2 Chronicles -32 -

ရာဇဝင်ချုပ်ဒုတိယစောင် - ၃၂

သနာခရိပ်တိုက်ခိုက်ခြင်း

(၄ ရာ၊ ၁၈:၁၃-၃၇၊ ဟေရှာ၊ ၃၆:၁-၂၂)

1ထိုအမှုများတို့ကို လက်စသတ်သည်နောက်၊ အာရှုရိရှင်ဘုရင် သနာခရိပ်သည်၊ ယုဒပြည်သို့စစ်ချီ၍ ခိုင်ခံ့သောမြို့တို့ကို ဝိုင်းထားလျက် တိုက်ယူခြင်းငှာ အားထုတ်လေ၏။ 2ထိုသို့ သနာခရိပ်သည်လာ၍၊ ယေရုရှလင်မြို့ကို တိုက်မည့်အကြံရှိကြောင်းကို၊ ဟေဇကိသည်သိမြင်လျှင်၊ 3မြို့ပြင်၌ရှိသော စမ်းရေကိုဖြတ်ခြင်းငှာ မှူးမတ်၊ စစ်သူကြီးတို့နှင့် တိုင်ပင်၍။ သူတို့သည် ဝိုင်းလုပ်ကြ၏။ 4အာရှုရိရှင်ဘုရင်တို့သည်လာ၍၊ များစွာသောရေကို အဘယ်ကြောင့်တွေ့ရမည်နည်းဟု လူများတို့သည်ဆိုလျက်၊ စုဝေး၍ စမ်းရေတွင်းရှိသမျှကို ပိတ်ကြ၏။ ပြည်အလယ်၌ စီးသောချောင်းရေကိုလည်း ဖြတ်ကြ၏။ 5ဟေဇကိသည်လည်း ကိုယ်ကို ခိုင်ခံ့စေ၏။ ပြိုသောမြို့ရိုးရှိသမျှကို ပြုပြင်၍၊ ရဲတိုက်တို့နှင့် တညီတည်းတည်၏။ ပြင်မြို့ရိုးကိုလည်း တည်၏။ ဒါဝိဒ်မြို့၌ မိလ္လောရဲတိုက်ကိုလည်း ပြုပြင်၍၊ များစွာသော လှံလက်နက်ဒိုင်း လွှားတို့ကိုလည်း လုပ်လေ၏။ 6လူများတို့တွင် တပ်မှူးတို့ကိုခန့်ထား၍၊ မြို့လမ်းမ၌ စုဝေးစေသဖြင့်၊ အားပေးသောစကားကို ပြောလျက်၊ 7ခွန်အားယူ၍ ရဲရင့်ခြင်းရှိကြလော့။ အာရှုရိ ရှင်ဘုရင်နှင့် သူ၌ပါသောအလုံးအရင်း အပေါင်းတို့ ကြောင့် မကြောက်ကြနှင့်။ စိတ်မပျက်ကြနှင့်။ ငါတို့ဘက်၌နေသော သူတို့သည်၊ သူ့ဘက်၌ နေသောသူတို့ထက်သာ၍ များကြ၏။ 8သူ့ဘက်၌ လူလက်ရုံးရှိ၏။ ငါတို့ဘက်၌ ထောက်မ၍၊ စစ်ကူတော်မူသော ငါတို့၏ဘုရားသခင် ထာဝရဘုရားရှိတော်မူသည်ဟု မိန့်တော်မူ၏။ လူများတို့သည် ယုဒရှင်ဘုရင်ဟေဇကိ၏စကားကို ကိုးစားကြ၏။

9ထိုနောက် အာရှုရိရှင်ဘုရင်သနာခရိပ်သည် ဗိုလ်ခြေအပေါင်းတို့နှင့်တကွ၊ လာခိရှမြို့ကိုဝိုင်းထားစဉ်တွင်၊ မိမိကျွန်အချို့ကို ယေရုရှလင်မြို့၊ ယုဒရှင်ဘုရင်ဟေဇကိထံသို့လည်းကောင်း၊ ယေရုရှလင်မြို့၌ရှိသော ယုဒလူအပေါင်းတို့ရှိရာသို့လည်းကောင်း စေလွှတ်၍၊ 10အာရှုရိရှင်ဘုရင်သနာခရိပ် မိန့်တော်မူသည်ကား၊ သင်တို့သည် ယေရုရှလင်မြို့၌ ဝိုင်းထားခြင်းကို ခံခြင်းငှာ၊ အဘယ်သို့ခိုလှုံကြသနည်း။ 11ဟေဇကိက၊ ငါတို့၏ဘုရားသခင် ထာဝရဘုရားသည် ငါတို့ကို အာရှုရိရှင်ဘုရင်လက်မှ ကယ်လွှတ်တော်မူမည်ဟုဆိုလျက်၊ မွတ်သိပ်ခြင်း၊ ရေငတ်ခြင်းအားဖြင့် အသေခံရသည်တိုင်အောင်၊ ကိုယ်ကိုစွန့်ပစ်စေခြင်းငှာ၊ သင်တို့ကို ဖြားယောင်းသည်မဟုတ်လော။ 12ထိုဟေဇကိသည် ထာဝရဘုရား၏ မြင့်သောအရပ်ဌာနနှင့် ယဇ်ပလ္လင်တို့ကို ပယ်၍၊ သင်တို့သည် တစ်ခုတည်းသော ယဇ်ပလ္လင် ရှေ့မှာ ကိုးကွယ်ရမည်။ ထိုယဇ်ပလ္လင်ပေါ်မှာ နံ့သာပေါင်းကို မီးရှို့ရမည်ဟု ယုဒပြည်သူ ယေရုရှလင်မြို့သားတို့ကို မိန့်တော်မူပြီမဟုတ်လော။ 13ငါနှင့် ငါ့ဘိုးဘေးတို့သည် အတိုင်းတိုင်းအပြည်ပြည်တို့၌ အဘယ်သို့ပြုသည်ကို သင်တို့မသိကြသလော။ အတိုင်းတိုင်းအပြည်ပြည် ဘုရားတို့သည် မိမိတို့ပြည်များကို ငါ့လက်မှ ကယ်လွှတ်ခြင်းငှာ တတ်စွမ်းနိုင်သလော။ 14ငါ့ဘိုးဘေးအကုန်အစင်ဖျက်ဆီးသော တိုင်းနိုင်ငံတို့၏ ဘုရားတို့တွင်၊ အဘယ်မည်သောဘုရားသည် မိမိပြည်ကို ငါ့လက်မှ ကယ်လွှတ်ဖူးသနည်း။ သင်တို့၏ဘုရားသည် သင်တို့ကိုငါ့လက်မှ အဘယ်သို့ကယ်လွှတ်မည်နည်း။ 15သို့ဖြစ်၍၊ ဟေဇကိသည် သင်တို့ကိုမလှည့်စားစေနှင့်။ ထိုသို့ မဖြားယောင်းစေနှင့်။ သူ့စကားကို မယုံကြနှင့်။ အခြားသော တိုင်းနိုင်ငံ၌ ကိုးကွယ်သောဘုရားမည်မျှသည်၊ မိမိပြည်ကိုငါ့လက်မှလည်းကောင်း၊ ငါ့ဘိုးဘေးလက်မှလည်းကောင်း မကယ်မလွှတ်နိုင်။ ထိုမျှမက၊ သင်တို့၏ဘုရားသည် သင်တို့ကို ငါ့လက်မှ မကယ်မလွှတ်နိုင်ဟု မှာလိုက်လေ၏။ 16သူ့ကျွန်တို့သည် ထာဝရအရှင်ဘုရားသခင်တစ်ဖက်၊ ဘုရားသခင်၏ကျွန်ဟေဇကိတစ်ဖက်၌ သာ၍ ပြောဆိုကြ၏။ 17ထိုမှတစ်ပါး အခြားသောတိုင်းနိုင်ငံဘုရားတို့သည်၊ မိမိလူများကို ငါ့လက်မှ မကယ်မလွှတ်နိုင်သည် နည်းတူ၊ ဟေဇကိကိုးကွယ်သော ဘုရားသည်၊ သူ၏လူများကို ငါ့လက်မှ မကယ်မလွှတ်ရဟုဣသရေလအမျိုး၏ ဘုရားသခင်ထာဝရဘုရားကို ကဲ့ရဲ့ပြစ်တင်သောစာကိုရေး၍ ပေးလိုက်သေး၏။ 18တစ်ဖန်မြို့ရိုးပေါ်မှာရှိသော ယေရုရှလင်မြို့သားတို့ကို ခြိမ်းခြောက်နှောင့်ယှက်၍၊ မြို့ကိုတိုက်ယူနိုင်အောင်၊ ယုဒဘာသာစကားအားဖြင့် ကျယ်သော အသံနှင့် ကြွေးကြော်ကြ၏။ 19လူတို့လက်ဖြင့် လုပ်သောဘုရား၊ မြေကြီးသားများ ကိုးကွယ်သော ဘုရားတို့နှင့် ယေရုရှလင်မြို့ဘုရားသခင်ကို ရော၍ ကဲ့ရဲ့ကြ၏။

20ထိုအကြောင်းကြောင့်၊ ဟေဇကိမင်းကြီးနှင့် အာမုတ်သား ပရောဖက်ဟေရှာယသည်ဆုတောင်း၍၊ ကောင်းကင်ဘုံသို့ ဟစ်ခေါ်သဖြင့်၊ 21ထာဝရဘုရားစေလွှတ်တော်မူသော ကောင်းကင်တမန်သည်၊ အာရှုရိရှင်ဘုရင်တပ်၌ ခွန်အားကြီးသောသူရဲများ၊ တပ်မှူး၊ စစ်ကဲများအပေါင်းတို့ကို သုတ်သင်ပယ်ရှင်းလေ၏။ ရှင်ဘုရင်သည် မျက်နှာပျက်လျက်၊ မိမိပြည်သို့ပြန်သွား၏။ မိမိဘုရား၏ဗိမာန်သို့ရောက်သောအခါ၊ မိမိသားရင်းတို့သည် ဓားနှင့်သတ်ကြ၏။ 22ထိုသို့ထာဝရဘုရားသည် ဟေဇကိနှင့် ယေရုရှလင်မြို့သားတို့ကို၊ အာရှုရိရှင်ဘုရင်လက်မှလည်းကောင်း၊ အခြားသောရန်သူလက်မှလည်းကောင်း ကယ်လွှတ်၍၊ အရပ်ရပ်၌ စောင့်မတော်မူ၏။ 23အများသောသူတို့သည် ယေရုရှလင်မြို့သို့ ထာဝရဘုရားအဖို့ ပူဇော်သကာကိုလည်းကောင်း၊ ယုဒရှင်ဘုရင်ဟေဇကိထံသို့ လက်ဆောင်ပဏ္ဏာကိုလည်းကောင်း ဆောင်ခဲ့ကြသဖြင့်၊ ဟေဇကိသည် ထိုကာလမှစ၍ ခပ်သိမ်းသောလူမျိုး ရှေ့မှာဘုန်းကြီးတော်မူ၏။

ဟေဇကိဖျားနာခြင်း

(၄ ရာ၊ ၂၀:၁-၁၁၊ ဟေရှာ၊ ၃၈:၁-၂၂)

24ထိုကာလအခါ ဟေဇကိမင်းသည် သေနာစွဲ၍ ထာဝရဘုရားအား ဆုတောင်းသဖြင့်၊ ဗျာဒိတ်တော်နှင့် ထူးဆန်းသောတန်ခိုးတော်ကို ခံရ၏။ 25သို့ရာတွင် ဟေဇကိသည် မိမိခံရသောကျေးဇူးတော်နှင့် အထိုက်အလျောက်မကျင့်၊ ထောင်လွှားသောစိတ်ရှိ၏။ ထိုကြောင့် သူ၌လည်းကောင်း၊ ယုဒပြည်နှင့် ယေရုရှလင်မြို့၌လည်းကောင်း၊ အမျက်တော်ထွက်လေ၏။ 26သို့ရာတွင် ဟေဇကိသည် မိမိစိတ်ထောင်လွှားသော အပြစ်ကြောင့်၊ ယေရုရှလင်မြို့သားတို့နှင့်တကွ ကိုယ်တိုင်ကိုယ်ကို နှိမ့်ချသောကြောင့်၊ လက်ထက်တော်ကာလတွင်၊ ထာဝရဘုရား၏ အမျက်တော်မသက်ရောက်။

ဟေဇကိ၏ကြွယ်ဝခြင်းနှင့်ဂုဏ်အသရေ

(၄ ရာ၊ ၂၀:၁၂-၁၉၊ ဟေရှာ၊ ၃၉:၁-၈)

27ဟေဇကိသည် များစွာသော စည်းစိမ်ဥစ္စာ ဂုဏ်အသရေရှိ၏။ ရွှေ၊ ငွေ၊ ကျောက်မြတ်၊ နံ့သာမျိုး၊ ဒိုင်းလွှား၊ နှမြောဖွယ်သော တန်ဆာ သိုထားရာဘဏ္ဍာတိုက်များကို တည်လေ၏။ 28စပါးကျီများ၊ ဆီ၊ စပျစ်ရည်သိုထားရာ တိုက်များ၊ တိရစ္ဆာန်မျိုး တင်းကုပ်များ၊ သိုးခြံများကိုလည်း လုပ်လေ၏။ 29ကိုယ်အဖို့ မြို့တို့ကိုတည်၍၊ များစွာသော သိုးနွားတို့ကိုလည်း ဆည်းပူးလေ၏။ ဘုရားသခင်သည် များစွာသောဥစ္စာကို ပေးသနားတော်မူ၏။ 30ထိုမှတစ်ပါး၊ ဟေဇကိသည် ဂိဟုန်အထက်ချောင်းရေကို ပိတ်၍၊ ဒါဝိဒ်မြို့အနောက်သို့ တည့်တည့် စီးစေ၏။ ထိုသို့ ဟေဇကိသည် ပြုလေရာရာ၌ အကြံထမြောက်၏။

31သို့ရာတွင်၊ နိုင်ငံတော်၌ ဖြစ်သောအံ့ဖွယ်သောအမှုကို မေးမြန်းစေခြင်းငှာ၊ ဗာဗုလုန်မင်းတို့သည် သံတမန်ကို စေလွှတ်သောအမှုမှာ၊ ဟေဇကိမင်း၏သဘောကို အကုန်အစင်သိခြင်းငှာ၊ ဘုရားသခင်သည် စုံစမ်း၍အလွတ်ထားတော်မူ၏။

ဟေဇကိ၏နန်းသက်ကုန်ဆုံးခြင်း

( ၄ရာ၊ ၂၀:၂၀-၂၁)

32ဟေဇကိပြုမူသော အမှုအရာကြွင်းလေသမျှတို့နှင့် ကျေးဇူးပြုခြင်းအရာသည် အာမုတ်သား ပရောဖက်ဟေရှာယ၏ ရူပါရုံကျမ်း၊ ယုဒရာဇဝင်၊ ဣသရေလရာဇဝင်၌ ရေးထားလျက်ရှိ၏။ 33ဟေဇကိသည် ဘိုးဘေးတို့နှင့်အိပ်ပျော်၍၊ ဒါဝိဒ်၏သားတော် မြေးတော်တို့ သင်္ချိုင်းတွင် အမြတ်ဆုံးသောသင်္ချိုင်း၌ သင်္ဂြိုဟ်ခြင်းကို ပြုလေ၏။ ယုဒပြည်သူ ယေရုရှလင်မြို့သားအပေါင်းတို့သည်၊ ဟေဇကိ အနိစ္စရောက်သောအခါ၊ ဂုဏ်အသရေတော်ကို ချီးမြှောက်ကြ၏။ သားတော်မနာရှေသည် ခမည်းတော်အရာ၌ နန်းထိုင်၏။

ရာဇဝင်ချုပ်ဒုတိယစောင် - ၃၂ (အနက်ဖွင့်)

၃၂:၁–၈ ၄ရာ ၁၇တွင် အာရှုရိသားများက ဣသရေလနိုင်ငံမြောက်ပိုင်းအား သိမ်းပိုက်ခေါ်ဆောင်သွားပုံရှင်းပြထား ပြီ။ ယခုတဖန် ယုဒနိုင်ငံကိုလည်း ခြိမ်းခြောက်လာကြပြန်သည်။ ဟေဇကိမင်းသည် အကြမ်းပတမ်းလူမိုက်နည်းဖြင့် ငြိမ်းချမ်းရေးမတည်ဆောက်လို။ ယခင်က သနာခရိပ်မင်းအား ဆက်ကြေးပေးခဲ့ပြီးဖြစ်သည်။ (၄ရာ ၁၈:၁၃-၂၆)။ယခုအခါ ထိုဆက်ကြေပေးခြင်းနှင့် မတင်းတိမ်ကြတော့ပါ။ ယုဒနိုင်ငံကို သိမ်းပိုက်ချင်သည်။

သနာခရိပ်က ယေရုရှလင်အားဝိုင်းရံသောအခါ ဟေဇကိမင်းသည် မြို့ပြင်သို့ ရေမထွက်အောင် ဖြတ်တောက်ထားသည်။ မြို့ရိုးကိုလည်း ပိုမိုခိုင်ခံ့အောင်မွမ်းမံသည်။အာရှုရိရန်အား ကြောက်ရွံ့ခြင်း မရှိရန်၊ ဘုရားသခင်ထံ ဆုတောင်းအားပေးသည်။ ပြည်သူများကိုလည်း လက်တွေ့ကျကျတိုက်ပွဲဝင်နိုင်ရန် စစ်လက်နက် ပစ္စည်းများ ဝေငှထားသည်။

ထိုအကြောင်းကို G.Cambellက ဤသို့ဆိုသည်။

ဘုရားသခင်အား သစ္စာရှိသောအပေါ် တိုင်း တပါးသားများ ဤကဲ့သို့ ဝင်ရောက်ကျူးကျော်ခြင်းသည် ထူးခြားသော အဖြေစကားတော်ဖြစ်သည်။ ဤကျမ်းချက်ထက် အသေးစိတ်ကျသော အကြောင်းရင်းရှိမည်။ ၄ရာ၁၈:၇−၁၆ တွင် အဖြေရှာတွေ့ကောင်းတွေ့နိုင်သည်။ ဟေဇကိမင်း၏ ဖခင်ပြုခဲ့သော ထမ်းပိုးထမ်းခြင်း ဖြစ်နိုင်သည်။ သနာခရိပ်သည် စစ်အင်အား နိမ့်သော ဟေဇကိမင်းအား တကြိမ်ချိမ်းခြောက်ဘူးသည်။ ထိုစဉ်တွင် ဟေဇကိမင်းကထမ်းပိုးနှင့်အောင် ငွေကြေးပေးဆပ်ခဲ့သည်။ ယခုတဖန် ရာဇပလ္လင်ပြုတ်အောင် ခြိမ်းခြောက်နေပြန်ပြီ။ သနာခရိပ်၏ တောင်းဆိုချက်သည် လက်ခံနိုင်ဖွယ်ရာ မရှိ။ အကြွင်းမဲ့အညံ့ခံလက်နက်ချစေချင်သည်။ ထိုကြောင့် ဟေဇကိမင်းအကြပ်အတည်းအဆုံး စွန်ကာလဖြစ်သည်။ ယုံကြည်ခြင်းဖြင့် ခွန်သစ်အားသစ် ရယူတည်ဆောက်ရသည်။ ရန်သူများ သောက်သုံ:စရာမရှိအောင် ရေဖြတ်တောက်သည်။ ခံတပ်ပိုမိုခိုင်မာစေသည်။ စစ်ကစားသည်။ ပြည်သူများကို အားပေးသတ္တိ မွေးစေသည်။ လူမစွမ်းနိုင်သော အစွမ်းသတ္တိ ဘုရားသခင်ထံမှ ရရှိကြသည်။၂၇

၃၂:၉–၁၉ သနာခရိပ်သည် လာခိရှမြို့ကိုလည်း ဝိုင်းရံထားသည်။ ယေရှုရှလင်မြို့နှင့် လာခိရှမြို့သားများထံသို့ စိတ်ဓာတ်စစ်ဆင်ရေးဆင်နွဲသည်။ “ဟေဇကိမင်း ကိုးကွယ်သောဘုရားသည် အခြားဘုရားမထူးခြားနားပါ။ သနာခရိပ်မင်း၏ ဘိုးဘွားများစဉ်ဆက်မှစ၍ မနိုင်မပိုင်သောစစ်ပွဲမရှိ။ တိုက်တိုင်းအောင်ခဲ့သည်။ ဟေဇကိမင်းကို ယောင်မှား၍ မယုံကြည်ကြနှင့်။ လိမ္မာပါးနပ်စွာ စောစောစီးစီး အညံ့ခံကြလျှင် သက်သာရာရကြမည်” ဟုဝါဒဖြန့်သည်။ အပိုဒ်ငယ် ၁၂ သည် ဟေဇကိမင်း၏ ကြံကြံခံပုံစံဖြစ်သည်။ သို့သော် သနာခရိပ်မင်းမသိမနားလည်နိုင်သော အချက်(၂)ချက်ရှိသည်။ ပြည်သူများ၏ ဟေဇကိမင်းအပေါ် သစ္စာရှိပုံနှင့် ယေဟောဝါဘုရားသခင်အား ယုံကြည်ကိုးစားခြင်းဖြစ်သည်။

၃၂:၂၀–၂၃ ဟေဇကိမင်းနှင့် ပရောဖက်ဟေရှာယတို့၏ ဘဝဂ်ညံဆုတောင်းသံကို ဘုရားသခင်နားညောင်း၍ သနာခရိပ်၏ စစ်တပ်ကို စိတ်ဓာတ်ပျက်ပြားစေသည်။ ဘုရားသခင်က ကောင်းကင်တမန်စေလွှတ်၍ သနာခရိပ်၏ တပ်အားဖျက်ဆီးစေသဖြင့် အာရှုရိတို့မျက်နှာပန်းမလှ တပ်ခေါက်ရသည်။ သနာခရိပ်လည်း ဘုရားကျောင်းတွင် ရှိခိုးနေစဉ် သားနှစ်ယောက်၏ လုပ်ကြံခြင်းခံရသည်။

၃၂:၂၄–၂၆ ဟေဇကိမင်းသည် သနာခရိပ်မှ ဝိုင်းရံခြိမ်းခြောက်ခြင်းမပြုမှီ ဖျားနာခဲ့ပြီးနလံ ပြန်ထသည်။ အသဲအသန်ဖျားနာခဲ့စဉ် ဘုရားသခင်အားတမ်းတသည်။ အသက်ဆက်ပေးမည့်အကြောင်း နေနာရီကို နောက်ပြန်ဆုတ်ပေးခြင်းဖြင့် အံ့ဖွယ်အမှတ်အသား မြင်ခဲ့သည်။ ထိုကျေးဇူးကို တုံ့ပြန်ချီးမွမ်းခြင်း မပြုသောကြောင့် ဘုရားသခင် စိတ်ဆိုးသော်လည်း ဟေဇကိမင်း၏ အောက်ကျို့နှိမ့်ချမှုကို ထောက်၍ သူ့ဘဝတွင် အရေးယူအပြစ်ပေးခြင်းမပြု။

၃၂:၂၇–၃၀ ဟေဇကိမင်းသည် ချမ်းသာကြွယ်ဝပုံ ချီးမွမ်းခန်းဖြစ်သည်။ ဂိဟုန်အထက်ရေချောင်းကိုလည်း ဒါဝိဒ်မြို့က နောက်ဘက်သို့ ရေလွှဲဆည်လုပ်ပေးသဖြင့် စပါးဆန်ရေ စိုက်ပျိုးမြေ ပိုမိုဖြစ်ထွန်းစေသည်။ ရွှေမလို၊ ငွေမလို ၊ ရေသာလိုသော ဒါဝိဒ်မြို့အနောက်ဘက်သားများ စိုက်ပျိုးသီးနှံဖြစ်ထွန်း၍ စည်ပင်သာယာကြသည် (၄ရာ ၂:၂၀ တွင် အသေးစိတ်ရေးထားသည်)။

၃၂:၃၁ ဟေဇကိမင်းသို့ ဘုရားပေးလက်ဆောင်များကို ချီးမွမ်းကြရန် ဗာဗုလုန်သံတမန်များ ရောက်ရှိလာကြသည်။ အထူးသဖြင့် နေနှင့်လကို ကိုးကွယ်ရာမှ ဘုရားသခင်ကို စိတ်ဝင်စားကြသည်။ ဟေဇကိမင်းကလည်း မရောင်ရာဆိလူး၊ ရူးမိုက်စွာ၊ ဥစ္စာဘဏ္ဍာများ ကြွားဝါပြသလိုက်သဖြင့် သံတမန်တို့၏ သိချင်စရာများပြည့်စုံသွားသည်။

၃၂:၃၂–၃၃ ဟေဇကိမင်းလုပ်ဆောင်ချက်များကို ဟေရှာယကျမ်း၌ ပြည့်စုံစွာမှတ်တမ်းတင်ထားသည်။ ဟေဇကိမင်းကို မင်းခမ်းမင်းနားဖြင့် ယုဒဘုရင်များ သုဿန်တွင် သင်္ဂြိုလ်ကြ၍ သားတော်မနာရှေမင်းထီးနန်းဆက်ခံသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။