သို့ ကိုယ်တော်ဘုရား၏ ဖြောင့်မတ်ခြင်းသည်လည်း နိစ္စ ထာဝရတည်တံ့နေပေမည်။

ရူပါရုံနှင့်ပရောဖက်ပြုချက်များ တံဆိတ်ခတ်နှိပ်ခြင်း။ ဓမ္မဟောင်း၏ အဓိကမဏ္ဍိုင်ပရောဖက်ပြုချက်မှာ ကမ္ဘာပေါ်သို့ ခရစ်တော်ဘုရား ဆင်းသက်လာမည့်အကြောင်း၊ နိုင်ငံတော်တည်ထောင်မည့်အကြောင်း ဖြစ်သည်။ သို့ကြောင်း သီတင်းပတ် (၇၀)အဆုံးတွင် ပရောဖက်ပြုချက်မှန် သမျှသည်ပြည့်စုံလာလိမ့်မည်.။

အလွန်သန့်ရှင်းသောအရပ်ဌာနကို လိမ်းစေခြင်း။ ခရစ်တော်ဘုရား၏ အနှစ်တထောင်နိုင်ငံတော်စတင်သောအခါ ဗိမာန်တော်သည် ဆီလူးဘိသိက်မင်္ဂလာပေးရမည့်အကြောင်း၊ ယေရုရှလင်မြို့သည် ကျက်သရေမင်္ဂလာပြည့်စုံမည့်အကြောင်း ယေဇ ၄၀-၄၄တွင် ပရောဖက်ပြုထားပါသည်။ ဘုန်းတန်ခိုးဟူသမျှသည် ကိုယ်တော်ဘုရားထံတွင် ပြည့်စုံလာကြမည်(ယေဇ ၄၃:၁-၅ )။

၉:၂၅ ထို့ကြောင့် ယေရုရှလင်မြို့ကို တဖန်တည်ထောင်ပြုစေခြင်းငှါအမိန့်တော်ရှိသည်။ ထိုကာလသည် ဘီစီ ၄၄၅ ခုနှစ် အာတဇေရဇ်မင်း Artexerxes လက်ထက်ဖြစ်သည် ။ (နေ ၂:၁-၈)

ခရစ်တော်လက်ထက်တိုင်အောင်။ ဤကျမ်းစကားသည် ခရစ်တော်ဘုရား ပထမအကြိမ် ကြွလာခြင်းကာလကို ဆိုလိုခြင်းမဟုတ်။ ကိုယ်တော်ဘုရားအသေခံတော်မူသည့်နေ့ရက်ကာလထိ အကျူံးဝင်သည်(ငယ် ၂၆ ကိုလည်းကြည့်)။

ခုနှစ်သီတင်း ၄၉ နှစ်နှင့် ခြောက်ဆယ့်နှစ်ပတ် (၄၃၄၅၆) ကြာလိမ့်မည်။ ခြောက်ဆယ့်ကိုးသီတင်းနှင့် ခြောက်ဆယ်နှစ်သီတင်းပေါ်ထွက်လာမည်။

မြို့လမ်းကို တဖန်တည်ထောင်ပြုစုရမည်။ အနှောင့်အယှက်များပြားထူပြောသည့် ကာလအကြား မှာပင် မြို့ပြပြည်ရွာ လမ်းတံတားတည်ဆောက်ကြမည်။ ယေရုရှလင်မြို့အား (ပထမသီတင်းခုနှစ်ပတ်အတွင်းတွင်) ပြည်သူ့ရင်ပြည်နှင့် မြိုပြအင်္ဂါစုံလင်စွာ အတားအဆီးအနှောင့်အယှက်မရှိ ချောမောစွာပြန်လည် တည်ဆောက်သည်။

၉:၂၆ သီတင်းပတ် ၆၂ ပတ် လွန်မြောက်သောအခါဆိုသည်မှာ အချိန်ကာလခွဲဝေပိုင်းခြားခြင်း ဖြစ်သည်။ စင်စစ် ၆၉ သီတင်းတွင် အချိန်ကာလစေ့သည်။ ထိုကာလစေ့သောအခါ မေရှိယသခင်ကို အကျိုးအကြောင်း ခိုင်လုံခြင်းမပြည့်စုံဘဲ အသေသတ်ကြမည်။ ခရစ်တော်ဘုရားလက်ဝါးကပ်တိုင်ပေါ်တွင် မရှုမလှ အသေခံခဲ့ပုံကို သတိရသင့်သည်။

လွန်ခဲ့သော နှစ်တရာခန့်တွင် ရေးသားသည့် Sir Robert Anderson ၏ “The Coming Prince” စာအုပ်တွင် ခြောက်ဆယ့်ကိုး သီတင်းကို “ပရောဖက်နှစ်များ” ဟုဆိုထားသည်။ ဝါထပ်ရက်များကြောင်း ရက်လပြက္ခဒိန်သည် ဘီစီမှ အေဒီသို့ပြောင်းလဲခဲ့သည်။ ခြောက်ဆယ့်ကိုး သီတင်းသည် ယေရုရှလင်မြို့သို့ ခရစ်တော်ဘုရား အောင်ပွဲခံဝင်ရောက်သည့် နေ့ရက်သည် အဆုံးသတ်ခဲ့သည်။ ခရစ်တော်ဘုရား အသေမခံမီ (၅) ရက်စောသွားသည်။၁၁

“သို့သော်လည်း သူ့အတွက်အလျဉ်းမဟုတ်။” ဆိုခြင်းမှာ စာကဗျာဖြင့်ရေးရလျှင် မည်သည့်အကျိုးခံစားခွင့်မှမယူဟု အဓိပ္ပါယ်ရသည်သည်။ ခရစ်တော်ဘုရားကြွလာခြင်းသည် ဣသရေလသူများထံမှ မည်သည့်အကျိုးရလာဒ်မှ မရရှိပါ။ သို့မဟုတ် ဣသရေလလူမျိုးကြောင့် ဒဏ်ခတ်ခြင်းခံရသည် (ဟေရှာ ၅၃:၈) သို့မဟုတ် ကိုယ်တော်ဘုရား၏ အောက်ကျို့နှိမ့်ချပုံ တင်စာခြင်းဖြစ်သည်။ ကိုယ်ပေါ်ရှိအဝတ်တလွှာမှလွဲ၍ မကျန်ရစ်ခဲ့ပါ။

ထိုနောက်မှလာသောသခင်လူတို့ ဆိုခြင်းမှာ ခရစ်တော်ကို ပှန်ကန်တော်လှန်သော အန္တိခရစ် ရောမအင်ပါယာကို ဆိုလိုသည်။ ဘေးဒဏ်ကြီးကာလတွင် စိုးမိုးသောင်းကျန်းကြမည်။ သူ့လူတို့ဆိုခြင်းမှာ ရောမလူမျိုးများ ဖြစ်သည်။

မြို့တော်ကို၎င်း၊ သန့်ရှင်းရာဌာနတော်ကို၎င်း၊ ဖြိုဖျက်ကြလိမ့်မည်။ တိတုလက်ထက်တွင် ရောမတို့သည် အေဒီ ၇၀ခုနှစ်၌ ရောမမြို့ကို ဖျက်ဆီးကြသည်။ ဗိမာန်တော်ကိုလည်း အုတ်တခဲမကျန်အောင် မီးရှို့ဖျက်ဆီး ကြသည်။

ရေလွှမ်းမိုးခြင်းဖြင့် ဆုံးကြလိမ့်မည်။ မြို့တော်ပြားပြားဝပ်၍ ရေပြင်ညီရှိခြင်းကို ဆိုလိုသည်။ ဗိမာန်တော်သည်လည်း အုတ်တချပ်ပေါ်တစ်ချပ်ဆင့်တည်ခြင်းမရှိတော့ပါ။ စစ်သားများအား တိတုမင်းက တားမြစ်တော်လည်း တားမနိုင်ဆီးမရ ဆိုးသွမ်းကြသည်။ ဗိမာန်တော်ရှိ ရွှေများအား အရည်ကြိုကြသည်။ အုတ်ကြိုအုတ်ကြား အင်္ဂတေပြားရှိ ရွှေစရွှေစုများ ခွာကြသည်။ မြေလှန်ကြသည်။ ထိုအဖြစ်တနည်းဆိုးသည် ယေရုရှလင်ဗိမာန်တော် ပြိုလဲပျက်ဆီးမည့်အကြောင်း၊ အုတ်တခဲမကျန်၊ ပျက်စီးမည့်အကြောင်း ခရစ်တော်ဘုရား၏နှုတ်တော်ထွက်စကား မ ၂၄:၁−၂ နှင့် ဒံယေလ၏ ပရောဖက်ပြုချက် ပြည့်စုံခြင်းအကြောင်း ဖြစ်သည်။

အဆုံ:တိုင်အောင် စစ်တိုက်ခြင်း ၊ ပျက်စီးခြင်းနှင့်ဆိုင်သော စီရင်ခြင်းရှိလိမ့်မည်။ ထိုအချိန်မှာစ၍ ယေရုရှလင်မြို့သည် စစ်သလင်းမြေဖြစ်လျက်လုံးဝပျက်စီး ပျက်သုဉ်းသွားသည်။ ဤကျမ်းပိုဒ်တွင် ပါရှိသည့်အဆုံးတိုင်အောင် ဆိုခြင်းမှာ တပါးအမျိုးသားများ၏ ခေတ်ကာလအဆုံးကို ဆိုလိုသည်။

၉:၂၇ ခုနှစ်ဆယ်မြောက်သော ရက်သတ္တပတ်ထဲသို့ ဝင်ရောက်လာကြပြီ။ အထက်တနေရာတွင် ဆိုခဲ့သည့်အတိုင်း ခြောက်ဆယ့်ကိုးနှင့်ခုနှစ်ဆယ်ကြား တွင် ကြားကွက်လပ်ရက်သတ္တပတ်တပတ်ရှိသည်။ ထိုကာလသည် အသင်းတော်ကာလကို ရည်းညွှန်းသည်။ ပင်တေကုတ္တေနေ့မှ အသင်းတော်ချီဆောင်ခြင်းကာလ ကိုဆိုလိုသည်။ ထိုအကြောင်းကို ဓမ္မဟောင်းကျမ်းတွင် ထုတ်ဖော်ပြသခြင်းမရှိ။ လျှို့ဝှက်ထားသည်။ ဓမ္မသစ်ကာလ ရောက်မှသာလျှင်တပည့်တော်များနှင့် ပရောဖက်များက ထုတ်ဖော်သည်။ ထိုကြားကာလအကြောင်းကို ဓမ္မဟောင်းကျမ်းတွင် ထုတ်ဖော်ထားခြင်းမရှိ။လျှိုဝှက်ထားသည်။ ကမ္ဘာဦးမှစ၍ ဖုံးကွယ်သိမ်းဆည်းထားသည် ဓမ္မသစ်ကာလ ရောက်မှသာလျှင်တပည့်တော်များနှင့် ပရောဖက်များက ထုတ်ဖော်ခဲ့သည်။ ထိုကြားကာလအကြောင်းကို ခရစ်တော်ဘုရားက နာဇရက်တရားစရပ်တွင် (လု၄:၁၈-၁၉) မိန့်ဆိုခဲ့သည်။ ခရစ်တော်က ဟေရှာ၆၁:၁-၂ ကို ကိုးကားခြင်း ဖြစ်သော်လည်း အနှစ်သာရကိုသာယူ၍ “နှစ်လိုဖွယ်ရာ ဘုရားသခင်၏နှစ်” (ကိုယ်တော်ဘုရားဒုတိယကြွလာခြင်း)ဟု ဆိုသည်။ တရားစီရင်ရန် ဒုတိယအကြိမ်ကြွလာခြင်း ဘုရားသခင်၏ ကလဲ့စားချေမည့်နေ့(ဟေရှာ ၆၁:၂ခ)ကို ချန်လှပ်ထားသည်။ ဤကြားကာလကို အသင်းတော်ခေတ်ဟုဆိုသည်။

ထို့နောက်သူသည် (ရောမမင်း) လူအများ (မယုံကြည်သူဣသရေလလူမျိုးများ) နှင့် သီတင်းတပတ် (ဘေးဒဏ်ကြီးကာလ ၇ နှစ် ပဋိညာဉ်ဖွဲ့ကြမည်။ သို့သော် လူမှုပေါင်းသင်းဆက်ဆံရေးအရ ပေါင်းဖက်သည်။ စစ်မဟာမိတ်ပြုခြင်းမဟုတ်၊ ဣသရေလအားကျူးကျော်တိုက်ခိုက်ရန် စစ်မဟာမိတ်ပြုခြင်းရှိကြမည်မဟုတ်။

ထိုသီတင်းပတ်တပတ်တွင် ယဇ်ပူဇော်ခြင်းနှင့် ဆက်ကပ်ခြင်းပပျောက်စေမည်။ ရောမအစိုးရသည် ဤသရေလလူမျိုးအား ရွံရှာမုန်းတီးစွာ ဆက်ဆံမည်။ ယေဟောဝါဘုရားသခင်အား ဆက်ကပ်ပူဇော်ခြင်း ချီးမွမ်းခြင်းဟူသမျှ တားဆီးပိတ်ပင်မည်။

ရွံရှာဖွယ်သော အရာတို့၏ အထွဋ်ဆိုသည်မှာ စက်ဆုပ်ရွံရှာဘွယ်ရာ ရုပ်တုဆင်းတု၊ နတ်ရုပ်များဗိမာန်တော်၌ နေရာယူကြမည့်အကြောင်း ဖြစ်၏။ ထိုအရုပ်များကို ရှိခိုးကိုးကွယ်ခိုင်းမည့်အကြောင်း။ မ ၂၄:၁၅ တွင် တွေ့ရသည်။ အချို့က ထိုအထွဋ်(အတောင်) ဆိုသည်မှာ ဗိမာန်တော်ဖြစ်သည်ဟု ယူဆကြသည်။

“စီရင်ဆုံးဖြတ်သော သုတ်သင်ပယ်ရှင်းခြင်းသည် ပျက်စီးအပ်သောသူတို့ကို မလွှမ်းမိုးမီတိုင်အောင် ထိုသို့ ဖြစ်လိမ့်မည်။” ခုနှစ်ဆယ်သီတင်း၏ ဒုတိယပိုင်းကာလတွင် ကြောက်ရွံတုန်လှုပ်ဖွယ်ရာ ဘေးအန္တရာယ်ကြီးများ ဣသရေလလူမျိုးအပေါ် သက်ရောက်မည်။ ထိုကာလကို ဘေးဒဏ်ကြီးကာလဟု နားလည်ကြသည်။ ထို့နောက်ရောမအင်ပါယာ (ပျက်စီးအပ်သောသူ)သည် ကိုယ့်အကြောင်းနှင့်ကိုယ် ပျက်စီးဖို့ ဘုရားသခင်က ကံကြမ္မာ ဖန်ဆင်းထားသည်။ မီးအိုင်ထဲသို့ ပြစ်ချခြင်းခံရမည်(ဗျာ ၁၉:၂၀)။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။