၄။ ယေရုရှလင်မြို့တွင် အမင်္ဂလာကျရောက်ခြင်း (၃:၁–၇)

(က) မနာခံခြင်း၊ တာဝန်မဲ့ခြင်း၊ မယုံကြည်ခြင်း၊ မခိုလှုံခြင်း (၃:၁–၂)

စင်စစ်ယေရုရှလင်မြို့သည် မိန်းမကဲ့သို့ဖြစ်သည်။ နာခံမှုမရှိ၊ ညစ်ညမ်းယုတ်ညံ့၊ မြည်တွန်တောက်တီး တတ်သည်။ နာခံမှုမရှိ၍ ယုံကြည်ခြင်းယုတ်လျော့ကာ ဘုရားသခင်ထံမှ ဝေးသထက်ဝေးကွာသွားကြသည်။

(ခ) မင်းဆိုးမင်းညစ်များနှင့် တရားသူကြီးဆိုးများ (၃:၃)

          ဣသရေလနှင့် ယုဒမင်းဆိုးမင်းညစ်များသည် သားကောင်ရှာဖွေနေသော ခြင်္သေ့များကဲ့သို့ ဟိန်းဟောက် ကြသည်။ အကျင့်ဆိုးယုတ်သည့် တရားသူကြီးများကလည်း ကိုက်ဖြတ်ဖဲ့စားဖို့ရန် ချောင်းမြောင်းနေသည့် ညနေစောင်း ဝံပုလွေငယ်များကဲ့သို့ လောဘရမက် သောင်းကျန်းနေကြသည်။

(ဂ) လျှပ်ပေါ်လော်လီသော ပရောဖက်များနှင့် ကြေးစားယဇ်ပုရောဟိတ်များ (၃:၄)

ပရောဖက်များသည် သစ္စာမရှိ၊ ယဇ်ပုရောဟိတ်များက မဖွယ်မရာပြုကြသည်။ ထိုအကြောင်းကို Feinberg က ဤသို့ထောက်ပြသည်။

ဤဆာလံကျမ်းငယ်ထဲတွင် ဤအပိုဒ်ငယ် (၄)၌သာ ယဇ်ပုရောဟိတ်များကို ရှုတ်ချရေးသားထားကြောင်း တွေ့ရသည်။ ဝတ်ပြုခြင်းထုံးနည်း၌ မထီမဲ့မြင်ပြုသဖြင့် ကြီးလေးသောပြစ်မှုကို ရှိကြသည်။ သူတို့ အသက်တာ၌၎င်း၊ လေးနက်တည်ကြည်မှုမရှိ။ လျှပ်ပေါ်လောလီသည်။ သူတို့ကိုယ်တိုင်က ဘုရားသခင် ကို သစ္စာမရှိကြသဖြင့် တပည့်သားမြေးများကလည်း တရားသီလမရှိနိုင်ကြ။ မစင်ကြယ်သောအရာတို့ ဖြင့် သန့်ရှင်းရာဌာနတော်ကို ညစ်ညမ်းစေကြသည်။ လူထုကို ဟောပြောသွန်သင်သည့်အခါ လာဘ်လာဘ မျှော်ကိုး၍ ပညတ်တရားကို မိမိလိုရာဆွဲ ပုံဖျက်သွန်သင်ကြသောကြောင့် ပညတ်တရား၏ ရည်ရွယ်ချက် နှင့် ဦးတည်ချက်မှာ လွဲချော်သွားကြပြီ။၆

(ဃ) သခင်ဘုရားမျက်မှောက်တော်၌ တရားစီရင်ခြင်း။ (၃:၅–၇)

ထိုအပြစ်ဒုစရိုက်ဆိုးသွမ်း၍ ပျက်စီးနေကြသော်လည်း ဘုရားသခင်သည် ထိုသူများအလယ်တွင် ဖြောင့် မတ်စွာ စီရင်တော်မူသည်။ အခြားလူမျိုးများကို အပြစ်ဒဏ်စီရင်ပေးသည်မှာ ယုဒလူမျိုးအား လေးစားကြစေ လိုသည်။ သို့သော် လူများသည် ပျက်စီးပြီး ပျက်စီးနေကြသည်။

(၅) သစ္စာရှိသော ရွေးနှုတ်ခံများအတွက် နှစ်သိမ့်မှုသတင်းစကား (၃:၈–၂၀)

(က) ဆိုးညစ်သော တပါးအမျိုးသားများ ပျက်စီးခြင်း (၃:၈)

ဘုရားသခင်က သဝန်တိုမှုမီးလျှံ၇ အားဖြင့် ခပ်သိမ်းသော ရန်သူများအပေါ် လောင်တိုက်သွင်းဖျက်စီး မည့်ကာလတိုင်အောင် အားမလျော့ကြဘဲ လက်ချိုးစောင့်မျှော်နေကြရန် မိမိအားသစ္စာရှိသော ရွေးနှုတ်ခံယုဒလူ များကို နှစ်သိမ့်စကားပြောသည်။

(ခ) ကြွင်းကျန်သော တိုင်းနိုင်ငံသားများ အသက်တာပြောင်းလဲကြခြင်း (၃:၉)

ဤအပိုဒ်(၉)၏ ဆိုလိုရင်းမှာ ပြောဆိုဖို့ရန်ဘာသာစကားအတွက်မဟုတ်ပါ။ ရုပ်တုကိုးကွယ်မှုအတွက် ဖတ်ရွတ်ခြင်းမရှိသော နှုတ်လျှာသန့်ရှင်းလျက် ယေဟောဝါဘုရားအား တညီတညွတ်တည်းချီးမွမ်းကိုးကွယ်ခြင်း ကို ဆိုလိုသည်။ လူမျိုးအပေါင်းသည် ထာဝရဘုရားကိုတညီတညွတ်တည်း ဝတ်ပြုအမှုဆောင်ကြမည်။

(ဂ) ကွဲလွင့်သော ဣသရေလလူမျိုးများ ပြန်လည်ပေါင်းစည်းသင့်မြတ်ခြင်း (၃:၁၀–၁၃)

အနှစ်တစ်ထောင် အုပ်စိုးခြင်းကာလနေ့ရက်တွင် အစိပ်စိပ်အမွှာမွှာ ယုဒလူမျိုးသည် ထာဝရဘုရားသခင် ကို ကိုးကွယ်ရန် ရောက်ရှိလာကြမည်။ မာနထောင်လွှားသော ယုဒလူတို့၏ စိတ်သဘောကို ချိုးနှိမ်ထားသော ကြောင့် ရွေးနှုတ်ခံ ကြွင်းကျန်သောယုဒလူများသည် နှိမ့်ချကျိုးနွံကြသည်။ သိမ်မွေ့ကြသည်။ ဘုရားသခင် နာမတော်မြတ်၌ ဖြောင့်မတ်စင်ကြယ်စွာ အသက်ရှင်ကြသည်။

(ဃ) ခရစ်တော်ဘုရား ဒုတိယအကြိမ်ကြွလာခြင်း (၃:၁၄–၁၇)

အပိုဒ်ငယ် ၁၄-၂၀၌ ဣသရေလတို့ ပြန်လည်စုစည်းမိခြင်းအတွက် ယေဟောဝါဘုရားအား ချီးမွမ်းသီဆို ခြင်းအကြောင်း ဖြစ်သည်။ ဘုရားရှင်၏မိမိလူမျိုးတော်အပေါ်၌ ထားရှိသော မေတ္တာတော် ကယ်နှုတ်တော်မူသည့် ဘုန်းတန်ခိုးတော်ကို ချီးမွမ်းဖွဲ့ဆို ပွဲခံကြသည်။ ဇိအုန်သမီးများက ကြွေးကြော်အော်ဟစ် ပျော်ရွှင်ကခုန်ကြမည်။

(င) ဘုရားသခင်၏လူများအပေါ် ကတိတော်ပြည့်စုံခြင်း (၃:၁၈–၂၀)

          မတရားသူများအပေါ် အပြစ်စီရင်ခြင်း ပြီးဆုံးသောအခါ ဘုရားသခင်ရွေးနှုတ်ထားသူများအပေါ် ကတိ တော်ပြည့်စုံမည့်အကြောင်းဖြင့် ပရောဖက်ပြုချက်ကို အဆုံးသတ်ထားသည်။ ကြေကွဲဝမ်းနည်းခြင်းနှင့် မျက်ရည်    များကို မေ့ပစ်ပြီး၊ အသင်းတော်၌စုဝေးကြရမည်။ နှင်ထုတ်ခြင်းခံရသောသူများ သင်းဖွဲ့ကြမည်။ အရှက် ကွဲခြင်းခံရရာ ပြည်အရပ်ရပ်တို့တွင် ချီးမွမ်းခြင်း ဂုဏ်အသရေပေးမည်။

မှတ်စု

          ၁(နိဒါန်း) KJV ကျမ်းမူ ၁:၁တွင်ပါရှိသော ဟိဇကိ Hizkiahသည် မူရင်းဟေဗြဲကျမ်းရှိ ဟေဇကိ Hezekiah နှင့်အတူတူဖြစ်သည်။

၂(နိဒါန်း) J. B. Hewitt, Outline Studies in the Minor Prophets. p.45.

၃(နိဒါန်း) Ibid.p.44.

၄(၁:၁၄-၁၈) Charles Lee Feinberg. Habakkuk, Zephaniah, Haggai, Malachi, p.50.

၅(၂:၁၂) Ibid, p.59.

၆(၃:၄) Ibid, p.64.

၇(၃:၈) ဟေဗြဲဘာသာဖြင့် ရေးထားသော မူရင်းကျမ်း ၃:၈ကျမ်းပိုဒ်တခုတည်းတွင်သာလျှင် ဟေဗြဲဗျည်း အပြည့်အစုံ ပါရှိသည်။