Zephaniah -1 -

ဇေဖနိအနာဂတ္တိကျမ်း - ၁

1ယုဒရှင်ဘုရင်အာမုန်သား ယောရှိမင်းလက်ထက်၊ ဟိဇကိ၊ အာမရိ၊ ဂေဒလိတို့မှ ဆင်းသက်သော ကုရှိ၏သား ဇေဖနိသို့ ရောက်လာသော ထာဝရဘုရား၏နှုတ်ကပတ်တော်ဟူမူကား၊

တရားစီရင်ရာနေ့

2ပြည်တစ်ပြည်လုံး၌ ရှိလေသမျှတို့ကို အကုန်အစင် ငါသုတ်သင်ပယ်ရှင်းမည်ဟု ထာဝရဘုရား မိန့်တော်မူ၏။ 3လူနှင့် တိရစ္ဆာန်တို့ကို ပယ်ရှင်းမည်။ မိုးကောင်းကင်ငှက်နှင့် ပင်လယ်ငါးတို့ကိုလည်းကောင်း၊ အဓမ္မလူတို့နှင့်တကွ ပြစ်မှားစရာအကြောင်းတို့ကိုလည်းကောင်း ငါပယ်ရှင်းမည်။ မြေတစ်ပြင်လုံး၌ရှိသော လူသတ္တဝါတို့ကိုလည်း ငါပယ်ရှင်းမည်ဟု ထာဝရဘုရား မိန့်တော်မူ၏။ 4ယုဒပြည်သူ၊ ယေရုရှလင်မြို့သားအပေါင်းတို့ကို ငါတိုက်၍၊ ဤအရပ်၌ ကျန်ကြွင်းသော ဗာလဘုရား၏တပည့်တို့နှင့် ယဇ်ပုရောဟိတ် အမျိုးမျိုးတို့ကိုလည်းကောင်း၊ 5ကောင်းကင်တန်ဆာများကို အိမ်မိုးပေါ်မှာ ကိုးကွယ်သောသူ၊ ထာဝရဘုရားနှင့် မာလခံဘုရားကိုတိုင်တည်လျက် ကျိန်ဆိုကိုးကွယ်သော သူတို့ကိုလည်းကောင်း၊ 6ထာဝရဘုရား၏ နောက်တော်သို့မလိုက်၊ ဆုတ်သွားသောသူ၊ ထာဝရဘုရားကို မရှာဖွေ၊ မမေးမြန်းသော သူတို့ကိုလည်းကောင်း ငါပယ်ရှင်းမည်။

7အရှင်ထာဝရဘုရား၏ရှေ့တော်၌ ငြိမ်သက်စွာ နေကြလော့။ ထာဝရဘုရား၏နေ့နီးပြီ။ ထာဝရဘုရားသည် မိမိယဇ်ပွဲတော်ကို ပြင်ဆင်၍၊ ပွဲဝင်သောသူတို့ကို သန့်ရှင်းစေတော်မူပြီ။ 8ထာဝရဘုရား ပွဲခံတော်မူသောနေ့၌ မင်းများ၊ ဆွေတော်မျိုးတော်များနှင့် ထူးခြားစွာဝတ်သောသူများ အပေါင်းတို့ကို ငါစစ်ကြောမည်။ 9သူတစ်ပါး၏ အိမ်တံခါးခုံကို ကျော်၍ အနိုင်အထက်ပြုခြင်း၊ လှည့်စားခြင်းအားဖြင့်ရသော ဥစ္စာနှင့် မိမိသခင်၏ အိမ်ကို ပြည့်စေသောသူ အပေါင်းတို့ကိုလည်း ထိုနေ့၌ ငါစစ်ကြောမည်။ 10ထာဝရဘုရား မိန့်တော်မူသည်ကား၊ ထိုနေ့၌ ငါးတံခါးဝမှာ အော်ဟစ်သံကိုလည်းကောင်း၊ ဒုတိယမြို့၌ ငိုကြွေးမြည်တမ်းသံကိုလည်းကောင်း၊ တောင်ရိုး၌ ပြင်းစွာ ချိုးဖျက်သံကိုလည်းကောင်း ကြားရ၏။ 11မတ္တေရှအရပ်သားတို့၊ ငိုကြွေးမြည်တမ်းကြလော့။ ကုန်သည်အပေါင်းတို့သည် ပြတ်ကြပြီ။ ငွေကိုဆောင်သောသူ အပေါင်းတို့သည် ဆုံးကြပြီ။ 12ထိုကာလ၌ ငါသည် မီးခွက်ကိုကိုင်၍ ယေရုရှလင်မြို့ကို စစ်ကြောမည်။ ထာဝရဘုရားသည် ကျေးဇူးကိုလည်းမပြု၊ အပြစ်ကိုလည်း မပေးဟု အောက်မေ့လျက်၊ မိမိတို့ အနည်အဖတ်ပေါ်၌ နေရာကျသော သူတို့ကို ငါစစ်ကြောမည်။ 13ထိုသူတို့၏ဥစ္စာကို သူတစ်ပါးလုယူ၍၊ သူတို့၏ နေရာသည် လူဆိတ်ညံလျက် ရှိလိမ့်မည်။ အိမ်ကိုဆောက်သော်လည်း မနေရကြ။ စပျစ်ဥယျာဉ်ကို စိုက်သော်လည်း စပျစ်ရည်ကို မသောက်ရကြ။

ထာဝရဘုရား၏နေ့ကြီး

14ထာဝရဘုရား၏နေ့ကြီးနီးပြီ။ နီးပြီ။ အလျင်အမြန်လာ၏။ ထာဝရဘုရား၏နေ့သတင်းသည် နား၌ ခါး၏။ ထိုနေ့၌ သူရဲသည် အော်ဟစ်လိမ့်မည်။ 15ထိုနေ့သည် အမျက်ထွက်သောနေ့၊ ဆင်းရဲပူပန်ခြင်းကို ခံရသောနေ့၊ သုတ်သင်ပယ်ရှင်း ဖျက်ဆီးရာနေ့၊ အလင်းကွယ်၍ မှောင်မိုက်သောနေ့၊ မိုးအုံ့၍ ထူထပ်သောမှောင်မိုက်ဖုံးလွှမ်းသောနေ့၊ 16ခိုင်ခံ့သောမြို့၊ မြင့်သောရဲတိုက်တို့တစ်ဖက်၌ တံပိုးမှုတ်၍ ကြွေးကြော်ရာနေ့ ဖြစ်၏။ 17သူတို့သည် ထာဝရဘုရားကို ပြစ်မှားသောကြောင့်၊ သူတို့ကို ငါညှဉ်းဆဲသဖြင့် မျက်စိမမြင်သော သူကဲ့သို့ သွားကြလိမ့်မည်။ သူတို့အသွေးကို မြေမှုန့်ကဲ့သို့သွန်း၍ အသားကိုလည်း မစင်ကဲ့သို့ မှတ်ကြလိမ့်မည်။ 18ထာဝရဘုရား အမျက်ထွက်တော်မူသောနေ့၌ သူတို့ရွှေငွေသည် သူတို့ကို မကယ်တင်နိုင်ရာ။ ဒေါသအမျက်တော်မီးသည် တစ်ပြည်လုံးကို လောင်လိမ့်မည်။ ပြည်သူပြည်သားအပေါင်းတို့ကို အလျင်အမြန်စီရင်၍ အကုန်အစင် သုတ်သင်ပယ်ရှင်းတော်မူလိမ့်မည်။

ဇေဖနိအနာဂတ္တိကျမ်း - ၁ (အနက်ဖွင့်)

၁။ အပြစ်စီရင်ရန် ဘုရားသခင်၏သဘောထား ဆုံးဖြတ်ချက် (အခန်း ၁)

(က) ကမ္ဘာမြေတဝှမ်းလုံးတွင် (၁:၁–၃)

ပရောဖက်များကို အဘအမည်နှင့် ရံဖန်ရံခါ အဖိုးအမည်အထိ ဖော်ပြလေ့ရှိသည်မှာ ယုဒလူတို့သည် မျိုးရိုးစဉ်လာကိုအလေးထားကြသောကြောင့် ဖြစ်သည်။ ယနေ့ခေတ်ကာလတွင် မိကောင်းဖခင်သားသမီးဟု ပြောကြသလိုဖြစ်သည်။ ဤကျမ်းပိုဒ်တွင် ဇေဖနိကို ကုရှိ၏သား ဖြစ်ကြောင်းမျှသာမက ရှေးဘိုးဘေးစဉ်ဆက် (၄)ဆက်ထိ ဖော်ပြရာ ယုဒမင်းမြတ် ဟေဇကိအားဖြင့် အမျိုးမှန်ကြောင်း သိစေသည်။

ဤအခန်းတွင် ကမ္ဘာမြေတပြင်လုံး ဖျက်ဆီးပစ်မည်။ အထူးသဖြင့် ယုဒပြည်နှင့်ယေရုရှလင်မြို့အား လွင်တီးခေါင်ဖြစ်စေမည်ဟု ပရောဖက်ပြုထားသည်။ အကြွင်းမချန် သုတ်သင်မည်ဟုဆိုသည်။

(ခ) ရုပ်တု၊ ဆင်းတုကိုးကွယ်သောကြောင့် ယုဒပြည်နှင့် ယေရုရှလင်မြို့ကိုလည်းစီရင်မည် (၁:၄–၆)

ရုပ်တုဆင်းတုဖြစ်သော အမ္မုန်တို့၏ဘုရားမိလကောမ၊ ဗာလဘုရားနှင့် ကောင်းကင်တန်ဆာ (ကြယ်တာရာများ)ကို ကိုးကွယ်ကြသော အပြစ်ဒုစရိုက်ကြောင့် ယုဒပြည်သားများသည် အပြစ်စီရင်ဆုံးမခြင်း ခံရမည်။

(ဂ) ပူဇော်သက္ကာပြုခြင်းနှင့် ဘုရားသခင်၏နေ့ရက် (၁:၇–၁၃)

(၁) အာဂန္တုများ – ယုဒရန်သူများ (၁:၇)

ဘုရားသခင်သည် ယဇ်ပူဇော်ပွဲပြင်ဆင်နေပြီ။ ယုဒလူများမှာ ယဇ်ကောင်ဖြစ်၍၊ ဗာဗုလုန်သားများမှာ ဧည့်သည်အာဂန္တုများဖြစ်သည်။

(၂) ယဇ်ကောင် – ဆိုးညစ်သောယုဒလူမျိုး (၁:၈-၁၃)

ရုပ်တုဆင်းတုကိုးကွယ်ခြင်း သူတပါးအား အကြမ်းဖက်ခြင်းနှင့် လှည့်စားရယူခြင်း အပြစ်များကြောင့် ယုဒလူမျိုးကို ဘုရားသခင်က အပြစ်စီရင်မည်။ ထိုနေ့ရက်တွင် ကျူးကျော်သူတို့က သတ်ဖြတ် လုယက်ကြသဖြင့် ငါးတံခါးဝမှာ အော်ငြီးငိုသံကို၎င်း၊ ဒုတိယမြို့၌ ငိုကြွေးြည်တမ်းသံကို၎င်း၊ တောင်ရိုး၌ ပြင်းစွာချိုးဖျက် သံကို၎င်း ကြားရကြလိမ့်မည်။

(ဃ) သခင်ဘုရားနေ့ရက်၏ ကြောက်မက်ဖွယ်အချင်းအရာ (၁:၁၄–၁၈)

သခင်ဘုရားနေ့ရက်အကြောင်းကို ဤကျမ်းပိုဒ်တွင် ပီပြင်စွာပုံဖော်ထားသည်။ လူသားတို့၏ အကျင့်စရိုက်ဆိုးညစ်မှုများကြောင့် သူတို့အပေါ်တွင် အထူးသဖြင့် ယုဒလူမျိုးများပေါ်တွင် ဘုရားသခင်၏အမျက် ဒေါသကျရောက်မည်။ စစ်မက်ဖြစ်ပွားခြင်း၊ ကြောင့်ကျစိုးရိမ်သောကဖိစီးခြင်း၊ သတ်ဖြတ်ခြင်းများဖြစ်ပွားမည်။ လက်တင်ဂန္တဝင် ဓမ္မတေးသီချင်းတစ်ပုဒ်သည် ထိုအကြောင်းပါ အခန်းငယ် ၁၅-၁၆အား အခြေပြုဖွဲ့ဆိုထားသည်။

၁၂၅၀ ခုတွင် ဆယ်လာနိုမြို့မှ သောမတ်စ် Thomas of Celanoဆိုသူက အပိုဒ်ငယ် ၁၅ကို အခြေခံ၍ “အမျက်ဒေါသသင့်ရာ ထိုနေ့ရက်“ဟူ၍ ဓမ္မတေးတစ်ပုဒ်ကို သီကျူးခဲ့သည်။ ထိုနေ့ရက်တွင် အမျက် ဒေါသ၊ ဒုက္ခဆင်းရဲစိုးရိမ်သောက၊ အထီးကျန်ဆိတ်ငြိမ်မှု၊ အချည်းနှီးသက်သက် (အထီးကျန် ဆိတ်ငြိမ်ခြင်းနှင့် အချည်းနှီ:သက်သက်ကို ဟေဗြဲဘာသာစကား၌ Shoah and umeshoah ဟုဆိုရာ အသံထွက်ဆင်တူနေခြင်းမှာ အလုံးစုံပျက်သုဉ်းမှု၏နိမိတ်ပုံဆောင်နေသည်) မှောင်မိုက်ကျခြင်း၊ ဝေဝါး ခြင်း၊ မှုန်မှိုင်းခြင်း၊ မြူခိုးထူထပ်ခြင်း၊ တံပိုးခရာမှုတ်ခြင်း၊ မြို့ရိုးပြအိုးတို့မှ မြို့တော်အား ကာကွယ်ကြဖို့ တပ်လှန့်သတိပေးသံများ သောသောညံအောင် ကြားရမည်။၄

ဘုရားသခင်သည် မိမိလူများကို ချစ်တော်မူသောကြောင့် သဝန်တိုသဖြင့် တုပြိုင်ဘက်ယှဉ်အန်တုလာသူ များအား ဆုံးမအရေးယူမည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။