Amos -6 -

အာမုတ်အနာဂတ္တိကျမ်း - ၆

ဣသရေလနိုင်ငံပျက်စီးခြင်း

1ဇိအုန်မြို့၌ ငြိမ်ဝပ်စွာနေသောသူ၊ ရှမာရိတောင်ပေါ်မှာ စိုးရိမ်ခြင်းနှင့် ကင်းလွတ်လျက်နေသောသူ၊ လူမျိုးတို့တွင် အထွတ်အမြတ်ဟူ၍ ခေါ်ဝေါ်သောသူ၊ ဣသရေလအမျိုးဆည်းကပ်သောသူတို့သည် အမင်္ဂလာ ရှိကြ၏။ 2ကာလနေမြို့သို့ သွား၍ ကြည့်ရှုကြလော့။ ထိုမြို့မှ ဟာမတ်ကြီးမြို့သို့လည်းကောင်း၊ ဖိလိတ္တိလူတို့နေသော ဂါသမြို့သို့လည်းကောင်း သွားကြလော့။ ထိုနိုင်ငံတို့သည် ဤနိုင်ငံတို့ထက် သာ၍ ကောင်းသလော။ သူတို့နယ်အပိုင်းအခြားသည် သင်တို့ နယ်အပိုင်းအခြားထက် သာ၍ ကျယ်သလော။ 3ဆိုးယုတ်သော နေ့ရက်ကို ရွှေ့၍၊ မတရားသဖြင့် စီရင်ရာပလ္လင်ကို အနီးမှာတည်စေခြင်း၊ 4ဆင်စွယ်ခုတင်ပေါ်မှာအိပ်၍ မွေ့ရာပေါ်မှာလျောင်းခြင်း၊ သိုးစုထဲက သိုးသငယ်တို့ကိုလည်းကောင်း၊ နွားတင်းကုပ်ထဲက နွားသငယ်တို့ကိုလည်းကောင်း ယူ၍စားခြင်း၊ 5တယောထိုးသံနှင့်ပြိုင်လျက် သီချင်းဆိုခြင်း၊ တီးမှုတ်ရာ တူရိယာမျိုးအသစ်ကို ဒါဝိဒ်မင်းရှာ၍ လုပ်သကဲ့သို့ လုပ်ခြင်း၊ 6စပျစ်ရည်ကို ဖလားနှင့်သောက်၍၊ အဖိုးထိုက်သော နံ့သာဆီနှင့် လိမ်းခြင်းတို့ကိုပြု၍၊ ယောသပ်အမျိုး ဆင်းရဲခံရသည်ကို စိတ်မနာကျင်ဘဲနေသော၊ 7ထိုသူတို့သည် အဦးဆုံးသိမ်းသွားခြင်းကို ခံရသောသူတို့နှင့်အတူ ပါသွားကြလိမ့်မည်။ လျောင်း၍နေသောသူတို့၏ ပွဲသည်လည်း ကွယ်ပျောက်ရလိမ့်မည်။

8ကောင်းကင်ဗိုလ်ခြေအရှင် ဘုရားသခင်ထာဝရဘုရား မိန့်တော်မူသည်ကား၊ အရှင်ထာဝရဘုရားသည် ကိုယ်ကိုတိုင်တည်၍ ကျိန်ဆိုတော်မူသည်အတိုင်း၊ ယာကုပ်၏မာနကိုငါရွံရှာ၍ သူ၏ဘုံဗိမာန်တို့ကို မုန်းသောကြောင့်၊ မြို့တော်နှင့် မြို့၌ရှိသမျှကို ငါစွန့်ပစ်မည်။ 9အိမ်တစ်ဆောင်တွင် လူတစ်ကျိပ်ကျန်ကြွင်းသော်လည်း သေကြလိမ့်မည်။ 10ပေါက်ဖော်တော်၍ မီးဖြင့် သင်္ဂြိုဟ်ရသောသူသည် အိမ်ထဲကအသေကောင်ကိုထုတ်၍ ချီသွားသောအခါ၊ အိမ်အတွင်းတွင်ရှိသော သူကိုခေါ်၍၊ သင်၌ တစ်စုံတစ်ယောက် ကျန်ကြွင်းသေးသလောဟု မေးသော်၊ မကျန်ကြွင်းဟု ပြန်ပြောလိမ့်မည်။ ထမ်းသွားသောသူကလည်း၊ တိတ်ဆိတ်စွာနေလော့။ ထာဝရဘုရား၏နာမတော်ကို ချီးမွမ်းရသော အခွင့်မရှိဟု ပြောဆိုလိမ့်မည်။ 11အကြောင်းမူကား၊ ထာဝရဘုရားအမိန့်တော်ရှိသဖြင့်၊ အိမ်ကြီးကိုဖြို၍ အိမ်ငယ်ကိုလည်း ကွဲစေတော်မူလိမ့်မည်။ 12မြင်းသည် ကျောက်ပေါ်မှာ ပြေးတတ်သလော။ လူသည် ကျောက်ပေါ်မှာ နွားနှင့် ထွန်တတ်သလော။ သင်တို့သည်တရားသဖြင့် စီရင်ခြင်းကို ခါးစွာသော သစ်ရွက်ဖြစ်စေခြင်းငှာလည်းကောင်း၊ ဖြောင့်မတ်ခြင်းကို ဒေါနရွက် ဖြစ်စေခြင်းငှာလည်းကောင်း ပြုကြသည်တကား။ 13အချည်းနှီးသောအရာ၌ ဝါကြွားဝမ်းမြောက်၍၊ ငါတို့သည် ကိုယ်အစွမ်းသတ္တိအားဖြင့် အာဏာကိုသိမ်းယူပြီမဟုတ်လောဟု ဆိုတတ်ကြသည်တကား။ 14အကယ်စင်စစ်၊ အို ဣသရေလအမျိုး၊ သင်တို့တစ်ဖက်၌ လူတစ်မျိုးကို ငါထစေ၍၊ ထိုလူမျိုးသည် ဟာမတ်မြို့လမ်းဝမှစ၍ တော၌ရှိသော မြစ်တိုင်အောင် သင်တို့ကို ညှဉ်းဆဲလိမ့်မည်ဟု၊ ကောင်းကင်ဗိုလ်ခြေအရှင် ဘုရားသခင်ထာဝရဘုရားမိန့်တော်မူ၏။

အာမုတ်အနာဂတ္တိကျမ်း - ၆ (အနက်ဖွင့်)

(င) ဒုတိယအမင်္ဂလာ (အခန်း ၆)

၆:၁– ၈ ဇိမ်ခံခြင်း၊ ချမ်းသာခြင်း၊ သာယာခြင်းနှင့် ဘဝလုံခြုံခြင်းများကို အနိုင်အထက်အပြုခံရမည်။ “ဆင်စွယ်ကုတင်မွေ့ယာပေါ်မှာလဲလျောင်းတတ်သူများ ၊ မြိန်ပေ့၊ ကောင်းပေ့ဟူသော အစားအသောက်ကို သောက်စားယစ်ကြူးသူများ၊ အဖိုးတန်နံ့သာရေမွှေးနှင့် ပန်းကုံးကမ်းခြင်းခံရသူများ အမင်္ဂလာသင့်ကြပြီ။ ထို့ကြောင့်ထာဝရဘုရားက “ယာကုပ်၏မာနကို ငါရွံရှာ၍ သူတို့ဗိမာန်ကို မုန်းသောကြောင့် မြို့တော်၌ ရှိသမျှကို ငါစွန့်ပစ်မည်” ဟုဆိုသည်။ ရှမာရိလူများသည် အာရှုရိများလက်ထက်သို့ ကျရောက်သွားကြမည်။

၆:၉–၁၀ ဤကျမ်းပိုဒ်အား Page H. Kelly ကဤသို့ရှင်းပြသည်။ မမျှော်လင့်သော ကပ်ရောဂါဆိုး ကျရောက်သဖြင့် မြေပြင်တဝှမ်းလုံးတွင် ဒုက္ခရောက်ကြမည်။ သမရိုးကျမြေမြှုပ်သင်္ဂြိုင်ခြင်းမပြုနိုင်အောင် သေကြေကြသဖြင့် အလောင်းများကို မီးပုံရှို့ကြရမည်။ အလောင်းထုတ်ဖို့ ချဉ်းကပ်လာကြသော ဆွေမျိုးသားခြင်းများလည်း မီးကူးလောင်ကျွမ်းရမည်။ ထိုမြင်ကွင်းကြောင့် အချို့သည် ပုန်းကွယ်နေကြမည်။ အိမ်သူအိမ်သားများက ထွက်လာရန်အော်ခေါ်ကြမည်။ထိုလူများသည် အတိတ်ကအပြစ်များကြောင့် ဘုရားသခင်၏ နာမတော်အားမခေါ်ဝံ့ကြ။ ဘုရားသခင်၏ အမျက်ဒေါသ သင့်ကြသည်။ ယနေ့ခေတ်ကာလတိုင် အော်သိုဒေါက်ဂျူးများသည် ဣသရေလတို့၏ ဘုရားသခင်နာမတော်အား မခေါ်ဝံ့ကြသကဲ့သို့ ဖြစ်ပေမည်။၅

၆:၁၁–၁၄ ဣသရေလတို့၏ အပြုအမူများသည် ကျောက်ပေါ်မှာ နွားဖြင့်လယ်ထွန်သကဲ့သို့ မိုက်ရူးနေကြသည်။ သူတို့၏တရားမျှတခြင်း၊ ဖြောင့်မတ်ခြင်းများသည် ရယ်မောဟားတိုက်စရာသာဖြစ်သည်။ စစ်အင်အားပေါ်တွင် ဂုဏ်ယူမာန်တက်၍ Lo Debar နှင့် Karnaim ကို သိမ်းပိုက်နိုင်မည် ထင်ကြသည်။ သို့သော် စင်စစ်တွင် အာရှုရိများက မြောက်ဘက်ဝင်ပေါက်ဟာမတ်မြို့မှ တောင်ဘက်နယ်နိမိတ်အဆုံး အာရာဗလွင်ပြင်တိုင်အောင် တိုက်ခိုက်သိမ်းပိုက်ကြလိမ့်မည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။