တမန်တော်၀တ္ထု - ၁၀

ပေတရုနှင့်ကော်နေလိ
1ကဲသရိမြို့၌ ဣတလိတပ်ဟု ခေါ်ဝေါ်သောတပ်တွင် လူတစ်ရာကိုအုပ်ချုပ်သော တပ်မှူးကော်နေလိ အမည်တွင်သော သူတစ်ယောက်ရှိ၏။- 2ထိုသူသည် မိမိအိမ်တွင်ရှိသမျှသော သူတို့နှင့်တကွ ဘုရားဝတ်၌ မွေ့လျော်၍ ဘုရားသခင်ကို ကြောက်ရွံ့ခြင်းရှိသဖြင့် လူတို့အား များစွာသော စွန့်ကြဲခြင်းကိုပြု၍ ဘုရားသခင်ကို အစဉ်ဆုတောင်းလေ့ရှိ၏။- 3တစ်နေ့သ၌ နေသုံးချက်တီးအချိန်တွင် ဘုရားသခင်၏ ကောင်းကင်တမန်သည်၊ ကော်နေလိဟု ခေါ်လျက် ရောက်လာသည်ကို ထိုသူသည် ထင်ရှားသော ဗျာဒိတ်ရူပါရုံအားဖြင့် မြင်ရ၏။- 4ကောင်းကင်တမန်ကို စေ့စေ့ကြည့်လျှင် ထိတ်လန့်ခြင်းရှိသည် ဖြစ်၍၊ သခင်၊ အဘယ်အခင်းရှိပါသနည်းဟု မေးသော်၊ ကောင်းကင်တမန်က၊ သင်ပြုသောဆုတောင်းပတ္ထနာနှင့် စွန့်ကြဲပေးကမ်းခြင်းတို့သည် ဘုရားသခင့်ရှေ့တော်၌ အောက်မေ့စရာဖို့ တက်ကြပြီ။- 5ထိုကြောင့် ယခုပင်ယုပ္ပေမြို့သို့ လူတို့ကိုစေလွှတ်၍၊ ပေတရု အမည်သစ်ကိုရသော ရှိမုန်ကိုခေါ်ပင့်လော့။- 6ထိုသူသည် သားရေလုပ်သမားရှိမုန်၏အိမ်၌ တည်းနေ၏။ ထိုအိမ်သည် ပင်လယ်နားမှာရှိသည်ဟု ပြောဆို၏။- 7ထိုသို့ပြောဆိုသော ကောင်းကင်တမန်သွားပြီးမှ၊ ကော်နေလိသည် မိမိငယ်သားနှစ်ယောက်နှင့်တကွ မိမိထံ၌ မပြတ်ခစားသောလူစုအဝင်၊ ဘုရားဝတ်၌ မွေ့လျော်သော စစ်သူရဲတစ်ယောက်ကိုခေါ်၍၊- 8ထိုအကြောင်းအရာအလုံးစုံတို့ကို ကြားပြောပြီးမှ ယုပ္ပေမြို့သို့ စေလွှတ်၏။
9နက်ဖြန်နေ့၌ ထိုသူတို့သည် သွား၍ ယုပ္ပေမြို့အနီးသို့ ရောက်ကြသောအခါ၊ နှစ်ချက်တီးအချိန်တွင် ပေတရုသည် ဆုတောင်းခြင်းငှာ အိမ်မိုးပေါ်သို့ တက်လေ၏။- 10ဆာမွတ်၍ အစာအာဟာရကို အလိုရှိလျှင် သူတစ်ပါးတို့သည် အစာအာဟာရကို ပြင်ဆင်ကြစဉ်အခါ ပေတရုသည် ဘဝင်ဖြစ်၍နေသဖြင့်၊- 11ကောင်းကင်ဖွင့်လှစ်သည်ကိုလည်းကောင်း၊ ခြုံထည်ကဲ့သို့ လေးထောင့်ချုပ်၍ မြေသို့ချလွှတ်သော တန်ဆာသည် မိမိဆီသို့ ဆင်းသက်လာသည်ကိုလည်းကောင်း မြင်လေ၏။- 12ထိုတန်ဆာထဲ၌ သားရဲမှစ၍ မြေ၌ကျင်လည် သောသားမျိုး၊ တွားတတ်သော တိရစ္ဆာန်မျိုး၊ မိုးကောင်းကင်၌ ကျင်လည်သော ငှက်မျိုးတို့သည် ရှိကြ၏။- 13စကားအသံသည်လည်း၊ ပေတရုထ၍ သတ်စားလော့ဟု လာ၏။- 14ပေတရုကလည်း၊ မဖြစ်နိုင်ပါသခင်။ ညစ်ညူးသောအရာနှင့် မစင်ကြယ်သောအရာကို အကျွန်ုပ်သည် တစ်ရံတစ်ခါမျှ မစားဖူးပါဟု ပြောဆို၏။- 15နောက်တစ်ဖန် စကားသံကား၊ ဘုရားသခင် စင်ကြယ်စေတော်မူသောအရာကို ညစ်ညူးသည်မထင်နှင့်ဟု လာပြန်၏။- 16ထိုသို့ သုံးကြိမ်မြောက်အောင်လာပြီးလျှင်၊ ထိုတန်ဆာကို ကောင်းကင်ထဲသို့ သိမ်းရုပ်ပြန်လေ၏။
17ပေတရုသည် မိမိမြင်ရသော ဗျာဒိတ်ရူပါရုံကား၊ အဘယ်သို့ ဆိုလိုသနည်းဟု တွေးတောဆင်ခြင်၍ နေစဉ်တွင်၊ ကော်နေလိစေလွှတ်သောသူတို့သည် ရှိမုန်အိမ်ကို မေးမြန်းရှာဖွေ၍ တံခါးရှေ့မှာရပ်လျက်၊ 18ပေတရုအမည်သစ်ကိုရသော ရှိမုန်သည် ဤမှာတည်းနေပါ သလောဟု မေးမြန်းဟစ်ခေါ်ကြ၏။ 19ပေတရုသည် ထိုဗျာဒိတ်ရူပါရုံကို ဆင်ခြင်၍နေစဉ်တွင် ဝိညာဉ်တော်က၊ လူသုံးယောက်တို့သည် သင့်ကိုရှာကြ၏။- 20ထ၍ဆင်းလော့။ တွေးတောခြင်းမရှိဘဲ ထိုသူတို့နှင့်အတူ လိုက်သွားလော့။ အကြောင်းမူကား၊ ထိုသူတို့သည် ငါစေလွှတ်သော သူဖြစ်ကြသည်ဟု မိန့်တော်မူလျှင်၊- 21ပေတရုသည်ဆင်း၍၊ ငါကား၊ သင်တို့ရှာသောသူ ဖြစ်၏။ အဘယ်အကြောင်းရှိ၍ လာကြသနည်းဟု ထိုသူတို့အားမေး၏။- 22ထိုသူတို့ကလည်း ဘုရားသခင်ကိုကြောက်ရွံ့၍၊ ယုဒလူအပေါင်းတို့တွင် အသရေရှိသော သူတော်ကောင်းတည်းဟူသော တပ်မှူးကော်နေလိသည်၊ ကိုယ်တော်ကို မိမိအိမ်သို့ခေါ်ပင့်၍ ကိုယ်တော်၏စကားကို နားထောင်ရမည်အကြောင်း၊ သန့်ရှင်းသော ကောင်းကင်တမန်အားဖြင့် ဗျာဒိတ်တော်ကို ခံရပါသည်ဟု ပြန်ပြောကြ၏။- 23ပေတရုသည်လည်း ထိုသူတို့ကို အိမ်ထဲသို့ခေါ်၍ ဧည့်သည်ဝတ်ကို ပြုလေ၏။ နက်ဖြန်နေ့၌ထ၍ ထိုသူတို့နှင့်အတူ သွားသဖြင့်၊ ယုပ္ပေမြို့သားဖြစ်သော ညီအစ်ကို အချို့တို့သည် လိုက်ကြ၏။
24ထိုနောက်တစ်နေ့၌ ကဲသရိမြို့သို့ဝင်ကြ၍၊ ကော်နေလိသည် မိမိအဆွေအမျိုး မိတ်ဆွေခင်ပွန်းများတို့ကို စုဝေးစေပြီးလျှင်၊ ထိုသူတို့ကိုမျှော်လင့်လျက်နေကြ၏။- 25ပေတရုရောက်လာသောအခါ ကော်နေလိသည် ခရီးဦးကြိုပြု၍၊ ပေတရု၏ခြေရင်း၌ ပျပ်ဝပ်လျက် ကိုးကွယ်လေ၏။- 26ပေတရုသည် သူ့ကိုချီပင့်လျက်၊ ထလော့။ ငါကိုယ်တိုင် လူဖြစ်သည်ဟုဆို၏။- 27ထိုသို့နှုတ်ဆက်၍ ဝင်လေသော် စုဝေးလျက်ရှိကြသော လူများကိုတွေ့လျှင်၊- 28ပေတရုက၊ ယုဒလူဖြစ်သောသူတို့သည် တစ်ပါးအမျိုးသားတို့နှင့် မပေါင်းဖော် မချည်းကပ်အပ်သည်ကို သင်တို့သိကြ၏။ သို့သော်လည်း ညစ်ညူးသည် မစင်ကြယ်ဟု အဘယ်သူကိုမျှ မခေါ်ရမည်အကြောင်း၊ ဘုရားသခင်သည်၊ ငါ့အား ဆုံးမပြသတော်မူပြီ။- 29ထိုကြောင့် ငါ့ကိုခေါ်ကြသောအခါ ငါသည် မငြင်းမခုံဘဲလျက် လာ၏။ သို့ဖြစ်၍ အဘယ်အကြောင်းကြောင့် ငါ့ကိုခေါ်ကြသနည်း၊ ငါမေးလိုသည်ဟု ထိုသူတို့ အားပြောဆို၏။
30ကော်နေလိကလည်း၊ အကျွန်ုပ်သည် ယခုအချိန် နာရီတိုင်အောင် အစာရှောင်၍ သုံးချက်တီးအချိန်တွင် အိမ်၌ဆုတောင်းလျက် နေသည်၊ ယခု လေးရက်ရှိပါပြီ။ ထိုအချိန်၌ လူတစ်ယောက်သည် ထွန်းတောက်သောအဝတ်ကို ဝတ်လျက် အကျွန်ုပ် ရှေ့မှောက်၌ရပ်၍၊- 31ကော်နေလိ၊ သင်ပြုသောပတ္ထနာကို ဘုရားသခင်သည် ကြား၍၊ သင်စွန့်ကြဲခြင်းကိုလည်း မှတ်တော်မူပြီ။- 32ထိုကြောင့် ယုပ္ပေမြို့သို့စေလွှတ်၍ ပေတရု အမည်သစ်ကိုရသော ရှိမုန်ကို ခေါ်ပင့်လော့။ ထိုသူသည် ပင်လယ်နားမှာ သားရေလုပ်သမား ရှိမုန်၏အိမ်၌ တည်းနေ၏။ ထိုသူသည်ရောက်လာလျှင် သင့်အား ဟောပြောလိမ့်မည်ဟု ပြောဆိုပါ၏။- 33ထိုကြောင့် အကျွန်ုပ်သည် ကိုယ်တော်ထံသို့ အလျင်အမြန်စေလွှတ်၍၊ ကိုယ်တော်သည် ကြွလာသောအားဖြင့် ကောင်းမွန်စွာပြုပါပြီ။ သို့ဖြစ်၍ ဘုရားသခင်သည် ကိုယ်တော်၌မှာထားတော်မူသမျှကို နားထောင်ခြင်းငှာ၊ ယခုအကျွန်ုပ်တို့ရှိသမျှသည် ဘုရားသခင်ရှေ့တော်၌ အသင့်နေကြပါသည်ဟု ကော်နေလိ ပြောဆို၏။
ပေတရုဟောပြောချက်
34ထိုအခါပေတရုသည် နှုတ်ကိုဖွင့်၍၊ အကယ်စင်စစ် ဘုရားသခင်သည် လူမျက်နှာကို မှတ်တော်မမူ။-တရား၊ ၁၀:၁၇။ 35လူအမျိုးမျိုးတို့တွင် ဘုရားသခင်ကို ကြောက်ရွံ့၍ တရားသဖြင့် ကျင့်ဆောင်သောသူသည် အထံတော်၌ မျက်နှာရသည်ကို ငါသိမြင်၏။- 36အလုံးစုံတို့ကို အစိုးရတော်မူသော သခင်ယေရှုခရစ်အားဖြင့် ရန်ငြိမ်းခြင်းတရားတည်းဟူသော ဧဝံဂေလိတရားကို ဟောတော်မူလျက်၊ ဣသရေလ အမျိုးသားတို့အား ပေးလိုက်တော်မူသော တရားတော်နှင့်အညီ၊- 37ယောဟန်သည် ဗတ္တိဇံတရားကို ဟောသည်နောက် ဂါလိလဲပြည်မှစ၍ ယုဒပြည်အရပ်ရပ်တို့၌ နှံ့ပြားသော အကြောင်းအရာကို သင်တို့သည် သိကြ၏။- 38ထိုအကြောင်းအရာဟူမူကား၊ ဘုရားသခင်သည် သန့်ရှင်းသော ဝိညာဉ်တော်နှင့်လည်းကောင်း၊ တန်ခိုးတော်နှင့်လည်းကောင်း၊ နာဇရက်မြို့သား ယေရှုကို ဘိသိက်ပေးတော်မူသဖြင့်၊ ထိုသူသည် ဘုရားသခင်၏အခွင့်တော်နှင့် ကျေးဇူးပြုလျက်၊ မာရ်နတ်ညှဉ်းဆဲသော သူအပေါင်းတို့အား ချမ်းသာကိုပေးလျက် လှည့်လည်တော်မူ၏။- 39ငါတို့သည်လည်း၊ ယေရုရှလင်မြို့မှစ၍ ယုဒပြည်တွင်ပြုတော်မူသော အမှုများတို့၏ သက်သေခံဖြစ်ကြ၏။ ထိုသူကို သစ်တိုင်၌ဆွဲ၍ ကွပ်မျက်ကြလေ၏။- 40သုံးရက်မြောက်သောနေ့၌ ဘုရားသခင်သည် ထမြောက်စေတော်မူ၍၊- 41လူအပေါင်းတို့အား ထင်ရှားစွာပြတော်မမူ၊ ဘုရားသခင်ခန့်ထားတော်မူနှင့်သော သက်သေခံတည်းဟူသော ငါတို့အား ထင်ရှားစွာ ပြတော်မူ၏။ သေခြင်းမှ ထမြောက်တော်မူသည်နောက်၊ ထိုသခင်နှင့်အတူ ငါတို့သည် စားသောက်ရကြ၏။- 42ထိုသခင်သည်လည်း အသက်ရှင်သောသူတို့နှင့် သေသောသူတို့ကို တရားစီရင်သောသခင်ဖြစ်စေခြင်းငှာ၊ ဘုရားသခင် ခန့်ထားတော် မူကြောင်းကို လူအပေါင်းတို့အား ဟောပြောကြလော့။ သက်သေခံကြလော့ဟု ငါတို့အား ပညတ်ထားတော်မူ၏။- 43ထိုသခင်ကို ယုံကြည်သောသူရှိသမျှတို့သည် နာမတော်အားဖြင့် အပြစ်လွှတ်တော်မူခြင်း ကျေးဇူးကို ခံရကြလတ္တံ့ဟူ၍ ပရောဖက်အပေါင်းတို့သည် ထိုသခင်၏ သက်သေခံဖြစ်ကြသည်ဟု ပေတရုမြွက်ဆို၏။
လူမျိုးခြားအပေါ်သန့်ရှင်းသော ဝိညာဉ်တော်သက်ရောက်ခြင်း
44ထိုစကားကို မြွက်ဆိုစဉ်၊ နှုတ်ကပတ်တရားတော်ကို ကြားနာရသော သူအပေါင်းတို့အပေါ်သို့ သန့်ရှင်းသောဝိညာဉ်တော်သည် သက်ရောက်တော်မူ၏။- 45တစ်ပါးအမျိုးသားတို့ အပေါ်သို့ သန့်ရှင်းသော ဝိညာဉ်တော်၏ ကျေးဇူးကို သွန်းလောင်းသောကြောင့်၊ အရေဖျားလှီးခြင်းကို ခံသောသူတည်းဟူသော ပေတရုနှင့် ပါသမျှသော တပည့်တော်တို့သည် မိန်းမောတွေဝေခြင်းရှိကြ၏။- 46အကြောင်းမူကား၊ ထိုသူတို့သည် အမျိုးမျိုးသော ဘာသာစကားအားဖြင့်ပြော၍၊ ဘုရားသခင်ကို ချီးမွမ်းသည်ကို ကြားကြလေ၏။- 47ထိုအခါ ပေတရုက၊ ငါတို့ကဲ့သို့ သန့်ရှင်းသောဝိညာဉ်တော်ကိုခံရသော ဤသူတို့ကို ဗတ္တိဇံမပေးစေခြင်းငှာ အဘယ်သူသည် ရေကို မြစ်တားနိုင်သနည်း ဟုဆိုလျက်၊- 48သခင်ဘုရား၏နာမ၌ ဗတ္တိဇံကို ခံစေမည်အကြောင်း စီရင်လေ၏။ ထိုနောက်မှ ပေတရုသည် ကာလအတန်အရာ နေပါမည်အကြောင်းကို ထိုသူတို့သည် တောင်းပန်ကြ၏။

တမန်တော်၀တ္ထု - ၁၀ (အနက်ဖွင့်)

၁၀:၁-၂  ကဲသရိမြို့သည် ယုပ္ပေမြို့၏ မြောက်ဘက် မိုင် (၃၀)ခန့် အကွာတွင် ရှိသည်။ ထိုမြို့တွင် ရောမစစ်သူကြီး ကော်နေလိ ဆိုသူရှိသည်။ သူ့တပ်ကို ဣတလိတပ် ဟု ခေါ်ကြသည်။ ထိုသူ၏ အိမ်ထောင်မိသားစုဝင်များသည် ဘုရားတရား ကိုင်းရှိုင်းသူများဖြစ်သည်။ ဆင်းရဲသားများကိုလည်း ပေးကမ်းစွန့်ကြဲတတ်သော စေတနာသဒ္ဓါပွားများသူဖြစ်သည်။ Ryrie က “ယုဒတို့၏ ဘုရားနှင့် ရောမအစိုးရအား သစွာရှိသူဖြစ်သောကြောင့် ဘုရားသခင်ကို ယုံကြည်ချင်သော်လည်း ခြေစုံပစ်မဝင်ရဲသူဖြစ်သည်” ဟုဆိုထားသည်။၄၈

ကယ်တင်ခြင်းရမရကိုမူ မေးစရာဖြစ်သည်။ အပိုဒ်ငယ် ၂ နှင့် ၃၅ တွင် ပေတရုသည် ကောနေလိယကို ညွှန်းဖွဲ့၍ ဘုရားသခင်ကို ယုံကြည်သောသူသည် ယုံကြည်သည့်အတိုင်း ဖြောင့်မတ်စင်ကြယ်သဖြင့် ဘုရားသခင်က လက်ခံသည်ဟု ဆိုထားသည်။ အခန်း ၁၁:၁၄ တွင်မူ ကောင်းကင်တမန်များက ပေတရုအား ကယ်တင်ခြင်းအကြောင်း ပြောဖို့ဆိုထားသည်။

ဤနေရာတွင်မူ ဘုရားသခင်၏ အလင်းမြင်ရသော ကောနေလိယ ကို ပုံဥပမာယူရန်ဖြစ်သည်။ ဤမြင်ရသောအလင်းသည် ကယ်တင်ခြင်းရရှိဖို့ မလုံလောက်သောကြောင့် ဧဝံဂေလိသတင်း ထပ်မံကြားသိစေခြင်းဖြစ်ပေသည်။ ပေတရုနှင့် မတွေ့ဆုံမီတွင် ကယ်တင်ခြင်းစိတ်ချမှု မရရှိသေးပါ။ သို့သော် စစ်မှန်သော ဘုရားသခင်ကို ကိုင်းရှိုင်းကိုးကွယ်သူဖြစ်သည်။

၁၀:၃-၈  တနေ့သော ညနေ ၃ နာရီခန့်တွင် ဘုရားသခင်၏ ကောင်းကင်တမန်များက ကောနေလိယအား ဗျာဒိတ်ပေးသည်။ သူသည် တပါးအမျိုးသားဖြစ်၍ ယုဒလူမျိုးများကဲ့သို့ ကောင်းကင်တမန်များ၏ အမှုတော်မကြုံဘူးသဖြင့် လန့်ဖြန့်သွားသည်။ ဘုရားသခင်၏ ကောင်းကင်တမန်က သင်၏ ဆုတောင်းခြင်းနှင့် လှူဒါန်းခြင်းအား ဘုရားသခင်က လက်ခံတော်မူသောကြောင့် ယုပ္ပေမြို့ တောင်ဘက် ပင်လယ်ဆိပ်ကမ်းခြေတွင် ရှိမုန်အိမ်၌ ရှိမုန် ပေတရု စေလွှတ်ထားသည်။၄၉ သူ့ကို သွားပင့်လောဟု ဆိုသည်။ ကောနေလိယလည်း အထွေအထူး မစဉ်းစားတော့ဘဲ ယုံကြည်သူ တပည့်တစ်ယောက်နှင့် ခြေမြန်တော်စစ်သား (၂)ဦးအား သွားရောက်ပင့်ခိုင်းလိုက်သည်။

၁၀:၉-၁၄  နောက်တနေ့ မွန်းတည်းချိန်တွင် ပေတရုသည် ရှိမုန်၏ အိမ်ခေါင်မိုးပေါ်သို့ တက်၍ ဆုတောင်းသည်။ ဆာလောင်မွတ်သိပ်သဖြင့် အစားအစာအတွက် ဆုတောင်းသည်။ သို့သော် အစားအစာများ ပြင်ဆင်နေဆဲဖြစ်သဖြင့် မိုးပေါ်က ကျမလာသေးပါ။ ခဏနေသောအခါ မိုးကောင်းကင်ပွင့်လာပြီး ထောင့်လေးထောင့်မှ ချုပ်ကိုင်ထားသော မိုးကာကြီးကျလာသည်။ ထိုမိုးကာထဲတွင် ခြေလေးချောင်း သတ္တဝါမှစ၍ ငှက်များ၊ တွားသွားသတ္တဝါများ စင်ကြယ်သော၊ မစင်ကြယ်သော သတ္တဝါများ ပါဝင်သည်။ ကောင်းကင်ယံမှ ငတ်ကြီးပေတရုအား “သတ်စားလော့”ဟု ခိုင်းလိုက်သည်။ မောရှေကျမ်းအရ ယုဒများသည် မစင်ကြယ်သော အသားများ မစားရပါ။ ထို့ကြောင့် ပေတရုကလည်း “အရှင်ဘုရား ဤသတ္တဝါများသည် မစင်ကြယ်ကြပါ” ဟု ငြင်းဆိုသည်။

၁၀:၁၅-၁၆  ထိုသို့ ပေတရုတသက်လုံး ရှောင်ကြဉ်လာသော မစင်ကြယ်သည့် အစာများ ဆင်ခြေပေးသောအခါ ကောင်းကင်ယံမှ “ဘုရားသခင်က စင်ကြယ်သည်ဟု ဆိုထားသည်ကို အဘယ်ကြောင့် မစင်ကြယ်ဘူးဟု ဆိုသနည်း” ဟူသော အသံတော်ထွက်လာသည်။ (၃)ကြိမ်တိုင်တိုင် ပြောဆိုပြီးမှ ထိုသားကောင်များ ပါသောအချပ်ကြီးကို ပြန်လည်ရုတ်သိမ်းသွားသည်။

ထိုဗျာဒိတ်တော်ပါ စင်ကြယ်သော မစင်ကြယ်သောအစာသည် လေးနက်သည်။ ခရစ်ယာန်ယုံကြည်သူ အသက်တာတွင် အစားအသောက်သည် ရှောင်ကြဉ်စရာ၊ ကရိကထများစရာမဟုတ်ပါ။ ဤရူပါရုံသည် ရှင်းလင်းသော အဖြေစကားဖြစ်သည်။ ဘုရားသခင်သည် တပါးအမျိုးသားများအတွက်သာ မဟုတ်ပါ။ ယုဒအမျိုးအတွက်လည်း ဖြစ်ပါသည်။ ပေတရုသည် တပါးအမျိုးသားများကို တလောကလုံး မစင်ကြယ်ဟု မြင်ခဲ့သည်။ တပါးအမျိုးသားများ၏ အစာရေစာများကို မသတ်ခဲ့။ ယခု ဘုရားသခင်က အသစ်သတ်မှတ်ပေးထားသည်။ တပါးအမျိုးသားများသည် စင်ကြယ်သောအစာဟူ၍ ခွဲခြား အယူမသီးကြ။ ယုဒများသာ ဂျီးများကြသည်။ ယခု သန့်ရှင်းသောဝိညာဉ်တော်က အားလုံးသန့်ရှင်းသည်၊ လူတိုင်းမှီဝဲစားသုံးနိုင်သည်ဟု ပြဌာန်းသည်။ လူမျိုး၊ ဘာသာ၊ ယဉ်ကျေးမှုခွဲခြားမှုမရှိပါ။ ယေရှုခရစ်တော်ကို အမှန်တကယ် ယုံကြည်လက်ခံသူတိုင်း ခရစ်ယာန်မိဿဟာယ၌ တန်းတူ ပါဝင်ဆက်ဆံကြရသည်။

၁၀:၁၇-၂၃(က)  ထိုသို့ ပေတရုတွေ့မြင်နေစဉ် ကောနေလိယ၏ စေတမန်နှစ်ယောက်သည် အိမ်ရှေ့တွင် ရောက်နေကြသည်။ ဝိညာဉ်တော်၏ ပြောပြချက်ဖြင့် ပေတရုသည်လည်း အိမ်ခေါင်မိုးပေါ်မှ ဆင်းသက်လာပြီး ထိုဧည့်သည်များအား တွေ့ဆုံလက်ခံသည်။ ဧည့်သည်များက ပေတရုအား လာရောက်ပင့်ဖိတ်ခြင်းအကြောင်း ရှင်းပြပြီးသောအခါ ဧည့်သည်များကို ညအိပ်ခေါ်ထားပြီး နောက်တနေ့တွင် လိုက်ပါသွားသည်။

၁၀:၂၃(ခ)-၂၉  နောက်တနေ့တွင် ပေတရုသည် ကောနေလိယ လွှတ်လိုက်သော အကြိုတော် (၃)ဦး၊ ယုပ္ပေမြို့မှညီအကိုတို့နှင့် အတူ ကဲသရိမြို့သို့ သွားကြသည်။ တနေကုန် အပြင်းခရီးနှင်ကြသဖြင့် ကဲသရိမြို့သို့ နေ့ချင်းပေါက်ရောက်သွားကြသည်။

ကော်နေလိယ အိမ်သို့ ရောက်သောအခါ ကောနေလိယ၏ ဆွေမျိုးသားချင်းများ၊ မိတ်သဟာယများ စည်စည်ကားကားရှိနေကြသည်။ ပေတရုကို တွေ့သောအခါ ကောနေလိယသည် ခြေရင်းတွင် ဝပ်လျက် အရိုအသေပေး ခရီးဦးကြိုလိုက်သည်။ ပေတရုကလည်း “ထိုသို့မပြုရန်နှင့် သူလိုငါလို လူသားပင်ဖြစ်ကြောင်း” ပြော၍ ထခိုင်းလိုက်သည်။ ပေတရုသည် အောက်ကျို့နှိမ့်ချသူဖြင့်သဖြင့် အိမ်ရှင်အား ဒူးမထောက်ခိုင်းခြင်းဖြစ်သည်။

အိမ်ခန်းထဲသို့ဝင်၍ လူအုပ်တွေ့သောအခါ ပေတရုက “ယုဒအမျိုးသားသည် တပါးအမျိုးသားများ အိမ်ထဲသို့ဝင်ရောက်ရိုး ထုံးစံမရှိခဲ့။ သို့သော် ဘုရားသခင်တရားတော်ကြောင့် တပါးအမျိုးသားနှင့် မဆက်ဆံစရာအကြောင်း မရှိတော့ပါ။ ယခု အဘယ်အကြောင်းကြောင့် ဖိတ်ခေါ်ပါသနည်း”ဟု မေးသည်။

၁၀:၃၀-၃၃  ကော်နေလိက လွန်ခဲ့သော ၄ရက်နေ့တွင် ကောင်းကင်တမန်က ရူပါရုံပေးကြောင်း ဆုတောင်းနေစဉ် ပေတရုကို စေလွှတ်ပေးမည်ဟု ဗျာဒိတ်ပေးကြောင်း၊ ထို့ကြောင့် ဖိတ်ခေါ်ကြောင်းရှင်းပြသည်။ နှုတ်ကပတ်တော်ငတ်မွတ်နေသော တပါးအမျိုးသားများ၏ အာသီယဖြစ်သည်။ ထာဝရဘုရား မိန့်တော်မူသမျှသော တရားတော်တို့ကို ကြားနာရန် ကျွန်ုပ်တို့သည် ရှေ့တော်မှောက်သို့ ရောက်နေကြပြီ ဟု ဆိုသည်။ ဝိညာဉ်တော်ဖြင့် ဖွင့်ပြသော နှုတ်ကပတ်တော်များ ကြားနာကြပေမည်။

၁၀:၃၄-၃၅  ပေတရုက သူ့တရားဒေသနာကို မွှေးရနံ့သာ စကားဖြင့် အစပြုသည်။ ဘုရားသခင်သည် ဣသရေလအမျိုးသားအတွက်သာဖြစ်သည်ဟု ယခင်က ထင်မှတ်ခဲ့သည်။ ယခု အမှန်တကယ် သိရှိလာသောအခါ ဘုရားသခင်သည် လူပုဂ္ဂိုလ်နှင့် လူမျိုးရေး မခွဲခြားပါ။ စိတ်နှလုံးသဘောရင်းနှင့် ယုံကြည်သူကို လက်ခံသည်။ ယုဒအမျိုးဖြစ်စေ၊ တပါးအမျိုးသားဖြစ်စေ တကယ်ယုံကြည်သူကို လက်ခံပါသည်။ မည်သည့် လူမျိုးတိုင်း နိုင်ငံသားမဆို ရိုးသားဖြူစင်စွာ ယုံကြည်သူကို သခင်ဘုရားအလိုတော်ရှိသည်။

အပိုဒ်ငယ် ၃၅ ကို (၂)မျိုး အနက်ဖွင့်ဆိုနိုင်သည်။

၁။ အချို့ သခင်ယေရှုကို မကြားဘူးသော်လည်း စိတ်နှလုံးအရင်းဖြင့် ဘုရားသခင်ကို ရှာဖွေတွေ့ရှိသူသည် ကယ်တင်ခြင်းရရှိသည်ဟု ဆိုကြသည်။ ထိုသူကိုယ်တိုင်က ခရစ်တော်၏ လူသားများအစား အသေခံပေးခြင်းကို မသိရှိသော်လည်း ဘုရားသခင်ကို သိကျွမ်းလျှင်စင်ကြယ်စေ၍ ကယ်တင်ခြင်းပေးသည်ဟု ယုံကြည်သည်။ သမ္မာတရားစစ်စစ်ကို တွေ့ရှိလျှင် ခရစ်တော်၏အမှုကို ရေတွက်သူဖြစ်သည်ဟု ထင်မှတ်ကြသည်။

၂။ နောက်ရှုထောင့်တစ်မျိုးမှာ အကျင့်တရားမည်မျှ ကောင်းမွန်၍ ဘုရားသခင်ကို သိကျွမ်းစေကာမူ ကယ်တင်ခြင်းမရ။ ကယ်တင်ခြင်းဆိုသည်မှာ ယေရှုခရစ်တော်အားဖြင့်သာလျှင် ဖြစ်သည်။ လူတစ်ဦးသည် ဘုရားသခင်၏ အလင်းထဲသို့ရောက်ရှိလျှင် သခင်ဘုရားကို မြင်ရသည်။ သခင်ဘုရားကို မြင်ရလျှင် ဧဝံဂေလိသတင်းစကား ကြားသိရသည်။ ထိုမှသာလျှင် ကယ်တင်ခြင်းစိတ်ချရသည်ဟု ဆိုကြသည်။

စာရေးသူသည် ဒုတိယရှုထောင့်ကို ပိုမိုအသားပေးချင်ပါသည်။

၁၀:၃၆-၃၈  ပေတရုက တရားနာ ပရိသတ်အား ဧဝံဂေလိသတင်းစကားသည် ဦးစွာယေရှုခရစ်အားဖြင့် ယုဒလူမျိုးများသို့ ပေးသည်မှာ မှန်ပါသည်။ ယခုမူ ယုဒလူမျိုးနှင့် တပါးအမျိုးသားအားလုံးအတွက်ဖြစ်သည်ဟု ရှင်းပြသည်။ တရားနာပရိသတ်ကလည်း နာဇရက်ယေရှုသည် ဂါလိလဲမှအစ ပြု၍ ယောဟန်ထံတွင် နှစ်ခြင်းမင်္ဂလာခံယူသည်။ ယုဒပြည်အနှံတွင် လှည့်လည်သည်ဟု သိရှိကြပြီးဖြစ်သည်။ ထိုယေရှုသည် ဝိညာဉ်တော်ဖြင့် ဘိသိက်ပေးထားသူဖြစ်သည်။ မိမိအကျိုးတစ်ခုမှ မလုပ်သူများ အကျိုးသာဆောင်သည်။ နေမကောင်း မကျန်းမာသူများ အနာရောဂါကင်းငြိမ်းစေသည်။ နတ်ဆိုးစွဲသူများ နတ်ဆိုးနှင်ထုတ်ပေးသည်။ ဆင်းရဲသူများကူညီမစသည်။

၁၀:၃၉-၄၁  တပည့်တော်များသည် ယေရှုသခင်၏ လုပ်ဆောင်ချက်များအား သက်သေခံကြသည်။ ယေရှုနှင့်အတူ ယေရုရှလင်မြို့မှစ၍ ကျေးရွာအနှံ့ခြေဆန့်ခဲ့ကြသည်။ ထို ယေရှုသည် ဖြောင့်မတ်စင်ကြယ်သူဖြစ်သော်လည်း လူရမ်းကားများက ကားတိုင်သို့ ပို့ခဲ့ကြသည်။ သူသေများအလယ်တွင် (၃) ရက်နေပြီးသောအခါ ရှင်ပြန်ထမြောက်သည်။ ဘုရားသခင်ကြိုတင် ရွေးချယ်ထားသောသူများသာလျှင် ထိုအမှုအရာကို ဖူးမြင်ခွင့်ရကြသည်။ လူတိုင်းသိမြင် ဖူးမျှော်ခွင့်ရသည်မဟုတ်။ သခင်ဘုရားသည် ရှင်ပြန်ထမြောက်သည့်တိုင်အောင် မယုံကြည်သူများက မြင်ခွင့်ရသည်မဟုတ်။ တပည့်တော်များသာ မြင်ရ၍အတူနေ၊ အတူစားသောက်ခဲ့ကြသည်။ သခင်ဘုရားသည် မျက်မြင်ကိုယ်တွေ့လက်ဖြင့် တုထိကိုင်တွယ်နိုင်သော ခန္ဓာကိုယ်ဖြင့် အမှန်တကယ် ထမြောက်သည်။

၁၀:၄၂  သခင်ယေရှုထမြောက်သောအခါ သူသည် အသက်ရှင်သူဖြစ်စေ၊ သေလွန်သူဖြစ်စေ တရားစီရင်မည့်သူဖြစ်ကြောင်း တပည့်တော်များအား လိုက်လံကြေညာခိုင်းသည်။ ထိုကျမ်းစကားသည် ခမည်းတော်က သားတော်အား တရားစီရင်ခွင့်အာဏာလွှဲအပ်ထားကြောင်း(ယော ၅:၂၂)နှင့် ကျမ်းစကားသက်သေဖြစ်သည်။ ဆိုလိုသည်မှာ ယုဒလူမျိုးဖြစ်စေ၊ တပါးအမျိုးသားဖြစ်စေ သခင်ယေရှုက တရားစီရင်ခွင့်ရှိသည်။

၁၀:၄၃  သို့သော် ဤကျမ်းပိုဒ်သည် အပြစ်စီရင်ခြင်းအကြောင်းကို အဓိကဖေါ်ပြသည်မဟုတ်။ အပြစ်စီရင်ခြင်းမှ ကင်းလွတ်ရာ ဧဝံဂေလိသတင်းစကား အကြောင်းကို မီးမောင်းထိုးပြလိုခြင်းဖြစ်သည်။  ရှေ့ပရောဖက်များက မေရှိယကို ယုံကြည်လက်ခံလျှင် အပြစ်မှ ကင်းစင်သည်ဟု ဟောပြောခဲ့ကြပြီးဖြစ်သည်။  ထိုစကားသည် ဣသရေလလူမျိုးများသာမဟုတ်၊ တကမ္ဘာလုံးနှင့်သက်ဆိုင်သည်။ စာရှုသူလည်း အပြစ်ကင်းလွတ်ခွင့်ရချင်ပါသလား။ ယေရှုကိုယုံလိုက်ပါ။

၁၀:၄၄-၄၈  ထိုသို့ တပါးအမျိုးသားများထံသို့ ပေတရုဟောကြားနေစဉ် တပါးအမျိုးသားများသည် သန့်ရှင်းသောဝိညာဉ်တော် သွန်းလောင်းခြင်းခံရကြသည်။ ဘာသာစကားအမျိုးမျိုးဖြင့် ဘုရားသခင်အား ချီးမွမ်းကိုးကွယ်ကြသည်။ ထိုနိမိတ်လက္ခဏာသည် ကောနေလိယနှင့် အိမ်ထောင်မိသားစု၌ သန့်ရှင်းသောဝိညာဉ်တော် အမှန်တကယ်သက်ရောက်သည့် လက္ခဏာဖြစ်သည်။ ယုပ္ပေမြို့မှ အလည်လာရောက်ကြသော ယုဒအမျိုးသားများသည် တပါးအမျိုးသားများက ထိုကဲ့သို့ သန့်ရှင်းသောဝိညာဉ်တော် သွန်းလောင်းခြင်းခံရကြောင်း တွေ့မြင်ကြသောအခါ အံ့အားသင့်ကုန်သည်။ ပေတရုက ထိုသူများသည်လည်း ယုဒလူမျိုးများနှင့် ကွဲပြားခြားနားခြင်းမရှိ၊ ဘဝတူဖြစ်ကြောင်း ရှင်းပြသည်။ ဘုရားသခင်က ယုဒလူ၊ တပါးအမျိုးသားလူဟူ၍ ခွဲခြားခြင်းမရှိပါ။ သို့နှင့် ကောနေလိယအိမ်တော်မိသားစုဝင်များကို ရေနှစ်ခြင်းမင်္ဂလာပေးလိုက်သည်။

ဤနေရာတွင် မှတ်သားပါ။ တပါးအမျိုးသားများသည်လည်း ယုဒအမျိုးသားကဲ့သို့ သန့်ရှင်းသောဝိညာဉ်တော်သွန်းလောင်း ခြင်းခံရသည်။ တပါးအမျိုးသားများသည် အရေဖျားလှီးခြင်း၊ ပညတ်တော်စောင့်ထိန်းခြင်း၊ ဘာသာရေးအစဉ်အလာ အယူသီးခြင်း ရှိသူများမဟုတ်၊ ရိုးစင်းစွင် ယုံကြည်ကြသူများဖြစ်သည်။

တပါးအမျိုးသားများ၏ သန့်ရှင်းသောဝိညာဉ်တော် ခံယူရရှိပုံကို မှတ်သားပါ။

၁။ နှုတ်ကပတ်တော် ကြားနာကြသည်။ ကြားသိရသည့်အတိုင်း ယုံကြည်ကြသည်။ (ငယ် ၄၄)

၂။ သန့်ရှင်းသောဝိညာဉ်တော်ကို ခံယူကြသည်။ (ငယ် ၄၄-၄၇)

၃။ နှစ်ခြင်းမင်္ဂလာခံယူကြသည် ။ (ငယ် ၄၈)

ဤအဖြစ်အပျက်သည် ယုဒလူမျိုးနှင့် တပါးအမျိုးသားများအကြားတွင် ဘုရားသခင်၏ သီးသန့်ခွဲခြားမှုမရှိကြောင်း အထောက်အထားဖြစ်သည်။

တပါးအမျိုးသား ကဲသရိသားက သန့်ရှင်းသော ဝိညာဉ်တော် လက်ခံရရှိကြသောအခါ ရွှင်လန်းဝမ်းမြောက်ကြသဖြင့် ပေတရုအား  သူတို့နှင့်အတူနေရန် တောင်းပန်ကြ၍ ရက်အနည်းငယ်သောင်တင်ခဲ့သည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက  http://bbcmm.net/the-believers-bible-commentary  တွင် လေ့လာနိုင်ပါသည်။

[post-views]

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။